ဘယ်လို ကောက်ချက်ချမလဲ

စကြဝဠာနဲ့ သက်ရှိတွေကို ဘုရားသခင် ဖန်ဆင်းတာလား၊ ဘာမှ မရှိတဲ့အရာကနေ အလိုလို ဖြစ်ပေါ်လာတာလား။ အထက်မှာ ဖော်ပြထားတဲ့ ရူပဗေဒ ပညာရှင် နှစ်ယောက်ရဲ့ စကားနဲ့ သမ္မာကျမ်းစာရဲ့ အဖွင့်စကားတွေ လုံးလုံး ဆန့်ကျင်နေတယ်။ အယူအဆ နှစ်ခုစလုံးမှာ ထောက်ခံသူတွေ ကိုယ်စီရှိတယ်။ တချို့သူတွေကျတော့ ဘယ်အယူအဆ အမှန် ဖြစ်မှန်း သေသေချာချာ မသိကြဘူး။ အရောင်းရဆုံး စာအုပ်တွေ၊ ရုပ်မြင်သံကြား စကားဝိုင်းတွေမှာ အဲဒီအကြောင်းကို အပြန်အလှန် ငြင်းခုံပြောဆိုကြတယ်။

စကြဝဠာနဲ့ သက်ရှိတွေဟာ အလိုလို ဖြစ်ပေါ်လာတယ်လို့ ကျောင်းက ဆရာ/မတွေ သင်ပေးကြတယ်။ ဖန်ဆင်းရှင် မရှိဘူးလို့ ပြောကြတယ်။ ဖန်ဆင်းရှင် မရှိဘူးဆိုတာကို ဆရာ/မတွေ သက်သေ ပြနိုင်ကြသလား။ ဘာသာရေး ခေါင်းဆောင်တွေကျတော့ ဖန်ဆင်းရှင် ရှိတယ်လို့ ဟောကြတယ်။ သူတို့အဆိုကို သူတို့ သက်သေပြသလား။ “ယုံကြည်ခြင်း” နဲ့ လက်ခံဖို့ပဲ ပြောသလား။

သင်လည်း ဒီအကြောင်းကို စဉ်းစားခဲ့ဖူးမှာပဲ။ ဖန်ဆင်းရှင် ရှိတယ်လို့ ဘယ်သူမှ အတိအကျ မပြောနိုင်ဘူး ဆိုပြီး စဉ်းစားမိမယ်။ အဖြေသိဖို့ အရေးကြီးလို့လား ဆိုပြီးတော့လည်း စဉ်းစားမိမယ်။

ဒီနိုးလော့! စာစောင်မှာ ဖန်ဆင်းရှင်ကို လူအများ ယုံကြည်ရတဲ့ အချက်အလက်တွေကို အရင် ရှင်းပြမယ်။ ပြီးတဲ့နောက် သက်ရှိတွေရဲ့ မူလအစကို သိဖို့ ဘာကြောင့် အရေးကြီးတယ်ဆိုတာ ဆက်ရှင်းပြပါမယ်။