အသင်းတော်စာအုပ်ကြီးသင်တန်း—ယင်းကို ကျွန်ုပ်တို့အဘယ်ကြောင့်လိုအပ်ကြ

၁။ အသင်းတော်စာအုပ်ကြီး သင်တန်းအစီအစဉ်ကို မည်သို့စတင်ခဲ့ကြသနည်း။

^၁ ၁၈၉၅ ခုနှစ်တွင် ကျမ်းစာကျောင်းသားများဟုခေါ်သည့် ယေဟောဝါသက်သေများ၏ သင်တန်းအုပ်စုများအားအရုဏ်ဦးကျမ်းစာသင်တန်းဝိုင်းများဟူ၍ လူသိများခဲ့သည်။ အနှစ်တစ်ထောင်အရုဏ်ဦးစာအုပ်တွဲများကို သင်တန်းအတွက် အခြေခံစာအုပ်အဖြစ် အသုံးပြုခဲ့ကြသည်။ နောက်ပိုင်းတွင် ဤစုဝေးမှုများအား ဗေရိကျမ်းစာသင်တန်းဝိုင်းများဟူ၍ခေါ်ကြသည်။ (တ. ၁၇:၁၁) အုပ်စုငယ်တစ်ခုသည် အုပ်စုအတွက်အဆင်ပြေသည့် ညနေပိုင်းတစ်ခုတွင် လူနေအိမ်တစ်လုံး၌ စုဝေးလေ့ရှိကြသည်။ ဤစုဝေးမှုများသည် အသင်းတော်စာအုပ်ကြီးသင်တန်း၏ ရှေ့ပြေးများဖြစ်သည်။

၂။ ကျွန်ုပ်တို့သည် စာအုပ်ကြီးသင်တန်းတွင် မည်သို့ “အပြန်အလှန်အားပေးမှု” ဖြစ်စေနိုင်သနည်း။

^၂ အားပေးမှုနှင့်ကူညီမှု– စာအုပ်ကြီးသင်တန်းအုပ်စုများကိုတမင်သက်သက်ငယ်ထားရာ တက်ရောက်သူများသည် မိမိတို့၏ယုံကြည်ခြင်းကို ဖွင့်ဟဖော်ပြကြရန် အခွင့်အရေးပိုရရှိကြသည်။ “ယုံကြည်သောအားဖြင့် အချင်းချင်းအားရသက်သာခြင်း [“အပြန်အလှန်အားပေးမှု၊” ကဘ]” ရရှိကြသည်။—ရော. ၁:၁၂။

၃၊ ၄။ စာအုပ်ကြီးသင်တန်းအစီအစဉ်က ကျွန်ုပ်တို့၏ဓမ္မအမှုကိုကျေပွန်စေရန် မည်သို့ကူညီပေးသနည်း။

^၃ စာအုပ်ကြီးသင်တန်း ကြီးကြပ်မှူး၏သွန်သင်ပုံကို ဂရုပြုခြင်းက “သမ္မာတရားကို မှန်ကန်စွာပိုင်းခြား [“ကိုင်တွယ်၊” ကဘ] တတ်” ရန် ကျွန်ုပ်တို့ကို ကူညီပေးနိုင်သည်။ (၂ တိ. ၂:၁၅) အကြောင်းအရာ၏ ကျမ်းစာဆိုင်ရာအခြေအမြစ်ကို သူ မည်သို့အလေးပေးတင်ပြကြောင်း ဂရုပြုမှတ်သားပါ။ သုံးသပ်နေသည့်စာအုပ်အတွက် သင့်လျော်မည်ဆိုလျှင် သူသည် ကျမ်းစာကိုသာအသုံးပြုလျက် နိဂုံးပိုင်းကို ပြန်လည်သုံးသပ်ခြင်းအားဖြင့် အဓိကအချက်များကို ပေါ်လွင်စေနိုင်သည်။ သူ၏ကောင်းသောပုံသက်သေက ခရစ်ယာန်ဓမ္မအမှုတွင် ကျွန်ုပ်တို့၏သွန်သင်ခြင်းကို တိုးတက်စေရန် ကူညီပေးနိုင်သည်။—၁ ကော. ၁၁:၁။

^၄ အပတ်စဉ်သင်တန်း ကျင်းပသည့်အပြင် စာအုပ်ကြီးသင်တန်း ကြီးကြပ်မှူးသည် ဧဝံဂေလိတရားဟောပြောရာတွင် ဦးဆောင်မှုပြု၏။ သူသည် လုပ်ငန်းတော်ကြီးကြပ်မှူးနှင့် ပူးပေါင်းလုပ်ဆောင်ကာ လယ်ကွင်းလုပ်ငန်းအတွက် သင့်လျော်သော အစီအစဉ်များပြုလုပ်သည်။ သတင်းကောင်းဟောပြောရန်နှင့် တပည့်ဖြစ်စေရန်ဟူသော ခရစ်ယာန်တာဝန်ကို ကျေပွန်စွာထမ်းဆောင်ကြဖို့ အုပ်စုတွင်ရှိသောသူအားလုံးကိုလည်း ကြိုးစားကူညီပေးသည်။—မ. ၂၈:၁၉၊ ၂၀; ၁ ကော. ၉:၁၆။

၅။ စာအုပ်ကြီးသင်တန်းမှတစ်ဆင့် အဘယ်ပုဂ္ဂိုလ်ရေးအကူအညီ ရရှိနိုင်သနည်း။

^၅ စာအုပ်ကြီးသင်တန်း ကြီးကြပ်မှူးသည် အုပ်စုတွင်ရှိသောသူတစ်ဦးစီ၏ ဝိညာဏကောင်းကျိုးကို စိတ်ဝင်စားသည်။ သူသည် အသင်းတော်အစည်းအဝေးများတွင်သာမက လယ်ကွင်းလုပ်ငန်းတွင် အခြားသူများနှင့်အတူအမှုဆောင်စဉ် ဤစိတ်ဝင်စားမှုကိုပြသည်။ ဝိညာဉ်ဆုကျေးဇူးကိုဝေမျှရန် ညီအစ်ကိုများ၏အိမ်များသို့လည်ပတ်သည့် အခါသမယများကိုလည်းအသုံးပြုသည်။ လိုအပ်သည့်အခါတိုင်း ဝိညာဏအကူအညီအတွက် စာအုပ်ကြီးသင်တန်း ကြီးကြပ်မှူးထံချဉ်းကပ်လျှင် ကြိုဆိုခံရသည်ဟု အားလုံး ခံစားရသင့်သည်။—ဟေရှာ. ၃၂:၁၊ ၂။

၆။ (က) အချို့သောတိုင်းပြည်များရှိ ကျွန်ုပ်တို့၏ညီအစ်ကိုများသည် အုပ်စုငယ်များဖြင့် စုဝေးကြခြင်းဖြင့် မည်သို့ခွန်အားရရှိခဲ့ကြသနည်း။ (ခ) စာအုပ်ကြီးသင်တန်းအစီအစဉ်မှ သင်ကိုယ်တိုင် မည်သို့အကျိုးခံစားခဲ့ရပြီနည်း။

^၆ တစ်ဦးကိုတစ်ဦး ခွန်အားရှိစေပါ– ဘုရားသခင့်လူမျိုး၏လုပ်ငန်းကို ပိတ်ပင်ထားသောတိုင်းပြည်များတွင် ညီအစ်ကိုများသည် အုပ်စုငယ်များဖြင့် စုဝေးရလေ့ရှိ၏။ ညီအစ်ကိုတစ်ဦးက ဤသို့ပြန်ပြောပြသည်– “ကျွန်ုပ်တို့၏ခရစ်ယာန်လုပ်ငန်းများ ပိတ်ပင်ခံထားရသော်လည်း ဖြစ်နိုင်သည့်အခါတိုင်း ၁၀ ယောက်မှ ၁၅ ယောက်အထိရှိသည့်အုပ်စုများဖြင့် အပတ်စဉ်အစည်းအဝေးများ ကျင်းပခဲ့ကြသည်။ အစည်းအဝေးများမှသာမက ကျွန်ုပ်တို့၏ကျမ်းစာလေ့လာမှုနှင့် လေ့လာမှုပြီးနောက်ပေါင်းသင်းမှု နှစ်ခုစလုံးတို့မှ ဝိညာဏခွန်အားရရှိခဲ့ကြသည်။ တွေ့ကြုံမှုများအပြန်အလှန်ပြောကြရာ ကျွန်ုပ်တို့တစ်ဦးစီတွင် တူညီသောရုန်းကန်လှုပ်ရှားမှုရှိကြောင်း သိရှိခဲ့ရသည်။” (၁ ပေ. ၅:၉) အလားတူပင် ကျွန်ုပ်တို့လည်း အသင်းတော်စာအုပ်ကြီး သင်တန်းအစီအစဉ်ကို အပြည့်အဝထောက်ခံခြင်းဖြင့် တစ်ဦးကိုတစ်ဦး ခွန်အားပေးနိုင်ကြပါစေ။—ဧ. ၄:၁၆။