အခန်း ခုနစ်

ဆိုးယုတ်မှုကို ဘုရားသခင် ခွင့်ပြုထားခြင်းမှ ကျွန်ုပ်တို့ သိရှိရသည့် အရာများ

၁၊ ၂။ (က) ဧဒင်ဥယျာဉ်တွင် သူပုန်များကို ယေဟောဝါ ချက်ချင်း ကွပ်မျက်ခဲ့ပါက ကျွန်ုပ်တို့အား မည်သို့ ထိခိုက်ခဲ့မည်နည်း။ (ခ) ကျွန်ုပ်တို့အတွက် အဘယ် မေတ္တာပြည့်ဝသည့် အစီအစဉ်များကို ယေဟောဝါ စီစဉ်တော်မူခဲ့သနည်း။

“ကျွန်တော် အသက်ရှင်သောနှစ်ပေါင်း နည်း၍ ဆိုးပါ၏” ဟူ၍ ဘိုးဘေး ယာကုပ်က ဆို၏။ (ကမ္ဘာဦး ၄၇:၉) အလားတူစွာ ယောဘကလည်း လူသည် “အသက်တို၍ ဒုက္ခနှင့်ပြည့်စုံပါ၏” ဟုဆိုခဲ့သည်။ (ယောဘ ၁၄:၁) သူတို့ကဲ့သို့ပင် ကျွန်ုပ်တို့အများသည်လည်း အခက်အခဲများ၊ မတရားမှုများသာမက ကြေကွဲဖွယ်ရာဖြစ်ရပ်များကို တွေ့ကြုံရကြ၏။ သို့ပင်ငြားလည်း ကျွန်ုပ်တို့ လူအဖြစ် မွေးဖွားလာရခြင်းမှာ ဘုရားသခင်ဘက်မှ မတရားသောကြောင့် မဟုတ်ပါ။ ကျွန်ုပ်တို့၌ အာဒံနှင့်ဧဝတို့ မူလကရှိခဲ့ကြသည့် စုံလင်သောကိုယ်စိတ်နှင့် ပရဒိသုစံအိမ် မရှိသည်မှာ မှန်ပါသည်။ ပုန်ကန်သည်နှင့် သူတို့ကို ယေဟောဝါ ချက်ချင်း ကွပ်မျက်လိုက်ပါက မည်သို့ရှိမည်နည်း။ ဖျားနာမှု၊ ဝမ်းနည်းကြေကွဲမှု သို့မဟုတ် သေခြင်း ရှိမည်မဟုတ်သကဲ့သို့ လူသားမျိုးနွယ်ဟူ၍လည်း ရှိမည်မဟုတ်ချေ။ ကျွန်ုပ်တို့လည်း လူဖြစ်လာကြမည်မဟုတ်။ သို့သော် ကလေးများ၌ မစုံလင်မှုအမွေကို ဆက်ခံရရှိကြမည် ဖြစ်စေကာမူ ဘုရားသခင်သည် အာဒံနှင့်ဧဝတို့အား သားသမီးများ မွေးဖွားရန် သက်ညှာစွာဖြင့် ခွင့်ပြုတော်မူခဲ့၏။ ယေဟောဝါသည် ခရစ်တော်မှတစ်ဆင့် အာဒံဆုံးရှုံးခဲ့ရာ—ပရဒိသုမြေကြီးပေါ်တွင် ထာဝစဉ်အသက်ရှင်ခြင်း—ကို ပြန်လည်ရရှိရန် ပြင်ဆင်ပေးတော်မူ၏။—ယောဟန် ၁၀:၁၀; ရောမ ၅:၁၂။

^၂ ဖျားနာခြင်း၊ ဝမ်းနည်းခြင်း၊ နာကျင်ခြင်းနှင့် သေခြင်းမှစ၍ လူဆိုးလူမိုက်များနှင့် ကင်းဝေးသည့် ပရဒိသု ပတ်ဝန်းကျင်မျိုးရှိသည့် ကမ္ဘာသစ်တွင် ထာဝစဉ် အသက်ရှင်ခြင်းကို မျှော်လင့်နိုင်ခြင်းသည် အားတက်ဖွယ်ကောင်းလေစွ! (သုတ္တံ ၂:၂၁၊ ၂၂; ဗျာဒိတ် ၂၁:၄၊ ၅) သို့သော် သမ္မာကျမ်းစာ မှတ်တမ်းအရ ကျွန်ုပ်တို့ကိုယ်တိုင် ကယ်တင်ခံရခြင်းသည် ကျွန်ုပ်တို့အဖို့နှင့် ယေဟောဝါအဖို့ အလွန် အရေးကြီးသော်လည်း သာ၍အရေးကြီးသည့် အရာတစ်ခု အကျုံးဝင်ပတ်သက်လျက်ရှိကြောင်း ကျွန်ုပ်တို့ သိရှိရသည်။

မဟာနာမတော်မြတ်ကိုထောက်၍

၃။ ကမ္ဘာမြေကြီးနှင့် လူသားတို့အတွက် ယေဟောဝါ၏ ရည်ရွယ်ချက် ပြည့်စုံခြင်းနှင့် မည်သည့်အရာ ဆက်နွှယ်ပတ်သက်လျက် ရှိသနည်း။

^၃ ဘုရားသခင့် နာမတော်သည် ကမ္ဘာမြေကြီးနှင့် လူသားတို့အတွက် ကိုယ်တော်ထားရှိသည့် ရည်ရွယ်ချက် ပြည့်စုံခြင်းနှင့် ဆက်နွှယ်ပတ်သက်လျက်ရှိသည်။ ထိုနာမတော် ယေဟောဝါသည် “ကိုယ်တော် ဖြစ်လာစေသည်” ဟူ၍အဓိပ္ပာယ်ရှိသည်။ ထို့ကြောင့် ကိုယ်တော့်နာမတော်၌ စကြဝဠာ အာဏာပိုင်၊ ရည်ရွယ်ရှင်နှင့် အမှန်တရားဆိုင်ရာ ဘုရားသခင်ဟူသော ကိုယ်တော့် ဂုဏ်သိက္ခာ အကျုံးဝင်ပတ်သက်နေသည်။ ယေဟောဝါ၏ ရာထူးကြောင့် စကြဝဠာတစ်ခုလုံး၏ ငြိမ်းချမ်းရေးနှင့် ကောင်းကျိုးချမ်းသာသည် ကိုယ်တော့်နာမတော်နှင့် နာမတော်၏ အကျုံးဝင်ပတ်သက်သမျှတို့ကို ထိုက်ထိုက်တန်တန် အပြည့်အဝ ရိုသေလေးစားခြင်း၊ ကိုယ်တော်ကို သက်ရှိခပ်သိမ်းတို့ နာခံခြင်းအပေါ် မူတည်နေပါသည်။

၄။ ကမ္ဘာမြေကြီးအတွက် ဘုရားသခင့် ရည်ရွယ်ချက်တွင် အဘယ်အရာ ပါဝင်ခဲ့သနည်း။

^၄ ယေဟောဝါသည် အာဒံနှင့်ဧဝတို့ကို ဖန်ဆင်းပြီးနောက် သူတို့ထမ်းဆောင်ရန် တာဝန်တစ်ရပ် အပ်ပေးတော်မူ၏။ မိမိ၏ရည်ရွယ်ချက်မှာ မြေကြီးတစ်ပြင်လုံးကို နိုင်နင်းခြင်းအားဖြင့် ပရဒိသု၏ နယ်နိမိတ်ကို တိုးချဲ့သွားရန်မျှသာမဟုတ်ဘဲ သူတို့၏ သားစဉ်မြေးဆက်များဖြင့် ပြည့်စေရန်ဖြစ်ကြောင်း ကိုယ်တော် ရှင်းလင်းစွာ ဖော်ပြတော်မူခဲ့၏။ (ကမ္ဘာဦး ၁:၂၈) သူတို့၏အပြစ်ကြောင့် ဤရည်ရွယ်ချက် ပျက်ရတော့မည်လော။ ဤကမ္ဘာမြေနှင့် လူသားတို့အတွက် ထားရှိသည့်ရည်ရွယ်ချက်ကို အကောင်အထည် မဖော်နိုင်ပါက အနန္တတန်ခိုးရှင် ယေဟောဝါ၏ နာမတော် အသရေ ပျက်ရလတ္တံ့!

၅။ (က) ကနဦးလူသားတို့သည် ကောင်းမကောင်း သိကျွမ်းရာအပင်၏ အသီးကို စားပါက အဘယ်အချိန်တွင် သေရမည်နည်း။ (ခ) ယေဟောဝါသည် မြေကြီးနှင့်ပတ်သက်သည့် မိမိ၏ရည်ရွယ်ချက်ကို တစ်ဖက်တွင် အလေးထားသော်လည်း တစ်ဖက်တွင် ကမ္ဘာဦး ၂:၁၇ မှစကားကို မည်သို့ ပြည့်စုံစေတော်မူသနည်း။

^၅ အာဒံနှင့်ဧဝတို့အနေဖြင့် နာခံမှုမရှိဘဲ ကောင်းမကောင်း သိကျွမ်းရာအပင်၏ အသီးကို စားမည်ဆိုလျှင် စားသော “နေ့၌” သေရမည်ဖြစ်ကြောင်း သူတို့အား ယေဟောဝါ သတိပေးထားတော်မူ၏။ (ကမ္ဘာဦး ၂:၁၇) မိန့်တော်မူသည့်အတိုင်း ယေဟောဝါသည် သူတို့ကို အပြစ်ပြုသည့်နေ့၌ပင် ပြစ်တင်ရှုတ်ချ၍ သေဒဏ်စီရင်ချက် ချတော်မူခဲ့၏။ ဘုရားသခင့် ရှုထောင့်မှကြည့်လျှင် အာဒံနှင့်ဧဝတို့သည် ထိုနေ့၌ပင် သေဆုံးသွားကြသည်။ သို့သော်၊ ယေဟောဝါသည် ကမ္ဘာနှင့်ပတ်သက်သည့် မိမိရည်ရွယ်ချက်ကို ဖော်ဆောင်ရန်အတွက် ကိုယ်ကာယအားဖြင့် သူတို့မသေဆုံးမီ မိသားစုတစ်စု မွေးဖွားရန် ခွင့်ပြုတော်မူခဲ့၏။ မည်သို့ပင်ဖြစ်စေ၊ ဘုရားသခင်သည် နှစ်ပေါင်း ၁,၀၀၀ ကို တစ်ရက်ကဲ့သို့ မှတ်ယူနိုင်သည်ဖြစ်ရာ အာဒံ အသက် ၉၃၀ တွင် သေဆုံးသည့်အခါ၌ “တစ်ရက်” အတွင်း၌ပင်ဖြစ်သည်။ (၂ ပေတရု ၃:၈; ကမ္ဘာဦး ၅:၃-၅) ဤသို့ဖြင့် အပြစ်ဒဏ်စီရင်သည့် အချိန်နှင့်စပ်လျဉ်း၍ ယေဟောဝါ၏ မှန်ကန်တိကျမှု ပေါ်လွင်ထင်ရှားခဲ့သည့်အပြင် ကမ္ဘာနှင့်ပတ်သက်သည့် ရည်ရွယ်ချက်သည်လည်း သူတို့၏သေခြင်းကြောင့် ပျက်ပြားသွားခြင်း မရှိခဲ့ချေ။ သို့သော် ဆိုးယုတ်သူများအပါအဝင် မစုံလင်သည့်လူတို့သည် အခိုက်အတန့်အားဖြင့် အသက်ရှင်ခွင့် ရရှိခဲ့ကြသည်။

၆၊ ၇။ (က) ထွက်မြောက်ရာ ၉:၁၅၊ ၁၆ အရ ဆိုးယုတ်မှုကို ယေဟောဝါ အဘယ်ကြောင့် အခိုက်အတန့် ခွင့်ပြုထားခြင်းဖြစ်သနည်း။ (ခ) ဖာရော၏သာဓက၌ ယေဟောဝါ၏တန်ခိုးတော် မည်သို့ထင်ရှားခဲ့သနည်း။ နာမတော်လည်း မည်သို့ ကျော်စောခဲ့သနည်း။ (ဂ) လက်ရှိ ဆိုးယုတ်သည့်စနစ် ကုန်ဆုံးသည့်အခါ၌ အဘယ်အကျိုးရလဒ် ဖြစ်ထွန်းမည်နည်း။

^၆ မောရှေလက်ထက်၌ အီဂျစ်ပြည့်ရှင်အား ယေဟောဝါ မိန့်ဆိုခဲ့သည်စကားကလည်း ဆိုးယုတ်သူတို့ကို ဘုရားသခင် ခွင့်ပြုခဲ့ရသည့်အကြောင်းရင်းကို ဖော်ပြသည်။ ဣသရေလ အမျိုးသားများအား အီဂျစ်ပြည်မှ ထွက်ခွာခြင်းကို ဖာရော တားမြစ်သည့်အခါ၌ ယေဟောဝါက သူ့ကို ချက်ချင်း မဖျက်ဆီးခဲ့ချေ။ အီဂျစ်ပြည်ပေါ်သို့ ကပ်ဘေးကြီးဆယ်ခု ကျရောက်စေခြင်းအားဖြင့် ယေဟောဝါ၏ တန်ခိုးတော်ကို အံ့ဖွယ်ကောင်းသောနည်းများဖြင့် ပြသတော်မူခဲ့၏။ သတ္တမမြောက် ကပ်ဘေးကြီးအကြောင်း သတိပေးသည့်အခါ၌ ယေဟောဝါက ဖာရောနှင့် သူ၏လူမျိုးကို ကမ္ဘာမြေပြင်ပေါ်မှ လွယ်လင့်တကူ ဖယ်ရှားပစ်နိုင်ကြောင်း ဖာရောအား မိန့်တော်မူခဲ့သည်။ “သင့်အား ငါ့တန်ခိုးကို ပြခြင်းငှာလည်းကောင်း၊ ငါ့နာမကို မြေတစ်ပြင်လုံးနှံ့ ကြေညာစေခြင်းငှာလည်းကောင်း သင့်ကိုတည်နေခွင့် ငါပေးခဲ့ပြီ” ဟု ယေဟောဝါ မိန့်တော်မူခဲ့သည်။—ထွက်မြောက်ရာ ၉:၁၅၊ ၁၆၊ သမ။

^၇ ဣသရေလလူမျိုးကို ယေဟောဝါ ကယ်လွှတ်တော်မူသည့်အခါ၌ ကိုယ်တော်၏ နာမတော်သည် အမှန်ပင် အနှံ့အပြား ကျော်စောခဲ့သည်။ (ယောရှု ၂:၁၊ ၉-၁၁) နှစ်ပေါင်း ၃,၅၀၀ နီးပါး ကြာညောင်းခဲ့ပြီဖြစ်သည့် ယနေ့တိုင်အောင် ထိုစဉ်က ကိုယ်တော် ပြုတော်မူခဲ့ရာကို လူတို့ မမေ့ကြသေးချေ။ ယေဟောဝါဟူသော ကိုယ်ပိုင်နာမတော်သာမက ထိုနာမတော်ကို ပိုင်ဆိုင်သော အရှင်နှင့်စပ်လျဉ်းသည့် အမှန်တရားပါ ကျော်ကြားပျံ့နှံ့ခဲ့သည်။ ဤအချက်က ယေဟောဝါသည် ကတိတည်သော ဘုရားသခင်၊ မိမိ၏ အစေခံများအတွက် အရေးယူ ဆောင်ရွက်တော်မူသော ဘုရားသခင်အဖြစ် ဂုဏ်သိက္ခာ မြှင့်တက်စေခဲ့သည်။ (ယောရှု ၂၃:၁၄) ကိုယ်တော်၏ အနန္တတန်ခိုးကြောင့် အဘယ်အရာကမျှ ကိုယ်တော့်ရည်ရွယ်ချက်ကို မပိတ်ဆို့ မဟန့်တားနိုင်ကြောင်း ထင်ရှားစေခဲ့သည်။ (ဟေရှာယ ၁၄:၂၄၊ ၂၇) ထို့ကြောင့် ကိုယ်တော်သည် စာတန်၏ ဆိုးယုတ်သည့် စနစ်တစ်ခုလုံးကို ဖျက်ဆီးခြင်းအားဖြင့် မိမိ၏သစ္စာရှိ အစေခံတို့၏ အကျိုးအတွက် များမကြာမီ အရေးယူဆောင်ရွက်မည့်အကြောင်း ကျွန်ုပ်တို့ စိတ်ချယုံကြည်နိုင်ပေသည်။ ထိုနည်းဖြင့် အနန္တတန်ခိုးတော်ကို ပြသလိုက်ခြင်းနှင့် ထိုသို့ပြသခြင်းမှ ယေဟောဝါ၏ နာမတော်ရရှိသည့် ကျော်ကြားမှု ဘုန်းအသရေတို့သည် ထာဝစဉ် ဥဒါန်းတွင်ရစ်သွားမည်ဖြစ်သည်။ ယင်း၏ အကျိုးကျေးဇူးများသည်လည်း အဆုံးမရှိ တည်တံ့သွားလတ္တံ့။—ယေဇကျေလ ၃၈:၂၃; ဗျာဒိတ် ၁၉:၁၊ ၂။

‘ဘုရားသခင်၏ ဉာဏ်ပညာတော်သည် အလွန်နက်နဲစွတကား!’

၈။ ပေါလုက အဘယ် အခြေခံအကြောင်းများကို စဉ်းစားသုံးသပ်ရန် ကျွန်ုပ်တို့အား တိုက်တွန်းသနည်း။

^၈ ရောမမြို့သားများထံ ရေးသားလိုက်သည့်စာတွင် တမန်တော်ပေါလုက ‘ဘုရားသခင်၌ မတရားခြင်း ရှိသလော’ ဟူသောမေးခွန်းကို ထုတ်ထားသည်။ ‘ဘယ်သောအခါမျှ ထိုသို့ မဖြစ်ပါစေနှင့်!’ ဟူ၍ သူကိုယ်တိုင်က ခိုင်မာပြတ်သားစွာ ဖြေကြားထားသည်။ ထိုနောက် သူက ဘုရားသခင်၏ ကရုဏာတော်ကို အလေးပေးဖော်ပြပြီးလျှင် ဖာရောအား အခိုက်အတန့် ဆက်၍အသက်ရှင်စေခွင့် ပြုခြင်းနှင့်ပတ်သက်၍ ယေဟောဝါ မိန့်တော်မူခဲ့သည့်စကားကို ရည်ညွှန်းကိုးကားခဲ့သည်။ ကျွန်ုပ်တို့ လူသားများသည် အိုးထိန်းသည်၏လက်၌ရှိသော ရွှံ့စေးနှင့်တူကြောင်းကိုလည်း ပေါလုက ဖော်ပြထားသည်။ ထို့နောက် ဤသို့ဆို၏– “ဘုရားသခင်သည် မိမိအမျက်တော်ကိုပြ၍၊ တန်ခိုးတော်ကို ထင်ရှားစေခြင်းငှာ အလိုတော်ရှိလျက်၊ ပျက်စီးခြင်းအဖို့ပြင်ဆင်သော အမျက်ခံရာအိုးများတို့ကို အလွန်သည်းခံခြင်းခန္တီနှင့် သည်းခံတော်မူသည်မှန်လျှင် အဘယ်ပြောဖွယ်ရှိအံ့နည်း။ ချီးမြှောက်ခြင်းအဖို့ ပြင်ဆင်တော်မူနှင့်သော ကရုဏာခံရာအိုးများတည်းဟူသော၊ ယုဒအမျိုးသားတို့အထဲမှ သာမဟုတ်၊ တစ်ပါးအမျိုးသားတို့အထဲမှ . . . ခေါ်တော်မူသောငါတို့၌ ဘုန်းအာနုဘော်တော် ကြွယ်ဝခြင်းကို ထင်ရှားစေခြင်းငှာ ပြုတော်မူသည်မှန်လျှင်၊ အဘယ်ပြောဖွယ်ရှိအံ့နည်း။”—ရောမ ၉:၁၄-၂၄။

၉။ (က) “ပျက်စီးခြင်းအတွက် ပြင်ဆင်သော အမျက်ခံရာအိုးများ” ကား အဘယ်သူများနည်း။ (ခ) ယေဟောဝါသည် ဆန့်ကျင်သူများကြားမှ အဘယ်ကြောင့် အလွန်သည်းခံတော်မူသနည်း။ အပြီးသတ်ရလဒ်သည် ကိုယ်တော့်ကို ချစ်သောသူတို့အတွက် မည်သို့ ကောင်းကျိုးဖြစ်ထွန်းမည်နည်း။

^၉ ဧဒင်၌ ပုန်ကန်ချိန်မှစ၍ ယေဟောဝါနှင့် ကိုယ်တော့် ပညတ်ဥပဒေများကို ဆန့်ကျင်သူမှန်သမျှသည် “ပျက်စီးခြင်းအဖို့ပြင်ဆင်သော အမျက်ခံရာအိုးများ” ဖြစ်ကြ၏။ ထိုအချိန်မှစ၍ ကာလတစ်လျှောက်အတွင်း ယေဟောဝါသည် သည်းခံခြင်းခန္တီကို ကျင့်သုံးတော်မူခဲ့သည်။ ဆိုးယုတ်သူတို့သည် ကိုယ်တော့်နည်းလမ်းတော်များကို ပြက်ရယ်ပြုခဲ့ကြပြီ၊ ကိုယ်တော့် အစေခံတို့ကို ညှဉ်းပန်းခဲ့ကြသည့်အပြင် ကိုယ်တော့် သားတော်ကိုပင် ကွပ်မျက်ခဲ့ကြပြီ။ ဘုရားသခင်အား ပုန်ကန်ခြင်းနှင့် ကိုယ်တော်နှင့်ကင်းကွာသည့် လူ့အုပ်ချုပ်ရေးတို့၏ ဘေးဒုက္ခကြီးသော ဆိုးကျိုးများကို ဖန်ဆင်းခံသတ္တဝါခပ်သိမ်း မျက်ဝါးထင်ထင် တွေ့မြင်စေရန် လုံလောက်သောအချိန်ကို ယေဟောဝါသည် မဟာခန္တီတော်ဖြင့် ခွင့်ပြုတော်မူခဲ့ပြီ။ တစ်ချိန်တည်းတွင် ယေရှု၏သေခြင်းသည် နာခံသောလူသားများကို ကယ်တင်ရန်အတွက်လည်းကောင်း၊ ‘မာရ်နတ်၏ အမှုတို့ကို ချေဖျက်ရန်’ အတွက်လည်းကောင်း နည်းလမ်းဖန်တီးပေးခဲ့သည်။—၁ ယောဟန် ၃:၈; ဟေဗြဲ ၂:၁၄၊ ၁၅။

၁၀။ လွန်ခဲ့သောနှစ်ပေါင်း ၁,၉၀၀ တိုင်တိုင် ဆိုးယုတ်မှုကို ယေဟောဝါ အဘယ်ကြောင့် သည်းခံတော်မူခဲ့သနည်း။

^၁၀ ယေရှု ရှင်ပြန်ထမြောက်ခဲ့ချိန်မှစ၍ နှစ်ပေါင်း ၁,၉၀၀ ကျော်အတွင်း ယေဟောဝါသည် “အမျက်ခံရာအိုးများ” ၏ပျက်စီးခြင်းကို ဆိုင်းငံ့ထားခြင်းအားဖြင့် သူတို့ကို ဆက်လက်၍ သည်းခံတော်မူခဲ့၏။ အဘယ်ကြောင့်နည်း။ တစ်ချက်အနေနှင့် ကောင်းကင်နိုင်ငံတော်တွင် ယေရှုခရစ်နှင့်အတူ ပူးပေါင်းကြမည့်သူတို့ကို အသင့်ပြင်ဆင်နေ၍ဖြစ်သည်။ ဤသူတို့သည် အရေအတွက်အားဖြင့် ၁၄၄,၀၀၀ ဖြစ်ပြီးလျှင် တမန်တော်ပေါလု ပြောဆိုသည့် “ကရုဏာခံရာအိုးများ” ဖြစ်ကြသည်။ ပထမဦးစွာ၊ ဤကောင်းကင် အတန်းအစားတွင်ပါဝင်ရန် ဂျူးလူမျိုးထဲမှ တစ်ဦးချင်းကို ဖိတ်ခေါ်ခဲ့သည်။ နောက်ပိုင်းတွင် လူမျိုးခြားတို့ထဲမှ လူတို့ကို ဖိတ်ခေါ်ခဲ့သည်။ ဤသူတို့ထဲမှ မည်သူ့ကိုမျှ မိမိအား ဝတ်ပြုရန် ယေဟောဝါ အတင်းအကျပ် ခိုင်းစေတော်မမူချေ။ သို့သော် မိမိ၏ မေတ္တာပြည့်ဝသည့် စီမံပေးရာများကို ကျေးဇူးတင်လေးမြတ်စွာ တုံ့ပြန်သူတို့ထဲမှ အချို့သူတို့အား ကောင်းကင်နိုင်ငံတော်တွင် မိမိ၏ သားတော်နှင့်အတူ တွဲဖက်အုပ်ချုပ်သူများအဖြစ် အခွင့်ထူးချီးမြှင့်တော်မူ၏။ ထိုကောင်းကင်အတန်းအစားကို ပြင်ဆင်ခြင်းသည် ယခုအခါ ပြီးစီးလုနီးနေပြီ။—လုကာ ၂၂:၂၉; ဗျာဒိတ် ၁၄:၁-၄။

၁၁။ (က) ယေဟောဝါ၏ စိတ်ရှည်တော်မူခြင်းမှ အဘယ်အုပ်စုသည် ယခု အကျိုးခံစားနေရကြသနည်း။ (ခ) သေလွန်သူများ မည်သို့ အကျိုးခံစားရကြမည်နည်း။

^၁၁ သို့သော် ကမ္ဘာပေါ်တွင် နေထိုင်ရမည့်သူတို့ကော အဘယ်အလားအလာ ရှိကြမည်နည်း။ ယေဟောဝါ၏ စိတ်ရှည်သည်းခံခြင်းကြောင့်လည်း လူမျိုးခပ်သိမ်းတို့အထဲမှ “လူအုပ်ကြီး” တစ်စုကို တစ်စည်းတစ်လုံး စုစည်းနိုင်ခဲ့သည်။ သူတို့၏ အရေအတွက်မှာ ယခုအခါ သန်းနှင့်ချီနေပေပြီ။ ဤမြေကြီးအတန်းအစားသည် ဤအစီအစဉ်စနစ်၏အဆုံးကို ကပ်ကျော်၍ ပရဒိသု မြေကြီးပေါ်တွင် ထာဝစဉ်အသက်ရှင်ခြင်း အလားအလာ ရရှိမည်ဟု ယေဟောဝါ ကတိထားတော်မူ၏။ (ဗျာဒိတ် ၇:၉၊ ၁၀; ဆာလံ ၃၇:၂၉; ယောဟန် ၁၀:၁၆) ဘုရားသခင် သတ်မှတ်ထားသည့် အချိန်ရောက်သော် သေလွန်သူ အမြောက်အမြားတို့သည် ရှင်ပြန်ထမြောက်လာပြီးလျှင် ကောင်းကင်နိုင်ငံတော်၏ မြေကြီးဆိုင်ရာ နိုင်ငံသားများဖြစ်ခြင်း အခွင့်အလမ်း ရရှိကြမည်ဖြစ်သည်။ ဘုရားသခင့် နှုတ်ကပါဌ်တော်က တမန်တော် ၂၄:၁၅ တွင် ဤသို့ တင်ကူးဖော်ပြထားသည်– “ဖြောင့်မတ်သောသူ၊ မဖြောင့်မတ်သောသူ ရှိသမျှတို့သည် သေခြင်းမှ ထမြောက်ကြလိမ့်မည်။”—ယောဟန် ၅:၂၈၊ ၂၉။

၁၂။ (က) ဆိုးယုတ်မှုကို သည်းခံခွင့်ပြုထားခြင်းမှ ယေဟောဝါအကြောင်း ကျွန်ုပ်တို့ အဘယ်အရာ သိရသနည်း။ (ခ) ဤကိစ္စများကို ယေဟောဝါ ကိုင်တွယ်ပုံနှင့်ပတ်သက်၍ သင်မည်သို့ သဘောရသနည်း။

^၁၂ ဤကိစ္စအားလုံးတွင် မတရားမှု တစ်စုံတစ်ရာ ပါရှိသလော။ မပါရှိပါ၊ အကြောင်းမှာ ဘုရားသခင်သည် ဆိုးယုတ်သူများ၊ သို့မဟုတ် “အမျက်ခံရာအိုးများ” ကိုမဖျက်ဆီးဘဲ ဆိုင်းငံ့ထားခြင်းဖြင့် မိမိ၏ ရည်ရွယ်ချက်နှင့်အညီ အခြားသူတို့ကို သနားကြင်နာခြင်း ပြတော်မူ၍ဖြစ်သည်။ ဤအချက်က ကိုယ်တော်သည် ကရုဏာမေတ္တာ မည်မျှကြီးမားကြောင်း ပြသပေသည်။ ၎င်းပြင်၊ ကိုယ်တော်၏ ရည်ရွယ်ချက် တစ်စတစ်စ အကောင်အထည် ပေါ်လာသည်ကိုတွေ့မြင်ရန် အချိန်ရရှိသဖြင့် ယေဟောဝါ ကိုယ်တော်တိုင်၏အကြောင်းကို ကျွန်ုပ်တို့ များစွာပို၍ သိရှိလာကြသည်။ ထင်ရှားပီပြင်လာသည့် ကိုယ်တော့် ဥပဓိရုပ်တော်၏ သွင်ပြင်လက္ခဏာ အမျိုးမျိုး—ကိုယ်တော်၏ တရားမျှတမှု၊ ကရုဏာတော်၊ ခန္တီတော်၊ အထူးထူးအပြားပြားသော ဉာဏ်ပညာတော်—တို့ကို ကျွန်ုပ်တို့ အံ့သြမိန်းမောကြရသည်။ စကြဝဠာ အချုပ်အခြာအာဏာ—ကိုယ်တော့် အုပ်ချုပ်ပိုင်ခွင့်—နှင့်ဆိုင်သည့် အရေးကိစ္စကြီးကို ဉာဏ်အမြော်အမြင်ရှိစွာဖြင့် ယေဟောဝါ ကိုင်တွယ်ဖြေရှင်းပုံသည် ကိုယ်တော်၏ အုပ်ချုပ်ပုံနည်းလမ်းသာလျှင် အကောင်းဆုံးဖြစ်သည် ဟူသောအချက်ကို ထောက်ခံသည့် သက်သေအဖြစ် ထာဝစဉ် တည်တံ့သွားပေမည်။ “ဘုရားသခင်၏ ကြွယ်ဝသောဉာဏ်ပညာနှင့် အသိပညာတော်သည် လွန်စွာနက်နဲလျက်၊ စီရင်တော်မူချက်များကို ရှာဖွေ၍မရ၊ နည်းလမ်းတော်များကိုလည်း နှိုက်၍မမီနိုင်ပါတကား” ဟူ၍ တမန်တော်ပေါလုနှင့်အတူ ကျွန်ုပ်တို့ ပြောဆိုကြသည်။—ရောမ ၁၁:၃၃၊ သမ။

ကျွန်ုပ်တို့၏ ဆည်းကပ်မြှုပ်နှံမှုကို ပြသရန် အခွင့်အလမ်း

၁၃။ ကိုယ်တိုင် ဆင်းရဲဒုက္ခ ကြုံတွေ့ခံရသည့်အခါ၌ ကျွန်ုပ်တို့ အဘယ်အခွင့်အလမ်း ရရှိကြသနည်း။ ပညာရှိစွာ တုံ့ပြန်ရန် အဘယ်အရာက ကူညီပေးမည်နည်း။

^၁၃ ဘုရားသခင်၏ အစေခံကျွန် များစွာတို့သည် ကိုယ်တိုင် ဒုက္ခဆင်းရဲကြုံရသည့် အခြေအနေများတွင် ရှိနေကြသည်။ ဆိုးယုတ်သူတို့ကို ဖျက်ဆီး၍ လူသားတို့ကို နဂိုအခြေအနေ ပြန်ရောက်စေမည်ဟူသော တင်ကူးဟောထားချက်အတိုင်း ဘုရားသခင် မလုပ်ဆောင်သေးသောကြောင့် သူတို့ဆက်၍ ဒုက္ခခံနေရခြင်းဖြစ်သည်။ ဤအတွက် ကျွန်ုပ်တို့ နာကြည်းသင့်သလော။ သို့မဟုတ် ထိုသို့သော အခြေအနေများကို မာရ်နတ်အား မုသာကောင်ဖြစ်ကြောင်း သက်သေထူခွင့်ရသည့် အခွင့်အလမ်းများအဖြစ် ရှုမြင်နိုင်သသော။ “ငါ့သား ပညာရှိလော့။ ကဲ့ရဲ့သောသူ၏စကားကို ငါချေနိုင်အောင် ငါ့စိတ်ကို ရွှင်လန်းစေလော့” ဟူသော မေတ္တာရပ်ခံချက်ကို စိတ်စွဲထားမည်ဆိုလျှင် ကျွန်ုပ်တို့ ထိုသို့ရှုမြင်ရန် ခွန်အားရှိလာပေမည်။ (သုတ္တံ ၂၇:၁၁) ယေဟောဝါအား ကဲ့ရဲ့သူ စာတန်က လူတို့သည် ရုပ်ပစ္စည်း ဆုံးရှုံးလျှင်၊ သို့မဟုတ် ကာယဝေဒနာ ခံရလျှင် ဘုရားသခင်ကို အပြစ်တင်ကြမည်သာမက ကျိန်ပင်ကျိန်ဆဲလိမ့်မည်ဟု အခိုင်အမာ ဆိုခဲ့သည်။ (ယောဘ ၁:၉-၁၁; ၂:၄၊ ၅) ကျွန်ုပ်တို့သည် ဆင်းရဲဒုက္ခ ကြုံရသည့်အခါ၌ သစ္စာစောင့်သိခြင်းအားဖြင့် ထိုစွပ်စွဲချက် မမှန်ကန်ကြောင်း ပြသွားခြင်းဖြင့် ယေဟောဝါ၏ နှလုံးတော်ကို ရွှင်ပြုံးစေကြသည်။

၁၄။ စုံစမ်းခြင်း ခံရသည့်အခါ ယေဟောဝါကို အားထားမည်ဆိုပါက ကျွန်ုပ်တို့ အဘယ်အကျိုးကျေးဇူးများ ရရှိနိုင်သနည်း။

^၁၄ စုံစမ်းခြင်းများကို အလူးအလဲ ခံရစဉ်တွင် ယေဟောဝါအား ယုံကြည်အားထားမည်ဆိုပါက တန်ဖိုးမဖြတ်နိုင်သည့် အရည်အသွေးများကို မွေးယူနိုင်ကြသည်။ သာဓကအနေနှင့် ယေရှုသည် ခံရသည့် ဆင်းရဲဒုက္ခများ၏ အကျိုးရလဒ်အဖြစ် မကြုံဖူးသည့်နည်းဖြင့် “နားထောင်ခြင်းကိုသင်” တော်မူ၏။ ကျွန်ုပ်တို့လည်း ခံရသည့် စုံစမ်းခြင်းများမှ စိတ်ရှည်ခြင်း၊ ခံနိုင်ရည်နှင့် ယေဟောဝါ၏ ဖြောင့်မတ်သော နည်းလမ်းတော်များကို လေးမြတ်သည့်သဘော မွေးမြူရန် သင်ယူနိုင်ပါသည်။—ဟေဗြဲ ၅:၈၊ ၉; ၁၂:၁၁; ယာကုပ် ၁:၂-၄။

၁၅။ အခက်အခဲများကို ကျွန်ုပ်တို့ ကြံ့ကြံ့ခံရပ်သွားစဉ် အခြားသူများ အဘယ်သို့ အကျိုးရရှိနိုင်ဖွယ်ရှိသနည်း။

^၁၅ ကျွန်ုပ်တို့ လုပ်သမျှကို အခြားသူတို့က မျက်ခြည်မပြတ် စောင့်ကြည့်နေကြမည်။ ဖြောင့်မတ်ခြင်းကို ချစ်မြတ်နိုးသည့်အတွက် ကျွန်ုပ်တို့ ခံရသမျှကိုထောက်၍ ထိုသူတို့အထဲမှ အချို့တို့သည် ယခုခေတ်တွင် စစ်မှန်သည့် ခရစ်ယာန်များကား မည်သူတို့ဖြစ်ကြောင်း တဖြည်းဖြည်းနှင့် သိမြင်လာဖွယ်ရှိသည်။ ဤသူတို့သည် ကျွန်ုပ်တို့နှင့်အတူ စည်းလုံးစွာ ကိုးကွယ်ဝတ်ပြုခြင်းအားဖြင့် ထာဝရအသက် ကောင်းချီးများကို ခံစားနိုင်ပေသည်။ (မဿဲ ၂၅:၃၄-၃၆၊ ၄၀၊ ၄၆) ယေဟောဝါနှင့် သားတော်တို့သည် ထိုအခွင့်အလမ်းကို လူတို့ရယူရန် လိုလားတော်မူ၏။

၁၆။ ကိုယ်တိုင် ဆင်းရဲဒုက္ခ ကြုံရခြင်းနှင့်ပတ်သက်သည့် ကျွန်ုပ်တို့၏ သဘောထားသည် စည်းလုံးညီညွတ်ခြင်းကိစ္စနှင့် မည်သို့ ဆက်စပ်နေသနည်း။

^၁၆ ခက်ခဲသော အခြေအနေများကိုပင် ယေဟောဝါအား ဆည်းကပ်မြှုပ်နှံကြောင်း ပြသနိုင်သည့် အခွင့်အလမ်းများ အဖြစ်လည်းကောင်း၊ ကိုယ်တော့်အလိုတော် အထမြောက်ရေးတွင် တစ်တပ်တစ်အား ပါဝင်ရသည့် အခွင့်အလမ်း အဖြစ်လည်းကောင်း ရှုမြင်လျှင် အလွန်ကောင်းပေစွ! ဤသို့ပြုခြင်းဖြင့် ကျွန်ုပ်တို့သည် ဘုရားသခင်နှင့် ခရစ်တော်တို့နှင့်အတူ စည်းလုံးညီညွတ်ခြင်းသို့ ဦးတည်ရွေ့လျားနေကြောင်း ထင်ရှားစွာပြသနိုင်ပေသည်။ ယေရှုက ခရစ်ယာန်စစ်အားလုံးအတွက် ယေဟောဝါထံ ဆုတောင်းရာ၌ ဤသို့ဆို၏– “ထိုသူတို့ [ကိုယ်တော်၏ ရင်းနှီးသော တပည့်တော်များ] အဖို့ကိုသာ အကျွန်ုပ် ဆုတောင်းသည်မဟုတ်ပါ။ သူတို့ဟောပြောခြင်းအားဖြင့် အကျွန်ုပ်ကို ယုံကြည်သောသူတို့အဖို့ကိုလည်း ဆုတောင်းပါ၏။ ကိုယ်တော်သည် အကျွန်ုပ်ကို စေလွှတ်တော်မူသည်ကို လောကီသားတို့သည် ယုံကြမည်အကြောင်း၊ ထိုသူအပေါင်းတို့သည် တစ်လုံးတစ်ဝတည်းဖြစ်လျက်၊ အဘ၊ ကိုယ်တော်သည် အကျွန်ုပ်၌ရှိတော်မူ၍ အကျွန်ုပ်သည်လည်း ကိုယ်တော်၌ရှိသကဲ့သို့၊ ထိုသူအပေါင်းတို့သည် ငါတို့၌ တစ်လုံးတစ်ဝတည်း ဖြစ်စေခြင်းငှာ ဆုတောင်းပါ၏။”—ယောဟန် ၁၇:၂၀၊ ၂၁။

၁၇။ ယေဟောဝါအပေါ် ကျေးဇူးသစ္စာ စောင့်သိမည်ဆိုပါက အဘယ် ယုံကြည်စိတ်ချမှု ရှိနိုင်သနည်း။

^၁၇ ယေဟောဝါအပေါ် ကျေးဇူးသစ္စာ စောင့်သိမည်ဆိုလျှင် ကျွန်ုပ်တို့ကို ရက်ရောစွာ ဆုချတော်မူမည်။ “သင်တို့ ဆောင်ရွက်မှုသည် အရှင်ဘုရား၌ အကျိုးမဲ့ မဟုတ်ကြောင်းကို သိသဖြင့် တည်ကြည်လျက်၊ ခိုင်ခံ့လျက် အရှင်ဘုရားအမှုတော်ကို အစဉ်ကြိုးစားလျက် နေကြလော့” ဟူ၍ နှုတ်ကပါဌ်တော်က ဆိုထား၏။ (၁ ကောရိန္သု ၁၅:၅၈၊ သမ) “နာမတော်ကိုထောက်၍ သင်တို့ပြသော မေတ္တာကျေးဇူးနှင့် ကိုယ်ကျင့်များကို မေ့လျော့ရန် ဘုရားသခင်သည် ဖြောင့်မတ်ခြင်း ကင်းတော်မူသည်မဟုတ်” ဟူ၍လည်း ဆိုထားသေးသည်။ (ဟေဗြဲ ၆:၁၀၊ သမ) “ခံနိုင်ရည်ရှိသောသူတို့ကို ပျော်ရွှင်သူများဟူ၍ ငါတို့ခေါ်ကြ၏။ ယောဘ၏ ခံနိုင်ရည်အကြောင်းကို သင်တို့ ကြားသိခဲ့ရကြပြီ။ ယေဟောဝါ ပေးသနားသည့် အကျိုးရလဒ်ကိုလည်း သင်တို့ တွေ့မြင်ခဲ့ရကြပြီ။ ယေဟောဝါသည် အလွန် သနားကြင်နာ စုံမက်တော်မူ၍ ကရုဏာတော်နှင့် ပြည့်စုံတော်မူသောကြောင့်တည်း” ဟူ၍ ယာကုပ် ၅:၁၁ (ကဘ) ၌ရေးမှတ်ထားသည်။ ယောဘအဖို့ အကျိုးရလဒ်ကား အဘယ်နည်း။ “ထာဝရဘုရားသည် ယောဘအား အစက ကောင်းချီးပေးတော်မူသည်ထက် အဆုံး၌ သာ၍ပေးတော်မူ” ၏။ (ယောဘ ၄၂:၁၀-၁၆၊ သမ္မာ) မှန်ပါသည်၊ ယေဟောဝါသည် “မိမိကို စိတ်အားထက်သန်စွာ ရှာသောသူတို့အား ဆုချီးမြှင့်တော်မူသောအရှင်” ဖြစ်၏။ (ဟေဗြဲ ၁၁:၆၊ ကဘ) ကျွန်ုပ်တို့ မျှော်လင့်နိုင်သည့် ဆုကျေးဇူးမှာ ပရဒိသု မြေကြီးပေါ်တွင် ထာဝစဉ်အသက်ရှင်ခြင်း ပင်တည်း!

၁၈။ ကျွန်ုပ်တို့၌ ရှိကောင်းရှိမည့် မည်သည့် နာကြည်းဖွယ် အမှတ်ရစရာမဆိုသည် နောက်ဆုံးတွင် မည်သို့ ဖြစ်သွားမည်နည်း။

^၁၈ လွန်ခဲ့သည့် နှစ်ထောင်ပေါင်းများစွာအတွင်း လူ့မိသားစုကြီးအပေါ် သက်ရောက်ခဲ့သည့် ထိခိုက်ပျက်စီးမှု မှန်သမျှကို ဘုရားသခင့် နိုင်ငံတော်အုပ်ချုပ်မှုက ပယ်ရှင်းပစ်မည်။ ထိုအချိန်တွင် ခံစားရသည့် ဝမ်းမြောက်ရွှင်လန်းမှုသည် ယခု ခံစားရသော မည်သည့် ဆင်းရဲဒုက္ခထက်မဆို ပို၍ အလေးသာမည်ဖြစ်သည်။ အတိတ်က ခံစားခဲ့ရသည့် ဆင်းရဲဒုက္ခ၏ မည်သည့်အရိပ်မည်းကြီးကမျှ ကျွန်ုပ်တို့ကို ခြောက်လှန့်တော့မည်မဟုတ်။ ကမ္ဘာသစ်တွင် သာမန်ကိစ္စများဖြစ်သည့် ဆောက်တည်မှုပြုသော အကြံအစည်များနှင့် လုပ်ဆောင်မှုများက နာကြည်းဖွယ် အမှတ်ရစရာများကို တဖြည်းဖြည်း ပယ်ဖျက်ပစ်မည်ဖြစ်သည်။ “မိုးကောင်းကင်သစ် [လူသားများအပေါ် အုပ်ချုပ်မည့် ကောင်းကင်နိုင်ငံတော် အစိုးရသစ်] နှင့် မြေကြီးသစ် [ဖြောင့်မတ်သော လူ့ဘောင်အဖွဲ့အစည်း] ကို ငါဖန်ဆင်း၍ ရှေးဟောင်းနှောင်းဖြစ်များကို သတိရတော့မည်မဟုတ်၊ နှလုံးထဲ၌လည်း ပေါ်လာတော့မည်မဟုတ်။ အသင်လူမျိုးတို့ အားရဝမ်းမြောက်ကြလော့၊ ငါဖန်ဆင်းဆဲရှိသော အရာကြောင့် အစဉ်အမြဲ ရွှင်လန်းကြလော့” ဟူ၍ ယေဟောဝါ ကြေညာထားတော်မူ၏။ မှန်ပါသည်၊ ယေဟောဝါ၏ ကမ္ဘာသစ်တွင် ဖြောင့်မတ်သောသူတို့သည် ဤသို့ပြောဆိုနိုင်ကြပေမည်– “မြေတစ်ပြင်လုံးသည် ငြိမ်သက်အေးချမ်းလျက်၊ ဆူပူနှောင့်ယှက်ခြင်းကင်းလျက် ရှိ၏။ လူတို့သည် ရွှင်လန်းသော ကြွေးကြော်သံများနှင့် ရွှင်ပျမြူးထူးလျက် ရှိကြ၏။”—ဟေရှာယ ၁၄:၇; ၆၅:၁၇၊ ၁၈၊ ကဘ။

ပြန်လည်သုံးသပ်ဆွေးနွေးခြင်း

• မကောင်းမှု ဒုစရိုက်ကို ခွင့်ပြုထားဆဲတွင် ယေဟောဝါက မိမိ၏နာမတော်ကို အထူးလေးစားကြောင်း မည်သို့ မှန်ကန်စွာ ပြသတော်မူသနည်း။

• “အမျက်ခံရာအိုးများ” ကို ဘုရားသခင် သည်းခံခြင်းအားဖြင့် ကျွန်ုပ်တို့တိုင်အောင် ကရုဏာတော်ကို မည်သို့ သက်ရောက်စေတော်မူသနည်း။

• ကိုယ်တိုင် ဒုက္ခဆင်းရဲ ကြုံရသည့် အခြေအနေများ၌ အဘယ်အရာကို တွေ့မြင်ရန် အားထုတ်သင့်သနည်း။