ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
သြဂုတ် ၆-၁၂
ကျမ်းစာထဲက အဖိုးတန်ဘဏ္ဍာများ | လုကာ ၁၇-၁၈
“ကျေးဇူးတင်ကြောင်း ပြပါ”
(လုကာ ၁၇:၁၁-၁၄) ယေရှုက ဂျေရုဆလင်မြို့ကို သွားတဲ့အခါ ရှမာရိပြည်နဲ့ ဂါလိလဲပြည်တွေကိုလည်း ဖြတ်သွားတယ်။ ၁၂ ရွာတစ်ရွာကို ရောက်တဲ့အခါ အနာကြီးရောဂါသည် ဆယ်ယောက်က ယေရှုကိုမြင်ပြီး ခပ်လှမ်းလှမ်းမှာ ရပ်နေတယ်။ ၁၃ ပြီးတော့ “ဆရာယေရှု၊ ကျွန်တော်တို့ကို သနားပါဦး” လို့ အော်ပြောကြတယ်။ ၁၄ ယေရှုက သူတို့ကို လှမ်းကြည့်ပြီး “ပုရောဟိတ်တွေဆီ ကိုယ်ကို သွားပြကြပါ” လို့ပြောတယ်။ သူတို့ သွားနေတုန်းမှာပဲ ရောဂါပျောက်သွားတယ်။
nwtsty လု ၁၇:၁၂၊ ၁၄ လေ့လာမှု မှတ်စု
အနာကြီးရောဂါသည် ဆယ်ယောက်– ကျမ်းစာခေတ်က အနာကြီးရောဂါသည်တွေဟာ အတူ စုနေကြတယ်။ အဲဒါကြောင့် အချင်းချင်းကို ကူညီပေးနိုင်ကြတယ်။ (၂ဘု ၇:၃-၅) ဘုရားသခင့် ပညတ်အရ သူတို့ဟာ စခန်းအပြင်ဘက်မှာ သီးခြားနေထိုင်ကြရတယ်။ အနာကြီးရောဂါသည်ဟာ “မသန့်ရှင်းဘူး၊ မသန့်ရှင်းဘူး” လို့အော်ပြီး အသိပေးရတယ်။ (ဝ ၁၃:၄၅၊ ၄၆) ပညတ်အရ အနာကြီးရောဂါသည်တွေဟာ ယေရှုနဲ့ ခပ်လှမ်းလှမ်းမှာ ရပ်နေကြတယ်။—မ ၈:၂ လေ့လာမှု မှတ်စုနဲ့ ခက်ဆစ်၊ “အနာကြီးရောဂါ” ကို ကြည့်ပါ။
ပုရောဟိတ်တွေဆီ ကိုယ်ကို သွားပြကြပါ– ယေရှုခရစ်ဟာ မြေကြီးပေါ်ရှိတုန်းက ပညတ်တရားအောက်မှာရှိတဲ့အတွက် အာရုန်ရဲ့ ပုရောဟိတ်အရာကို အသိအမှတ်ပြုပြီး အနာကြီးရောဂါ ပျောက်ကင်းသွားသူတွေကို ပုရောဟိတ်ဆီ သွားပြခိုင်းတယ်။ (မ ၈:၄။ မာ ၁:၄၄) မောရှေပညတ်အရ ပုရောဟိတ်က ရောဂါ ပျောက်ကင်းသွားပြီလို့ အတည်ပြုပေးရတယ်။ ရောဂါပျောက်သွားတဲ့ အနာကြီးရောဂါသည်ဟာ သန့်ရှင်းတဲ့ ငှက်အရှင်နှစ်ကောင်၊ သစ်ကတိုးသား၊ ကြက်သွေးရောင် ချည်နဲ့ ဟုဿုပ်ခက်ကို အလှူ၊ လက်ဆောင်အဖြစ် ဗိမာန်တော်ဆီ ယူလာရတယ်။—ဝ ၁၄:၂-၃၂။
(လုကာ ၁၇:၁၅၊ ၁၆) သူတို့ထဲက တစ်ယောက်က ရောဂါပျောက်သွားမှန်းလည်း သိရော ပြန်လှည့်လာပြီး ဘုရားသခင်ကို အကျယ်ကြီး ဂုဏ်တင်ချီးမွမ်းတယ်။ ၁၆ ပြီးတော့ ယေရှုရဲ့ခြေရင်းမှာ ဒူးထောက်ပြီး ကျေးဇူးတင်စကားပြောတယ်။ တကယ်တော့ သူဟာ ရှမာရိလူပါ။
(လုကာ ၁၇:၁၇၊ ၁၈) ယေရှုက “ဆယ်ယောက်စလုံး ရောဂါပျောက်သွားတာ မဟုတ်လား။ ကျန်တဲ့ကိုးယောက်က ဘယ်မှာလဲ။ ၁၈ ဒီလူမျိုးခြားတစ်ယောက်ပဲ ဘုရားသခင်ကို ဂုဏ်တင်ချီးမွမ်းဖို့ ပြန်လာတာလား။”
ကျေးဇူးတင်လေးမြတ်ကြောင်း အဘယ်ကြောင့် ဖော်ပြရမည်နည်း
အခြားသူတို့ ကျေးဇူးတင်ကြောင်းပြောဆိုရန် ပျက်ကွက်သည်ကို ယေရှု လျစ်လျူရှုခဲ့သလော။ မှတ်တမ်းက ဤသို့ဆို၏– ‘ယေရှုကလည်း “တစ်ကျိပ်သောသူတို့သည် သန့်ရှင်းခြင်းသို့ ရောက်ကြသည်မဟုတ်လော။ ကိုးယောက်သောသူတို့သည် အဘယ်မှာရှိကြသနည်း။ ဤတစ်ပါးအမျိုးသားကို ထား၍ ဘုရားသခင်၏ဂုဏ်တော်ကို ချီးမွမ်းခြင်းငှာ ပြန်လာသောသူ တစ်ယောက်မျှမရှိသလော” ဟု မေးတော်မူ၏။’—လုကာ ၁၇:၁၇၊ ၁၈။
အခြားအနူသည်ကိုးဦးသည် ဆိုးယုတ်သောသူများ မဟုတ်ပါ။ သူတို့သည် ယေရှုကို ယုံကြည်ကြောင်း လူသိရှင်ကြားဖော်ပြခဲ့ပြီး ယေရုရှလင်သို့ ခရီးနှင်ကာ ယဇ်ပုရောဟိတ်ထံ ကိုယ်ကိုသွားပြပါဟူသော ကိုယ်တော်၏ ညွှန်ကြားချက်များကိုလည်း လိုလိုလားလား နာခံခဲ့ကြသည်။ ယေရှု၏ ကြင်နာသောလုပ်ရပ်အတွက် အမှန်တကယ် ကျေးဇူးတင် လေးမြတ်မည်ဖြစ်သော်လည်း ယင်းကိုဖော်ပြရန် ပျက်ကွက်ခဲ့ကြသည်။ သူတို့၏လုပ်ရပ်ကို ခရစ်တော်မနှစ်သက်ခဲ့ပေ။ ကျွန်ုပ်တို့ကော မည်သို့နည်း။ တစ်စုံတစ်ဦးက ကျွန်ုပ်တို့ကို ကောင်းမွန်စွာ ဧည့်ခံကျွေးမွေးပါက ကျေးဇူးတင်ကြောင်း ပြောသလော၊ သင့်လျော်ပါက စာရေးထားသော ကတ်လေးတစ်ခု ပို့ပေးခြင်းဖြင့် ကျေးဇူးတင်ကြောင်း ဖော်ပြပါသလော။
ရှာဖွေလေ့လာ ဘုရားရေးရာရတနာ
(လုကာ ၁၇:၇-၁၀) လယ်ထွန်ရာကဖြစ်စေ၊ သိုးကျောင်းရာကဖြစ်စေ ပြန်ရောက်လာတဲ့ ကျွန်ကို ‘လာခဲ့၊ စားပွဲမှာ တစ်ခါတည်းသာ ဝင်စားလိုက်’ လို့ပြောမယ့်သူ ခင်ဗျားတို့ထဲမှာ ရှိသလား။ ၈ တကယ်တော့ ‘ငါ့အတွက် ညစာပြင်ပေးစမ်း။ ငါစားသောက်ပြီးတဲ့အထိ ခါးစည်းစည်းပြီး လိုသမျှ လုပ်ပေး။ ပြီးမှပဲ မင်း စားတော့’ လို့ပြောတတ်ကြတယ် မဟုတ်လား။ ၉ ခိုင်းတဲ့အတိုင်းလုပ်တဲ့ ကျွန်ကို သခင်က ကျေးဇူးတင်စရာအကြောင်း ဘာမှမရှိဘူး။ ၁၀ အဲဒီလိုပဲ၊ ခင်ဗျားတို့လည်း ခိုင်းထားသမျှ လုပ်ပြီးသွားတဲ့အခါ ‘ကျွန်တော်တို့ဟာ ဘာမှအကျိုးမပေးတဲ့ ကျွန်တွေပါ။ လုပ်ရမယ့် ဝတ္တရားကို လုပ်ခဲ့ရုံလေးပါပဲ’ လို့ပြောကြပါ” ဆိုပြီး သင်ပေးတယ်။
nwtsty လု ၁၇:၁၀ လေ့လာမှု မှတ်စု
ဘာမှအကျိုးမပေး– စာသားအရ၊ “အသုံးမကျ။ တန်ဖိုးမရှိ။” ယေရှုရဲ့ ပုံဥပမာထဲက ကျွန်တွေဖြစ်တဲ့ သူ့တပည့်တွေဟာ သူတို့ကိုယ်ကို အသုံးမကျ၊ တန်ဖိုးမရှိသူလို့ ယူမှတ်ရမယ်လို့ မဆိုလိုဘူး။ ရှေ့နောက်စကားအရ “ဘာမှအကျိုးမပေး” ဆိုတာက ကျွန်တွေဟာ ကျိုးနွံစိတ်ရှိဖို့၊ ဂုဏ်ပြုခံထိုက်တယ်ဆိုတဲ့ သဘောထားမျိုးမရှိဖို့ ဖြစ်တယ်။ ပညာရှင်တချို့က ဒီမှာ အသုံးပြုထားတဲ့ အသုံးအနှုန်းကို “ငါတို့ဟာ အထူးဂရုစိုက်စရာမလိုတဲ့ ကျွန်တွေပါ” ဆိုတဲ့အဓိပ္ပာယ်မျိုးနဲ့ သုံးထားတာလို့ ယူဆကြတယ်။
(လုကာ ၁၈:၈) ကျွန်တော်ပြောမယ်။ ဘုရားသခင်က သူတို့အတွက် တရားသဖြင့် အမြန်ဆုံး စီရင်ပေးလိမ့်မယ်။ ဒါပေမဲ့ လူသားရောက်လာတဲ့အခါ ကမ္ဘာပေါ်မှာ အဲဒီလိုယုံကြည်ခြင်းမျိုး တွေ့ရပါ့မလား။”
nwtsty လု ၁၈:၈ လေ့လာမှု မှတ်စု
အဲဒီလိုယုံကြည်ခြင်းမျိုး– စာသားအရ၊ “ဒီယုံကြည်ခြင်း။” ယေဘုယျ ယုံကြည်ခြင်းကို မဟုတ်ဘဲ ပုံဥပမာထဲက မုဆိုးမမှာရှိတဲ့ ယုံကြည်ခြင်းအကြောင်း ယေရှု ပြောနေတာဖြစ်တယ်။ (လု ၁၈:၁-၈) အဲဒီထဲမှာ ဆုတောင်းခြင်းရဲ့တန်ခိုးကို ယုံကြည်ခြင်းနဲ့ ရွေးချယ်ခံရသူတွေ ကြုံနေရတဲ့ မတရားမှုကို ဘုရားဖြေရှင်းပေးမယ်ဆိုတာ ယုံကြည်ခြင်း ပါဝင်တယ်။ ယေရှုက တပည့်တွေကို သူတို့ကိုယ်တိုင်ရဲ့ ယုံကြည်ခြင်းကို ဆန်းစစ်စေချင်တဲ့အတွက် ယုံကြည်ခြင်း တွေ့ရပါ့မလားလို့ မေးပြီး မဖြေဘဲနေတာဖြစ်တယ်။ ယေရှုက တပည့်တွေ ကြုံရမယ့် စမ်းသပ်မှုတွေအကြောင်း ပြောပြီးနောက် ဆုတောင်းခြင်းနဲ့ ယုံကြည်ခြင်း ပုံဥပမာပေးတာဟာ အထူးသင့်တော်တယ်။—လု ၁၇:၂၂-၃၇။
ကျမ်းစာဖတ်ရှုခြင်း
(လုကာ ၁၈:၂၄-၄၃) ယေရှုက သူ့ကိုကြည့်ပြီး “ချမ်းသာတဲ့သူတွေ ဘုရားသခင့် နိုင်ငံတော်ကို ဝင်ဖို့ သိပ်ခက်တယ်။ ၂၅ ဘုရားသခင့်နိုင်ငံတော်ကို ချမ်းသာတဲ့သူတွေ ဝင်တာထက် အပ်ပေါက်ထဲ ကုလားအုတ် လျှိုဝင်တာကမှ လွယ်ဦးမယ်” လို့ပြောတယ်။ ၂၆ ဒီစကားကို ကြားတဲ့သူတွေက “ဒါဆိုရင် ကယ်တင်ခံရမယ့်သူ ရှိနိုင်ပါဦးမလား” လို့မေးတော့၊ ၂၇ ယေရှုက “လူတွေအတွက် မဖြစ်နိုင်တဲ့အရာတွေဟာ ဘုရားသခင်အတွက်တော့ ဖြစ်နိုင်တယ်” လို့ပြောတယ်။ ၂၈ ပေတရုက “ကျွန်တော်တို့ ပိုင်ဆိုင်တာတွေကို စွန့်ပြီး သခင့်နောက်ကို လိုက်လာပါပြီ” လို့ပြောတော့၊ ၂၉ ယေရှုက “ကျွန်တော် မှန်တာကိုပြောမယ်။ ဘုရားသခင့် နိုင်ငံတော်ကြောင့် မိဘ၊ ဇနီး၊ ညီအစ်ကို၊ သားသမီး၊ အိမ် တစ်ခုခုကို စွန့်လွှတ်သူတိုင်း၊ ၃၀ အခုအချိန်မှာ အဆပေါင်းများစွာ ပြန်ရမယ့်အပြင် နောင်လာမယ့် လောကစနစ် မှာလည်း ထာဝရအသက်ကို ရဦးမယ်” လို့ပြောတယ်။ ၃၁ အဲဒီနောက် ယေရှုက တမန်တော် ၁၂ ယောက်ကိုပဲ ခေါ်ပြီး “အခု ကျွန်တော်တို့ ဂျေရုဆလင်မြို့ကို သွားနေတာ။ လူသားနဲ့ပတ်သက်ပြီး ပရောဖက်တွေ ရေးထားသမျှ ပြည့်စုံလာတော့မယ်။ ၃၂ လူသားကို လူမျိုးခြားတွေလက်ထဲ အပ်ကြလိမ့်မယ်။ လှောင်ပြောင်ပြီး အရှက်ခွဲကြလိမ့်မယ်၊ တံတွေးထွေးကြလိမ့်မယ်။ ၃၃ ကျာပွတ်နဲ့ ရိုက်ကြလိမ့်မယ်။ အဲဒီနောက် အသေသတ်ကြလိမ့်မယ်။ ဒါပေမဲ့ သုံးရက်ကြာရင် အသက်ပြန်ရှင်လာလိမ့်မယ်” လို့ပြောပြတယ်။ ၃၄ တပည့်တွေကတော့ နားမလည်ကြဘူး။ အဲဒီစကားရဲ့ အဓိပ္ပာယ်ကို သူတို့ သဘောမပေါက်အောင် ဖုံးကွယ်ထားတဲ့အတွက် ယေရှုပြောတာကို နားမလည်ကြတာ။ ၃၅ ယေရှုက ယေရိခေါမြို့အနားကို ရောက်လာချိန်မှာ မျက်မမြင်တစ်ယောက် လမ်းဘေးမှာထိုင်ပြီး တောင်းစားနေတယ်။ ၃၆ လူတွေ အုပ်လိုက်ကြီး ဖြတ်သွားတာကို သူကြားတဲ့အခါ ဘာတွေဖြစ်နေတာလဲဆိုပြီး မေးတယ်။ ၃၇ “နာဇရက်မြို့သားယေရှု ဖြတ်သွားတာ” လို့ ပြောကြတဲ့အခါ၊ ၃၈ သူက “ဒါဝိဒ်ရဲ့သား ယေရှု၊ ကျွန်တော့်ကို သနားပါဦး” လို့အော်တယ်။ ၃၉ ရှေ့ကနေဖြတ်သွားတဲ့ လူတွေက သူ့ကို တိတ်တိတ်နေဖို့ တားကြပေမဲ့ “ဒါဝိဒ်ရဲ့သား၊ ကျွန်တော့်ကို သနားပါဦး” ဆိုပြီး ပိုလို့တောင်အော်တယ်။ ၄၀ ဒါနဲ့ ယေရှုက ရပ်လိုက်ပြီး အဲဒီမျက်မမြင်ကို ခေါ်လာခိုင်းတယ်။ သူ ရောက်လာတဲ့အခါ၊ ၄၁ “ခင်ဗျားအတွက် ဘာလုပ်ပေးရမလဲ” လို့မေးတော့ “သခင်၊ ကျွန်တော့်ကို မျက်စိမြင်အောင် လုပ်ပေးပါ” လို့ အသနားခံတယ်။ ၄၂ ယေရှုက “မြင်စေ။ ခင်ဗျားရဲ့ယုံကြည်ခြင်းက မျက်စိပြန်မြင်စေပြီ” လို့ပြောလိုက်တယ်။ ၄၃ အဲဒီအချိန်မှာပဲ သူ မျက်စိပြန်မြင်လာတယ်။ ဘုရားသခင်ကို ဂုဏ်တင်ချီးမွမ်းရင်း ယေရှုနောက်ကို လိုက်လာတယ်။ ဒါကိုမြင်တဲ့အခါ လူအားလုံးက ဘုရားသခင်ကို ချီးမွမ်းကြတယ်။
သြဂုတ် ၁၃-၁၉
ကျမ်းစာထဲက အဖိုးတန်ဘဏ္ဍာများ | လုကာ ၁၉-၂၀
“ဆယ်မိုင်နာ ပုံဥပမာကနေ သင်ယူပါ”
(လုကာ ၁၉:၁၂၊ ၁၃) ယေရှု အခုလိုပြောတယ်- “မင်းညီမင်းသားတစ်ယောက်က ထီးနန်းဆက်ခံပြီးမှ ပြန်လာမယ်ဆိုပြီး တိုင်းတစ်ပါးကို ခရီးထွက်သွားတယ်။ ၁၃ မသွားခင် ကျွန်ဆယ်ယောက်ကို ခေါ်ပြီး ဆယ်မိုင်နာ အပ်ပေးတယ်။ ပြီးတော့ ‘ငါပြန်လာချိန်အထိ ဒီငွေနဲ့ အရောင်းအဝယ် လုပ်ထားကြပါ’ လို့မှာတယ်။
ဆယ်မိုင်နာ ပုံဥပမာ
“မင်းညီမင်းသားတစ်ယောက်က ထီးနန်းဆက်ခံပြီးမှ ပြန်လာမယ်ဆိုပြီး တိုင်းတစ်ပါးကို ခရီးထွက်သွားတယ်’ လို့ယေရှုပြောတယ်။ (လုကာ ၁၉:၁၂) တိုင်းတစ်ပါးကို ခရီးထွက်တာဆိုတော့ တော်တော်ကြာမှာပဲ။ ‘မင်းညီမင်းသား’ ကတော့ ယေရှုဖြစ်ပြီး ‘တိုင်းတစ်ပါး’ နဲ့တူတဲ့ ကောင်းကင်ကို ထွက်သွားတယ်။ အဲဒီမှာ သူ့ဖခင်က သူ့ကို ထီးနန်းအပ်နှင်းမှာဖြစ်တယ်။
ပုံဥပမာမှာ ‘မင်းညီမင်းသား’ က ခရီးမသွားခင် ကျွန်ဆယ်ယောက်ကိုခေါ်ပြီး ငွေမိုင်နာ အပ်ပေးတယ်။ ပြီးတော့ ‘ငါပြန်လာချိန်အထိ ဒီငွေနဲ့ အရောင်းအဝယ်လုပ်ထားပါ’ လို့မှာတယ်။ (လုကာ ၁၉:၁၃) အဲဒီငွေမိုင်နာတွေဟာ တော်တော်တန်ဖိုးရှိတဲ့ငွေပဲ။ တစ်မိုင်နာဟာ လယ်သမားတစ်ယောက်ရဲ့ သုံးလစာလုပ်အားခနဲ့ ညီမျှတယ်။
တပည့်တွေအနေနဲ့ ပုံဥပမာထဲက ကျွန်ဆယ်ယောက်ဟာ သူတို့ကိုရည်ညွှန်းမှန်း သိကြမှာပဲ။ ယေရှုက သူတို့ကို စပါးရိတ်တဲ့လုပ်သားတွေနဲ့ ခိုင်းနှိုင်းခဲ့လို့လေ။ (မဿဲ ၉:၃၅-၃၈) တပည့်တွေဟာ စပါးရိတ်ပြီး ယူလာရမယ်လို့ ယေရှု ပြောနေတာ မဟုတ်ဘူး။ အဲဒီအစား ဘုရားနိုင်ငံတော်ဝင်ခွင့်ရနိုင်တဲ့ တခြားတပည့်တွေကို စုသိမ်းဖို့ ပြောနေတာ။ တပည့်တွေဟာ သူတို့ရဲ့အချိန်၊ ခွန်အား၊ ပစ္စည်းဥစ္စာတွေကို အသုံးပြုပြီး နိုင်ငံတော်အမွေခံတွေ တိုးများလာအောင် လုပ်ရမှာဖြစ်တယ်။
(လုကာ ၁၉:၁၆-၁၉) ပထမကျွန်က ရှေ့ထွက်လာပြီး ‘သခင်အပ်ထားတဲ့ငွေနဲ့ ကျွန်တော် ဆယ်မိုင်နာ အမြတ်ရပါတယ်’ လို့ပြောတော့၊ ၁၇ သခင်က ‘တော်လိုက်တာ။ မင်းဟာ ကျွန်ကောင်းပဲ။ အသေးအမွှားကိစ္စမှာတောင် သစ္စာရှိတယ်ဆိုတော့ မြို့ဆယ်မြို့ကို အပိုင်စားစေ’ လို့ပြောတယ်။ ၁၈ ဒုတိယကျွန်က လာပြီး ‘သခင်အပ်ထားတဲ့ငွေနဲ့ ကျွန်တော် ငါးမိုင်နာ အမြတ်ရပါပြီ’ လို့ပြောတော့၊ ၁၉ သခင်က ‘မင်းလည်း မြို့ငါးမြို့ကို အပိုင်စားစေ’ လို့ပြောတယ်။
ဆယ်မိုင်နာ ပုံဥပမာ
တပည့်တွေဟာ အဲဒီကျွန်တွေလိုပဲ သူတို့ရဲ့အချိန်၊ ခွန်အား၊ ပစ္စည်းဥစ္စာတွေကို ကောင်းကောင်းအသုံးပြုပြီး တပည့်တွေတိုးများလာအောင် လုပ်မယ်ဆိုရင် သူတို့ကို ယေရှု နှစ်သက်မယ်ဆိုတာ စိတ်ချနိုင်တယ်။ ဒီလို ကြိုးစားအားထုတ်မှုကို ယေရှု ဆုချမယ်ဆိုတာလည်း ယုံကြည်စိတ်ချနိုင်တယ်။ တပည့်အားလုံးကတော့ ဘဝပေး အခြေအနေချင်း၊ စွမ်းရည်ချင်း၊ အခွင့်အရေးချင်း တူမှာမဟုတ်ဘူး။ ဒါပေမဲ့ ‘ထီးနန်းဆက်ခံ’ ထားတဲ့ယေရှုက အဲဒါကိုအသိအမှတ်ပြုပြီး တပည့်ဖြစ်စေခြင်းမှာ သူတို့သစ္စာရှိရှိ ကြိုးစားလုပ်ဆောင်နေတာကို ကောင်းချီးပေးပါလိမ့်မယ်။—မဿဲ ၂၈:၁၉၊ ၂၀။
(လုကာ ၁၉:၂၀-၂၄) ကျွန်နောက်တစ်ယောက်က ‘ဒီမှာ၊ သခင့်ရဲ့ငွေပါ။ အဝတ်နဲ့ထုပ်ပြီး သိမ်းထားပါတယ်။ ၂၁ သခင်ဟာ ခက်ထန်သူ၊ ကိုယ်မအပ်ထားတဲ့ငွေကို သိမ်းယူတတ်ပြီး ကိုယ်မစိုက်တဲ့အရာကို ရိတ်သိမ်းတတ်သူဖြစ်မှန်း သိလို့ ကျွန်တော်ကြောက်နေတာ’ ဆိုပြီး လာပြောတယ်။ ၂၂ သခင်က ‘ကျွန်ဆိုး၊ မင်းရဲ့စကားအတိုင်း မင်းကို ငါစီရင်မယ်။ ငါဟာ ခက်ထန်တဲ့သူ၊ ကိုယ်မအပ်ထားတဲ့ငွေကို သိမ်းယူတတ်ပြီး ကိုယ်မစိုက်တဲ့အရာကို ရိတ်သိမ်းတတ်သူဖြစ်မှန်း မင်းသိတယ်ဆိုရင်၊ ၂၃ ငါ့ငွေကို အတိုးချထားသင့်တာပေါ့။ ဒါဆိုရင် ငါပြန်လာတဲ့အခါ အရင်းရော အတိုးပါ ရဦးမှာ’ လို့ပြောတယ်။ ၂၄ “အဲဒီနောက် အနားမှာရပ်နေသူတွေကို ‘သူ့ဆီကငွေကို ယူပြီး ဆယ်မိုင်နာရှိသူကို ပေးလိုက်’ လို့ပြောတယ်။
ဆယ်မိုင်နာ ပုံဥပမာ
သခင့်တိုင်းပြည်ရဲ့ အကျိုးစီးပွားတိုးတက်အောင် မလုပ်တဲ့ကျွန်ဟာ နစ်နာဆုံးရှုံးခဲ့ရတယ်။ တမန်တော်တွေဟာ ယေရှုအုပ်ချုပ်တဲ့ ဘုရားနိုင်ငံတော်ကို မျှော်လင့်နေကြတယ်။ နောက်ဆုံးကျွန်လိုပဲ သူတို့လည်း ဝီရိယရှိရှိ ကြိုးစား မလုပ်ဆောင်ဘူးဆိုရင် နိုင်ငံတော်ဝင်ရမှာ မဟုတ်ဘူး။
ရှာဖွေလေ့လာ ဘုရားရေးရာရတနာ
(လုကာ ၁၉:၄၃) ရန်သူတွေက မင်းရဲ့ပတ်လည်မှာ တုတ်ချွန်ခံတပ်ကို ဆောက်ပြီး လေးဖက်လေးတန် ဝိုင်းရံပိတ်ဆို့မယ့်အချိန် ရောက်လာလိမ့်မယ်။
nwtsty လု ၁၉:၄၃ လေ့လာမှု မှတ်စု
တုတ်ချွန်ခံတပ်– ဒီဂရိစကားလုံး ခါရက်စ် ကို ခရစ်ယာန်ဂရိကျမ်းစောင်တွေမှာ ဒီတစ်နေရာမှာပဲ တွေ့ရတယ်။ အဲဒါကို “ခြံစည်းရိုးခတ်ရာမှာ သုံးတဲ့ တုတ်ချွန် ဒါမှမဟုတ် သစ်တိုင်၊” “တိုင်တွေသုံးပြီး ဆောက်ထားတဲ့ စစ်တပ်အအောက်အအုံ၊ တုတ်ချွန်ခံတပ်” လို့ အနက်ဖွင့်ထားတယ်။ အေဒီ ၇၀ မှာ တိတုဦးဆောင်တဲ့ ရောမစစ်တပ်က ဂျေရုဆလင်မြို့ကို ရောက်လာပြီး မြို့ပတ်လည်မှာ ထိုးစစ်တံတိုင်း ဒါမှမဟုတ် ခံတပ်တစ်ခု တည်ဆောက်လိုက်ချိန်မှာ ယေရှုရဲ့စကားတွေ ပြည့်စုံလာတယ်။ တိတုမှာ ရည်ရွယ်ချက်သုံးခု ရှိတယ်။ ဂျူးတွေ ထွက်မပြေးစေဖို့၊ လက်နက်ချစေဖို့နဲ့ မြို့သားတွေ အညံ့ခံလာအောင် အငတ်ထားဖို့ဖြစ်တယ်။ ရောမစစ်တပ်ဟာ ခံတပ်ဆောက်ရာမှာ သုံးဖို့ သစ်ပင်တွေကို ခုတ်လှဲပစ်တယ်။
(လုကာ ၂၀:၃၈) ဘုရားသခင်ဟာ သေလွန်သူတွေရဲ့ဘုရား မဟုတ်ဘူး။ အသက်ရှင်သူတွေရဲ့ ဘုရားပဲ။ ဘုရားသခင်ရဲ့အမြင်မှာ သူတို့အားလုံး အသက်ရှင်နေတယ်။”
nwtsty လု ၂၀:၃၈ လေ့လာမှု မှတ်စု
သူတို့အားလုံး အသက်ရှင်နေတယ်– ဒါမှမဟုတ် “ဘုရားသခင်ရဲ့အမြင်မှာ သူတို့အားလုံး အသက်ရှင်နေတယ်။” အသက်ရှင်ပေမဲ့ ဘုရားနဲ့ ရင်းနှီးတဲ့ ဆက်ဆံရေး မရှိသူတွေဟာ ဘုရားအမြင်မှာ လူသေပဲ။ (ဧ ၂:၁။ ၁တိ ၅:၆) သေဆုံးသွားတဲ့ ဘုရားမျက်နှာသာရကျေးကျွန်တွေကို ထမြောက်စေမယ်ဆိုတဲ့ ယေဟောဝါရဲ့ ရည်ရွယ်ချက်ဟာ အမှန်တကယ် ပြည့်စုံလာမှာဖြစ်လို့ သူတို့ဟာ ကိုယ်တော့်အမြင်မှာ အသက်ရှင်နေတုန်းပဲ ဖြစ်တယ်။ —ရ ၄:၁၆၊ ၁၇။
ကျမ်းစာဖတ်ရှုခြင်း
(လုကာ ၁၉:၁၁-၂၇) ဒါနဲ့ ယေရှုက နားထောင်နေတဲ့ တပည့်တွေကို ပုံဥပမာတစ်ခု ထပ်ပြောပြတယ်။ ဂျေရုဆလင်မြို့ကို ရောက်ရင် ဘုရားသခင့် နိုင်ငံတော် ချက်ချင်းလာမယ်ဆိုပြီး သူတို့ ယူဆထားလို့ပဲ။ ၁၂ ယေရှု အခုလိုပြောတယ်- “မင်းညီမင်းသားတစ်ယောက်က ထီးနန်းဆက်ခံပြီးမှ ပြန်လာမယ်ဆိုပြီး တိုင်းတစ်ပါးကို ခရီးထွက်သွားတယ်။ ၁၃ မသွားခင် ကျွန်ဆယ်ယောက်ကို ခေါ်ပြီး ဆယ်မိုင်နာ အပ်ပေးတယ်။ ပြီးတော့ ‘ငါပြန်လာချိန်အထိ ဒီငွေနဲ့ အရောင်းအဝယ် လုပ်ထားကြပါ’ လို့မှာတယ်။ ၁၄ ပြည်သားတွေကတော့ သူ့ကို မကြိုက်တဲ့အတွက် သံတမန်အဖွဲ့ကို စေလွှတ်ပြီး ‘ဒီလူ အုပ်ချုပ်မှာကို ငါတို့ မလိုလားဘူး’ လို့ပြောခိုင်းတယ်။ ၁၅ “သူ ထီးနန်းဆက်ခံပြီးနောက် ပြန်လာတဲ့အခါ အရောင်းအဝယ်လုပ်လို့ အမြတ်ငွေ ဘယ်လောက်ရသလဲဆိုတာ သိဖို့ ငွေအပ်ခဲ့တဲ့ ကျွန်တွေကို ခေါ်လိုက်တယ်။ ၁၆ ပထမကျွန်က ရှေ့ထွက်လာပြီး ‘သခင်အပ်ထားတဲ့ငွေနဲ့ ကျွန်တော် ဆယ်မိုင်နာ အမြတ်ရပါတယ်’ လို့ပြောတော့၊ ၁၇ သခင်က ‘တော်လိုက်တာ။ မင်းဟာ ကျွန်ကောင်းပဲ။ အသေးအမွှားကိစ္စမှာတောင် သစ္စာရှိတယ်ဆိုတော့ မြို့ဆယ်မြို့ကို အပိုင်စားစေ’ လို့ပြောတယ်။ ၁၈ ဒုတိယကျွန်က လာပြီး ‘သခင်အပ်ထားတဲ့ငွေနဲ့ ကျွန်တော် ငါးမိုင်နာ အမြတ်ရပါပြီ’ လို့ပြောတော့၊ ၁၉ သခင်က ‘မင်းလည်း မြို့ငါးမြို့ကို အပိုင်စားစေ’ လို့ပြောတယ်။ ၂၀ ကျွန်နောက်တစ်ယောက်က ‘ဒီမှာ၊ သခင့်ရဲ့ငွေပါ။ အဝတ်နဲ့ထုပ်ပြီး သိမ်းထားပါတယ်။ ၂၁ သခင်ဟာ ခက်ထန်သူ၊ ကိုယ်မအပ်ထားတဲ့ငွေကို သိမ်းယူတတ်ပြီး ကိုယ်မစိုက်တဲ့အရာကို ရိတ်သိမ်းတတ်သူဖြစ်မှန်း သိလို့ ကျွန်တော်ကြောက်နေတာ’ ဆိုပြီး လာပြောတယ်။ ၂၂ သခင်က ‘ကျွန်ဆိုး၊ မင်းရဲ့စကားအတိုင်း မင်းကို ငါစီရင်မယ်။ ငါဟာ ခက်ထန်တဲ့သူ၊ ကိုယ်မအပ်ထားတဲ့ငွေကို သိမ်းယူတတ်ပြီး ကိုယ်မစိုက်တဲ့အရာကို ရိတ်သိမ်းတတ်သူဖြစ်မှန်း မင်းသိတယ်ဆိုရင်၊ ၂၃ ငါ့ငွေကို အတိုးချထားသင့်တာပေါ့။ ဒါဆိုရင် ငါပြန်လာတဲ့အခါ အရင်းရော အတိုးပါ ရဦးမှာ’ လို့ပြောတယ်။ ၂၄ “အဲဒီနောက် အနားမှာရပ်နေသူတွေကို ‘သူ့ဆီကငွေကို ယူပြီး ဆယ်မိုင်နာရှိသူကို ပေးလိုက်’ လို့ပြောတယ်။ ၂၅ သူတို့က ‘သခင်၊ သူ့ဆီမှာ ဆယ်မိုင်နာရှိပြီးသားပဲ’ လို့ပြောတော့၊ ၂၆ သခင်က ‘ငါပြောမယ်။ ရှိထားတဲ့သူဟာ ထပ်ပြီးရလိမ့်မယ်။ မရှိတဲ့သူကတော့ ရှိထားတာတောင် အသိမ်းခံရလိမ့်မယ်။ ၂၇ အခု၊ ငါအုပ်ချုပ်တာကို မကြိုက်တဲ့ ရန်သူတွေကို ခေါ်ခဲ့ပြီး ငါ့ရှေ့မှာ ကွပ်မျက်စေ’ လို့ပြောတယ်။”
သြဂုတ် ၂၀-၂၆
ကျမ်းစာထဲက အဖိုးတန်ဘဏ္ဍာများ | လုကာ ၂၁-၂၂
“ခင်ဗျားတို့ကို ကယ်တင်မယ့်အချိန် ရောက်ခါနီးပြီ”
(လုကာ ၂၁:၂၅) နေ၊ လ၊ ကြယ်တွေမှာ ထူးခြားတဲ့လက္ခဏာတွေ ပေါ်လာလိမ့်မယ်။ ကမ္ဘာမြေပေါ်က လူမျိုးအပေါင်းကလည်း စိတ်ဒုက္ခရောက်ပြီး ပင်လယ်လှိုင်းတံပိုး မြည်ဟည်းသံကြောင့် ကြံရာမရ ဖြစ်လိမ့်မယ်။
ဘုရားသခင့်နိုင်ငံတော်က ရန်သူတွေအပေါ် အောင်ပွဲခံ
၉ ကောင်းကင်မှာဖြစ်မယ့် အံ့ဖွယ်နိမိတ်လက္ခဏာများ။ “နေသည် မိုက်လိမ့်မည်။ လသည် အလင်းကိုမပေး။ ကြယ်တို့သည် ကောင်းကင်မှ ကြွေလိမ့်မည်” လို့ ယေရှု ကြိုပြောခဲ့တယ်။ လူတွေဟာ အလင်းရဖို့၊ တစ်နည်းအားဖြင့် လမ်းညွှန်မှုရဖို့ ဘာသာရေး ခေါင်းဆောင်တွေကို မျှော်ကိုးတော့မှာ မဟုတ်ဘူးဆိုတာ သေချာပါတယ်။ ယေရှုက ကောင်းကင်မှာဖြစ်မယ့် သဘာ၀လွန်ဖြစ်ရပ်တွေကိုလည်း ရည်ညွှန်းနေတာလား။ ဖြစ်နိုင်ပါတယ်။ (ဟေရှာ. ၁၃:၉-၁၁။ ယောလ ၂:၁၊ ၃၀၊ ၃၁) ဒီဖြစ်ရပ်တွေကို လူတွေမြင်တဲ့အခါ ဘာဖြစ်ကြမလဲ။ “အလွန်စိတ်ပူပန်၍ ကြံရာမရ” ဖြစ်ကြပါလိမ့်မယ်။ (လု. ၂၁:၂၅။ ဇေ. ၁:၁၇) မှန်ပါတယ်၊ ‘ဘုရင်ကအစ ကျွန်အဆုံး၊’ ဘုရားသခင့်နိုင်ငံတော်ရဲ့ရန်သူတွေဟာ “ဖြစ်ပျက်မည့် အရာများကိုမျှော်၍ ကြောက်လန့်” ပြီး ခိုလှုံရာကို အပြေးအလွှားရှာကြလိမ့်မယ်။ ဒါပေမဲ့ ကျွန်တော်တို့ဘုရင်ရဲ့ အမျက်ဒေါသကနေလွတ်မြောက်နိုင်တဲ့ လုံခြုံရာနေရာကို သူတို့ရှာတွေ့နိုင်မှာ မဟုတ်ပါဘူး။—လု. ၂၁:၂၆။ ၂၃:၃၀။ ဗျာ. ၆:၁၅-၁၇။
(လုကာ ၂၁:၂၆) လူတွေဟာ ကမ္ဘာပေါ်မှာ ဖြစ်လာမယ့်အရာတွေကို မျှော်မြင်ပြီး ကြောက်လွန်းလို့ မေ့မြောသွားကြလိမ့်မယ်။ ကောင်းကင်တန်ခိုးတွေ တုန်လှုပ်လိမ့်မယ်။
(လုကာ ၂၁:၂၇၊ ၂၈) အဲဒီနောက် လူသားက မိုးတိမ်ခြံရံပြီး မဟာဘုန်းတန်ခိုးနဲ့ လာတာကို သူတို့မြင်ရလိမ့်မယ်။ ၂၈ ဒါတွေ စဖြစ်ပြီဆိုရင် ခင်ဗျားတို့ကို ကယ်တင်မယ့်အချိန် ရောက်ခါနီးပြီဖြစ်လို့ မတ်မတ်ရပ်ပြီး ခေါင်းမော့ထားကြပါ။”
“သင်တို့၏ ညီရင်းအစ်ကိုကဲ့သို့ချစ်ခြင်းကို ဆက်တင်ပြ” ဖို့ စိတ်ပိုင်းဖြတ်ထားပါ
၁၇ ‘ရဲစွမ်းသတ္တိရှိပါ။’ (ဟေဗြဲ ၁၃:၆ ကိုဖတ်ပါ။) ယေဟောဝါကို ယုံကြည်ကိုးစားခြင်းက ဘယ်အခက်အခဲကိုမဆို သတ္တိရှိရှိ ခံရပ်စေနိုင်တယ်။ ရဲစွမ်းသတ္တိရှိခြင်းက အပြုသဘောထားရှိစေနိုင်တယ်။ အပြုသဘောထားရှိမယ်ဆိုရင် ညီအစ်ကိုညီအစ်မတွေကို အားပေးနှစ်သိမ့်ခြင်းအားဖြင့် ညီရင်းအစ်ကိုမေတ္တာ တင်ပြနိုင်ပါလိမ့်မယ်။ (၁ သက်. ၅:၁၄၊ ၁၅) ကယ်တင်ခံရမယ့်အချိန် နီးပြီဆိုတာ သိထားလို့ ကြီးစွာသောဒုက္ခအတွင်းမှာတောင် ရဲစွမ်းသတ္တိရှိနိုင်ပါတယ်။—လု. ၂၁:၂၅-၂၈။
‘သင်တို့ကို ရွေးနုတ်သောအချိန်ကာလ ရောက်လုနီးပြီ’
၁၃ ဆိတ်တွေဟာ သူတို့ဖျက်ဆီးခံရမှာကို သိတဲ့အခါ ဘယ်လိုတုံ့ပြန်ကြမလဲ။ “ငိုကြွေးမြည်တမ်းကြ” ပါလိမ့်မယ်။ (မ. ၂၄:၃၀) ဘိသိက်ခံတွေနဲ့ သူတို့ကို ထောက်ခံသူတွေကော။ သူတို့ကတော့ “ထိုအမှုအရာတို့သည် ဖြစ်စရှိသောအခါ သင်တို့ကို ရွေးနုတ်သောအချိန်ကာလ ရောက်လုနီးသည်ကို ထောက်သဖြင့် မတ်မတ်ရပ်၍ ခေါင်းကိုမော့ကြလော့” လို့ ယေရှုမိန့်မှာတဲ့အတိုင်း လုပ်ဆောင်ကြပါလိမ့်မယ်။—လု. ၂၁:၂၈။
ရှာဖွေလေ့လာ ဘုရားရေးရာရတနာ
(လုကာ ၂၁:၃၃) ကောင်းကင်နဲ့မြေကြီး ကွယ်ပျောက်လိမ့်မယ်။ ဒါပေမဲ့ ကျွန်တော့်စကားတွေ ဘယ်တော့မှ ကွယ်ပျောက်မှာ မဟုတ်ဘူး။
nwtsty လု ၂၁:၃၃ လေ့လာမှု မှတ်စု
ကောင်းကင်နဲ့မြေကြီး ကွယ်ပျောက်လိမ့်မယ်– ကောင်းကင်နဲ့မြေကြီး ထာဝစဉ်တည်မယ်လို့ တခြားကျမ်းချက်တွေက ဖော်ပြတယ်။ (က ၉:၁၆။ ဆ ၁၀၄:၅။ ဒေ ၁:၄) ဒါကြောင့် မကွယ်ပျောက်နိုင်တဲ့ ကောင်းကင်နဲ့မြေကြီး ကွယ်ပျောက်ရင်တောင် သူ့စကား ပြည့်စုံရမယ်ဆိုတာ ယေရှု အလေးအနက် ပြောနေတာဖြစ်တယ်။ (မ ၅:၁၈ နဲ့နှိုင်းယှဉ်ပါ။) ဒါပေမဲ့ ဒီမှာပါတဲ့ ကောင်းကင်နဲ့မြေကြီးဟာ ဗ ၂၁:၁ မှာဖော်ပြထားတဲ့ “အရင်ကောင်းကင်နဲ့ အရင်မြေကြီး” ကိုဆိုလိုတာလည်း ဖြစ်နိုင်တယ်။
ကျွန်တော့်စကားတွေ ဘယ်တော့မှ ကွယ်ပျောက်မှာ မဟုတ်ဘူး– ကြိယာနဲ့တွဲပြီး ဂရိ ဆန့်ကျင်ဘက် စကားလုံးနှစ်လုံးကို သုံးထားတာက မဖြစ်နိုင်တာကို အလေးအနက် ဖော်ပြပြီး ယေရှုရဲ့ စကားတွေ တကယ်ပြည့်စုံလာမယ်ဆိုတာ ပေါ်လွင်စေတယ်။
(လုကာ ၂၂:၂၈-၃၀) “ခင်ဗျားတို့က ကျွန်တော် စမ်းသပ်မှုကြုံရချိန်တွေမှာ ကျွန်တော့်ကို မစွန့်ခွာကြဘူး။ ၂၉ အဖဘုရားက ကျွန်တော်နဲ့ ပဋိညာဉ်ဖွဲ့ခဲ့သလို ကျွန်တော်ကလည်း နိုင်ငံတော်မှာ အုပ်ချုပ်ဖို့ ခင်ဗျားတို့နဲ့ ပဋိညာဉ်ဖွဲ့တယ်။ ၃၀ ခင်ဗျားတို့ဟာ နိုင်ငံတော်မှာ ကျွန်တော်နဲ့ တစ်စားပွဲတည်းထိုင်ပြီး စားသောက်ရလိမ့်မယ်။ ပလ္လင်ပေါ်ထိုင်ပြီး အစ္စရေး ၁၂ နွယ်ကို တရားစီရင်ရလိမ့်မယ်။
မင်းတို့ဟာ ‘ယဇ်ပုရောဟိတ်နိုင်ငံ’ ဖြစ်လာလိမ့်မယ်
၁၅ ယေရှုဟာ သခင့်ညစာစားပွဲကို အစပြုပြီးနောက် သစ္စာရှိတပည့်တွေနဲ့ ပဋိညာဉ်ဖွဲ့ခဲ့တယ်။ အဲဒီပဋိညာဉ်ကို နိုင်ငံတော်ပဋိညာဉ်လို့ခေါ်တယ်။ (လုကာ ၂၂:၂၈–၃၀ ကိုဖတ်ပါ။) တခြားပဋိညာဉ်တွေနဲ့ မတူတာက ဒီပဋိညာဉ်မှာ ယေဟောဝါ မပါဝင်ဘူး။ ယေရှုနဲ့ ဘိသိက်ခံတွေ သီးသန့်ဖွဲ့တဲ့ ပဋိညာဉ်ဖြစ်တယ်။ “ငါ့ခမည်းတော်သည် ငါနှင့်ပဋိညာဉ်ဖွဲ့သည့်နည်းတူ” လို့ ယေရှုပြောတဲ့အခါ သူနဲ့ယေဟောဝါဖွဲ့ခဲ့တဲ့ ပဋိညာဉ်ကို ရည်ညွှန်းနေတာဖြစ်နိုင်တယ်။ အဲဒါကတော့ “မေလခိဇေဒက်ကဲ့သို့ ထာဝရယဇ်ပုရောဟိတ်” ဖြစ်စေတဲ့ ပဋိညာဉ်ဖြစ်တယ်။—ဟေဗြဲ ၅:၅၊ ၆။
၁၆ သစ္စာရှိတမန်တော် ၁၁ ယောက်ဟာ ယေရှု စမ်းသပ်မှုတွေကြုံရချိန် တစ်လျှောက်လုံးမှာ ယေရှုအပေါ် သစ္စာစောင့်သိခဲ့ကြတယ်။ ဒီတမန်တော်တွေဟာ ပလ္လင်ပေါ်ထိုင်ပြီး ကောင်းကင်မှာ ယေရှုနဲ့အတူ ဘုရင်တွေအဖြစ် အုပ်ချုပ်ရမယ်၊ ယဇ်ပုရောဟိတ်တွေအဖြစ် အမှုဆောင်ရမယ်ဆိုတာကို နိုင်ငံတော်ပဋိညာဉ်က အာမခံတယ်။ ဒါပေမဲ့ ဒီ ၁၁ ယောက်ပဲ အဲဒီအခွင့်ထူးကို ရမှာမဟုတ်ဘူး။ စိတ်အာရုံတစ်ခုမှာ တမန်တော်ယောဟန်ကို ယေရှု ဒီလိုပြောတယ်– “ငါသည် အောင်မြင်၍ ငါ့ခမည်းတော်၏ ပလ္လင်တော်ပေါ်မှာ ခမည်းတော်နှင့်အတူ ထိုင်ရသည်နည်းတူ အောင်မြင်သောသူအား ငါ့ပလ္လင်ပေါ်မှာ ငါနှင့်အတူ ထိုင်ရသောအခွင့်ကို ငါပေးမည်။” (ဗျာ. ၃:၂၁) ဒါကြောင့် နိုင်ငံတော်ပဋိညာဉ်ကို ဘိသိက်ခံခရစ်ယာန် ၁၄၄,၀၀၀ နဲ့ ဖွဲ့တာဖြစ်တယ်။ (ဗျာ. ၅:၉၊ ၁၀။ ၇:၄) ဒီပဋိညာဉ်ဟာ ဘိသိက်ခံတွေကို ကောင်းကင်မှာ ယေရှုနဲ့အတူ အုပ်ချုပ်ခွင့်ရစေတဲ့ တရားဝင်အကြောင်းရင်းဖြစ်တယ်။ ဒါက ဘုရင်နဲ့လက်ထပ်ဖို့ ရွေးချယ်ခံရတဲ့ သတို့သမီးနဲ့ ဆင်တူတယ်။ သတို့သမီးဟာ ဘုရင်နဲ့လက်ထပ်လိုက်တာနဲ့ ဘုရင်နဲ့အတူအုပ်ချုပ်ဖို့ အခွင့်အရေးရသွားတယ်။ အဲဒီလိုပဲ ကျမ်းစာမှာ ဘိသိက်ခံတွေကိုလည်း ခရစ်တော်ရဲ့ “သတို့သမီး” လို့ခေါ်ထားတယ်။ သူတို့ဟာ ခရစ်တော်နဲ့လက်ထပ်ဖို့ ကတိပြုထားတဲ့ “အပျိုစင်” ဖြစ်တယ်။—ဗျာ. ၁၉:၇၊ ၈။ ၂၁:၉။ ၂ ကော. ၁၁:၂။
ကျမ်းစာဖတ်ရှုခြင်း
(လုကာ ၂၂:၃၅-၅၃) အဲဒီနောက် ယေရှုက “ငွေအိတ်၊ ရိက္ခာအိတ်၊ ဖိနပ်တွေ မယူသွားနဲ့လို့ ပြောပြီး ခင်ဗျားတို့ကို လွှတ်လိုက်တုန်းက လိုအပ်တာ ဘာမှမရှိဘူး မဟုတ်လား” ဆိုပြီးမေးတော့ သူတို့က “မရှိပါဘူး” လို့ဖြေတယ်။ ၃၆ ဒါနဲ့ ယေရှုက “အခုတော့ ငွေအိတ်ရှိသူက ငွေအိတ်ဆောင်ထားပါ။ ရိက္ခာအိတ်ရှိတဲ့သူက ရိက္ခာအိတ် ဆောင်ထားပါ။ ဓားမရှိတဲ့သူကလည်း ကိုယ့်အင်္ကျီကိုရောင်းပြီး ဓားဝယ်ပါ။ ၃၇ ကျွန်တော် ပြောမယ်။ ‘သူဟာ တရားမဲ့သူတွေရဲ့ စာရင်းမှာ ပါတယ်’ ဆိုတဲ့ ကျမ်းစကားက ကျွန်တော့်ဆီမှာ ပြည့်စုံတော့မယ်။ ကျွန်တော်နဲ့ပတ်သက်ပြီး ရေးထားသမျှ ပြည့်စုံနေပြီ” လို့ပြောတယ်။ ၃၈ တပည့်တွေက “သခင်၊ ဒီမှာ ဓားနှစ်လက် ရှိပါတယ်” ဆိုတော့ ယေရှုက “ဒီလောက်ဆိုရင် ရပြီ” ဆိုပြီးပြောတယ်။ ၃၉ အဲဒီနောက် ယေရှုက သွားနေကျအတိုင်း သံလွင်တောင်ကို ထွက်သွားတဲ့အခါ တပည့်တွေလည်း လိုက်သွားတယ်။ ၄၀ အဲဒီကိုရောက်တော့ “သွေးဆောင်မှုနောက် ပါမသွားအောင် အမြဲ ဆုတောင်းနေကြပါ” လို့မှာပြီး၊ ၄၁ တပည့်တွေနဲ့ ခဲတစ်ပစ်လောက် ဝေးတဲ့နေရာကို ထွက်သွားတယ်။ အဲဒီမှာ ဒူးထောက်ပြီး၊ ၄၂ “အဖ၊ အလိုရှိမယ်ဆိုရင် ဒီခွက်ကို လွှဲဖယ်ပေးပါ။ ဒါပေမဲ့ ကျွန်တော့်ဆန္ဒအတိုင်း မဖြစ်ပါစေနဲ့။ အဖရဲ့ဆန္ဒအတိုင်းသာ ဖြစ်ပါစေ” လို့ဆုတောင်းတယ်။ ၄၃ အဲဒီအခါ ကောင်းကင်ကနေ ကောင်းကင်တမန်တစ်ပါး ရောက်လာပြီး ယေရှုကို အားပေးတယ်။ ၄၄ ယေရှုက မချိတင်ကဲ ခံစားရလွန်းလို့ ခါတိုင်းထက်ပိုပြီး အသည်းအသန် ဆုတောင်းတော့ ချွေးတွေဟာ သွေးလို မြေပေါ် တစက်စက် ကျလာတယ်။ ၄၅ ဆုတောင်းပြီးနောက် တပည့်တွေဆီ ပြန်လာတဲ့အခါ သူတို့ ဝမ်းနည်းလွန်းလို့ နွမ်းလျပြီး အိပ်ပျော်နေတာကို တွေ့ရတယ်။ ၄၆ ယေရှုက “ခင်ဗျားတို့ ဘာလို့ အိပ်နေကြတာလဲ။ ထကြ၊ သွေးဆောင်မှုနောက် ပါမသွားအောင် မပြတ်ဆုတောင်းနေကြပါ” လို့ပြောတယ်။ ၄၇ အဲဒီလိုပြောနေတုန်းမှာပဲ လူတစ်အုပ် ရောက်လာတယ်။ တမန်တော် ၁၂ ယောက်အဝင်ဖြစ်တဲ့ ယုဒက ဦးဆောင်ခေါ်လာတာ။ သူက ယေရှုဆီ သွားပြီး နမ်းလိုက်တယ်။ ၄၈ ဒါနဲ့ ယေရှုက “ယုဒ၊ ခင်ဗျားက လူသားကို နမ်းပြီး သစ္စာဖောက်လိုက်တာပေါ့” လို့ပြောတယ်။ ၄၉ အနားမှာရှိသူတွေက ဘာဖြစ်တော့မယ်ဆိုတာ ရိပ်မိပြီး “သခင်၊ ဓားနဲ့ခုတ်လိုက်ရမလား” လို့မေးတယ်။ ၅၀ သူတို့ထဲက တစ်ယောက်က ပုရောဟိတ်မင်းရဲ့ကျွန်ကို ခုတ်လိုက်တဲ့အတွက် ညာဘက်နားရွက် ပြတ်သွားတယ်။ ၅၁ ယေရှုက “တော်တော့” လို့ပြောပြီး သူ့နားရွက်ကို တို့လိုက်တဲ့အခါ အကောင်းပကတိ ဖြစ်သွားတယ်။ ၅၂ အဲဒီနောက် ယေရှုက ရောက်လာတဲ့ ပုရောဟိတ်ကြီးတွေ၊ ဗိမာန်တော်မှူးတွေ၊ အကြီးအကဲတွေကို “ခင်ဗျားတို့က ဓားပြဖမ်းသလို ကျွန်တော့်ကိုဖမ်းဖို့ ဓားတွေ၊ တုတ်တွေ ကိုင်ပြီး လာရသလား။ ၅၃ နေ့တိုင်း ဗိမာန်တော်မှာ ခင်ဗျားတို့နဲ့အတူ ရှိနေတုန်းက ကျွန်တော့်ကို မဖမ်းကြဘူး။ အခုချိန်က ခင်ဗျားတို့ရဲ့အချိန်၊ အမှောင်မှာ ကျင်လည်သူတွေ ကြီးစိုးတဲ့အချိန်ကိုး” လို့ပြောတယ်။
သြဂုတ် ၂၇–စက်တင်ဘာ ၂
ကျမ်းစာထဲက အဖိုးတန်ဘဏ္ဍာများ | လုကာ ၂၃-၂၄
“သူတစ်ပါးရဲ့အပြစ်ကို ခွင့်လွှတ်ဖို့ အသင့်ရှိပါ”
(လုကာ ၂၃:၃၄) ယေရှုက “အဖ၊ သူတို့ကို ခွင့်လွှတ်ပါ။ သူတို့ဘာလုပ်နေမှန်း သူတို့မသိကြဘူး” လို့ပြောတယ်။ ပြီးတော့ ယေရှုရဲ့ ဝတ်လုံကို မဲချပြီး ခွဲဝေယူကြတယ်။
“ခရစ်တော်၏မေတ္တာတော်ကို သိနားလည်ခြင်း”
၁၆ ယေရှုသည် ကိုယ်တော့်ခမည်းတော်၏မေတ္တာကို အရေးပါသောနောက်တစ်နည်းဖြင့် စုံလင်စွာ ရောင်ပြန်ဟပ်ပြခဲ့သည်– ကိုယ်တော်သည် “ခွင့်လွှတ်ဖို့ အသင့်ရှိတယ်။” (ဆာလံ ၈၆:၅) ကိုယ်တော်သည် ညှဉ်းဆဲရာနှက်တိုင်ပေါ်တွင် အတင်ခံရစဉ်၌ပင် ဤတလိုတလားစိတ်ကို အထင်အရှားပြခဲ့သည်။ ကိုယ်တော်၏လက်နှင့် ခြေတို့ကို သံဖြင့်ရိုက်နှက်၍ အရှက်တကွဲအကျိုးနည်းစွာ သေရတော့မည့်အချိန်၌ပင် ယေရှုသည် အဘယ်အကြောင်း ပြောဆိုခဲ့သနည်း။ ကိုယ်တော်အား အဆုံးစီရင်သူတို့ကို အပြစ်ပေးဖို့ ယေဟောဝါထံတောင်းဆိုခဲ့ပါသလော။ ထိုသို့ပြောဆိုမည့်အစား ယေရှု၏နောက်ဆုံးစကားများမှာ “သူတို့၏အပြစ်ကို လွှတ်တော်မူပါ။ သူတို့သည် ကိုယ်ပြုသောအမှုကို မသိကြ” ဟူ၍ဖြစ်သည်။—လုကာ ၂၃:၃၄။
(လုကာ ၂၃:၄၃) ယေရှုက “ဒီနေ့ ကျွန်တော် မှန်တာကိုပြောမယ်။ ခင်ဗျားဟာ ကျွန်တော်နဲ့အတူ ပရဒိသုမှာ ရှိလိမ့်မယ်” လို့ပြောတယ်။
ကြီးလေးသောအပြစ်များကို ဘုရားသခင် ခွင့်လွှတ်သလော
အပြစ်ကိုသာမက အပြစ်ပြုသူ၏ သဘောထားကိုလည်း ယေဟောဝါ ရှုမှတ်တော်မူ၏။ (ဟေရှာယ ၁:၁၆-၁၉) ယေရှု၏ဘေးတစ်ဖက်တစ်ချက်စီတွင် နှက်တိုင်တင်ခံခဲ့ရသော လူဆိုးနှစ်ဦး၏အခြေအနေကို သုံးသပ်ကြည့်ပါ။ လူဆိုးနှစ်ဦးစလုံးသည် ရာဇဝတ်မှုကြီးများ ကျူးလွန်ခဲ့သည်မှာ ထင်ရှားပါသည်၊ အကြောင်းမှာ လူဆိုးတစ်ဦးက ဤသို့ဝန်ခံခဲ့၏– “ငါတို့သည် ကိုယ့်အပြစ်အတွက် ထိုက်သင့်သောပြစ်ဒဏ်ကို တရားသဖြင့် ခံရကြ၏။ ဤသူ [ယေရှု] မူကား အဘယ်အပြစ်ကိုမျှ မကျူးလွန်ခဲ့။” အဆိုပါလူဆိုး၏စကားက ယေရှုအကြောင်း အနည်းအကျဉ်းသိထားကြောင်း ဖော်ပြပြီး ယင်းက သူ၏သဘောထားကို ပြုပြင်ပြောင်းလဲစေခဲ့သည်။ သူ၏ သဘောထားပြောင်းသွားသည်ကို သူ ဆက်ပြောသည့် စကားအားဖြင့် သိနိုင်ပါသည်။ ဤတစ်ကြိမ်တွင် ယေရှုအား ဤသို့အနူးအညွတ်တောင်းပန်၏– “နိုင်ငံတော်ကို အမွေခံရသည့်အခါ ကျွန်ုပ်ကို သတိရတော်မူပါ။” အဆိုပါ လှိုက်လှဲသောတောင်းဆိုချက်ကို ခရစ်တော် မည်သို့ တုံ့ ပြန်ခဲ့သနည်း။ “ဒီနေ့ ကျွန်တော် မှန်တာကိုပြောမယ်။ ခင်ဗျားဟာ ကျွန်တော်နဲ့အတူ ပရဒိသုမှာ ရှိလိမ့်မယ်” ဟု မိန့်ဆိုခဲ့လေသည်။—လုကာ ၂၃:၄၁-၄၃။
ဤအချက်ကို စဉ်းစားကြည့်ပါ– လူသားတစ်ဦး အနေနှင့် ယေရှု နောက်ဆုံးပြောသွားသည့်စကားတွင် မိမိသည် သေဒဏ်ခံထိုက်ကြောင်း ဝန်ခံခဲ့သူတစ်ဦးကို သနားကြင်နာကြောင်း ဖော်ပြခဲ့သည်။ ယင်းသည် အလွန်အားရှိစရာပင်။ သို့ဖြစ်၍ ယခင်ကလုပ်ရပ်များ မည်သို့ပင်ဖြစ်ခဲ့ပါစေ စစ်မှန်သောနောင်တ တင်ပြသူအားလုံးအပေါ် ယေရှုခရစ်နှင့် ခမည်းတော် ယေဟောဝါတို့သည် ကရုဏာပြမည်ဖြစ်ကြောင်း ကျွန်ုပ်တို့ ယုံကြည်စိတ်ချနိုင်ပါသည်။—ရောမ ၄:၇။
(လုကာ ၂၄:၃၄) “သခင် အသက်ပြန်ရှင်လာတာ အမှန်ပဲ။ ရှိမုန်ကို လာတွေ့သွားတယ်။”
“ခရစ်တော်၏မေတ္တာတော်ကို သိနားလည်ခြင်း”
၁၇ တမန်တော်ပေတရုကို ယေရှုခွင့်လွှတ်၍ ဆက်ဆံခဲ့ပုံက သာ၍ပင် စိတ်နှလုံးထိမိစရာ ပုံဥပမာဖြစ်သည်။ ယေရှုကို ပေတရု အလွန်ချစ်ကြောင်း ယုံမှားဖွယ် အကြောင်းမရှိချေ။ နိသန်လ ၁၄ ရက်၊ ယေရှု မြေကြီးအသက်တာ၏ နောက်ဆုံးညတွင် ပေတရုက ကိုယ်တော်အား “သခင်၊ အကျွန်ုပ်သည် ကိုယ်တော်နှင့်အတူ ထောင်ထဲသို့လည်းကောင်း၊ အသေသတ်ခြင်းသို့လည်းကောင်း လိုက်ခြင်းငှာ အသင့်ရှိပါ၏” ဟုပြောခဲ့သည်။ သို့တိုင် နာရီအနည်းငယ်အကြာတွင် ယေရှုကို သိပင်မသိဟု သုံးကြိမ်တိုင်တိုင် ပေတရုငြင်းပယ်ခဲ့သည်တကား! တတိယအကြိမ် ပေတရု ငြင်းပယ်ပြောဆိုစဉ် အဘယ်အရာ ဖြစ်ပျက်ခဲ့ကြောင်း သမ္မာကျမ်းစာက ဤသို့ဖော်ပြသည်– “သခင်ဘုရားသည် လှည့်၍ ပေတရုကို ကြည့်တော်မူ၏။” သူ့အပြစ်၏လေးလံမှုကြောင့် နှလုံးကြေကွဲသွားပြီး ပေတရု “ပြင်သို့ထွက်၍ ပြင်းစွာငိုကြွေးလေ၏။” ထိုနေ့နှောင်းပိုင်းတွင် ယေရှု သေဆုံးသွားသောအခါ အဆိုပါတမန်တော်အနေဖြင့် ‘ငါ့သခင် ငါ့ကိုခွင့်လွှတ်ပါ့မလား’ ဟုသိလိုခဲ့ပေလိမ့်မည်။—လုကာ ၂၂:၃၃၊ ၆၁၊ ၆၂။
၁၈ အဖြေရရန် ပေတရု ကြာကြာစောင့်နေစရာ မလိုခဲ့ချေ။ နိသန်လ ၁၆ ရက်နံနက် ယေရှု ရှင်ပြန်ထမြောက်ခဲ့သည့် နေ့တွင်ပင် ကိုယ်တော်သည် ပေတရုထံ ကိုယ်တိုင်သွားရောက် တွေ့ဆုံခဲ့သည်။ (လုကာ ၂၄:၃၄။ ၁ ကောရိန္သု ၁၅:၄-၈) ယေရှုအား ခါးခါးသီးသီး ငြင်းပယ်ခဲ့သော ဤတမန်တော်ကို ကိုယ်တော် အဘယ်ကြောင့် ထိုသို့အထူးဂရုစိုက်ခဲ့ရသနည်း။ နောင်တရသော ပေတရုကို သူ၏သခင်သည် သူ့အားချစ်ဆဲ၊ တန်ဖိုးထားဆဲဖြစ်ကြောင်း ယေရှု ယုံကြည်စိတ်ချစေလို၍ ဖြစ်မည်။ သို့သော် ယေရှုသည် ပေတရုကို စိတ်ချစေရန် ထိုထက်မက ပြုတော်မူခဲ့သည်။
ရှာဖွေလေ့လာ ဘုရားရေးရာရတနာ
(လုကာ ၂၃:၃၁) အပင်စိမ်းစိုနေချိန်မှာ ဒီလိုဖြစ်နေတယ်ဆိုရင် ခြောက်သွေ့တဲ့အခါမှာ ဘယ်လိုဖြစ်သွားမလဲ။”
nwtsty လု ၂၃:၃၁ လေ့လာမှု မှတ်စု
အပင်စိမ်းစိုနေချိန်မှာ . . . ခြောက်သွေ့တဲ့အခါ– ယေရှုက ဂျူးလူမျိုးကို ရည်ညွှန်းနေတာ ထင်ရှားတယ်။ ဒီလူမျိုးဟာ သေတော့မယ့်အပင်နဲ့ တူတယ်။ ယေရှုနဲ့ ယေရှုကို ယုံကြည်တဲ့ဂျူးအနည်းငယ် ရှိနေတာကြောင့် နည်းနည်းတော့ စိမ်းစိုနေသေးတယ်။ ဒါပေမဲ့ မကြာခင်မှာ ယေရှု အသတ်ခံရတော့မယ်၊ သစ္စာရှိဂျူးတွေ စွမ်းအားတော်နဲ့ ဘိသိက်ပေးခံရပြီး ဘုရားသခင်ရဲ့ အစ္စရေးလူမျိုးထဲ ပါဝင်ရတော့မယ်။ (ရ ၂:၂၈၊ ၂၉။ ဂ ၆:၁၆) အဲဒီအခါ ဇာတိအစ္စရေးလူမျိုးဟာ ခြောက်သွေ့ပြီး သေသွားတဲ့အပင်လို ဖြစ်သွားမယ်။—မ ၂၁:၄၃။
(လုကာ ၂၃:၃၃) ဦးခေါင်းခွံဆိုတဲ့ အရပ်ကို ရောက်လာတဲ့အခါ ယေရှုကို သစ်တိုင်ပေါ်တင်ပြီး သံနဲ့ရိုက်တယ်။ ရာဇဝတ်သား နှစ်ယောက်ကိုလည်း ဘယ်ဘက်မှာ တစ်ယောက်၊ ညာဘက်မှာတစ်ယောက် သံနဲ့ရိုက်တယ်။
nwtsty မီဒီယာ
ဖနောင့်ရိုးထဲ ဝင်နေတဲ့သံချောင်း
ဒီဓာတ်ပုံဟာ လူ့ဖနောင့်ရိုးထဲ ၄.၅ လက်မရှည်တဲ့ သံချောင်းဝင်နေတဲ့ ပုံဖြစ်တယ်။ (mwb17.12 စာ. ၅ ကိုကြည့်ပါ။) မူလအရိုးကို ၁၉၆၈ ခုနှစ်က ဂျေရုဆလင်မြောက်ပိုင်းမှာ တူးဖော် တွေ့ရှိခဲ့တာဖြစ်ပြီး ရောမခေတ်ကလို့ သတ်မှတ်ကြတယ်။ လူတွေကို သစ်တိုင်တင်သတ်တဲ့အခါ သံရိုက်လေ့ရှိကြောင်း အဲဒါက သက်သေထူတယ်။ ရောမစစ်သားတွေ ယေရှုခရစ်ကို သစ်တိုင်တင်တဲ့အချိန်မှာလည်း အဲဒီလိုသံမျိုးတွေ အသုံးပြုခဲ့မှာပဲ။ ကွယ်လွန်သူရဲ့ အသား ဆွေးမြေ့ပြီးနောက် အရိုးခြောက်တွေ ထည့်တဲ့ ကျောက်အရိုးအိုးထဲမှာ အဲဒီအရိုးကို တွေ့ခဲ့တာဖြစ်တယ်။ ဒါက သစ်တိုင်ပေါ် အသတ်ခံရသူကို သင်္ဂြိုဟ်ခွင့်ပေးခဲ့တယ်ဆိုတာ ဖော်ပြတယ်။
ကျမ်းစာဖတ်ရှုခြင်း
(လုကာ ၂၃:၁-၁၆) ဒါနဲ့ စုရုံးနေတဲ့ လူတွေအားလုံး ထပြီး ယေရှုကို ပိလတ်မင်းဆီ ခေါ်သွားကြတယ်။ ၂ ပြီးတော့ သူတို့က “ဒီလူဟာ ကျွန်တော်တို့ရဲ့ လူမျိုးကို လမ်းလွဲအောင်လုပ်တယ်။ ဆီဇာကို အခွန်မဆောင်နဲ့လို့ တားတယ်။ သူ့ကိုယ်သူ ခရစ်တော်လို့ခေါ်တဲ့ ဘုရင်ဆိုပြီး ပြောနေတယ်” လို့စွပ်စွဲကြတယ်။ ၃ ပိလတ်မင်းက “မင်းဟာ ဂျူးတွေရဲ့ဘုရင် ဟုတ်သလား” လို့မေးတော့ ယေရှုက “မင်းကြီးပြောတာ အမှန်ပဲ” လို့ဖြေတယ်။ ၄ အဲဒီအခါ ပိလတ်မင်းက “ဒီလူ့ဆီမှာ ဘာပြစ်မှုမှ ငါမတွေ့ဘူး” လို့ ပုရောဟိတ်ကြီးတွေနဲ့ လူတွေကိုပြောတော့၊ ၅ သူတို့က “သူဟာ ဂါလိလဲပြည်ကအစ ဒီနေရာအထိ ယုဒပြည်တစ်လျှောက်လုံးမှာ လူတွေကို သွန်သင်ပြီး ပြဿနာတွေ ဖန်တီးနေပါတယ်” လို့ ထပ်တလဲလဲ ပြောကြတယ်။ ၆ ဒါကိုကြားတော့ ပိလတ်မင်းက ဒီလူ ဂါလိလဲနယ်သား ဟုတ်မဟုတ် မေးမြန်းကြည့်တဲ့အခါ၊ ၇ ဟေရုဒ်မင်းပိုင်တဲ့နယ်က ဖြစ်မှန်းသိတော့ သူ့ဆီ ပို့လိုက်တယ်။ အဲဒီအချိန်မှာ ဟေရုဒ်မင်းက ဂျေရုဆလင်မြို့ကို ရောက်နေတယ်။ ၈ ဟေရုဒ်မင်းက ယေရှုကိုမြင်တဲ့အခါ သိပ်ပျော်သွားတယ်။ ယေရှုအကြောင်း အများကြီး ကြားထားတဲ့အတွက် သူ့ကိုတွေ့ချင်နေတာ ကြာပြီ။ အံ့ဖွယ်အမှုတစ်ခုခု လုပ်ပြမယ်လို့လည်း မျှော်လင့်နေတာ။ ၉ ဒါနဲ့ ဟေရုဒ်မင်းက မေးခွန်းတွေ အများကြီးမေးပေမဲ့ ယေရှု တစ်ခုမှ ပြန်မဖြေဘူး။ ၁၀ ပုရောဟိတ်ကြီးတွေနဲ့ ကျမ်းတတ်တွေလည်း အကြိမ်ကြိမ်ထပြီး ဒေါသတကြီး စွပ်စွဲပြောဆိုကြတယ်။ ၁၁ ဟေရုဒ်မင်းနဲ့ သူ့စစ်သည်တွေက ယေရှုကို အရှက်ခွဲတယ်။ တင့်တယ်တဲ့အဝတ်ကို ဝတ်ခိုင်းပြီး လှောင်ပြောင်တယ်။ ပြီးနောက် ပိလတ်မင်းဆီ ပြန်ပို့လိုက်တယ်။ ၁၂ အရင်တုန်းက ရန်ဘက်တွေဖြစ်တဲ့ ဟေရုဒ်မင်းနဲ့ ပိလတ်မင်းက အဲဒီနေ့မှာ ပြန်သင့်မြတ်သွားကြတယ်။ ၁၃ အဲဒီနောက် ပိလတ်မင်းက ပုရောဟိတ်ကြီးတွေ၊ ခေါင်းဆောင်တွေနဲ့ လူတွေကို ခေါ်ပြီး၊ ၁၄ “ပြည်သူပြည်သားတွေကို ပုန်ကန်အောင် လှုံ့ဆော်သူဆိုပြီး ဒီလူကို ငါ့ဆီခေါ်လာခဲ့ကြတယ်။ မင်းတို့ရှေ့မှာ သူ့ကို ငါစစ်ဆေးမေးမြန်းပေမဲ့ မင်းတို့ စွဲချက်တင်လောက်တဲ့ အပြစ်တစ်ခုကိုမှ ငါမတွေ့ဘူး။ ၁၅ ဟေရုဒ်မင်းလည်း အပြစ်ရှာမတွေ့လို့ ငါတို့ဆီ ပြန်ပို့လိုက်တာပဲ။ ဒီလူက သေထိုက်တဲ့ပြစ်မှု တစ်ခုမှ မကျူးလွန်ဘူး။ ၁၆ ဒါကြောင့် သူ့ကို ငါဒဏ်ပေးပြီးတော့ ပြန်လွှတ်လိုက်မယ်” လို့ပြောတယ်။