အခြားသူများကို အမှန်တကယ်ဂရုစိုက်ခြင်းဖြင့် ယေဟောဝါကိုတုပ

^၁ ယေဟောဝါသည် အခြားသူများအပေါ်စိတ်ဝင်စားမှုအမှန်တင်ပြသည့် အကြီးမြတ်ဆုံးသော ပုံသက်သေရှင်ဖြစ်တော်မူသည်။ စကြဝဠာအချုပ်အခြာရှင်အနေဖြင့် ကိုယ်တော်သည် ဖန်ဆင်းရာလူသားများ၏လိုအပ်ရာတို့ကို သိမြင်တော်မူသည်။ (၁ ပေ. ၅:၇) ဖြောင့်မတ်သူ၊ မဖြောင့်မတ်သူများအပေါ်၌ နေထွက်ပြီးမိုးရွာစေသော မိမိခမည်းတော်၏အရည်အချင်းမျိုးကိုတင်ပြရန် တပည့်တော်များအား ယေရှုတိုက်တွန်းခဲ့သည်။ (မ. ၅:၄၅) အခြားသူများအပေါ် စိုးရိမ်မကင်းဖြစ်မှု အမှန်တင်ပြခြင်းဖြင့် ယေဟောဝါကို သင်တုပနိုင်သည်—တွေ့ဆုံသည့်သူတိုင်းထံ နိုင်ငံတော်သတင်းဝေငှရန် အသင့်ဖြစ်နေခြင်းဖြင့်ဖြစ်သည်။ ဇူလိုင်လအတွင်းအမှုဆောင်ရာတွင် အသုံးပြုမည့်ဘရိုရှာများနှင့်လုံးဝအကျွမ်းတဝင်ရှိနေခြင်းဖြင့် သင်သည် အခြားသူများကိုဝိညာဉ်ရေးအရကူညီပေးရန် ကောင်းမွန်သည့်အခြေအနေတွင် ရှိနေပေမည်။ ဦးဆုံးအကြိမ်သွားရောက်ခြင်းနှင့် စိတ်ဝင်စားမှုတင်ပြသူများထံ အချိန်မီပြန်လည်ပတ်ရာတွင် ပြင်ဆင်သွားနိုင်သည့်နည်းနှင့်စပ်လျဉ်း၍ အောက်ပါအကြံပြုချက်များသည် အကြံဉာဏ်အချို့ဖြစ်ပါသည်။

^၂ “ဘုရားသခင်သည် ကျွန်ုပ်တို့အား အမှန်ပင်ဂရုစိုက်တော်မူသလော” ဘရိုရှာကိုဝေငှသောအခါ သင်ပြောနိုင်သည်မှာ–

▪ “ဘုရားသခင်ဟာလူသားတွေကို အမှန်တကယ်ဂရုစိုက်တယ်ဆိုရင် ဘာကြောင့်ဒုက္ခခံခွင့်ပြုထားရတာလဲဆိုပြီး တွေးဖူးသလား။ [တုံ့ပြန်ပါစေ။] ဒီဘရိုရှာဟာ ဒီမေးခွန်းကိုကျေနပ်အောင်အဖြေပေးထားရုံမက မိမိကိုယ်ကိုနဲ့ မြေကြီးစံအိမ်ကို ဖျက်ဆီးနေတဲ့လူအားလုံးကို ဘုရားသခင် ဖျက်ဆီးပစ်မယ်ဆိုတဲ့ ကတိတော်အကြောင်းကိုလည်းတင်ပြထားပါတယ်။” စာမျက်နှာ ၂၇ ရှိအပိုဒ် ၂၃ ကိုဖတ်ပါ။ အောက်တွင်ရှိသည့် ရုပ်ပုံကိုပြပြီး အပိုဒ် ၂၂ မှ ဆာလံ ၁၄၅:၁၆ ကိုဖတ်ပြပါ။ ဘရိုရှာကိုဝေငှပါ။ လက်ခံပါက နောက်တစ်ကြိမ်ပြန်လာသည့်အခါဖြေဆိုရန် ဤသို့သောမေးခွန်းတစ်ခုကိုမေးပါ– “ဘုရားသခင်ဟာ လူသားတွေကိုကောင်းချီးခံစားစေပြီး မြေကြီးကိုပရဒိသုအဖြစ်ပြောင်းလဲပေးမယ်ဆိုတဲ့ မိမိရဲ့ရည်ရွယ်ချက်ကို ဘယ်လိုများ ပြီးပြည့်စုံစေမယ်ဆိုတာ သိချင်ပါသလား။” ကျွန်ုပ်တို့၏ကမ္ဘာချီလုပ်ငန်းကို စေတနာဖြင့်လှူဒါန်းသည့် အလှူငွေများဖြင့်ထောက်ပံ့ပေးနေကြောင်းပြောပြပါ။

^၃ “ဘုရားသခင်သည် ကျွန်ုပ်တို့အား အမှန်ပင် ဂရုစိုက်တော်မူသလော” ဘရိုရှာကို သင်ထားခဲ့သည့်သူများထံပြန်သွားသည့်အခါ နောက်ထပ်ဆွေးနွေးခန်းတစ်ခုကို ဤနည်းဖြင့်အစပြုနိုင်ပါသည်–

▪ “ပြီးခဲ့တဲ့အချိန်ကျွန်တော်လာတုန်းက ဘုရားသခင်ဟာကျွန်တော်တို့ကို အမှန်တကယ်ဂရုစိုက်ပြီး မိမိကိုယ်ကိုနဲ့မြေကြီးစံအိမ်ကို ဖျက်ဆီးနေတဲ့လူအားလုံးကို ဖျက်ဆီးပစ်မယ်ဆိုတဲ့ကိုယ်တော့်ရည်ရွယ်ချက်အကြောင်းကို သုံးသပ်ခဲ့ကြတယ်။” ဘရိုရှာ၏စာမျက်နှာ ၂-၃ ရှိရုပ်ပုံကိုဖွင့်ပြီး ဤသို့ပြောပါ– “ဘုရားသခင်ဟာ လူသားတွေကိုကောင်းချီးခံစားစေပြီး မြေကြီးကိုပရဒိသုအဖြစ်ပြောင်းလဲပေးမယ်ဆိုတဲ့မိမိရဲ့ရည်ရွယ်ချက်ကို ဘယ်လိုများ ပြီးပြည့်စုံစေမလဲ ဆိုတဲ့မေးခွန်းနဲ့ကျွန်တော်တို့အဆုံးသတ်ခဲ့ကြပါတယ်။ ခင်ဗျားဘယ်လိုထင်သလဲ။” တုံ့ပြန်ပါစေ။ စာမျက်နှာ ၁၇ ကိုဖွင့်ပြီး အပိုဒ် ၂ နှင့် ဒံယေလ ၂:၄၄ ကိုဖတ်ပါ။ ပြီးနောက် စာမျက်နှာ ၁၈ ရှိအပိုဒ် ၁၂ ကိုဖတ်ပါ။ အပိုင်း ၉ ကိုသင်နှင့်အတူဆင်ခြင်သုံးသပ်ရန်ဆန္ဒရှိမရှိ အိမ်ရှင်အားမေးပါ။ ဆန္ဒရှိက သူနှင့်ကျမ်းစာသင်အံမှုလုပ်ပါ။

^၄ “သင်ချစ်ရသူတစ်ဦး ကွယ်လွန်သည့်အခါ . . .” ဘရိုရှာကိုဝေငှရာတွင်အသုံးပြုနိုင်သည့် ချဉ်းကပ်နည်းတစ်နည်းဖြစ်သည်။ မျက်နှာဖုံးကိုပြပြီးဤသို့ပြောပါ–

▪ “ဒီကနေ့ ကျွန်တော်တို့ ချစ်ရသူများကို သေခြင်းမှာဆုံးရှုံးသွားရတဲ့သူသန်းပေါင်းများစွာတို့ကို နှစ်သိမ့်မှုနဲ့မျှော်လင့်ချက်ရှိစေတဲ့ ဒီဘရိုရှာကိုဝေငှနေကြပါတယ်။ ကွယ်လွန်သူအတွက် ဘာမျှော်လင့်ချက်ရှိတယ်ဆိုတာ သင်တွေးတောဖူးပါသလော။ [တုံ့ပြန်ပါစေ။] ရှင်ပြန်ထမြောက်လာမယ်ဆိုတဲ့ဘုရားရဲ့ကတိကို သမ္မာကျမ်းစာက ရှင်းရှင်းလေးဖော်ပြထားပါတယ်။” ယောဟန် ၅:၂၈၊ ၂၉ ကိုဖတ်ပါ။ စာမျက်နှာ ၂၈၊ နောက်ဆုံးအပိုဒ်နှင့် စာမျက်နှာ ၃၁၊ ပထမအပိုဒ်ပါ အချက်များကိုတင်ပြပါ။ ပူးတွဲရုပ်ပုံများကိုပြပါ။ ဘရိုရှာကိုဝေငှပါ။ “နောက်ဆုံးမှာသေခြင်းဟာ လုံးဝဖယ်ရှားခံရမယ်ဆိုတာကို ဘာကြောင့်စိတ်ချနိုင်ပါသလဲ” ဟုမေးခြင်းဖြင့် ပြန်လည်ပတ်မှုအတွက် ပြင်ဆင်ထားနိုင်ပါသည်။

^၅ “သင်ချစ်ရသူတစ်ဦး ကွယ်လွန်သည့်အခါ . . .” ဘရိုရှာကိုထားခဲ့သည့်နေရာသို့ ပြန်လည်ပတ်သွားသည့်အခါ သင်သည် ဤတင်ဆက်နည်းကိုအသုံးပြုလိုပေမည်–

▪ “အရင်တုန်းက အံ့ချီးဖွယ်ထမြောက်ခြင်းမျှော်လင့်ချက်အကြောင်းကို ကျွန်တော်တို့ဆွေးနွေးခဲ့ကြတယ်။ ကျွန်တော်ထားခဲ့တဲ့ဘရိုရှာက နောက်ဆုံးမှာသေခြင်းဟာ လုံးဝဖယ်ရှားခံရမယ်ဆိုတာကို ဘာကြောင့်စိတ်ချနိုင်ကြောင်းကို ရှင်းပြပေးပါတယ်။ ဘုရားသခင့်ကတိတော်တွေကနေ နှစ်သိမ့်မှုနဲ့ အားပေးမှုကို ရရှိတယ်မဟုတ်လား။” တုံ့ပြန်ပါစေ။ ထို့နောက် ဘရိုရှာ၏စာမျက်နှာ ၃၁ ကိုပြန်ဖွင့်ပြီး ဗျာဒိတ် ၂၁:၁-၄ နှင့်အတူ ဒုတိယနှင့်တတိယစာပိုဒ်ကိုဖတ်ပါ။ ကျွန်ုပ်တို့၌ အစဉ်သေခြင်းမရှိတော့ဘဲ ပျော်ရွှင်စရာကောင်းသည့် အသက်တာမျှော်လင့်ချက်ရှိကြောင်း ပေါ်လွင်စေပါ။ စိတ်ဝင်စားမှုတင်ပြပုံနှင့် လောလောဆယ်အခြေအနေပေါ်မူတည်ပြီး အသိပညာစာအုပ်ဖြင့် ကျမ်းစာသင်အံမှုပြုရန် ကမ်းလှမ်းနိုင်သည် သို့မဟုတ် နောက်တစ်ကြိမ်ပြန်လည်ပတ်မှုအတွက် လမ်းပွင့်စေရန် နောက်ထပ်မေးခွန်းတစ်ခုကိုမေးနိုင်သည်။

^၆ “ဘဝရည်ရွယ်ချက်ကားအဘယ်နည်း—ယင်းကိုသင်မည်သို့ရှာတွေ့ နိုင်သနည်း” ဘရိုရှာကိုတင်ဆက်သောအခါ အောက်ပါအတိုင်းပြောနိုင်သည်–

▪ “ဘဝရည်ရွယ်ချက်ဟာ ဘာလဲဆိုပြီး မြောက်မြားစွာသောလူတွေ တွေးတောကြပါတယ်။ သူတို့ကိုယ်ကိုသူတို့ဒီလိုမေးကြတယ်– ‘ငါဘာကြောင့်ဒီကိုရောက်နေရတာလဲ၊ ငါဘယ်ကိုသွားနေတာလဲ၊ ငါ့အတွက် ဘာအနာဂတ်ရှိသလဲ။’ ဘယ်နေရာမှာ အဖြေရှာတွေ့နိုင်မယ်လို့ ထင်ပါသလဲ။ [တုံ့ပြန်ပါစေ] ကျမ်းစာပြောထားတာကို သတိပြုပါ။ [ဆာလံ ၃၆:၉ ကိုဖတ်ပါ။] ကျွန်တော်တို့ ဘာကြောင့် ဒီနေရာမှာရောက်နေရတယ်ဆိုတာကိုရှင်းပြဖို့ လူသားဖန်ဆင်းရှင်သာ အသင့်တော်ဆုံးဖြစ်တယ်လို့ လက်ခံထားခြင်းဟာ ကျိုးကြောင်းညီညွတ်တယ်မဟုတ်လား။ [တုံ့ပြန်ပါစေ။] ဒီဘရိုရှာက ကျွန်တော်တို့အတွက် ဘုရားသခင် အရန်သင့်ထားရှိတဲ့ ကြီးမြတ်တဲ့ရည်ရွယ်ချက်ကိုဖော်ပြထားပါတယ်။” စာမျက်နှာ ၂၀-၁ ကိုဖွင့်၊ ရုပ်ပုံပါစာကိုဖတ်ပြီး ရုပ်ပုံနှင့်ပတ်သက်၍ရှင်းပြပါ; ပြီးနောက်ဘရိုရှာကို ဝေငှပါ။ လက်ခံပါက ဤသို့မေးခွန်းမေးပါ– “လူသားတွေအတွက် မြေကြီးပရဒိသုပေါ်ထာဝစဉ်အသက်ရှင်ဖို့ဆိုတဲ့ ဘုရားရဲ့ရည်ရွယ်ချက်ဟာ ယနေ့ထိရှိနေသေးတယ်ဆိုတာ ဘာကြောင့်စိတ်ချနိုင်ပါသလဲ။” အလှူငွေပေးနိုင်သည့် အစီအစဉ်ကိုရှင်းပြပါ။ ပြန်လာရန်အချိန်ကို စီစဉ်ပါ။

^၇ “ဘဝရည်ရွယ်ချက်ကားအဘယ်နည်း—ယင်းကိုသင်မည်သို့ရှာတွေ့ နိုင်သနည်း” ဘရိုရှာကိုထားခဲ့ပါက သင်ပြန်သွားသည့်အခါ ဤသို့ပြောနိုင်သည်–

▪ “ယခင်တစ်ခါအလည်လာတုန်းက ဘုရားနှုတ်ကပါဌ်တော်ရဲ့အဆိုအရ လူ့ဘဝမှာ တကယ်ဘဲရည်ရွယ်ချက်တစ်ခုရှိတယ်ဆိုတဲ့ ကျမ်းစာရဲ့အမြင်ကို ခင်ဗျားနဲ့ဆွေးနွေးခဲ့ရလို့ ရွှင်လန်းမှုခံစားခဲ့ရပါတယ်။” စာမျက်နှာ ၃၁ ရှိရုပ်ပုံကိုပြပြီးမေးပါ, “လူသားတွေ မြေကြီးပရဒိသုပေါ်ထာဝစဉ်အသက်ရှင်ရန် ဘုရားရဲ့အလိုတော်ဟာ ယနေ့ထိတိုင်ပဲဆိုတာ ဘာကြောင့်စိတ်ချနိုင်ပါသလဲ။” စာမျက်နှာ ၂၀ ရှိအပိုဒ် ၃ ကိုဖတ်ပါ။ စာမျက်နှာ ၂၁၊ “ဘုရားသခင့်ရည်ရွယ်ချက်ဖြစ်မြဲ” ခေါင်းစဉ်ငယ်အောက်ရှိ အချက်များကိုဆွေးနွေးပါ။ ဘရိုရှာ၏ကျောဘက်အဖုံးကိုပြပြီး အခမဲ့အိမ်တွင်းကျမ်းစာသင်အံမှု ကမ်းလှမ်းခြင်းအကြောင်း ဖတ်ပြပါ။ အသိပညာ စာအုပ်ကိုစတင်သုံးကာ ယင်းကို သမ္မာကျမ်းစာလေ့လာရာတွင် အကူအညီအဖြစ်မည်သို့အသုံးပြုကြောင်းကို ပြသပေးမည်ဟူ၍ ကမ်းလှမ်းပါ။

^၈ ကျွန်ုပ်တို့၏ဓမ္မအမှုက နှလုံးရိုးဖြောင့်သူများကို “သမ္မာတရားကိုသိစေခြင်းငှာ” ကူညီပေးရန် အမှန်တကယ်စိတ်ဝင်စားကြောင်း ထင်ဟပ်သင့်သည်။ (၁ တိ. ၂:၄) ထို့ကြောင့် ဘရိုရှာထားခဲ့သည့်သူတိုင်းထံ ပြန်သွားရန် သင့်လုပ်ငန်းတော်ဇယားတွင် အချိန်သတ်မှတ်ပါ။ သူတို့အပေါ် အမှန်တကယ်စိုးရိမ်ကြောင့်ကြကြောင်းတင်ပြခြင်းက မှောက်မှားသောဘာသာအတွင်း ပြုမူနေကြသည့် စက်ဆုပ်ရွံရှာဖွယ်ရာများကြောင့် ညည်းတွားငိုကြွေးနေသူများကို ကပ်ကျော်ဖို့ မှတ်သားခံရသူများဖြစ်လာစေရန် ကူညီပေးပါမည်။ (ယေဇ. ၉:၄၊ ၆) အခြားသူများကို အမှန်တကယ်ဂရုစိုက်ခြင်းဖြင့် ယေဟောဝါအားတုပနေသည်ဟူသည့်အသိမှပေါက်ဖွားလာသော ရွှင်လန်းမှုနှင့်ကျေနပ်ရောင့်ရဲမှုကိုလည်း သင်တွေ့ ကြုံခံစားရပါလိမ့်မည်။—ဖိလိပ္ပိ ၂:၂၀ နှိုင်းယှဉ်။