ကိုယ့်ကိုယ်ကိုယ် တလိုတလား ပေးဆက်ကြသူများ​—တူရကီနိုင်ငံမှာ

ပထမရာစု ခရစ်ယာန်တွေဟာ လူများနိုင်သမျှ များများဆီ “နိုင်ငံတော် သတင်းကောင်း” ရောက်ဖို့ အကြီးအကျယ် ကြိုးစားအားထုတ်ခဲ့ကြတယ်။ (မ. ၂၄:၁၄) တချို့ဆိုရင် တိုင်းတစ်ပါးကိုတောင် သွားကြတယ်။ ဥပမာ၊ တမန်တော်ပေါလုဟာ သာသနာပြုခရီးစဉ်မှာ မျက်မှောက်ခေတ် တူရကီနိုင်ငံ တည်ရှိရာဒေသကို သွားပြီး ကျယ်ကျယ်ပြန့်ပြန့် ဟောပြောခဲ့တယ်။a အနှစ် ၂,၀၀၀ ခန့်အကြာ ၂၀၁၄ ခုနှစ်မှာ တူရကီနိုင်ငံမှာ နောက်တစ်ကြိမ် အထူးဟောပြောခြင်း ကင်ပိန်း ပြန်လုပ်ခဲ့တယ်။ ဘာကြောင့်လဲ။ ဘယ်သူတွေ ပါဝင်ခဲ့သလဲ။

“ဘာလုပ်နေကြတာလဲ”

တူရကီမှာ ကြေညာသူ ၂,၈၀၀ ကျော် ရှိပေမဲ့ နိုင်ငံလူဦးရေ ၇၉ သန်း ရှိတယ်။ ကြေညာသူတစ်ယောက်က လူ ၂၈,၀၀၀ ကို ဟောရမယ်။ ဒါကြောင့် ဒီနိုင်ငံသား အနည်းငယ်ကိုပဲ ဟောပြောနိုင်သေးတယ်။ အထူးဟောပြောခြင်းကင်ပိန်းရဲ့ ရည်ရွယ်ချက်က အချိန်တိုအတွင်း လူများနိုင်သမျှ များများကို ဟောပြောဖို့ပဲ။ တခြားနိုင်ငံတွေမှာ နေထိုင်တဲ့ တူရကီစကားပြော ညီအစ်ကို/မ ၅၅၀ လောက် တူရကီနိုင်ငံကို ရောက်လာပြီး ကင်ပိန်းကာလအတွင်း ဒေသခံကြေညာသူတွေနဲ့ လက်တွဲဟောပြောခဲ့ကြတယ်။ ဘာရလဒ် ရခဲ့သလဲ။

ကျယ်ကျယ်ပြန့်ပြန့် သက်သေခံနိုင်ခဲ့ကြတယ်။ အစ္စတန်ဘူလ်မြို့ အသင်းတော်တစ်ခုက စာရေးတယ်– “လူတွေ ကျွန်တော်တို့ကို တွေ့တဲ့အခါ ‘အထူးအစည်းအဝေး ရှိလို့လား။ နေရာတိုင်းမှာ ယေဟောဝါသက်သေတွေကို တွေ့နေရတယ်’ လို့ပြောကြတယ်။’’ အီဇမီယာမြို့ အသင်းတော်တစ်ခုက စာရေးတယ်– “တက္ကစီဂိတ်မှာ လုပ်တဲ့လူတစ်ယောက် ဒေသခံ အကြီးအကဲဆီ လာပြီး ‘ဘာလုပ်နေကြတာလဲ။ ခင်ဗျားတို့ရဲ့ လုပ်ငန်းကို တိုးချဲ့နေတာလား’ လို့မေးတယ်။” ကင်ပိန်းကို လူတွေ သတိထားမိကြတယ်။

တိုင်းတစ်ပါးက ရောက်လာသူတွေဟာ ဟောပြောခြင်းလုပ်ငန်းကြောင့် တကယ်ပျော်ခဲ့ကြတယ်။ ဒိန်းမတ်က စတီဖန် ပြောတယ်– “ယေဟောဝါအကြောင်း မကြားဖူးသူတွေကို နေ့တိုင်း ဟောပြောရတယ်။ ယေဟောဝါရဲ့ နာမည် လူတွေ သိအောင် လုပ်နေတယ်လို့ တကယ်ခံစားရတယ်။” ပြင်သစ်က ဇန်ဒေးဗစ် ရေးတယ်– “လမ်းတစ်လမ်းကို နာရီနဲ့ချီ ဟောရတယ်။ သိပ်ကောင်းတာပဲ။ လူအများစုက ယေဟောဝါသက်သေတွေကို မသိကြဘူး။ အိမ်တိုင်းလိုလိုမှာ စကားပြောလို့ရတယ်။ ဗီဒီယို ပြနိုင်တယ်။ စာပေတွေ ထားခဲ့နိုင်တယ်။”

ပါဝင်သူ ၅၅၀ ဟာ နှစ်ပတ်အတွင်းမှာပဲ စာပေ ၆၀,၀၀၀ လောက် ဝေငှနိုင်ခဲ့တယ်။ ကင်ပိန်းကြောင့် ကျယ်ကျယ်ပြန့်ပြန့် သက်သေခံနိုင်ခဲ့ကြတယ်။

အမှုဆောင်လုပ်ငန်းမှာ ပိုစိတ်ထက်သန်လာတယ်။ အထူးလှုပ်ရှားမှုက ဒေသခံ ညီအစ်ကိုတွေအပေါ် အကျိုးသက်ရောက်ခဲ့တယ်။ ညီအစ်ကိုများစွာဟာ အချိန်ပြည့်လုပ်ငန်းအကြောင်း စတင်စဉ်းစားလာကြတယ်။ တူရကီမှာ ကင်ပိန်းပြီးနောက် ၁၂ လအတွင်း မှန်မှန်ရှေ့ဆောင် အရေအတွက် ၂၄ ရာခိုင်နှုန်း တိုးတက်လာတယ်။

တိုင်းတစ်ပါးကလာတဲ့ ပါဝင်သူတွေလည်း နေရင်းတိုင်းပြည်ကို ပြန်သွားပြီးနောက်မှာတောင် ကင်ပိန်းကြောင့် ဆက်အကျိုးခံစားရကြောင်း ပြောပြကြတယ်။ ဂျာမနီက ဆီရင်း ပြောတယ်– “တူရကီက ညီအစ်ကိုတွေအတွက် အလွတ်သဘော ဟောပြောရတာ တအားလွယ်တယ်။ အလွတ်သဘော သက်သေခံရမှာ ကျွန်မ သိပ်ရှက်တယ်။ ဒါပေမဲ့ ဒီအထူးကင်ပိန်း၊ ဒေသခံ ညီအစ်ကိုတွေရဲ့ ပုံသက်သေ၊ ဆုတောင်းချက်တွေကြောင့် အရင်က မလုပ်နိုင်တာကို အခုလုပ်နိုင်ပြီ။ မြေအောက် ရထားဘူတာရုံတွေမှာတောင် ဟောပြောခဲ့တယ်။ ဝေစာတွေ ဝေခဲ့တယ်။ အခု အရင်လို မရှက်တော့ဘူး။”

ဂျာမနီက ဂျိုဟန်နပ် ပြောတယ်– “အမှုဆောင်လုပ်ငန်းကနေ သင်ခန်းစာတချို့ သင်ယူခဲ့ရတယ်။ တူရကီက ညီအစ်ကိုတွေဟာ လူများနိုင်သမျှ များများကို အမှန်တရားအကြောင်း တကယ် ဟောပြောချင်ကြတယ်။ အခွင့်အရေးရတိုင်း ဟောပြောကြတယ်။ ဂျာမနီကို ပြန်ရောက်ရင် အဲဒီအတိုင်း လုပ်ဖို့ ဆုံးဖြတ်ထားတယ်။ အခု အရင်ကထက် ပိုဟောပြောနေပြီ။”

ပြင်သစ်က ဇေးနက် ပြောတယ်– “ဒီကင်ပိန်းက ကျွန်မရဲ့ အမှုဆောင်လုပ်ငန်းအပေါ် အများကြီး အကျိုးသက်ရောက်တယ်။ ရဲစွမ်းသတ္တိ ပိုရှိဖို့၊ ယေဟောဝါကို ပိုအားကိုးဖို့ ကူညီပေးတယ်။”

ကြေညာသူတွေ ပိုခင်မင်ရင်းနှီးလာကြတယ်။ နိုင်ငံအသီးသီးက ရောက်လာတဲ့ ညီအစ်ကို/မတွေရဲ့ မေတ္တာနဲ့ စည်းလုံးမှုက မမေ့နိုင်စရာပါပဲ။ ဇန်ဒေးဗစ် ဒီလိုပြောတယ်– “ညီအစ်ကိုတွေရဲ့ ဧည့်ဝတ်ကျေပွန်မှုကို ကျွန်တော်တို့ ‘မြည်းစမ်း’ ခဲ့ကြတယ်။ ကျွန်တော်တို့ကို သူတို့ရဲ့ မိတ်ဆွေတွေ၊ မိသားစုဝင်တွေအဖြစ် လက်ခံကြတယ်။ အိမ်တံခါးတွေ ဖွင့်ထားကြတယ်။ ကျွန်တော်တို့ဟာ အပြည်ပြည်ဆိုင်ရာ ညီအစ်ကိုအသင်းအပင်းပါပဲ။ စာပေတွေမှာ အဲဒီအကြောင်း ဖတ်ဖူးပေမဲ့ ဒီတစ်ခါတော့ ကိုယ်တွေ့ပေါ့။ ယေဟောဝါသက်သေ ဖြစ်ရတာ အရင်ကထက် ပိုဂုဏ်ယူမိတယ်။ ဒီအခွင့်ထူးအတွက် ယေဟောဝါကို ကျေးဇူးတင်ပါတယ်။”

ပြင်သစ်က ကလဲယား ဒီလိုပြောတယ်– “ဒိန်းမတ်၊ ပြင်သစ်၊ ဂျာမနီ၊ တူရကီ ဘယ်နိုင်ငံကပဲ ဖြစ်ပါစေ ကျွန်မတို့က မိသားစုတစ်ခုတည်းပါပဲ။ ဘုရားသခင်က နယ်ခြားမျဉ်းတွေကို ခဲဖျက်ကြီးနဲ့ ဖျက်ပစ်လိုက်သလိုပဲ။”

ပြင်သစ်က စတက်ဖနီ ပြောတယ်– “ကျွန်မတို့ကို စည်းလုံးစေတာက ယဉ်ကျေးမှု၊ ဘာသာစကား မဟုတ်ဘဲ ယေဟောဝါကို ချစ်တဲ့မေတ္တာပဲဆိုတာ ဒီအထူးကင်ပိန်းက သင်ပေးတယ်။”

ရေရှည်အကျိုး ခံစားရ

တိုင်းတစ်ပါးက ပါဝင်သူများစွာဟာ တူရကီကို ပြောင်းရွှေ့ပြီး ဟောပြောခြင်းလုပ်ငန်းမှာ ပါဝင်ကူညီဖို့ စစဉ်းစားလာကြတယ်။ တချို့သူတွေ ပြောင်းရွှေ့နေပြီ။ ပိုလိုအပ်တဲ့ဒေသမှာ အမှုဆောင်သူတွေကို ကျေးဇူးတင်ကြပါတယ်။

ဥပမာ၊ ဒေသတစ်ခုက ကြေညာသူ ၂၅ ယောက်ရှိတဲ့ သီးခြားအုပ်စုတစ်ခုကို စဉ်းစားကြည့်ပါ။ အဲဒီမှာ အကြီးအကဲတစ်ယောက်ပဲ ရှိတာ နှစ်တွေ မနည်းတော့ဘူး။ ၂၀၁၅ ခုနှစ်မှာ ပိုလိုအပ်တဲ့ဒေသမှာ အမှုဆောင်တဲ့သူ ခြောက်ယောက် ဂျာမနီနဲ့ နယ်သာလန်ကနေ ပြောင်းရွှေ့ကူညီကြလို့ ဘယ်လောက် ပျော်ကြမလဲဆိုတာ မြင်ယောင်ကြည့်ပါ။

ရှေ့တန်းမှာ အမှုဆောင်ခြင်း

ပိုလိုအပ်တဲ့ဒေသ တူရကီမှာ ခဏ အမှုဆောင်ခဲ့သူတွေ ဘာပြောကြသလဲ။ ခက်ခဲတဲ့အချိန်တွေတော့ ရှိပေမဲ့ ပိုလိုအပ်တဲ့နေရာမှာ အမှုဆောင်ရတာ အကျိုးအများကြီး ရှိတယ်။ တချို့ ပြောတဲ့စကားတွေကို စဉ်းစားကြည့်ပါ–

စပိန်ကနေ ပြောင်းရွှေ့လာတဲ့ အသက် ၄၀ ကျော် အိမ်ထောင်သည် ညီအစ်ကို ဖယ်ဒီရီကိုက “တွယ်တာစရာပစ္စည်းတွေ မရှိတော့ ပိုလွတ်လပ်တယ်။ ပိုအရေးကြီးတဲ့အရာတွေကို အာရုံစိုက်နိုင်တယ်” လို့ပြောတယ်။ ဒီလိုအမှုဆောင်လုပ်ငန်းကို သူထောက်ခံမလား။ “လုံးဝ ထောက်ခံတာပေါ့။ ယေဟောဝါအကြောင်း သိအောင် လူတွေကို ကူညီပေးမယ်ဆိုတဲ့ ရည်ရွယ်ချက်နဲ့ တိုင်းတစ်ပါးကို ပြောင်းရွှေ့တာက ကိုယ့်ကိုယ်ကိုယ် ဘုရားလက်ထဲ အပ်လိုက်တာပဲ။ ယေဟောဝါရဲ့ ဂရုစိုက်မှုကို အရင်ကထက် ပိုခံစားမိတယ်” လို့ပြောတယ်။

နယ်သာလန်က အသက် ၆၀ နီးပါး အိမ်ထောင်သည် ညီအစ်ကို ရူဒီလည်း “ရှေ့တန်းမှာ အမှုဆောင်ရတော့ ကျေနပ်မှုအများကြီး ခံစားရတယ်။ အမှန်တရား မကြားသိဖူးသူများစွာကို ဟောပြောခွင့် ရတယ်။ အမှန်တရား သိလာတဲ့လူတွေရဲ့ ပျော်ရွှင်မှုကို မြင်တွေ့ရတာ အကြီးအကျယ် ရွှင်လန်းမှု ဖြစ်စေတယ်” လို့ပြောတယ်။

ဂျာမနီက အသက် ၄၀ ကျော် အိမ်ထောင်သည် ညီအစ်ကို ဆာရှာ ပြောတာက “အမှုဆောင်ထွက်တိုင်း အမှန်တရားအကြောင်း တစ်ခါမှ မကြားဖူးတဲ့သူတွေနဲ့ ဆုံတယ်။ အဲဒီလိုလူတွေကို ယေဟောဝါအကြောင်း ပြောပြရတာ ကျေနပ်အားရစရာ သိပ်ကောင်းတယ်။”

ဂျပန်က အသက် ၃၀ ကျော် အိမ်ထောင်သည် ညီအစ်မ အတ်ဆူကိုက “အရင်တုန်းကဆိုရင် အာမဂေဒုန် မြန်မြန်လာစေချင်တာ။ တူရကီကို ပြောင်းပြီးနောက်မှာတော့ ယေဟောဝါ စိတ်ရှည်နေတဲ့အတွက် ကျေးဇူးတင်တယ်။ ယေဟောဝါ ညွှန်ကြားနေပုံကို ပိုတွေ့ရလေ ဘုရားနဲ့ ပိုရင်းနှီးလာလေပဲ” လို့ပြောတယ်။

ရုရှားက အသက် ၃၀ ကျော် ညီအစ်မ အလီဆာ ပြောတယ်– “ဒီအမှုဆောင်လုပ်ငန်းမှာ ပါဝင်ရတာ ယေဟောဝါရဲ့ ကောင်းမြတ်မှုအားလုံးကို မြည်းစမ်းခွင့် ရစေတယ်။” (ဆာ. ၃၄:၈) “အခြေအနေအမျိုးမျိုးကြောင့် ယေဟောဝါကို ကျွန်မရဲ့ ဖခင်အဖြစ်ရော မိတ်ဆွေအဖြစ်ပါ ပိုသိကျွမ်းရင်းနှီးလာတယ်။ ကျွန်မဘဝမှာ ပျော်စရာ အချိန်အခါတွေ၊ စိတ်လှုပ်ရှားစရာ တွေ့ကြုံမှုတွေ၊ ကြွယ်ဝတဲ့ ကောင်းချီးတွေ အပြည့်ပါပဲ။”

“လယ်ကွင်းကို ကြည့်လိုက်ပါ”

တူရကီမှာ အထူးဟောပြောခြင်း ကင်ပိန်းကြောင့် လူအများကြီးဆီ သတင်းကောင်း ရောက်ရှိခဲ့တယ်။ သတင်းကောင်း မရောက်ရှိသေးတဲ့နေရာ များစွာ ကျန်သေးတယ်။ ပိုလိုအပ်တဲ့ဒေသမှာ အမှုဆောင်တဲ့သူတွေက ယေဟောဝါအကြောင်း တစ်ခါမှ မကြားဖူးတဲ့သူတွေနဲ့ နေ့တိုင်းလိုလို ဆုံနေရတုန်းပဲ။ အဲဒီလိုရပ်ကွက်မှာ အမှုဆောင်ချင်ပါသလား။ ဆောင်ချင်တယ်ဆိုရင် “လယ်ကွင်းကို လှမ်းမျှော်ကြည့်လိုက်ပါ။ ရိတ်စရာစပါးတွေ မှည့်ဝင်းနေပြီ” လို့ အားပေးပါတယ်။ (ယော. ၄:၃၅) “ရိတ်စရာစပါးတွေ မှည့်ဝင်းနေ” တဲ့ ကမ္ဘာ့လယ်ကွင်း တစ်နေရာရာမှာ ကူညီပေးနိုင်မလား။ ကူညီပေးနိုင်မယ်ဆိုရင် အခုပဲ လက်တွေ့ကျခြေလှမ်းတွေ စလှမ်းလိုက်ပါ။ “ကမ္ဘာမြေ အစွန်အဖျားအထိ” သတင်းကောင်း ဝေမျှခြင်းမှာ တိုးချဲ့ပါဝင်တာက ဘာနဲ့မှ နှိုင်းယှဉ်လို့မရတဲ့၊ ကြွယ်ဝတဲ့ ကောင်းချီးတွေ ခံစားရစေမှာ သေချာပါတယ်။—တ. ၁:၈။