ကျမ်းစာကို ပို၍အလေးပေး!

၁။ မူလက ကင်းမျှော်စင် နှင့် ရွှေခေတ် ကို မည်သူတို့အတွက် အဓိကထုတ်ဝေခဲ့သနည်း။

^၁ ၁၉၁၉၊ အောက်တိုဘာ ၁ ရက်တွင် ရွှေခေတ် မဂ္ဂဇင်း၏ ပထမဆုံးစာစောင်ကို ထုတ်ဝေခဲ့သည်။ ယင်းသည် ဟောပြောခြင်းလုပ်ငန်းတွင် တန်ဖိုးအရှိဆုံးကိရိယာတစ်ခုဖြစ်ကြောင်း ထင်ရှားခဲ့သည်။ အဘယ်ကြောင့်နည်း။ ယင်းကို ပြည်သူလူထုအတွက် အထူးရည်စူးထုတ်ဝေထားသောကြောင့်ဖြစ်၏။ ယင်းသည် အဓိကအားဖြင့် “သိုးစုငယ်” အတွက်မဂ္ဂဇင်းအဖြစ် နှစ်ပေါင်းများစွာယူမှတ်ခဲ့သည့် ကင်းမျှော်စင် နှင့် မတူပေ။ (လု. ၁၂:၃၂) နိုင်ငံတော်ကြေညာသူများသည် နှစ်ပေါင်းများစွာအထိ ကင်းမျှော်စင် ထက်ပိုမိုထုတ်ဝေခဲ့သည့် ရွှေခေတ် ဟူသောစာပေအသစ်ကို အားတက်သရောတုံ့ပြန်ခဲ့ကြသည်။

၂။ ရွှေခေတ် ၏ ယနေ့အမည်ကား အဘယ်နည်း၊ ယင်း၏မူလရည်ရွယ်ချက်ကား အဘယ်နည်း။

^၂ လူသားတို့၏ပြဿနာများအတွက် စစ်မှန်သောဖြေရှင်းနည်းမှာ လူသားများအတွက် ရွှေခေတ်ကို အမှန်ဆောင်ကြဉ်းပေးမည့် ခရစ်တော်၏အနှစ်တစ်ထောင်အုပ်ချုပ်မှုဖြစ်ကြောင်း လူတို့အား ဖော်ပြရန် ရွှေခေတ် မဂ္ဂဇင်းကို ထုတ်ဝေခဲ့သည်။ နောက်ဆယ်စုနှစ်များအတွင်း ခေတ်ကာလ၏ ပြောင်းလဲနေသောလိုအပ်ရာများနှင့်ကိုက်ညီရန် ရွှေခေတ် ကို အတော်များများပြုပြင်ပြောင်းလဲခဲ့သည်။ ၁၉၃၇ ခုနှစ်တွင် ယင်း၏နာမည်ကို နှစ်သိမ့်မှု ဟူ၍ ပြောင်းခဲ့သည်။ ၁၉၄၆ ခုနှစ်တွင် ယနေ့ ကျွန်ုပ်တို့သိကြသည့် နိုးလော့! ဟူသောအမည်ကို ရရှိလာသည်။

၃။ အဘယ်ပရောဖက်ပြုချက်ကို ပြည့်စုံစေရာတွင် နိုးလော့! သည် တန်ခိုးပါသောကိရိယာတစ်ခုဖြစ်ခဲ့ပြီနည်း။

^၃ စတင်ထုတ်ဝေချိန်မှစ၍ ဤမဂ္ဂဇင်းသည် ၁၉၁၉ ခုနှစ်ကတည်းက လုပ်ဆောင်လာသည့် ကြီးမားသောသက်သေခံချက်ကို များစွာထောက်ကူပေးခဲ့သည်။ (မ. ၂၄:၁၄) သို့သော် ကျွန်ုပ်တို့ခေတ်ကာလ၏ အရေးတကြီးဖြစ်မှုကိုထောက်ရှုပြီး နိုးလော့! ကို နောက်ထပ်ပြုပြင်ပြောင်းလဲမှုများပြုလုပ်ခြင်းက ပညာရှိရာကျပုံပေါက်သည်။

၄။ (က) လူတစ်ဦးသည် ‘ယေဟောဝါ၏အမျက်ထွက်တော်မူသောနေ့’ တွင် ပုန်းရှောင်ရာကိုတွေ့ရှိလိုလျှင် အဘယ်အရာကို လုပ်ဆောင်ဖို့လိုသနည်း။ (ခ) ဗျာဒိတ် ၁၄:၆၊ ၇ အရ ‘ကောင်းကင်အလယ်၌ ပျံဝဲလျက်ရှိသောကောင်းကင်တမန်’ သည် အဘယ်အရာကို လုပ်ဆောင်ရန် အားလုံးကို ဖိတ်ခေါ်သနည်း။

^၄ နိုးလော့! သည် လောကီအကြောင်းအရာအမျိုးမျိုးကို နှစ်လို့ဖွယ်နည်းဖြင့် သုံးသပ်ထားသောကြောင့် လူသန်းပေါင်းများစွာသည် ၎င်းအားဖတ်ရှုရခြင်းကို နှစ်သက်ကြသည်။ နှစ်စဉ် သတိရအောက်မေ့ပွဲတက်ရောက်သူအများစုသည် နိုးလော့! ကို ပုံမှန်ဖတ်ရှုသူများဖြစ်ကြမည်မှာ သေချာသည်။ သို့သော် တစ်စုံတစ်ဦးသည် ‘ယေဟောဝါ၏အမျက်ထွက်တော်မူသောနေ့’ ၌ ပုန်းရှောင်ရာကိုတွေ့ရှိရန်မျှော်လင့်ပါက သူသည် ကျွန်ုပ်တို့၏စာပေများကို ပုံမှန်ဖတ်ရှုသူဖြစ်ရုံထက်မက ပိုမိုလုပ်ဆောင်ရန် အကူအညီလိုပါမည်။—ဇေ. ၂:၃; ဗျာ. ၁၄:၆၊ ၇။

၅။ (က) ၂၀၀၆၊ ဇန်နဝါရီလ နိုးလော့! မှစတင်၍ အဘယ်အရာကို ပို၍ထင်ထင်ရှားရှားသုံးသပ်မည်နည်း။ (ခ) များစွာသောသူတို့သည် အဘယ်အရာပြုလုပ်ရန် လှုံ့ဆော်ခံရနိုင်သနည်း၊ မည်သည့်ပရောဖက်ပြုချက် ပြည့်စုံမည်နည်း။

^၅ ထို့ကြောင့် ၂၀၀၆၊ ဇန်နဝါရီလမှစ၍ နိုးလော့! သည် ဘုရားသခင့်နိုင်ငံတော်ကို ပိုမိုအလေးပေးပါမည်။ ယင်းက စာရှုသူများအား သူတို့၏ပြဿနာဖြေရှင်းနည်းများအတွက် သမ္မာကျမ်းစာကိုအားထားရန် ပို၍ပွင့်လင်းစွာအားပေးမည်ဖြစ်ပြီး လတ်တလောဖြစ်ရပ်များဆိုင်ရာ ကျမ်းစာရှင်းပြချက်ကိုလည်း ပို၍အထင်အရှားပေါ်လွင်စေပါမည်။ ဤနည်းဖြင့် စာရှုသူများသည် လက်တလောဖြစ်ရပ်များကို ပိုမိုသဘောပေါက်မည်ဖြစ်ပြီး ယေဟောဝါအကြောင်း ပိုမိုသင်ယူလေ့လာရန် သူတို့ဖတ်ရှုသည့်အရာက သူတို့အား လှုံ့ဆော်ပေးနိုင်ဖွယ်ရှိသည်။—ဇာ. ၈:၂၃။

၆၊ ၇။ (က) ၁ သက်သာလောနိတ် ၂:၁၃ ကိုလက်တွေ့ကျင့်သုံးရန် နိုးလော့! က လူများစွာအား မည်သို့ကူညီပေးမည်နည်း။ (ခ) အင်္ဂလိပ်ဘာသာစကားဖြင့် နိုးလော့! ကို အကြိမ်မည်မျှ ထုတ်ဝေမည်နည်း၊ ပြောင်းလဲမှုက ဘာသာစကားမည်မျှအပေါ် အကျိုးသက်ရောက်မှုရှိမည်နည်း။

^၆ နိုးလော့! သည် လူအများစိတ်ဝင်စားမည့် အကြောင်းအရာများကို ဆက်လက်သုံးသပ်မည်။ သို့သော် ကျမ်းစာကို ပို၍အလေးပေးလိမ့်မည်။ (၁ သက်. ၂:၁၃) ကင်းမျှော်စင် တွင် နက်နဲသည့် ကျမ်းစာဆိုင်ရာအချက်အလက်များပါဝင်သည့်အပြင် နိုးလော့! သည် နောက်ထပ်ကျမ်းစာအခြေပြုအကြောင်းအရာများကို သုံးသပ်မည်ဖြစ်ရာ အင်္ဂလိပ်ဘာသာစကားဖြင့် နိုးလော့! ကို တစ်လလျှင် နှစ်ကြိမ် ဆက်လက်ထုတ်ဝေရန် လိုအပ်မည့်ပုံမပေါက်ချေ။ ထို့ကြောင့် ၂၀၀၆၊ ဇန်နဝါရီလထုတ်မှစ၍ အင်္ဂလိပ်ဘာသာစကားဖြင့် နိုးလော့! ကို တစ်လတစ်ကြိမ်ထုတ်မဂ္ဂဇင်းအဖြစ် ထုတ်ဝေပါမည်။ ဤသို့ပြုခြင်းဖြင့် ကြိုတင်ပြင်ဆင်ခြင်း၊ ဘာသာပြန်ခြင်းနှင့် စာအုပ်စာတမ်းထုပ်ပို့ခြင်းတို့တွင် အတော်အတန်ရိုးရှင်းလွယ်ကူစေမည်ဖြစ်သည်။

^၇ ဤပြောင်းလဲမှုက နိုးလော့! ကိုထုတ်ဝေသည့် ဘာသာစကား ၄၀ ရာခိုင်နှုန်းခန့်အပေါ် အကျိုးသက်ရောက်မှုရှိလိမ့်မည်။ ဘာသာစကားအများစုတွင် နိုးလော့! သည် တစ်လတစ်ကြိမ် သို့မဟုတ် သုံးလတစ်ကြိမ်ထုတ်စာပေဖြစ်နှင့်နေပြီဖြစ်သည်။ ကင်းမျှော်စင် မူ ပြောင်းလဲခြင်းရှိမည်မဟုတ်ချေ။

၈။ ကြေညာသူများသည် ကင်းမျှော်စင် နှင့်အတူ နိုးလော့! ကို မည်သို့အသုံးပြုနိုင်သနည်း။

^၈ ကြေညာသူများသည် တစ်လနှစ်မျိုးထုတ် ကင်းမျှော်စင် မှတစ်မျိုးမျိုးနှင့်အတူ တစ်လစီ၏ နိုးလော့! ကို ဝေငှနိုင်သည်။ အင်္ဂလိပ်ဘာသာစကားဖြင့် နိုးလော့! ကိုဝေငှသူများသည် ယခုကဲ့သို့ တင်ဆက်မှုကို တစ်လနှစ်မျိုးပြောင်းစရာမလိုဘဲ တစ်လလုံးတွင် တစ်မျိုးတည်းကို အသုံးပြုနိုင်မည်ဖြစ်သည်။

၉။ နိုးလော့! သည် အဘယ်အခန်းကဏ္ဍမှ ဆက်လက်ပါဝင်မည်နည်း။

^၉ ၁၉၁၉ ခုနှစ်တွင် ၎င်းကို ဦးဆုံးထုတ်ဝေချိန်မှစ၍ ရွှေခေတ်၊ နှစ်သိမ့်မှု နှင့် ယခု နိုးလော့! ဟူ၍ အဆင့်ဆင့်သိရှိလာခဲ့သောမဂ္ဂဇင်းသည် ဟောပြောခြင်းလုပ်ငန်းတွင် အဓိကအခန်းကဏ္ဍမှပါဝင်ခဲ့ပေပြီ။ ၎င်း၏ပြန်လည်ပြင်ဆင်ထားသည့်ပုံစံဖြင့် မဂ္ဂဇင်းဖြန့်ဝေမှုအပေါ် ယေဟောဝါ ဆက်လက်ကောင်းချီးပေးဖို့နှင့် ဤမဂ္ဂဇင်းက တစ်ခုတည်းသောမျှော်လင့်ချက်အဖြစ် ဘုရားသခင်၏နိုင်ငံတော်ကို အားထားရန် “အသီးအသီးဘာသာစကားကိုပြောသော လူအမျိုးအနွယ်ခပ်သိမ်း” တို့အထဲမှ နောက်ထပ်လူများစွာတို့အား ကူညီပေးဖို့ ကျွန်ုပ်တို့ဆုတောင်းပါသည်။—ဗျာ. ၇:၉။