စာရှုသူများအမေး . . .

သမ္မာကျမ်းစာပါ သာယာအေးချမ်းတဲ့ဥယျာဉ် ပရဒိသုက ဘယ်မှာရှိသလဲ

▪ မိမိကို ယုံကြည်ကြောင်း သတ္တိရှိရှိ ထုတ်ဖော်ပြောဆိုခဲ့တဲ့ နှက်တိုင်ပေါ်က လူဆိုးတစ်ယောက်ကို ယေရှု ဒီလိုကတိပေးခဲ့တယ်– “သင်သည် ငါနှင့်အတူ ပရဒိသု၌ ရှိလိမ့်မည်။” (လုကာ ၂၃:၄၃) အဲဒီလူဆိုး ဘယ်နေရာမှာ ရှိနေမလဲ။ ပရဒိသုက ကောင်းကင်မှာလား၊ မြေကြီးပေါ်မှာလား၊ လူတွေ တရားစီရင်ခံရဖို့ စောင့်နေတဲ့ နေရာတစ်နေရာမှာလား။

တစ်ချိန်က ကျွန်ုပ်တို့ရဲ့ ဘိုးဘေးတွေဟာ သာယာအေးချမ်းတဲ့ဥယျာဉ် ပရဒိသုမှာ နေထိုင်ခဲ့ကြပါတယ်။ “ထာဝရအရှင် ဘုရားသခင်သည်လည်း အရှေ့မျက်နှာ ဧဒင်အရပ်၌ ဥယျာဉ်ကိုစိုက်ပျိုးပြီးလျှင် ဖန်ဆင်းတော်မူသောလူကို ထိုဥယျာဉ်၌ နေရာချတော်မူ၏။ . . . ထိုအခါ ထာဝရအရှင်ဘုရားသခင်သည် လူကိုယူ၍ ဧဒင်ဥယျာဉ်ကို ပြုစုစောင့်နေစေခြင်းငှာ ထားတော်မူ၏။” (ကမ္ဘာဦး ၂:၈၊ ၁၅) “ဥယျာဉ်” ဆိုတဲ့စကားလုံးကို ဂရိစကားနဲ့ပြောရင် ပရဒေစော့စ်ဖြစ်ပြီး အင်္ဂလိပ်လို “ပါရာဒိုက်စ်၊” မြန်မာလို “ပရဒိသု” လို့ခေါ်ပါတယ်။

ဇနီးမောင်နှံတစ်စုံမှာ သားသမီးတွေ အများကြီးရလာတဲ့အခါ နေအိမ်ကို တိုးချဲ့ရသလို ကျွန်ုပ်တို့ရဲ့ ကနဦးမိဘနှစ်ပါးဖြစ်တဲ့ အာဒံနဲ့ဧဝတို့ကလည်း လူ့မိသားစု ကြီးထွားလာတာနဲ့အမျှ ဧဒင်ဥယျာဉ်ရဲ့နယ်နိမိတ်ကို တိုးချဲ့ရမှာဖြစ်တယ်။ ဘုရားသခင်က “မြေကြီးကိုပြည့်စေ၍ နိုင်ကြလော့” လို့ သူတို့ကို မိန့်မှာခဲ့တယ်။—ကမ္ဘာဦး ၁:၂၈။

ဒါကြောင့် ကျွန်ုပ်တို့ဖန်ဆင်းရှင်ရဲ့ ရည်ရွယ်ချက်က လူသားတွေဟာ ဒီကမ္ဘာမြေကြီးပေါ်က သာယာအေးချမ်းတဲ့ဥယျာဉ် ပရဒိသုမှာ နေထိုင်ပြီး သားသမီးတွေ မွေးဖွားဖို့ဖြစ်တယ်။ လူသားတွေဟာ ဒီကမ္ဘာပေါ် အမြဲနေထိုင်သွားရမှာဖြစ်လို့ သင်္ချိုင်းတွေ မလိုအပ်ဘူး။ ကမ္ဘာမြေကြီးဟာ လူသားထုရဲ့ ထာဝရနေအိမ်ဖြစ်လာမှာ။ ကျွန်ုပ်တို့နေထိုင်ရာ ကမ္ဘာဂြိုဟ်ရဲ့ သဘာဝအလှအပတွေက ဘယ်လောက်နှစ်သက်စရာ ကောင်းလိုက်သလဲဆိုတာ အထူးပြောဖို့မလိုပါဘူး။ ကျွန်ုပ်တို့လူသားတွေဟာ လှပတဲ့ ဒီကမ္ဘာမြေပေါ်နေထိုင်ဖို့ ဖန်ဆင်းခံရတာပါ။

ဘုရားသခင့်ရည်ရွယ်ချက်က  ပြောင်းလဲသွားပြီလား။ မပြောင်းလဲပါဘူး။ ဘာကြောင့်လဲဆိုတော့ ဘုရားသခင်က ဒီလိုအာမခံထားလို့ပါ– ‘ထိုအတူ ငါ၏နှုတ်မြွက်စကားသည် ဖြစ်လိမ့်မည်။ အကျိုးမရှိဘဲ ငါ့ထံသို့မပြန်ရ။ ငါ့အလိုကို ပြည့်စုံစေမည်။’ (ဟေရှာယ ၅၅:၁၁) “မြေကြီးကိုပြုပြင်ဖန်ဆင်း၍ အမြဲတည်စေတော်မူသောအရှင်” ဟာ မြေကြီးကို “အချည်းနှီးဖန်ဆင်း” တာမဟုတ်ဘဲ “သတ္တဝါနေစရာဖို့ ဖန်ဆင်း” ထားကြောင်း လူကိုဖန်ဆင်းပြီး အနှစ် ၃,၀၀၀ ကုန်လွန်ပြီးတဲ့နောက်မှာတောင် သမ္မာကျမ်းစာမှာ ဖော်ပြထားပါတယ်။ (ဟေရှာယ ၄၅:၁၈) ဘုရားသခင့်အလိုတော်က မပြောင်းလဲသွားပါဘူး။ ကမ္ဘာမြေကြီးဟာ သာယာအေးချမ်းတဲ့ဥယျာဉ် ပရဒိသု ဖြစ်ကိုဖြစ်လာမှာပါ။

စိတ်ဝင်စားစရာက ဒီပရဒိသုနဲ့ပတ်သက်တဲ့ ကျမ်းချက်အတော်များများမှာ ကမ္ဘာမြေပေါ် အသက်ရှင်ခြင်းအကြောင်းကိုပဲ ဖော်ပြထားတာဖြစ်တယ်။ ဥပမာ၊ ဟေရှာယပရောဖက်ပြုချက်တစ်ခုမှာ ဒီလိုဖော်ပြထားတယ်– “ထိုသူတို့သည် ကိုယ်ဆောက်သောအိမ်၌ နေကြလိမ့်မည်။ ကိုယ်စိုက်သောစပျစ်ဥယျာဉ်အသီးကို စားကြလိမ့်မည်။” (ဟေရှာယ ၆၅:၂၁) အိမ်တွေကို ဘယ်မှာဆောက်ပြီး စပျစ်ခြံတွေကို ဘယ်မှာစိုက်ပျိုးကြသလဲ။ သစ်သီးဝလံတွေကို ဘယ်နေရာမှာ စားသုံးသလဲ။ ဒီကမ္ဘာမြေကြီးပေါ်မှာပဲပေါ့။ ကျမ်းစောင်တစ်စောင်ကလည်း ဒီလိုရှင်းရှင်းလင်းလင်း ဖော်ပြပါတယ်– “ဖြောင့်မတ်သောသူတို့သည် ပြည်တော် [“ကမ္ဘာမြေကြီး၊” ကဘ] ၌နေ၍ စုံလင်သောသူတို့သည် နေရာကျကြလိမ့်မည်။”—သု. ၂:၂၁။

ယေရှုလည်း  မြေကြီးပရဒိသုအကြောင်း  ပြောခဲ့ပါတယ်။ ကောင်းကင်ပရဒိသုအကြောင်းလည်း ကိုယ်တော်ပြောခဲ့သေးတယ်။ ဒါပေမဲ့ အဲဒါက ရွေးချယ်ထားတဲ့ လူအနည်းငယ်အတွက်ပါပဲ။ (လုကာ ၁၂:၃၂) အဲဒီလူနည်းစုဟာ သူတို့သေဆုံးပြီးရင် ကောင်းကင်ပရဒိသုမှာ အသက်ပြန်ရှင်လာပြီး ခရစ်တော်နဲ့အတူ မြေကြီးပရဒိသုကို အုပ်ချုပ်ကြမှာဖြစ်တယ်။ (ဗျာ. ၅:၁၀; ၁၄:၁-၃) ကောင်းကင်မှာ အုပ်ချုပ်ကြမယ့်သူတွေဟာ မြေကြီးပရဒိသုကို ကောင်းကောင်းအုပ်ချုပ်ပြီး ဘုရားသခင့်စံနှုန်းတွေနဲ့အညီ ထိန်းသိမ်းစောင့်ရှောက်သွားမှာဖြစ်ပါတယ်။

ဒါက ကမ္ဘာမြေကြီးအတွက် ဘုရားသခင့်အလိုတော်ဖြစ်တယ်ဆိုတာ ယေရှုသိထားတယ်။ တကယ်ဆိုရင် ယေရှုဟာ ဧဒင်ဥယျာဉ်ကို ဖန်ဆင်းချိန်က ခမည်းတော်ယေဟောဝါနဲ့အတူ ကောင်းကင်မှာ ရှိခဲ့ပါတယ်။ ကနေ့ ယုံကြည်ခြင်းတင်ပြသူအားလုံးဟာ အနာဂတ်မြေကြီးပရဒိသုမှာ အသက်ရှင်ခွင့်ရကြပါလိမ့်မယ်။ (ယောဟန် ၃:၁၆) အဲလိုလူတွေကို ယေရှုက “ငါနှင့်အတူ ပရဒိသု၌ ရှိလိမ့်မည်” လို့ကတိပေးပါတယ်။—လုကာ ၂၃:၄၃။

[Credit Line on page 25]

© FORGET Patrick/SAGAPHOTO.COM/Alamy