သူတစ်ပါးနှင့်အတူတွဲဖက်အမှုဆောင်ရာမှ ရရှိသောကောင်းချီးများ

^၁ ဓမ္မအမှုတွင် သူတစ်ပါးနှင့်အတူတကွ တွဲဖက်အမှုဆောင်ရာမှ အကျိုးခံစားရသည်ဟု သင်ယူမှတ်ပါသလော။ ယေရှုယူမှတ်တော်မူခဲ့သည်။ စပါးရိတ်စရာ များစွာရှိ၍ ရိတ်သောသူတို့သည် နည်းကြသော်လည်း ရပ်ကွက်သို့ တပည့်တော် ၇၀ ကို “နှစ်ယောက်စီ နှစ်ယောက်စီ” စေလွှတ်တော်မူခဲ့သည်။ “ကိုယ်တိုင်ကြွလေအံ့သော မြို့ရွာအရပ်ရပ်တို့” ၌ သူတို့ဟောပြောခဲ့ကြရာ အကျိုးများစွာဖြစ်ထွန်းခဲ့သည်တကား!—လု. ၁၀:၁၊ ၁၇; မ. ၉:၃၇။

^၂ သူတစ်ပါးနှင့်အတူ တွဲ၍အမှုဆောင်ခြင်းသည် အမှန်အားရှိသည်။ ကျွန်ုပ်တို့တွင် အချို့ရှက်ကြောက်တတ်၍ သူစိမ်းအား စကားမပြောဝံ့ကြချေ။ မိမိဘေးတွင် အဖော်တစ်ဦးရှိနေပါက ဘုရားသခင့်နှုတ်ကပါဌ်တော်ကို ရဲရင့်စွာဟောပြောရန် သတ္တိပိုရှိပေမည်။ ကျွန်ုပ်တို့၌ အဖော်ပါမည်ဆိုလျှင် လေ့ကျင့်ခံထားသည့်နည်းအတိုင်း လုပ်ငန်းတော်ကို ထမ်းရွက်ရန် ပိုမိုလွယ်ကူပေမည်။ (သု. ၂၇:၁၇) ပညာရှိက ဤသို့ဆိုသည်– “လူသည် တစ်ယောက်တည်းထက် နှစ်ယောက်သာ၍ကောင်း၏။”—ဒေ. ၄:၉။

^၃ ကြေညာသူအသီးသီး၊ ရှေ့ဆောင်အသီးသီးတို့နှင့် တွဲဖက်အမှုဆောင်ခြင်းသည် ကောင်းပေသည်။ တမန်တော်ပေါလု၏ အမှုဆောင်ဖက်များတွင် ဗာနဗ၊ သိလ၊ တိမောသေ၊ ယောဟန်မာကုတို့ အသီးသီးပါဝင်ခဲ့ပြီး သူတို့အတူတကွအမှုဆောင်ခဲ့ကြရာတွင် ကောင်းချီးများစွာ ခံစားခဲ့ကြရသည်။ ယနေ့လည်း ထပ်တူပင်ဖြစ်နိုင်သည်။ သမ္မာတရားတွင် ကြာမြင့်စွာရှိခဲ့သူတစ်ဦးနှင့် တွဲဖက်အမှုဆောင်ခဲ့ဖူးသလော။ ကျွမ်းကျင်စွာသက်သေခံခဲ့ပုံကို သတိပြုမိပြီး သင့်အား တိုးတက်မှုရှိစေသည့် နည်းကောင်းများကို အတုယူခဲ့ပေမည်။ ကြေညာသူအသစ်များနှင့် လိုက်သွားဖူးပြီလော။ ထိုသို့ဆိုလျှင် ကိုယ်တိုင်တတ်သိထားသောအရာအချို့ကို သူတို့အား ပြသခွင့်ရ၍ သူတို့လည်း ပိုမိုထိရောက်လာနိုင်စေရန် ကူညီပေးခဲ့ပေမည်။ သို့ဖြင့် သူတို့၏ဓမ္မအမှုတွင် ပျော်ရွှင်မှု ပိုမိုခံစားခဲ့ပေမည်။

^၄ သင်သည် ယခု ကျမ်းစာသင်အံမှု ပြုလုပ်နေပါသလော။ သို့ဆိုလျှင် အကြီးအကဲတစ်ဦး သို့မဟုတ် တိုက်နယ်ကြီးကြပ်မှူးအား ဖိတ်ခေါ်၍ သင်အံမှုသို့ ခေါ်သွားမည်လော။ ကျွန်ုပ်တို့၏ကျမ်းစာသင်အံမှုများ ကြီးကြပ်မှူးများနှင့် အကျွမ်းတဝင်ရှိလာခြင်းသည် အကျိုးရှိသည်။ အကြီးအကဲရှေ့မှောက်တွင် သင်အံမှုမပြုလုပ်ဝံ့လျှင် သူက သင်အံမှုကိုကိုင်ပေးရန် အသင့်ရှိ၍ သူ၏သင်ပြနည်းကို အသင်လေ့လာနိုင်ပေမည်။ ထို့နောက် သင်သားသည် ပိုမိုတိုးတက်ရန် မည်သို့ကူညီပေးနိုင်ကြောင်းကို သူ့အား အကြံဉာဏ်တောင်းဆိုနိုင်သည်။

^၅ သူတစ်ပါးနှင့် တွဲဖက်အမှုဆောင်သည့်အခါ အားပေးတတ်သောအပေါင်းအသင်းဖြစ်ပါ။ ရပ်ကွက်နှင့်ပတ်သက်၍ အပြုသဘောပါစကားများကို ပြောဆိုပါ။ အတင်းပြောဆိုခြင်း သို့မဟုတ် အသင်းတော်အစီအစဉ်များအပေါ် အပြစ်တင်စကားများပြောခြင်းကို ဘယ်သောအခါမျှ မပြုပါနှင့်။ ဓမ္မအမှုကိုသာ အာရုံစူးစိုက်ပါ။ ယေဟောဝါထံတော်မှ ကောင်းချီးများ ခံစားရပါလိမ့်မည်။ ထိုသို့ပြုမည်ဆိုလျှင် သင်နှင့်သင့်အဖော်များသည် ဝိညာဉ်ရေးဘက် အားရှိစွာ ပြန်လာနိုင်ကြပါမည်။

^၆ သင့်အခြေအနေသည် အခြားညီအစ်ကို၊ ညီအစ်မများနှင့် မှန်မှန်တွဲဖက်အမှုဆောင်ခွင့် မရနိုင်သည့်အခြေအနေမျိုးဖြစ်နေမည်။ သို့ရာတွင် အခြားကြေညာသူတစ်ဦးနှင့်အတူ အချိန်အနည်းငယ် တွဲဖက်အမှုဆောင်နိုင်ရန် စီစဉ်ကြည့်ပါလေ။ သင်တို့နှစ်ဦးစလုံး ကောင်းချီးခံစားရပါလိမ့်မည်!—ရော. ၁:၁၁၊ ၁၂။