ကျမ်းစာမေးခွန်းတွေရဲ့အဖြေ

ဘာရည်ရွယ်ချက်နဲ့ ခရစ်တော်ပြန်လာမှာလဲ

ယေရှုခရစ်က ကမ္ဘာပေါ် ပြန်လာမယ်လို့ ကတိပေးခဲ့တယ်။ အဲဒီကတိကို ကောင်းကင်မတက်ခင် အေဒီ ၃၃ မှာ ပေးခဲ့တာဖြစ်တယ်။ ယေရှုဟာ ခရီးဝေးကို ထွက်သွားပြီးနောက် ဘုရင်အဖြစ် ပြန်လာမယ့် မင်းသားနဲ့ သူ့ကိုယ်သူ နှိုင်းယှဉ်ခဲ့တယ်။ ဒါကြောင့် ယေရှု ပြန်လာရတဲ့ရည်ရွယ်ချက်က လူသားတွေကို အုပ်ချုပ်ဖို့ဖြစ်တယ်။—လုကာ ၁၉:၁၁၊ ၁၂ ကိုဖတ်ပါ။

ဘယ်လို ခန္ဓာကိုယ်မျိုးနဲ့ ခရစ်တော် ပြန်လာမှာလဲ။ ယေရှုဟာ သေပြီးတဲ့နောက် မမြင်နိုင်တဲ့ နာမ်ဝိညာဉ်ခန္ဓာကိုယ်နဲ့ အသက်ပြန်ရှင်ခဲ့တယ်။ (၁ ပေတရု ၃:၁၈) အဲဒီနောက် ကောင်းကင်ကို ပြန်သွားပြီး ယေဟောဝါဘုရားရဲ့ ညာဘက်မှာ ထိုင်စောင့်နေခဲ့တယ်။ (ဆာလံ ၁၁၀:၁) တော်တော်လေးကြာပြီးနောက် “အသက်ကြီးသောသူ” ဖြစ်တဲ့ ယေဟောဝါဘုရားက လူသားတွေကို အုပ်ချုပ်ဖို့ ယေရှုကို အာဏာအပ်နှင်းခဲ့တယ်။ ဒါကြောင့် ယေရှုဟာ လူတစ်ယောက်အဖြစ်မဟုတ်ဘဲ မမြင်ရတဲ့ နာမ်ဝိညာဉ်ခန္ဓာကိုယ်နဲ့ ဘုရင်အဖြစ် ပြန်လာမှာဖြစ်တယ်။—ဒံယေလ ၇:၁၃၊ ၁၄ ကိုဖတ်ပါ။

ယေရှုပြန်လာတဲ့အခါ ဘာတွေလုပ်မှာလဲ

မျက်မြင်မရတဲ့နည်းနဲ့ ကောင်းကင်တမန်တွေနဲ့အတူ ယေရှု ပြန်လာတဲ့အခါ လူသားတွေကို တရားစီရင်ပါလိမ့်မယ်။ လူဆိုးတွေကို ဖျက်ဆီးပြီး မိမိကို ဘုရင်အဖြစ် လက်ခံသူတွေကို ထာဝရအသက်ဆု ပေးမှာဖြစ်တယ်။—မဿဲ ၂၅:၃၁-၃၃၊ ၄၆ ကိုဖတ်ပါ။

ယေရှု ဘုရင်အဖြစ် အုပ်ချုပ်တဲ့အခါ ကမ္ဘာမြေကြီးကို သာယာလှပတဲ့ဥယျာဉ်အဖြစ် ပြောင်းလဲပေးမှာဖြစ်တယ်။ သေဆုံးသွားသူတွေလည်း သာယာလှပတဲ့ ကမ္ဘာမြေကြီးမှာ ပျော်ရွှင်စွာနေထိုင်နိုင်ဖို့ သူတို့ကို အသက်ပြန်ရှင်အောင် လုပ်ပေးမှာဖြစ်တယ်။—လုကာ ၂၃:၄၂၊ ၄၃ ကိုဖတ်ပါ။