ရဲရင့်သော်လည်း အသင့်အတင့်နေကြ

^၁ ကျွန်ုပ်တို့ဟောပြောရမည့်လူများစွာသည် ကျမ်းစာနှင့်ဆန့်ကျင်သော ယုံကြည်ချက်များကို စိတ်ရင်းမှန်ဖြင့် ခံယူထားကြသည်။ ကျွန်ုပ်တို့သည် ရဲရင့်စွာဟောပြောကြသော်လည်း “လူအပေါင်းတို့နှင့် အသင့်အတင့်နေ” လိုကြပြီး မလိုအပ်သောဆန့်ကျင်မှုများကို ရှောင်လိုကြသည်။ (ရော. ၁၂:၁၈; တ. ၄:၂၉၊ ၃၀) နိုင်ငံတော်သတင်းတရားကို ရဲရင့်စွာကြေညာစဉ် မည်သို့ အသင့်အတင့်နေနိုင်သနည်း။

^၂ နှစ်ဦးနှစ်ဖက် သဘောတူညီချက်များကိုရှာပါ– အသင့်အတင့်နေသောသူသည် အငြင်းပွားမှုများကို ရှောင်သည်။ အိမ်ရှင်၏ခိုင်မာသောယုံကြည်ချက်များကို မလိုအပ်ဘဲ ချေပပြောဆိုခြင်းက ကျွန်ုပ်တို့၏သတင်းတရားကို လက်ခံစေမည်မဟုတ်ပါ။ သူ့ပြောဆိုချက်မှားယွင်းသည့်တိုင် သဘောတူညီမှုရနိုင်မည့်အချက်တစ်ချက်ကို လိမ္မာပါးနပ်စွာပြောပြနိုင်သည်။ နှစ်ဦးနှစ်ဖက်လက်ခံနိုင်ရာကို အလေးပေးပြောဆိုခြင်းဖြင့် အပျက်သဘောထားကို ဖယ်ရှားစေနိုင်ပြီး လူတို့၏နှလုံးကိုထိမိစေနိုင်သည်။

^၃ အိမ်ရှင်၏မှားယွင်းသောအမြင်ကို လျစ်လျူရှုလိုက်ပါကအလျှော့ပေးလိုက်လျောရာ သို့မဟုတ် အမှန်တရား၏တန်ဖိုးကို လျော့ပေါ့စေရာကျသလော။ မကျပါ။ ခရစ်ယာန်ဓမ္မအမှုဆောင်များအဖြစ် ကျွန်ုပ်တို့၏တာဝန်မှာ ကြုံတွေ့ရသည့် ယူဆချက်အမှားများကို ချေပရန်မဟုတ်ဘဲ ဘုရားသခင့်နိုင်ငံတော်သတင်းကောင်း ဟောပြောရန်သာဖြစ်သည်။ (မ. ၂၄:၁၄) အိမ်ရှင်၏ မှားယွင်းသောအမြင်ကို လွန်ကဲစွာတုံ့ပြန်မည့်အစား ထိုသူ၏အတွေးအခေါ်ကို ထိုးထွင်းသိမြင်နိုင်သည့်အခွင့်အရေးအဖြစ် ယင်းကိုရှုမြင်ပါ။—သု. ၁၆:၂၃။

^၄ ဂုဏ်သိက္ခာကို မထိပါးနှင့်– မှားယွင်းသောသွန်သင်ချက်များကို ရဲစွမ်းသတ္တိရှိရှိချေပပြောဆိုရမည့် အချိန်အခါများရှိပါသည်။ သို့သော် အသင့်အတင့်နေသောသူများအနေနှင့် ကျွန်ုပ်တို့သည် အမှားကို ယုံကြည်လက်ခံသွန်သင်သူများအား ခနဲ့သော၊ ရှုတ်ချသောအသုံးအနှုန်းများ မပြောဆိုကြပေ။ အထက်စီးဆန်သောသဘောထားက မိတ်ပျက်စေပြီး နှိမ့်ချကြင်နာသောအပြုအမူက အမှန်တရားချစ်မြတ်နိုးသူတို့၏စိတ်ကို စေ့ဆော်ပေးသည်။ နားထောင်သူများနှင့် သူတို့၏ယုံကြည်ချက်များကို လေးစားမှုတင်ပြခြင်းဖြင့် သူတို့၏ဂုဏ်သိက္ခာကို မထိပါးစေဘဲ သတင်းကောင်းလက်ခံရ လွယ်ကူစေပေမည်။

^၅ တမန်တော်ပေါလုသည် မိမိဟောပြောသူများ၏ ယုံကြည်ချက်များကို ထည့်စဉ်းစားပြီး သူတို့နှလုံးကိုထိမိစေမည့်နည်းဖြင့် သတင်းကောင်းဟောပြောရန် ကြိုးစားခဲ့သည်။ (တ. ၁၇:၂၂-၃၁) သူသည် “အချို့သောသူတို့ကို တစ်စုံတစ်ခုသောအမှုအရာအားဖြင့် ကယ်တင်ခြင်းအလို့ငှာ” လိုလိုလားလားဖြင့် “ခပ်သိမ်းသောသူတို့၌ ခပ်သိမ်းသောအရာဖြစ်” ခဲ့သည်။ (၁ ကော. ၉:၂၂) သတင်းကောင်းကို ရဲရင့်စွာဟောပြောစဉ် အသင့်အတင့်နေခြင်းဖြင့် ကျွန်ုပ်တို့လည်း ထပ်တူပြုနိုင်ပါသည်။