ဘယ်လို စတင်ဖတ်ရှုမလဲ

ကျမ်းစာကို စိတ်ဝင်တစား ဖတ်ရှုပြီး အဲဒီကနေ အကျိုးအပြည့်အဝရအောင် ဘယ်လိုလုပ်နိုင်မလဲ။ လူအများစုအတွက် အကျိုးရှိခဲ့တဲ့ အကြံပြုချက် ၅ ခုကို ကြည့်ရအောင်။

သင့်တော်တဲ့ဝန်းကျင်ကို ရွေးချယ်ပါ။ တိတ်ဆိတ်တဲ့ နေရာကို ရှာပါ။ အနှောင့်အယှက်မရှိမှဘဲ ဖတ်တဲ့အရာကို အာရုံစိုက်နိုင်မယ်။ အလင်းရောင်နဲ့ လေကောင်းလေသန့် ကောင်းကောင်းရတယ်ဆိုရင် ဖတ်ရှုရတာ ပိုအဆင်ပြေပါတယ်။

သဘောထားအမှန်ရှိပါ။ ကျမ်းစာဟာ ကောင်းကင်ဖခင်ဆီက ဖြစ်တာမို့ မိဘဆီကနေ သင်ယူဖို့ အသင့်ဖြစ်နေတဲ့ ကလေးတစ်ယောက်ရဲ့ သဘောထားမျိုး သင့်မှာရှိမယ်ဆိုရင် အကျိုးအများကြီး ရပါလိမ့်မယ်။ အပျက်သဘောထားတွေ၊ လက်ခံထားပြီးသားအစွဲတွေ ရှိနေရင်တော့ အဲဒါတွေကို ဘေးချိတ်လိုက်ပါ။ ဒါမှ သင့်ကို ဘုရားသခင် သွန်သင်ပေးနိုင်မယ်။—ဆာလံ ၂၅:၄။

မဖတ်ခင် ဆုတောင်းပါ။ ကျမ်းစာမှာ ဘုရားသခင်ရဲ့ အတွေးအခေါ်တွေပါတယ်။ ဒါကြောင့် အဲဒါကို နားလည်နိုင်ဖို့ ကိုယ်တော်ရဲ့ အကူအညီ လိုအပ်တယ်။ ဘုရားသခင်က “တောင်းသောသူတို့အား သန့်ရှင်းသော စွမ်းအားတော်ကို” ပေးမယ်လို့ ကတိပေးထားတယ်။ (လုကာ ၁၁:၁၃) သန့်ရှင်းသော စွမ်းအားတော်က ဘုရားသခင်ရဲ့ စဉ်းစားပုံကို နားလည်ဖို့ ကူညီပေးနိုင်တယ်။ အဲဒီနောက် “ဘုရားသခင်၏ နက်နဲရာတို့ကို” နားလည်လာနိုင်ဖို့ သင့်ရဲ့ စိတ်နှလုံးကို ဖွင့်ပေးပါလိမ့်မယ်။—၁ ကောရိန္သု ၂:၁၀။

နားလည်အောင်ဖတ်ပါ။ အကြောင်းအရာကို ပြီးရုံလောက်ပဲ ဖတ်တာမျိုး မလုပ်ပါနဲ့။ ဖတ်နေတဲ့အကြောင်းအရာကို အသေအချာ စဉ်းစားပါ။ ‘ငါဖတ်နေတဲ့ ပုဂ္ဂိုလ်မှာ ဘယ်အရည်အသွေးတွေ ရှိသလဲ။ အဲဒါကို ငါ့အသက်တာမှာ ဘယ်လိုကျင့်သုံးနိုင်မလဲ’ ဆိုပြီး ကိုယ့်ကိုယ်ကိုယ်မေးပါ။

တိကျတဲ့ပန်းတိုင်တွေ ထားပါ။ ကိုယ့်အသက်တာအတွက် အကျိုးပြုနိုင်တဲ့အချက်တွေကို သင်ယူမယ်ဆိုတဲ့ ပန်းတိုင်ထားပြီး ကျမ်းစာဖတ်မယ်ဆိုရင် အကျိုးအများကြီး ရနိုင်ပါတယ်။ ‘ဘုရားသခင်အကြောင်း ပိုသိအောင်လုပ်မယ်၊’ ‘ခင်ပွန်းကောင်း၊ ဇနီးကောင်းဖြစ်အောင် ဒါမှမဟုတ် ပိုကောင်းတဲ့ လူတစ်ယောက်ဖြစ်အောင်လုပ်မယ်’ စတဲ့ပန်းတိုင်တွေ ထားနိုင်ပါတယ်။ ပြီးတော့ အဲဒီပန်းတိုင်တွေ ပြည့်မီအောင် ကူညီပေးနိုင်တဲ့ ကျမ်းစာအချက်အလက်တွေကို ရွေးချယ်ဖတ်ပါ။a

ဒီအကြံပြုချက် ၅ ခုက သင့်ကို ကျမ်းစာစတင်ဖတ်ရှုဖို့ ကူညီပေးပါလိမ့်မယ်။ ဒါပေမဲ့ ကျမ်းစာဖတ်ရတာ ပိုစိတ်ဝင်စားစရာကောင်းအောင် ဘာတွေလုပ်နိုင်သေးသလဲ။ ဒီအကြောင်းကို နောက်ဆောင်းပါးမှာ ဖော်ပြထားပါတယ်။