ခရစ္စမတ်စိတ်ဓာတ် ပျံ့နှံ့နေ ဘာကြောင့်လဲ

ခရစ္စမတ်ကို သင် စောင့်မျှော်နေသလား။ ဒါမှမဟုတ် ခရစ္စမတ်နီးလာလို့ စိတ်အနှောင့်အယှက်ဖြစ်မိသလား။ လူသန်းပေါင်းများစွာက ဒီလိုစဉ်းစားတတ်ကြတယ်– ‘ငါ ဘယ်သူ့ကို လက်ဆောင်ပေးရမလဲ။ ဘာဝယ်ပေးရင် ကောင်းမလဲ။ ငါ ဝယ်နိုင်ပါ့မလား။ အကြွေးတင်သွားရင် ဘယ်အချိန်လောက်မှ ငါပြန်ဆပ်နိုင်မှာလဲ။’

ဒီလိုစိုးရိမ်မှုတွေရှိပေမဲ့ ခရစ္စမတ်ပွဲက လူကြိုက်များနေဆဲပဲ။ တကယ်တော့ ဒီပွဲတော်က ခရစ်ယာန်မဟုတ်တဲ့နိုင်ငံတွေအထိ ပျံ့နှံ့နေတယ်။ ဂျပန်နိုင်ငံမှာရှိတဲ့ မိသားစုအများစုက အခုအချိန်မှာ ခရစ္စမတ်ပွဲကို ဘာသာရေးအထိမ်းအမှတ်အနေနဲ့မဟုတ်ဘဲ ပျော်ပွဲရွှင်ပွဲအခါသမယသက်သက်အဖြစ် ကျင်းပကြတယ်။ တရုတ်ပြည်ရဲ့ “မြို့ကြီးတွေမှာ အနီရောင်ခရစ္စမတ်ဘိုးဘိုးကြီးပုံကို စတိုးဆိုင်မျက်နှာစာတွေမှာ ထင်ထင်ရှားရှားပြသထားကြတယ်” လို့ ဝေါလ်စထရိဂျာနယ်မှာ ဖော်ပြထားပြီး ဒီလိုဆက်ပြောတယ်– “စျေးဝယ်ထွက်မယ်၊ စားသောက်မယ်၊ ပျော်ပွဲရွှင်ပွဲကျင်းပမယ်ဆိုတဲ့အကြောင်းပြချက်နဲ့ တရုတ်ပြည်မြို့ပြသစ်တွေရဲ့ အလယ်အလတ်တန်းစားလူထုတွေအထိ ခရစ္စမတ်ရောဂါ ပျံ့နှံ့နေတယ်။”

ကမ္ဘာ့ဒေသအများစုမှာ ခရစ္စမတ်ပွဲကျင်းပခြင်းက ဒေသစီးပွားရေးကို အကြီးအကျယ်တိုးတက်စေတယ်။ “သစ်ပင်တုတွေ၊ အလှဆင်ရောင်စုံစက္ကူတွေ၊ ရောင်စုံမီးလုံးတွေနဲ့ ခရစ္စမတ်ဆိုင်ရာ တခြားအလှဆင်ပစ္စည်းတွေကို တင်ပို့ရောင်းချနေတဲ့” တရုတ်ပြည်မှာ အထူးသဖြင့်မှန်ကန်တယ်လို့ အဲဒီဂျာနယ်ကပြောတယ်။

အစ္စလာမ်ဘာသာလွှမ်းမိုးတဲ့နိုင်ငံတွေမှာလည်း ဒီဇင်ဘာ ၂၅ ရက်မှာမဟုတ်ပေမဲ့ ခရစ္စမတ်နဲ့တူတဲ့ပွဲတွေကို အားပေးအားမြှောက်ပြုကြတယ်။ တူရကီနိုင်ငံက အဲန်းကာရာမြို့နဲ့ လက်ဘနွန်နိုင်ငံက ဘေရွတ်မြို့မှာ စတိုးဆိုင်မျက်နှာစာတွေကို အမြဲစိမ်းသစ်ပင်တွေ၊ အသင့်ထုပ်ထားတဲ့ လက်ဆောင်တွေနဲ့ အလှဆင်ထားတာကိုမြင်တွေ့ရတာ အဆန်းမဟုတ်တော့ဘူး။ အင်ဒိုနီးရှားမှာ ဟိုတယ်နဲ့ ကုန်တိုက်ကြီးတွေကဦးဆောင်ပြီး ပွဲတွေကျင်းပနေကြတယ်၊ ကလေးတွေအတွက် ခရစ္စမတ်ဘိုးဘိုးကြီးနဲ့ ညစာအတူစားဖို့၊ ဓာတ်ပုံအတူရိုက်ဖို့ စီစဉ်ပေးထားတယ်။

အနောက်နိုင်ငံတွေမှာ ခရစ္စမတ်ပွဲဟာ “ကလေးတွေကိုအဓိကရည်စူးတဲ့” ကြော်ငြာများစွာနဲ့အတူ လောကီရေးရာနဲ့ စီးပွားရေးဆန်ဆန်ဖြစ်ကုန်ပြီလို့ ကနေဒါနိုင်ငံရဲ့ အကြီးဆုံးဘဏ်ဖြစ်တဲ့ Royal Bank Letter က ဖော်ပြထားတယ်။ ချာ့ချ်မှာပြုလုပ်တဲ့ ခရစ္စမတ်ဝတ်ပြုမှုတွေကို တချို့သူတွေ သွားတက်ရောက်နေဆဲပဲ ဆိုတာမှန်ပါတယ်၊ ဒါပေမဲ့ ခရစ္စမတ်တေးသံတွေ ဟိန်းနေတဲ့ကုန်တိုက်ကြီးတွေက ခရစ္စမတ်ပွဲကျင်းပတဲ့ ချာ့ချ်အသစ်လို ဖြစ်လာပြီ။ ဘာကြောင့် ပြောင်းလဲသွားရတာလဲ။ အကြောင်းရင်းက ခရစ္စမတ်ပွဲရဲ့ဇာစ်မြစ်နဲ့ ပတ်သက်ဆက်နွှယ်နေပါသလား။ အဲဒီဇာစ်မြစ်က ဘာလဲ။

ဒီမေးခွန်းတွေကိုမဖြေဆိုခင် ခရစ္စမတ်ရဲ့ သူငယ်တော်ဖွားမြင်ရာမြင်ကွင်းကို ဖော်ပြတယ်လို့ဆိုကြတဲ့ ကျမ်းစာမှတ်တမ်းတွေကို ဆန်းစစ်ကြည့်ခြင်းက ကောင်းပါလိမ့်မယ်။

[စာမျက်နှာ ၄ ပါ လေးထောင့်ကွက်/ရုပ်ပုံ]

ခရစ်ဝင်ကျမ်းရေးသူတွေရဲ့ ပြောဆိုရာများ

တမန်တော် မဿဲ– “ဟေရုဒ်မင်းလက်ထက်၊ ယုဒပြည် ဘက်သလီဟင်မြို့တွင် ယေရှုကို ဖွားမြင်ပြီးနောက် အရှေ့တိုင်းမှ နက္ခတ်ဗေဒင်ဆရာများသည် ဂျေရုဆလင်မြို့သို့ ရောက်လာကြ၍ ‘ယခု ဖွားမြင်သည့် ဂျူးတို့၏ရှင်ဘုရင်သည် အဘယ်မှာ ရှိသနည်း။ အရှေ့တိုင်းတွင် ငါတို့ရှိစဉ်က သူ၏ကြယ်ကိုမြင်ရ၏။ ထိုသူငယ်တော်ကို ဦးညွှတ်ရန် ငါတို့ရောက်လာကြပြီ’ ဟုဆိုကြ၏။ ထိုသတင်းကို ကြားလျှင် ဟေရုဒ်မင်း . . . စိတ်ပူပန်၏။” ထို့ကြောင့် ဟေရုဒ်မင်းက ‘ယဇ်ပုရောဟိတ်ကြီးအား ခရစ်တော်ကို အဘယ်အရပ်တွင် ဖွားမြင်မည်နည်းဟု စုံစမ်းမေးမြန်းတော်မူ၏။’ “ဘက်သလီဟင်မြို့တွင်” ဖြစ်ကြောင်း သိရှိသောအခါ ဟေရုဒ်က နက္ခတ်ဗေဒင်ဆရာတို့အား ဤသို့ဆို၏– “သင်တို့သွား၍ သူငယ်ကို အသေအချာရှာပြီးလျှင် တွေ့သောအခါ ငါ့ထံသို့ပြန်သတင်းပို့ကြလော့။”

“သူတို့ ထွက်သွားကြရာ အရှေ့အရပ်တွင် ရှိစဉ်က မြင်ခဲ့သည့်ကြယ်သည် သူတို့ရှေ့မှ သွား၍ သူငယ်ရှိရာအရပ်သို့ ရောက်သော် ရပ်လေ၏။ . . . အိမ်ထဲသို့ သူတို့ဝင်သောအခါ သူငယ်ကို မိခင်ဖြစ်သူမာရိနှင့်အတူ တွေ့ရ၏။” ယေရှုအတွက် လက်ဆောင်တွေကို ဆက်သပြီးတဲ့နောက် “ဟေရုဒ်ထံ ပြန်မသွားရန် အိပ်မက်အားဖြင့် ဘုရားသခင်၏သတိပေးခြင်းကို ခံရသောကြောင့် အခြားသောလမ်းဖြင့် မိမိတို့ပြည်သို့ ပြန်သွားကြ၏။”

“သူတို့ ထွက်သွားပြီးနောက် ယေဟောဝါဘုရား၏ကောင်းကင်တမန်သည် ယောသပ်ထံသို့ အိပ်မက်တွင် ပေါ်လာ၍ ‘ထလော့။ သူငယ်နှင့် မိခင်ကို ခေါ်၍ အီဂျစ်ပြည်သို့ ထွက်ပြေးလော့’ . . . ဟုဆို၏။ ထို့ကြောင့် ယောသပ်သည် ထ၍ သူငယ်နှင့် မိခင်ကိုခေါ်ပြီးလျှင် ညအချိန်တွင် . . . ထွက်သွားကြ၏။ . . . ဟေရုဒ်သည် နက္ခတ်ဗေဒင်ဆရာတို့ လှည့်စားသွားကြောင်း သိသည်နှင့် ပြင်းစွာအမျက်ထွက်လေ၏။ နက္ခတ်ဗေဒင်ဆရာတို့ထံမှ သေချာစွာ မေးမြန်းသိရှိထားသည့်အချိန်ကိုထောက်၍ ဘက်သလီဟင်မြို့နှင့် ပတ်ဝန်းကျင်အရပ်ရှိ နှစ်နှစ်နှင့် နှစ်နှစ်အောက် သားယောက်ျားမှန်သမျှကို သတ်စေ၏။”—မဿဲ ၂:၁-၁၆။

တပည့်တစ်ဦးဖြစ်သူ လုကာ– ယောသပ်သည် ‘ဂါလိလဲပြည် နာဇရက်မြို့မှ ယုဒပြည်ရှိ ဘက်သလီဟင်အမည်ရှိသော ဒါဝိဒ်၏မြို့သို့ တက်သွားလေ၏။ မာရိနှင့်အတူ အမည်စာရင်းသွင်းရန် ထိုမြို့သို့ ထွက်သွားခြင်းဖြစ်၏။ . . . ထိုမြို့တွင်ရှိနေစဉ် မာရိသည် သားဦးကိုဖွားမြင်လေ၏။ တည်းခိုရာဇရပ်၌ သူတို့နေစရာမရှိသောကြောင့် သူငယ်ကို အနှီးနှင့်ပတ်ပြီးမှ နွားစားခွက်၌ သိပ်ထားလေ၏။’

“ထိုအရပ်ဒေသမှ သိုးထိန်းများသည် မိမိတို့၏သိုးအုပ်များကို ညအခါ ကွင်းပြင်၌ ထိန်းကျောင်းလျက်ရှိကြ၏။ ယေဟောဝါဘုရား၏ ကောင်းကင်တမန်သည် သူတို့အနီးတွင် ရုတ်တရက်ပေါ်လာ၍ . . . အလွန်ကြောက်ရွံ့ကြ၏။ သို့ရာတွင် ကောင်းကင်တမန်က ‘ကြောက်ရွံ့ခြင်း မရှိကြနှင့်။ လူအပေါင်းတို့အတွက် အလွန်ဝမ်းမြောက်ဖွယ်သတင်းကောင်းကို ငါသည် သင်တို့အား ပြောကြားရ၏။ အကြောင်းမူကား သခင်ခရစ်တော်တည်းဟူသော ကယ်တင်ရှင်သည် သင်တို့အတွက် ဒါဝိဒ်၏မြို့၌ ယနေ့ ဖွားမြင်ခြင်းကို ခံတော်မူပြီ’ . . . ဟုမြွက်ဆို၏။” သိုးထိန်းတို့သည် “အလျင်အမြန်သွား၍ မာရိနှင့်ယောသပ်အပြင် နွားစားခွက်၌ သိပ်ထားလျက်ရှိသော ဖွားစသူငယ်ကိုလည်း တွေ့ကြ၏။”—လုကာ ၂:၄-၁၆။