“သူတို့က အမှန်တရားကို ကျွန်တော်ကိုယ်တိုင် ရှာဖွေဖို့ အားပေးခဲ့တယ်”

အတိတ်–

ကျွန်တော့်ကို ဒိုမီနီကန် ပြည်သူ့သမ္မတနိုင်ငံ၊ စန်တို ဒိုမင်ဂိုမြို့မှာ မွေးဖွားခဲ့ပါတယ်။ သားသမီးလေးယောက်ထဲမှာ ကျွန်တော်က အထွေးဆုံးပါ။ မိဘတွေက ပညာတတ်တွေဖြစ်တဲ့အတွက် သားသမီးတွေကိုလည်း လူတော်လူကောင်းတွေအဖြစ် ကြီးပြင်းလာစေချင်ပါတယ်။ ကျွန်တော့်ကိုမမွေးခင် လေးနှစ်တုန်းက မိဘတွေဟာ မော်မန်ခရစ်ယာန်သာသနာပြုတွေနဲ့ တွေ့ဆုံခဲ့ပါတယ်။ သပ်သပ်ရပ်ရပ် ဝတ်စားဖြီးလိမ်းထားတဲ့ သူတို့ကို မိဘတွေ သဘောကျသွားပြီး မော်မန်အသင်းသားဖြစ်ဖို့ ဆုံးဖြတ်လိုက်တယ်။ ဒီလိုနဲ့ ဒိုမီနီကန် ပြည်သူ့သမ္မတနိုင်ငံမှာ ပထမဆုံးမော်မန်အသင်းသားတွေ ဖြစ်လာကြတဲ့သူတွေထဲမှာ ကျွန်တော်တို့မိသားစုလည်း ပါတယ်။

ကျွန်တော်အရွယ်ရောက်လာတော့ မော်မန်အသင်းရဲ့ လူမှုရေးလှုပ်ရှားမှုတွေမှာ ပါဝင်ခဲ့ပါတယ်။ အဲဒီအသင်းက မိသားစုဘဝနဲ့ ကိုယ်ကျင့်တရားစံနှုန်းတွေကို အဓိကထားတဲ့အတွက် ကျွန်တော် လေးစားတယ်။ မော်မန်အသင်းသားတစ်ယောက် ဖြစ်ရတာကိုလည်း ဂုဏ်ယူမိတယ်။ ဒါကြောင့် မော်မန်သာသနာပြုတစ်ယောက်ဖြစ်ဖို့ ပန်းတိုင်ထားခဲ့တယ်။

အသက် ၁၈ နှစ်ရောက်တဲ့အခါ ကျွန်တော် တက္ကသိုလ်ကောင်းကောင်း တက်နိုင်အောင် မိသားစုလိုက် အမေရိကန်နိုင်ငံကို ပြောင်းသွားကြတယ်။ အဲဒီကိုရောက်ပြီး နောက်တစ်နှစ်အကြာမှာ ဖလော်ရီဒါပြည်နယ်မှာနေထိုင်တဲ့ ကျွန်တော်တို့ဆီကို ယေဟောဝါသက်သေခရစ်ယာန်တွေဖြစ်တဲ့ ဒေါ်လေးနဲ့သူ့ခင်ပွန်းတို့ အလည်လာကြတယ်။ ကျမ်းစာအခြေပြု စည်းဝေးကြီးတစ်ခုကို တက်ရောက်ဖို့လည်း ကျွန်တော်တို့ကို ဖိတ်ခေါ်ခဲ့တယ်။ စည်းဝေးကြီးမှာ လူတိုင်းက ကျမ်းစာဖွင့်ပြီး မှတ်စုတွေ ယူနေကြတာကို ကျွန်တော် အရမ်းသဘောကျသွားတယ်။ ဒါနဲ့ ကျွန်တော်လည်း ဘော်လ်ပင်နဲ့စာရွက်တောင်းပြီး သူတို့လို လိုက်မှတ်နေတော့တယ်။

ကျွန်တော်က ခရစ်ယာန်သာသနာပြုတစ်ဦး ဖြစ်ချင်တာကို ဒေါ်လေးနဲ့သူ့ခင်ပွန်းက သိထားတဲ့အတွက် စည်းဝေးကြီးပြီးတဲ့နောက် ကျွန်တော့်ကို ကျမ်းစာသင်ပေးမယ်လို့ ပြောတယ်။ အဲဒါက ကောင်းတဲ့ အကြံဉာဏ်ဖြစ်တယ်လို့ ကျွန်တော် ယူဆလိုက်တယ်။ ဘာကြောင့်လဲဆိုတော့ အဲဒီတုန်းက သမ္မာကျမ်းစာကို မော်မန်ကျမ်းလောက် အကျွမ်းတဝင်မရှိလို့ပါပဲ။

သမ္မာကျမ်းစာက ကျွန်တော့်ဘဝပုံစံကို ပြောင်းလဲပေးခဲ့ပုံ–

ဒေါ်လေးတို့ဇနီးမောင်နှံက ကျွန်တော့်ကို ဖုန်းနဲ့ဆက်သွယ်ပြီး ကျမ်းစာဆွေးနွေးတဲ့အခါ ကျမ်းစာသွန်သင်ချက်တွေနဲ့ ကျွန်တော့်ယုံကြည်ချက်တွေကို နှိုင်းယှဉ်ကြည့်ဖို့ အမြဲ တိုက်တွန်းခဲ့တယ်။ သူတို့က အမှန်တရားကို ကျွန်တော်ကိုယ်တိုင် ရှာဖွေဖို့ အားပေးခဲ့တယ်။

မော်မန်ဘာသာနဲ့ပတ်သက်ပြီး ကျွန်တော်လက်ခံထားတဲ့ အချက်တွေ အများကြီးရှိနေပေမဲ့ အဲဒီအချက်တွေက သမ္မာကျမ်းစာနဲ့ ကိုက်ညီမှု ရှိမရှိဆိုတာကိုတော့ ကျွန်တော် အသေအချာ မသိဘူး။ ယေဟောဝါသက်သေတွေ ထုတ်ဝေတဲ့ ၁၉၉၅၊ နိုဝင်ဘာ ၈ ရက်ထုတ် နိုးလော့! မဂ္ဂဇင်းကို ကျွန်တော့်ဆီ ဒေါ်လေး ပို့ပေးခဲ့တယ်။ အဲဒီမဂ္ဂဇင်းထဲမှာ မော်မန်ယုံကြည်ချက်အကြောင်းပါတဲ့ ဆောင်းပါးတချို့ကို ဖတ်လိုက်ရတယ်။ အဲဒီအခါကျမှ မော်မန်သွန်သင်ချက် အတော်များများကို ကျွန်တော် မသိသေးပါလားဆိုပြီး အံ့ဩသွားတယ်။ ဒါနဲ့ အဲဒီအချက်အလက်တွေ မှန်မမှန်သိချင်လို့ တရားဝင် မော်မန်ဝက်ဘ်ဆိုက်ထဲကို ဝင်ပြီး ရှာဖွေလေ့လာကြည့်တယ်။ ယူတာပြည်နယ်မှာရှိတဲ့ မော်မန်ပြတိုက်တွေဆီကို သွားလည်ပတ်တဲ့အခါ အဲဒီအချက်အလက်တွေက မှန်ကန်နေတယ်ဆိုတာ ပိုပြီးခိုင်လုံသွားတယ်။

မော်မန်ကျမ်းနဲ့ သမ္မာကျမ်းစာက အတူတူပဲလို့ ကျွန်တော် အမြဲတမ်း ယုံကြည်နေခဲ့တာ။ ဒါပေမဲ့ သမ္မာကျမ်းစာကို အသေအချာ ဖတ်ကြည့်လိုက်တော့ မော်မန်သွန်သင်ချက်တွေနဲ့ ကျမ်းစာသွန်သင်ချက်တွေက တစ်ခြားစီပဲဆိုတာကို သတိပြုမိသွားတယ်။

မော်မန်တွေ သွန်သင်ပေးတဲ့ အယူဝါဒပိုင်းဆိုင်ရာ ကွာခြားမှုတွေအပြင် အမျိုးသားရေးစိတ်ဓာတ်ကို ဖော်ကျူးတဲ့ ယူဆချက်တွေကြောင့် ကျွန်တော် စိတ်အနှောင့်အယှက်ဖြစ်လာတယ်။ ဥပမာ၊ ဧဒင်ဥယျာဉ်ဟာ အမေရိကန်နိုင်ငံ၊ မစ်ဇိုရီပြည်နယ်၊ ဂျက်ဆင် ကောင်တီမြို့မှာ ရှိတယ်။ ဘုရားသခင့်နိုင်ငံတော်က အမေရိကန်အစိုးရကို အသုံးပြုပြီး ကမ္ဘာကြီးကို အုပ်ချုပ်လိမ့်မယ်လို့ မော်မန်ဘာသာရေးခေါင်းဆောင်တွေက ဆိုတယ်။

ဒါဆိုရင် ကျွန်တော့်ရဲ့ဇာတိမြေဖြစ်တဲ့ ဒိုမီနီကန် ပြည်သူ့သမ္မတနိုင်ငံအပါအဝင် တခြားနိုင်ငံတွေမှာရော ဘာတွေ ဖြစ်လာမလဲဆိုတာကို ကျွန်တော် သိချင်ခဲ့တယ်။ မော်မန်ခရစ်ယာန်သာသနာပြုအဖြစ် လေ့ကျင့်မှုခံယူနေတဲ့ လူငယ်တစ်ဦး ကျွန်တော့်ဆီ ဖုန်းဆက်လာတဲ့ တစ်ညနေခင်းမှာ အဲဒီအကြောင်းကို ကျွန်တော်တို့ ပြောဖြစ်ခဲ့ကြတယ်။ မော်မန်ဘာသာဝင်တွေရှိတဲ့ နိုင်ငံအချင်းချင်း စစ်ဖြစ်တဲ့အခါ ကိုယ့်နိုင်ငံအတွက် တိုက်ပွဲဝင်မလားလို့ သူ့ကို ကျွန်တော် ပွင့်ပွင့်လင်းလင်း မေးလိုက်တယ်။ သူက တိုက်မှာပေါ့လို့ ဖြေလိုက်တော့ အရမ်းအံ့သြသွားတယ်။ ဒါနဲ့ ကျွန်တော်ယုံကြည်နေတဲ့ မော်မန်သွန်သင်ချက်တွေကို အလေးအနက်လေ့လာပြီး တာဝန်ရှိ မော်မန်ဘာသာရေးခေါင်းဆောင်တွေနဲ့ ဆွေးနွေးခဲ့တယ်။ သူတို့ရဲ့အဖြေတွေထဲမှာ ကျွန်တော်နားမလည်နိုင်တဲ့ နက်နဲရာတွေ ပါဝင်နေတယ်၊ အလင်းက တဖြည်းဖြည်း ထွန်းလင်းလာသလို တစ်နေ့ကျရင် အဲဒီနက်နဲရာတွေကို နားလည်လာပါလိမ့်မယ်လို့ ကျွန်တော့်ကို ပြောကြတယ်။

သူတို့ရဲ့ရှင်းပြချက်တွေကြောင့် ကျွန်တော် စိတ်ပျက်လက်ပျက်ဖြစ်ပြီး ကိုယ့်ကိုယ်ကိုယ်နဲ့ မော်မန်သာသနာပြုဖြစ်ချင်ရတဲ့ အကြောင်းရင်းကို အသေအချာ ပြန်ဆန်းစစ်လိုက်တယ်။ မော်မန်သာသနာပြုဖြစ်ချင်တဲ့ အကြောင်းရင်းတစ်ခုက လူတွေကို ကူညီပေးချင်တဲ့ဆန္ဒကြောင့်ဆိုတာကိုတော့ ကျွန်တော် သိလိုက်ရတယ်။ နောက်အကြောင်းရင်းတစ်ခုကတော့ လူတွေရဲ့လေးစားမှုကို ခံယူချင်လို့ပါ။ ဒါပေမဲ့ ဘုရားသခင်အကြောင်းကိုတော့ ရေရေရာရာ မသိရှိပါဘူး။ အရင်တုန်းက သမ္မာကျမ်းစာကို ခဏခဏ ဖတ်ခဲ့ပေမဲ့ တန်ဖိုးထားရကောင်းမှန်း မသိခဲ့ဘူး။ ကမ္ဘာမြေ ဒါမှမဟုတ် လူသားတွေနဲ့ပတ်သက်တဲ့ ဘုရားသခင့်ရည်ရွယ်ချက်တွေကို ဘာမှမသိခဲ့ဘူး။

အကျိုးကျေးဇူးရရှိခဲ့ပုံ–

ယေဟောဝါသက်သေတွေနဲ့ ကျမ်းစာလေ့လာနေတဲ့အချိန်မှာ ဘုရားသခင့်နာမည်က ဘာလဲ၊ လူသေရင် ဘာဖြစ်သွားမလဲ၊ ဘုရားသခင့်ရည်ရွယ်ချက် ပြည့်စုံရေးမှာ ယေရှုရဲ့ အခန်းကဏ္ဍက ဘာလဲဆိုတာတွေကို ကျွန်တော် သိလာခဲ့ရတယ်။ နောက်ဆုံးတော့ သမ္မာကျမ်းစာနဲ့ အကျွမ်းတဝင်ရှိလာပြီး တခြားသူတွေကိုလည်း ကျွန်တော်သိရှိထားရာတွေ ပြောပြနေပါပြီ။ ဘုရားသခင် တည်ရှိတယ်ဆိုတာ အရင်က သိထားပေမဲ့ အခုမှပဲ ကိုယ်တော့်ကို ကျွန်တော့်ရဲ့ အကောင်းဆုံးမိတ်ဆွေအဖြစ် ဆုတောင်းနိုင်ပါတော့တယ်။ ၂၀၀၄၊ ဇူလိုင် ၁၂ ရက်နေ့မှာ ယေဟောဝါသက်သေအဖြစ် ကျွန်တော် နှစ်ခြင်းခံလိုက်တယ်။ ခြောက်လအကြာမှာတော့ အမှုဆောင်ခြင်းလုပ်ငန်းမှာ အချိန်ပြည့်ပါဝင်ခဲ့ပါတယ်။

နယူးယောက်မြို့၊ ဘရွတ်ကလင်မှာရှိတဲ့ ယေဟောဝါသက်သေတွေရဲ့ ကမ္ဘာ့ဌာနချုပ်မှာ ငါးနှစ်ကြာ အမှုဆောင်ခဲ့ပါတယ်။ ကမ္ဘာတစ်ဝန်းက သန်းနဲ့ချီတဲ့သူတွေကို အကျိုးပြုတဲ့ သမ္မာကျမ်းစာနဲ့ ကျမ်းစာအခြေပြုစာပေတွေ ထုတ်လုပ်ရေးမှာ ကျွန်တော် အစွမ်းကုန် ပါဝင်ကူညီပေးနိုင်ခဲ့တယ်။ အခုတော့ ဘုရားသခင်အကြောင်းကို တခြားသူတွေ သိရှိလာအောင် ဆက်ကူညီပေးနေပါတယ်။