ကိုယ်ကျင့်တရားနဲ့ပတ်သက်ပြီး ဘာသာရေးအဖွဲ့အစည်းကို ယုံကြည်စိတ်ချနိုင်သလား

ကျန်းမာရေးဌာနမှာ အလုပ်လုပ်တဲ့ စယ်လ်ဗီယာက ဒီလိုပြောပြတယ်– “ဘာသာတရား ကိုင်းရှိုင်းပါတယ်ဆိုတဲ့ သူတွေနဲ့အတူတူ ကျွန်မ ကျောင်းတက်ခဲ့တယ်။ ဒါပေမဲ့ သူတို့ဟာ စာမေးပွဲမှာ စာခိုးချပြီး မူးယစ်ဆေးဝါးလည်း သုံးစွဲကြတယ်။ တကယ်တော့ ဘာသာတရားဟာ သူတို့ဘဝအတွက် အသုံးမဝင်သလိုပဲ။”

လိုင်နယ်လ်ဆိုတဲ့ အမျိုးသားတစ်ယောက်ကလည်း ဒီလိုပြောပြတယ်– “အလုပ်ဖော်တွေဟာ လိမ်ပြောကြတယ်၊ တကယ်မဖျားဘဲနဲ့ ဖျားနေတယ်ဆိုပြီး ခွင့်တင်ကြတယ်။ ကုန်ပစ္စည်းပြခန်းမှာ မရောင်းဘဲ ဟန်ပြအဖြစ်ထားတဲ့ ပရိဘောဂတွေလိုပဲ ဘာသာတရားကလည်း သူတို့အတွက် ဟန်ပြပဲဖြစ်ပြီး အသုံးမပြုကြဘူး။”

ဘာသာရေးအဖွဲ့အစည်းက လူအများစုရဲ့ ကိုယ်ကျင့်တရားကို ကောင်းမွန်အောင် မလုပ်ပေးနိုင်ပါဘူး။ ကနေ့ လူတော်တော်များများဟာ “ဘုရားတရား ဆည်းကပ်ဟန်ရှိသော်လည်း ထိုသို့ဆည်းကပ်ခြင်း၏အကျိုးကို ငြင်းပယ်” နေကြတယ်။ (၂ တိမောသေ ၃:၅) သူတို့ရဲ့ဘာသာရေးခေါင်းဆောင်တွေဟာ ကိုယ်ကျင့်တရားဘက်မှာ သူတို့ကိုယ်တိုင်လည်း စံနမူနာမပြကြဘူး။ အသင်းသားတွေကိုလည်း ကိုယ်ကျင့်တရားကောင်းဖို့ ကျမ်းစာနဲ့ မသွန်သင်ပေးကြဘူး။ ဒါကြောင့် လူတွေ ဘာပဲလုပ်လုပ် ဘုရားသခင် စိတ်ဝင်စားမှာမဟုတ်ဘူးလို့ လူတော်တော်များများ ယုံကြည်ကြတာ အံ့ဩစရာမဟုတ်ပါဘူး။

ကျမ်းစာသွန်သင်ရာ

ဘုရားသခင်မှာ ခံစားချက်ရှိတဲ့အပြင် ကျွန်ုပ်တို့ရဲ့အပြုအမူတွေဟာ ဘုရားသခင်အတွက် အလွန်အရေးပါတယ်ဆိုပြီး သမ္မာကျမ်းစာမှာ ဖော်ပြထားပါတယ်။ ဘုရားသခင်ကို ရှေးခေတ်အစ္စရေးလူတွေ ပုန်ကန်တဲ့အခါ ကိုယ်တော် “စိတ်ထိခိုက်” ခဲ့တယ်။ (ဆာလံ ၇၈:၄၀၊ ကဘ) ဒါပေမဲ့ လူတစ်ဦးဟာ အကျင့်ဆိုးတွေကို စိတ်ရင်းမှန်နဲ့ ပြုပြင်ပြောင်းလဲတဲ့အခါ ဘုရားသခင် “ဝမ်းမြောက်” တယ်လို့ ကျမ်းစာမှာ ဖော်ပြထားတယ်။ (လုကာ ၁၅:၇) ကျွန်ုပ်တို့ကောင်းကင်ခမည်းတော်ရဲ့ အရည်အသွေးကောင်းတွေကို လူတစ်ဦး လေးမြတ်လာတဲ့အခါ ဘုရားသခင်ကို တဖြည်းဖြည်း ချစ်မြတ်နိုးလာတယ်။ အဲဒီအပြင် ဘုရားသခင် နှစ်သက်တဲ့အရာတွေကို နှစ်သက်ပြီး မုန်းတဲ့အရာတွေကို မုန်းတတ်လာတယ်။—အာမုတ် ၅:၁၅။

ယေဟောဝါသက်သေတွေ လုပ်ဆောင်ရာ

ယေဟောဝါသက်သေတွေဟာ “မိသားစုနှောင်ကြိုးခိုင်မြဲအောင်၊ ရိုးသားကြိုးစားတဲ့ နိုင်ငံသားဖြစ်အောင် လူတွေကို ကူညီပေးနေတယ်” လို့ အမေရိကန်နိုင်ငံ၊ ယူတာပြည်နယ်၊ ဆော့လ်လိတ်စီးတီးမြို့ထုတ် သတင်းစာတစ်စောင် (Deseret News) မှာ ဖော်ပြထားတယ်။ ဒီလိုလည်း ဆက်ဖော်ပြထားသေးတယ်– “ယေဟောဝါသက်သေတွေဟာ မြင့်မားတဲ့ ကိုယ်ကျင့်တရားစံနှုန်းကို လိုက်လျှောက်ကြတယ်။ ဆေးလိပ်သောက်တာ၊ အရက်အလွန်အကျွံသောက်တာ၊ မူးယစ်ဆေးဝါး တလွဲသုံးတာ၊ လိင်အကျင့်ယိုယွင်းတာ၊ လိင်တူဆက်ဆံတာစတဲ့ အကျင့်တွေဟာ ဘုရားသခင်နဲ့ သူတို့ရဲ့ဆက်ဆံရေးကို ထိခိုက်နိုင်တယ်ဆိုပြီး သူတို့ယုံကြည်ကြတယ်။”

ဘုရားသခင်ရဲ့ အရည်အသွေးကောင်းတွေကို သင်ယူသိရှိတဲ့အတွက် ယေဟောဝါသက်သေတွေ ဘယ်လိုအထောက်အကူရကြသလဲ။ ဆောင်းပါးအစမှာ ဖော်ပြထားတဲ့ စယ်လ်ဗီယာက ဒီလိုပြောပြတယ်– “ကျန်းမာရေးဌာနမှာ လိမ်လည်ပြောဆိုနေတာက ထမင်းစား ရေသောက်သလို ရိုးနေပြီ။ အများ မိုးခါးရေသောက်လို့ ကိုယ်ပါလိုက်သောက်မိနိုင်သလို သူတို့လို ကိုယ်ပါ လိမ်ပြောမိဖို့ လွယ်လွယ်လေးပါ။ လိမ်ပြောတာနဲ့ပတ်သက်ပြီး ယေဟောဝါaဘုရားသခင်ရဲ့ ခံစားချက်ကို သဘောပေါက်ထားတာက မှန်ရာကို လုပ်ဖို့အတွက် ကျွန်မကို အထောက်အကူပေးတယ်။ ကျွန်မကတော့ ပျော်နေပြီး စိတ်ငြိမ်သက်မှုရှိနေပါတယ်။” စယ်လ်ဗီယာဟာ သူ့ရဲ့ ဘာသာရေးယုံကြည်ချက်နဲ့အညီ ပြုမူနေထိုင်တဲ့အတွက် သူ့ဘဝ တိုးတက်ကောင်းမွန်လာတာလို့ ယုံကြည်တယ်။