ပရောဖက်တွေရဲ့ စံနမူနာကို တုပပါ —နာဟုံ

၁။ နာဟုံကျမ်းကနေ ကျွန်ုပ်တို့ ဘာသိရှိရသလဲ။

^၁ နာဟုံ ကြိုဟောထားတဲ့အတိုင်း ယေဟောဝါဘုရားဟာ ရန်သူတွေကို ကလဲ့စားချေတဲ့ဘုရားဖြစ်ပြီး အင်အားကြီးတဲ့ ရန်သူတွေတောင် ကိုယ်တော့်ကို အန်တုနိုင်မှာ မဟုတ်ဘူးဆိုတာ ရှေးခေတ်နိနေဝေမြို့ရဲ့ အပျက်အယွင်းတွေက သက်သေထူနေတယ်။ (နာ. ၁:၂၊ ၆) နာဟုံရဲ့ ပရောဖက်ပြုချက်ကို သေချာလေ့လာကြည့်တဲ့အခါ အမှုဆောင်လုပ်ငန်းအတွက် သင်ခန်းစာတွေကို ရရှိနိုင်ပါတယ်။

၂။ နာဟုံတင်ဆက်သလိုမျိုး ကျွန်ုပ်တို့လည်း သတင်းကောင်းအဖြစ် ဘယ်လို တင်ဆက်နိုင်သလဲ။

^၂ နှစ်သိမ့်မှုနဲ့ မျှော်လင့်ချက်ပေး– နာဟုံကျမ်းကို အပေါ်ယံဖတ်ကြည့်တဲ့အခါ အဆီးရီးယားလူမျိုးရဲ့ ခိုင်ခံ့တဲ့မြို့တော် နိနေဝေကို ဖျက်ဆီးမယ့် ကြေညာချက်ကိုပဲ မှတ်တမ်းတင်ထားတယ်လို့ ထင်ရနိုင်တယ်။ (နာ. ၁:၁; ၃:၇) ဒါပေမဲ့ ဒီကြေညာချက်က ယေဟောဝါဘုရားရဲ့ လူတွေအတွက်တော့ သတင်းကောင်းပဲ။ နာဟုံဆိုတဲ့နာမည်က “နှစ်သိမ့်ပေးသူ” လို့အဓိပ္ပာယ်ရှိတယ်။ မကြာခင် ရန်သူတွေ ရှိတော့မှာမဟုတ်ဘူးဆိုတဲ့ သတင်းနဲ့ ဂျူးတွေကို သူ နှစ်သိမ့်ပေးခဲ့တယ်။ ယေဟောဝါဘုရားဟာ “ဒုက္ခရောက်တဲ့နေ့မှာ ရဲတိုက်” ဖြစ်တယ်လို့လည်း နာဟုံ အာမခံခဲ့တယ်။ (နာ. ၁:၇၊ ကဘ) ကျွန်ုပ်တို့လည်း သတင်းကောင်းကို ဟောပြောပြီး ယေဟောဝါဘုရားကို ခိုလှုံဖို့ လူတွေကို တိုက်တွန်းကြပါတယ်။—နာ. ၁:၁၅။

၃။ ပုံဥပမာတွေအသုံးပြုခဲ့တဲ့ နာဟုံကို ဘယ်လိုတုပနိုင်သလဲ။

^၃ ပုံဥပမာတွေကို အသုံးပြုပါ– နိနေဝေမြို့ရဲ့ ပျက်စီးခြင်းကို အီဂျစ်ပြည်ရဲ့ မြို့တစ်မြို့ဖြစ်တဲ့ သီးဘီး (နောမုန်) မြို့ရဲ့ ပျက်စီးခြင်းနဲ့ နှိုင်းယှဉ်ဖော်ပြဖို့ နာဟုံကို ယေဟောဝါဘုရား မိန့်မှာခဲ့တယ်။ သီးဘီးမြို့ဟာ အဆီးရီးယားလူတွေ အရင်က ဖျက်ဆီးခဲ့တဲ့မြို့ဖြစ်တယ်။ (နာ. ၃:၈-၁၀) ကျွန်ုပ်တို့လည်း ဒီစနစ်ဆိုးကြီး ပျက်စီးတော့မယ့်အကြောင်း ပြောတဲ့အခါ ယေဟောဝါဘုရားရဲ့စကားတွေဟာ တစ်လုံးမကျန် ပြည့်စုံခဲ့တယ်ဆိုတာ ဖော်ပြတဲ့ ကျမ်းစာပရောဖက်ပြုချက်တွေကို အသုံးပြုနိုင်ပါတယ်။ ဥပမာ၊ ဗာဗုလုန်နဲ့ မေဒိလူတွေဟာ ဘီစီ ၆၃၂ မှာနိနေဝေမြို့ကို လာတိုက်တဲ့အခါ မိုးအကြီးအကျယ်ရွာပြီး တိုက်ဂရစ္စမြစ်ရေလျှံခဲ့တဲ့အတွက် ခိုင်ခံ့တဲ့မြို့ရိုးတွေ ပြိုလဲသွားတယ်။ အဲဒီနောက် နိနေဝေမြို့ဟာ ယေဟောဝါပြောတဲ့အတိုင်း အလျင်အမြန် ကျဆုံးသွားတယ်။—နာ. ၁:၈; ၂:၆။

၄။ အမှုဆောင်လုပ်ငန်းမှာ ရှင်းရှင်းလင်းလင်းနဲ့ နားလည်လွယ်အောင် ဘယ်လိုပြောပြနိုင်သလဲ။

^၄ ရှင်းရှင်းလင်းလင်းနဲ့ နားလည်လွယ်အောင်ပြောပါ– နာဟုံဟာ ရုပ်လုံးပေါ်အောင် ရေးထားတဲ့အတွက် သူပြောချင်တဲ့ အချက်အလက်တွေကို ရှင်းရှင်းလင်းလင်း သိနိုင်ပါတယ်။ (နာ. ၁:၁၄; ၃:၁) ကျွန်ုပ်တို့လည်း နားလည်လွယ်တဲ့ အသုံးအနှုန်းတွေကို သုံးချင်ကြတယ်။ (၁ ကော. ၁၄:၉) တစ်အိမ်တက်ဆင်းသွားတဲ့အခါ လာရတဲ့အကြောင်းရင်းကို ရှင်းရှင်းလင်းလင်း ပြောပြပါ။ ကျမ်းစာသင်ပေးတဲ့အခါ ယေဟောဝါဘုရားနဲ့ ကိုယ်တော့်ရဲ့စကားတော်အပေါ် ယုံကြည်ခြင်း တိုးများလာအောင်၊ ကျမ်းစာသတင်းတရားက သူတို့အတွက် ဘယ်လိုအကျိုးရှိတယ်ဆိုတာ နားလည်လာအောင် ကူညီပေးပါ။—ရော. ၁၀:၁၄။

၅။ နာဟုံရဲ့ ကြိုဟောချက်ကနေ ဘာနှစ်သိမ့်မှု ရနိုင်သလဲ။

^၅ နာဟုံဟာ ယေဟောဝါဘုရားရဲ့ စကားတွေ အတိအကျ ပြည့်စုံလာမယ်ဆိုတာ ယုံကြည်ခဲ့တယ်လို့ နာဟုံကျမ်းမှာ ရှင်းရှင်းလင်းလင်း ဖော်ပြထားပါတယ်။ စာတန့်စနစ် ကုန်ဆုံးဖို့ နီးလာတာနဲ့အမျှ “ဒုက္ခက ဒုတိယအကြိမ် ရောက်လာမှာမဟုတ်ဘူး” ဆိုတဲ့ ဘုရားပေးကတိကနေ ကျွန်ုပ်တို့ နှစ်သိမ့်မှု ရနိုင်ပါတယ်။—နာ. ၁:၉၊ ကဘ။