မစ္ဆားပွဲ

အဓိပ္ပာယ်သတ်မှတ်ချက်– ရိုမင်ကက်သလစ်ချာ့ချ် အခမ်းအနားဆိုင်ရာ မြင့်မြတ်သောအသင်းတော် ဖော်ပြသည့်အတိုင်း၊ မစ္ဆားပွဲဆိုသည်မှာ၊ “လက်ဝါးကပ်တိုင်၏ပူဇော်ခြင်းကို အဓွန့်ရှည်စေသော ပူဇော်ခြင်းတစ်ရပ်ဖြစ်သည်။​—သခင်ဘုရား၏သေခြင်းနှင့်ထမြောက်ခြင်းကို အောက်မေ့ရန်ဖြစ်သည်။ ကိုယ်တော်က ‘ငါ့ကိုအောက်မေ့ဖို့ ဤသို့ပြုလော့’ ဟုမိန့်မှာခဲ့သည်။ (လုကာ ၂၂:၁၉)​—ထိုမြင့်မြတ်သောပွဲတော်၌ ဘုရားသခင့်လူမျိုးတော်တို့သည် သခင်ဘုရား၏ခန္ဓာတော် အသွေးတော်နှင့်ဆက်ဆံခြင်းအားဖြင့်၊ ပသခါယဇ်အကျိုးကိုမျှယူခံစားခြင်း၊ ခရစ်တော်အသွေးဖြင့် လူတို့နှင့်တစ်ကြိမ်တည်းဖွဲ့တော်မူသောထာဝရပဋိညာဉ်သစ်ကို ပြန်လည်သစ်လန်းစေခြင်း၊ ယုံကြည် မျှော်လင့်ခြင်းဖြင့် ခမည်းတော်နိုင်ငံတော်၏နောက်ဆုံးပွဲတော်ကိုရှေ့ပြေးပုံဆောင်၍ ၎င်း၌ ပါဝင်ဖို့စောင့်ဆိုင်းရင်း ‘ကြွလာသည်တိုင်အောင်’ သခင်ဘုရားသေခြင်းကိုကြွေးကြော်ခြင်း ပြုကြပါသည်။” (Eucharisticum Mysterium, ၁၉၆၇၊ မေလ ၂၅) ယေရှုခရစ် နောက်ဆုံးညစာစားပွဲ၌ ပြုတော်မူသောအမှုများဖြစ်သည်ဟု မိမိတို့နားလည်သည့်အတိုင်း ကက်သလစ်အသင်းက တုပပြုလုပ်ခြင်းဖြစ်သည်။

မုန့်နှင့်စပျစ်ရည်သည် ခရစ်တော်၏ခန္ဓာတော်နှင့်အသွေးတော်အဖြစ်သို့ တကယ်ပင် ပြောင်းလဲသွားသလော

ပဉ္စမမြောက်ပုပ်ရဟန်းမင်းက ၁၉၆၈ ခု၊ ဇွန်လ ၃၀ ရက်နေ့၌ “လေးနက်တည်ကြည်သော ယုံကြည်ခြင်းခံယူချက်” တစ်ရပ်၌ ဤသို့ကြေညာ၏– “နောက်ဆုံးညစာစားပွဲ၌ သခင်ဘုရားသန့်ရှင်းစေတော်မူသောမုန့်နှင့်စပျစ်ရည်တို့သည် ငါတို့အဖို့ လက်ဝါးကပ်တိုင်ပေါ်မှာ ပူဇော်တော်မူသော ခန္ဓာတော်နှင့်အသွေးတော်အဖြစ်သို့ ပြောင်းလဲသွားသည်နည်းတူ၊ ရဟန်းတော်သန့်ရှင်းစေတော်မူသောမုန့်နှင့်စပျစ်ရည်သည်လည်း ကောင်းကင်၌ ဘုန်းတန်ခိုးဖြင့် စံမြန်းတော်မူသော ခရစ်တော်၏ခန္ဓာတော်နှင့် အသွေးတော်အဖြစ်သို့ ပြောင်းလဲသွားသည်ကို ငါတို့ယုံကြည်သည်။ ထိုအရာတို့သည် ငါတို့အာရုံ၌ သန့်ရှင်းစေခြင်းအမှုမတိုင်မီကအတိုင်းဖြစ်သည်ဟု ထင်ရသော်လည်း ၎င်းတို့၏အောက်၌ သခင်ဘုရား၏လျှို့ဝှက်သောရောက်ရှိတော်မူခြင်းသည် စိတ်ထင်မဟုတ်၊ ဧကန်အမှန် ရောက်ရှိတော်မူခြင်းဖြစ်သည်ဟုလည်း ငါတို့ယုံကြည်သည်။ အသင်းတော်က လျှို့ဝှက်နက်နဲသော ဤပြောင်းလဲမှုကို ဒြပ်တော်ပြောင်းခြင်းဟုသမုတ်သည်မှာ ဆီလျော်လှပေသည်။” (တရားဝင် ကက်သလစ်သွန်သင်ချက်များ​—ငါတို့သခင်ခရစ်တော်၊ မြောက်ကယ်ရလိုင်းနားပြည်နယ်၊ ဝိလ်မင်တန်မြို့; ၁၉၇၈၊ အမန်ဒါ ဂျီ. ဝပ်လင်တန်၊ စ. ၄၁၁) ဤယုံကြည်ချက်သည် သန့်ရှင်းသောကျမ်းစာနှင့် ညီညွတ်၏လော။

“ငါ၏ကိုယ်၊” “ငါ၏အသွေးဖြစ်၏” ဟု ယေရှုမိန့်ဆိုစဉ် ဘာကိုဆိုလိုသနည်း

မ. ၂၆:၂၆-၂၉– “ထိုအခါ၊ စားလျက်နေကြစဉ်တွင် ယေရှုသည် မုန့်ကိုယူ၍ ကျေးဇူးတော်ကိုချီးမွမ်းပြီးမှ မုန့်ကိုဖဲ့၍ ဤမုန့်ကား ငါ၏ကိုယ်ဖြစ်၏။ ယူ၍စားကြလော့ဟု မိန့်တော်မူလျက် တပည့်တော်တို့အား ပေးတော်မူ၏။ ခွက်ကိုလည်းယူ၍ ကျေးဇူးတော်ကိုချီးမွမ်းပြီးမှ သူတို့အား ပေးတော်မူ၍ သင်တို့ရှိသမျှသည် သောက်ကြလော့။ ဤခွက်ကား ပဋိညာဉ်တရားသစ်နှင့်ဆိုင်၍ လူများတို့၏အပြစ်ကို လွတ်စေခြင်းငှာ သွန်းသော ငါ၏အသွေးဖြစ်၏။ ငါဆိုသည်ကား၊ ဤစပျစ်ရည်မျိုးအသစ်ကို ငါ့ခမည်းတော်၏နိုင်ငံ၌ သင်တို့နှင့်အတူ ငါမသောက်မီနေ့တိုင်အောင် ယခုမှစ၍ တစ်ဖန်ငါမသောက်ရ ဟု မိန့်တော်မူ၏။”

“ဤမုန့်ကား ငါ၏ကိုယ်ဖြစ်၏၊” “ဤခွက်ကား . . . ငါ၏အသွေးဖြစ်၏” ဟူသောစကားနှင့်ပတ်သက်၍ အောက်ပါအချက်သည် မှတ်သားဖွယ်ဖြစ်သည်။ Mo ကျမ်းက “ဤကား ငါ၏ခန္ဓာကို ဆိုလိုသည်၊” “ဤကား ငါ၏သွေးကိုဆိုလိုသည်” ဟူ၍ပြန်ဆို၏။ (ဖြည့်စွက်စာလုံးစောင်း) NW က အလားတူပြန်ဆိုသည်။ LEF ကျမ်းက “ဤကား ငါ၏ခန္ဓာကို ကိုယ်စားပြုသည်၊” “ဤကား ငါ၏သွေးကို ကိုယ်စားပြုသည်”ဟူ၍ပြန်သည်။ (ဖြည့်စွက်စာလုံးစောင်း) ဤပြန်ဆိုချက်များသည် ကက်သလစ်ဘာသာပြန်ကျမ်းများစွာ၌ အခန်းငယ် ၂၉ ပါ ရှေ့နောက်စကားများနှင့် ညီညွတ်ပေသည်။ Kx ကျမ်းက “ငါ့ခမည်းတော်၏နိုင်ငံတော်၌ သင်တို့နှင့်အတူ စပျစ်ရည်သစ်ကို ငါမသောက်မချင်း ငါသည် စပျစ်နွယ်ပင်၏ဤအသီးမှ သောက်မည်မဟုတ်။” (ဖြည့်စွက်စာလုံးစောင်း) CC, NAB, Dy ကျမ်းတို့လည်း ခွက်ထဲမှအရာကို “စပျစ်နွယ်ပင်၏ဤအသီး” အဖြစ် ယေရှုညွှန်းဆိုကြောင်း ပြသည်။ “ဤခွက်ကား . . . ငါ၏အသွေးဖြစ်၏” ဟုမိန့်တော်မူသည့်နောက်၌ ထိုသို့ဆိုခြင်းဖြစ်သည်။

ကျမ်းစာပါ သိသာပြတ်သားသောအသုံးအနှုန်းများကိုထောက်ရှုလျက် “ဤမုန့်ကား ငါ၏ကိုယ်ဖြစ်၏၊” “ဤခွက်ကား . . . ငါ၏အသွေးဖြစ်၏” ဟူသောစကားများကိုသုံးသပ်ပါ။ ယေရှုက “ငါသည် ဤလောက၏အလင်းဖြစ်၏၊” “ငါသည် သိုးဝင်သောတံခါးဝဖြစ်၏၊” “ငါသည် မှန်သောစပျစ်နွယ်ပင်ဖြစ်၏” ဟူ၍လည်းမိန့်ဆိုသေးသည်။ (ယော. ၈:၁၂; ၁၀:၇; ၁၅:၁) ထိုစကားတစ်ခွန်းကမျှ ယေရှုသည် အံ့ဖွယ်တန်ခိုးဖြင့် ထိုအရာများအဖြစ်သို့ ပြောင်းလဲသွားသည်ဟူသောသဘော မသက်ရောက်စေပါ။ မှန်ပါသလော။

တမန်တော်ပေါလုက ၁ ကောရိန္သု ၁၁:၂၅ ၌ နောက်ဆုံးညစာစားပွဲအကြောင်း ရေးရာတွင် အနည်းငယ်ခြားနားသောနည်းဖြင့် ထပ်တူသဘောကို တင်ပြသည်။ ခွက်နှင့်ပတ်သက်၍ “သင်တို့ရှိသမျှသည် သောက်ကြလော့။ ဤခွက်ကား ပဋိညာဉ်တရားသစ်နှင့်ဆိုင်၍ လူများတို့၏အပြစ်ကိုလွတ်စေခြင်းငှာ သွန်းသော ငါ၏အသွေးဖြစ်၏” ဟူသော ယေရှု၏စကားကို တိုက်ရိုက်ကိုးကားမည့်အစား၊ ပေါလုက “ဤခွက်ကား ငါ၏အသွေး၌တည်သော ပဋိညာဉ်တရားသစ်ဖြစ်၏” ဟူ၍ရေးသား၏။ ထိုခွက်သည် တစ်နည်းတစ်ဖုံ အံ့ဖွယ်နည်းဖြင့် ပဋိညာဉ်တရားသစ်အဖြစ်သို့ပြောင်းလဲသွား၏ဟူ၍မဆိုလိုသည်မှာ သေချာ၏။ ခွက်ထဲမှအရာသည် ပဋိညာဉ်သစ်ကိုအတည်ဖြစ်စေသော ယေရှု၏အသွေးတော်ကို ပုံဆောင်၏ ဟုဆိုလျှင် သာ၍လျော်ကန်သည်မဟုတ်လော။

ယောဟန် ၆:၅၃-၅၇ ၌ ယေရှု၏စကားက ဘာကိုဆိုလိုသနည်း

“ယေရှုကလည်း ငါအမှန်အကန်ဆိုသည်ကား၊ လူသား၏အသားကိုမစား၊ အသွေးကိုမသောက်လျှင် သင်တို့၌ အသက်မရှိ။ ငါ၏အသားကိုစား၍ ငါ၏အသွေးကိုသောက်သောသူသည် ထာဝရအသက်ကိုရ၏။ ထိုသူကို နောက်ဆုံးသောနေ့၌ ငါထမြောက်စေမည်။ ငါ၏အသားသည် စားစရာကောင်း၏။ ငါ၏အသွေးလည်း သောက်စရာကောင်း၏။ ငါ၏အသားအသွေးကိုသောက်စားသောသူသည် ငါ၌တည်၏။ ထိုသူ၌လည်း ငါတည်၏။ အသက်ရှင်တော်မူသောခမည်းတော်သည် ငါ့ကိုစေလွှတ်တော်မူ၍၊ ငါသည်ခမည်းတော်အားဖြင့် အသက်ရှင်သည်နည်းတူ ငါ့ကိုစားသောသူသည် ငါ့အားဖြင့် အသက်ရှင်လိမ့်မည်။”​—ယော. ၆:၅၃-၅၇။

ယေရှု၏အသွေးအသားကို တကယ်စားရမည်ဟုဆိုလိုသလော။ သို့ဆိုလျှင် ယေရှုသည် မောရှေအားဖြင့် ဘုရားသခင်ပြဋ္ဌာန်းသောပညတ်တရားကိုလွန်ကျူးရန် အားပေးရာရောက်မည်။ ပညတ်တရားက အဘယ်သွေးကိုမျှမစားရန်တားမြစ်၏။ (ဝတ်. ၁၇:၁၀-၁၂) ထိုသို့အားပေးမည့်အစား၊ ပညတ်တရားတားမြစ်ချက်ကျူးလွန်မှုမှန်သမျှကို ယေရှု အပြင်းအထန်ဆန့်ကျင်၏။ (မ. ၅:၁၇-၁၉) ထို့ကြောင့် ပုံဆောင်သောအဓိပ္ပာယ်ဖြင့် စားသောက်ခြင်းကိုဆိုလိုနေခြင်းဖြစ်ရမည်။ စုံလင်သောကိုယ်တော့်လူ့ယဇ်၏တန်ဖိုးပေါ်ယုံကြည်ခြင်းဖြင့် ဖြစ်သည်။​—ယောဟန် ၃:၁၆; ၄:၁၄; ၆:၃၅၊ ၄၀ နှိုင်းယှဉ်။

မိမိ၏သေခြင်းကိုအောက်မေ့ရန်သာမက မိမိကိုအသစ်တစ်ဖန်ပူဇော်သော အခမ်းအနားတစ်ရပ် ပြုလုပ်ရန် တပည့်တော်တို့အား ယေရှုညွှန်ကြားခဲ့သလော

ဒုတိယအကြိမ်ဗက်တီကင်ညီလာခံမှတ်တမ်းများ အရ၊ “ငါတို့ကယ်တင်ရှင်သည် သစ္စာဖောက်ခံရသောည၊ နောက်ဆုံးညစာစားပွဲ၌ မိမိ၏ခန္ဓာတော်နှင့်အသွေးတော်ပူဇော်ခြင်းပွဲတော်ကို စတင်ကျင်းပခဲ့သည်။ လက်ဝါးကပ်တိုင်ပေါ်ပူဇော်ခြင်းကို အဓွန့်ရှည်စေရန် ပြုတော်မူခြင်းဖြစ်သည်။ . . .”​—(နယူးယောက်၊ ၁၉၆၆)၊ ယေရှုအသင်းသား၊ ဒဗ္ဗလျူ. အမ်၊ အဘော့တ်၊ စ. ၁၅၄; ဖြည့်စွက်စာလုံးစောင်း။

ကက်သလစ်စွယ်စုံကျမ်းက ဤသို့ဆို၏– “အသင်းတော်သည် မစ္ဆားကို ‘စစ်မှန်လျောက်ပတ်သောပူဇော်ခြင်း’ အဖြစ် ယူမှတ်ကြစေရန် ရည်ရွယ်သည်။ . . . သို့ရာတွင် ကျွန်ုပ်တို့၏အယူဝါဒဆင်းသက်လာရာ အဓိကပင်ရင်းအမြစ်မှာ ရှေးရိုးစဉ်လာဖြစ်သည်။ ရှေးရိုးစဉ်လာက ရှေးအကျဆုံးအချိန်ကတည်းက မစ္ဆားပူဇော်ခြင်း၌ တောင်းခံရယူနိုင်သည့်အစွမ်းရှိသည်ဟု ကြေညာသည်။”​—(၁၉၁၃)၊ အတွဲ ၁၀၊ စစ. ၆၊ ၁၇။

ယေရှုကိုယ်တော်တိုင်ဤသို့ဆို၏– “ငါ့ကိုအောက်မေ့ဖို့ရာ ဤသို့ပြုကြလော့။” (လု. ၂၂:၁၉; ၁ ကော. ၁၁:၂၄) လုကာ ၂၂:၁၉၊ Kx နှင့် Dy ကျမ်းတို့၌ “ငါ့ကိုအောက်မေ့ခြင်းအတွက် ဤအမှုကိုပြုလော့” ဟုဆို၏။ NAB ကျမ်းက “ငါ့ကိုအောက်မေ့သည့်အနေနှင့် ဤသို့ပြုပါ” ဟုဆို၏။ နောက်ဆုံးညစာစားပွဲ၌ မိမိပြုသောအမှုသည် မိမိကိုယ်ကို ပူဇော်မှုတစ်ရပ်ဖြစ်သည်ဟု ယေရှုမဆို။ တပည့်တော်များအနေနှင့် မိမိ၏ပူဇော်မှုကို အသစ်တစ်ဖန်ပြုရမည်ဟူ၍လည်း မိန့်တော်မမူ။

ဟေဗြဲ ၉:၂၅-၂၈– “[ဂျူး] ယဇ်ပုရောဟိတ်မင်းသည် သန့်ရှင်းရာဌာနထဲသို့ သူတစ်ပါးအသွေးနှင့် နှစ်တိုင်းအစဉ် ဝင်ရသကဲ့သို့ ခရစ်တော်သည် အဖန်များစွာ ကိုယ်ကိုပူဇော်ရသည်မဟုတ်။ ထိုသို့ပူဇော်ရသည်မှန်လျှင် ကမ္ဘာဦးမှစ၍ အဖန်များစွာ အသေခံတော်မူရ၏။ ယခုမူကား၊ ဤကပ်ကာလအဆုံး၌ တစ်ခါတည်း ကိုယ်ကိုပူဇော်သောအားဖြင့် အပြစ်များကို သုတ်သင်ပယ်ရှင်းခြင်းငှာ၊ ပေါ်ထွန်းတော်မူ၏။ လူသည် တစ်ခါတည်းသေ၍ ထိုနောက်မှ တရားစီရင်တော်မူခြင်းကိုခံရသကဲ့သို့ ထိုနည်းတူ၊ ခရစ်တော်သည် လူများအပြစ်တို့ကိုခံခြင်းငှာ တစ်ခါတည်း ကိုယ်ကိုပူဇော် [တော်မူ၏။]” (ဖြည့်စွက်စာလုံးစောင်း)

၎င်းသည် “နားမလည်နိုင်သောလျှို့ဝှက်နက်နဲချက်” လော

ကျမ်းစာ၌ ဘုရားသခင့်နက်နဲရာများ၊ သို့မဟုတ် လျှို့ဝှက်ချက်များအကြောင်း ဆိုထားသည်မှန်၏။ သို့သော် ၎င်းတို့အနက် တစ်ခုကမျှ ကျမ်းစာရှင်းလင်းစွာဖော်ပြသော အမှန်တရားများနှင့် ဆန့်ကျင်ခြင်းမရှိ။ ကျမ်းစာထက် ရှေးရိုးကိုဦးစားပေးသူများနှင့်ပတ်သက်၍ ယေရှုက “အချင်းကြောင်သူတော်တို့၊ သင်တို့နှင့်ပတ်သက်၍ ထာဝရဘုရားသည် ဟေရှာယအားဖြင့် ‘ဤလူမျိုးသည် ငါ့အား နှုတ်ဖြင့်ဂုဏ်ပြုချီးကျူးကြ၏။ သူတို့၏စိတ်နှလုံးမူကား ငါနှင့်ဝေးလှ၏။ သူတို့သည် လူ့ပညတ် [“စည်းမျဉ်း၊” JB] များကို ဘုရားပေးပညတ်သဖွယ် သင်ကြားပို့ချကြ၏။ သို့ဖြစ်၍ ငါ့အား သူတို့ဝတ်ပြုကိုးကွယ်ခြင်းသည် အချည်းနှီးဖြစ်၏’ ဟု မိန့်ကြားခဲ့သည်မှာ မှန်လှ၏ဟု မိန့်တော်မူ၏။”​—မ. ၁၅:၇-၉၊ သက။

ဤအောက်မေ့ပွဲကို နေ့စဉ် သို့မဟုတ် အပတ်စဉ် ပြုလုပ်ကြရန် ယေရှုရည်ရွယ်သလော

အခြေခံမေးဖြေပို့ချချက် က ဤသို့ဆို၏– “ကက်သလစ်ခရစ်ယာန်များ၏ အထူးဝတ္တရားများ” အနက် “တနင်္ဂနွေနေ့နှင့် အခါကြီးရက်ကြီးတိုင်း မစ္ဆားသို့တက်ရောက်ခြင်း” ပါဝင်သည်။ (ဘော့စတွန်၊ ၁၉၈၀၊ စ. ၂၁) “အမှန်ဆိုလျှင် မစ္ဆားသို့တက်ရောက်ရန်၊ အခါများစွာမက၊ နေ့စဉ်ပင်ပွဲတော်ခံရန် သစ္စာရှိတို့အားတိုက်တွန်း၏။”​—ခရစ်တော်၏သွန်သင်ချက်​—လူကြီးများအတွက် ကက်သလစ်မေးဖြေပို့ချချက်၊ အကျဉ်း၊ (ဟန်းတင်းတန်မြို့၊ ၁၉၇၉)၊ စ. ၂၈၁။

“မုန့်ကိုဖဲ့ခြင်း” ဟုကျမ်းစာဆိုတိုင်း ခရစ်တော်၏သေခြင်းအောက်မေ့ပွဲကိုဆိုလိုသလော။ (တ. ၂:၄၂၊ ၄၆; ၂၀:၇) ယေရှုသည် နောက်ဆုံးညစာစားပွဲမတိုင်မီကပင် အစာစားစဉ် ‘မုန့်ကိုဖဲ့’ လေ့ရှိသည်။ (မာ. ၆:၄၁; ၈:၆) ထိုခေတ်ကဂျူးများသုံးသောမုန့်သည် ယနေ့လူတို့သုံးနေကျမဟုတ်။ စားသောအခါ၊ ဖဲ့လေ့ရှိကြသည်။

မိမိ၏သေခြင်းအောက်မေ့ပွဲကို မည်မျှကြာလျှင်တစ်ကြိမ်ကျင်းပရမည်ဟု ယေရှုအတိအကျမဆိုပါ။ သို့ရာတွင်၊ ထိုပွဲတော်ကို ဂျူးတို့၏ပသခါပွဲရက်၌ စတင်ကျင်းပတော်မူသည်။ တပည့်တော်တို့က ပသခါကို ခရစ်တော်သေခြင်းအောက်မေ့ပွဲဖြင့်အစားထိုးလေ၏။ ပသခါပွဲသည် နှစ်စဉ်နိသန်လ ၁၄ ရက်နေ့၌ ကျင်းပသောပွဲဖြစ်သည်။ ထို့အတူ၊ ဂျူးတို့၏အဇုမပွဲ (တဆေးမဲ့မုန့်ပွဲ)၊ ခုနစ်သီတင်းပွဲ (ပင်တေကုတ္တေပွဲ)၊ သကေနေပွဲ (တဲနေပွဲ) သို့မဟုတ် သိုထားပွဲနှင့် အပြစ်ဖြေရာနေ့တို့သည် တစ်နှစ်တစ်ကြိမ်ကျင်းပသောပွဲများဖြစ်ကြသည်။

မစ္ဆားရွတ်ခြင်းဖြင့် ငရဲကလေးမှစိုးလ်များကို ချမ်းသာရစေနိုင်သလော

ခရစ်တော်၏သွန်သင်ချက်​—လူကြီးများအတွက် ကက်သလစ်မေးဖြေပို့ချချက် က ဤသို့ဆို၏– “‘ငရဲကလေး’ ဟူသောစကား ကျမ်းစာထဲ၌မရှိ။ ကျမ်းစာ၌ ထိုအယူဝါဒကို အတိအလင်း သွန်သင်ထားခြင်းလည်းမရှိ။ . . . အသင်းတော်၏ရှေးအာဏာပိုင်ဘာသာရေး စာရေးဆရာများ၏စာပေများ၌ ငရဲကလေးတည်ရှိကြောင်းသာမက သေလွန်သူသစ္စာရှိတို့ကိုရည်စူး၍ ရှင်သူများကဆုတောင်းခြင်း၊ အထူးသဖြင့် မစ္ဆားပူဇော်ခြင်းအားဖြင့် သေသူတို့ကို ချမ်းသာရစေနိုင်ကြောင်း များစွာရေးသားထားသည်။”​—စစ. ၃၄၇၊ ၃၄၈။

လူသေ၏အခြေအနေနှင့်စပ်လျဉ်း၍ သန့်ရှင်းသောကျမ်းစာက ဤသို့ဆို၏– “အသက်ရှင်သောသူသည် မိမိသေရမည်ကိုသိ၏။ သေသောသူမူကား အဘယ်အရာကိုမျှမသိ။” (ဒေ. ၉:၅) “ပြစ်မှားသောဝိညာဉ် [“လူ၊” JB] သည် အသက်သေရမည်။” (ယေဇ. ၁၈:၄) (“သေခြင်း” ခေါင်းစဉ်အောက် စာမျက်နှာ ၃၃၀-၃၃၂ ကိုပါရှု။)