ကမ္ဘာချီ ဟောပြောခြင်းလုပ်ငန်းကို ဦးစားပေးခြင်း

၂၀၁၅၊ စက်တင်ဘာ ၂၃ ရက်၊ ဗုဒ္ဓဟူးနေ့မှာ အုပ်ချုပ်ရေးအဖွဲ့က လှူဒါန်းထားတဲ့ ရန်ပုံငွေကို အကောင်းဆုံး အသုံးပြုနိုင်ဖို့ အဖွဲ့အစည်းဆိုင်ရာ ပြောင်းလဲမှု အတော်များများအကြောင်း ကမ္ဘာတစ်ဝန်းမှာရှိတဲ့ ဗေသလမိသားစုကို အသိပေးခဲ့တယ်။ အဲဒီနောက် ၂၀၁၅၊ အောက်တိုဘာ ၃ ရက်၊ စနေနေ့၊ အုပ်ချုပ်ရေးအဖွဲ့ရဲ့ ကြေညာချက်မှာ ဒီလိုရှင်းပြထားတယ်– “ဖိလိပ္ပိ ၁:၁၀ မှာ ‘ပိုအရေးကြီးတဲ့အရာတွေကို ပိုင်းခြားသိ’ ဖို့ အားပေးထားတယ်။ အဲဒီပညာရှိ အကြံပြုချက်နဲ့အညီ ကျွန်တော်တို့ [အုပ်ချုပ်ရေးအဖွဲ့] က ဘုရားသခင့်လူမျိုးရဲ့ ဝတ်ပြုရေး ကောင်းကျိုး၊ ကမ္ဘာချီ ဟောပြောခြင်းလုပ်ငန်း တိုးတက်မှုကို အကောင်းဆုံး ထောက်မပေးမယ့် လုပ်ငန်းတွေကို ဦးစားပေးလိုပါတယ်။”

JW ရုပ်သံအစီအစဉ်မှာ အုပ်ချုပ်ရေးအဖွဲ့ဝင် ညီအစ်ကို စတီဗင်လတ် ဆက်ရှင်းပြတယ်– “အုပ်ချုပ်ရေးအဖွဲ့က လယ်ကွင်းမှာ နိုင်ငံတော်အကျိုးစီးပွား တိုးတက်ရေးကို အင်မတန် စိတ်ဝင်စားနေတယ်။ ဌာနခွဲအားလုံးမှာ အသုံးစရိတ် လျှော့ချနိုင်မယ့်နည်းတွေကို ပြန်ဆန်းစစ်ထားတယ်။ ဒါမှ ရန်ပုံငွေတွေကို လယ်ကွင်းမှာ ပိုသုံးနိုင်မယ်။ ဒါကြောင့် ကြာမြင့်စွာကတည်းက ရှိလာတဲ့ ဗေသလလုပ်ရိုးလုပ်စဉ်၊ လုပ်ငန်းများစွာကို လျှော့ချ၊ ပယ်ဖျက်လိုက်ပါပြီ။ ရလဒ်အနေနဲ့ ဗေသလမိသားစုဝင် နည်းနည်းပဲ လိုအပ်ပါတော့မယ်။”

ဒါကြောင့် ၂၀၁၅၊ စက်တင်ဘာလကစပြီး ကမ္ဘာတစ်ဝန်းက ဗေသလမိသားစုဝင် ၅,၅၀၀ လောက် လယ်ကွင်းကို ပြန်သွားကြရတယ်။ ဒီပြောင်းလဲမှုတွေကြောင့် အကြီးအကျယ် ပြုပြင်ချိန်ညှိကြရပေမဲ့ ယေဟောဝါ ကောင်းချီးပေးတာ ထင်ရှားတယ်။ ဟောပြောသွန်သင်ခြင်းလုပ်ငန်းလည်း ပိုခိုင်မာတောင့်တင်းလာတယ်။

ဗေသလကနေ လယ်ကွင်းကို ပြန်တာဝန်ပေးခံရတဲ့ သီရိလင်္ကာနိုင်ငံက ဇနီးမောင်နှံက ဒီအပြောင်းအလဲဟာ ယေဟောဝါနဲ့ အဖွဲ့အစည်းအပေါ် ယုံကြည်စိတ်ချမှု တင်ပြဖို့ အခွင့်အရေးဖြစ်တယ်လို့ ရှုမြင်ခဲ့ကြတယ်။ “ရှေ့ဆက် ဘယ်လိုဖြစ်မယ်ဆိုတာ မသေချာပေမဲ့ ယေဟောဝါ ပစ်မထားဘူးဆိုတာတော့ သေချာပါတယ်။ ဒါကြောင့် ‘ယေဟောဝါ၊ ဘယ်အခြေအနေပဲ ကြုံရပါစေ ကျွန်တော်တို့ နှစ်ယောက်စလုံး မှန်မှန်ရှေ့ဆောင်အဖြစ် ဆက်အမှုဆောင်နိုင်ဖို့ ပြုပြင်ချိန်ညှိနိုင်အောင် ကူညီပေးပါ’ လို့ ဆုတောင်းခဲ့ကြတယ်။ ပထမလမှာ ငွေမရှိသလောက်ပဲ။ ဒါပေမဲ့ ယေဟောဝါရဲ့ မေတ္တာနဲ့ စောင့်ရှောက်မှု ခံစားခဲ့ရတယ်။ အခု ကုန်ကျစရိတ်တွေ ကာမိစေမယ့် ပုံမှန်ဝင်ငွေ ရှိနေပြီ။ အိမ်အလုပ်၊ အပြင်အလုပ်၊ ရှေ့ဆောင်အလုပ်ကြောင့် အလုပ်သိပ်များပေမဲ့ ဗေသလမှာ ရရှိတဲ့ လေ့ကျင့်မှုကြောင့် အချိန်ကို ကောင်းကောင်း စီမံနိုင်တယ်။ လူတွေ အမှန်တရား သိလာအောင် ကူညီပေးရတာထက် ပိုကျေနပ်စရာကောင်းတာ မရှိတော့ဘူး။ ရှေ့ဆောင်အနေနဲ့ အဲဒီလိုကူညီပေးခွင့်ရလို့ သိပ်ပျော်တယ်။”

ကိုလံဘီယာနိုင်ငံက တာဝန်ပြောင်းလဲခံရတဲ့ ဗေသလအိမ်သားတချို့ဟာ ဘာသာစကားအသစ် သင်ယူကြပြီး နိုင်ငံတော်သတင်းကောင်း ဝေမျှဖို့ ဝေးလံတဲ့ဒေသတွေကို ပြောင်းရွှေ့ခဲ့ကြတယ်။ အဲဒီညီအစ်ကို/မတွေဟာ အသင်းတော်သစ်တွေအတွက် ကောင်းချီးပါပဲ။ မိမိရဲ့ တိုက်နယ်မှာ တာဝန်ခန့်အပ်ခံရတဲ့ ဇနီးမောင်နှံနဲ့ပတ်သက်ပြီး တိုက်နယ်ကြီးကြပ်မှူးတစ်ယောက် ပြောတယ်– “အသင်းတော်မှာရှိတဲ့ ညီအစ်ကို/မတွေက သူတို့ရဲ့ အကူအညီကို သိပ်လေးမြတ်ကြတယ်။ လယ်ကွင်းလုပ်ငန်းမှာ အသင်းတော်ရဲ့ ပါဝင်မှု တိုးတက်လာတယ်။ အသင်းတော်တာဝန် အမျိုးမျိုးကို ထမ်းဆောင်နိုင်ဖို့လည်း ဒေသခံညီအစ်ကိုတွေ လေ့ကျင့်ခံနေရတယ်။” ဗေသလအိမ်သားဟောင်းတွေဟာ ဗေသလကို တစ်ပတ်မှာ တစ်ရက် ဒါမှမဟုတ် ဒီ့ထက်မက လာပြီးတော့လည်း အချိန်ပိုင်း အမှုဆောင်ကြတယ်။

ဂျပန်ဗေသလမှာ ၃၁ နှစ်လောက် အမှုဆောင်ခဲ့တဲ့ ညီအစ်ကိုဟာ အကြီးအကဲနှစ်ယောက်ပဲရှိတဲ့ အသင်းတော်မှာ တာဝန်ခန့်အပ်ခံရတယ်။ နိုင်ငံတော်ခန်းမကို ပြုပြင်မွမ်းမံဖို့ အစီအစဉ်ရှိတာမို့ နှစ်ပတ်လုံးလုံး လောကအလုပ် မလုပ်ခဲ့ဘူး။ ပြုပြင်မွမ်းမံမှု မစခင်လေးမှာပဲ အသင်းတော်ရှိတဲ့ ကူမာမိုတိုဒေသမှာ ၇.၀ ပြင်းအားရှိ ငလျင် လှုပ်ခတ်ခဲ့တယ်။ လောကအလုပ်လုပ်ဖို့ မစီစဉ်ထားတဲ့အတွက် ကယ်ဆယ်ရေးလုပ်ငန်းနဲ့ နောက်ပိုင်း သိုးထိန်းလုပ်ငန်းမှာ ဦးဆောင်ပါဝင်နိုင်ခဲ့တယ်။ “ပြန်တွေးကြည့်လိုက်တဲ့အခါ ယေဟောဝါက ကျွန်တော်တို့ကို အလိုအပ်ဆုံးနေရာမှာ နေရာချပေးတယ်လို့ ပြောနိုင်တယ်” ဆိုပြီး သူပြောတယ်။

ဩစတြေးလျဌာနခွဲမှာ အမှုဆောင်ခဲ့တဲ့ ဖီလ်နဲ့ ရှူဂါ ဒီလိုပြောတယ်– “တာဝန်ပြောင်းလဲသွားတော့ ဘဝကို ရိုးရိုးရှင်းရှင်းထားဖို့ ဆုံးဖြတ်ခဲ့တယ်။ ဆုံးဖြတ်ချက်ကောင်း ချနိုင်အောင် လမ်းပြပေးဖို့၊ ဆုံးဖြတ်ချက်တွေကို ကောင်းချီးပေးဖို့ ယေဟောဝါဆီ ဆုတောင်းခဲ့တယ်။ ကျွန်တော်တို့ အဖြစ်ချင်ဆုံးကတော့ တိုင်းတစ်ပါးအသင်းတော်တစ်ခုမှာ အမှုဆောင်ဖို့ပဲ။ ကျွန်တော်တို့ရဲ့ ဆုံးဖြတ်ချက်ကို ယေဟောဝါ ကောင်းချီးပေးခဲ့တယ်။ စိတ်နှလုံးအကြွင်းမဲ့ အမှုဆောင်နိုင်အောင် လမ်းရှင်းပေးခဲ့တယ်။” အခု ဖိလစ်ပိုင်နိုင်ငံ၊ ဒါဗောင်ပြည်နယ်က ကြေညာသူ ၃၄ ယောက်၊ မှန်မှန်ရှေ့ဆောင် ၉ ယောက်ရှိတဲ့ ဆာမယ်ကျွန်း အင်္ဂလိပ်အုပ်စုမှာ အမှုဆောင်နေတယ်။ ဆက်လိုက်ရမယ့် စိတ်ဝင်စားသူတွေရဲ့ လိပ်စာ ၁၂၀ လောက် ရရှိထားတယ်။ “လုပ်စရာ အများကြီးရှိနေတာ သေချာတယ်။ ယေဟောဝါကို အကြွင်းမဲ့ အားကိုးခဲ့လို့ ပျော်လိုက်တာ။ ဒါက ယုံကြည်ခြင်း၊ ယေဟောဝါကို ချစ်တဲ့မေတ္တာ တိုးများစေတယ်။”

အထူးရှေ့ဆောင်အဖြစ် တာဝန်ပြောင်းလဲခန့်အပ်ခံရတဲ့ ရုရှားနိုင်ငံက ညီအစ်မတစ်ယောက် ဒီလိုပြောတယ်– “ရှေ့ဆောင်လုပ်ငန်းက အရေးကြီးဆုံးလုပ်ငန်း၊ ဘယ်တော့မှ ပြန်မလုပ်တော့မယ့် ဟောပြောခြင်းလုပ်ငန်းမှာ အပြည့်အဝ ပါဝင်ဖို့ အခွင့်အရေး ရရှိစေတယ်။ ယေဟောဝါရဲ့ အသုံးတော်ခံခွင့်ရလို့ သိပ်ပျော်တယ်။” အခု ကျမ်းစာသင်အံမှု ခြောက်ခု ရှိနေတယ်။ အီရတ်၊ နိုင်ဂျီးရီးယား၊ သီရိလင်္ကာ၊ ဆီးရီးယား၊ ဇမ်ဘီယာနိုင်ငံတို့က လူတွေ ပါဝင်တယ်။

ဇမ်ဘီယာ ဗေသလမိသားစုဝင်များစွာဟာ မှန်မှန်ရှေ့ဆောင်အဖြစ် တာဝန်ခန့်အပ်ခံရတယ်။ လယ်ကွင်းလုပ်ငန်းမှာ ပိုပါဝင်ခွင့်ရလို့ ပျော်ရွှင်နေကြတယ်။ “ဗေသလက ထွက်ပြီး မကြာခင်မှာပဲ စာမတတ်သူနှစ်ယောက်ကို ရေးတတ်၊ ဖတ်တတ်လာအောင် ကူညီပေးနိုင်ခဲ့တယ်။ ကျမ်းစာသင်သားတစ်ယောက်ဖြစ်တဲ့ ၁၀ နှစ်အရွယ် ကောင်လေးဟာ မကြာခင်မှာပဲ ကြားရက်အစည်းအဝေးမှာ ပထမဆုံးတာဝန် ရခဲ့တယ်။ ကျွန်တော်တို့ သက်သေခံလိုက်တဲ့ ဇနီးမောင်နှံတစ်စုံက သတိရအောက်မေ့ပွဲလာတက်တယ်။ အဲဒီအချိန်ကစပြီး အသင်းတော် အစည်းအဝေးတွေကို မပျက်မကွက် တက်ရောက်နေပြီ။ ကျမ်းစာသင်အံမှုမှာလည်း တော်တော် တိုးတက်လာတယ်။ ယေဟောဝါရဲ့ လမ်းညွှန်မှုကိုသာ မလိုက်ခဲ့ရင်၊ ကိုယ်တော့် ထောက်မမှုကိုသာ အသိအမှတ် မပြုရင်၊ ကောင်းချီးကိုသာ မစောင့်ဆိုင်းခဲ့ရင် ဒါတွေအားလုံး ဖြစ်လာမှာ မဟုတ်ဘူး” လို့ ဇနီးနဲ့အတူ ရှေ့ဆောင်လုပ်နေတဲ့ အန်ဒရူး ပြောတယ်။

ဇမ်ဘီယာမှာ နေထိုင်တဲ့ အက်စန်နဲ့ အာနက်တို့ လယ်ကွင်းကို ပြန်တာဝန်ကျချိန်မှာ အိမ်ထောင်ကျခါစပဲ ရှိသေးတယ်။ အာနက် ဒီလိုပြောတယ်– “ခြိုးခြံချွေတာတတ်အောင်၊ အကြွေးမရှိအောင်၊ ပျော်နေနိုင်အောင် ဗေသလလေ့ကျင့်မှုက ကူညီပေးတယ်။ ဗေသလလုပ်ငန်းမှာ ပါဝင်ခဲ့တာကို နောင်တမရပါဘူး။ ဘုရားရေးရာပန်းတိုင်တွေကို ဘယ်လို ချိန်ညှိရမယ်၊ ဘယ်လို အရောက်လှမ်းရမယ်ဆိုတာတွေ တတ်သိလာတယ်။ ယေဟောဝါကို ပိုယုံကြည်လာပြီး ဆက်သစ္စာရှိဖို့ အသင့်ပြင်ခံရတယ်။”