မိဘတို့—သင်တို့၏ရင်သွေးများကို နို့စို့အရွယ်မှစ၍ လေ့ကျင့်ပေးကြလော့

^၁ “သူငယ်သွားရာလမ်းဝ၌ ဆုံးမသွန်သင်လော့။ သို့ပြုလျှင် သူသည် အိုသောအခါ ထိုလမ်းမှမလွှဲ လိုက်သွားလိမ့်မည်။” (သု. ၂၂:၆) မိဘတို့၊ သင်တို့၏ရင်သွေးများကို သမ္မာတရား “လမ်းမှမလွှဲ” သွားစေလိုလျှင် အဆိုပါလေ့ကျင့်မှုကို မည်သည့်အချိန်မှ စတင်သင့်သနည်း။ နို့စို့အရွယ်မှဖြစ်၏!

^၂ ပေါလုက တိမောသေ၏ဝိညာဏပညာရေးသည် “နို့စို့အရွယ်မှ” ဖြစ်သည်ဟုဆိုသောအခါ ကလေးပေါက်စအရွယ်မှဖြစ်သည်ဟုဆိုလိုကြောင်း ထင်ရှားသည်။ (၂ တိ. ၃:၁၄၊ ၁၅၊ ကဘ) ရလဒ်အနေနှင့် တိမောသေသည် အလွန်တော်သောဝိညာဏလူတစ်ဦးအဖြစ် ကြီးပြင်းလာခဲ့သည်။ (ဖိ. ၂:၁၉-၂၂) မိဘတို့၊ သင်တို့လည်း မိမိတို့၏ရင်သွေးများကို ‘ယေဟောဝါရှေ့တော်၌ကြီးပွား’ စေရန် သူတို့လိုအပ်သည့်လေ့ကျင့်မှုကိုပေးဖို့ “နို့စို့အရွယ်မှ” စတင်ရမည်ဖြစ်သည်။—၁ ရာ. ၂:၂၁။

^၃ သူတို့ကြီးထွားရန် ရေလောင်းပေးဖို့လို– ပျိုးပင်ငယ်များသည် ခံ့ညားသည့်အပင်များအဖြစ်ကြီးထွားရန် ရေမပြတ်ရရှိဖို့လိုသကဲ့သို့ အသက်အရွယ်အသီးသီးရှိသောကလေးများသည် ရင့်ကျက်သောဘုရားသခင့်ကျေးကျွန်များအဖြစ် ကြီးထွားရန် ကျမ်းစာသမ္မာတရားရေ ရွှဲရွှဲလောင်းပေးဖို့လိုသည်။ ကလေးများကို သမ္မာတရားသင်ကြားပေးရန်နှင့် ယေဟောဝါနှင့်ရင်းနှီးမှုရရှိဖို့ကူညီပေးရန် အဓိကနည်းမှာ မိသားစုကျမ်းစာသင်အံမှု မှန်မှန်ပြုလုပ်ခြင်းအားဖြင့်ဖြစ်သည်။ သို့သော် မိဘတို့၊ ကလေးတစ်ဦးစီ၏ အာရုံစိုက်နိုင်သည့်အတိုင်းအတာကို သုံးသပ်ပါ။ ကလေးငယ်များအတွက် အကြိမ်ကြိမ်လုပ်ပေးသော သင်ကြားပို့ချချက်အချိန်တိုလေးများသည် ကြာရှည်သောသင်ကြားပို့ချချက် အနည်းငယ်ထက် သာ၍ထိရောက်ဖွယ်ရှိသည်။—တရား. ၁၁:၁၈၊ ၁၉။

^၄ သင့်ကလေး၏သင်ယူနိုင်စွမ်းကို ဘယ်သောအခါမျှ လျှော့မတွက်ပါနှင့်။ သူတို့အား ကျမ်းစာဇာတ်ကောင်များနှင့်ပတ်သက်သည့် ပုံပြင်များကိုပြောပြပါ။ သူတို့ကို ကျမ်းစာပါရှုခင်းများ၏ပုံကိုဆွဲခိုင်းပါ သို့မဟုတ် ကျမ်းစာအဖြစ်အပျက်များကို သရုပ်ဆောင်ခိုင်းပါ။ ကျမ်းစာပြဇာတ်များအပါအဝင် ကျွန်ုပ်တို့၏ဗီဒီယိုခွေများနှင့် ကက်ဆက်ခွေများကို ကောင်းစွာအသုံးချပါ။ မိသားစုသင်အံမှုကို သင့်ရင်သွေးတို့၏အသက်အရွယ်၊ သင်ယူနိုင်စွမ်းနှင့်အညီ အလိုက်သင့်ပြုပြင်ပြောင်းလဲပါ။ အစပိုင်းတွင် လေ့ကျင့်မှုသည် အခြေခံဖြစ်ကာ အနည်းငယ်သာဖြစ်မည်; သို့သော် ကလေးအသက်အရွယ်ကြီးလာသည်နှင့်အမျှ လေ့ကျင့်မှုသည် ပို၍ကျယ်ပြန့်တိုးတက်လာသင့်သည်။ ကျမ်းစာသင်ကြားပို့ချချက်ကို တက်ကြွမှုရှိစေကာ အမျိုးမျိုးအဖုံဖုံဖြစ်စေပါ။ သင်သည် သင့်ရင်သွေးများတွင် နှုတ်ကပါဌ်တော်ကို “အလွန်လိုချင်သောစိတ်” ရှိစေလိုရာ သင်အံမှုကို ဖြစ်နိုင်သရွေ့ ခံတွင်းတွေ့စရာဖြစ်အောင်လုပ်ပါ။—၁ ပေ. ၂:၂၊ ၃။

^၅ အသင်းတော်တွင် သူတို့ကိုပါဝင်စေပါ– သင့်ရင်သွေးများ အစည်းအဝေးတွင် အပြည့်အဝပါဝင်လာရန် ၎င်းတို့အတွက် အဆင့်တိုးပန်းတိုင်များချမှတ်ပါ။ အဘယ်အရာသည် သူတို့၏ဦးဆုံးပန်းတိုင်ဖြစ်နိုင်သနည်း။ ကလေးငယ်နှစ်ယောက်၏မိဘတို့က “နှစ်ယောက်စလုံးဟာ နိုင်ငံတော်ခန်းမမှာ ငြိမ်ငြိမ်လေးထိုင်ဖို့လေ့ကျင့်ပေးတာကို စတင်ခံယူခဲ့ကြတယ်” ဟုဆိုသည်။ နောက်ပိုင်းတွင် အစည်းအဝေးများ၌ ကိုယ်ပိုင်စကားဖြင့်အဖြေပေးရန်၊ သီအိုကရက်တစ်ဓမ္မအမှုကျောင်းတွင်ပါဝင်ဖို့ ပန်းတိုင်ထားရန် သားသမီးများအား ကူညီပေးပါ။ လယ်ကွင်းလုပ်ငန်းတွင် ချမှတ်ရန်ပန်းတိုင်ကောင်းများမှာ အိမ်တံခါးဝတွင် ဝေစာကမ်းခြင်း၊ ကျမ်းချက်တစ်ချက်ဖတ်ပေးခြင်း၊ မဂ္ဂဇင်းဝေငှခြင်း၊ အိမ်ရှင်များနှင့် အဓိပ္ပာယ်ရှိသောစကားစမြည်ပြောဆိုမှုများတွင် ပါဝင်စေခြင်းတို့ဖြစ်သည်။

^၆ စိတ်အားထက်သန်မှုရှိသောပုံသက်သေချမှတ်ပါ– သင့်ရင်သွေးတို့သည် သင် ယေဟောဝါအကြောင်းပြောကာ ကိုယ်တော်ထံဆုတောင်းသည်ကို နေ့စဉ်ကြားရပါသလော။ သင် နှုတ်ကပါဌ်တော်ကိုလေ့လာခြင်း၊ အစည်းအဝေးများတက်ခြင်း၊ လယ်ကွင်းဓမ္မအမှုတွင်ပါဝင်ခြင်းနှင့် ဘုရားသခင်၏အလိုတော်ထမ်းဆောင်ရာတွင် မွေ့ပျော်ခြင်းတို့ကို သူတို့တွေ့မြင်ပါသလော။ (ဆာ. ၄၀:၈) ၎င်းတို့ကို သူတို့တွေ့မြင်ရန်နှင့် သင်တို့အတူတကွလုပ်ဆောင်ကြရန် အရေးကြီး၏။ သားသမီးခြောက်ယောက်ကို သစ္စာရှိသောသက်သေခံများဖြစ်လာဖို့ ပြုစုပျိုးထောင်ပေးခဲ့သည့် မိခင်နှင့်ပတ်သက်ပြီး အရွယ်ရောက်သောသမီးတစ်ဦးက ဤသို့ဆိုသည်– “အမေ့ပုံသက်သေဟာ ကျွန်မတို့ကို အစွဲမှတ်စေဆုံးပဲ—အဲဒါဟာ အပြောထက်ပိုပြီးတာသွားတယ်။” သားသမီးလေးယောက်ရှိမိခင်တစ်ဦးက “‘ယေဟောဝါကို ရှေးဦးထားတယ်’ ဆိုတာဟာ ပြောနေကျ စကားစုမျှသာမဟုတ်ဘဲ ကျွန်မတို့လျှောက်လှမ်းနေတဲ့ အသက်တာလမ်းစဉ်ပါပဲ” ဟုပြောခဲ့သည်။

^၇ မိဘတို့၊ သင်တို့၏ရင်သွေးများအား စောစောစတင်လေ့ကျင့်ပါ၊ ၎င်းတို့အား ဘုရားသခင့်နှုတ်ကပါဌ်စကားတော်မှသမ္မာတရားကို သင်ကြားပေးပါ၊ အဆင့်တိုးပန်းတိုင်များနှင့် အကောင်းဆုံးပုံသက်သေကို ချမှတ်ပါ။ သင်သည် လုပ်ဆောင်ခဲ့ရာများမှ ပျော်ရွှင်မှုခံစားရမည်ဖြစ်သည်!