ဘုရားသခင့်မိတ်ဆွေများကား မည်သူတို့နည်း

ယေရှုခရစ်သည် ယေဟောဝါ၏သားတော်ဖြစ်ပြီး ကိုယ်တော်၏အရင်းနှီးဆုံး၊ အမြတ်နိုးဆုံးမိတ်ဆွေဖြစ်၏။ ယေရှုသည် လူသားတစ်ဦးအဖြစ် မြေကြီးပေါ်မနေထိုင်မီက တန်ခိုးကြီးသောနာမ်ဝိညာဉ်သတ္တဝါတစ်ပါးအဖြစ် ကောင်းကင်တွင်နေထိုင်ခဲ့သည်။ (ယောဟန် ၁၇:၅) ထို့နောက် မြေကြီးပေါ်ကြွလာ၍ ဘုရားသခင်နှင့်ပတ်သက်သောအမှန်တရားကို လူတို့အားသွန်သင်ပေးသည်။ (ယောဟန် ၁၈:၃၇) နာခံသည့်လူသားများကို အပြစ်နှင့်သေခြင်းမှကယ်တင်ရန် မိမိ၏လူသားအသက်ကိုလည်းစွန့်ခဲ့သည်။ (ရောမ ၆:၂၃) ယခု ယေရှုသည် မြေကြီးကိုပရဒိသုဖြစ်စေမည့် ကောင်းကင်အစိုးရတည်းဟူသော ဘုရားသခင့်နိုင်ငံတော်၏ဘုရင်ဖြစ်၏။—ဗျာဒိတ် ၁၉:၁၆။

ကောင်းကင်တမန်များသည်လည်း ဘုရားသခင့်မိတ်ဆွေများဖြစ်ကြသည်။ ကောင်းကင်တမန်များသည် လူသားများကဲ့သို့ မြေကြီးပေါ်အသက်စတင်ခဲ့ခြင်းမဟုတ်ပါ။ ဘုရားသခင်သည် မြေကြီးကိုမဖန်ဆင်းမီ သူတို့ကိုကောင်းကင်၌ဖန်ဆင်းခဲ့သည်။ (ယောဘ ၃၈:၄-၇) ကောင်းကင်တမန် သန်းပေါင်းများစွာရှိ၏။ (ဒံယေလ ၇:၁၀) ဘုရားသခင်၏ ဤကောင်းကင်ဆိုင်ရာမိတ်ဆွေများသည် ယေဟောဝါနှင့်ပတ်သက်သောအမှန်တရားကို လူတို့အားသင်ယူစေလိုကြသည်။—ဗျာဒိတ် ၁၄:၆၊ ၇။

မြေကြီးပေါ်၌လည်း ဘုရားသခင့်မိတ်ဆွေများရှိကြသည်; သူတို့ကို မိမိ၏သက်သေများဟု ကိုယ်တော်ခေါ်ဆို၏။ တရားရုံးရှိသက်သေတစ်ဦးသည် တစ်စုံတစ်ဦး သို့မဟုတ် တစ်စုံတစ်ရာနှင့်ပတ်သက်၍ သူသိရှိထားရာကိုထွက်ဆိုသည်။ ယေဟောဝါသက်သေများသည် ယေဟောဝါနှင့် ကိုယ်တော်၏ရည်ရွယ်ချက်နှင့်စပ်လျဉ်း၍ သူတို့သိရှိထားရာကို သူတစ်ပါးအားပြောပြကြသည်။ (ဟေရှာယ ၄၃:၁၀) သက်သေခံများသည် ကောင်းကင်တမန်များကဲ့သို့ပင် ယေဟောဝါနှင့်ပတ်သက်သောအမှန်တရားကို လေ့လာသင်ယူရာတွင် သင့်အားကူညီပေးလိုကြသည်။ သူတို့က သင့်ကိုလည်း ဘုရားသခင့်မိတ်ဆွေဖြစ်စေလိုကြ၏။