ကျွန်ုပ်တို့၏စာရှုသူများထံမှ

အကျပ်ရိုက်နေသည့်ကလေးများ ၁၉၉၉၊ ဧပြီ ၈ [လိပ်] ရက်ထုတ် “အကျပ်ရိုက်နေသည့်ကလေးများ—မည်သူကာကွယ်ပေးမည်နည်း” ဆိုတဲ့ အခန်းဆက်ဆောင်းပါးတွေအတွက် ကျေးဇူးတင်ကြောင်း ကျွန်မပြောလိုပါတယ်။ ကလေးတွေကို မတရားပြုခြင်းနဲ့ပတ်သက်လို့ ဒီထူးခြားတဲ့အကြောင်းအရာကို လူတွေသိမြင်လာစေဖို့ မပြတ်တမ်းလှုံ့ဆော်ပေးသင့်တယ်လို့ ကျွန်မထင်တယ်။ ကျွန်မတို့ရဲ့တာဝန်က ကျွန်မတို့ရဲ့ကလေးလောကကို ကာကွယ်ဖို့ဖြစ်တယ်။ မွန်မြတ်တဲ့လုပ်ငန်းမှာ သင်တို့ ဆက်လက်လုပ်ဆောင်နိုင်ကြပါစေ။

ပီ.ပီ.၊ ကလေးများအတွက် ဒေသန္တရအုပ်ချုပ်ရေးရုံး၊ အီတလီ၊ ရောမမြို့

၂၁ ရာစုအစမှာ ကလေးများစွာဟာ ကျွန်ခံနေကြရဆဲဖြစ်ပြီး တခြားသူတွေကို သတ်ဖြတ်ဖို့ အသုံးပြုခံနေတုန်းပဲဆိုတာ အော့နှလုံးနာစရာပါပဲ။ သူတို့ထဲကအများစုဟာ ပိုပြီးကောင်းတဲ့အသက်တာအတွက် အလားအလာမရှိဘူးဆိုတဲ့အချက်ကို လက်ခံဖို့ ပိုပြီးတော့တောင် ခက်ပါသေးတယ်။ ထပ်ပြီးတော့ နိုးလော့!က ကမ္ဘာ့ကလေးများရဲ့အခြေအနေကို အတိအကျသရုပ်သကန်ပေါ်အောင် ရေးသားဖော်ပြပေးခဲ့တာပဲ။

အက်စ်.အာရ်.ဘီ၊ ဘရာဇီး

အိမ်ထောင်သက် ၃၆ နှစ်ရှိပြီးမှ ကျွန်မ အခုကွာရှင်းလိုက်ပါပြီ။ ကျွန်မရဲ့ခင်ပွန်းဟာ ကျွန်မချစ်မြတ်နိုးတဲ့သမီးအရင်းတွေကို နှစ်နဲ့ချီပြီး မတော်မတရားပြုခဲ့တယ်ဆိုတာကို သိခဲ့ရတယ်။ (သူဟာ ခရစ်ယာန်တစ်ဦးမဟုတ်ပါဘူး။) ဒီအကြောင်းကို ကျွန်မ စကြားကြားချင်းမှာ အရမ်းကိုစိတ်ချောက်ချားခဲ့တယ်။ လိင်ဆိုင်ရာမတော်မတရားပြုခြင်းရဲ့ ရင်လေးဖွယ်ရာ ဒါမှမဟုတ် အပြစ်မဲ့သူတွေခံစားရတဲ့ ပြောမပြနိုင်တဲ့စိတ်နာကျင်မှုကို ဘယ်သူမှ နားလည်ပေးနိုင်ပုံမရဘူး။ ဒါကြောင့် အဲဒီလိုအများအပြားဖြစ်ပျက်နေတာနဲ့ပတ်သက်လို့ သင်တို့ရေးသားဖော်ပြပေးလို့ ယေဟောဝါကို ကျွန်မကျေးဇူးတင်ပါတယ်။

အန်.အမ်.၊ အမေရိကန်ပြည်ထောင်စု

သက်ကြီးရွယ်အိုတို့ကိုဂရုစိုက်ခြင်း “ဂရုစိုက်ကြောင်းပြပါ” ဆိုတဲ့အကြောင်းအတွက် ကျွန်မ တကယ်ပဲကျေးဇူးတင်ပါတယ်။ (ဧပြီ ၈၊ ၁၉၉၉ [လိပ်]) ပြုစုရေးဂေဟာမှာရှိတဲ့ သက်ကြီးရွယ်အိုများစွာဟာ သူတို့မိသားစုရဲ့ မေ့လျော့ခြင်းကိုခံနေကြရတယ်။ ဒါပေမဲ့ လွန်ခဲ့တဲ့လအနည်းငယ်က ကျွန်မတို့ထဲကတချို့ဟာ အနီးအနားမှာရှိတဲ့ ပြုစုရေးဂေဟာက လူတချို့နဲ့ သမ္မာကျမ်းစာကို သွားရောက်ဆွေးနွေးကြဖို့ ဆုံးဖြတ်ခဲ့ကြတယ်။ ဒီနောက်မှာတော့ သူတို့အတွက် စန္ဒရားတီးပေးကြပြီး သူတို့နဲ့စကားပြောဆိုခဲ့ကြတယ်။ အခု သူတို့ဆီ မှန်မှန်သွားလည်ဖို့ ကျွန်မတို့စီစဉ်ထားကြတယ်။

စီ.ဗွီ.၊ အမေရိကန်ပြည်ထောင်စု

အာဖရိကန်မုန်တိုင်း ကျွန်တော်အသက် ၁၂ နှစ်ပါ၊ “မုန်တိုင်းစဲပြီးသည့်နောက် ခရစ်ယာန်ဘာသာ လူသိများလာ” ဆိုတဲ့ဆောင်းပါးအတွက် ကျေးဇူးတင်ကြောင်းပြောလိုပါတယ်။ (ဇူလိုင် ၈၊ ၂၀၀၁) အခက်အခဲတွေ့သူတွေကို ကူညီပေးခဲ့ကြတဲ့ ညီအစ်ကိုတွေဟာ တကယ့်ကိုချီးမွမ်းဖို့ကောင်းတယ်! ဒါက ကျွန်တော့်ကို ဂျပန်နိုင်ငံမှာ ဟန်ရှင်ငလျင်ကြီး လှုပ်ပြီးတဲ့နောက် အခြားသူတို့တွေကို ကျွန်တော်တို့ရဲ့ညီအစ်ကိုတွေက ကူညီပေးခဲ့တာကို ပြန်အမှတ်ရစေတယ်။ ဒီဆောင်းပါးက ရဲစွမ်းသတ္တိရှိဖို့နဲ့ တခြားသူတွေအတွက် ကောင်းမွန်ရာကိုပြုလုပ်ပေးဖို့ ကျွန်တော့်ကို အားပေးလှုံ့ဆော်ခဲ့ပါတယ်။

အာရ်.ကေ.၊ ဂျပန်

အိပ်ပျော်နေသောနို့စို့သူငယ် “နို့စို့သူငယ်တစ်ဦး မည်သို့အိပ်သင့်သနည်း” ဆောင်းပါးအတွက် ကျေးဇူးတင်ပါတယ်။ (ဇူလိုင် ၈၊ ၂၀၀၁) ကျွန်မရဲ့ပထမကလေးနှစ်ယောက်ကို တစ်လခွဲအရွယ်မှာ ကလေးများ ရုတ်တရက်သေဆုံးခြင်းလက္ခဏာစု (SIDS) ကြောင့် ဆုံးရှုံးလိုက်ရပါတယ်။ ဒီအကြောင်းတွေကို ကျွန်မ အစကသိများသိခဲ့ရရင်! နောက်ထပ်သိပ်တော်တဲ့သမီးနှစ်ယောက် ရလာခဲ့ပေမဲ့ အတိုင်းမသိအောင် ပြောမပြနိုင်တဲ့နာကျင်မှုတစ်ရပ်ကို ကျွန်မခံစားနေရတုန်းပါပဲ။”

အေ.ဒီ.၊ အီတလီ

SIDS အတွက် ဘေးဖြစ်စေသည့်ထူးခြားသော အကြောင်းအရာအတော်များများရှိသည်။ (နိုးလော့! ၁၉၉၇၊ ဇန်နဝါရီ ၂၂ [လိပ်] ထုတ် “ကမ္ဘာ့ဖြစ်ရပ်အကဲခတ်” ၌ရှု) သို့တိုင် ဆေးဘက်ဆိုင်ရာတွင် SIDS သည် နည်းလမ်းများစွာဖြင့် နားလည်ရခက်ဆဲပင်။ သို့ဖြစ်၍ SIDS ကြောင့် ကလေးဆုံးရှုံးခဲ့ရသော မိဘများသည် ထိုပူဆွေးဝမ်းနည်းဖွယ်ရာအတွက် မိမိတို့၌တာဝန်ရှိသည်ဟူ၍ ကိုယ့်ကိုယ်ကိုအပြစ်မတင်သင့်ချေ။ SIDS နှင့်ပတ်သက်၍ ကျွန်ုပ်တို့၏ ၁၉၈၈၊ ဇန်နဝါရီ ၂၂ ရက်ထုတ်တွင် အသေအချာဆွေးနွေးထားချက်က ဝမ်းနည်းကြေကွဲနေသောမိဘများစွာကို နှစ်သိမ့်မှုပေးခဲ့ကြောင်း သက်သေထူခဲ့လေပြီ။—အယ်ဒီတာ။

ဝမ်းတွင်းဆိုင်ရာရောဂါ ကျွန်တော်တို့ရဲ့သမီးမှာ အဲဒီရောဂါရှိနေတယ်လို့သိပြီး သုံးလအကြာမှာ “ဝမ်းတွင်းဆိုင်ရာရောဂါကို ကိုင်တွယ်ဖြေရှင်းခြင်း” (နိုဝင်ဘာ ၈၊ ၂၀၀၁) ဆောင်းပါးကိုရရှိခဲ့ပါတယ်။ ရုရှားနိုင်ငံမှာ အဲဒီဖျားနာမှုဟာ ဆရာဝန်တွေကြားမှာတောင် မသိသလောက်ဖြစ်တယ်။ ကျွန်တော်တို့ရဲ့သမီးဟာ ဘာကြောင့် အထူးဓာတ်စာစားနေရတယ်ဆိုတာ ကျွန်တော်တို့ရဲ့ခရစ်ယာန်ညီအစ်ကို၊ ညီအစ်မတွေက နားလည်ပေးလိမ့်မယ်လို့သိထားရတာ ဘယ်လောက်ကောင်းလိုက်သလဲ! ဒီဆောင်းပါးက ကျွန်တော်တို့ကို အားရှိစေပြီး ယေဟောဝါဟာ ကိုယ်တော်ရဲ့လူတွေကို အမြဲဂရုစိုက်တော်မူတယ်ဆိုတာ ယုံကြည်စိတ်ချစေတယ်။

ဗွီ.ပီ.နှင့် အဲလ်.ပီ.၊ ရုရှား

မရနိုင်တာကို လိုလားခြင်း “လူငယ်များအမေး . . . ငါလိုချင်တာတွေကို ဘာကြောင့်မရနိုင်တာလဲ” ဆိုတဲ့ဆောင်းပါးကို ကျွန်မဖတ်ပြီးကာစပဲရှိသေးတယ်။ (စက်တင်ဘာ ၈၊ ၂၀၀၁) ဒီဆောင်းပါးအတွက် ကျေးဇူးတင်ကြောင်း ပြောလိုပါတယ်၊ အကြောင်းကတော့ ကျွန်မလိုချင်သမျှကို မရရှိနိုင်ဘူးဆိုတာ အဲဒီကနေသိလာရလို့ပါပဲ။ ဒါပေမဲ့ အဲဒီဆောင်းပါးမှာ ပြောထားသလို ယေဟောဝါဟာ ကျွန်မတို့လိုအပ်ရာကိုသိရှိပြီး ကျွန်မမှာ ရိုးရှင်းတဲ့အသက်တာရှိထားတဲ့အတွက် ကျွန်အရမ်းကိုပျော်ပါတယ်။

စီ.ကေ.၊ ကနေဒါ