“ဆောင်ရွက်စရာလုပ်ငန်းတံခါးကြီး” ထဲသင်ဝင်ရောက်နိုင်မည်လော

၁။ အဘယ် “ဆောင်ရွက်စရာလုပ်ငန်းတံခါးကြီး” သည် ကျွန်ုပ်တို့အတွက် ဖွင့်လျက်ရှိသနည်း။

^၁ “ဆောင်ရွက်စရာလုပ်ငန်းတံခါးကြီးသည် အဆင်သင့်၍ ဖွင့်လျက်ရှိ” သောကြောင့် တမန်တော်ပေါလုသည် ဆန့်ကျင်မှုများကြားမှ နိုင်ငံတော်အကျိုးစီးပွားတိုးတက်စေမည့် အခွင့်အလမ်းများကို အပြည့်အဝအသုံးချခဲ့သည်။ (၁ ကော. ၁၆:၉၊ ကဘ) ယနေ့လည်း ကမ္ဘာတစ်ဝန်းတွင် နိုင်ငံတော်ကြေညာသူပေါင်း ၆၄၂,၀၀၀ သည် မှန်မှန်ရှေ့ဆောင်အဖြစ် အမှုဆောင်ခြင်းဖြင့် ဆောင်ရွက်စရာလုပ်ငန်းတံခါးကြီးထဲ ဝင်ရောက်ခဲ့ကြသည်။

၂။ ကျွန်ုပ်တို့၏အခြေအနေကို မကြာခဏပြန်ဆန်းစစ်ခြင်းက အဘယ်ကြောင့်သင့်လျော်သနည်း။

^၂ အခြေအနေအပြောင်းအလဲ– ကျွန်ုပ်တို့၏လက်ရှိအခြေအနေကြောင့် အကန့်အသတ်ဖြင့်သာ လုပ်ဆောင်နိုင်မည်ဖြစ်သော်လည်း ထိုအခြေအနေများ ပြောင်းလဲနိုင်ပါသည်။ ထို့ကြောင့် အကောင်းဆုံးအခြေအနေဖြစ်လာသည့်အထိ စောင့်ဆိုင်းနေမည့်အစား ကျွန်ုပ်တို့၏လက်ရှိအခြေအနေကို မကြာခဏပြန်ဆန်းစစ်ခြင်းက သင့်လျော်ပါသည်။ (ဒေ. ၁၁:၄) သင်သည် အထက်တန်းကျောင်းပြီးတော့မည့် ကျောင်းသားတစ်ဦးလော။ ကျောင်းတက်တော့မည့် သားသမီးများရှိသော မိဘတစ်ဦးလော။ လောကအလုပ်မှ အငြိမ်းစားယူတော့မည့်သူလော။ ထိုသို့သောအခြေအနေအပြောင်းအလဲများက သင့်အတွက် အချိန်ပိုမိုရရှိစေသောကြောင့် မှန်မှန်ရှေ့ဆောင်လုပ်နိုင်ရန် လမ်းပွင့်စေသည်။ ယခင်က ကျန်းမာရေးချို့တဲ့ခဲ့သော ညီအစ်မတစ်ဦးသည် အသက် ၈၉ နှစ်အရွယ်တွင် ရှေ့ဆောင်တစ်ဦးအဖြစ် စာရင်းသွင်းရန် ဆုံးဖြတ်ခဲ့သည်။ အဘယ်ကြောင့်နည်း။ သူ ဆေးရုံမတက်ရသည်မှာ တစ်နှစ်ကျော်ရှိပြီဖြစ်ရာ ရှေ့ဆောင်လုပ်နိုင်မည်ဟု ယူဆသောကြောင့်ဖြစ်၏။

၃။ အချို့သည် မှန်မှန်ရှေ့ဆောင်လုပ်နိုင်ရန် အဘယ်ပြုပြင်ပြောင်းလဲမှုများ လုပ်ဆောင်ခဲ့သနည်း။

^၃ ပေါလု၏အဖြစ်ကို သုံးသပ်ကြည့်လျှင် အစတွင် သူသည် ကောရိန္သုမြို့ရှိ ညီအစ်ကိုများထံ သွားရောက်လည်ပတ်မည်ဟု ရည်ရွယ်ထား၏။ သို့သော် သတင်းကောင်းအတွက် သူ၏အစီအစဉ်များကို ပြုပြင်ပြောင်းလဲခဲ့သည်။ ယနေ့လည်း မှန်မှန်ရှေ့ဆောင်များစွာသည် ရှေ့ဆောင်လုပ်နိုင်ရန် ပြုပြင်ပြောင်းလဲမှုများစွာ လုပ်ဆောင်ခဲ့ရသည်။ အချို့မူ နေထိုင်စားသောက်စရိတ်ကာမိစေရန် အချိန်ပိုင်းအလုပ်ကိုလုပ်ဆောင်သည့်အထိ မိမိတို့ဘဝကို ရိုးရှင်းစေခဲ့ကြသည်။ ထို့ကြောင့် သူတို့၏လုပ်ငန်းတော်အခွင့်ထူးအတွက် ရွှင်လန်းနေကြသည်။ (၁ တိ. ၆:၆-၈) မောင်နှံစုံအချို့သည် လင်ယောက်ျား၏ဝင်ငွေတစ်ခုတည်းဖြင့် ရပ်တည်နိုင်ရန် အပြောင်းအလဲများလုပ်ဆောင်ခြင်းဖြင့် ဇနီးဖြစ်သူမှာ ရှေ့ဆောင်လုပ်နိုင်ခဲ့သည်။

၄။ သတ်မှတ်နာရီ မပြည့်မီမည်ကို စိုးရိမ်နေပါက အဘယ်အရာလုပ်ဆောင်နိုင်သနည်း။

^၄ သတ်မှတ်နာရီ မပြည့်မီမည်ကို စိုးရိမ်သောကြောင့် ရှေ့ဆောင်မလုပ်နိုင်ဟု ချက်ချင်းမယူဆလိုက်ပါနှင့်။ တစ်ရက်လျှင် နှစ်နာရီကျော်ကျော်သာ လိုအပ်သည်။ သင်လုပ်ဆောင်နိုင်မည်ကို မသေမချာဖြစ်နေပါက နာရီ ၇၀ ပန်းတိုင်ထားကာ အရန်ရှေ့ဆောင်အဖြစ် တစ်လ၊ နှစ်လ စမ်းကြည့်ပါ။ ယင်းက ရှေ့ဆောင်လုပ်ငန်း၏ပျော်ရွှင်မှုကို မြည်းစမ်းခွင့်ရစေပေမည်။ (ဆာ. ၃၄:၈) ရှေ့ဆောင်လုပ်နေသူများနှင့် ပြောဆိုဆွေးနွေးပါ။ သူတို့သည် သင်ကြုံနေရသောအခက်အခဲများကို ကျော်လွှားအောင်မြင်ခဲ့ပြီးဖြစ်ပေမည်။ (သု. ၁၅:၂၂) ဓမ္မအမှုကိုတိုးချဲ့ရန် သင်၏ကြိုးစားလုပ်ဆောင်မှုများအပေါ် ကောင်းချီးပေးဖို့ ယေဟောဝါထံဆုတောင်းပါ။—၁ ယော. ၅:၁၄။

၅။ မှန်မှန်ရှေ့ဆောင်လုပ်ငန်းသည် အဘယ်ကြောင့် လုပ်ဆောင်ရကျိုးနပ်သနည်း။

^၅ လုပ်ဆောင်ရကျိုးနပ်သောလုပ်ငန်း– မှန်မှန်ရှေ့ဆောင်အဖြစ် အမှုဆောင်ခြင်းက ကောင်းချီးများစွာ ရရှိစေသည်။ သာ၍ပေးကမ်းစွန့်ကြဲခြင်းမှရရှိသော ရွှင်လန်းမှုကို ခံစားရစေသည်။ (တ. ၂၀:၃၅) ရှေ့ဆောင်လုပ်ခြင်းက သမ္မာတရားကို မှန်ကန်စွာပိုင်းခြားနိုင်စွမ်း တိုးတက်စေသည်။ (၂ တိ. ၂:၁၅) ယေဟောဝါ၏ထောက်မကူညီမှုကို ခံစားနိုင်မည့် အခွင့်အလမ်းများစွာ ရရှိစေသည်။ (တ. ၁၁:၂၁; ဖိ. ၄:၁၁-၁၃) ထို့ပြင် ခံနိုင်ရည်ကဲ့သို့သော ဝိညာဏအရည်အသွေးများကို မွေးမြူနိုင်ရန် ကူညီပေးပြီး ယေဟောဝါနှင့် ပို၍ရင်းနှီးကျွမ်းဝင်စေပါလိမ့်မည်။ (ယာ. ၄:၈) သင်သည် ဆောင်ရွက်စရာလုပ်ငန်းတံခါးကြီးထဲ ဝင်ရောက်ပြီး မှန်မှန်ရှေ့ဆောင်လုပ်နိုင်မည်လော။