“ဘုရားသခင်၏အိမ်တော်” ကို တန်ဖိုးထား လေးစားစွာ ရှုမြင်ခြင်း

“ထာဝရဘုရား၏ တင့်တယ်ခြင်း အသရေတော်ကို ဖူးမြင်၍ ဗိမာန်တော်၌ မွေ့လျော်ခြင်းအလို့ငှာ ထာဝရဘုရား၏ အိမ်တော်မှာ တစ်သက်လုံးနေရမည်အကြောင်းတည်းဟူသော အခွင့်တစ်ခုကို ထာဝရဘုရား၌ ငါဆုတောင်းပြီ။ ထိုအခွင့်ကို ရှာရဦးမည်။”—ဆာလံ ၂၇:၄။

တန်ဖိုးထား လေးမြတ်တတ်သော ဒါဝိဒ်မင်းကြီးသည် ယေဟောဝါ၏ဗိမာန်တော်ကို အားရဝမ်းသာစွာ ရှုမြင်ခဲ့သည်။ အသင်လည်း စစ်မှန်သောဝတ်ပြုရေးဆိုင်ရာဌာနများအပေါ် ထပ်တူသဘောထားမျိုး ယနေ့ရှိပါသလော။ ကျွန်ုပ်တို့ခေတ်တွင် ယေဟောဝါ၏ဝတ်ပြုရေးနှင့်ဆက်စပ်သော အဆောက်အအုံများတွင် ကင်းမျှော်စင်အသင်း၏ ဌာနခွဲများရှိ ၉၅ ခုမကသောဗေသလအိမ် များလည်း ပါဝင်ပါသည်။

၁၉၄၈ ခုနှစ်၌ ဂျာမနီနိုင်ငံရှိအိမ်တော်တွင် အမှုတော်စထမ်းဆောင်ခဲ့သော ဟဲလ်ဂါက “ကျွန်မ၏ နှစ်ပေါင်းများစွာ ဗေသလလုပ်ငန်းကို ပြန်စဉ်းစားကြည့်သည့်အခါ အလွန်ကျေးဇူးတင်ရုံမက တန်ဖိုးထားလေးမြတ်စိတ် တစ်နှစ်ထက်တစ်နှစ် များစွာတိုးများလာသည်ကို တွေ့ရှိရသည်” ဟုရှင်းပြပါသည်။ ၁၉၉၃ လုပ်ငန်းတော်နှစ်အတွင်း ‘ယေဟောဝါ၏ တင့်တယ်ခြင်းအသရေတော်ကို ဖူးမြင်’ ခဲ့သူ ရွှင်လန်းသော ဗေသလလုပ်သား ၁၃,၈၂၈ ယောက်အနက် ဟဲလ်ဂါသည် တစ်ဦးအပါအဝင်ဖြစ်သည်။ ဗေသလဟူသောအမည်၏ အဓိပ္ပာယ်အတိအကျကား အဘယ်နည်း။ ဗေသလအတွင်း၌ဖြစ်စေ၊ ပြင်ပတွင်ဖြစ်စေ ဘုရားအမှုတော်ထမ်းသူ ယေဟောဝါသက်သေခံတိုင်းသည် ဤအစီအစဉ်ကို တန်ဖိုးထားလေးမြတ်သောစိတ်ဖြင့် မည်သို့ရှုမြင်သင့်သနည်း။

ဆက်ကပ်အပ်နှံခြင်း တောင်းဆိုသော နာမ

“ဗေသလ” ဟူသောအမည်သည် အလျောက်ပတ်ဆုံးဖြစ်သည်။ အကြောင်းမှာ ဗက်သ်အဲလ်ဟူသော ဟေဗြဲစကားလုံး၏အဓိပ္ပာယ်မှာ “ဘုရားသခင့်၏အိမ်တော်” ဖြစ်သည်။ (ကမ္ဘာဦး ၂၈:၁၉၊ ကဘ၊ အောက်ခြေမှတ်ချက်) မှန်ပါသည်၊ ဗေသလသည် စည်းကမ်းစနစ်ကျသောအိမ်၊ သို့မဟုတ် ဘုရားသခင်နှင့် ကိုယ်တော်၏အလိုတော်ကို ဗဟိုပြုသည့် ‘ဉာဏ်ပညာအားဖြင့် တည်ဆောက်သောအိမ်’ နှင့်တူပါသည်။ (သု. ၂၄:၃) “မိသားစုတစ်ခုတွင် နေထိုင်ခြင်းနှင့်တူသည်။ ကျွန်မတို့အတွက် နေ့စဉ်အစီအစဉ် အတိအကျရှိသည်” ဟုဟာတာက ကျေးဇူးတင်စွာ ပြောပြသည်။ သူမသည် ဟဲလ်ဂါအမှုထမ်းနေသောဗေသလတွင်ပင် ၄၅ နှစ်ကျော်အမှုထမ်းခဲ့ပြီ။ ဤကြီးမားသောမိသားစုအဝင်ဖြစ်သူ၌ ကိုယ်စီကိုယ်ငှ ဆောင်ရွက်စရာလုပ်ငန်းနှင့် ကိုယ့်နေရာကိုယ်ရှိကြရာ တစ်ဦးစီသည် ပျော်ရွှင်မှုနှင့် လုံခြုံမှုရှိသည်ဟု ခံစားကြရသည်။ ဗေသလအမည်နှင့်အညီ ဌာနတိုင်းကို အစီအစဉ်တကျနှင့် စည်းစနစ်ကျနစွာ ဖွဲ့စည်းထားပါသည်။ ယင်းက သင့်တင့်မှုရှိစေ၍ သတင်းကောင်းကို ထိရောက်စွာ ဟောပြောနိုင်စေသည့်အပြင် အသင်းတော်များအား “ဘုရားသခင်၏အိမ်တော်” ကို အမြင့်မားဆုံးဂုဏ်တင်ချီးမွမ်းနိုင်ရန်ခိုင်လုံသောအကြောင်း ရှိစေပါသည်။—၁ ကောရိန္သု ၁၄:၃၃၊ ၄၀။

ဤသို့သောအဆောက်အအုံများ အဘယ်ကြောင့်လိုအပ်သနည်း။ ဥပမာ၊ ဤမဂ္ဂဇင်းကို ဗေသလပုံနှိပ်တိုက်တစ်ခုတွင် ထုတ်လုပ်ခဲ့သည်။ ယေရှုခရစ် ကြိုတင်မြင်တော်မူခဲ့သော ဘုရားသခင့်နိုင်ငံတော်သတင်း ဟောပြောခြင်းနှင့် ဝိညာဏအစာ ဖြန့်ဝေခြင်းတို့အတွက် ဗေသလကဲ့သို့သော ဖွဲ့စည်းစီစဉ်မှုများ မရှိလျှင်မဖြစ်ပါ—စေတနာ့ဝန်ထမ်းများ၏ ထောက်ပံ့ကူညီမှုနှင့် ယေဟောဝါအား ကိုးကွယ်သူအပေါင်း၏ များစွာသောလေးစားမှုကိုခံရသည်။—မဿဲ ၂၄:၁၄၊ ၄၅။

ဤနေရာ၏ တစ်နေ့တာလုပ်ငန်းအစီအစဉ်ကို ပိုမိုသိလိုပါသလော။ ဟဲလ်ဂါနှင့်ဟာတာတို့ နေထိုင်သောနေရာတွင် လူနေအိမ်တိုက်ခန်းအားလုံး၌ နံနက် ၆:၃၀ တွင် အသံသာဖြင့်နှိုးဆော်ပေးပါသည်။ ဤတွင်မှန်မှန်လုပ်အားပေးသူ ၈၀၀ ကျော်တို့မှ များစွာသောသူတို့သည် တစ်နေ့တာလုပ်ငန်းအတွက် ထိုအချိန်မတိုင်မီ နိုးထ၍ ပြင်ဆင်နှင့်ပြီးသားဖြစ်သည်။ တနင်္လာမှစနေနေ့အထိ နံနက် ၇ နာရီအချိန်တွင် ထမင်းစားခန်းများ၌ နေ့စဉ်ကျမ်းချက်ဆွေးနွေးခြင်း သို့မဟုတ် နံနက်ဝတ်ပြုမှုပြုခြင်းအတွက် မိသားစုသည်စုဝေးကြသည်။ ထိုနောက် အာဟာရပြည့်သော နံနက်စာကို စားသုံးကြသည်။ တစ်နေ့တာ လုပ်ငန်းဆောင်ရွက်ချိန်မှာ နံနက် ၈:၀၀ နာရီတွင်စတင်၍ ရှစ်နာရီကြာကာ နေ့လည်စာ စားသုံးဖို့အတွက်သာ အနားယူကြသည်။ (ဤမိသားစုသည် စနေနေ့တွင် နေ့ဝက်အလုပ်လုပ်ကိုင်လေ့ရှိသည်။) မီးဖိုခန်း၊ ပုံနှိပ်တိုက်၊ အဝတ်လျှော်ခန်း၊ ရုံးခန်းများ၊ အလုပ်ရုံများ၊ စာအုပ်ချုပ်ဌာန သို့မဟုတ် မည်သည့်ဌာနတွင်မဆို အလုပ်များစွာ လုပ်ကိုင်စရာရှိသည်။

ညနေချိန်များနှင့် စနေ၊ တနင်္ဂနွေနေ့များတွင် ဤမိသားစုအဝင်ဖြစ်သူတို့သည် ဒေသခံအသင်းတော်များနှင့် ပေါင်းသင်းပြီး စည်းဝေးများတက်ကြသည်၊ လူထုအား ဟောပြောခြင်း၌ ပါဝင်ကြသည်။ ဤအသင်းတော်များတွင် ဗေသလရှိညီအစ်ကိုအများသည် အကြီးအကဲများ သို့မဟုတ် ဓမ္မအမှုထမ်းများ ဖြစ်ကြသည်။ ဒေသခံသက်သေခံများကလည်း ဤသို့သော ပူးပေါင်းဆောင်ရွက်မှုကို တန်ဖိုးထားကြသည်။ နှစ်အုပ်စုလုံးသည် တပေါင်းတစည်းတည်း တစ်ဦးကိုတစ်ဦး လေးစားတန်ဖိုးထား၍ နားလည်မှုရှိစွာ လုပ်ကိုင်ဆောင်ရွက်ကြသည်။ (ကောလောသဲ ၂:၁၉) ဗေသလလုပ်သားတစ်ဦးစီသည် “ဘုရားသခင်၏အိမ်တော်” တွင်ရထားသောတာဝန်မှာ အခြားလုပ်ငန်းများထက် ပိုအရေးကြီးကြောင်း သဘောပေါက်ထားပါသည်။ သို့ရာတွင် စိတ်အားထက်သန်စွာ ဟောပြောခြင်း၊ အသင်းတော်နှင့်အတူ ပါဝင်လုပ်ဆောင်ခြင်း၊ မျှတသောအမြင်ရှိထားခြင်းဖြင့် ဗေသလလုပ်သား၏ ဝိညာဉ်ရေးစိတ်ထားကို တိုးပွားစေ၏၊ ပိုမိုပျော်ရွှင်စေ၍ မိသားစုတွင် ပိုမိုအလုပ်ဖြစ်ထွန်းသူ ဖြစ်စေသည်။ စိုးလ်အပြည့်ဆက်ကပ်အပ်နှံခြင်းနှင့် ကွင်းဆက်နေသောအမည်ရှိ “အိမ်တော်” ၌လုပ်ငန်းဆောင်ရွက်ရာတွင် ဤအရည်အချင်းများသည် အမှန်အရေးပါလှပေသည်!

ဗေသလလုပ်ငန်းကို အောင်မြင်စွာ ဆောင်ရွက်ခြင်း

ယေဟောဝါသက်သေ မြောက်မြားစွာတို့အား ဗေသလလုပ်ငန်းတွင် အောင်မြင်မှုရရှိရန် အကူအညီဖြစ်စေသည်ကား အဘယ်နည်း။ ပြင်သစ်တွင် နှစ်ချီအတွေ့အကြုံရှိသော ဗေသလမိသားစုအဝင်ဖြစ်သူများ ဤသို့ဖြေဆိုသည်– “ယေဟောဝါကို ချစ်ခြင်းဖြစ်သည်။ ကျွန်မတို့ကို ကိုယ်တော်ထားရာနေရာတွင် စွဲစွဲမြဲမြဲနေမည်ဟု စိတ်ဆုံးဖြတ်ခြင်း; အသင်းမ၏ညွှန်ကြားချက်ကို နှိမ့်ချစွာ လက်အောက်ခံ နာယူခြင်းတို့ဖြစ်သည်။” (ဒနိစ်) “ရောမ ၁၂:၁၀၊ (ကဘ) ပါ– ‘အချင်းချင်းချီးမြှောက်ဂုဏ်ပြုခြင်း၌ ဦးဆောင်ကြ’ ဟုပေါလုတင်ပြခဲ့သောမူကို လေးစားရန် မည်မျှအရေးကြီးကြောင်း ကျွန်တော်သတိပြုမိသည်။ မိမိသဘောကို လက်ခံစေရန် အတင်းအကျပ်ပြောဆိုမည့်အစား သူတစ်ပါး၏သဘောထားကို ထည့်စဉ်းစားပေးခြင်းသည် အရေးကြီးကြောင်း ဤကျမ်းချက်က ဖော်ပြသည်။ တစ်နည်းပြောရလျှင် သူတစ်ပါးထက်သာလွန်ရန် မရှာကြံခြင်းဖြစ်သည်။” (ဂျီးန်ယာန်-ယာခ်) “အသွေးအသားဆိုင်ရာ လူ့ရှုထောင့်မှ ကိစ္စအဝဝကို ရှုမြင်လျှင် ဗေသလလုပ်ငန်းကို ကျွန်မတို့ တန်ဖိုးထားလေးစားစိတ် ပျက်စီးသွားနိုင်ပါသည်” ဟုဘာဘရာပြောသည်။ “အကြောင်းမှာ ယေဟောဝါ၏အဖွဲ့အစည်းကို ကိုယ်တော်လမ်းပြညွှန်ကြားနေသည်ဟု မျက်ခြည်ပြတ်သွားစေနိုင်သည်။ သူတစ်ပါး၏ ချွတ်ယွင်းအားနည်းချက်များကြောင့် ထိမိလဲကြမည်ဆိုလျှင် ဤကဲ့သို့သောလေးစားမှု ပျောက်သွားနိုင်ပါသည်။”

ဗေသလတွင်ရှိသူတိုင်း မစုံလင်သူများဖြစ်ကြသည်။ ထိုကြောင့် အသေအချာစဉ်းစားဆင်ခြင်၍ ပေါင်းသင်းရန် လိုအပ်သည်။ လူငယ်များ သို့မဟုတ် နောက်ဆုံးရောက်ရှိလာသူများသည် သက်တူရွယ်တူများနှင့်သာ ပေါင်းသင်းမှုကိုကန့်သတ်မထားလျှင် ကောင်းလိမ့်မည်။ ညည်းတွားတတ်သူ၊ သို့မဟုတ် အပျက်သဘောဖြင့် စဉ်းစားတတ်သူများသည် ဗေသလ၌လည်းကောင်း၊ အသင်းတော်၌လည်းကောင်း တည်ဆောက်မှုဖြစ်သော အပေါင်းအသင်းများ မဖြစ်နိုင်ပါ။ တစ်ဖက်မှကြည့်ပြန်လျှင် ယာကုပ် ၃:၁၇ (ကဘ) တွင်ဖော်ပြထားသည့် “ထက်ရပ်မှပညာ” ကိုအတုယူခြင်းသည် ကောင်းချီးများ သက်ရောက်စေသည်။ ယင်းကား “ရှေးဦးစွာစင်ကြယ်၏။ ၎င်းနောက် ငြိမ်းချမ်း၏။ သင့်တင့်လျော်ကန်၏။ နာခံရန်အသင့်ရှိ၏။ ကရုဏာနှင့်လည်းကောင်း၊ ကောင်းကျိုးတို့နှင့်လည်းကောင်း ပြည့်ဝ၍မျက်နှာလိုက်ခြင်း၊ ဟန်ဆောင်ခြင်းနှင့်ကင်းလွတ်၏။” ဤအရည်အချင်းများနှင့်အတူ စိတ်ရှည်ခြင်း၊ ကြင်နာခြင်းတို့ကို “ဘုရားသခင်၏အိမ်တော်” တွင် မြင်သာ၍ ဤတွင်နေထိုင်ရန် ပျော်ရွှင်အားရစရာဖြစ်စေပါသည်။ သက်သေခံမဟုတ်သော ဧည့်သည်များပင်လျှင် လုပ်သားများ၏ အပြုအမူကောင်း၊ ဖော်ရွေပျူငှာမှုနှင့် ရွှင်လန်းသောသဘောကို ချီးမွမ်းပြောဆိုကြပါသည်။

အသက် ၇၀ ကျော်ရှိ၍ ၁၉၅၆ ခုနှစ်ကတည်းက ဂျာမနီဗေသလမိသားစုအဝင်ဖြစ်သူ အဲနီသည် အစေခံရန် အသင့်ရှိစိတ်ကို သူမမည်သို့မွေးမြူကြောင်း ရှင်းပြပါသည်– “ကျွန်မ၏ ဝိညာဉ်ရေးကောင်းဖို့အတွက် အသင်းမစာပေများကို အလျင်မီဖတ်ပြီးရန်၊ စည်းဝေးများကို မှန်မှန်တက်ရန်၊ ဟောပြောခြင်းလုပ်ငန်းတွင် မှန်မှန်ပါဝင်ရန် အတတ်နိုင်ဆုံး ကြိုးစားပါသည်။ နံနက်တိုင်း လေ့ကျင့်ခန်းယူခြင်း၊ ဓာတ်လှေခါးကို အတတ်နိုင်ဆုံး အသုံးမပြုခြင်း၊ အထူးသဖြင့် လယ်ကွင်းလုပ်ငန်းတွင် များများလမ်းလျှောက်ပေးခြင်းဖြင့် ကျန်းမာရေးညီညွတ်ရန်လည်း ကြိုးစားသည်။”

ဗေသလအသက်တာတွင် အတွေ့အကြုံများသောသူများစွာသည် အဲနီနှင့် သဘောတူညီကြမည်။ သူတို့သည် သင်ယူစရာမကုန်ခမ်းနိုင်ပါ။ အလုပ်ကိုလည်း အမြဲလုပ်ကိုင်ကြသည်။ ကျန်းမာရေးညီညွတ်ရန် လုံလောက်စွာ အိပ်စက်ဖို့၊ လေ့ကျင့်ခန်းယူဖို့၊ အစားအသောက်ကို ဆင်ခြင်ဖို့ လိုပါသည်။ အရေးအကြီးဆုံးကား ကိုယ်ပိုင်ဆုတောင်းခြင်းနှင့် ကျမ်းစာလေ့လာခြင်းကို သူတို့လျစ်လျူရှုမထားကြပါ။

ဗေသလတွင် မြင့်မြတ်သောလုပ်ငန်းကို များစွာဂုဏ်တင်ခြင်း

ဗေသလအိမ်သားများအား “ဘယ်မှာအလုပ်လုပ်သနည်း” ဟုမေးလေ့မေးထရှိသည်။ လုပ်ငန်းတာဝန်များ အမျိုးမျိုးရှိသော်လည်း အခုတိုင်းကို လူတိုင်းမြင့်မားသောတန်ဖိုးထားမှုဖြင့် ဆောင်ရွက်သင့်သည်။ အဘယ်ကြောင့်နည်း။ အကြောင်းမှာ တာဝန်တစ်ခုစီ—ဝိညာဏအစာ ပုံနှိပ်သောစက်ကိုကိုင်ရသည်ဖြစ်စေ၊ မိသားစုအဝတ်များ လျှော်ရခြင်းဖြစ်စေ၊ ချက်ပြုတ်ရခြင်း၊ သန့်ရှင်းရခြင်းဖြစ်စေ သို့မဟုတ် ရုံးလုပ်ငန်းကို ပြုလုပ်ရသည်ဖြစ်စေ—သည်မြင့်မြတ်သောလုပ်ငန်းတော်ဖြစ်သည်။ အထက်တွင် ဖော်ပြထားသကဲ့သို့ပင် ခရစ်ယာန်များသည် မျက်နှာလိုက်ခြင်းမရှိပါ။ ဗိမာန်တော်တွင်လည်းကောင်း၊ တံတိုင်းတော်တွင်လည်းကောင်း၊ စားသောက်ခန်းများတွင်လည်းကောင်း ယဇ်ပုရောဟိတ်များ၊ လေဝိသားများထမ်းဆောင်ခဲ့သမျှ လိုအပ်သောတာဝန်အားလုံးကို ယေဟောဝါအတွက် မြင့်မြတ်သောလုပ်ငန်းတော်ဟု ယူမှတ်ခဲ့ကြောင်းကို အောက်မေ့ပါ။ ထိုတွင် ယဇ်ပူဇော်ခြင်းငှာ တိရစ္ဆာန်များကို သတ်ဖြတ်၍ ပြင်ဆင်ခြင်း၊ မီးအိမ်များကို ဆီဖြည့်ခြင်း၊ သန့်ရှင်းရေးနှင့် အစောင့်တာဝန်များကို ထမ်းဆောင်ခြင်းပင် ပါဝင်သည်။ ထိုနည်းတူစွာ ဗေသလအိမ်တွင် တာဝန်တစ်ခုစီသည် “သခင်ဘုရား၏အမှုတော်” တွင်ကျေနပ်ဖွယ်၊ လုပ်သင့်လုပ်ထိုက်သောလုပ်ငန်းဖြစ်ရာ ထူးကဲသောအခွင့်အရေးဖြစ်ပါသည်။—၁ ကောရိန္သု ၁၅:၅၈။

“ဘုရားသခင်၏အိမ်တော်” ကိုတန်ဖိုးထားလေးမြတ်မှုနှင့် ရှုမြင်ခြင်းကို မရှိစေနိုင်သည့် အကျင့်တစ်ခုကို အကျဉ်းချုပ် သုံးသပ်ကြည့်ကြစို့။ ဗေသလအတွင်းနှင့်အပြင်ရှိ ခရစ်ယာန်များသည် “အရိုးဆွေးမြေ့” စေသည့် မနာလို သဝန်တိုစိတ်ကို သတိပြုဖို့လိုပါသည်။ (သု. ၁၄:၃၀) ဗေသလလုပ်သားများ၏ လုပ်ငန်းတော်အခွင့်အရေးများကို မည်သူ၌မျှ မနာလိုစရာအကြောင်း မရှိပါ။ ထို့ပြင် အသွေးအသားဆိုင်ရာအကျင့်တစ်ခုဖြစ်သည့် သဝန်တိုစိတ်အတွက် ဗေသလမိသားစုအတွင်း နေရာမရှိပါ။ နှိမ့်ချစွာစောင်ဆိုင်းပါ—ယင်းသည် အခြားသူများ အခွင့်အရေးပိုမိုရရှိနေ၍ လျစ်လျူရှုခံရဟန်ရှိသောသူတစ်ဦးအတွက် အလွန်ကောင်းသောသြဝါဒ ဖြစ်သည်။ ထိုထက်ကား ငွေရေးကြေးရေးနောက်ခံ အလွန်ကွာခြားသူများသည် ဗေသလတွင် အတူတကွစုပေါင်းနေထိုင်ကြပါသည်။ မိမိအခြေအနေကို ‘သူတစ်စုံတစ်ယောက် . . . နှင့်နှိုင်းယှဉ်ကြည့်” လျှင် မည်မျှစိတ်ပျက်စရာဖြစ်မည်တကား! “စားရန်၊ ဝတ်ရန်” နှင့်ရောင့်ရဲခြင်းက များစွာသောသူတို့အား “ဘုရားသခင်၏အိမ်တော်” တွင် ဆယ်စုနှစ်များစွာ သစ္စာရှိရှိ ဆက်အမှုထမ်းစေခဲ့ပြီ။—ဂလာတိ ၅:၂၀၊ ၂၆; ၆:၄၊ သတ; ၁ တိမောသေ ၆:၈။

ဗေသလတွင် ဘုရားသခင်ကိုလည်းကောင်း၊ ကိုယ်နှင့်စပ်ဆိုင်သူကိုလည်းကောင်း ချစ်ခြင်းကြောင့် ကိုယ်ကျိုးမရှာ လုပ်ကိုင်သော အခငွေမရဘဲ ပြုလုပ်ဆောင်ရွက်မှုတို့မှ ယေဟောဝါသက်သေများနှင့် အခြားသန်းပေါင်းများစွာသောသူတို့သည် အကျိုးများစွာ ခံစားနေကြရသည်။ ဗေသလအိမ်များနှင့် ကင်းမျှော်စင်အသင်း၏ ပုံနှိပ်တိုက်များသည် အခြားသီအိုကရက်တစ် အဆောက်အဦများနည်းတူပင် စေတနာနှင့်ပေးသော အလှူငွေဖြင့် ဆောင်ရွက်ပါသည်။ (၂ ကောရိန္သု ၉:၇) ဒါဝိဒ်မင်းကြီး၊ ဣသရေလမင်းသားနှင့် အကြီးအကဲများနည်းတူ “ဘုရားသခင်၏အိမ်တော်” ကို တန်ဖိုးထားလေးမြတ်ကြောင်း အသင်းမထံ စိတ်ဓာတ်နှင့်ငွေအင်အားဖြင့် ထောက်ပံ့ကူညီမှု ပြုနိုင်ပါသည်။ (၁ ရာဇဝင်ချုပ် ၂၉:၃-၇) ဤတွင် ဗေသလ၌ “ထာဝရဘုရား၏ တင့်တယ်ခြင်း အသရေတော်ကို ဖူးမြင်” နိုင်သည့်နည်းကို ယခုသုံးသပ်ကြည့်စို့။

“ဘုရားသခင့်အိမ်တော်” တွင်ကောင်းချီးများ

စည်းဝေးပွဲတစ်ခုကို တက်ရောက်သည့်အခါ ယေဟောဝါကို ဝမ်းသာအားရစွာ ကိုးကွယ်သူများဖြင့် ဝန်းရံခံရသည့်အတွက် အလွန်ကျေနပ်သောစိတ်ကို ခံစားရပါသလော။ စဉ်းစားကြည့်လေ။ ဗေသလလုပ်သားတစ်ဦးသည် နေ့စဉ်နေ့တိုင်းပင် ညီအစ်ကိုများအလယ် ယေဟောဝါအမှုတော်ထမ်းခွင့် ရရှိပါသည်! (ဆာလံ ၂၆:၁၂) ကမ်းလှမ်းထားသည့် ဝိညာဉ်ရေးဘက် ကြီးထွားမှုအတွက် အလွန်ကောင်းသောအခွင့်အရေးပါတကား! အခြားနေရာတွင် သုံးနှစ်နေခြင်းထက် ဗေသလတွင် တစ်နှစ်အတွင်း မိမိ၏ဥပဓိရုပ်ကို ပုံသွင်းနိုင်ရန် ပို၍အကူအညီရရှိခဲ့ကြောင်း ညီအစ်ကိုတစ်ဦး ပြောဆိုခဲ့သည်။ အဘယ်ကြောင့်နည်း။ များလှစွာသော ရင့်ကျက်သည့်ခရစ်ယာန်အရည်အသွေးများရှိသူတို့၏ ယုံကြည်ခြင်းကို သူကြည့်ရှု အတုယူလိုက်လျှောက်ရန် အခွင့်အရေးအခြားနေရာတွင် မရှိသောကြောင့်ဖြစ်သည်။—သု. ၁၃:၂၀။

ဗေသလတွင် အတွေ့အကြုံရှိ အကြံပေးသူများနှင့် ဝန်းရံနေသည်။ ထို့ပြင် နံနက်ဝတ်ပြုမှုနှင့် ဗေသလမိသားစု ကင်းမျှော်စင်သင်တန်းတွင် ကောင်းစွာပြင်ဆင်၍ ပြောဆိုသည့်စကားများအပြင် တနင်္လာနေ့ညနေပိုင်းများတွင် ဟောပြောချက်များ နားထောင်ရသည့်အခါ အကျိုးများစွာရရှိပါသည်။ ရောက်လာခါစ လူသစ်များသည် ဗေသလသို့ အသစ်ဝင်ရောက်သူများသင်တန်း၌ သွန်သင်ချက်များရရှိ၍ ပထမ ၁၂ လအတွင်း ကျမ်းစာတစ်အုပ်လုံးကို ဖတ်ပြီးရန် တာဝန်ရရှိပါသည်။

တိုင်းတစ်ပါးမှ ဧည့်သည်များ၏ မှတ်တမ်းတင်စကားများနှင့် တွေ့ကြုံမှုများကလည်း ထပ်ဆင့်အားပေးမှုဖြစ်စေသည်။ ထို့ပြင် အုပ်ချုပ်ရေးအဖွဲ့ဝင်များ သို့မဟုတ် ယင်း၏ကိုယ်စားလှယ်များသည် ဌာနခွဲရုံးများထံ လည်ပတ်ရောက်ရှိကြသည်။ “သူတို့သည် အလွန်အလုပ်များကြသော်လည်း ထိုညီအစ်ကိုများသည် ခင်မင်ရင်းနှီးသော စကားနှင့် အပြုံးကလေးများပေးရန် အချိန်ရှိကြပါသည်” ဟုဟဲလ်ဂါပြန်ပြောပြသည်။ ဤသစ္စာရှိအမျိုးသားများ၏ စိတ်အားတက်စေသည့် နှိမ့်ချသောအမူအရာများကို ကိုယ်တိုင်ကိုယ်ကျ တွေ့မြင်ရခြင်းသည် မည်မျှ အားရှိစရာပါတကား!

ဘုရားသခင်၏အဖွဲ့အစည်းသည် မည်သို့လုပ်ဆောင်ပြီး ကိုယ်တော်၏ သန့်ရှင်းသောဝိညာဉ်တော်သည် စိတ်စေတနာရှိသူများ၏ နှလုံးနှင့်လက်တို့ကို မည်သို့လှုံ့ဆော်တိုက်တွန်းပေးကြောင်း အထူးသဖြင့် ဗေသလတွင် တွေ့မြင်နိုင်ပါသည်။ “ဗေသလတွင် ‘လည်ပတ်မှု၏ဗဟိုချက်မ’ နှင့်အနီးကပ်ရှိသည်” ဟုခံစားရကြောင်း ၁၉၄၉ ခုနှစ်ကတည်းက ပြင်သစ်ဗေသလတွင် အမှုထမ်းဆောင်ခဲ့သော ညီအစ်ကိုတစ်ဦး ပြောပြသည်။ ဆက်လက်၍ ဤသို့ဆိုသည်– “ကျွန်တော့်အတွက် ဗေသလသည် ယေဟောဝါအမှုတော်၌ အချိန်ပြည့်လုပ်ငန်းတွင် အချိန်နှင့်ခွန်အား အများဆုံးပါဝင်နိုင်ပြီး ညီအစ်ကိုမြောက်မြားစွာ၏အကျိုးကို ဆောင်ရွက်နိုင်သည့်နေရာဖြစ်ကြောင်း ကျွန်တော်မှန်ကန်စွာပြောနိုင်သည်။” ယင်းသည် ကျွန်ုပ်တို့၏ဘဝရည်မှန်းချက် အစစ်အမှန်—ဘုရားသခင်၏အလိုတော်ကိုဆောင်ရွက်ခြင်း ဖြစ်သည်မဟုတ်ပေလော။ ဗေသလတွင် “နေ့ရှိသမျှ . . . ချီးမွမ်း” နိုင်ပါသည်။ ကောင်းကြီးတစ်ရပ်ပါတကား!—ဆာလံ ၄၄:၈ သမ။

ကျွန်ုပ်တို့တွေ့ရှိခဲ့သည့်အတိုင်း ဗေသလအိမ်တွင် အမှုထမ်းခွင့်ရသူသည် ယေဟောဝါ၏ တင့်တယ်ခြင်း အသရေတော်ကို ဖူးမြင်နိုင်၍ ကောင်းချီးအမျိုးမျိုး ခံစားခွင့် ရပါသည်။ (ဟေဗြဲ ၆:၁၀) “ဘုရားသခင်၏အိမ်တော်” တွင် အမှုထမ်းခြင်းသည် သင့်အတွက် အကျိုးတစ်ခုခုရှိနိုင်မည်လော။ အနည်းဆုံး အသက် ၁၉ နှစ်ရှိ၍ ဝိညာဏနှင့်ကာယကျန်းမာမှုရှိ ယေဟောဝါသက်သေများအနက်၊ တိမောသေကဲ့သို့ “ညီအစ်ကိုတို့တွင် အသရေရှိသောသူ” ဟုချီးမွမ်းခံရသူများသည် ဗေသလတွင် အမှုထမ်းဆောင်ရန် လျှောက်လွှာတင်နိုင်သည်။ (တမန်တော် ၁၆:၂) အထက်တွင် ဖော်ပြထားသူများကဲ့သို့ များစွာသောသူတို့သည် ဗေသလလုပ်ငန်းကို မိမိတို့၏တစ်သက်တာလုပ်ငန်းအဖြစ် ရွေးချယ်ခဲ့ကြပြီ။ ဤသူများအတွက် ဆာလံဆရာ၏ နက်ရှိုင်းသောတမ်းတချက်—‘ယေဟောဝါ၏ အိမ်တော်မှာ တစ်သက်လုံးနေရမည်အကြောင်း’—သည်အမှန်တကယ် ပြည့်စုံလာပြီ။

ယေဟောဝါသက်သေများသည် ဗေသလရှိ စေတနာစိတ်ဖြင့် ရွှင်လန်းအားရစွာ မိမိတို့တာဝန်များကို ထမ်းဆောင်သော ညီအစ်ကိုညီအစ်မများ တင်ပြကြသည့် ကိုယ်ကျိုးစွန့်စိတ်ဓာတ်ကို အလွန်တန်ဖိုးထား လေးမြတ်ကြပါသည်။ ဗေသလတွင်ဖြစ်စေ၊ အခြားနေရာတွင်ဖြစ်စေ ယေဟောဝါအမှုတော်ထမ်းသည်ဆိုလျှင် ကျွန်ုပ်တို့တစ်ဦးစီသည် ဒါဝိဒ်မင်းကြီးကဲ့သို့—“ဘုရားသခင်၏အိမ်တော်” ကိုတန်ဖိုးထားလေးမြတ်စိတ်၊ သို့မဟုတ် အားရဝမ်းသာစွာ ရှုမြင်ရန် အကြောင်းကောင်းရှိပါသည်။

[စာမျက်နှာ ၃၁ ပါ ရုပ်ပုံ]

ဤခရစ်ယာန်များသည် ဂျာမနီရှိဗေသလအိမ်တွင် ဆယ်စုနှစ်များစွာ မြင့်မြတ်သောလုပ်ငန်းတော်၌ ပျော်မွေ့ခဲ့