နိုင်ငံတော်သတင်း နံပါတ် ၃၄

ဘဝသည် အဘယ့်ကြောင့် ပြဿနာများနှင့် ဤမျှပြည့်နှက်နေသနည်း

ဒုက္ခကင်းဝေးသည့် ပရဒိသုတစ်ခု ဖြစ်နိုင်ပါမည်လော

ကြီးလေးသည့်ပြဿနာများ တိုး၍ဆိုးရွားနေ—အဘယ့်ကြောင့်နည်း

လူတို့သည် ပြဿနာများအစဉ်ရှိခဲ့သည်။ လူများစွာက ခေတ်သစ်စက်မှုအတတ်ပညာသည် ယင်းတို့ကို ဖြေရှင်းနိုင်မည်ဟုထင်ကြသော်လည်း ကြီးလေးသည့်ပြဿနာများသည် တိုး၍ဆိုးရွားလာနေသည်။

ရာဇဝတ်မှု– လမ်းပေါ်တွင် လမ်းလျှောက်နေခြင်း သို့မဟုတ် မိမိအိမ်တွင် ထိုင်နေခြင်းသည်ပင်လျှင် လုံခြုံသည်ဟုခံစားရသူ နည်းပါသည်။ မကြာမီနှစ်များက ဥရောပနိုင်ငံတစ်နိုင်ငံတွင် လူ ၃ ယောက်တွင် ၁ ယောက်နီးပါးသည် ရာဇဝတ်မှု၏သားကောင်ဖြစ်ရသည်။

ပတ်ဝန်းကျင်– လေထု၊ မြေထုနှင့် ရေထုညစ်ညမ်းမှုသည် ပို၍ပို၍ကျယ်ပြန့်လာသည်။ ဖွံ့ဖြိုးဆဲနိုင်ငံများတွင် လူဦးရေလေးပုံတစ်ပုံသည် သန့်ပြန့်သောရေကို မရကြပါ။

ဆင်းရဲနွမ်းပါးမှု– ဆင်းရဲပြီး ဆာလောင်မွတ်သိပ်သောလူများ တစ်ခါနှင့်မျှမတူအောင်များနေသည်။ အချို့သောနိုင်ငံများတွင် လူဦးရေ၏ ၉၀ ရာခိုင်နှုန်းကျော်သည် ဆင်းရဲနွမ်းပါးစွာနေထိုင်ကြရသည်; ကမ္ဘာ့အလုပ်သမားထု၏ ၃၀ ရာခိုင်နှုန်းဖြစ်သော သန်း ၈၀၀ ခန့်တို့သည် အလုပ်လက်မဲ့ သို့မဟုတ် အလုပ်မရရှိသေးပါ—ယင်းအရေအတွက်သည် ကြီးထွားလာသည်။

ဆာလောင်မွတ်သိပ်မှု– သင့်တွင် စားစရာအလုံအလောက်ရှိသော်ငြားလည်း အလုံအလောက်မရှိသူ သန်းနှင့်ချီ၍တိုးများလာနေသည်။ မဖွံ့ ဖြိုးသေးသောနိုင်ငံများတွင် နှစ်စဉ်အနည်းဆုံး ၁၃ သန်း၊ အများစုမှာ ကလေးများဖြစ် သူတို့သည်ဆာလောင်မွတ်သိပ်မှုကြောင့် သေကြရသည်။

စစ်မှု– မကြာမီက လူမျိုးစုအကြမ်းဖက်မှုတွင် လူထောင်ပေါင်းများစွာ အသတ်ခံခဲ့ရသည်။ ထို့အပြင် ဤ ၂၀ ရာစုတွင် စစ်ပွဲများသည် သန်းတစ်ရာထက်မကသော လူများကို သတ်ဖြတ်ခဲ့သည်။

အခြားပြဿနာများ– အထက်ပါတို့တွင် မိသားစုပြိုကွဲမှုများ တိုး၍ဆိုးရွားလာခြင်း၊ လက်မထပ်ထားသည့်မိခင်များ တိုးများလာခြင်း၊ အိမ်မဲ့ရာမဲ့များ တိုးပွားလာခြင်း၊ မူးယစ်ဆေးဝါးအလွဲသုံးစားပြုမှု ကျယ်ပြန့်လာခြင်း၊ စာရိတ္တယိုယွင်းမှု နှံ့ပြားလာခြင်းတို့ကို ထပ်ထည့်လိုက်ပါ။ အမေရိကန် ကက်ဘိနက်ဝင်တစ်ဦး ဤသို့မှန်ကန်စွာ ပြောခဲ့သည်– “လူ့ယဉ်ကျေးမှု ပျက်စီးယိုယွင်းနေတဲ့ . . . လက္ခဏာတွေကတော့ ဒုနဲ့ဒေးဘဲ။” မကြာသေးသော အနှစ် ၃၀ ကာလပိုင်းတွင် အမေရိကန်လူဦးရေသည် ၄၁ ရာခိုင်နှုန်းတိုးများလာသော်လည်း အကြမ်းဖက်ရာဇဝတ်မှု ၅၆၀ ရာခိုင်နှုန်း၊ တရားမဝင်ကလေးမွေးဖွားမှု ၄၀၀ ရာခိုင်နှုန်း၊ ကွာရှင်းမှု ၃၀၀ ရာခိုင်နှုန်း၊ ဆယ်ကျော်သက်များ ကိုယ့်ကိုယ်ကို သတ်သေမှု ၂၀၀ ရာခိုင်နှုန်းကျော်သို့ ထိုးတက်သွားသည်။ အခြားနိုင်ငံများတွင် အခြေအနေသည် ထပ်တူပင်ဖြစ်သည်။

ပြဿနာများသည် အဘယ့်ကြောင့် တိုး၍ဆိုးရွားလာရသနည်း

ကျွန်ုပ်တို့၏ဖန်ဆင်းရှင်က အဖြေပေးသည်။ ကိုယ်တော်.နှုတ်ကပါဌ်တော်က ဤပြဿနာပြည့်နှက်နေသည့် “ခဲယဉ်းသောကာလ” ကို “နောက်ဆုံးသောနေ့ရက်များ” ဟု ခေါ်ထားသည်။ (၂ တိမောသေ ၃:၁၊ သမ္မာ) အဘယ်အရာ၏ နောက်ဆုံးသောနေ့ရက်များနည်း။ အမှန်တွင် ကျမ်းစာက “ဤကပ်ကမ္ဘာကုန်” ခြင်း နှင့်ပတ်သက်၍ ပြောထားသည်။—မဿဲ ၂၄:၃။

ယနေ့တိုးပွားလာသော ပြဿနာများသည် ဆိုးသွမ်းမှုနှင့် ယင်းအတွက်တာဝန်ရှိသူများအပါအဝင် ဤအစီအစဉ်စနစ်၏ အဆုံးသတ်မှု နီးကပ်နေကြောင်း ထင်ရှားသောသာဓကများဖြစ်သည်။ (မဿဲ ၂၄:၃-၁၄; ၂ တိမောသေ ၃:၁-၅; ဗျာဒိတ် ၁၂:၇-၁၂) မကြာမီ ဘုရားသခင်သည် ယနေ့ပြဿနာရှိရှိသမျှကို လုံးလုံးလျားလျားဖြေရှင်းပေးရန် ကြားဝင်အရေးယူဆောင်ရွက်တော်မူမည်။—ယေရမိ ၂၅:၃၁-၃၃; ဗျာဒိတ် ၁၉:၁၁-၂၁။

ဤကမ္ဘာ့ဘာသာတရားများ ပျက်ကွက်ခဲ့ပြီ

ယနေ့ပြဿနာများကို ဝိုင်းကူဖြေရှင်းပေးမည့်အစား ဤကမ္ဘာ့ဘာသာတရားသည် ပြဿနာများကို ထပ်ဆောင်းပေးသည်။ စစ်ပွဲများအတွင်းသန်းနှင့်ချီ၍ သတ်ဖြတ်ကြသည်။ များမကြာသေးမီက ကက်သလစ်အများဆုံးရှိသည့် ရဝမ်ဒါတွင် ထောင်ပေါင်းရာနှင့်ချီသောလူများက တစ်ယောက်ကိုတစ်ယောက် သတ်ဖြတ်ခဲ့ကြသည်! (ဘယ်ဘက်ပုံကို ရှု။)

ယေရှုသည် စစ်ချီလျက်ရိုင်ဖယ်တစ်လက် သို့မဟုတ် ဓားမတစ်ချောင်းကိုင်ကာ မိမိနှင့်လူမျိုးမတူသောကြောင့် တပည့်တော်များကို သတ်မည်လော။ လုံးဝဥဿုံပင်! “ဘုရားသခင်ကို ချစ်သောသူသည် မိမိညီအစ်ကိုကို ချစ်ရမည်” ဟု ကျမ်းစာဆိုထားသည်။ (၁ ယောဟန် ၄:၂၀၊ ၂၁) ဤကမ္ဘာ့ဘာသာတရားများသည် ယင်းသို့ပြုရန် ပျက်ကွက်ခဲ့ပြီ။ “ဘုရားသခင်ကို သိသည်ဟု သူတို့ဆိုကြသော်လည်း အကျင့်များအားဖြင့် ဘုရားသခင်ကို ငြင်းပယ်ကြ၏။”—တိတု ၁:၁၆၊ သမ္မာ။

ထို့အပြင် ကျမ်းစာ၏စာရိတ္တစံနှုန်းများကို အမှန်တကယ်လက်ဆုပ်လက်ကိုင်မပြုခြင်းအားဖြင့် ဤကမ္ဘာ့ဘာသာတရားများသည် မြေကြီးအနှံ့ ထိတ်လန့်ဖွယ် စာရိတ္တချွတ်ခြုံကျမှုကို မြေတောင်မြှောက်ပေးသည်။

ယေရှုက စစ်မှန်သောဘာသာနှင့် မှားသောဘာသာကို ‘ယင်းတို့၏ အသီးများအားဖြင့်’—ယင်း၏အသင်းသားများပြုသည့် အရာအားဖြင့်—ပြောပြနိုင်သည်ဟု မိန့်တော်မူခဲ့သည်။ ကိုယ်တော်ဤသို့လည်းမိန့်ဆိုခဲ့သည်– “ကောင်းသောအသီးမသီးသော အပင်ရှိသမျှတို့ကို ခုတ်လှဲ၍ မီးထဲသို့ချလိုက်တတ်၏။” (မဿဲ ၇:၁၅-၂၀) ဘုရားသခင့်နှုတ်ကပါဌ်တော်က ကျွန်ုပ်တို့အား မကောင်းသောအသီးကို သီးပွင့်ပြီး ဖျက်ဆီးခြင်းနှင့် ပက်ပင်းတိုးမည့် ဘာသာတရားမှ အလွတ်ထွက်ပြေးရန် တိုက်တွန်းထားသည်။—ဗျာဒိတ် ၁၈:၄။

စစ်မှန်သောဘာသာတရားသည် ပျက်ကွက်မှုမရှိခဲ့

စစ်မှန်သောဘာသာတရားသည် အထူးသဖြင့် ချစ်ခြင်းမေတ္တာဖြစ်သော “ကောင်းသောအသီး . . . သီးတတ်၏။” (မဿဲ ၇:၁၇; ယောဟန် ၁၃:၃၄၊ ၃၅) မည်သည့်စည်းလုံးသော အပြည်ပြည်ဆိုင်ရာ ခရစ်ယာန်ညီအစ်ကိုအသင်းအပင်းသည် ဤသို့သောမေတ္တာကို ကျင့်သုံးနေသနည်း။ မိမိတို့၏ဘာသာတူလူများကို သို့မဟုတ် အခြားတစ်ဦးတစ်ယောက်ကို သတ်ရန်ငြင်းဆန်သူများကား မည်သူများနည်း။—၁ ယောဟန် ၃:၁၀-၁၂။

ယေဟောဝါသက်သေများသည် ဤ “ကောင်းသောအသီး” သီးပွင့်ခြင်းတွင် နာမည်ကောင်းရသည်။ ကမ္ဘာတစ်ဝန်း နိုင်ငံပေါင်း ၂၃၀ ကျော်တွင် ‘သူတို့ဓားများကို ထွန်သွားဖြစ်စေခြင်းငှာ ထုလုပ်ခဲ့ကြပြီ။’ (ဟေရှာယ ၂:၄) လူများကိုချစ်သည့် သူတို့၏မေတ္တာကို ဘုရားသခင့်နိုင်ငံတော်နှင့်ယှဉ်သော ‘သတင်းကောင်း’ အား ကမ္ဘာတစ်ဝန်းကြေညာရန် ခရစ်တော်၏အမိန့်ကို နာခံခြင်းအားဖြင့် ပြသကြသည်။ (မဿဲ ၂၄:၁၄) သူတို့သည် ကျမ်းစာတွင် သွန်သင်ထားသည့် မြင့်မားသောစာရိတ္တရေးရာများကိုလည်း လက်တွေ့ကျင့်သုံးထောက်ခံကြသည်။—၁ ကောရိန္သု ၆:၉-၁၁။

စစ်မှန်သောဘာသာတရားသည် ပျက်ကွက်ခြင်းမရှိခဲ့ပါ။ ယင်းက လူတို့အား လူ့လောက၏ ပြဿနာများကို ဖြေရှင်းနိုင်သည့် တစ်ပါးတည်းသောပုဂ္ဂိုလ်ကို ညွှန်ပြသည်။ မကြာမီ ထိုပုဂ္ဂိုလ်သည် လုံးဝကမ္ဘာသစ်တစ်ခုကို ဖြစ်ပေါ်စေမည်။ ထိုပုဂ္ဂိုလ်ကား မည်သူနည်း။ (ကျေးဇူးပြု၍ ကျောဘက်စာမျက်နှာကို ရှု။)

ဒုက္ခကင်းဝေးသည့် ပရဒိသုသည် မုချဖြစ်မည်

သင်တတ်နိုင်ပါက လူသားများအပေါ်ကျရောက်နေသည့် ပြဿနာရှိရှိသမျှကို ဖြေရှင်းမည်မဟုတ်လော။ အမှန်ပင် သင်ဖြေရှင်းပေမည်! လူ့ပြဿနာများကို ဖြေရှင်းရန် တန်ခိုးနှင့် ဉာဏ်ပညာရှိသည့်တစ်ပါးတည်းသောပုဂ္ဂိုလ် ကျွန်ုပ်တို့၏မေတ္တာရှိသောဖန်ဆင်းရှင်သည် မဖြေရှင်းဘဲနေမည်ဟု ကျွန်ုပ်တို့ထင်မှတ်သင့်သလော။

ဘုရားသခင်သည် လူ့ရေးရာများတွင် ယေရှုခရစ်လက်ဝယ်ရှိ မိမိ၏ကောင်းကင်အစိုးရအားဖြင့် ကြားဝင်ဆောင်ရွက်ပေးမည်ဖြစ်ကြောင်း ကျမ်းစာတွင် ဖွင့်ဆိုထားသည်။ ယင်းသည် ကမ္ဘာပေါ်ရှိ ဖောက်ပြန်ယိုယွင်းမှုများကို “ချိုးဖဲ့ဖျက်ဆီး” မည်ဖြစ်သည်။ (ဒံယေလ ၂:၄၄; မဿဲ ၆:၉၊ ၁၀) အဘယ့်ကြောင့်နည်း။ ဘုရားသခင်ကို ဦးတိုက်၍ ဆာလံဆရာ ဤသို့ဖြေဆိုသည်– “ထာဝရဘုရား [ယေဟောဝါ၊ ကဘ] ဟူ၍နာမတော်ရှိသော ကိုယ်တော်တစ်ပါးတည်းသာလျှင် မြေကြီးတစ်ပြင်လုံးအပေါ်မှာ အမြင့်ဆုံးသောဘုရားဖြစ်တော်မူကြောင်းကို သိကြပါစေသော။”—ဆာလံ ၈၃:၁၈။

ဤလောက အဆုံးတိုင်သည့်အခါ ကပ်ကျော်သူများ ရှိမည်လော။ “ဤလောကနှင့် လောကီတပ်မက်ခြင်းသည် ကွယ်ပျောက်ဆဲဖြစ်၏။ ဘုရားသခင်၏အလိုတော်ကို ဆောင်ရွက်သောသူမူကား နိစ္စထာဝရတည်၏” ဟုကျမ်းစာကဆိုထားသည်။ (၁ ယောဟန် ၂:၁၇၊ သမ္မာ) ဤကပ်ကျော်သူများသည် မည်သည့်နေရာတွင် ထာဝစဉ်နေထိုင်ကြမည်နည်း။ “ဖြောင့်မတ်သောသူတို့သည် ပြည်တော် [မြေကြီး၊ ကဘ] ကိုအမွေခံ၍ အစဉ်အမြဲနေရကြလိမ့်မည်” ဟု ကျမ်းစာက အဖြေပေးသည်။—ဆာလံ ၃၇:၉-၁၁၊ ၂၉; သု. ၂:၂၁၊ ၂၂။

ဘုရားသခင့်ကမ္ဘာသစ်တွင် “သေဘေးမရှိရ၊ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိ။” (ဗျာဒိတ် ၂၁:၄) ရာဇဝတ်မှု၊ ဆင်းရဲနွမ်းပါးမှု၊ ဆာလောင်မွတ်သိပ်မှု၊ ဖျားနာမှု၊ ဝမ်းနည်းပူဆွေးမှုနှင့် သေခြင်းတို့ ရှိတော့မည်မဟုတ်! လူသေများပင် ပြန်အသက်ရှင်လာကြမည်တည်း! “သေခြင်းမှ ထမြောက်ကြလိမ့်မည်။” (တမန်တော် ၂၄:၁၅) မြေကြီးကိုယ်နှိုက်သည် ပကတိပရဒိသုတစ်ခုအဖြစ်သို့ ပြောင်းလဲသွားမည်။—ဟေရှာယ ၃၅:၁၊ ၂; လုကာ ၂၃:၄၃။

ဘုရားသခင့်ကမ္ဘာသစ်တွင် ဝင်စားလိုလျှင် ကျွန်ုပ်တို့ဘာလုပ်ရမည်နည်း။ ယေရှုဤသို့ မိန့်ဆိုခဲ့သည်– “ထာဝရအသက်ဟူမူကား မှန်သောဘုရားသခင်တစ်ဆူတည်းဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း သိကျွမ်းခြင်းတည်း။” (ယောဟန် ၁၇:၃) ကမ္ဘာတစ်ဝန်းရှိ သန်းပေါင်းများစွာသော နှလုံးရိုးဖြောင့်သူများသည် ဤအသိပညာကို ရယူနေကြသည်။ ယင်းက ကိုယ်ရေးကိုယ်တာပြဿနာများကို ယခုပင်ဖြေရှင်းစေနိုင်သည့်အပြင် ပို၍အရေးကြီးသည်ကား မိမိတို့၏အစွမ်းဖြင့် ဖြေရှင်း၍မရနိုင်သော ပြဿနာများကို ဘုရားသခင့်ကမ္ဘာသစ်တွင် လုံးလုံးလျားလျားပပျောက်စေမည်ဟူသည့် အပြည့်အဝယုံကြည်စိတ်ချမှုကို ရရှိစေသည်။

[Picture Credit Line on page 2]

WHO photo by P. Almasy

[Picture Credit Line on page 3]

Jerden Bouman/Sipa Press