ဘာသာစကားအမျိုးမျိုးပြောသော ဘာသာတရားခပ်သိမ်းမှလူတို့ကိုသက်သေခံခြင်း

^၁ ပထမရာစုရှိခရစ်ယာန်များသည် အခြားဘာသာစကားပြောသူများနှင့် ခြားနားသောဘာသာတရားကိုခံယူထားသူများအား ဇွဲနပဲဖြင့်သက်သေခံခဲ့ကြသည်။ ရလဒ်ကား “အနှစ် ၁၀၀ တိုင်လေသော် မြေထဲပင်လယ်နှင့်နယ်ချင်းစပ်လျက်ရှိသည့် ခရိုင်တိုင်းတွင် ခရစ်ယာန်အသိုင်းအဝိုင်းတစ်ခုရှိခဲ့ဖွယ်ရှိသည်။”—အလယ်ခေတ်၏သမိုင်း။

^၂ အမေရိကန်ပြည်ထောင်စုတွင် များစွာသောသူတို့သည် အင်္ဂလိပ်ဘာသာအပြင် အခြားဘာသာစကားများကိုလည်းပြောကြသည်။ ဒုက္ခသည်များပြောင်းရွှေ့လာခြင်းကြောင့် ယခုအခါ အရွယ်အစားအတော်အတန်ရှိသော နိုင်ငံခြားရပ်ကွက်များရှိသည့် မြို့ကြီးမြို့ငယ်များရှိသည်။ ဗုဒ္ဓဘာသာ၊ ဟိန္ဒူ၊ ဂျူးနှင့် မွတ်စလင်ဘာသာဝင် ထောင်ပေါင်းများစွာအပါအဝင် ခရစ်ယာန်မဟုတ်သောဘာသာတရားကို လိုက်စားသူအမြောက်အမြားသည် တိုင်းတစ်ပါးမှဝင်ရောက်နေထိုင်ခဲ့ကြသည်။ ဤကဲ့သို့ ဘာသာစကားနှင့် ဘာသာတရားများကွဲပြားခြင်းကြောင့် ထိုသို့သောသူများနှင့်တွေ့ဆုံရသည့်အခါ မည်သို့ပြောဆိုသက်သေခံရမည်ကို သိရန်မှာ စိန်ခေါ်ချက်တစ်ရပ်ဖြစ်သည်။ အမှန်မှာ ကျွန်ုပ်တို့၏ဒေသတွင် သာသနာပြုရပ်ကွက်ရှိပေမည်။ ဘာသာစကားအမျိုးမျိုးပြောသော ဘာသာတရားခပ်သိမ်းမှ လူတို့အား “ဟောပြောရန်နှင့် နှံ့စပ်စွာသက်သေခံရန်” ယေရှု၏မိန့်မှာချက်ကို ကျွန်ုပ်တို့ မည်သို့လိုက်လျှောက်နိုင်သနည်း။—တ. ၁၀:၄၂၊ ကဘ။

အခြားဘာသာစကားပြောသူတို့ကို သက်သေခံခြင်း

^၃ ကျွန်ုပ်တို့၏ဌာနခွဲရပ်ကွက်ရှိ ပြည်နယ်နှင့်တိုင်းများတွင်နေထိုင်သော နိုင်ငံခြားဘာသာစကားပြောသူများမှလာသော ကြေညာသူသစ်လွင်များ အကြီးအကျယ်တိုးတက်လာနေပါသည်။ အသင်းတော်များကို ဘာသာစကား ၁၀ ခုနီးပါးဖြင့်တည်ထောင်ခဲ့ပါသည်။ သို့ရာတွင် ရပ်ကွက်ကိုအမှုဆောင်လျက်ရှိသော နိုင်ငံခြားဘာသာစကားပြောအသင်းတော်မရှိသည့်နေရာများတွင် ပိုမိုပြီးမြောက်အောင်လုပ်ဆောင်နိုင်ပါသေးသည်။

^၄ ဘာသာစကားအတားအဆီးများကို ကျော်လွှားခြင်း– များစွာသောသူတို့သည် မိခင်ဘာသာစကားဖြင့် သင်ပေးသည့်အခါ ပိုမိုမြန်ဆန်စွာတတ်မြောက်ကြပြီး ပိုမိုသဘောပေါက်နားလည်ကြသည်မှာ သံသယဖြစ်ဖွယ်မရှိချေ။ “သတင်းကောင်းအတွက်” နှင့် ‘အခြားသူများကို ဝေမျှသူများဖြစ်လာ’ ရန်ညီအစ်ကိုညီအစ်မများစွာသည် အခြားဘာသာစကားကို သင်ယူခဲ့ကြပါသည်။ (၁ ကော. ၉:၂၃၊ ကဘ) ရှေ့ဆောင်များစွာသည် အခြားဘာသာစကားကို သင်ယူခဲ့ကြသည်။ အချို့တို့သည် လူရှိုင်း၊ ဟားခါး၊ မတူပီ၊ ကချင်စသော ဘာသာစကားများကို သင်ယူခဲ့ကြသည်။—တမန်တော် ၂၂:၂ နှိုင်းယှဉ်။

^၅ အကြောင်းကောင်းရှိ၍ ၁၉၉၂၊ နိုဝင်ဘာ ၁၊ ကင်းမျှော်စင်က “နိုင်ငံခြားဘာသာစကားသင်ယူခြင်းသည် လူငယ်များအား စိတ်ပိုင်းဆိုင်ရာအရည်အချင်းမြင့်မားစေရုံမျှမက ယေဟောဝါ၏အဖွဲ့အစည်းအတွက် ပို၍အသုံးဝင်စေသည်” ဟူ၍ဆိုသည်။ သင်သည် အခြားဘာသာစကားကို တတ်မြောက်သည် သို့မဟုတ် သင်ယူလိုသည်ဆိုပါက သင်သည်လည်း နိုင်ငံခြားဘာသာစကားပြောအသင်းတော် သို့မဟုတ် အုပ်စုတစ်ခုကို အကူအညီပေးနိုင်ပေမည်။—မ. ၉:၃၇၊ ၃၈။

^၆ သမ္မာတရားမရရှိမီက ဗီယက်နမ်ဘာသာစကားကိုသင်ယူခဲ့သော ဖလော်ရီဒါပြည်နယ်ရှိညီအစ်ကိုတစ်ဦးသည် ယခုအခါ ဗီယက်နမ်ဘာသာစကားပြောသူများအား သတင်းကောင်းမျှဝေခြင်း၌ အလွန်ပျော်ရွှင်မှုရသည်။ သက်သေခံရာတွင် သူတတ်မြောက်ထားသည့် ထိုဘာသာစကားကို ပိုမိုအသုံးချနိုင်ရန် ဗီယက်နမ်လယ်ကွင်းရှိ သာ၍လိုအပ်သည့်နေရာသို့ တောလမ်းကိုဖြတ်၍ မိသားစုလိုက်ပြောင်းရွှေ့ခဲ့သည်။ ပြောင်းရွှေ့သည့်အချိန်မှစ၍ သူသည် ဗီယက်နမ်မှလူများစွာကို ကျမ်းစာသင်ပေးရာတွင် အောင်မြင်မှုကောင်းရရှိနေပါသည်။

^၇ ကယ်လီဖိုးနီးယားရှိ ရှေ့ဆောင်ညီအစ်မတစ်ဦးသည် သူမ၏ရပ်ကွက်တွင် နားမကြားသူအတော်များများကိုတွေ့ရှိခဲ့သည်။ သူတို့ကို သမ္မာတရားသင်ပေးနိုင်ရန် မိမိအား လက်ဟန်ခြေဟန်ပြစကားသင်ပေးနိုင်သူတစ်ဦးဦးကိုတွေ့ရှိရန် ယေဟောဝါ၏အကူအညီအတွက် သူမဆုတောင်းသည်။ တစ်နေ့ အိမ်နီးချင်းကုန်စုံဆိုင်တွင် ဈေးဝယ်နေစဉ် နားမကြားသူအမျိုးသမီးငယ်တစ်ဦးက သူမကိုချဉ်းကပ်ပြီး ပစ္စည်းတစ်ခုကို ကူရှာပေးရန် စာတိုလေးရေးပြီး အကူအညီတောင်းသည်။ သူမအား ကူရှာပေးပြီးနောက် ဒေသတွင်းရှိ နားမကြားသူများကိုကူညီရန် လက်ဟန်ခြေဟန်ပြစကားကိုသင်ယူလိုကြောင်းဖော်ပြသည့် စာတိုလေးကို ရေး၍ပေးလိုက်သည်။ ထို့နောက် နားမကြားသူအမျိုးသမီးက “နားမကြားသူတွေကို ရှင် ဘာဖြစ်လို့ကူညီပေးချင်တာလဲ” ဟုရေး၍မေးသည်။ ညီအစ်မက ဤသို့ ပြန်ရေးသည်– “ကျွန်မဟာ ယေဟောဝါသက်သေတစ်ဦးပါ၊ နားမကြားသူတွေကို ကျမ်းစာနားလည်အောင် ကျွန်မကူညီပေးချင်တယ်။ ကျွန်မကို လက်ဟန်ခြေဟန်ပြစကားသင်ပေးမယ်ဆိုရင် ရှင့်ကို ကျွန်မ ကျမ်းစာသင်ပေးချင်တယ်။” “‘အိုကေ’ လို့ပြောလိုက်တဲ့အခါ ကျွန်မဘယ်လောက်ပျော်သလဲဆိုတာ သင်တို့မှန်းဆနိုင်မှာမဟုတ်ပါဘူး” ဟူ၍ ညီအစ်မကဆို၏။ ထိုညီအစ်မသည် ခြောက်ပတ်အထိ ညနေတိုင်း အမျိုးသမီး၏အိမ်သို့သွားသည်။ လက်ဟန်ခြေဟန်ပြစကားကို သူမတတ်မြောက်ခဲ့ပြီး နားမကြားသူအမျိုးသမီးကလည်း သမ္မာတရားကိုသိရှိလာကာ နှစ်ခြင်းခံခဲ့သည်! လွန်ခဲ့သောအနှစ် ၃၀ ကျော်က ထိုသို့ဖြစ်ပျက်ခဲ့ကာ ယနေ့အထိ ထိုရှေ့ဆောင်ညီအစ်မသည် နားမကြားသူများကို သက်သေခံနေဆဲပင်ဖြစ်ပြီး ယခုအခါ လက်ဟန်ခြေဟန်ပြစကားပြောအသင်းတော်နှင့် ပူးပေါင်းနေပါသည်။

^၈ သင်သည် အခြားဘာသာစကားကို ကျွမ်းကျင်စွာပြောတတ်ပြီး ထိုလယ်ကွင်းရှိ သာ၍လိုအပ်သောနေရာသို့ ပြောင်းရွှေ့ရန်ဆန္ဒရှိပြီးပြောင်းရွှေ့နိုင်မည်ဆိုပါက အသင်းတော်ရှိအကြီးအကဲများနှင့် ယင်းကိစ္စကို ဆွေးနွေးပါလေ။ သင်သည် ထိုသို့ပြောင်းရွှေ့ရန် အရည်အချင်းပြည့်မီသည်ဟု သူတို့ယူမှတ်ပါက အနီးအနားတွင် သင်အမှုဆောင်နိုင်သည့်ဒေသတစ်ခုရှိမရှိ တိုက်နယ်ကြီးကြပ်မှူးအား မေးပါ။ မရှိပါက သင့်အရည်အချင်းနှင့် ဘာသာစကားကျွမ်းကျင်မှုများနှင့်ပတ်သက်သော အကြီးအကဲများ၏ရှုမြင်ချက်များပါသည့်စာနှင့်တွဲလျက် အသင်းမသို့ သင်စာရေးနိုင်သည်။—၁၉၈၈၊ ဩဂုတ် ၁၅၊ ကင်းမျှော်စင်၊ စာမျက်နှာ ၂၁-၃ ရှု [လိပ်]။

^၉ ပြင်ဆင်ပေးထားသည့်ကိရိယာများကို အသုံးပြုခြင်း– ကျွန်ုပ်တို့၏စာပေကို မြန်မာနိုင်ငံနှင့် နိုင်ငံခြားတိုင်းပြည်များတွင်အသုံးပြုသော ဘာသာစကားများစွာဖြင့် ရရှိနိုင်သည်။ သင့်ရပ်ကွက်တွင်ပြောသည့် ဘာသာစကားများဖြင့် ဝေစာများ၊ တောင်းဆိုဘရိုရှာတို့ကို ယူဆောင်သွားလျှင် အကျိုးရှိပေမည်။ မြန်မာစကားသည် လူတစ်ဦး၏အဓိကသုံး ဘာသာစကားမဟုတ်ကြောင်းထင်ရှားပါက ထိုသူအား မည်သည့်ဘာသာစကားဖြင့် ဖတ်ကြောင်းမေးပါ။ ယင်းက မည်သည့်စာပေကို ဝေငှနိုင်သည်နှင့်စပ်လျဉ်း၍ သင် ရွေးချယ်ခွင့်ပိုရရှိစေသည်။ ဥပမာ၊ အူရ်ဒူဘာသာစကားပြောသူတစ်ဦးသည် အာရဘစ်ဘာသာစကားကိုလည်း ဖတ်တတ်ပေမည်။

^၁၀ သက်သေခံခြင်းလုပ်ငန်းတွင် တွေ့ရသူ၏ဘာသာစကားကို မပြောတတ်သည့်တိုင် သူ့အား သတင်းကောင်းကို တင်ပြနိုင်ပါသေးသည်။ မည်သို့အားဖြင့်နည်း။ မြန်မာ သို့မဟုတ် သင်တတ်ကျွမ်းသည့်ဘာသာစကားနှင့် ပြောခြင်းဖြင့်ဖြစ်သည်။ သူ၏ဘာသာစကားဖြင့် စာအုပ်တစ်အုပ်ကိုပြပါ။ ထိုသို့သောစာအုပ်မရှိလျှင် အင်္ဂလိပ် သို့မဟုတ် မြန်မာဘာသာစကားဖြင့် စာပေကိုပြပါ။ သူ၏ဘာသာစကားဖြင့်စာအုပ်တစ်အုပ်နှင့်အတူ ကြိုးစားပြန်လာမည်ဖြစ်ကြောင်း သိရှိစေပါ။ သူ့နာမည်ကိုမေးကာ လိပ်စာနှင့်တွဲ၍ရေးမှတ်ထားပါ။ ထိုဘာသာစကားကိုတတ်ကျွမ်းသော ညီအစ်ကို သို့မဟုတ် ညီအစ်မတစ်ဦးအား အချက်အလက်များကို သင်လက်ဆင့်ကမ်းပေးနိုင်ပေသည်။ သင့်လျော်သောညီအစ်ကိုများအား ထိုသို့သောအချက်အလက်များကို မည်သို့ဆက်ကမ်းပေးရမည်နှင့်စပ်လျဉ်း၍ ထပ်ဆင့်ညွှန်ကြားချက်များအတွက် အောက်တိုဘာ ၁၉၉၃ ကျွန်ုပ်တို့၏နိုင်ငံတော်ဓမ္မအမှုစာမျက်နှာ ၇ [လိပ်] ကိုကြည့်ပါ။ ခေါ်သွားရန် ထိုဘာသာစကားကိုပြောတတ်သူ တစ်ဦးမျှမရှိလျှင် အင်္ဂလိပ် သို့မဟုတ် မြန်မာစာပေတစ်ခုတွင် လိုက်ကြည့်ပြီး ထိုသူကိုသင်ပေးခြင်းဖြင့် စိန်ခေါ်ချက်ကို သင် လက်ခံနိုင်ပေမည်။—၁ ကော. ၉:၁၉-၂၃။

ခရစ်ယာန်မဟုတ်သောဘာသာတရားများမှလူတို့ကိုသက်သေခံခြင်း

^၁၁ လူတစ်ဦး၏ဘာသာရေးနောက်ခံနှင့်ဆိုင်သည့် ဗဟုသုတအချို့ရှိထားခြင်းက ဘုရားသခင့်နိုင်ငံတော်အကြောင်းကို ထိရောက်စွာသက်သေခံနိုင်ရန် ကျွန်ုပ်တို့ကိုကူညီပေးသည်။ အင်္ဂလိပ်ဘာသာစကားဖြင့် ဘုရားသခင်ကို လူသားများ ရှာပုံတော်စာအုပ်က လူတို့အား သမ္မာတရားအသိပညာကို သိရှိလာစေရန်ကူညီဖို့ သူတို့၏ယုံကြည်ချက်များကို လုံလောက်စွာနားလည်နိုင်စေရန် ကမ္ဘာ့အဓိကဘာသာတရားများကို ထိုးထွင်းသိမြင်စေသည်။

^၁၂ ဤကြားညှပ်စာရွက်၏နောက်ဆုံးစာမျက်နှာရှိ လေးထောင့်ကွက်က ခရစ်ယာန်မဟုတ်သူများကိုသက်သေခံရာတွင် အသုံးပြုဖို့ ယေဟောဝါ၏အဖွဲ့အစည်းက စီမံပေးထားသည့် အင်္ဂလိပ်ဘာသာစကားဖြင့် လက်ရှိစာပေများစာရင်းကိုဖော်ပြပေးသည်။ ဤစာပေများကိုဖတ်ရှုခြင်းဖြင့် လူတို့ထံ သတင်းကောင်းဖြင့် မည်သို့ချဉ်းကပ်ရမည်ကို ကျွန်ုပ်တို့နားလည်ကြသည်။ ကျိုးကြောင်းဆင်ခြင်စာအုပ်သည် အထောက်အကူပြုသောကိရိယာတစ်ခုဖြစ်ကြောင်း မမေ့ရန်ဖြစ်သည်။ ထိုစာအုပ်၏စာမျက်နှာ ၂၁-၄ တွင် ဗုဒ္ဓဘာသာ၊ ဟိန္ဒူ၊ ဂျူးနှင့် မွတ်စလင်တို့ကို တုံ့ ပြန်ပုံနှင့်စပ်လျဉ်း၍ လက်တွေ့ကျအကြံပြုချက်များကို ပေးထားသည်။

^၁၃ သင်ပြောသည့်အရာကို ဂရုစိုက်ခြင်း– သူတို့၏ကိုယ်ပိုင်ယုံကြည်ချက်များသည် အခြားဘာသာတူသူများနှင့်အတူတူပင်ဖြစ်သည်ဟု ကောက်ချက်ချခြင်းဖြင့် အချို့ဘာသာတရားမှလူတို့ကို ပုံသေကားကျမယူမှတ်ရန် ဂရုစိုက်သင့်သည်။ ယင်းအစား သင်နှင့်ပြောနေသူသည် မည်သို့ထင်မြင်ယူဆသည်ကို နားလည်ရန်ကြိုးစားပါ။ (တ. ၁၀:၂၄-၃၅) စဲလီမွန်သည် မွတ်စလင်တစ်ဦးအနေနှင့် ကူရ်အန်ကျမ်းသည် ဘုရားသခင့်နှုတ်ကပါဌ်တော်ဖြစ်သည်ဟုယုံကြည်ရန် သွန်သင်ခံခဲ့ရသည်။ သို့သော် အခါခပ်သိမ်းဂရုဏာပြတော်မူသောဘုရားသခင်သည် မီးတောက်လောင်နေသောငရဲတွင် လူတို့ကိုညှဉ်းဆဲမည်ဟူသည့် မွတ်စလင်သွန်သင်ချက်ကို ဘယ်သောအခါမျှ သူအပြည့်အဝလက်မခံနိုင်ခဲ့ပေ။ တစ်နေ့တွင် ယေဟောဝါသက်သေများက သူ့အား စည်းဝေးတက်ရန်ဖိတ်ခေါ်သည်။ ချက်ချင်းပင် သမ္မာတရားကိုအသိအမှတ်ပြုပြီး ယခုအခါ သူသည် ခရစ်ယာန်အသင်းတော်တွင် အကြီးအကဲတစ်ဦးအနေနှင့် ပျော်ရွှင်စွာအမှုတော်ဆောင်လျက်ရှိသည်။

^၁၄ ခရစ်ယာန်ယုံကြည်ချက်မရှိသူတို့ကို သက်သေခံသောအခါ ကျွန်ုပ်တို့၏ချဉ်းကပ်နည်းကြောင့် သူတို့နှင့် သတင်းကောင်းအကြောင်းပြောဆိုရန်အခွင့်အရေးပိတ်မသွားစေရန် ဂရုစိုက်ဖို့လိုသည်။ (တ. ၂၄:၁၆) အချို့ဘာသာတရား၏ နောက်လိုက်များသည် သူတို့၏ယုံကြည်ချက်ကိုပြောင်းရန် အားထုတ်မှုတစ်စုံတစ်ရာနှင့်ပတ်သက်၍ အလွန်အကဲဆတ်ကြသည်။ ထို့ကြောင့် သူတို့အား ဘုရားသခင့်နှုတ်ကပါဌ်တော်၏သမ္မာတရားတစ်ခုလုံးသို့ဆွဲဆောင်ရန် နှစ်ဦးနှစ်ဖက်သဘောတူနိုင်မည့်အချက်များကို ရှာဖွေဖို့နိုးကြားပါ။ သိုးကဲ့သို့သောသူများသည် ကြင်နာစွာချဉ်းကပ်မှုနှင့် သမ္မာတရားကို ရှင်းလင်းစွာတင်ပြမှုတို့ကို တုံ့ ပြန်ကြမည်ဖြစ်သည်။

^၁၅ လူများသည် ကျွန်ုပ်တို့၏သတင်းတရားမှ မလိုအပ်ဘဲသွေဖည်သွားလေမလားစိုးရိမ်စိတ်ဖြင့် စကားလုံးကိုရွေးချယ်ပြောဆိုခြင်းသည်လည်း အရေးတကြီးထည့်သွင်းစဉ်းစားရမည့်အချက်ဖြစ်သည်။ ဥပမာ၊ သင့်ကိုယ်သင် ခရစ်ယာန်တစ်ဦးဖြစ်သည်ဟု ချက်ချင်းထုတ်ပြောလိုက်ပါက နားထောင်သူသည် သင့်ကို ခရစ်ယာန်ဘောင်ချာ့ချ်များနှင့် အလိုအလျောက်တစ်တန်းတည်းထားလိုက်နိုင်ရာ ယင်းက အတားအဆီးတစ်ခုကို ပေါ်ပေါက်စေနိုင်သည်။ ကျမ်းစာကို “ကျမ်းစာစောင်များ” သို့မဟုတ် “သန့်ရှင်းသောရေးသားပြုစုချက်များ” အဖြစ်ရည်ညွှန်းခြင်းသည်လည်း အကျိုးဖြစ်ထွန်းနိုင်ပေသည်။—မ. ၂၁:၄၂၊ ကဘ; ၂ တိ. ၃:၁၅၊ ကဘ။

^၁၆ သင်သည် ခရစ်ယာန်မဟုတ်သူတစ်ဦးကိုတွေ့ ၍ ချက်ချင်းသက်သေခံရန် အရန်သင့်မရှိဟုယူမှတ်ပါက ရင်းနှီးမှုရရုံမျှသာ အခွင့်အရေးကိုသုံးပါ၊ ဝေစာတစ်စောင်ဝေငှပြီး နာမည်များကို အပြန်အလှန်မိတ်ဆက်ပါ။ သက်သေခံရန် သင် အလုံအလောက်ပြင်ဆင်ပြီးနောက် တစ်ရက်နှစ်ရက်အတွင်း ပြန်သွားပါ။—၁ တိ. ၄:၁၆; ၂ တိ. ၃:၁၇။

^၁၇ ဗုဒ္ဓဘာသာဝင်များကိုသက်သေခံခြင်း– (ဘုရားသခင်ကို လူသားများ ရှာပုံတော် [လိပ်] ရှိအခန်း ၆ ကိုရှု။) ဗုဒ္ဓဘာသာယုံကြည်ချက်များသည် ဘာသာဝင်တစ်ဦးနှင့်တစ်ဦး အလွန်ကွာခြားသည်။ ဖန်ဆင်းရှင်ပုဂ္ဂိုလ်တစ်ပါးရှိသည်ကို ထောက်ခံမည့်အစား ဗုဒ္ဓဝါဒသည် ဘီ.စီ.အီး. ခြောက်ရာစုကပေါ်ထွန်းသော အိန္ဒိယလူမျိုး ဗုဒ္ဓဂေါတမကို ဘာသာရေးစံပြပုဂ္ဂိုလ်မြတ်အဖြစ်ယုံကြည်ကြသည်။ ဂေါတမသည် လူနာ၊ လူအိုနှင့် လူသေတစ်ဦးကို ဦးဆုံးတွေ့သောအခါ အသက်၏အဓိပ္ပာယ်နှင့်ပတ်သက်၍ နာကျင်စွာခံစားခဲ့ရသည်။ ‘လူသည် ဝေဒနာခံစားရဖို့၊ အိုပြီးသေဖို့လောက်သာ မွေးလာသလော’ ဟူ၍သူသိလိုခဲ့သည်။ အမှန်မှာ ထိုအဖြေများကိုသိလိုသည့် စိတ်ရင်းမှန်သောဗုဒ္ဓဘာသာဝင်များအတွက် ဤမေးခွန်းများကို ကျွန်ုပ်တို့ဖြေဆိုနိုင်ပါသည်။

^၁၈ ဗုဒ္ဓဘာသာဝင်များနှင့်စကားပြောသည့်အခါ အထင်ရှားဆုံး ကျမ်းဂန်ပေမြတ်တစ်ဆူဖြစ်သည့်ကျမ်းစာပါ တိကျခိုင်လုံသောသတင်းနှင့် ရှင်းလင်းသောသမ္မာတရားများကို စွဲကိုင်အသုံးပြုပါ။ အခြားသူအများစုကဲ့သို့ ဗုဒ္ဓဘာသာဝင်များသည် ငြိမ်းချမ်းရေး၊ စာရိတ္တနှင့် မိသားစုဘဝတို့ကို အလွန်စိတ်ဝင်စားကြပြီး ယင်းအကြောင်းများကိုဆွေးနွေးလျှင် လက်ခံလေ့ရှိသည်။ ယင်းက လူသားများ၏ပြဿနာများအတွက် တကယ်ဖြေရှင်းနည်းအဖြစ် သင်မီးမောင်းထိုးပြသည့်နိုင်ငံတော်သို့ ရောက်သွားစေသည်။

^၁၉ တရုတ်လူမျိုးများသည်လည်း ဗုဒ္ဓဝါဒနှင့် အခြားအရှေ့တိုင်းအတွေးအခေါ်ပညာများကို ယုံကြည်ကြသည်။ မွန်တားနားပြည်နယ် (ယူ.အက်စ်.အေ) ရှိညီအစ်မတစ်ဦးသည် ကုန်စုံဆိုင်တစ်ဆိုင်တွင် တရုတ်အမျိုးသားတစ်ဦးကိုတွေ့ရာ ထိုသူ၏ဘာသာစကားဖြင့်ဝေစာတစ်စောင် ကမ်းပေးလိုက်ပြီး ကျမ်းစာသင်အံမှုကမ်းလှမ်းခဲ့သည်။ ထိုသူက “သမ္မာကျမ်းစာကို မင်း ဆိုလိုတာလား။ ငါ့တစ်သက်တာပတ်လုံး ဒါကိုပဲရှာနေတာ” ဟူ၍ဆို၏။ ထိုအပတ်တွင် သင်အံမှုစကာ အစည်းအဝေးအားလုံးကို စတက်လေသည်။

^၂၀ နဗားဒါးပြည်နယ် (ယူ.အက်စ်.အေ) ရှိရှေ့ဆောင်ညီအစ်မတစ်ဦးသည် တရုတ်လူမျိုးကျောင်းသားများအား သမ္မာတရားသင်ကြားပေးခဲ့သည်မှာ ဆယ်နှစ်ကျော်ပေပြီ။ ဤကျောင်းသားများနေထိုင်ရာ အခန်းတွဲရှစ်ခန်းရှိအဆောက်အဦတစ်ခုတွင် အမှုဆောင်သောအခါ အခန်းတွဲတစ်ခုစီတွင် သင်အံမှုစနိုင်ရန်ကူညီပေးဖို့ ယေဟောဝါထံ သူမဆုတောင်းခဲ့သည်။ နှစ်ပတ်အတွင်းတွင် အခန်းတွဲတစ်ခုစီရှိ အနည်းဆုံးကျောင်းသားတစ်ဦးနှင့် ကျမ်းစာသင်ရသည်။ သူမအတွက် ကောင်းကောင်းထိရောက်မှုရှိသောချဉ်းကပ်နည်းတစ်ခုမှာ ကျောင်းသားများထဲမှ အများစုစိတ်ဝင်စားရာတစ်ခု—သူတို့အားလုံးသည် ငြိမ်သက်မှုနှင့် ပျော်ရွှင်မှုကိုလိုလားကြသည်—ကိုသူမတွေ့ရှိထားကြောင်း ပြောခြင်းဖြစ်သည်။ ထို့နောက် သူတို့၏စိတ်ဝင်စားရာသည်လည်း ထိုသို့ဟုတ်မဟုတ် သူမမေးသည်။ အမြဲပင် သူတို့သဘောတူကြသည်။ သူမသည် တရုတ်လူမျိုးများအတွက်စီစဉ်ထားသည့် တည်မြဲသောငြိမ်သက်မှုနှင့် ပျော်ရွှင်မှု—ယင်းတို့ကိုရှာတွေ့နိုင်ပုံဘရိုရှာကို သူတို့အာရုံစိုက်ရန်ညွှန်ပြသည်။ အချိန်ပိုင်းငါးခုမျှသင်ပြီးနောက် ကျောင်းသားတစ်ဦးက သူသည် သမ္မာတရားကို အချိန်ကြာကြာရှာဖွေခဲ့ပြီး ယခုမှ တွေ့ရကြောင်း သူမအားပြောသည်။

^၂၁ ဟိန္ဒူဘာသာဝင်များကို သက်သေခံခြင်း– (ဘုရားသခင်ကို လူသားများ ရှာပုံတော် [လိပ်] ရှိအခန်း ၅ ကိုရှု။) ဟိန္ဒူဘာသာတွင် တိကျသောအယူဝါဒမရှိချေ။ ယင်း၏အတွေးအခေါ်သည် အလွန်ရှုပ်ထွေးသည်။ ဟိန္ဒူဘာသာဝင်များတွင် အဓိကနတ်ဘုရားဗြဟ္မဏနှင့်ဆိုင်သည့် သုံးပါးတစ်ဆူအယူရှိသည် (ဖန်ဆင်းသူ ဗြဟ္မာ၊ ထိန်းသိမ်းသူ မဟာပိန္နဲ (ဝါ) ဗိဿနိုး၊ ဖျက်ဆီးသူ သီဝ)။ မသေနိုင်သောဝိညာဉ်ယုံကြည်ချက်သည် ၎င်းတို့၏လူဝင်စားခြင်းသွန်သင်ချက်အတွက် အဓိကဖြစ်သည်၊ ယင်းက ဟိန္ဒူဘာသာဝင်များအား အသက်သည် ကံစီမံရာအတိုင်းဖြစ်သည်ဟူ၍ ရှုမြင်စေသည်။ (ကျိုးကြောင်းဆင်ခြင်စာအုပ် စာမျက်နှာ ၂၈၄-၈၈ နှင့် ၁၉၉၇၊ မေ ၁၅၊ ကင်းမျှော်စင်၊ စာမျက်နှာ ၃-၈ ရှုပါ။) ဟိန္ဒူဘာသာက ဘာသာအားလုံးသည် တစ်မျိုးတည်းသောအမှန်တရားသို့ ပို့ဆောင်ပေးသည်ဟူသော သဘောထားကြီးမှုကိုသွန်သင်ပေးသည်။

^၂၂ ဟိန္ဒူတစ်ဦးကိုသက်သေခံရန် ချဉ်းကပ်နည်းတစ်နည်းမှာ ကမ္ဘာမြေပေါ်တွင် လူ့စုံလင်မှုဖြင့်ထာဝစဉ်အသက်ရှင်ရန်ဟူသော ကျွန်ုပ်တို့၏ကျမ်းစာအခြေခံမျှော်လင့်ချက်အပြင် သမ္မာကျမ်းစာသည် လူသားအားလုံးရင်ဆိုင်ရသောပြဿနာများ၏ ကျေနပ်ဖွယ်အဖြေများကိုပေးကြောင်း ရှင်းပြခြင်းဖြစ်သည်။

^၂၃ ဂျူးများကို သက်သေခံခြင်း– (ဘုရားသခင်ကို လူသားများ ရှာပုံတော် [လိပ်] ရှိအခန်း ၉ ကိုရှု။) ခရစ်ယာန်မဟုတ်သော အခြားဘာသာများနှင့်မတူဘဲ ဂျူးဘာသာသည် ဒဏ္ဍာရီတွင်မဟုတ်၊ သမိုင်းတွင်အခြေခံသည်။ မှုတ်သွင်းခံဟေဗြဲကျမ်းစာစောင်များအားဖြင့် မှန်သောဘုရားသခင်ကို လူသားများရှာပုံတော်ဖွင့်ရာတွင် အရေးပါသောကွင်းဆက်ကိုပေးသည်။ သို့တိုင် ဘုရားသခင့်နှုတ်ကပါဌ်တော်နှင့်ဆန့်ကျင်သည့် မျက်မှောက်ခေတ်ဂျူးဘာသာ၏အခြေခံသွန်သင်ချက်တစ်ခုမှာ မသေနိုင်သောလူ့ဝိညာဉ်ကိုယုံကြည်ခြင်းဖြစ်သည်။ ကျွန်ုပ်တို့သည် အာဗြဟံကိုးကွယ်သည့်ဘုရားကိုကိုးကွယ်ကြောင်း အတည်ပြုခြင်းဖြင့်လည်းကောင်း၊ ယနေ့လောကတွင် တူညီသည့်အခက်အခဲများကို ကျွန်ုပ်တို့ရင်ဆိုင်ကြရကြောင်း အသိအမှတ်ပြုခြင်းဖြင့်လည်းကောင်း နှစ်ဦးသဘောတူနိုင်မည့်အချက်တစ်ခုကို အခြေချနိုင်သည်။

^၂၄ ဘုရားသခင်ကိုမယုံသည့်ဂျူးတစ်ယောက်နှင့် တွေ့ရပါက အရင်ကတည်းကလောဟု မေးခြင်းသည် သူ့အား စိတ်အဝင်စားဆုံးဖြစ်စေမည့်အရာကို သိမြင်ရန် သင့်အား ကူညီပေးနိုင်သည်။ ဥပမာ၊ ဆင်းရဲဒုက္ခကို ဘုရားသခင်ခွင့်ပြုရသည့်အကြောင်းနှင့်စပ်လျဉ်းသည့် ကျေနပ်ဖွယ်ရှင်းလင်းချက်ကို မည်သည့်အခါမျှ မကြားဖူးဘဲဖြစ်နေပေမည်။ စိတ်ရင်းမှန်သောဂျူးများကို ယေရှုသည် မေရှိယဖြစ်ကြောင်း ခရစ်ယာန်ဘောင်၏ တလွဲဖော်ပြချက်များအားဖြင့်မဟုတ်ဘဲ ကိုယ်တော်အကြောင်း ဂျူးလူမျိုးဂရိကျမ်းစာစောင်ရေးသူများဖော်ပြသည့်အတိုင်း ပြန်ဆန်းစစ်ကြရန် အားပေးနိုင်သည်။

^၂၅ မွတ်စလင်များကိုသက်သေခံခြင်း– (ဘုရားသခင်ကို လူသားများ ရှာပုံတော် [လိပ်] ရှိအခန်း ၁၂ ကိုရှု။) မွတ်စလင်များသည် အစ္စလာမ်ဘာသာ (သို့မဟုတ် မိုဟာမက်အယူဝါဒ) ၏နောက်လိုက်များဖြစ်သည်၊ ယင်းတွင် အလ္လာကို သူတို့၏တစ်ဆူတည်းသောဘုရားအဖြစ်နှင့် မိုဟာမက် (စီ.အီး. ၅၇၀-၆၃၂) ကိုနောက်ဆုံးနှင့် အရေးကြီးဆုံးပရောဖက်ဖြစ်အဖြစ် ယုံကြည်ခြင်းပါဝင်သည်။ ဘုရားသခင်၌ သားရှိသည်ဟူ၍ မယုံသောကြောင့် မွတ်စလင်များသည် ယေရှုခရစ်ကို ဘုရားသခင်၏ပရောဖက်ငယ်တစ်ပါးအဖြစ်မျှသာ အသိအမှတ်ပြုကြသည်။ နှစ်ပေါင်း ၁,၄၀၀ အောက်သက်တမ်းရှိသော ကူရ်အန်ကျမ်းသည် ဟေဗြဲနှင့် ဂရိကျမ်းစာစောင်နှစ်ခုစလုံးကို ကိုးကားဖော်ပြသည်။ အစ္စလာမ်နှင့် ကက်သလစ်ဘာသာတွင် သိသာသောဆင်တူချက်များရှိသည်။ ဘာသာနှစ်ခုစလုံးသည် လူ့စိုးလ်မသေနိုင်သောအယူ၊ ယာယီညှဉ်းဆဲခံရသည့်အခြေအနေ၊ မီးတောက်လောင်နေသောငရဲရှိခြင်းအယူတို့ကို သွန်သင်သည်။

^၂၆ နှစ်ဦးနှစ်ဖက်သဘောတူညီမှုရနိုင်သည့် ထင်ရှားသောအချက်မှာ စစ်မှန်သောဘုရားသခင်တစ်ဆူတည်းရှိကြောင်းနှင့် ကျမ်းစာသည် ကိုယ်တော်၏မှုတ်သွင်းခံဖြစ်ကြောင်း ယုံကြည်ချက်ဖြစ်သည်။ ကူရ်အန်ကျမ်းကို အသေအချာဖတ်ရှုသူတစ်ဦးသည် တိုရာကျမ်း၊ ဆာလံကျမ်းနှင့် ခရစ်ဝင်ကျမ်းများကို ဘုရားသခင့်နှုတ်ကပါဌ်တော်အဖြစ် ရည်ညွှန်းသည့်အချက်များကိုတွေ့ရပြီး ၎င်းတို့ကို ထိုသို့အသိအမှတ်ပြုကာ လိုက်နာသင့်ကြောင်း ဖတ်ခဲ့ရပေမည်။ ထို့ကြောင့် ယင်းတို့ကို ထိုသူနှင့်လေ့လာရန် သင် ကမ်းလှမ်းနိုင်သည်။

^၂၇ ဤတင်ဆက်ပုံသည် မိမိကိုယ်ကို မွတ်စလင်တစ်ဦးပါဟု ပြောဆိုသူတစ်စုံတစ်ဦးအား ထိရောက်မှုရှိနိုင်သည်– “မွတ်စလင်အများစုနဲ့ စကားမပြောခဲ့ရပါဘူး၊ ဒါပေမဲ့ ဒီလက်စွဲစာအုပ်ထဲမှာ မိတ်ဆွေဘာသာရဲ့ သွန်သင်ချက်အနည်းအကျဉ်းနဲ့စပ်လျဉ်းတဲ့အကြောင်းအရာကို ကျွန်တော်ဖတ်ရပါတယ်။ [ကျိုးကြောင်းဆင်ခြင်စာအုပ် စာမျက်နှာ ၂၄ ကိုဖွင့်ပါ။] ဒီစာအုပ်က မိတ်ဆွေတို့အနေနဲ့ ယေရှုကိုပရောဖက်တစ်ပါးဖြစ်တယ်၊ ဒါပေမဲ့ မိုဟာမက်ကိုကျတော့ နောက်ဆုံးနဲ့ အရေးကြီးဆုံးပရောဖက်ဖြစ်တယ်လို့ ယုံကြည်တယ်ဆိုတာ ဖော်ပြပါတယ်။ မောရှေလည်း စစ်မှန်တဲ့ပရောဖက်တစ်ပါးဖြစ်လို့ မိတ်ဆွေယုံကြည်သလား။ [တုံ့ ပြန်မှုကိုစောင့်ပါ။] ဘုရားသခင်ရဲ့ကိုယ်ပိုင်နာမတော်နဲ့ပတ်သက်ပြီး ကိုယ်တော်ထံက မောရှေသိခဲ့ရတာကို မိတ်ဆွေကို ပြပေးလို့ရမလား။” ထို့နောက် ထွက်မြောက်ရာ ၆:၂၊ ၃ ကိုဖတ်ပြပါ (ကမ္ဘာသစ်ဘာသာပြန်ကျမ်းမှ ပြပါ။)။ ပြန်လည်ပတ်သောအခါ ဘုရားသခင့်လက်တော်အောက် ကျိုးနွံရန်အချိန်တန်ပြီ [လိပ်] စာအုပ်ငယ်တွင်ရှိသည့် စာမျက်နှာ ၁၃ ပါ “ဘုရားတစ်ဆူ၊ ဘာသာတစ်ခု” ဟူသောခေါင်းစဉ်ငယ်ကို သင် ဆွေးနွေးနိုင်သည်။

^၂၈ ယနေ့ လူများစွာသည် ဟေရှာယ ၅၅:၆ ပါစကားများနှင့်အညီ လုပ်ဆောင်နေကြပါသည်၊ ယင်းတွင် “တွေ့နိုင်သည်ကာလတွင် ထာဝရဘုရားကိုရှာကြလော့။ နီးတော်မူသည်ကာလတွင် ဆုတောင်းပတ္ထနာပြုကြလော့” ဟူ၍ဖတ်ရသည်။ ယင်းစကားများသည် ဘာသာစကား သို့မဟုတ် ဘာသာရေးနောက်ခံ မည်သို့ပင်ရှိစေကာမူ နှလုံးရိုးဖြောင့်သူအားလုံးနှင့်သက်ဆိုင်သည်။ ‘သွား၍ လူမျိုးတကာတို့ကို တပည့်ဖြစ်စေ’ ရန်ကြိုးစားသည်နှင့်အမျှ ကျွန်ုပ်တို့၏ကြိုးစားအားထုတ်မှုများအပေါ် ယေဟောဝါကောင်းချီးပေးတော်မူမည်ကို ကျွန်ုပ်တို့စိတ်ချနိုင်ပါသည်။—မ. ၂၈:၁၉။

[စာမျက်နှာ ၆ ပါ လေးထောင့်ကွက်]

ခရစ်ယာန်မဟုတ်သူများအတွက်စီစဉ်ပေးထားသည့်စာပေ

ဗုဒ္ဓဘာသာ

ဖခင်ရှာပုံတော် (စာအုပ်ငယ်)

“ကြည့်ရှုလော့! ငါသည် ခပ်သိမ်းသောအရာတို့ကို အသစ်ဖန်ဆင်းသည်” (ဘရိုရှာ)

တရုတ်လူမျိုး

တည်မြဲသောငြိမ်သက်မှုနှင့် ပျော်ရွှင်မှု—ယင်းတို့ကိုရှာတွေ့နိုင်ပုံ [လိပ်] (ဘရိုရှာ)

ဟိန္ဒူ

ကုရုရှတ္တရမှ အာမဂေဒုန်—နှင့် သင့်အသက်ချမ်းသာရရေး [လိပ်] (စာအုပ်ငယ်)

ကျွန်ုပ်တို့၏ပြဿနာများ—ယင်းတို့ကိုဖြေရှင်းရန် ကျွန်ုပ်တို့ကိုမည်သူကူညီမည်နည်း [လိပ်] (ဘရိုရှာ)

လွတ်ငြိမ်းချမ်းသာရောက် ဘုရားသခင့်သမ္မာတရားလမ်းစဉ် [လိပ်] (စာအုပ်ငယ်)

သေခြင်းအပေါ်အောင်ပွဲခံခြင်း—သင့်အတွက်ဖြစ်နိုင်ပါမည်လော [လိပ်] (စာအုပ်ငယ်)

ဘုရားသခင်အား မေတ္တာနှင့် သမ္မာတရားတို့ဖြင့် ကျွန်ုပ်တို့ အဘယ်ကြောင့်ကိုးကွယ်သင့်သနည်း [လိပ်] (ဘရိုရှာ)

ဂျူး

ငြိမ်းချမ်းသောကမ္ဘာသစ်—ရောက်ရှိလာမည်လော [လိပ်] (ဝေစာနံပါတ် ၁၇)

ယေဟောဝါသက်သေများ—သူတို့ယုံကြည်ချက်ကား အဘယ်နည်း (ဝေစာနံပါတ် ၁၈)

စစ်မဲ့ကမ္ဘာ တစ်နေ့နေ့ ရှိနိုင်ပါမည်လော [လိပ်] (ဘရိုရှာ)

မွတ်စလင်

ပရဒိသုလမ်းကြောင်းကို ရှာတွေ့နိုင်ပုံ [လိပ်] (ဝေစာ)

ဘုရားသခင့်လက်တော်အောက် ကျိုးနွံရန် အချိန်တန်ပြီ [လိပ်] (စာအုပ်ငယ်)