ရေချို

ရေချိုရဲ့ ရင်လေးစရာ အနာဂတ်

ကမ္ဘာမြေရဲ့ အစိတ်အပိုင်းအများစုဟာ ရေနဲ့ ဖုံးလွှမ်းနေတာပါ။ ဒါပေမဲ့ ကမ္ဘာ့ မိုးလေဝသအဖွဲ့ရဲ့ အဆိုအရ “ကမ္ဘာပေါ်မှာ ရေချိုပမာဏ ၀.၅% ပဲရှိတယ်။” ရရှိနိုင်တဲ့ ရေချိုပမာဏ သိပ်နည်းလွန်းတယ် ထင်ရပေမဲ့ ကမ္ဘာပေါ်က သက်ရှိတွေအတွက်တော့ လုံလောက်ပါတယ်။ ပြဿနာက ရှိထားတဲ့ရေချိုတွေ ညစ်ညမ်းလာတယ်၊ ရာသီဥတုပြောင်းလဲမှုနဲ့ အသုံးများမှုကြောင့် ရှားပါးလာတယ်။ နောက်အနှစ် ၃၀ အတွင်း လူဦးရေ သန်းငါးထောင်ဟာ ရေချိုရှားပါးမှု ပြဿနာ ကြုံရနိုင်တယ်လို့ ပညာရှင်တွေ ခန့်မှန်းကြတယ်။

ကမ္ဘာမြေကို ဆက်ရှင်သန်နိုင်အောင် ပုံစံပြုထား

ကမ္ဘာမြေရဲ့ သဘာဝဖြစ်စဉ်တွေက ရေအရင်းအမြစ် ပျောက်မသွားအောင် ကာကွယ်ပေးတယ်။ ဒါ့အပြင် နေရောင်ခြည်၊ မြေကြီးနဲ့ ပင်လယ်သတ္တဝါတွေကလည်း ရေကို သန့်စင်ပေးကြတယ်။ ကမ္ဘာမြေကို ဆက်ရှင်သန်နိုင်အောင် ပုံစံပြုထားကြောင်း အထောက်အထားတချို့ကို သုံးသပ်ကြည့်ပါ။

• ရေထဲမှာပါလာတဲ့ အညစ်အကြေးတွေကို မြေကြီးက စစ်ထုတ်ပေးတယ်။ စိမ့်မြေမှာ ပေါက်တဲ့ အပင်တချို့က နိုက်ထရိုဂျင်၊ ဖော့စဖရတ်နဲ့ ပိုးသတ်ဆေးတွေကို ဖယ်ရှားပေးတယ်။

• ရေထဲက အဆိပ်အတောက်တွေဟာ ရေစီးကြောင့် အားပျော့သွားပြီး အဲဒီအဆိပ်တွေကို ဘက်တီးရီးယားတွေက ဖြိုခွဲပေးကြတယ်။ ဒီနည်းနဲ့ သဘာဝအလျောက် ရေသန့်စင်လာတယ်ဆိုတာ သိပ္ပံပညာရှင်တွေ တွေ့ရှိခဲ့တယ်။

• ရေချိုနေ ခုံးကောင်၊ ယောက်သွားတွေကလည်း ရေထဲက အန္တရာယ်ရှိ ဓာတုပစ္စည်းတွေကို ရက်ပိုင်းအတွင်း ဖယ်ရှားပေးနိုင်ကြတယ်။ ရေသန့်စက်ရုံတွေထက်တောင် ပိုထိထိရောက်ရောက် သန့်စင်ပေးနိုင်ကြတာ။

• ကမ္ဘာပေါ်မှာ ရေအမြဲ ရရှိနေတာဟာ ရေသံသရာကြောင့်ပါ။ ရေသံသရာနဲ့ တခြားသဘာဝဖြစ်စဉ်တွေကြောင့် ရေဟာ ကမ္ဘာ့လေထုထဲကနေ လွတ်ထွက်မသွားဘဲ ဆက်လက်တည်တံ့နေတယ်။

လူ့ကြိုးပမ်းအားထုတ်မှုများ

ရေကို အလဟဿ မဖြုန်းတီးဖို့ ပညာရှင်တွေ တိုက်တွန်းကြတယ်။ ဒါ့အပြင် ရေညစ်ညမ်းမှုကို လျှော့ချတဲ့အနေနဲ့ ကားဆီယိုနေရင် ပြင်ဖို့၊ မသုံးတော့တဲ့ ဆေးဝါးတွေကို အိမ်သာထဲ ရေဆွဲမချဖို့၊ ရေမြောင်းထဲ အဆိပ်တွေ မသွန်ဖို့ အကြံပြုကြတယ်။

ရေချိုတွေ များများရနိုင်ဖို့ အင်ဂျင်နီယာတွေက အဆင့်မြင့်နည်းပညာတွေသုံးပြီး ပင်လယ်ရေငန်ကို ရေချိုဖြစ်အောင် တီထွင်ကြိုးပမ်းနေပါတယ်။

လက်တွေ့မှာတော့ အဲဒီနည်းနဲ့ ရေချိုအမြောက်အများ ထုတ်လုပ်ဖို့ဆိုတာ မဖြစ်နိုင်ဘူး။ အကုန်အကျသိပ်ကြီးပြီး စွမ်းအင် အများကြီး ကုန်လို့ပါ။ သောက်သုံးရေ ထိန်းသိမ်းဖို့ “ကမ္ဘာတစ်ဝန်း နှစ်ဆကြိုးပမ်းရမယ်” လို့ ကမ္ဘာ့ကုလသမဂ္ဂရဲ့ ၂၀၂၁ ခုနှစ် အစီရင်ခံစာမှာ ဖော်ပြထားတယ်။

ကမ္ဘာမြေအတွက် မျှော်လင့်ချက်—ကျမ်းစာအဆို

“ဘုရားက ရေစက်တွေကို ဆွဲယူတယ်။ ရေခိုးရေငွေ့တွေက မိုးရေအဖြစ် ငွေ့ရည်ဖွဲ့တယ်။ အဲဒီနောက် မိုးတိမ်တွေကနေ မိုးရွာချပြီး လူတွေအပေါ် ရွာသွန်းဖြိုးတော့တယ်။”—ယောဘ ၃၆:၂၇-၂၈။

ကမ္ဘာ့ရေသံသရာကို ဖန်ဆင်းထားသူဟာ ဘုရားသခင်ပါ။—ဒေသနာ ၁:၇။

စဉ်းစားကြည့်ပါ– ဖန်ဆင်းရှင်က ရေချို သန့်စင်ပေးတဲ့ စနစ်တွေကိုတောင် ဖန်တီးပေးထားမှတော့ လူတွေကြောင့် ညစ်ညမ်းသွားတဲ့ ရေအရင်းအမြစ်တွေကို ပြန်ပြုပြင်ပေးနိုင်စွမ်း မရှိဘဲနေပါ့မလား၊ ပြန်ပြုပြင်ပေးချင်စိတ် မရှိဘဲနေပါ့မလား။ စာမျက်နှာ ၁၅ ရှိ “ကမ္ဘာမြေ ဆက်ရှင်သန်မယ်လို့ ဘုရားသခင် ကတိပြု” ဆောင်းပါးကို ကြည့်ပါ။