သင့်သင်သား၏နှလုံးကိုထိမိစေပါ

^၁ ကောင်းကင်သို့မတက်ကြွမီ ယေရှုက တပည့်တော်များအား မိမိပညတ်ခဲ့သမျှကို “စောင့်ရှောက်” ရန် အခြားသူတို့အား သွန်သင်ပေးဖို့ မိန့်မှာခဲ့သည်။ (မ. ၂၈:၁၉၊ ၂၀) လူတစ်ဦးသည် ခရစ်တော်၏ပညတ်တို့ကို “စောင့်ရှောက်” မည်ဆိုလျှင် လေ့လာသိရှိသည့်အရာက သူ၏နှလုံးကိုထိမိရမည်ဖြစ်သည်။ (ဆာ. ၁၁၉:၁၁၂) သင်သည် မိမိနှင့်ကျမ်းစာလေ့လာနေသူတစ်ဦး၏နှလုံးကို မည်သို့ထိမိစေနိုင်သနည်း။

^၂ ယေဟောဝါ၏လမ်းညွှန်မှုအတွက်ဆုတောင်းပါ– တပည့်ဖြစ်စေခြင်းသည် ဘုရားသခင့်လုပ်ငန်းဖြစ်၏။ အောင်မြင်မှုရရန် ကျွန်ုပ်တို့၏အစွမ်းအစများကိုမဟုတ်ဘဲ ကိုယ်တော့်ကောင်းချီးရဖို့လိုသည်။ (တ. ၁၆:၁၄; ၁ ကော. ၃:၇) ထို့ကြောင့် အခြားသူများကို သမ္မာတရားသွန်သင်ပေးရာတွင် ယေဟောဝါ၏အကူအညီအတွက် ဆုတောင်းခြင်းသည် မရှိမဖြစ်လိုအပ်သည်။—ဟေရှာ. ၅၀:၄။

^၃ သင်သားယုံကြည်သည့်အရာကို ပိုင်းခြားသိမြင်ပါ– လူတို့ယုံကြည်သည့်အရာနှင့် ယင်းကို သူတို့အဘယ်ကြောင့်ယုံကြည်ကြောင်း သိထားခြင်းက ၎င်းတို့၏နှလုံးကိုထိမိရန် ဘာပြောရမည်ကို ထိုးထွင်းသိမြင်စေနိုင်သည်။ သင်သားတစ်ဦးသည် သွန်သင်ချက်တစ်ခုကို အဘယ်ကြောင့်နှစ်သက်နေသနည်း။ ယင်းသည် ယုံကြည်နိုင်စရာဖြစ်သည်ဟု သူ့ကိုလက်ခံစေသည့်အရာကား အဘယ်နည်း။ ယင်းတို့ကိုသိရှိခြင်းက ပိုင်းခြားသိမြင်မှုဖြင့်ပြောဆိုရန် ကျွန်ုပ်တို့ကိုကူညီပေးနိုင်သည်။—တ. ၁၇:၂၂၊ ၂၃။

^၄ ဆင်ခြင်တုံတရားနှင့်ညီသော ကျမ်းဆိုင်ရာအချေအတင်ပြောဆိုချက်တစ်ခုကို တည်ဆောက်ပါ– သမ္မာတရားသည် သင်သားအတွက် ကျိုးကြောင်းညီညွတ်ရမည်။ (တ. ၁၇:၂၄-၃၁) ကျွန်ုပ်တို့သည် မိမိတို့မျှော်လင့်ချက်အတွက် ခိုင်လုံသောအကြောင်းတစ်ခုပေးရမည်။ (၁ ပေ. ၃:၁၅) သို့သော် စိတ်ရှည်ရှည်နှင့် ကြင်နာစွာဖြင့် အမြဲပြုပါ။

^၅ ယင်းကို ပုံဥပမာများဖြင့် ထပ်လောင်းဖြည့်စွက်ပါ– ပုံဥပမာများသည် သင်သားအတွက် နားလည်ရန်ပိုလွယ်ကူစေရုံသာမက စိတ်လှုပ်ရှားမှုကိုပါ နှိုးဆွပေးသည်။ ယင်းတို့သည် စိတ်ရောနှလုံးကိုပါ ထိမိစေသည်။ ယေရှုသည် ယင်းတို့ကို မကြာခဏသုံးလေ့ရှိ၏။ (မာ. ၄:၃၃၊ ၃၄) မှန်ပါသည်၊ ထိရောက်မှုရှိရန် အသုံးပြုသောပုံဥပမာသည် ဆွေးနွေးနေသည့်အချက်နှင့် အံဝင်ရမည်ဖြစ်ကာ သင်သား၏အသက်တာနှင့် ဆက်စပ်မှုရှိသင့်သည်။

^၆ သမ္မာတရားလက်ခံခြင်း၏အကျိုးကျေးဇူးများကို ဖော်ပြပါ– လူတို့သည် မိမိတို့သင်ယူနေသည့်အရာအား လက်တွေ့ကျင့်သုံးခြင်း၏အကျိုးကျေးဇူးများကို သိလိုကြသည်။ ၂ တိမောသေ ၃:၁၄-၁၇ ပါပေါလုစကားများ၏ဉာဏ်ပညာကိုတွေ့မြင်ရန် သင့်သင်သားကိုကူညီပေးပါ။

^၇ အချို့က သင့်သွန်သင်ခြင်းကို မတုံ့ပြန်လျှင် စိတ်ဓာတ်မကျပါနှင့်။ နှလုံးသားတိုင်း လက်ခံကြမည်မဟုတ်ပါ။ (မ. ၁၃:၁၅) သို့သော် အချို့သူတို့သည် ယုံကြည်သူများဖြစ်လာကြသည်။ (တ. ၁၇:၃၂-၃၄) သတင်းကောင်းဖြင့် နှလုံးများကိုထိမိရန် သင့်ကြိုးစားမှုများသည် နောက်ထပ်များစွာသောသူတို့အား ယေရှုမိန့်မှာခဲ့ရာကို လက်ခံ “စောင့်ရှောက်” ရန် ကူညီပေးနိုင်ပါစေ။