ဒီလောကရဲ့ အဆုံး

ကွယ်ပျောက်သွားတော့မယ့် “လောက” ဆိုတာ ဘာလဲ

သမ္မာကျမ်းစာပြောဆိုရာ–

လောကမှာ ဘုရား မနှစ်သက်တဲ့ “တပ်မက်ခြင်း” ရှိနေတာကြောင့် အဲဒါဟာ ကမ္ဘာမြေကြီးကို ဆိုလိုတာမဟုတ်မှန်း သိနိုင်တယ်။ “လောက” ဆိုတာ ဘုရားကို အလေးမထား၊ ဘုရား မကြိုက်တာကို လုပ်နေကြတဲ့ လူသားထုကြီး ဖြစ်တယ်။ (ယာကုပ် ၄:၄) သူတို့တွေဟာ “ထာဝရပျက်စီးခြင်း အပြစ်ဒဏ်ကို ခံရ” ပါလိမ့်မယ်။ (၂ သက်သာလောနိတ် ၁:၇-၉) ဒါပေမဲ့၊ ယေရှုခရစ်ကို နာခံကြောင်းပြပြီး အဲဒီ “လောက” နဲ့ မပတ်သက်တဲ့သူတွေမှာတော့ ထာဝစဉ်အသက်ရှင်နိုင်တဲ့ မျှော်လင့်ချက် ရှိတယ်။—ယောဟန် ၁၅:၁၉။

“ဘုရားသခင်၏အလိုတော်ကို ဆောင်ရွက်သော သူမူကား အစဉ်အမြဲတည်၏” လို့ ၁ ယောဟန် ၂:၁၇ မှာ ဆိုထားတယ်။ “ဖြောင့်မတ်သောသူတို့သည် ပြည်တော် [ကမ္ဘာမြေ] ကိုအမွေခံ၍ အစဉ်အမြဲ နေရကြလိမ့်မည်” လို့ ဆာလံ ၃၇:၂၉ မှာ ပြောထားတဲ့အတိုင်း ဘုရားသခင့် အလိုတော်ကို ဆောင်ရွက်သူတွေမှာ ကမ္ဘာမြေကြီးပေါ် ထာဝစဉ်အသက်ရှင်နိုင်တဲ့ မျှော်လင့်ချက် ရှိကြတယ်။

“လောကကိုလည်းကောင်း၊ လောက၌ရှိသောအရာများကိုလည်းကောင်း မချစ်ကြနှင့်။ လောကကို ချစ်သောသူသည် ခမည်းတော်ကို ချစ်ခြင်း မရှိ။”​—၁ ယောဟန် ၂:၁၅။

ဒီ “လောက” ဘယ်လို ကွယ်ပျောက်သွားမလဲ

သမ္မာကျမ်းစာပြောဆိုရာ–

အဆင့်နှစ်ဆင့်နဲ့ ကွယ်ပျောက်သွားပါလိမ့်မယ်။ ပထမ၊ “မဟာဗာဗုလုန်” လို့ နာမည်ရှိတဲ့ ပြည့်တန်ဆာနည်းတူ ကျင့်ကြံကြတဲ့၊ မှားယွင်းတဲ့ဘာသာရေးကို ဘုရားသခင် ပယ်ဖျက်ပစ်မယ်။ (ဗျာဒိတ် ၁၇:၁-၅; ၁၈:၈) မှားယွင်းတဲ့ဘာသာရေးဟာ တရားတော်အတိုင်း လုပ်တယ်လို့ ပြောပေမဲ့ နိုင်ငံရေးခေါင်းဆောင်တွေနဲ့ ဖက်လဲတကင်း လုပ်တယ်။ အဲဒီနိုင်ငံရေးအုပ်စိုးရှင်တွေက သူ့ကို ချေမှုန်းပစ်လိမ့်မယ်။ သူတို့သည် “ပြည့်တန်ဆာကို မုန်းလိမ့်မည်။ သူ့ကို ပျက်ပြုန်းစေ၍ အဝတ်အချည်းစည်း ရှိစေလျက် သူ၏အသားကို စားပြီးလျှင် သူ့ကို လုံးလုံး မီးရှို့ပစ်လိမ့်မည်” လို့ ကျမ်းစာမှာ ပြောထားတယ်။​—ဗျာဒိတ် ၁၇:၁၆။

ဒုတိယ၊ “လူနေထိုင်ရာ မြေတစ်ပြင်လုံးရှိ ဘုရင်များ” ဖြစ်တဲ့ နိုင်ငံရေးအုပ်စိုးရှင်တွေဘက် ဘုရားသခင် အာရုံလှည့်ပါလိမ့်မယ်။ “အနန္တတန်ခိုးရှင် ဘုရားသခင်၏ နေ့ကြီးတွင် တိုက်မည့်စစ်ပွဲ၊” “အာမဂေဒုန်” မှာ နိုင်ငံရေးအုပ်စိုးရှင်တွေနဲ့အတူ ဆိုးညစ်သူတွေ ပျက်စီးသွားလိမ့်မယ်။​—ဗျာဒိတ် ၁၆:၁၄၊ ၁၆။

“စိတ်နှိမ့်ချသောပြည်သူပြည်သားအပေါင်းတို့ [ယေဟောဝါ] ဘုရား ကိုရှာကြလော့။ ဖြောင့်မတ်ခြင်းနှင့် စိတ်နှိမ့်ချခြင်းကိုလည်းရှာကြလော့။ [ယေဟောဝါ] ဘုရားအမျက်ထွက်တော်မူသောနေ့၌ သင်တို့သည် ပုန်းရှောင်ရာကို တွေ့ကောင်းတွေ့ကြလိမ့်မည်။”​—ဇေဖနိ ၂:၃။

ဒီ “လောက” ဘယ်အချိန်မှာ ကွယ်ပျောက်သွားမလဲ

သမ္မာကျမ်းစာပြောဆိုရာ–

လူ့အုပ်ချုပ်မှုတွေနေရာမှာ ဘုရားသခင့်နိုင်ငံတော် အစားထိုးတော့မယ်ဆိုတာကို လူတွေကို အတော်အတန် သတိပေးပြီးနောက် ဒီ “လောက” ကွယ်ပျောက်သွားပါလိမ့်မယ်။ (ဒံယေလ ၇:၁၃၊ ၁၄) ယေရှုက “လူမျိုးအပေါင်းတို့အတွက် သက်သေဖြစ်စေရန် နိုင်ငံတော်နှင့်ဆိုင်သော ဤသတင်းကောင်းကို လူနေရာ မြေတစ်ပြင်လုံး၌ ဟောပြောရလိမ့်မည်။ သို့ပြီးမှ အဆုံးသည် ရောက်လိမ့်မည်” လို့ ပြောခဲ့တယ်။ (မဿဲ ၂၄:၁၄) အဲဒီဟောပြောခြင်းအလုပ်ဟာ ဘုရားသခင့် တရားမျှတမှုနဲ့ ကရုဏာ ထင်ရှားပြီး အဆုံးရောက်တော့မယ်ဆိုတာ ဖော်ပြတဲ့ စုပေါင်း “နိမိတ်လက္ခဏာ” ထဲကတစ်ခု ဖြစ်တယ်။ အဲဒီစုပေါင်းနိမိတ်ထဲမှာ ကမ္ဘာချီ စစ်ပွဲတွေ၊ ငလျင်လှုပ်ခြင်း၊ အစာခေါင်းပါးခြင်းနဲ့ ကပ်ရောဂါတွေလည်း ပါဝင်တယ်။​—မဿဲ ၂၄:၃; လုကာ ၂၁:၁၀၊ ၁၁။

အဲဒီအပြင်၊ “နောက်ဆုံးသောနေ့ရက်များ” မှာ အသက်ရှင်ကြတဲ့ လူတွေရဲ့ စရိုက်လက္ခဏာအကြောင်း ကျမ်းစာမှာ ဒီလို ဖော်ပြထားတယ်– ‘နောက်ဆုံးသောနေ့ရက်များသည် ခက်ခဲကျပ်တည်းသောကာလ ဖြစ်မည်ကို သိမှတ်လော့။ လူတို့သည် ကိုယ့်ကိုယ်ကိုယ်ချစ်သူ၊ ငွေကိုတပ်မက်သူ၊ မိဘစကားနားမထောင်သူ၊ ချုပ်တည်းခြင်းမရှိသူ၊ ကြမ်းကြုတ်သူ၊ ကောင်းမြတ်ခြင်းကို မနှစ်သက်သူ၊ ဘုရားသခင်ကို ချစ်သည်ထက် အပျော်အပါးကို သာ၍နှစ်သက်သူ ဖြစ်ကြလိမ့်မည်။’a​—၂ တိမောသေ ၃:၁-၅။

အဲဒီနိမိတ်အားလုံးဟာ ပထမကမ္ဘာစစ်ဖြစ်ချိန် ၁၉၁၄ ခုနှစ်မှာ စဖြစ်တယ်ဆိုတာ ထင်ရှားတယ်။ ၁၉၁၄ ခုနှစ်ကစပြီး ဘုရားသခင့်နိုင်ငံတော် တည်ထောင်ပြီဖြစ်ကြောင်း ယေဟောဝါသက်သေ ခရစ်ယာန်တွေ ဂုဏ်ယူစွာနဲ့ နေရာအနှံ့ ကြေညာလာခဲ့ကြတယ်။ သူတို့ထုတ်ဝေတဲ့ လစဉ်ထုတ်စာစောင်ရဲ့ခေါင်းစဉ်ဟာ ကင်းမျှော်စင် ယေဟောဝါ၏နိုင်ငံတော်ကို ကြေညာခြင်း ဖြစ်တယ်။

“နေ့ရက်၊ အချိန်နာရီကို သင်တို့မသိသောကြောင့် စောင့်နေကြလော့။”​—မဿဲ ၂၅:၁၃။