သေဆုံးသွားသူတွေ အသက်ပြန်ရှင်လာမယ်ဆိုတဲ့ မျှော်လင့်ချက်

သေဆုံးသွားသူတွေ အသက်ပြန်ရှင်လာမယ်ဆိုတဲ့ ဘုရားပေးကတိကို သင် ယုံပါသလား။a သေဆုံးသွားတဲ့ ချစ်ရသူတွေနဲ့ ပြန်တွေ့ရမယ်ဆိုတဲ့ မျှော်လင့်ချက်က တကယ့်ကို စိတ်ကြည်နူးစရာပါ။ ဒါပေမဲ့ ဘုရားပေးကတိက တကယ်ဖြစ်လာမှာလား။ ဘုရားပေးကတိကို ယေရှုခရစ်ရဲ့ အရင်းနှီးဆုံး တပည့်တွေဖြစ်တဲ့ တမန်တော်တွေ ဘာကြောင့်ယုံကြည်ခဲ့သလဲဆိုတာ သုံးသပ်ကြည့်ရအောင်။

တမန်တော်တွေဟာ လူသေသွားရင် ပြန်အသက်ရှင်လာမယ်လို့ အခိုင်အမာ ယုံကြည်ခဲ့တယ်။ အနည်းဆုံး အကြောင်းရင်းနှစ်ရပ်ကြောင့် ယုံကြည်ခဲ့တာဖြစ်တယ်။ ပထမအကြောင်းရင်းက ယေရှုကိုယ်တိုင် သေပြီးတဲ့နောက် ပြန်အသက်ရှင်လာတာကို တမန်တော်တွေအပြင် “ညီအစ်ကိုငါးရာကျော်” တို့ တစ်ပြိုင်နက် တွေ့ခဲ့ကြတယ်။ (၁ ကောရိန္သု ၁၅:၆) ယေရှုအသက်ပြန်ရှင်ခဲ့တယ်ဆိုတာ သက်သေအထောက်အထား အများကြီးရှိတဲ့အပြင် လူများစွာကလည်း လက်ခံခဲ့ကြတယ်။ ဒီအကြောင်းကို ကျမ်းစာမှာပါတဲ့ ခရစ်ဝင်ကျမ်းလေးကျမ်းမှာ ဖော်ပြထားပါတယ်။—မဿဲ ၂၇:၆၂-၂၈:၂၀; မာကု ၁၆:၁-၈; လုကာ ၂၄:၁-၅၃; ယောဟန် ၂၀:၁-၂၁:၂၅။

ဒုတိယအကြောင်းရင်းက အနည်းဆုံး လူသုံးယောက်ကို အသက်ပြန်ရှင်အောင် ယေရှု လုပ်ပေးတာကို တမန်တော်တွေ မြင်ခဲ့တယ်။ ဒီအဖြစ်အပျက်တွေက နာဣနမြို့၊ ကပေရနောင်နဲ့ ဗေသနိရွာမှာ ဖြစ်ခဲ့တယ်။ (လုကာ ၇:၁၁-၁၇; ၈:၄၉-၅၆; ယောဟန် ၁၁:၁-၄၄) ယေရှုနောက်ဆုံး ထမြောက်ပေးတဲ့သူကတော့ ရှေ့ဆောင်းပါးမှာ ဖော်ပြခဲ့တဲ့အတိုင်း ကိုယ်တော်နဲ့ရင်းနှီးတဲ့ မိသားစုဝင်တစ်ယောက် ဖြစ်တယ်။ ဘာတွေဖြစ်ခဲ့သလဲဆိုတာကို ပြန်ကြည့်ရအောင်။

“ငါသည် ရှင်ပြန်ထမြောက်ခြင်းဖြစ်၏”

“သင်၏မောင်သည် ထမြောက် [အသက်ပြန်ရှင်] လိမ့်မည်” လို့ မာသကို ယေရှုပြောခဲ့တယ်။ ယေရှု ဒီစကားပြောနေချိန်မှာ မာသရဲ့မောင် လာဇရု သေဆုံးသွားတာ လေးရက်ရှိနေပါပြီ။ မာသက ယေရှုပြောချင်တဲ့ ဆိုလိုရင်းကို ချက်ချင်း နားမလည်ဘူး။ “သူသည် ထမြောက်လိမ့်မည်ကို ကျွန်မသိပါသည်” လို့ ပြန်ပြောလိုက်ပေမဲ့ အနာဂတ်တစ်ချိန်ချိန်မှာ အသက်ပြန်ရှင်လာမယ်လို့ မာသ ထင်နေတယ်။ ဒါကြောင့် ယေရှုက “ငါသည် ရှင်ပြန်ထမြောက်ခြင်းဖြစ်၏။ အသက်လည်းဖြစ်၏” လို့ပြောပြီး လာဇရုကို အသက်ပြန်ရှင်အောင် လုပ်ပေးလိုက်တဲ့အခါ မာသ ဘယ်လောက်အံ့သြသွားမလဲဆိုတာ မြင်ယောင်ကြည့်ပါ။—ယောဟန် ၁၁:၂၃-၂၅။

သေဆုံးသွားတဲ့လေးရက်အတွင်းမှာ လာဇရု ဘယ်ရောက်နေခဲ့တာလဲ။ ဒီလေးရက်အတွင်း တစ်နေရာရာမှာ အသက်ရှင်ခဲ့တယ်လို့ လာဇရု မပြောပါဘူး။ လာဇရုမှာ ကောင်းကင်ဘုံသွားနိုင်တဲ့ ဝိညာဉ်လည်း မရှိပါဘူး။ လာဇရုသာ ဘုရားရှိတဲ့ ကောင်းကင်ဘုံမှာ ပျော်ရွှင်နေမယ်ဆိုရင် အဲဒီကနေ ဆွဲချပြီး ကမ္ဘာပေါ် အသက်ပြန်ရှင်အောင် ယေရှု လုပ်ပေးမှာ မဟုတ်ပါဘူး။ ဒါဆို အဲဒီလေးရက်အတွင်းမှာ လာဇရု ဘယ်ရောက်နေတာလဲ။ သင်္ချိုင်းမှာ သူ အိပ်ပျော်နေတာပါ။—ဒေသနာ ၉:၅၊ ၁၀။

ယေရှုက သေသွားတာကို အိပ်ပျော်နေတာနဲ့ တင်စားပြီး အိပ်ပျော်သူကို နှိုးသလို သေတဲ့သူကို ပြန်ရှင်အောင် လုပ်ပေးမယ်လို့ ပြောခဲ့တာကို သတိရပါ။ ကျမ်းစာမှာ ခုလို ဖတ်ရတယ်– ‘“ငါတို့အဆွေ လာဇရုသည် အိပ်ပျော်ပြီ။ သို့သော်လည်း သူ့ကိုနှိုးရန် ငါသွားမည်” ဟုမိန့်တော်မူ၏။ ထိုအခါ တပည့်တော်တို့က “သခင်၊ သူသည် အိပ်ပျော်လျှင် သက်သာလာလိမ့်မည်” ဟုလျှောက်ကြ၏။ ယေရှုသည် လာဇရုသေဆုံးကြောင်းကို ဆိုလိုသော်လည်း ပကတိအိပ်ပျော်ခြင်းအကြောင်း မိန့်တော်မူသည်ဟု တပည့်တော်တို့ ထင်မှတ်ကြ၏။ ထို့ကြောင့် ယေရှုက “လာဇရု သေပြီ” ဟု ပွင့်လင်းစွာ မိန့်တော်မူ၏။’ (ယောဟန် ၁၁:၁၁-၁၄) ယေရှုက လာဇရုကို သူ့မိသားစုနဲ့ ပြန်ဆုံစည်းဖို့ အသက်ပြန်ရှင်အောင် လုပ်ပေးခဲ့တယ်။ အဲဒီအတွက် သူတို့မိသားစု ဘယ်လောက်တောင် ဝမ်းသာကြည်နူးလိုက်မလဲ။

ယေရှု ကမ္ဘာပေါ်မှာ ရှိနေတုန်းက သေဆုံးသွားသူတွေကို အသက်ပြန်ရှင်အောင် လုပ်ပေးခဲ့တာတွေဟာ အနာဂတ်မှာ ဘုရင်အနေနဲ့ ယေရှု လုပ်ပေးမယ့်အရာတွေရဲ့ ပုံရိပ်ဖြစ်ပါတယ်။b ကောင်းကင်ကနေ ကမ္ဘာကို ယေရှု အုပ်ချုပ်တဲ့အခါ သင်္ချိုင်းမှာ အိပ်ပျော်နေတဲ့ သေဆုံးသွားသူတွေကို အသက်ပြန်ရှင်အောင် လုပ်ပေးပါလိမ့်မယ်။ ဒါကြောင့်လည်း “ငါသည် ရှင်ပြန်ထမြောက်ခြင်းဖြစ်၏” လို့ ယေရှု ပြောခဲ့တာဖြစ်တယ်။ ကိုယ်ချစ်ရတဲ့သူတွေကို ပြန်တွေ့တဲ့အခါ ခံစားရမယ့် ဝမ်းသာပျော်ရွှင်မှုကို မြင်ယောင်ကြည့်ပါ။ အသက်ပြန်ရှင်လာကြသူတွေလည်း ဘယ်လောက်တောင် ဝမ်းသာပျော်ရွှင်လိုက်ကြမလဲဆိုတာ စဉ်းစားကြည့်ပါ။—လုကာ ၈:၅၆။

ထာဝစဉ်အသက်ရှင်ခွင့်ရမယ်ဆိုတဲ့ ယုံကြည်ခြင်း

မာသကို ယေရှု ဒီလိုပြောခဲ့တယ်– “ငါ့ကိုယုံကြည်ကြောင်း တင်ပြသောသူသည် သေလွန်သော်လည်း အသက်ပြန်ရှင်လိမ့်မည်။ အသက်ရှင်လျက် ငါ့ကိုယုံကြည်ကြောင်း တင်ပြသောသူတိုင်းသည်လည်း ဘယ်သောအခါမျှ သေရမည်မဟုတ်။” (ယောဟန် ၁၁:၂၅၊ ၂၆) ယေရှုအုပ်ချုပ်တဲ့ အနှစ်တစ်ထောင်အတွင်း အသက်ပြန်ရှင်လာမယ့်သူတွေဟာ ကိုယ်တော့်ကို ယုံကြည်နေသရွေ့ ထာဝစဉ်အသက်ရှင်ခွင့် ရရှိကြပါလိမ့်မယ်။

သေလွန်သူတွေ အသက်ပြန်ရှင်လာမယ့်အကြောင်း ပြောပြီးနောက်မှာ ယေရှုက “ဤစကားကို ယုံသလော” လို့ မာသကို ဆက်မေးခဲ့တယ်။ မာသကလည်း “ယုံပါ၏၊ သခင်။ ကိုယ်တော်သည် ဤလောကသို့ကြွလာရမည့် ဘုရားသခင်၏သားတော်၊ ခရစ်တော်ဖြစ်သည်ကို ကျွန်မယုံပါသည်” လို့ ပြန်ဖြေခဲ့တယ်။ (ယောဟန် ၁၁:၂၆၊ ၂၇) သေသွားတဲ့သူတွေ အသက်ပြန်ရှင်လာမယ်လို့ မာသ ယုံကြည်ခဲ့တယ်။ သင်ကော မာသလိုယုံကြည်ခြင်းမျိုး ရှိချင်ပါသလား။ ရှိချင်တယ်ဆိုရင် အရင်ဆုံး လူသားတွေအတွက် ဘုရားရဲ့ ရည်ရွယ်ချက်အကြောင်းကို လေ့လာသင်ယူရမယ်။ (ယောဟန် ၁၇:၃; ၁ တိမောသေ ၂:၄) လေ့လာသင်ယူမယ်ဆိုရင် သင်လည်း အဲဒီလိုယုံကြည်ခြင်းမျိုး ရှိလာမှာ ဖြစ်တယ်။ ဒီအကြောင်းအရာတွေနဲ့ပတ်သက်ပြီး သမ္မာကျမ်းစာမှာ ဖော်ပြထားရာတွေကို သိနိုင်ဖို့ ယေဟောဝါသက်သေတွေကို မေးကြည့်ပါ။ သူတို့က သေလွန်သူတွေ အသက်ပြန်ရှင်လာမယ်ဆိုတဲ့ အံ့သြကြည်နူးစရာကောင်းတဲ့ မျှော်လင့်ချက်အကြောင်း သင့်ကို ဝမ်းသာအားရ ပြောပြကြပါလိမ့်မယ်။