ယေဟောဝါ၏အမှုတော်တွင် ကျွန်ုပ်တို့ကိုယ်ကို ဝမ်းမြောက်စွာ အသုံးတော်ခံကြ!

^၁ တမန်တော်ပေါလုသည် ခရစ်ယာန်ဓမ္မအမှုကို ကျေပွန်စေရန် “ကိုယ်ဥစ္စာကိုလည်းကောင်း၊ ကိုယ်ကိုလည်းကောင်း ကုန်စေခြင်းငှာ အလွန်စေတနာရှိ၏။” (၂ ကော. ၁၂:၁၅) အလားတူ၊ ယနေ့ ခရစ်ယာန်များလည်း ရှေ့ဆောင်များအဖြစ် ဝီရိယရှိရှိအမှုဆောင်လျက်ရှိကြသည်။ မိသားစုတာဝန်များဖြင့် အလုပ်များနေသူတို့လည်း ဓမ္မအမှုတွင် ပတ်စဉ်ပါဝင်နိုင်ရန် အစီအစဉ်ဆွဲကြသည်။ ကျန်းမာရေးပြဿနာများ ကြုံနေရသူတို့လည်း နိုင်ငံတော်အကျိုးစီးပွား တိုးတက်ရေးတွင် တတ်နိုင်သလောက် ပါဝင်အမှုဆောင်နေကြသည်။ ယေဟောဝါ၏လူမျိုးသည် အသက်အရွယ်၊ အခြေအနေ မည်သို့ပင်ရှိပါစေ ကိုယ်တော့်လုပ်ငန်းတော်မြတ်တွင် မိမိတို့ကိုယ်ကို အသုံးတော်ခံနေကြကြောင်း တွေ့မြင်ရခြင်းက မည်မျှအားရှိစရာပါတကား!

^၂ လူသားချင်းကိုချစ်ပါ– ယေဟောဝါနှင့် လူသားချင်းကိုချစ်သောမေတ္တာကြောင့် ကိုယ်တော့်အမှုတော်ကို အတတ်နိုင်ဆုံး ဆောင်ရွက်ခြင်းက စင်ကြယ်သောသြတ္တပ္ပစိတ်ရှိစေသည်။ ပေါလုသည် သတင်းကောင်းဝေမျှရာတွင် မိမိအသက်ကိုပင် ပေးခဲ့သောကြောင့် “လူအပေါင်းတို့၏အသွေးနှင့် ငါကင်းလွတ်သည်ဟု ယနေ့၌ သင်တို့အား ငါသက်သေခံ၏” ဟုပြောဆိုနိုင်ခဲ့သည်။ (တ. ၂၀:၂၄၊ ၂၆; ၁ သက်. ၂:၈) ဓမ္မအမှုတွင် ကျွန်ုပ်တို့၏အခြေအနေခွင့်ပြုသရွေ့ အတတ်နိုင်ဆုံးပါဝင်ခြင်းဖြင့် သွေးပြစ်သင့်ခြင်းမှ ကာကွယ်ပေးပါလိမ့်မည်။—ယေဇ. ၃:၁၈-၂၁။

^၃ အခြားသူများကို ကူညီရာတွင် ကိုယ့်ကိုယ်ကိုအသုံးတော်ခံခြင်းသည် ကျွန်ုပ်တို့ကိုပျော်ရွှင်စေ၏။ (တ. ၂၀:၃၅) ညီအစ်ကိုတစ်ဦး ဤသို့ဆို၏– “တစ်နေ့လုံး ယေဟောဝါအမှုတော်ဆောင်ပြီး ညနေ အိမ်ပြန်ရောက်တော့ ကျွန်တော် သိပ်မောပန်းနေပြီ။ ဒါပေမဲ့ ကျွန်တော်ပျော်တယ်။ ဘယ်သူမှမလုယူနိုင်တဲ့ ပျော်ရွှင်မှုမျိုး ကျွန်တော်ခံစားရတဲ့အတွက် ယေဟောဝါကို ကျေးဇူးတင်တယ်။”

^၄ ဘုရားသခင်ကိုချစ်ပါ– ယေဟောဝါ၏အမှုတော်တွင် ကျွန်ုပ်တို့ကိုယ်ကို အသုံးတော်ခံလိုသည့် အဓိကအကြောင်းရင်းမှာ ယင်းက ကောင်းကင်ခမည်းတော်၏ စိတ်တော်ကို ရွှင်လန်းစေသောကြောင့်ဖြစ်၏။ ဘုရားသခင်ကိုချစ်သောမေတ္တာက ဟောပြောခြင်းနှင့် တပည့်ဖြစ်စေခြင်း အပါအဝင် ကိုယ်တော့်အမိန့်တော်များကို လိုက်နာရန် လှုံ့ဆော်ပေးသည်။ (၁ ယော. ၅:၃) လူတို့ လျစ်လျူရှု၊ ဆန့်ကျင်ကြသည့်တိုင် ယေဟောဝါအတွက် ကျွန်ုပ်တို့ရွှင်လန်းစွာ ဆက်ကြိုးစားလုပ်ဆောင်ကြသည်။

^၅ ယခုအချိန်သည် အရှိန်လျှော့လိုက်ရမည့်အချိန် မဟုတ်ပေ။ ကျွန်ုပ်တို့သည် ရိတ်သိမ်းချိန်အတွင်း အသက်ရှင်နေကြ၏။ (မ. ၉:၃၇) လယ်သမားတစ်ဦးသည် ရိတ်သိမ်းချိန်အတွင်း မနားတမ်းကြိုးစားလုပ်ဆောင်လေ့ရှိသည်။ အကြောင်းမှာ ကောက်နှံများမပျက်စီးမီ ရိတ်သိမ်းရန် အချိန်အကန့်အသတ်သာ ရှိသောကြောင့်ဖြစ်၏။ အလားတူ၊ ဝိညာဏရိတ်သိမ်းခြင်းလုပ်ငန်းတွင်လည်း အချိန်အကန့်အသတ်သာရှိပါသည်။ ထို့ကြောင့် ကျွန်ုပ်တို့အသက်ရှင်နေသည့် အချိန်ကာလကို စိတ်စွဲမှတ်ထားပြီး ဓမ္မအမှုတွင် ဆက်၍ကြိုးစားအားထုတ်ကြပါစို့။—လု. ၁၃:၂၄; ၁ ကော. ၇:၂၉-၃၁။