ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
ဇန်နဝါရီ ၁–၇
ကျမ်းစာထဲက အဖိုးတန်ဘဏ္ဍာများ | မဿဲ ၁–၃
“ကောင်းကင်နိုင်ငံနီးနေပြီ”
nwtsty မ ၃:၂ လေ့လာမှု မှတ်စု
ဟောပြော– ဂရိစကားလုံးမှာ “စေတမန်တစ်ယောက် အနေနဲ့ လူအများကို ကြေညာတာ” လို့အဓိပ္ပာယ် ရှိတယ်။ လူတစ်စုကို ဟောတာမျိုးမဟုတ်ဘဲ လဟာပြင်မှာရှိတဲ့ လူအများရှေ့ ကြေညာတာဖြစ်တယ်။
နိုင်ငံ– ဂရိစကားလုံးက ba·si·leiʹa ဖြစ်ပြီး ဒီမှာ ပထမဆုံး တွေ့ရတယ်။ ဘုရင်တစ်ပါး အုပ်ချုပ်တဲ့ အစိုးရ၊ နယ်မြေ၊ ပြည်သူတွေကို ရည်ညွှန်းတယ်။ ဒီဂရိစကားလုံးကို ခရစ်ယာန်ဂရိကျမ်းစာစောင်တွေမှာ ၁၆၂ ကြိမ်တွေ့ရပြီး မဿဲကျမ်းမှာ ၅၅ ကြိမ်ပါတယ်။ အများစုက ဘုရားသခင့် ကောင်းကင်အုပ်ချုပ်မှုကို ရည်ညွှန်းတယ်။ ဒီစကားလုံးကို မဿဲက အကြိမ်ကြိမ်သုံးထားတဲ့အတွက် သူ့ကျမ်းကို နိုင်ငံတော်သတင်းကောင်းကျမ်းလို့ ခေါ်နိုင်တယ်။
ကောင်းကင်နိုင်ငံ– ဒီအသုံးအနှုန်းကို မဿဲခရစ်ဝင်ကျမ်း တစ်ခုထဲမှာပဲ တွေ့ရပြီး အကြိမ် ၃၀ လောက် ပါတယ်။ မာကုနဲ့ လုကာကျမ်းထဲမှာတော့ “ဘုရားသခင့် နိုင်ငံတော်၊” “ဘုရားသခင်ရဲ့ နိုင်ငံတော်” လို့သုံးနှုန်းထားပြီး အဲဒါက ကောင်းကင်ကနေ အုပ်ချုပ်မယ့် ဘုရားသခင်ရဲ့ နိုင်ငံတော်ကို ဆိုလိုတယ်။—မ ၂၁:၄၃။ မာ ၁:၁၅။ လု ၄:၄၃။ ဒံ ၂:၄၄။ ၂တိ ၄:၁၈။
နီးနေပြီ– ဒီနေရာမှာတော့ ကောင်းကင်း နိုင်ငံတော်ရဲ့ အုပ်စိုးရှင် မကြာခင် ပေါ်လာတော့မယ်ဆိုတဲ့ အဓိပ္ပာယ်ရှိတယ်။
nwtsty မ ၃:၄ မီဒီယာ
နှစ်ခြင်းဆရာယောဟန်ရဲ့ အဝတ်အစားနဲ့ အသွင်အပြင်
ယောဟန်က ကုလားအုတ်မွေးနဲ့ရက်တဲ့ အဝတ်ကိုဝတ်ပြီး သားရေခါးပတ် ဒါမှမဟုတ် ပစ္စည်းအသေးလေးတွေ ထည့်လို့ရတဲ့ ခါးပန်းကို စည်းထားတယ်။ ပရောဖက် ဧလိယလည်း အဲဒီလို ဝတ်ဆင်ခဲ့တယ်။ (၂ဘု ၁:၈) ကုလားအုတ်အမွေးနဲ့ရက်တဲ့ အထည်တွေဟာ ကြမ်းတဲ့အတွက် အဲဒါကို ဆင်းရဲသားတွေပဲ ဝတ်ကြတယ်။ ဒါပေမဲ့ ပိုးထည်၊ ချည်ထည်တွေကိုတော့ ချမ်းသာတဲ့သူတွေ ဝတ်တယ်။ (မ ၁၁:၇-၉) ယောဟန်ဟာ မွေးကတည်းက နာဇရိလူ ဖြစ်တဲ့အတွက် ဆံပင်မညှပ်ပဲနေတာ ဖြစ်နိုင်တယ်။ သူ့ရဲ့ အဝတ်အစားနဲ့ အသွင်အပြင်က ဘုရားအလိုတော်ကို အပြည့်အဝ လုပ်ဆောင်နိုင်ဖို့ ရိုးရိုးရှင်းရှင်း နေထိုင်သူဖြစ်ကြောင်း ချက်ချင်း သိမြင်စေတယ်။
ကျိုင်းကောင်
ကျမ်းစာမှာ ဖော်ပြတဲ့ ကျိုင်းကောင်ဟာ စမ်းသပ်ဦးမှင်တံပါတဲ့ နှံကောင်အမျိုးအစားဖြစ်ပြီး အုပ်လိုက် သွားလာတဲ့အကောင်တွေ ဖြစ်တယ်။ ဂျေရုဆလင်က ဆန်းစစ်ချက်တစ်ခုအရ ကန္တာရကျိုင်းကောင်တွေမှာ ပရိုတင်း ၇၅ ရာခိုင်နှုန်းပါကြောင်း သိရတယ်။ ကျိုင်းကောင်ကို စားတဲ့အခါ ခေါင်း၊ ခြေထောက်၊ အတောင်နဲ့ ကလီစာတွေကို ဖယ်လိုက်ကြတယ်။ ကျန်တဲ့အပိုင်းကို အစိမ်း ဒါမှမဟုတ် ချက်စားကြတယ်။ သူ့အရသာက ပုစွန်၊ ဂဏန်း အရသာနဲ့တူပြီး ပရိုတင်းဓာတ်အပြည့်ပဲ။
တောထဲက ပျားရည်
ပုံတွေက ပျားရိုင်းတွေ ဆောက်ထားတဲ့ ပျားအိမ် (၁) နဲ့ ပျားရည်အပြည့်ပါတဲ့ ပျားလပို့ (၂) ဖြစ်တယ်။ ယောဟန်စားခဲ့တဲ့ ပျားရည်က အဲဒီဒေသမှာရှိတဲ့ ပျားအရိုင်းမျိုး (Apis mellifera syriaca) ဖြစ်နိုင်တယ်။ ဒီပျားမျိုးက ပူပြင်းခြောက်သွေ့တဲ့ ယုဒတောမှာ နေနိုင်ပြီး မွေးမြူလို့မရဘူး။ ဒါပေမဲ့ ဘီစီ ကိုးရာစုလောက်ကတည်းက အစ္စရေးတွေဟာ မြေအိုးတွေထဲမှာ ပျားမွေးမြူရေး လုပ်ခဲ့ကြတယ်။ ဂျော်ဒန်မြစ်ဝှမ်းမှာရှိတဲ့ အခု တဲလ်ရီဟိုဗ် လို့ခေါ်တဲ့ဒေသမှာ ပျားဖယောင်း အပိုင်းအစ အများကြီးကို တွေ့ရှိခဲ့တယ်။ အခု တူရကီလို့ခေါ်တဲ့ နေရာက ပျားမျိုးတွေကို မွေးမြူခဲ့ပုံရတယ်။
ရှာဖွေလေ့လာ ဘုရားရေးရာရတနာ
nwtsty မ ၁:၃ လေ့လာမှု မှတ်စု
တာမာ– မဿဲကျမ်းပါ မေရှိယရဲ့ ဆွေစဉ်မျိုးဆက်စာရင်းထဲမှာ ဖော်ပြထားတဲ့ အမျိုးသမီးငါးဦးထဲက ဦးဆုံးဖော်ပြခံရသူ ဖြစ်တယ်။ နောက်လေးယောက်က တစ်ပါးအမျိုးသားဖြစ်တဲ့ ရာခပ်နဲ့ ရုသ (အခန်းငယ် ၅)၊ ပြီးတော့ ဥရိယရဲ့ဇနီး ဗာသရှေဗ (အခန်းငယ် ၆)၊ မာရိ (အခန်းငယ် ၁၆) တို့ဖြစ်တယ်။ အမျိုးသားတွေပဲပါတဲ့ ဆွေစဉ်မျိုးဆက်စာရင်းမှာ ဒီအမျိုးသမီးတွေကို ထည့်သွင်းရတာက သူတို့ဟာ တစ်ယောက်တစ်မျိုးစီ ထူးခြားတဲ့နည်းနဲ့ ယေရှုရဲ့ ဘေးမတွေဖြစ်လာကြလို့ ဖြစ်မယ်။
nwtsty မ ၃:၁၁ လေ့လာမှု မှတ်စု
နှစ်ခြင်းပေး– “နှစ်ခြင်း” ဆိုတဲ့စကားလုံးဟာ “နှစ်သည်၊ နစ်မြှုပ်စေသည်” လို့အဓိပ္ပာယ်ရှိတဲ့ ဂရိစကားလုံး (ba·ptiʹzo) ကနေ ဆင်းသက်လာတယ်။ တခြား ကျမ်းစာရည်ညွှန်းကျမ်းတွေအရ နှစ်ခြင်းပေးတာဟာ ရေထဲမှာ လုံးလုံးနှစ်မြှုပ်လိုက်တာကို ဆိုလိုတယ်။ တစ်ကြိမ်မှာ ယောဟန်ဟာ ဂျော်ဒန်မြစ်ဝှမ်း၊ ရှာလိမ်မြို့အနီးက “ရေအိုင်ကြီးတစ်အိုင်မှာ” နှစ်ခြင်းပေးခဲ့တယ်။ (ယဟ ၃:၂၃) အီသီယိုးပီးယား မိန်းမစိုးကို ဖိလိပ္ပု နှစ်ခြင်းပေးတဲ့အခါ “နှစ်ယောက်သား ရေထဲဆင်း” ခဲ့ကြတယ်။ (တ ၈:၃၈) နေမန်ဟာ “ဂျော်ဒန်မြစ်ထဲ ဆင်းပြီး ခုနစ်ကြိမ် နှစ်လိုက်” တယ်လို့ စက်ပ်တွားဂျင့်ကျမ်းရဲ့ ၂ ဘုရင်များ ၅:၁၄ မှာ ဖော်ပြတဲ့အခါ တူညီတဲ့ဂရိစကားလုံးကို သုံးထားတယ်။
ဇန်နဝါရီ ၈-၁၄
ကျမ်းစာထဲက အဖိုးတန်ဘဏ္ဍာများ | မဿဲ ၄–၅
“ယေရှုရဲ့ တောင်ပေါ်ဒေသနာကနေရတဲ့ သင်ခန်းစာများ”
nwtsty မ ၅:၃ လေ့လာမှု မှတ်စု
ပျော်ရွှင်ချမ်းမြေ့– လူတစ်ယောက် ရိုးရိုးပျော်ရွှင်တာကိုပဲ ပြောနေတာမဟုတ်ဘူး။ လူတွေနဲ့ပတ်သက်ပြီးပြောရင် ဘုရားသခင်ရဲ့ ကောင်းချီးနဲ့ မျက်နှာသာ ခံစားရလို့ ရရှိတဲ့ ပျော်ရွှင်မှုကို ဖော်ပြတယ်။ ဘုရားသခင်နဲ့ ယေရှုရဲ့ ကောင်းကင်ဘုန်းအသရေကို ဖော်ပြဖို့လည်း ဒီအသုံးအနှုန်းကို အသုံးပြုတယ်။—၁တိ ၁:၁၁။ ၆:၁၅။
ဘုရားသခင်ကို မှီခိုဖို့ လိုအပ်မှန်း သိမြင်သူတွေ– “သိမြင်သူတွေ၊” စာသားအရ “ဆင်းရဲသူတွေ (လိုအပ်နေသူ၊ မွဲတေနေသူ၊ တောင်းစားသူတွေ)” လို့ဘာသာပြန်တဲ့ ဂရိစကားလုံးရဲ့ ရှေ့နောက်စကားကို ကြည့်လိုက်ရင် ဘုရားသခင်ရဲ့ အကူအညီ လိုအပ်မှန်း တကယ်သိမြင်သူတွေနဲ့ပတ်သက်ပြီး အသုံးပြုထားတာ ဖြစ်တယ်။ လုကာ ၁၆:၂၀၊ ၂၂ မှာ “သူတောင်းစား” လာဇရုကို ရည်ညွှန်းတဲ့အခါ အဲဒီစကားလုံးကို သုံးထားတယ်။ “စိတ်ဝိညာဉ်၌ ဆင်းရဲသောသူ” လို့ ဘာသာပြန်ကျမ်းတချို့ ပြန်ဆိုတဲ့အခါ သူတို့ဟာ ဘုရားတရားဘက်မှာ ဆင်းရဲနွမ်းပါးနေပြီး ဘုရားကို တကယ်လိုအပ်နေတယ်လို့ အသိအမှတ်ပြုသူတွေကို ဆိုလိုတယ်။
nwtsty မ ၅:၇ လေ့လာမှု မှတ်စု
သနားကြင်နာ– ကျမ်းစာမှာသုံးထားတဲ့ “သနားကြင်နာတတ်သူ၊” “သနားကြင်နာ” ဆိုတာက ခွင့်လွှတ်တာ ဒါမှမဟုတ် တရားစီရင်တဲ့အခါ သက်ညှာတာကိုပဲ ပြောနေတာမဟုတ်ဘူး။ တကယ် အကူအညီ လိုအပ်နေသူကို ကိုယ်ကစပြီး ကူညီပေးချင်တဲ့ သနားကြင်နာစိတ်ကို များသောအားဖြင့် ဖော်ပြတာဖြစ်တယ်။
nwtsty မ ၅:၉ လေ့လာမှု မှတ်စု
ငြိမ်သက်မှုရှိအောင် လုပ်ဆောင်သူတွေ– ငြိမ်သက်မှုကို ထိန်းသိမ်းသူသာမဟုတ်ဘဲ မငြိမ်မသက်ဖြစ်နေတာကို ငြိမ်သက်အောင် လုပ်ပေးနိုင်သူဖြစ်တယ်။
သင့်ကလေးကို သူတစ်ပါးနှင့် အသင့်အတင့်နေတတ်ရန် သွန်သင်ပေးပါ
“သူတစ်ပါးနှင့် အသင့်အတင့်နေခြင်းကို ရှာ၍ မီအောင်လိုက်” နိုင်ဖို့ ကလေးတို့အား လေ့ကျင့်ပေးခြင်းကို ခရစ်ယာန်မိဘများ အလွန်စိတ်ဝင်စားကြသည်။ (၁ ပေတရု ၃:၁၁) သံသယရှိခြင်း၊ စိတ်ပျက်ခြင်း၊ ရန်ငြိုးထားခြင်းစသော ခံစားချက်များကို အနိုင်ယူပြီး ရန်ငြိမ်းစေသူတစ်ဦးဖြစ်ရန် အလွန်ကြိုးစားအားထုတ်ရ၏။ သို့သော် ယင်းမှ ပျော်ရွှင်မှုခံစားရသောကြောင့် ကြိုးစားရကျိုးနပ်ပါသည်။
ရှာဖွေလေ့လာ ဘုရားရေးရာရတနာ
nwtsty မ ၄:၉ လေ့လာမှု မှတ်စု
တစ်ကြိမ်ပဲ ရှိခိုးဦးချ– “ရှိခိုးဦးချ” လို့ ပြန်ဆိုတဲ့ ဂရိစကားလုံးက ခေတ္တခဏသာကြာတဲ့ လုပ်ရပ်ကို ရည်ညွှန်းတယ်။ “တစ်ကြိမ်ပဲ ရှိခိုးဦးချ” လို့ ပြန်ဆိုတဲ့ ဂရိစကားလုံးအရ မာရ်နတ်ဟာ သူ့ကို ယေရှု ဆက်ဝတ်ပြုသွားဖို့ တောင်းဆိုတာမဟုတ်ဘဲ တစ်ကြိမ်သာ လုပ်ခိုင်းတာ ဖြစ်တယ်။
nwtsty မ ၄:၂၃ လေ့လာမှု မှတ်စု
သွန်သင် . . . ဟောပြော– သွန်သင်တာနဲ့ ဟောပြောတာက မတူဘူး။ သွန်သင်ပေးသူဆိုတာ ပြောပြရုံသာမဟုတ်ဘဲ ညွှန်ကြားပေးတယ်၊ ရှင်းပြတယ်၊ ယုံကြည်အောင် ပြောဆိုပြီး သက်သေပြပေးတယ်။
ဇန်နဝါရီ ၁၅–၂၁
ကျမ်းစာထဲက အဖိုးတန်ဘဏ္ဍာများ | မဿဲ ၆–၇
“ဘုရားသခင့်နိုင်ငံတော်ကို အမြဲဦးစားထားပါ”
bhs ၁၇၈ ပိုဒ်. ၁၂
ဆုတောင်းခြင်း အခွင့်ထူး
၁၂ ဆုတောင်းတဲ့အခါ ဘာကို အဓိကထားရမလဲ။ ယေဟောဝါနဲ့ အလိုတော်ကို အဓိကထားရမယ်။ ကျွန်တော်တို့အတွက် ဘုရား လုပ်ပေးခဲ့တာမှန်သမျှအတွက် လှိုက်လှိုက်လှဲလှဲ ကျေးဇူးတင်ကြောင်း ပြောနိုင်တယ်။ (၁ ရာဇဝင်ချုပ် ၂၉:၁၀-၁၃) ယေရှု မြေကြီးပေါ်ရှိတုန်းက တပည့်တွေကို သင်ပေးခဲ့တဲ့ ဆုတောင်းချက်ကနေ ဒီအချက်ကို သိနိုင်တယ်။ (မဿဲ ၆:၉-၁၃ ကိုဖတ်ပါ။) ဦးဆုံးအနေနဲ့၊ ဘုရားနာမည် သန့်ရှင်းမြင့်မြတ်ခြင်းရှိဖို့ ဆုတောင်းရမယ်။ အဲဒီနောက် နိုင်ငံတော်လာဖို့၊ ကမ္ဘာမြေပေါ် အလိုတော်ပြည့်စုံစေဖို့ ဆုတောင်းရမယ်လို့ ယေရှုပြောတယ်။ အဲဒါတွေကို အဓိကထား ဆုတောင်းပြီးနောက်မှ ကိုယ်လိုအပ်တာတွေကို တောင်းပါလို့ ယေရှုပြောတယ်။ ယေဟောဝါနဲ့ အလိုတော်ကို ဦးစားထားဆုတောင်းမယ်ဆိုရင် ကျွန်တော်တို့ ဘာကို အဓိကထားသလဲဆိုတာ ဖော်ပြရာရောက်တယ်။
nwtsty မ ၆:၂၄ လေ့လာမှု မှတ်စု
အစေခံ– ဂရိစကားလုံးအရ သခင်တစ်ယောက် ပိုင်တဲ့ကျွန်ကို ရည်ညွှန်းတယ်။ ခရစ်ယာန်တွေဟာ ဘုရားသခင်ကို ဝတ်ပြုရင်း တစ်ချိန်တည်းမှာ ပစ္စည်းဥစ္စာပိုင်ဆိုင်ဖို့ ကြိုးစားနေလို့ မရဘူးဆိုပြီး ယေရှု ပြောနေတာ ဖြစ်တယ်။
nwtsty မ ၆:၃၃ လေ့လာမှု မှတ်စု
အမြဲ ဦးစားထားကြပါ– ဂရိကြိယာက ဆက်တိုက်လုပ်ရပ်ကို ရည်ညွှန်းတဲ့အတွက် “ဆက်ပြီးရှာနေပါ” လို့ ပြန်ဆိုနိုင်တယ်။ ခရစ်တော်ရဲ့ နောက်လိုက်တွေဟာ နိုင်ငံတော်ကို ခဏရှာလိုက်၊ တခြားအရာတွေကို ရှာလိုက် လုပ်လို့မရဘူး။ အဲဒီအစား ဘဝမှာ နိုင်ငံတော်ကို အမြဲဦးစားထားရတယ်။
နိုင်ငံတော်– ရှေးခေတ်ဂရိ လက်ရေးစာမူတချို့မှာ “ဘုရားသခင့် နိုင်ငံတော်” လို့ ဖတ်ရတယ်။
ဖြောင့်မတ်ခြင်း– ဘုရားသခင်ရဲ့ ဖြောင့်မတ်ခြင်းကို ဦးစားထားတဲ့သူတွေဟာ ဘုရားအလိုတော်ကိုဆောင်ဖို့ အသင့်ရှိတယ်၊ အမှားအမှန်နဲ့ပတ်သက်တဲ့ ဘုရားရဲ့ စံနှုန်းတွေကို လိုက်နာကြတယ်။ ဒီသွန်သင်ချက်က ကိုယ်ဖြောင့်မတ်တယ်ဆိုတာကို ပြတတ်တဲ့ ဖာရိရှဲတွေရဲ့ သွန်သင်ချက်နဲ့ လုံးလုံးဆန့်ကျင်တယ်။—မ ၅:၂၀။
က၁၆.၀၇ ၁၂ ပိုဒ်. ၁၈
ပစ္စည်းဥစ္စာတွေကိုမဟုတ်ဘဲ နိုင်ငံတော်ကို ဦးစားထားပါ
၁၈ မဿဲ ၆:၃၃ ကိုဖတ်ပါ။ ဘဝမှာ နိုင်ငံတော်ကို ဦးစားထားရင် လိုအပ်ရာအားလုံးကို ယေဟောဝါ ပြင်ဆင်ပေးလိမ့်မယ်။ အဲဒီကတိကို ဘာကြောင့် ယုံကြည်စိတ်ချနိုင်သလဲ။ “ဤအရာအားလုံးကို သင်တို့လိုအပ်ကြောင်း ကောင်းကင်ဘုံရှိ သင်တို့၏အဖ သိတော်မူ၏” လို့ ယေရှု ပြောတယ်။ သင် လိုအပ်တာကို သင်ကိုယ်တိုင် မသိခင်မှာတောင် ယေဟောဝါ သိတယ်။ (ဖိ. ၄:၁၉) ဘယ်အချိန်မှာ အဝတ်အစားအသစ် လိုအပ်တယ်ဆိုတာ ကိုယ်တော်သိတယ်။ ဘာအစားအစာ လိုအပ်တယ်ဆိုတာလည်း သိတယ်။ သင်နဲ့ သင့်မိသားစုအတွက် နေစရာလိုအပ်တယ်ဆိုတာလည်း သိတယ်။ သင် အမှန်တကယ် လိုအပ်ရာကို ရရှိအောင် ယေဟောဝါ စီစဉ်ပေးပါလိမ့်မယ်။
ရှာဖွေလေ့လာ ဘုရားရေးရာရတနာ
အမှုဆောင်လုပ်ငန်းမှာ ရွှေပညတ်ကို လိုက်နာပါ
၁၄ သင်မသိတဲ့သူတစ်ယောက်က သင့်ကို ဖုန်းဆက်ပြီး သင် ဘယ်လို အစားအစာ ကြိုက်သလဲလို့မေးတယ် ဆိုပါစို့။ ဖုန်းဆက်တဲ့သူက ဘယ်သူလဲ၊ သူ ဘာကြောင့် အဲဒီလိုလုပ်တာလဲလို့ သင်စဉ်းစားမှာပဲ။ သင်က မရိုင်းပျချင်လို့ သူနဲ့ စကားနည်းနည်းပဲ ပြောပြီး စကားဖြတ်လိုက်မှာ ဖြစ်တယ်။ အခု ဒီဥပမာကို စဉ်းစားကြည့်ပါ– သင့်ဆီကို အဲဒီလိုဖုန်းမျိုးပဲ ထပ်လာတယ်၊ ဒါပေမဲ့ ဖုန်းဆက်တဲ့သူက သူ ဘယ်သူလဲဆိုတာ ပြောပြတယ်။ သူ့ရဲ့အလုပ်က လူတွေ ကျန်းမာရေးနဲ့ ညီညွတ်တဲ့ အစားအသောက် စားဖို့ ကူညီပေးတဲ့ အလုပ်ဖြစ်တယ်လို့ ပြောပြတယ်။ သင့်အတွက် အကျိုးရှိမယ့် အချက်အလက်တချို့ ပြောပြချင်တယ်လို့ ယဉ်ယဉ်ကျေးကျေး ပြောတယ်။ သူပြောတာကို သင် နားထောင်ချင်မှာဖြစ်တယ်။ အမှန်အတိုင်းပြောရရင် ကိုယ်နဲ့စကားပြောတဲ့သူက သူ့ကိုယ်သူ လျှို့ဝှက်မထားတာကို ကျွန်ုပ်တို့ ကြိုက်ကြတယ်။ ကျွန်ုပ်တို့နဲ့ တွေ့တဲ့သူတွေကို အဲဒီလိုလေးစားမှုမျိုး ဘယ်လို ပြနိုင်သလဲ။
၁၅ ကျွန်ုပ်တို့ လာရတဲ့ အကြောင်းရင်းကို အိမ်ရှင်တွေကို ရှင်းရှင်းလင်းလင်း ပြောပြသင့်တယ်။ ကျွန်ုပ်တို့မှာ အိမ်ရှင်တွေကြားဖို့လိုတဲ့ အဖိုးတန် အချက်အလက်တွေ ရှိတယ်ဆိုတာ မှန်ပါတယ်။ ဒါပေမဲ့ ကိုယ်က ဘယ်သူလဲ၊ ဘာကြောင့် လာသလဲဆိုတာကို မပြောပြဘဲ အိမ်ရှင်ကို တွေ့တာနဲ့ “ကမ္ဘာပေါ်မှာရှိတဲ့ ပြဿနာတိုင်းကို ခင်ဗျား ဖြေရှင်းနိုင်မယ်ဆိုရင် ဘယ်ပြဿနာကို ခင်ဗျား ဖြေရှင်းပေးမလဲ” လို့ မေးလိုက်တယ်ဆိုပါစို့။ ကျွန်ုပ်တို့က အိမ်ရှင်စိတ်ထဲမှာ ဘာရှိသလဲ ဆိုတာ သိချင်လို့ မေးခွန်းမေးလိုက်တာ ဖြစ်တယ်။ ဒါမှ ကျမ်းစာမှာပါတဲ့အကြောင်း ပြောပြနိုင်မယ်။ ဒါပေမဲ့ အိမ်ရှင်က ‘ဒီလူက ဘယ်သူလဲ။ ဘာဖြစ်လို့ ငါ့ကို ဒီမေးခွန်းမေးတာလဲ။ ဘာအတွက်လဲ’ လို့ စဉ်းစားမိနိုင်တယ်။ ဒါကြောင့် ကျွန်ုပ်တို့နဲ့ စကားပြောတဲ့အခါ အိမ်ရှင်ကို သက်သောင့်သက်သာ ရှိစေသင့်ပါတယ်။ (ဖိ. ၂:၃၊ ၄) ဘယ်လို လုပ်နိုင်ပါသလဲ။
၁၆ နယ်လှည့်ကြီးကြပ်မှူး တစ်ယောက် ဒီလိုလုပ်တယ်– အိမ်ရှင်ကို နှုတ်ဆက်ပြီးတဲ့အခါ အမှန်တရားကို သင်သိလိုပါသလော ဝေစာပေးရင်း “ဒီနေ့ ဒီရပ်ကွက်မှာ လူတိုင်းကို ဒီဝေစာ တစ်စောင်စီ လိုက်ပေးနေပါတယ်။ ဒီထဲမှာ လူတွေမေးနေကျ မေးခွန်းခြောက်ခုကို ဆွေးနွေးထားတယ်။ ဒါကတော့ ခင်ဗျားအတွက်ပါ။” ညီအစ်ကိုက သူဘာကြောင့်လာတယ်ဆိုတာ အိမ်ရှင်တွေ သိသွားတဲ့အခါမှာ အများစုက သက်သောင့်သက်သာ ဖြစ်သွားပြီး စကားဆက်ပြောဖို့ လွယ်ကူသွားတယ်လို့ ပြောပြတယ်။ အဲဒီနောက် ညီအစ်ကိုက အိမ်ရှင်ကို “ခင်ဗျားကော ဒီထဲကမေးခွန်းတစ်ခုခုကို မေးဖူးသလား” လို့ မေးလိုက်တယ်။ အိမ်ရှင်က မေးခွန်းတစ်ခုကို ပြောတယ်ဆိုရင် ညီအစ်ကိုက ဝေစာကိုဖွင့်တယ်၊ အဲဒီနောက် အဲဒီမေးခွန်းနဲ့ ပတ်သက်ပြီး ကျမ်းစာမှာ ဘယ်လို ပြောထားသလဲဆိုတာကို ဆွေးနွေးတယ်။ အိမ်ရှင်က ဘယ်မေးခွန်းကိုမှ မပြောဘူးဆိုရင် ညီအစ်ကိုက မေးခွန်းတစ်ခုကိုရွေးပြီး အိမ်ရှင်ကို ကသိကအောက် မဖြစ်စေဘဲ စကားဆက်ပြောတယ်။ စကားစမြည်စပြောနိုင်တဲ့ နည်းလမ်းတွေ အများကြီးရှိပါတယ်။ တချို့ဒေသတွေမှာဆိုရင် ကျွန်ုပ်တို့ လာရတဲ့ အကြောင်းကို မပြောပြခင် လူတွေကို နှုတ်ဆက်တဲ့အခါ လိုက်နာရတဲ့ ဓလေ့ထုံးစံ တချို့ရှိတယ်။ သတင်းကောင်းကို လူတွေ နားထောင်ချင်လာအောင် ကျွန်ုပ်တို့ရဲ့ တင်ဆက်နည်းကို ပြုပြင်ပြောင်းလဲဖို့ အရေးကြီးတယ်ဆိုတာ နားလည်ဖို့လိုတယ်။
nwtsty မ ၇:၂၈၊ ၂၉ လေ့လာမှု မှတ်စု
အံ့ဩကြ– ဒီဂရိကြိယာကို “မယုံနိုင်လောက်အောင် အံ့ဩမှင်တက်သွားတယ်” လို့ အဓိပ္ပာယ် ဖွင့်နိုင်တယ်။ လူအုပ်က ယေရှုရဲ့သွန်သင်ချက်တွေကို အချိန်အတော်ကြာ စွဲမှတ်နေမယ်ဆိုတာ ဖော်ပြတယ်။
ယေရှုရဲ့သွန်သင်ပုံ– ဒီအသုံးအနှုန်းက တောင်ပေါ်ဒေသနာ ဟောချိန်မှာ ယေရှု အသုံးပြုခဲ့တဲ့ သွန်သင်ပုံ၊ သွန်သင်နည်း အားလုံးကို ရည်ညွှန်းတယ်။
ကျမ်းတတ်တွေလို မဟုတ်ဘဲ– ယေရှုဟာ ကျမ်းတတ်တွေလို ရဗ္ဗိဆရာတွေရဲ့ စကားကို ကိုးကားမယ့်အစား ဘုရားရဲ့တရားတော်ကို အခြေခံပြီး ယေဟောဝါရဲ့ ကိုယ်စားလှယ်တစ်ယောက်လို၊ အခွင့်အာဏာရှိသူတစ်ယောက်လို သွန်သင်ပေးတယ်။—ယဟ ၇:၁၆။
ဇန်နဝါရီ ၂၂–၂၈
ကျမ်းစာထဲက အဖိုးတန်ဘဏ္ဍာများ | မဿဲ ၈–၉
“လူတွေကို ယေရှု ချစ်တယ်”
nwtsty မ ၈:၃ လေ့လာမှု မှတ်စု
လှမ်းကိုင်ပြီး– တခြားသူတွေ မညစ်ညူးစေဖို့ အနာကြီးရောဂါသည်တွေကို သီးခြားခွဲထားဖို့ မောရှေပညတ်မှာ ဆိုတယ်။ (ဝ ၁၃:၄၅၊ ၄၆။ တလ ၅:၁-၄) ဂျူးဘာသာရေး ခေါင်းဆောင်တွေကတော့ နောက်ထပ် စည်းမျဉ်းတွေ ထုတ်တယ်။ ဥပမာ၊ အနာကြီးရောဂါသည်နဲ့ ခြောက်ပေအကွာမှာ၊ လေတိုက်တဲ့ရက်ဆိုရင် ပေ ၁၅၀ အကွာမှာ နေဖို့ စည်းမျဉ်းထုတ်တယ်။ ဒါကြောင့်လည်း အနာကြီးရောဂါသည်တွေကို မညှာမတာ ဆက်ဆံလာကြတယ်။ ထုံးတမ်းစဉ်လာအဆိုတစ်ခုမှာ ရဗ္ဗိတစ်ယောက်က အနာကြီး ရောဂါသည်တွေကို ရှောင်တယ်၊ နောက်တစ်ယောက်ဆိုရင် သူတို့ကို ခဲနဲ့ပေါက်ပြီး မောင်းထုတ်တယ်လို့ ဖော်ပြတယ်၊ အဲဒါကို အပြစ်မမြင်ကြဘူး။ ယေရှုကျတော့ အနာကြီးရောဂါသည်ကို စကားတစ်ခွန်းနဲ့ပဲ ကုသပေးနိုင်လျက်နဲ့ သနားလွန်းလို့ သူ့ကို လှမ်းကိုင်ပြီး ကုသပေးခဲ့တယ်။ ဒီလိုလုပ်ဖို့ ဂျူးတွေ စဉ်းတောင်စဉ်းစားမှာ မဟုတ်ဘူး။—မ ၈:၅-၁၂။
ဆန္ဒရှိတာပေါ့– အကူအညီတောင်းတဲ့သူကို ဝတ်ကျေတမ်းကျေ ပြောလိုက်တာ မဟုတ်ဘဲ တလိုတလား ကူညီပေးချင်တဲ့ဆန္ဒ ရှိတယ်ဆိုတာ ပေါ်လွင်တဲ့ အသုံးအနှုန်းဖြစ်တယ်။
nwtsty မ ၉:၁၀ လေ့လာမှု မှတ်စု
စားသောက်– ဒါမှမဟုတ် “စားပွဲ၌လျောင်း ။” တစ်ယောက်ယောက်နဲ့ စားပွဲမှာလျောင်း တယ်ဆိုတာ အဲဒီလူနဲ့ ခင်မင်ရင်းနှီးတယ်ဆိုတာ ပြတယ်။ ယေရှုခေတ်က ဂျူးတွေဟာ ဂျူးမဟုတ်သူတွေနဲ့ တစ်စားပွဲတည်း လျောင်း ပြီး စားသောက်တာမျိုး မလုပ်ကြဘူး။
အခွန်ခံတွေ– ဂျူးအတော်များများဟာ ရောမအာဏာပိုင်တွေအတွက် အခွန် ကောက်ပေးကြတယ်။ လူတွေက သူတို့ကို မုန်းတယ်။ အကြောင်းက သူတို့ဟာ တိုင်းတစ်ပါးအုပ်စိုးသူတွေနဲ့ ပူးပေါင်းတဲ့အပြင် အစိုးရသတ်မှတ်နှုန်းထက် အခွန်ငွေ ပိုကောက်လို့ဖြစ်တယ်။ တခြားဂျူးတွေက အခွန်ခံတွေကို အပြစ်သားတွေ၊ ပြည့်တန်ဆာတွေနဲ့ တစ်တန်းတစ်စားတည်းထားပြီး ရှောင်ကြဉ်ကြတယ်။—မ ၁၁:၁၉။ ၂၁:၃၂။
nwtsty မ ၉:၃၆ လေ့လာမှု မှတ်စု
သနား– ဒီအသုံးအနှုန်းရဲ့ ဂရိကြိယာက splag·khniʹzo·mai ဖြစ်ပြီး “အူ” (splagʹkhna) ဆိုတဲ့ စကားလုံးနဲ့ ဆက်စပ်တဲ့အတွက် ကိုယ်ခန္ဓာအတွင်းအကျဆုံး စိတ်လှုပ်ရှားမှု၊ ပြင်းပြတဲ့ခံစားချက်ကို ဆိုလိုတယ်။ အဲဒါက ဂရိစကားမှာ သနားတဲ့ခံစားချက်ကို ဖော်ပြတဲ့ အထိရောက်ဆုံး စကားလုံး ဖြစ်တယ်။
ရှာဖွေလေ့လာ ဘုရားရေးရာရတနာ
‘ငါသည် ပုံသက်သေကိုပြခဲ့ပြီ’
၁၆ အလားတူ တစ်ပါးအမျိုးသား ရောမလူမျိုးတစ်ဦး ဖြစ်ကောင်းဖြစ်မည့် တပ်မှူးတစ်ဦးက ယေရှုထံ ချဉ်းကပ်ပြီး မိမိ၏ ဖျားနာနေသောကျွန်ကို ကုသပေးဖို့ တောင်းဆိုသောအခါ ထိုသူ၌ အမှားများရှိကြောင်း ယေရှု သိတော်မူခဲ့သည်။ ထိုခေတ်မှ တပ်မှူးတစ်ဦး၏ ဘဝနောက်ကြောင်းသည် အကြမ်းဖက်မှု၊ သွေးသွန်းမှု၊ မှားယွင်းသော ဝတ်ပြုမှုတို့နှင့် ပြည့်နေပေမည်။ သို့တိုင် ယေရှုသည် ထိုသူ၏ ကောင်းကွက်တစ်ခုဖြစ်သော သူ၏ထူးကဲသော ယုံကြည်ခြင်းကို အာရုံစိုက်ခဲ့သည်။ (မဿဲ ၈:၅-၁၃) နောက်ပိုင်းတွင် ယေရှုသည် မိမိနံဘေးရှိ သစ်တိုင်ပေါ် အဆွဲခံထားရသော လူဆိုးနှင့် စကားပြောသောအခါ ထိုသူ၏ အတိတ်မှ ရာဇဝတ်ကျူးလွန်မှုအတွက် သူ့ကို ဆုံးမပြစ်တင်မည့်အစား အနာဂတ်အတွက် မျှော်လင့်ချက်ပေး၍ တိုက်တွန်းအားပေးခဲ့သည်။ (လုကာ ၂၃:၄၃) သူတစ်ပါးကို အပျက်သဘောနှင့် အပြစ်မြင်ခြင်းသည် သူတို့အတွက် စိတ်ဓာတ်ကျစရာသာ ဖြစ်မည်ကို ယေရှု ကောင်းစွာသိတော်မူ၏။ သူတစ်ပါး၏ ကောင်းကွက်ကို ကိုယ်တော် ရှာကြံခဲ့ခြင်းက လူများစွာကို ပို၍တိုးတက်စေရန် အားပေးခဲ့ပေမည်။
ယေရှုရဲ့တပည့်တွေ ဘာလို့ အစာမရှောင်တာလဲ
အစာရှောင်ခြင်းလိုမျိုး ယုဒဘာသာရေး ဓလေ့ထုံးစံ အဟောင်းတွေကို ယေရှုရဲ့ နောက်လိုက်တွေ လိုက်လျှောက်ရမယ်လို့ ဘယ်သူမှ မမျှော်လင့်သင့်မှန်း နှစ်ခြင်းပေးသူ ယောဟန်ရဲ့ တပည့်တွေကို နားလည်စေချင်တာ။ ဖယ်ရှားခံရတော့မယ့် ဝတ်ပြုရေးစနစ်၊ ဟောင်းနွမ်းပြီး အသုံးမဝင်တော့တဲ့ ဝတ်ပြုမှုပုံစံကို ဖာထေးဖို့၊ သက်ဆိုးရှည်အောင်လုပ်ဖို့ ယေရှု လာတာမဟုတ်ဘူး။ ယေရှု အားပေးထောက်ခံတဲ့ ဝတ်ပြုရေးဟာ အဲဒီအချိန်မှာရှိတဲ့ ယုဒဘာသာရေးနဲ့ လူ့ထုံးတမ်းစဉ်လာတွေ နောက်ကို မလိုက်ဘူး။ ယေရှုက ဟောင်းနွမ်းနေတဲ့ အဝတ်ကို ပိတ်စသစ်နဲ့ ဖာမှာမဟုတ်ဘူး၊ သားရေဘူး အဟောင်းထဲ စပျစ်ဝိုင်အသစ် ထည့်မှာမဟုတ်ဘူး။
ဇန်နဝါရီ ၂၉–ဖေဖော်ဝါရီ ၄
ကျမ်းစာထဲက အဖိုးတန်ဘဏ္ဍာများ | မဿဲ ၁၀–၁၁
“ယေရှုက လန်းဆန်းမှုပေး”
nwtsty မ ၁၀:၂၉၊ ၃၀ လေ့လာမှု မှတ်စု
စာငှက်– သေးငယ်တဲ့ ဘယ်ငှက်မျိုးကိုမဆို ဒီဂရိစကားလုံး strou·thiʹon နဲ့ ဖော်ပြတယ်။ စားဖို့ရောင်းတဲ့ ငှက်တွေထဲမှာ ဈေးအပေါဆုံးဖြစ်တဲ့ စာငှက်တွေကို များသောအားဖြင့် ရည်ညွှန်းတယ်။
ငွေတစ်ပြား– မူရင်းအရ “အဿရိတစ်ပြား” ဖြစ်ပြီး ၄၅ မိနစ် လုပ်အားခ ဖြစ်တယ်။ (နောက်ဆက်တွဲ ခ၁၄ မှာကြည့်ပါ။) ဂါလိလဲမှာ တတိယအကြိမ် လှည့်လည်နေချိန်မှာ ယေရှုက စာငှက်နှစ်ကောင်ကို အဿရိတစ်ပြားနဲ့ ဝယ်လို့ရတယ်လို့ ပြောခဲ့တယ်။ တစ်နှစ်အကြာဖြစ်တဲ့ ယုဒနယ်မှာ အမှုဆောင်နေချိန်မှာလည်း ယေရှုက စာငှက်ငါးကောင်ကို အဿရိနှစ်ပြားနဲ့ ဝယ်လို့ရတယ်လို့ ပြောခဲ့တယ်။ (လု ၁၂:၆) ဒီမှတ်တမ်းတွေကို နှိုင်းယှဉ်ကြည့်ရင် စာငှက်တွေဟာ အဖိုးနည်းလွန်းတဲ့အတွက် စာငှက်တစ်ကောင်ကို အဆစ်အနေနဲ့ ပေးနိုင်တယ်။
ခင်ဗျားတို့ရဲ့ ဆံပင်တွေကိုတောင် အကုန် ရေတွက်ထားတယ်– လူတစ်ဦးရဲ့ ခေါင်းပေါ်မှာ ပျမ်းမျှအားဖြင့် ဆံပင် ၁၀၀,၀၀၀ ခန့်ရှိတယ်။ ဒီလိုအသေးစိတ်ကအစ ယေဟောဝါ သိတယ်ဆိုတာက ခရစ်တော်ရဲ့ နောက်လိုက် တစ်ဦးချင်းစီကို ဂရုစိုက်ကြောင်း စိတ်ချစေတယ်။
nwtsty မီဒီယာ
စာငှက်
စားဖို့ရောင်းတဲ့ ငှက်တွေထဲမှာ စာငှက်ဟာ ဈေးအပေါဆုံးဖြစ်တယ်။ စာငှက်နှစ်ကောင်ကို ၄၅ မိနစ် လုပ်အားခနဲ့ ဝယ်လို့ရတယ်။ အဲဒီဂရိစကားလုံးက အစ္စရေးမှာ အခုထိ အများကြီးတွေ့ရတဲ့ စာငှက်အပါအဝင် သေးငယ်တဲ့ ဘယ်ငှက်မျိုးကိုမဆို ဆိုလိုတယ်။
nwtsty မ ၁၁:၂၈ လေ့လာမှု မှတ်စု
ဝန်ပိ– စိတ်ရောကိုယ်ပါ ပင်ပန်း “ဝန်ပိ” နေတဲ့သူတွေကို ယေရှုဆီလာဖို့ ဖိတ်ခေါ်တယ်။ မောရှေပညတ်ထဲ ထပ်ဖြည့်ထားတဲ့ လူ့ထုံးတမ်းစဉ်လာတွေကြောင့် ယေဟောဝါရဲ့ ဝတ်ပြုရေးဟာ သူတို့အတွက် ဝန်ထုပ်ဝန်ပိုး ဖြစ်လာတယ်။ (မ ၂၃:၄) လန်းဆန်းမှုရစေဖို့ စီစဉ်ပေးထားတဲ့ ဥပုသ်နေ့ဟာလည်း ဝန်ထုပ်ကြီး ဖြစ်လာတယ်။—ထွ ၂၃:၁၂။ မာ ၂:၂၃-၂၈။ လု ၆:၁-၁၁။
လန်းဆန်းစေမယ်– “လန်းဆန်း” လို့ပြန်ဆိုတဲ့ ဂရိစကားလုံးက အနားယူတာ (မ ၂၆:၄၅။ မာ ၆:၃၁) ကိုရော ပင်ပန်းနွမ်းလျနေရာကနေ အားအင်ပြန်ပြည့် (၂က ၇:၁၃။ ဖလ ၇) လာတာကိုပါ ဆိုလိုတယ်။ ယေရှုရဲ့ “ထမ်းပိုး” ထမ်းပါ (မ ၁၁:၂၉) ဆိုတဲ့ စကားကိုကြည့်ရင် အနားယူဖို့မဟုတ်ဘဲ အလုပ်လုပ်ဖို့ လိုတယ်ဆိုတာ ဖော်ပြတယ်။ လန်းဆန်းစေမယ်လို့ ယေရှု ပြောတဲ့အခါ အားအင်ပြန်ပြည့်လာမယ် ဆိုတဲ့သဘော သက်ရောက်တဲ့အတွက် ပင်ပန်းသူတွေဟာ ယေရှုရဲ့ ထမ်းလွယ်ပြီး ဝန်ပေါ့တဲ့ ထမ်းပိုးကို ထမ်းချင်စိတ် ပေါ်လာတယ်။
nwtsty မ ၁၁:၂၉ လေ့လာမှု မှတ်စု
ကျွန်တော့်ထမ်းပိုးကို ထမ်း– အခွင့်အာဏာကို လက်အောက်ခံပါ၊ လမ်းညွှန်မှုကို လက်ခံပါဆိုတဲ့ သဘောမျိုးနဲ့ “ထမ်းပိုး” ဆိုတဲ့ စကားလုံးကို ယေရှု အသုံးပြုခဲ့တာဖြစ်တယ်။ ယေရှုက ဘုရားတင်ထားတဲ့ ထမ်းပိုးကို သူနဲ့အတူထမ်းဖို့ တပည့်တွေကို ဖိတ်ခေါ်တဲ့အခါ အဲဒီထမ်းပိုးကို ယေရှု ကူထမ်းပေးမယ်လို့ ဆိုလိုတာဖြစ်တယ်။ အဲဒါက “ငါ့ထမ်းပိုးကို ငါနဲ့အတူ ထမ်းကြပါ” လို့ ဆိုရာရောက်တယ်။ ဒီထမ်းပိုးကို ယေရှုကိုယ်တိုင် တင်ပေးတယ်ဆိုရင် ခရစ်တော်ရဲ့ အခွင့်အာဏာနဲ့ လမ်းညွှန်မှုကို တပည့်တွေ လက်အောက်ခံရမှာ ဖြစ်တယ်။
ရှာဖွေလေ့လာဘုရားရေးရာရတနာ
ယေရှုဆီကနေ ယောဟန်သိချင်တဲ့အရာ
အဲဒီမေးခွန်းက ထူးဆန်းပုံပေါက်တယ် မဟုတ်လား။ ယောဟန်ဟာ ဘုရားတရား ကိုင်းရှိုင်းသူပါ။ လွန်ခဲ့တဲ့ နှစ်နှစ်လောက်တုန်းက ယေရှုကို နှစ်ခြင်းပေးချိန်မှာ ယေရှုအပေါ် ဘုရားရဲ့စွမ်းအားတော် သက်ရောက်တာကို သူမြင်ခဲ့ရပြီး ဘုရားရဲ့ အသံကိုလည်း ကြားခဲ့ရတယ်။ ဒါကြောင့် ယောဟန် ယုံကြည်ခြင်း အားနည်းသွားတာ မဖြစ်နိုင်ဘူး။ သူသာ ယုံကြည်ခြင်း အားနည်းသွားတယ်ဆိုရင် ယေရှုက ဒီအချိန်မှာ သူ့အကြောင်း ချီးမွမ်းပြောဆိုမှာ မဟုတ်ဘူး။ သူသံသယဝင်နေတာ မဟုတ်ပါဘူး။ ဒါဆိုရင် သူဘာလို့ ယေရှုကို အဲဒီမေးခွန်းမေးတာလဲ။
မေရှိယဖြစ်တယ် ဆိုတာနဲ့ပတ်သက်ပြီး ယေရှုဆီကနေ ခိုင်လုံတဲ့ အတည်ပြုချက် လိုချင်နေတာပဲ ဖြစ်မယ်။ အဲဒါက ထောင်ကျနေချိန်မှာ သူ့ကို တော်တော်အားရှိစေမှာပဲ။ ယောဟန်ရဲ့ မေးခွန်းမှာ တခြားအဓိပ္ပာယ်လည်း ရှိနိုင်တယ်။ ဘုရားဘိသိက်ပေးသူဟာ ဘုရင်လည်းဖြစ်၊ ကယ်တင်ရှင်လည်း ဖြစ်မယ်ဆိုတာ ဖော်ပြထားတဲ့ ကျမ်းစာ ပရောဖက်ပြုချက်တွေကို သူကောင်းကောင်း သိတယ်။ ဒါပေမဲ့ ယေရှုနှစ်ခြင်းခံပြီး နောက်ပိုင်း သူထောင်ကျနေတာ လနဲ့ချီနေပြီ။ ဒါကြောင့် မေရှိယနဲ့ပတ်သက်ပြီး ကြိုဟောထားတာ အားလုံးကို ပြည့်စုံစေမယ့်သူ၊ ယေရှုကို ဆက်ခံမယ့်သူ ရောက်လာအုံး မလားဆိုပြီး မေးနေတာ။
တုံ့ပြန်မှုမရှိတဲ့ လူမျိုးဆက် အဖြစ်ဆိုးကြုံရ
ယေရှုက နှစ်ခြင်းပေးသူ ယောဟန်ကို အထင်ကြီးလေးစားပေမဲ့ လူအများစုကတော့ ယောဟန်ကို ဘယ်လို သဘောထားကြသလဲ။ ယေရှု ဒီလိုပြောတယ်– ‘ဒီလူမျိုးဆက်ကို ဘယ်သူနဲ့ နှိုင်းရမလဲ။ သူတို့ဟာ စျေးထဲမှာထိုင်ပြီး “ငါတို့ ပလွေမှုတ်တော့လည်း နင်တို့မကကြဘူး။ ငါတို့ငိုချင်းချတော့လည်း နင်တို့ ရင်ဘတ်ကိုထုပြီး မငိုကြဘူး” လို့ ကစားဖော်တွေကို အော်ပြောနေတဲ့ ကလေးတွေနဲ့တူတယ်။’—မဿဲ ၁၁:၁၆၊ ၁၇၊ ကဘ။
ယေရှု ဘာပြောချင်တာလဲ။ သူအခုလို ရှင်းပြတယ်– ‘အစာရှောင်တဲ့၊ မသောက်မစားတတ်တဲ့ ယောဟန် ရောက်လာတော့ “ဒီလူဟာ နတ်ဆိုးပူးနေတာပဲ” လို့သူတို့ပြောတယ်။ အများတကာလို စားသောက်တဲ့ လူသားရောက်လာတော့ “စားကြူးသောက်ကြူးတဲ့သူ၊ အခွန်ခံတွေ၊ အပြစ်သားတွေနဲ့ မိတ်ဖွဲ့တဲ့သူ” လို့ပြောကြပြန်တယ်။’ (မဿဲ ၁၁:၁၈၊ ၁၉၊ ကဘ) နာဇရိလူတစ်ယောက်လို ရိုးရိုးရှင်းရှင်း နေထိုင်ပြီး စပျစ်ဝိုင်တောင် မသောက်တဲ့ ယောဟန်ကို ဒီလူမျိုးဆက်က နတ်ဆိုးပူးနေတယ်လို့ ပြောကြတယ်။ (တောလည်ရာ ၆:၂၊ ၃; လုကာ ၁:၁၅) အများတကာလို နေထိုင်ပြီး တော်သင့်ရုံစားသောက်တဲ့ ယေရှုကိုတော့ စားကြူးသောက်ကြူးတယ်လို့ စွပ်စွဲကြပြန်တယ်။ ဒီလူတွေ အလိုကျအောင်လုပ်ဖို့ မလွယ်ပါလား။