တမန်တော်များကိုဆက်ခံခြင်း

အဓိပ္ပာယ်သတ်မှတ်ချက်– ဘုရားသခင့်ခန့်အပ်ခြင်းအားဖြင့် တမန်တော် ၁၂ ပါးတို့၏အခွင့်အာဏာကို ဆက်ခံသူများရှိသည်ဟူသောအယူဝါဒဖြစ်သည်။ ကက်သလစ်အသင်းတွင် ဂိုဏ်းအုပ်ဘုန်းကြီးများသည် အုပ်စုတစ်ခုအနေနှင့် တမန်တော်များကိုဆက်ခံသူများဖြစ်ကြပြီး ပုပ်ရဟန်းမင်းသည် ပေတရု၏နောက်ဆက်ခံဟုအဆိုရှိသည်။ ခရစ်တော်သည် ပေတရုအား အသင်းတော်တစ်ခုလုံးအပေါ် အုပ်ချုပ်စေရန် အထွတ်အမြတ်အာဏာအပ်နှင်းခဲ့ကြောင်း၊ ပေတရုပြီးလျှင် သူ့ရာထူးကိုရောမပုပ်ရဟန်းမင်းများက တိုက်ရိုက်ဆက်ခံ၍ သူ့လုပ်ငန်းကိုဆက်လက်လုပ်ကိုင်လာကြကြောင်း အခိုင်အမာဆိုကြ၏။ သမ္မာကျမ်းစာ၏သွန်သင်ချက်မဟုတ်ပါ။

အသင်းတော်ကို “ကျောက်” ပေါ်တည်ဆောက်ထားသည်ဖြစ်ရာ ပေတရုပင်လျှင် ထို “ကျောက်” ဖြစ်သလော

မ. ၁၆:၁၈၊ JB– “ယခုသင့်ကိုငါပြော၏။ သင်သည်ပေတရုဖြစ်ပြီး ဤကျောက်ပေါ်မှာ ငါ၏အသင်းတော်ကိုငါတည်ဆောက်မည်။ မြေအောက်ကမ္ဘာ၏ဝင်ပေါက်တံခါးများသည် ယင်းကို မည်သည့်အခါမျှမတားဆီးနိုင်ကြ။” (ကျမ်းချက်၏ရှေ့နောက်စကားများ [အခန်းငယ် ၁၃၊ ၂၀] က ယေရှု မည်သူမည်ဝါဖြစ်ကြောင်း အဓိကဆွေးနွေးနေသည်ကိုသတိပြုပါ။)

မည်သူသည် “ကျောက်”၊ “တိုက်ထောင့်အမြစ်ကျောက်မြတ်” ဖြစ်ကြောင်း တမန်တော်ပေတရုနှင့်ပေါလုတို့နားလည်ခဲ့ကြသနည်း

တ. ၄:၈-၁၁၊ JB– “ပေတရုသည် သန့်ရှင်းသောဝိညာဉ်တော်နှင့်ပြည့်ပြီး သူတို့အားဟောပြောသည်မှာ ‘လူတို့၏အုပ်စိုးရှင်များနှင့်အကြီးအကဲများတို့ . . . ဤသူသည် ယနေ့သင်တို့မျက်မှောက်၌ ကျန်းမာပကတိမတ်တတ်ရပ်နိုင်သည်မှာ အခြားသူ၏နာမအားဖြင့်မဟုတ်။ လက်ဝါးကပ်တိုင်တွင်သင်တို့တင်သတ်သော်လည်း ဘုရားသခင်ထမြောက်စေသော နာဇရက်မြို့သားယေရှုခရစ်၏နာမအားဖြင့်ဖြစ်၏။ ထိုသူကား အသင်ဆောက်လုပ်သူများ စွန့်ပယ်ထားသောကျောက်တုံးဖြစ်သော်လည်း အဓိကကျောက်တုံး [“တိုက်ထောင့်ကျောက်၊” NAB] ဖြစ်ခဲ့ပြီ။”

၁ ပေ. ၂:၄-၈၊ JB– “သင်တို့လည်း ဝိညာဏအိမ်တော်ကိုတည်ဆောက်သည့် သက်ရှိကျောက်များဖြစ်ခြင်းငှာ . . . ထိုသခင် [ယေရှုခရစ်] ထံတော်သို့ တိုးဝင်ချဉ်းကပ်ကြလော့။ ကျမ်းစာပြောသည့်အတိုင်း၊ ငါရွေးချယ်သော တိုက်ထောင့်ကျောက်မြတ်ကို ဇိအုန်၌ ငါမည်ကဲ့သို့ချထားသည်ကိုကြည့်ပါ။ ထိုကျောက်ကိုယုံစားအားထားသောသူသည် စိတ်ပျက်ရမည်မဟုတ်။ ၎င်းသည် ယုံကြည်သူသင်တို့အတွက် တန်ဖိုးကြီးမြတ်၏ဟုဆိုလိုသတည်း။ သို့သော် မယုံကြည်သူများအတွက်မူ ဆောက်လုပ်သူများပယ်ထားသောကျောက်သည် အဓိကကျောက်၊ ထိမိလဲစေသောကျောက်၊ လူကိုလဲကျစေသောကျောက်ဖြစ်သတည်း။

ဧ. ၂:၂၀၊ JB– “သင်တို့သည် တမန်တော်များ၊ ပရောဖက်များအားဖြင့် အုတ်မြစ်ချထားသော အဆောက်အအုံ၏ အစိတ်အပိုင်းများဖြစ်ကြပြီး ခရစ်တော်ယေရှုကိုယ်တော်တိုင် ယင်း၏အဓိကတိုက်ထောင့်ကျောက်ဖြစ်သည်။”

(ကက်သလစ်ချာ့ချ် က သူတော်စင်အဖြစ်ယူမှတ်ထားသော) ဩဂတ်စတင်း၏ယုံကြည်ချက်ကား အဘယ်နည်း

“ကျွန်ုပ်ဘုန်းတော်ကြီးဘဝတွင်ရှိနေစဉ် ဒိုနေးတပ်စ်၏စာကို ဆန့်ကျင်၍စာအုပ်တစ်အုပ်ကိုလည်း ရေးသားခဲ့သည်။ . . . ဤစာအုပ်၏အပိုဒ်တစ်ပိုဒ်တွင် တမန်တော်ပေတရုနှင့်ပတ်သက်၍ ‘အသင်းတော်သည် ကျောက်ဖြစ်သောသူ [ပေတရု] အပေါ်မှာ တည်ဆောက်ထားသည်’ ဟုကျွန်ုပ်ရေးသားခဲ့သည်။ . . . သို့သော် ‘သင်သည်ပေတရုဖြစ်ပြီး ဤကျောက်ပေါ်မှာ ငါ၏အသင်းတော်ကိုငါတည်ဆောက်မည်’ ဟူ၍သခင်မိန့်ကြားရာ၌ ‘ကိုယ်တော်သည် ခရစ်တော်တည်းဟူသော အသက်ရှင်တော်မူသောဘုရားသခင်၏သားတော်ဖြစ်တော်မူသည်’ ဟု ပေတရုဝန်ခံခဲ့သောသူ ကိုယ်တော့်အပေါ်တည်ဆောက်ခြင်းသာဖြစ်ကြောင်းနားလည်သင့်သည်ဟူ၍ နောက်ပိုင်း၌ ကျွန်ုပ်ထပ်ခါထပ်ခါရှင်းပြခဲ့သည်။ ထို့ကြောင့် ဤကျောက်ကိုအစွဲပြု၍ကင်ပွန်းတပ်ခံရသောပေတရုသည် ဤကျောက်ပေါ်တွင်တည်ဆောက်သောအသင်းတော်ကိုယ်နှိုက်ကို ကိုယ်စားပြု၍ ‘ကောင်းကင်နိုင်ငံတော်၏သော့များ’ ကိုလက်ခံရရှိခဲ့သည်။ အကြောင်းမှာ သူ့အား ‘သင်သည် ပေတရုဖြစ်၏’ ဟုသာဆိုပြီး ‘သင်သည် ကျောက်ဖြစ်သည်’ ဟုမိန့်တော်မမူသောကြောင့်တည်း။ သို့သော် ‘ကျောက်သည်ခရစ်တော်ဖြစ်’ ပြီးအသင်းတော်တစ်ရပ်လုံးက ကိုယ်တော်ကိုဝန်ခံသည်နည်းတူ ရှိမုန်လည်းဝန်ခံရာမှ ပေတရုဟုသမုတ်တော်မူခြင်းခံရသည်။” မေရီ အိုင်. ဘိုဂင် ဘာသာပြန်သည့် အသင်းတော်၏ရှေးအာဏာပိုင် ဘာသာရေးစာရေးဆရာများ​—စိန့်သြဂတ်စတင်း၊ ပြန်လည်ရုပ်သိမ်းခြင်း (ဝါရှင်တန်၊ ဒီ.စီ.; ၁၉၆၈)၊ စာအုပ် ၁၊ စ. ၉၀။

အခြားတမန်တော်များက ပေတရုကိုမိမိတို့အထဲမှဂိုဏ်းချုပ်ရာထူးရရှိထားသူအဖြစ်ရှုမှတ်သလော

လု. ၂၂:၂၄-၂၆၊ JB– “မည်သူ့ကိုအကြီးမြတ်ဆုံးအဖြစ်သတ်မှတ်သင့်သည်နှင့်ပတ်သက်၍ သူတို့ [တမန်တော်များ] အလယ်တွင်လည်း အငြင်းအခုံပေါ်ပေါက်လာသည်။ သို့သော် သူတို့အားကိုယ်တော်က ‘ဘုရားမဲ့သူများအလယ်တွင် ဘုရင်များက အစိုးတရပြုကြ၏။ သူတို့အထက်က အာဏာရှင်များကို ကျေးဇူးရှင် ဟူ၍ဘွဲ့တပ်ကြသည်။ သင်တို့တွင် ထိုသို့မဖြစ်ရ’ ဟုမိန့်တော်မူ၏။” (ပေတရုသာ “ကျောက်” ဖြစ်ပါက “မည်သူ့ကို အကြီးမြတ်ဆုံးအဖြစ်သတ်မှတ်သင့်” သနည်းဟူသောမေးခွန်း ပေါ်ပေါက်ခဲ့မည်လော။)

အသင်းတော်၏ဦးခေါင်းဖြစ်သောယေရှုခရစ်သည် အသက်ရှင်နေသည်ဖြစ်ရာ နောက်ဆက်ခံလိုသေးသလော

ဟေဗြဲ ၇:၂၃-၂၅၊ JB– “[ဣသရေလနိုင်ငံတွင်] အခြားယဇ်ပုရောဟိတ်များစွာရှိခဲ့ဖူးသည်။ အကြောင်းမှာ သူတို့ယောက်တိုင်း သေရကြသောကြောင့်ဖြစ်သည်။ သို့သော် ဤတစ်ယောက် [ယေရှုခရစ်] မူ အစဉ်အမြဲတည်သောကြောင့် မိမိ၏ယဇ်ပုရောဟိတ်အရာကို မည်သည့်အခါမျှမဆုံးရှုံးနိုင်ပါ။ သို့ဖြစ်၍ ကိုယ်တော်သည် ထာဝစဉ်အသက်ရှင်သည်နှင့်အညီ မိမိမှတစ်ဆင့် ဘုရားသခင်ထံချဉ်းကပ်သောသူအားလုံးအတွက် ကြားဖျန်ပေးသောကြောင့် ကိုယ်တော်၏ကယ်တင်နိုင်စွမ်းသည် ကျိန်းသေ၏။”

ရော. ၆:၉၊ JB– “ကျွန်ုပ်တို့သိသည့်အတိုင်း ခရစ်တော်သည် သေခြင်းမှထမြောက်ခြင်းခံရသည့်နောက် ဘယ်တော့မျှ တစ်ဖန်သေတော့မည်မဟုတ်တော့။”

ဧ. ၅:၂၃၊ JB– “ခရစ်တော်သည် အသင်းတော်၏ဦးခေါင်းဖြစ်တော်မူ၏။”

ပေတရုအားအပ်နှင်းတော်မူသော “သော့များ” ကား အဘယ်နည်း

မ. ၁၆:၁၉၊ JB– “ငါသည် သင့်အား ကောင်းကင်နိုင်ငံတော်သော့များကိုပေးမည်။ မြေကြီးပေါ်မှာသင်ချည်နှောင်သမျှ ကောင်းကင်တွင်ချည်နှောင်ပြီဟုယူမှတ်ခံရမည်။ မြေကြီးပေါ်တွင်သင်ဖြေလွှတ်သမျှ ကောင်းကင်တွင်ဖြေလွှတ်ပြီဟုယူမှတ်ခံရမည်။”

ဗျာဒိတ်ကျမ်း၌ ယေရှုခရစ်က မိမိသည်ပုံဆောင်သော့တစ်ချောင်းကိုသုံးလျက် လူသားများအဖို့ အခွင့်ထူးနှင့်အခွင့်လမ်းများဖွင့်လှစ်ခဲ့တော်မူကြောင်း ညွှန်းဆိုတော်မူသည်

ဗျာ. ၃:၇၊ ၈၊ JB– “ဒါဝိဒ်၏သော့ လက်ဝယ်ရှိသဖြင့် ဖွင့်လိုက်လျှင် မည်သူမျှမပိတ်နိုင်၊ ပိတ်လိုက်လျှင် မည်သူမျှမဖွင့်နိုင်အောင်စွမ်းဆောင်နိုင်ထသော၊ သန့်ရှင်း၍သစ္စာရှိထသောသူ၏သတင်းစကားမှာ ဤသို့တည်း။ ငါသည် သင့်ရှေ့ ၌ တံခါးတစ်ခုကိုဖွင့်လိုက်လေပြီ။ ၎င်းကိုမည်သူမျှမပိတ်နိုင်။”

ပေတရုသည်မိမိလက်၌အပ်နှင်းတော်မူသော “သော့များ” ကိုသုံးစွဲလျက် (ဂျူး၊ ရှမာရိ၊တစ်ပါးအမျိုးသား) များ ဘုရားသခင့်နိုင်ငံတော်သို့ဝင်နိုင်ရန် ဘုရားသခင့်ဝိညာဉ်တော်ရဖို့အခွင့်လမ်းကိုဖွင့်ပေးခဲ့သည်

တ. ၂:၁၄-၃၉၊ JB– “ပေတရုသည် တမန်တော်ဆယ့်တစ်ပါးနှင့်အတူထ၍ ကျယ်သောအသံနှင့် သူတို့အား ဤသို့ဟောပြောလေ၏။ ‘ယုဒလူများနှင့် ယေရုရှလင်မြို့တွင်နေသောသူအပေါင်းတို့ . . . လက်ဝါးကပ်တိုင်မှာ သင်တို့တင်၍သတ်သောဤယေရှုကို ဘုရားသခင်သည် သခင်အဖြစ်လည်းကောင်း၊ ခရစ်တော်အဖြစ်လည်းကောင်း ချီးမြှင့်တော်မူပြီ။’ ယင်းကိုကြားသောအခါ သူတို့၏နှလုံး အလွန်ထိခိုက်ပြီး ပေတရုနှင့်တမန်တော်များအား ‘ညီအစ်ကိုတို့ အဘယ်သို့ပြုရပါမည်နည်း’ ဟုမေးကြ၏။ ပေတရုက ‘သင်တို့ယောက်တိုင်း နောင်တယူပြီး သင်တို့၏အပြစ်လွှတ်ခြင်းခံရရန် ခရစ်တော်ယေရှု၏နာမ၌နှစ်ခြင်းယူရမည်။ ထိုအခါ သင်တို့သည် သန့်ရှင်းသောဝိညာဉ်တော်ဆုကျေးဇူးကို လက်ခံရရှိကြမည်။ ပြုတော်မူသောကတိတော်သည် သင်တို့နှင့်သင်တို့၏သားသမီးများအတွက်၊ အလွန်ဝေးသောအရပ်မှလူအားလုံးအတွက်၊ ငါတို့၏အရှင်ဘုရားသခင် အထံတော်သို့ခေါ်တော်မူမည့်သူအားလုံးအတွက်ဖြစ်သည်’ ဟုပေတရုပြန်ပြောခဲ့သည်။”

တ. ၈:၁၄-၁၇၊ JB– “ယေရုရှလင်မြို့၌ရှိသောတမန်တော်များသည် ရှမာရိလူတို့ ဘုရားသခင့်နှုတ်ကပါဌ်တော်ကိုလက်ခံကြပြီဖြစ်ကြောင်း ကြားသိကြသောအခါ ပေတရုနှင့်ယောဟန်တို့ကို သူတို့ထံသို့စေလွှတ်ကြ၏။ သူတို့လည်းထိုဒေသသို့သွား၍ ရှမာရိလူမျိုးများ သန့်ရှင်းသောဝိညာဉ်တော်ဆုကျေးဇူးရရှိစေရန် ဆုတောင်းပေးကြ၏။ အကြောင်းမှာ ထိုသူတစ်ယောက်အပေါ်၌မျှ သန့်ရှင်းသောဝိညာဉ်တော်မကျရောက်သေးချေ။ သခင်ယေရှု၏နာမ၌ နှစ်ခြင်းခံပြီးရုံသာရှိသည်။ ထို့နောက် တမန်တော်တို့သည် သူတို့အပေါ်လက်တင်ကြသောအခါ သူတို့အပေါ်သန့်ရှင်းသောဝိညာဉ်တော်ကျရောက်လေသည်။” (အခန်းငယ် ၂၀ အရ၊ ထိုအခါထူး၌ ပေတရုဦးဆောင်ခဲ့သည်။)

တ. ၁၀:၂၄-၄၈၊ JB– “နောက်တစ်နေ့တွင် ကဲသရိမြို့သို့သူတို့ရောက်ကြပြီး [အရေဖျားမလှီးသောတစ်ပါးအမျိုးသား] ကော်နေလိက သူတို့ကိုစောင့်နေ၏။ . . . သူတို့ကိုပေတရုဟောပြောလေသည်။ . . . ပေတရုစကားပြောနေစဉ် နားထောင်သူအားလုံးအပေါ်သို့ သန့်ရှင်းသောဝိညာဉ်တော်ကျရောက်လေသည်။”

ကောင်းကင်သည် ပေတရု၏ဆုံးဖြတ်ချက်များကိုစောင့်ပြီး သူ့ ဦးစီးမှုကိုလိုက်သလော

တ. ၂:၄၊ ၁၄၊ JB– “သူတို့အားလုံးသန့်ရှင်းသောဝိညာဉ်တော်နှင့်ပြည့်ဝ၍ ဝိညာဉ်တော်သည် စကားပြောခြင်းဆုကျေးဇူးကိုပေးသည်နှင့်အညီ သူတို့သည် နိုင်ငံခြားစကားများစတင်ပြောဆိုကြလေသည်။ . . . ထို့နောက် [အသင်းတော်၏ဦးခေါင်းခရစ်တော်က သူတို့အား သန့်ရှင်းသောဝိညာဉ်တော်အားဖြင့် လှုံ့ဆော်ပြီးနောက်မှ] ပေတရုသည် တမန်တော်ဆယ့်တစ်ပါးနှင့်အတူထ၍ သူတို့အား ဤသို့ ဟောပြောလေ၏။” (အခန်းငယ် ၃၃ ကိုရှု။)

တ. ၁၀:၁၉၊ ၂၀၊ JB– “ဝိညာဉ်တော်က သူ့ [ပေတရု] အား ‘လူအချို့သင့်ကိုတွေ့ရန်လာပြီ။ အောက်သို့အမြန်ဆင်းပြီး သူတို့နှင့်အတူ၊ [တစ်ပါးအမျိုးသားကော်နေလိအိမ်သို့] လိုက်သွားရန်ခြေမနှေးနှင့်။ သူတို့အားသင့်ထံသို့လာရန်မှာကြားသူကား ငါပင်တည်း’ ဟုမိန့်ဆိုခဲ့ရသည်။”

မဿဲ ၁၈:၁၈၊ ၁၉ နှင့်နှိုင်းယှဉ်။

ပေတရုသည်ကောင်းကင်နိုင့်ငံတော်သို့မည်သူဝင်ထိုက်ကြောင်း အဆုံးအဖြတ်ပေးသည့်တရားသူကြီးလော

၂ တိ. ၄:၁၊ JB– “ခရစ်တော်ယေရှုသည် . . . သေသူနှင့်ရှင်သူများ၏ တရားသူကြီးဖြစ်ရမည်။”

၂ တိ. ၄:၈၊ JB– “ယခုမှာ ဖြောင့်မတ်သောတရားသူကြီးဖြစ်သူ သခင် [ယေရှုခရစ်] က ထိုနေ့တွင်ငါ့အား ပေးရန်သိမ်းဆည်းထားသောဖြောင့်မတ်ခြင်းသရဖူကို ငါရယူရန်သာကျန်တော့သည်။ ငါ့အားသာမက၊ ကိုယ်တော်၏ပေါ်ထွန်းတော်မူခြင်းကို တောင့်တသူမှန်သမျှအားလည်း ပေးတော်မူမည်တည်း။”

ရောမသို့ပေတရုရောက်ခဲ့သလော

သမ္မာကျမ်းစာတွင် ရောမမြို့အကြောင်း အခန်းငယ်ကိုးခု၌ ဖော်ပြထားသည်။ တစ်ချက်ကမျှ ပေတရု ရောမသို့ရောက်ခဲ့သည်ဟု မဆိုချေ။ ပေတရု ပထမစောင် ၅:၁၃ က သူ ဗာဗုလုန်တွင်ရှိခဲ့ကြောင်းဖော်ပြသည်။ ဗာဗုလုန်သည် ရောမ၏လျှို့ဝှက်သင်္ကေတလော။ ဗာဗုလုန်မြို့၌ဂျူးလူမျိုးအမြောက်အမြားနေထိုင်ကြသည်ဖြစ်၍ (ဂလာတိ ၂:၉ ဖော်ပြချက်အရ) ဂျူးများအားဟောပြောရန်ပေတရုတာဝန်ရခဲ့သည့်အတွက် ဗာဗုလုန်သို့ သူရောက်သွားခြင်းဖြစ်သည် ဟုဆိုလျှင် ဆီလျော်ပေသည်။ ဘေဘီလိုးနီးယန်း (ဗာဗုလုန်) တာလ်မွဒ်ကျမ်း (Talmud) ၏ရေးသားထုတ်လုပ်ခြင်းအကြောင်း ဆွေးနွေးရာတွင် ဂျူးစွယ်စုံကျမ်း (ဂျရူးစလင်မြို့၊ ၁၉၇၁။ အတွဲ ၁၅၊ ကော်လံ ၇၅၅) က ခရစ်သက္ကရာဇ်ခေတ် “ဗာဗုလုန်” မြို့ရှိ ဂျူးဘာသာဆိုင်ရာ “အနုပညာကျော်အဖွဲ့များ” အကြောင်း ရည်ညွှန်းဖော်ပြခဲ့သည်။

ပေတရုမှသည်ခေတ်သစ်ပုပ်ရဟန်းများအထိ အဆက်မပြတ်သည့် ဆက်ခံသူများအစဉ်အဆက်ကို တွေ့ ရှိခဲ့ပြီလော

ယေရှုအသင်းသား ဂျော်န်မက်ကဲန်ဇီ သည် နိုထရာဒိမ်းဘုရားကျောင်းကြီးမှ ဓမ္မပညာပါမောက္ခဖြစ်ခဲ့စဉ် ဤသို့ရေးသားခဲ့သည်။ “အသင်းတော်အခွင့်အာဏာနောက်ဆက်ခံ ကွင်းဆက်မပြတ်ရှိခဲ့သည်ဟူသောသမိုင်းဝင်အထောက်အထား မရှိချေ။”​—ကက်သလစ်အသင်း (နယူးယောက်မြို့၊ ၁၉၆၉)၊ စ. ၄။

ကက်သလစ်စွယ်စုံကျမ်းသစ် က “. . . စာရွက်စာတမ်းအထောက်အထားများ ရှားပါးခြင်းကြောင့် ဂိုဏ်းအုပ်အဖွဲ့ထွန်းကားလာပုံ၏အစပိုင်းနှင့်ပတ်သက်၍ . . . ပို၍မသဲမကွဲဖြစ်ရလေသည်” ဟုဝန်ခံ၏။”​—(၁၉၆၇)၊ အတွဲ ၁၊ စ. ၆၉၆။

မိမိတို့ကိုဘုရားသခင်ခန့်အပ်သည်ဆိုသော်လည်း ဘုရားသခင်နှင့်ခရစ်တော်တို့အား မနာခံပါက ထိုအဆိုသည်အချည်းနှီးသက်သက်

မ. ၇:၂၁-၂၃၊ JB– “ကောင်းကင်နိုင်ငံတော်သို့ဝင်ရမည့်သူများမှာ ငါ့ကို ‘သခင်၊ သခင်’ ဟုခေါ်သောသူများမဟုတ်၊ ကောင်းကင်ဘုံ၌ရှိသော ငါ့ခမည်းတော်၏အလိုတော်ကို လုပ်ဆောင်သူများသာလျှင်ဖြစ်သည်။ ထိုနေ့ရက်ရောက်လာသောအခါ များစွာသောသူတို့က ငါ့အား ‘သခင်၊ သခင် ကျွန်တော်တို့သည် ကိုယ်တော်၏နာမဖြင့်ပရောဖက်ပြုခဲ့ကြပြီ၊ ကိုယ်တော်၏နာမဖြင့် နတ်ဆိုးတို့ကိုနှင်ထုတ်ခဲ့ကြပြီ၊ ကိုယ်တော်၏နာမဖြင့် အံ့ဖွယ်အမှုများစွာကိုပြုခဲ့ကြပြီမဟုတ်လော’ ဟုပြောကြလိမ့်မည်။ ထိုအခါ ငါသည် သူတို့အား ‘သင်တို့ကိုငါစိုးစဉ်းမျှမသိ။ အချင်းလူဆိုးများ ငါ့ထံမှဝေးဝေးထွက်သွားကြ’ ဟုတေ့တေ့ဆိုင်ဆိုင်ပြောမည်။”

ယေရမိ ၇:၉-၁၅ ကိုပါရှု။

တမန်တော်များ၏နောက်ဆက်ခံဟုအမည်ခံသူများသည် ယေရှုခရစ်နှင့်ကိုယ်တော့်တမန်တော်များ၏ သွန်သင်ချက်နှင့်ကျင့်ထုံးများကို စွဲကိုင်လာခဲ့ကြသလော

ကက်သလစ်အဘိဓာန်ကျမ်းတစ်စောင် က “ကက်သလစ်အသင်းတော်သည် တမန်တော်များမှတိုက်ရိုက်ဆင်းသက်လာသည်။ အကြောင်းမှာ ယင်း၏အယူဝါဒမှာ တစ်ကြိမ်က တမန်တော်များအားဗျာဒိတ်ပေးတော်မူခဲ့သောယုံကြည်ချက်ဖြစ်၍ အသင်းတော်သည် ယင်းယုံကြည်ချက်ကို ဖြည့်စွက်ခြင်း၊ နုတ်ပယ်ခြင်းမပြု၊ ပကတိအတိုင်း ထိန်းသိမ်းစောင့်ရှောက်၍ ရှင်းလင်းဟောပြောသည်။” (လန်ဒန်မြို့၊ ၁၉၅၇၊ ဒဗ္ဗလျူ. အီး. အက်ဒစ်စ် နှင့် တီ. အာရ်နောလ်၊ စ. ၁၇၆) အဖြစ်မှန်နှင့်ကိုက်ညီပါသလော။

ဘုရားသခင်မည်သူမည်ဝါဖြစ်ကြောင်း

“သုံးပါးပေါင်းတစ်ဆူသည် ခရစ်ယာန်ဘာသာ၏ပင်မအယူဝါဒကို အမှတ်သညာပြုသည့်ဝေါဟာရဖြစ်သည်။”​—ကက်သလစ်စွယ်စုံကျမ်း (၁၉၁၂)၊ အတွဲ ၁၅၊ စ. ၄၇။

“သုံးပါးပေါင်းတစ်ဆူဟူသောစကားလုံးသော်လည်းကောင်း၊ တိကျပြတ်သားသော ထိုအယူဝါဒကိုသော်လည်းကောင်း ဓမ္မသစ်ကျမ်း၌မတွေ့ရပါ။ . . . ထိုအယူဝါဒသည် ရာစုနှစ်ပေါင်းများစွာတစ်လျှောက် အငြင်းအခုံဒုနှင့်ဒေးကြားမှ တစ်စတစ်စပေါ်ပေါက်လာခဲ့ခြင်းဖြစ်သည်။”​—ဗြိတိန်စွယ်စုံကျမ်းသစ် (၁၉၇၆) ကျမ်းငယ်၊ အတွဲ ၁၀၊ စ. ၁၂၆။

“ကျမ်းစာဋီကာပါရဂူများနှင့်ဓမ္မပညာဆရာများက ဓမ္မသစ်ကျမ်းမှ သုံးပါးပေါင်းတစ်ဆူဝါဒအကြောင်းကို အလေးအနက်မချင့်ချိန်ဘဲမပြောဆိုသင့်ဟု ဝန်ခံသိမှတ်ထားကြသည်။ ထိုသို့ဝန်ခံသိမှတ်သော ကက်သလစ်အသင်းသားအရေအတွက်လည်း တစ်နေ့တခြား တိုးများနေသည်။ တစ်ဦးတစ်ယောက်က မချင့်ချိန်ဘဲသုံးပါးပေါင်းတစ်ဆူအယူဝါဒအကြောင်း ပေါက်ကရပြောသောအခါ ထိုသူသည် ခရစ်ယာန်ဇာစ်မြစ်ခေတ်ကိုလွန်၍ စတုတ္ထရာစုနှစ်၏စတုတ္ထအပိုင်းအဆုံးသို့ ရောက်သွားလေပြီဖြစ်ကြောင်း တရားသေ အယူဝါဒဆိုင်ရာသမိုင်းပညာရှင်များနှင့် စည်းစနစ်လိုက်သည့်ဓမ္မပညာဆရာများကလည်း ရှေးနည်းထပ်တူဝန်ခံသိမှတ်ကြသည်။”​—ကက်သလစ်စွယ်စုံကျမ်းသစ် (၁၉၆၇)၊ အတွဲ ၁၄၊ စ. ၂၉၅။

ဘုန်းကြီးရဟန်းများအိမ်ထောင်သားမွေးခြင်းမပြုဘဲနေခြင်း

ဆဋ္ဌမမြောက်ပုပ်ရဟန်းမင်းပေါလ်က Sacerdotalis Caelibatus (ဘုန်းကြီးများအိမ်ထောင်မပြုဘဲနေခြင်း၊ ၁၉၆၇) ခေါ် ဂိုဏ်းချုပ်များထံရေးသောမှာတမ်းတွင် ဘုန်းကြီးရဟန်းများ အိမ်ထောင်သားမွေးခြင်းကိုရှောင်ရန်လိုအပ်သည် ဟူသောအချက်ကို အတည်ပြုထောက်ခံခဲ့သည်။ သို့သော် “ခရစ်တော်နှင့်တမန်တော်များ၏ဆုံးမသွန်သင်ချက်ပါဝင်သော ဓမ္မသစ်ကျမ်းတွင် . . . မြင့်မြတ်သောဓမ္မအမှုဆောင်များ အိမ်ထောင်သားမွေးခြင်းကိုရှောင်ရန် ပွင့်ပွင့်လင်းလင်းတောင်းဆိုမထား” ကြောင်း၊ “ယေရှုကိုယ်တော်တိုင် တမန်တော်ဆယ့်နှစ်ပါးကိုရွေးချယ်ရာ၌ ယင်းကို လိုအပ်ချက်အဖြစ်မသတ်မှတ်ခဲ့” ကြောင်း၊ “တမန်တော်များလည်း ကနဦးခရစ်ယာန်လူစုများပေါ်ဦးစီးသောသူတို့ အိမ်ထောင်သားမွေးခြင်းရှောင်ရမည်ဟု မတောင်းဆိုခဲ့ကြပါ” ဟုဝန်ခံခဲ့သည်။​—ပုပ်ရဟန်း၏မှာတမ်း ၁၉၅၈-၁၉၈၁ (ဗာဂျီးနီးယားနယ်၊ ဖောလ်စ်ချာ့ချ်မြို့၊ ၁၉၈၁)၊ စ. ၂၀၄။

၁ ကော. ၉:၅– NAB– “ငါတို့သည် သခင်၏ညီများ၊ အခြားသောတမန်တော်များနှင့် ကေဖတို့နည်းတူ ယုံကြည်သောမိန်းမတစ်ယောက်နှင့် အိမ်ထောင်ပြုခွင့်မရှိကြသလော။” (“ကေဖ” သည် ပေတရုကိုပေးသော အာရေမိတ်အမည်ဖြစ်သည်။ ယောဟန် ၁:၄၂ ကိုရှု။ ရှိမုန်ပေတရု၏ယောက္ခမအကြောင်းဖော်ပြသော မာကု ၁:၂၉-၃၁ ကိုပါရှု။)

၁ တိ. ၃:၂ Dy– “ဂိုဏ်းအုပ်ဘုန်းကြီးသည် . . . မယားတစ်ယောက်တည်းရှိသောသူ [“တစ်ကြိမ်တည်းသာအိမ်ထောင်ပြုသောသူ၊” NAB] ဖြစ်သင့်သည်။”

ခရစ်ယာန်ခေတ်မတိုင်မီက ဗုဒ္ဓဘာသာစည်းမျဉ်းအရ၊ ဘုန်းကြီးရဟန်းများ အိမ်ထောင်မပြုရချေ။ (ခရစ်ယာန်အသင်းဘောင်တွင်း ဘုန်းကြီးရဟန်းများ အိမ်ထောင်မပြုခြင်းဆိုင်ရာသမိုင်း။ လန်ဒန်မြို့၊ ၁၉၃၂၊ စတုတ္ထတွဲ၊ ပြန်ပြင်။ ဟင်နရီ စီ. လီ၊ စ. ၆) အေ. ဟစ်စလော့ပ် ရေးသားသော ထိုဗာဗုလုန်နှစ်ခု အရ၊ ယင်းအချိန်မတိုင်မီကပင် ဗာဗုလုန်လူမျိုးတို့၏အဆင့်မြင့်ဘုန်းကြီးရဟန်းများသည် အိမ်ထောင်သားမွေးခြင်းကိုရှောင်ကြဉ်ခဲ့ရကြသည်။​—(နယူးယောက်မြို့၊ ၁၉၄၃)၊ စ. ၂၁၉။

၁ တိ. ၄:၁-၃၊ JB– “ဝိညာဉ်တော်ဤသို့အတိအလင်းမိန့်ဆိုခဲ့ပြီ။ နောက်ဆုံးကာလများအတွင်း၊ လူအချို့တို့သည် ယုံကြည်ခြင်းကိုစွန့်လွှတ်ပြီး နတ်ဆိုးများထံမှလာသော လှည့်ဖြားသည့်ဝိညာဉ်များနှင့် အယူဝါဒများကိုရွေးချယ်၍နားထောင်ကြမည်။ . . . သူတို့က အိမ်ထောင်မပြုရဟု ဆိုကြလိမ့်မည်။”

လောကနှင့်မရောယှက်ဘဲနေခြင်း

ဆဋ္ဌမမြောက်ပုပ်ရဟန်းမင်းပေါလ်က ၁၉၆၅ ခုနှစ်တွင် ကုလသမဂ္ဂ၌မိန့်ခွန်းပြောကြားစဉ် ဤသို့ဆိုခဲ့သည်– “ကမ္ဘာ့လူသားများသည် နိုင်ငံချင်းသင့်မြတ်ညီညွတ်ရေးနှင့် ငြိမ်းချမ်းရေးအတွက် နောက်ဆုံးမျှော်လင့်ချက်အဖြစ် ကုလသမဂ္ဂကိုအားထားကြပါသည်။ ကျွန်ုပ်တို့လည်း အသင်းသားများနှင့်အတူ လူသားတို့နှင့်တကွ ကုလသမဂ္ဂကိုချီးမွမ်းဂုဏ်ပြုလျက် အားကိုးကြောင်း ဤတွင် ဝံ့ဝံ့စားစားတင်ပြလိုက်ပါသည်။”​—ပုပ်ရဟန်းမင်း၏အလည်အပတ် (နယူးယောက်၊ ၁၉၆၅)၊ အချိန်-ဘဝ အထူးသတင်း၊ စ. ၂၆။

ယော. ၁၅:၁၉၊ JB– “[ယေရှုခရစ်မိန့်ဆိုသည်မှာ၊] သင်တို့ကို လောကက ပိုင်ဆိုင်လျှင် လောကသည် သင်တို့ကိုမိမိ၏ပိုင်ဆိုင်ရာအဖြစ်ချစ်လိမ့်မည်။ သို့သော် သင်တို့ကိုလောကမပိုင်ဆိုင်၊ သင်တို့ကို ငါရွေးချယ်သဖြင့် လောကမှနုတ်ယူခဲ့သောကြောင့် လောကသည်သင်တို့ကိုမုန်း၏။”

ယာ. ၄:၄၊ JB– “လောကနှင့်မိတ်ဖွဲ့ ခြင်းသည် ဘုရားသခင်နှင့်ရန်ဖွဲ့ရာရောက်ကြောင်း သင်တို့မသိကြသလော။”

အဆုံး၌ စစ်လက်နက်ကို သုံးစွဲခြင်း

ကက်သလစ်သမိုင်းဆရာ အီး. အိုင်. ဝတ္တကင်း ဤသို့ရေးသားလိုက်သည်– “ဂိုဏ်းအုပ်ဘုန်းကြီးများသည် မိမိတို့နိုင်ငံအစိုးရ ဆင်နွှဲသမျှသောစစ်ပွဲအားလုံးကို အစဉ်တစိုက်ထောက်ခံအားပေးလာခဲ့သည်။ တလွဲတိုးတက်မှု သို့မဟုတ် မရိုးသားသောသစ္စာစောင့်မှုကိုအကြောင်းပြပြီး ထိုသမိုင်းအဖြစ်မှန်ကို ကျွန်ုပ်တို့ ငြင်းပယ်ခြင်းသော်လည်းကောင်း၊ လျစ်လျူရှုခြင်းသော်လည်းကောင်း မပြုနိုင်ပေ။ မည်မျှပင်အခံရခက်စေကာမူ ဝန်ခံရမည်ဖြစ်သည်။ အမှန်ဆိုရလျှင် နိုင်ငံ့ဂိုဏ်းအုပ်ဘုန်းတော်ကြီးအဖွဲ့တစ်ဖွဲ့က စစ်ပွဲတစ်ရပ်ကိုမတရားစစ်ပွဲအဖြစ်ပြစ်တင်ရှုတ်ချခဲ့ကြောင်း ကျွန်ုပ်တစ်ခါမျှမကြားခဲ့ရပါ။ . . . အသင်း၏တရားဝင်သီအိုရီမည်သို့ပင်ရှိပါစေ လက်တွေ့တွင်မူ ‘ငါ့နိုင်ငံ အမြဲမှန်’ ဟူသောအဆိုသာလျှင် စစ်ပွဲကာလအတွင်း ကက်သလစ်အသင်းဂိုဏ်းအုပ်များ လိုက်လျှောက်ခဲ့သည့်မူဝါဒဖြစ်ခဲ့သည်။” ချားလ်စ် အက်စ်. ထော်မ်စင် တည်းဖြတ်သည့် သီလနှင့်ဒုံးကျည်များ (လန်ဒန်၊ ၁၉၅၉)၊ စ. ၅၇၊ ၅၈။

မ. ၂၆:၅၂၊ JB– “ထို့နောက်ယေရှုက ‘သင့်ဓားကို ပြန်သိမ်းလော့။ အကြောင်းမှာ ဓားကိုဆွဲသောသူမှန်သမျှ ဓားဖြင့်သေရကြမည်’ ဟုမိန့်တော်မူ၏။”

၁ ယော. ၃:၁၀-၁၂၊ JB– “ဤနည်းအားဖြင့် ငါတို့သည် ဘုရားသခင်၏သားသမီးများနှင့် မာရ်နတ်၏သားသမီးများကို ခွဲခြားသိကြ၏။ မည်သူမဆို . . . မိမိ၏ညီအစ်ကိုကိုမချစ်သောသူသည် ဘုရားသခင်၏သားသမီးမဟုတ် . . . ဆိုးညစ်သူ [မာရ်နတ်] ၏လူဖြစ်၍ မိမိညီ၏လည်ကိုဖြတ်ခဲ့သူကာဣနနှင့်မတူဘဲ ငါတို့သည် အချင်းချင်းချစ်ရကြမည်။”

ဖော်ပြခဲ့ပြီးသောအချက်များအရ တမန်တော်များကိုဆက်ခံသူများပါဟု အမည်ခံသောသူတို့သည် ခရစ်တော်နှင့်တမန်တော်များနည်းအတိုင်း ဟောပြောကျင့်သုံးကြပါသလော။