ရှေးဟောင်းမြေအိုးပေါ်က ကျမ်းစာနာမည်
၂၀၁၂ ခုနှစ်မှာ တူးဖော်တွေ့ရှိခဲ့တဲ့၊ နှစ်ပေါင်း ၃,၀၀၀ ကျော်သက်တမ်းရှိတဲ့ အိုးခြမ်းကွဲတွေကို ရှေးဟောင်းသုတေသနပညာရှင်တွေ စိတ်ဝင်စားခဲ့ကြတယ်။ ဒီတွေ့ရှိမှုဟာ ဘာကြောင့် သိပ်ထူးခြားသလဲ။ အိုးခြမ်းကွဲတွေပေါ်မှာ ရေးထားတာတွေကြောင့်ပဲ။
ရှေးဟောင်း သုတေသနပညာရှင်တွေဟာ အိုးခြမ်းကွဲတွေကို ဆက်စပ်လိုက်တဲ့အခါ ရှေးဟောင်း ခါနာန်အက္ခရာကို အဓိပ္ပာယ်ဖော်နိုင်ခဲ့ကြတယ်။ “ဗေဒရဲ့ သား ဣရှဗာလ ဗန်” ဆိုပြီး ရေးထားတယ်။ ရှေးဟောင်းစာမူမှာ ဒီနာမည်ကို ဦးဆုံးအကြိမ် တွေ့ရှိခြင်းပဲ။
တကယ်တော့ ဣရှဗာလ နောက်တစ်ယောက်ကို ကျမ်းစာမှာ ဖော်ပြထားတယ်။ ဘုရင်ရှောလုရဲ့ သားတစ်ယောက် ဖြစ်တယ်။ (၅ ရာ. ၈:၃၃။ ၉:၃၉) တူးဖော်မှုမှာ ပါဝင်ခဲ့တဲ့ ပါမောက္ခ ယိုးဇက် ဂါဖင်ကယ် ဒီလိုပြောတယ်– “ဘုရင်ဒါဝိဒ်ခေတ်က ဣရှဗာလဆိုတဲ့နာမည် ကျမ်းစာမှာ ပါတာ၊ ရှေးဟောင်းသုတေသန မှတ်တမ်းမှာလည်း ပါတာဟာ စိတ်ဝင်စားစရာ ကောင်းတယ်။” အဲဒီနာမည်ဟာ အဲဒီခေတ်နဲ့ပဲ ဆိုင်တယ်လို့ တချို့ထင်ကြတယ်။ ကျမ်းစာမှာပါတဲ့ အသေးစိတ် အချက်အလက်တွေကို ရှေးဟောင်းသုတေသန အထောက်အထားတွေက ထောက်ခံတယ်။
ကျမ်းစာမှာ ရှောလုရဲ့သား ဣရှဗာလကို ဣရှဗောရှက်လို့လည်း ခေါ်တယ်။ “ဗာလ” ကို “ဗောရှက်” နဲ့ ဘာကြောင့် အစားထိုးထားသလဲ။ (၂ ရာ. ၂:၁၀) “ဣရှဗာလဆိုတဲ့ နာမည်ဟာ ခါနာန်တွေရဲ့ မုန်တိုင်းဘုရား ဗာလကို အမှတ်ရစေတဲ့အတွက် ဓမ္မရာဇဝင် ဒုတိယစောင်မှာ မသုံးထားတာ ဖြစ်တယ်။ ဒါပေမဲ့ ရာဇဝင်ချုပ် ပထမစောင်မှာတော့ မူလနာမည်ကို ထည့်သွင်းထားတယ်” လို့ ပညာရှင်တွေ ရှင်းပြတယ်။