“အခြားသောအမှုအရာထက်မက အချင်းချင်း အားကြီးသောချစ်ခြင်းမေတ္တာ ရှိကြလော့”

“ခပ်သိမ်းသောအမှုအရာတို့သည် အဆုံးသို့ရောက်လုသည်ဖြစ်သောကြောင့် . . . အခြားသောအမှုအရာ ထက်မက အချင်းချင်း အားကြီးသောချစ်ခြင်းမေတ္တာ ရှိကြလော့။”—၁ ပေတရု ၄:၇၊ ၈။

တမန်တော်များနှင့်အတူရှိခဲ့သော နောက်ဆုံးနာရီအနည်းငယ်သည် အလွန်တန်ဖိုးရှိကြောင်း ယေရှုသိတော်မူ၏။ တမန်တော်များရှေ့တွင်ရှိသည့်အရာကို ကိုယ်တော်သိထားသည်။ သူတို့သည် ကြီးမားသောလုပ်ငန်းကို ပြီးမြောက်အောင် ဆောင်ရွက်ရမည်၊ သို့သော် ကိုယ်တော်ကဲ့သို့ပင် သူတို့လည်း မုန်းတီးခြင်း၊ နှိပ်စက်ညှဉ်းပန်းခြင်းတို့ ခံရကြမည်။ (ယောဟန် ၁၅:၁၈-၂၀) သူတို့နှင့်အတူရှိခဲ့သော ထိုနောက်ဆုံးညတွင် “အချင်းချင်း ချစ်ကြ” ရန် တစ်ကြိမ်ထက်မက ကိုယ်တော်သတိပေးခဲ့သည်။—ယောဟန် ၁၃:၃၄၊ ၃၅; ၁၅:၁၂၊ ၁၃၊ ၁၇။

^၂ ထိုညတွင်ရှိခဲ့သော တမန်တော်ပေတရုသည် ဆိုလိုရင်းကို သဘောပေါက်ခဲ့သည်။ နှစ်များစွာ ကုန်လွန်ပြီးနောက် ယေရုရှလင်မြို့ မပျက်စီးမီအချိန်လေးတွင် ရေးသားခဲ့သော ပေတရု၏စာတွင် ချစ်ခြင်းမေတ္တာ၏ အရေးကြီးမှုကို အလေးပေးဖော်ပြခဲ့သည်။ ခရစ်ယာန်များကို သူဤသို့ဆုံးမခဲ့၏– “ခပ်သိမ်းသောအမှုအရာတို့သည် အဆုံးသို့ရောက်လုသည်ဖြစ်သောကြောင့် . . . အခြားသောအမှုအရာထက်မက အချင်းချင်း အားကြီးသောချစ်ခြင်းမေတ္တာ ရှိကြလော့။” (၁ ပေတရု ၄:၇၊ ၈) ပေတရု၏စကားများသည် ဤအစီအစဉ်စနစ်၏ “နောက်ဆုံးသောနေ့ရက်များ” အတွင်းအသက်ရှင်နေသူတို့အတွက် အထူးအဓိပ္ပာယ်ရှိသည်။ (၂ တိမောသေ ၃:၁၊ သမ္မာ) “အားကြီးသောချစ်ခြင်းမေတ္တာ” ဟူသည် အဘယ်နည်း။ ကျွန်ုပ်တို့သည် အခြားသူများအား ထိုသို့သောမေတ္တာကိုပြသရန် အဘယ်ကြောင့် အရေးကြီးသနည်း။ ယင်းမေတ္တာကို ကျွန်ုပ်တို့ မည်သို့တင်ပြနိုင်သနည်း။

“အားကြီးသောချစ်ခြင်းမေတ္တာ”—ယင်းကားအဘယ်နည်း

^၃ မေတ္တာကို အလိုအလျောက်ပေါ်ထွက်လာသော ခံစားချက်တစ်ခုအဖြစ် လူအများစုက ယူမှတ်ကြသည်။ သို့သော် ထိုမေတ္တာမျိုးကို ပေတရု ပြောနေခြင်း မဟုတ်ပါ; အမွန်မြတ်ဆုံး မေတ္တာအကြောင်း ပြောနေခြင်းဖြစ်သည်။ ၁ ပေတရု ၄:၈ ပါ “မေတ္တာ” သည် ဂရိစကားလုံး အဂါးပေးမှ ပြန်ဆိုထားခြင်းဖြစ်သည်။ ထိုဝေါဟာရသည် မူဖြင့် ထိန်းကွပ်ခံရသည့် ကိုယ်ကျိုးစွန့်မေတ္တာကို ဆိုလိုသည်။ ကိုးကားဖော်ပြချက်တစ်ခုက ဤသို့ဆိုသည်– “အဂါးပေးမေတ္တာသည် အမိန့်ပေးခြင်းကို နာခံနိုင်သည့်အစွမ်းရှိသည်၊ အကြောင်းမှာ ယင်းသည် အဓိကအားဖြင့် စိတ်လှုပ်ရှားမှုတစ်ရပ်မဟုတ်ဘဲ လုပ်ဆောင်ခြင်းသို့ဦးတည်စေသော စိတ်ပိုင်းဖြတ်ချက်တစ်ခုဖြစ်သည်။” ကျွန်ုပ်တို့သည် ကိုယ်ကျိုးရှာတတ်သည့်ဉာဉ်ကို အမွေရရှိထားကြသောကြောင့် အချင်းချင်းချစ်ရမည်ဟူသည့် သတိပေးချက် လိုအပ်သည်၊ ဘုရားသခင်ရေးရာမူများ လမ်းညွှန်သည့်နည်းအတိုင်း ယင်းကိုတင်ပြကြသည်။—ကမ္ဘာဦး ၈:၂၁; ရောမ ၅:၁၂။

^၄ ကျွန်ုပ်တို့သည် တာဝန်အရသာ အချင်းချင်းချစ်သင့်သည်ဟု ဆိုလိုခြင်း မဟုတ်ပါ။ အဂါးပေးသည် နွေးထွေးမှု၊ စိတ်ခံစားမှုတို့ ကင်းမဲ့သည့်မေတ္တာမျိုး မဟုတ်ပါ။ ပေတရုက ကျွန်ုပ်တို့သည် “အချင်းချင်း အားကြီးသော [စာသားအရ၊ “ဆန့်ထုတ်ထားသော”] ချစ်ခြင်းမေတ္တာ” ရှိကြရမည်ဟု ဆိုခဲ့သည်။a (နိုင်ငံတော်ကြားညှပ်) သို့တိုင် ထိုသို့သောမေတ္တာပြရန် ကြိုးစားအားထုတ်မှုလိုသည်။ “အားကြီးသော” ဟူ၍ပြန်ဆိုထားသော ဂရိစကားလုံးနှင့်ပတ်သက်၍ ပညာရှင်တစ်ဦး ဤသို့ဆို၏– “အားကစားသမားတစ်ဦးသည် ပန်းဝင်ခါနီးတွင် နောက်ဆုံးအနေနှင့် အားကုန်စိုက်ထုတ်ကြိုးစားမှုကို သရုပ်ဖော်ပေးသည့်စကားဖြစ်သည်။”

^၅ သို့ဖြစ်၍ မေတ္တာပြရန်လွယ်ကူသူများအပေါ်သာ သို့မဟုတ် ရွေးချယ်ထားသော လူအနည်းငယ်အပေါ်သာ မေတ္တာပြရန် ကန့်သတ်ထား၍မရပါ။ မေတ္တာပြရန် ခက်ခဲနိုင်သည့်အချိန်တွင်ပင် ခရစ်ယာန်မေတ္တာပြခြင်းဖြင့် ကျွန်ုပ်တို့၏နှလုံးကို “ဆန့်ထုတ်” ရမည်။ (၂ ကောရိန္သု ၆:၁၁-၁၃) အားကစားသမားတစ်ဦးက သူ၏စွမ်းရည်ကို ထက်မြက်နေစေရန် လေ့ကျင့်၊ အသုံးချနေရသကဲ့သို့ပင် ဤမေတ္တာမျိုးသည် ပြုစုပျိုးထောင်ပြီး အသုံးချနေရမည့်အရာဖြစ်သည်။ ကျွန်ုပ်တို့အချင်းချင်း ထိုသို့သောမေတ္တာရှိရန် အရေးကြီးသည်။ အဘယ်ကြောင့်နည်း။ အနည်းဆုံး အကြောင်းရင်းသုံးခုကြောင့်ဖြစ်သည်။

ကျွန်ုပ်တို့သည် အဘယ်ကြောင့် အချင်းချင်းချစ်သင့်သနည်း

^၆ ဦးဆုံးအချက်မှာ “ချစ်ခြင်းမေတ္တာသည် ဘုရားသခင်နှင့်စပ်ဆိုင်” သောကြောင့်ဖြစ်သည်။ (၁ ယောဟန် ၄:၇) နှစ်လိုဖွယ် ဤအရည်အသွေး၏ မူလရင်းမြစ်ဖြစ်သော ယေဟောဝါသည် ကျွန်ုပ်တို့ကို ရှေးဦးစွာ ချစ်တော်မူ၏။ တမန်တော်ယောဟန် ဤသို့ဆို၏– “သားတော်အားဖြင့် ငါတို့သည် အသက်ရှင်စေခြင်းငှာ ဘုရားသခင်သည် တစ်ပါးတည်းသောသားတော်ကို ဤလောကသို့ စေလွှတ်တော်မူသောအရာ၌ ငါတို့ကို ချစ်တော်မူသော မေတ္တာတော်သည် ထင်ရှားလျက်ရှိ၏။” (၁ ယောဟန် ၄:၉) ဘုရားသခင့်သားတော်သည် လူသားတစ်ဦးအနေဖြင့် ဓမ္မအမှုဆောင်ရွက်ကာ ညှဉ်းဆဲရာနှက်တိုင်ပေါ်တွင် အသေခံရန် “စေလွှတ်” ခံခဲ့ရသည်—ယင်းတို့အားလုံးသည် ‘ကျွန်ုပ်တို့ အသက်ရရန်’ အတွက် ဖြစ်သည်။ ဘုရားသခင်၏ အမြင့်မြတ်ဆုံးသော ဤမေတ္တာကို ကျွန်ုပ်တို့ မည်သို့ တုံ့ပြန်သင့်သနည်း။ ယောဟန် ဤသို့ဆို၏– “ဘုရားသခင်သည် ငါတို့ကို ဤမျှလောက်ချစ်တော်မူသည်မှန်လျှင် ငါတို့သည်လည်း အချင်းချင်းချစ်ရကြမည်။” (၁ ယောဟန် ၄:၁၁) ယောဟန်၏ ရေးသားချက်ကို သတိပြုပါ၊ “ဘုရားသခင်သည် ငါတို့ကို ဤမျှလောက်ချစ်တော်မူသည်”—သင့် ကိုမဟုတ်ဘဲ ငါတို့ကိုဟူ၍ ဖော်ပြထားသည်။ အဓိပ္ပာယ်မှာ ရှင်းနေပါသည်– ဘုရားသခင်သည် ကျွန်ုပ်တို့၏ ဝတ်ပြုကိုးကွယ်သူချင်းများကို ချစ်တော်မူသောကြောင့် ကျွန်ုပ်တို့သည်လည်း သူတို့ကိုချစ်သင့်သည်။

^၇ ဒုတိယအချက်မှာ “ခပ်သိမ်းသောအမှုအရာတို့သည် အဆုံးသို့ရောက်လုသည်ဖြစ်သောကြောင့်” အကူအညီလိုနေသော ကျွန်ုပ်တို့၏ ညီအစ်ကိုများကို ကူညီပေးရန် ယခုအချိန်သည် အချင်းချင်းချစ်ဖို့ အထူးအရေးကြီးသောအချိန်ဖြစ်သည်။ (၁ ပေတရု ၄:၇) ကျွန်ုပ်တို့သည် “ခဲယဉ်းသောကာလ” တွင် အသက်ရှင်နေကြသည်။ (၂ တိမောသေ ၃:၁) ကမ္ဘာ့အခြေအနေများ၊ သဘာဝဘေးအန္တရာယ်များနှင့် ဆန့်ကျင်မှုများက ကျွန်ုပ်တို့ကို ခက်ခဲကျပ်တည်းစေသည်။ ခံရခက်သောအခြေအနေများအောက်တွင် ကျွန်ုပ်တို့သည် ယခင်ကထက် အချင်းချင်း ပို၍ရင်းနှီးချစ်ခင်ရန် လိုအပ်သည်။ အားကြီးသောချစ်ခြင်းမေတ္တာသည် ကျွန်ုပ်တို့ကို စည်းလုံးစေပြီး ‘အချင်းချင်း သတိပြုစေခြင်းငှာ” လှုံ့ဆော်ပေးမည်။—၁ ကောရိန္သု ၁၂:၂၅၊ ၂၆။

^၈ တတိယအချက်မှာ ကျွန်ုပ်တို့သည် စာတန်၏အမြတ်ထုတ်ခြင်း မခံရရန် ‘[စာတန်]ကိုအခွင့်မပေး’ လိုကြသောကြောင့် အချင်းချင်းချစ်ရန် လိုအပ်သည်။ (ဧဖက် ၄:၂၇) စာတန်သည် ထိမိလဲစရာအဖြစ် ယုံကြည်သူချင်းများ၏ မစုံလင်မှုများ—အားနည်းချက်များ၊ အပြစ်အနာဆာများ၊ အမှားများ—ကို အသုံးပြုရန် အကင်းပါးသူဖြစ်သည်။ မဆင်မခြင်ပြောဆိုမှု သို့မဟုတ် ကြင်နာမှုမရှိသော လုပ်ရပ်တစ်ခုက ကျွန်ုပ်တို့ကို အသင်းတော်မှ ထွက်သွားစေသလော။ (သု. ၁၂:၁၈) အချင်းချင်း အားကြီးသောချစ်ခြင်းမေတ္တာရှိမည်ဆိုလျှင် ထိုသို့ဖြစ်မည် မဟုတ်ပါ! အဆိုပါချစ်ခြင်းမေတ္တာက ဘုရားသခင့်အမှုတော်ကို “တညီတညွတ်တည်း” ငြိမ်သက်စည်းလုံးစွာ ထမ်းဆောင်နေရန် အထောက်အကူပြုသည်။—ဇေဖနိ ၃:၉။

အခြားသူများကို မေတ္တာပြနိုင်ပုံ

^၉ မေတ္တာပြခြင်းကို အိမ်တွင်စတင်ရမည်။ အချင်းချင်းချစ်ခြင်းဖြင့် မိမိ၏တပည့်စစ်များဖြစ်ကြောင်း ခွဲခြားသိမြင်ခံရမည်ဟု ယေရှုမိန့်တော်မူခဲ့သည်။ (ယောဟန် ၁၃:၃၄၊ ၃၅) မေတ္တာကို အသင်းတော်တွင်သာမက မိသားစု—အိမ်ထောင်ဖက် အချင်းချင်း၊ မိဘနှင့် သားသမီးများကြား—တွင်လည်း ထင်ရှားပြရမည်။ မိသားစုဝင်များအား မေတ္တာခံစားစေရုံဖြင့် မလုံလောက်ပါ; အပြုသဘောဆောင်သောနည်းများဖြင့် မေတ္တာကို တင်ပြရန်လိုအပ်သည်။

^၁၀ အိမ်ထောင်ဖက်များသည် အချင်းချင်းချစ်ကြောင်း မည်သို့တင်ပြနိုင်သနည်း။ ဇနီးကို မေတ္တာစစ်ဖြင့် ချစ်မြတ်နိုးသော ခင်ပွန်းတစ်ဦးသည် လူများရှေ့တွင်ဖြစ်စေ၊ လူကွယ်ရာတွင်ဖြစ်စေ ချစ်ခင်မြတ်နိုးကြောင်း စကားအားဖြင့်ဖြစ်စေ၊ အပြုအမူအားဖြင့်ဖြစ်စေ သူ့အားသိစေသည်။ ခင်ပွန်းသည် ဇနီး၏ဂုဏ်သိက္ခာကို လေးစားပြီး သူ၏အယူအဆများ၊ သဘောထားများ၊ ခံစားချက်များကို ထောက်ထားစာနာပေးသည်။ (၁ ပေတရု ၃:၇) မိမိအကျိုးထက် ဇနီးသည်၏အကျိုးကို ဦးစားပေးပြီး ရုပ်ပိုင်း၊ ဝိညာဉ်ရေးနှင့် စိတ်ပိုင်းဆိုင်ရာတို့ကို အတတ်နိုင်ဆုံး ကြည့်ရှုစောင့်ရှောက်ပေးသည်။ (ဧဖက် ၅:၂၅၊ ၂၈) ခင်ပွန်းကို အမှန်တကယ် ချစ်မြတ်နိုးသော ဇနီးတစ်ဦးသည် တစ်ခါတစ်ရံ မိမိမျှော်လင့်ထားသကဲ့သို့ ဖြစ်မလာသည့်တိုင် ခင်ပွန်းကို ‘အလွန်ရိုသေခြင်းရှိ’ မည်။ (ဧဖက် ၅:၂၂၊ ၃၃) သူသည် ခင်ပွန်းကို တရားလွန်တောင်းဆိုမည်မဟုတ်ဘဲ ဝိညာဉ်ရေးရာများကို အာရုံစိုက်လုပ်ဆောင်ရာတွင် ခင်ပွန်းနှင့် ပူးပေါင်းလုပ်ဆောင်ခြင်းဖြင့် ခင်ပွန်းအတွက် အထောက်အမနှင့် လက်အောက်ခံသူဖြစ်သည်။—ကမ္ဘာဦး ၂:၁၈; မဿဲ ၆:၃၃။

^၁၁ မိဘတို့၊ သင်တို့၏သားသမီးများကို မည်သို့ မေတ္တာပြနိုင်သနည်း။ သူတို့အတွက် ရုပ်ပိုင်းဆိုင်ရာများကို ဖြည့်ဆည်းပေးရန် တလိုတလား ကြိုးစားလုပ်ဆောင်ခြင်းသည် သင့်မေတ္တာ၏ သက်သေသာဓကဖြစ်သည်။ (၁ တိမောသေ ၅:၈) သို့သော် ကလေးများသည် အစားအစာ၊ အဝတ်အစားနှင့် နေစရာတို့ထက်မက ပိုလိုအပ်သည်။ သူတို့သည် စစ်မှန်သောဘုရားသခင်ကို ချစ်မြတ်နိုးပြီး ကိုယ်တော်ကို ဝတ်ပြုကိုးကွယ်သူများအဖြစ် ကြီးပြင်းလာစေရန် ဝိညာဉ်ရေးလေ့ကျင့်ပေးမှု လိုအပ်သည်။ (သု. ၂၂:၆) ထို့ကြောင့် ကျမ်းစာလေ့လာခြင်း၊ ဓမ္မအမှုတွင်ပါဝင်ခြင်း၊ ခရစ်ယာန် အစည်းအဝေးများ တက်ရောက်ခြင်းတို့ကို မိသားစုလိုက်လုပ်ဆောင်ရန် အချိန်သတ်မှတ်ထားဖို့လိုသည်။ (တရားဟောရာ ၆:၄-၇) ထိုလုပ်ဆောင်မှုများကို တစ်သမတ်တည်းလုပ်ဆောင်ရာတွင် အထူးသဖြင့် ဤခဲယဉ်းသောကာလတွင် အတော်အတန် ကိုယ်ကျိုးစွန့်ရန်လိုသည်။ သားသမီးများ၏ ဝိညာဉ်ရေး လိုအပ်ချက်များအတွက် သင်တို့၏ စိုးရိမ်မှုနှင့် ကြိုးစားအားထုတ်မှုတို့သည် သူတို့၏ထာဝရကောင်းကျိုးကို အမှန်စိတ်ဝင်စားကြောင်း တင်ပြသည့် မေတ္တာပါလုပ်ရပ်ဖြစ်သည်။—ယောဟန် ၁၇:၃။

^၁၂ မိဘများသည် သားသမီးများ၏ စိတ်ပိုင်းဆိုင်ရာ လိုအပ်ချက်များကို ကြည့်ရှုစောင့်ရှောက်ပေးခြင်းဖြင့်လည်း မေတ္တာပြရန် အရေးကြီးသည်။ ကလေးများသည် ထိခိုက်နာကျင်လွယ်သည်; သူတို့၏နူးညံ့သောနှလုံးသားသည် သင်တို့၏ချစ်မြတ်နိုးမှုခံရကြောင်း ယုံကြည်စိတ်ချရန် လိုအပ်သည်။ သူတို့ကို ချစ်ကြောင်းပြောပါ၊ ချစ်မြတ်နိုးမှုများ တင်ပြပါ၊ ထိုဖော်ပြချက်များက သူတို့သည် ချစ်စရာကောင်းကြောင်း၊ တန်ဖိုးရှိသူလေးများဖြစ်ကြောင်း စိတ်ချစေသည်။ လှိုက်လှဲမှုရှိပြီး မှန်ကန်သည့် ချီးမွမ်းစကားများပြောပါ၊ ယင်းက သူတို့၏ကြိုးစားအားထုတ်မှုများကို သင်တွေ့မြင်ပြီး တန်ဖိုးထားကြောင်း သူတို့ကိုသိစေသည်။ မေတ္တာဖြင့် ဆုံးမပါ၊ ထိုပဲ့ပြင်ပေးမှုက သူတို့ မည်ကဲ့သို့သော လူစားမျိုးဖြစ်လာမည်နှင့်ပတ်သက်၍ သင်စိုးရိမ်မကင်းဖြစ်ကြောင်း ဖော်ပြခြင်းဖြစ်သည်။ (ဧဖက် ၆:၄) အကျိုးဖြစ်ထွန်းစေသော ထိုမေတ္တာဖော်ပြချက် အားလုံးသည် ပျော်ရွှင်ပြီး ရင်းနှီးချစ်ခင်သောမိသားစုတစ်ခု တည်ဆောက်ရာတွင် အကူအညီဖြစ်စေကာ ဤနောက်ဆုံးသောနေ့ရက်များ၏ ဖိအားများကို ခုခံတွန်းလှန်ရန် သာ၍အသင့်ရှိစေသည်။

^၁၃ မေတ္တာသည် အခြားသူတို့၏ အားနည်းချက်များကို လျစ်လျူရှုရန် ကျွန်ုပ်တို့ကို လှုံ့ဆော်ပေးသည်။ မိမိ၏စာဖတ်သူများအား ပေတရု ဆုံးမစာ ရေးချိန်တွင် “အချင်းချင်း အားကြီးသောချစ်ခြင်းမေတ္တာရှိရန်” အဘယ်ကြောင့် ဤမျှအရေးကြီးရသည့်အကြောင်းရင်းကို ဤသို့ဖော်ပြခဲ့သည်– “ချစ်ခြင်းမေတ္တာသည် များစွာသောအပြစ်တို့ကို ဖုံးအုပ်တတ်၏။” (၁ ပေတရု ၄:၈) အပြစ်များကို “ဖုံးအုပ်” သည်ဟုဆိုရာတွင် ကြီးလေးသည့်အပြစ်များကို ‘ဖုံးကွယ်’ ခြင်းမဟုတ်ပါ။ ထိုအပြစ်များကို အသင်းတော်ရှိ တာဝန်ရှိသူများထံ သတင်းပို့သင့်ပြီး ကိုင်တွယ်ဖြေရှင်းရသည်။ (ဝတ်ပြုရာ ၅:၁; သု. ၂၉:၂၄) ကြီးလေးသောအပြစ်ပြုသူများအား ဆက်၍အပြစ်ပြုစေရန် သို့မဟုတ် အပြစ်မဲ့သူများအား ထိခိုက်နာကျင်စေရန် ခွင့်ပြုထားခြင်းသည် ပို၍မေတ္တာမဲ့ရာရောက်ပြီး ကျမ်းစာနှင့် မကိုက်ညီပါ။—၁ ကောရိန္သု ၅:၁-၁၃။

^၁၄ အများအားဖြင့် ယုံကြည်သူချင်းများ၏ အမှားများ၊ အပြစ်များသည် အသေးအဖွဲဖြစ်သည်။ ကျွန်ုပ်တို့အားလုံးသည် စကားအားဖြင့် သို့မဟုတ် အပြုအမူအားဖြင့် မှားတတ်ကြပြီး တစ်ဦးကိုတစ်ဦး စိတ်ပျက်စေ၊ နာကျင်စေကြသည်။ (ယာကုပ် ၃:၂) ကျွန်ုပ်တို့သည် အခြားသူများ၏ အားနည်းချက်များကို ချက်ချင်း ကြေညာမောင်းခတ်သင့်သလော။ ယင်းသို့ပြုခြင်းက အသင်းတော်အတွင်း စိတ်သဘောထားကွဲလွဲမှုကိုသာ ဖြစ်စေသည်။ (ဧဖက် ၄:၁-၃) ကျွန်ုပ်တို့သည် မေတ္တာဖြင့် ထိန်းချုပ်ခံရပါက ယုံကြည်သူချင်းတစ်ဦး၏ ‘အသရေကို ရှုတ်ချ’ မည်မဟုတ်ပါ။ (ဆာလံ ၅၀:၂၀၊ သမ္မာ) နံရံပေါ်မှ အပြစ်အနာအဆာများကို အင်္ဂတေကိုင်ပြီး ဆေးသုတ်လိုက်သကဲ့သို့ပင် မေတ္တာသည် အခြားသူများ၏ အပြစ်အနာအဆာများကို ဖုံးအုပ်တတ်သည်။—သု. ၁၇:၉။

^၁၅ မေတ္တာသည် အမှန်တကယ် အကူအညီလိုနေသူများကို ကူညီပေးရန် ကျွန်ုပ်တို့အား လှုံ့ဆော်ပေးမည်။ နောက်ဆုံးသောနေ့ရက်များတွင် အခြေအနေများ ပိုဆိုးရွားလာသောကြောင့် ကျွန်ုပ်တို့၏ ယုံကြည်သူချင်းများသည် တစ်ခါတစ်ရံ ရုပ်ပစ္စည်းနှင့် ကာယရေးအကူအညီများ လိုအပ်ကြပေမည်။ (၁ ယောဟန် ၃:၁၇၊ ၁၈) ဥပမာ၊ ကျွန်ုပ်တို့အသင်းတော်မှ တစ်ဦးဦးသည် ငွေကြေး အလွန်ကျပ်တည်းနေသလော သို့မဟုတ် အလုပ်လက်မဲ့ဖြစ်နေသလော။ သို့ဖြစ်လျှင် ကျွန်ုပ်တို့၏အခြေအနေခွင့်ပြုသရွေ့ ရုပ်ပိုင်းဆိုင်ရာ အကူအညီအချို့ ပေးနိုင်ပါသည်။ (သု. ၃:၂၇၊ ၂၈; ယာကုပ် ၂:၁၄-၁၇) သက်ကြီးရွယ်အိုမုဆိုးမတစ်ဦး၏ အိမ်သည် ပြုပြင်စရာလိုနေသလော။ သို့ဖြစ်လျှင် အလုပ်တချို့အတွက် လျောက်ပတ်စွာ အစပြုကူညီပေးနိုင်ပါသည်။—ယာကုပ် ၁:၂၇။

^၁၆ အခြားသူများအား ကျွန်ုပ်တို့မေတ္တာပြရာတွင် ကျွန်ုပ်တို့အနီးအနားဝန်းကျင်တွင် နေထိုင်သူတို့အတွက်သာ ကန့်သတ်မထားရပါ။ တစ်ခါတစ်ရံ မုန်တိုင်း၊ မြေငလျင်၊ ပြည်တွင်းမငြိမ်မသက်မှုဒဏ်တို့ကို ဆိုးရွားစွာခံစားရသည့် အခြားနိုင်ငံများရှိ ဘုရားသခင်၏ ကျေးကျွန်များအကြောင်း ကျွန်ုပ်တို့ ကြားရပေမည်။ သူတို့သည် အစားအစာ၊ အဝတ်အထည်နှင့် အခြားအသုံးအဆောင်များ အလွန်လိုအပ်နေကြပေမည်။ လူမျိုးခြား၊ အနွယ်ခြားဖြစ်ခြင်းသည် အရေးကိစ္စမဟုတ်ပါ။ ကျွန်ုပ်တို့သည် ‘ညီအစ်ကို အသင်းအပင်းတစ်ခုလုံးကို ချစ်ကြသည်။’ (၁ ပေတရု ၂:၁၇၊ ကဘ) ထို့ကြောင့် ပထမရာစုအသင်းတော်များကဲ့သို့ ကျွန်ုပ်တို့သည် အကူအညီပေးရန် ဖွဲ့စည်းထားသော ကယ်ဆယ်ရေးလုပ်ငန်းများကို ထောက်မကူညီပေးလိုစိတ် ပြင်းပြကြသည်။ (တမန်တော် ၁၁:၂၇-၃၀; ရောမ ၁၅:၂၆) အဆိုပါနည်းလမ်းအားလုံးဖြင့် ကျွန်ုပ်တို့မေတ္တာပြကြသည့်အခါ ဤနောက်ဆုံးသောနေ့ရက်များတွင် ကျွန်ုပ်တို့၏ စည်းလုံးမှုနှောင်ကြိုးကို ခိုင်မြဲစေကြသည်။—ကောလောသဲ ၃:၁၄။

^၁၇ မေတ္တာက အခြားသူများအား ဘုရားသခင့်နိုင်ငံတော်သတင်းကောင်းဟောပြောရန် လှုံ့ဆော်ပေးသည်။ ယေရှု၏ပုံနမူနာကို သုံးသပ်ကြည့်ပါ။ ကိုယ်တော်သည် အဘယ်ကြောင့် ဟောပြောသွန်သင်ခဲ့သနည်း။ လူအုပ်၏ သနားစဖွယ် ဝိညာဉ်ရေးအခြေအနေကြောင့် “သနားခြင်းစိတ်တော်ရှိ၍” ဖြစ်သည်။ (မာကု ၆:၃၄) ဝိညာဉ်ရေးအမှန်တရားအကြောင်း သွန်သင်ပေးကာ မျှော်လင့်ချက်ပေးသင့်သော မှားယွင်းသောဘာသာရေး ခေါင်းဆောင်များ၏ လျစ်လျူရှုမှုကို သူတို့ခံရကြပြီး လမ်းလွဲနေကြသည်။ ထို့ကြောင့် ယေရှုသည် နက်ရှိုင်းနွေးထွေးသောမေတ္တာ၊ ထောက်ထားစာနာမှုတို့၏ လှုံ့ဆော်မှုကြောင့် ‘ဘုရားသခင့်နိုင်ငံတော်သတင်းကောင်း’ ဖြင့် လူများကို နှစ်သိမ့်ပေးခဲ့သည်။—လုကာ ၄:၁၆-၂၁၊ ၄၃။

^၁၈ ယနေ့အချိန်တွင်လည်း လူများစွာသည် ဝိညာဉ်ရေးဘက်တွင် လျစ်လျူရှုခံရ၊ လမ်းလွဲနေကြပြီး မျှော်လင့်ချက်မဲ့နေကြသည်။ ယေရှုကဲ့သို့ ကျွန်ုပ်တို့လည်း စစ်မှန်သောဘုရားသခင်ကို မသိသေးသူများ၏ ဝိညာဉ်ရေးလိုအပ်ချက်များကို အကင်းပါးစွာ သိရှိမည်ဆိုလျှင် ဘုရားသခင့် နိုင်ငံတော်သတင်းကောင်းကို သူတို့အားဝေမျှဖို့ မေတ္တာနှင့် ထောက်ထားစာနာမှုက ကျွန်ုပ်တို့ကို လှုံ့ဆော်ပါလိမ့်မည်။ (မဿဲ ၆:၉၊ ၁၀; ၂၄:၁၄) ကျန်ရှိသောအချိန်သည် တိုတောင်းသောကြောင့် ဤအသက်ကယ်သတင်းတရားကို ယခင်ကထက် ပို၍အရေးတကြီးဟောပြောရမည်။—၁ တိမောသေ ၄:၁၆။

“ခပ်သိမ်းသောအမှုအရာတို့သည် အဆုံးသို့ရောက်လု” ပြီ

^၁၉ ပေတရုက အချင်းချင်းမေတ္တာရှိရန် တိုက်တွန်းသည့်အခါ “ခပ်သိမ်းသောအမှုအရာတို့သည် အဆုံးသို့ရောက်လုသည်ဖြစ်သောကြောင့်” ဟူသည့်စကားဖြင့် အစပြုခဲ့သည်။ (၁ ပေတရု ၄:၇) မကြာမီ ဤလောကစနစ်ဆိုးကို ဘုရားသခင်၏ ဖြောင့်မတ်သောကမ္ဘာသစ်က အစားထိုးတော့မည်။ (၂ ပေတရု ၃:၁၃) သို့ဖြစ်၍ မိမိတို့ကိုယ်ကို ကျေနပ်နေရမည့် အချိန်မဟုတ်ပါ။ ယေရှု ဤသို့သတိပေးခဲ့သည်– “သင်တို့သည် ကိုယ်ကိုကိုယ်သတိပြုကြလော့။ သို့မဟုတ် အစားအသောက်လွန်ကြူးခြင်း၊ လော[က]စိုးရိမ်ခြင်းအားဖြင့် စိတ်နှလုံးပင်ပန်းလျက်နေစဉ်တွင် ထိုနေ့ရက်သည် အမှတ်တမဲ့ သင်တို့နှင့်တွေ့ကြုံလိမ့်မည်။”—လုကာ ၂၁:၃၄၊ ၃၅။

^၂၀ သို့ဖြစ်၍ ကျွန်ုပ်တို့၏ အချိန်ကာလရေစီးကြောင်းအခြေအနေကို သတိရှိရှိ “စောင့်နေကြ” စို့။ (မဿဲ ၂၄:၄၂) ကျွန်ုပ်တို့ကို အာရုံပျံ့လွင့်စေနိုင်သည့် စာတန်၏ သွေးဆောင်မှုမှန်သမျှကို ကာကွယ်ကြစို့။ အေးတိအေးစက်၊ မေတ္တာမဲ့သော ဤလောကကြောင့် အချင်းချင်းမေတ္တာပြခြင်းကို အတားအဆီး မဖြစ်ပါစေနှင့်။ ထို့ထက်ကား၊ စစ်မှန်သောဘုရားသခင်နှင့် ယခင်ကထက် ပို၍နီးကပ်စွာနေကြစို့၊ မကြာမီ ကိုယ်တော်၏ မေရှိယနိုင်ငံတော်သည် ကိုယ်တော်၏ ဘုန်းကျက်သရေပြည့်ဝသော ရည်ရွယ်ချက်ကို ဤကမ္ဘာပေါ်တွင် ပြည့်စုံစေမည်။—ဗျာ. ၂၁:၄၊ ၅။

[အောက်ခြေမှတ်ချက်]

လေ့လာရန် မေးခွန်းများ

• ယေရှုသည် ခွဲခွာခါနီးအချိန်တွင် တပည့်များအား အဘယ်ဆုံးမစကား မိန့်တော်မူခဲ့သနည်း၊ ပေတရုသည် ဆိုလိုရင်းကို နားလည် သဘောပေါက်ခဲ့ကြောင်း အဘယ်အရာက ဖော်ပြသနည်း။ (ပိုဒ်. ၁-၂)

• “အားကြီးသော ချစ်ခြင်းမေတ္တာ” ကားအဘယ်နည်း။ (ပိုဒ်. ၃-၅)

• ကျွန်ုပ်တို့သည် အဘယ်ကြောင့် အချင်းချင်းချစ်သင့်သနည်း။ (ပိုဒ်. ၆-၈)

• အခြားသူများအား ချစ်ကြောင်း မည်သို့တင်ပြနိုင်သနည်း။ (ပိုဒ်. ၉-၁၈)

• မိမိကိုယ်ကို ကျေနပ်နေရမည့်အချိန် အဘယ်ကြောင့် မဟုတ်သနည်း၊ အဘယ်အရာပြုလုပ်ရန် စိတ်ဆုံးဖြတ်သင့်သနည်း။ (ပိုဒ်. ၁၉-၂၀)

[စာမျက်နှာ ၂၉ ပါ ရုပ်ပုံ]

ရင်းနှီးချစ်ခင်သောမိသားစုသည် ဤနောက်ဆုံးသောနေ့ရက်များ၏ ဖိအားများကို ခံရပ်ရန် သာ၍အသင့်ရှိစေ

[စာမျက်နှာ ၃၀ ပါ ရုပ်ပုံ]

မေတ္တာသည် အမှန်တကယ်လိုအပ် နေသူများကို အကူအညီပေးရန် ကျွန်ုပ်တို့အား လှုံ့ဆော်ပေး

[စာမျက်နှာ ၃၁ ပါ ရုပ်ပုံ]

အခြားသူများအား ဘုရားသခင့်နိုင်ငံတော် သတင်းကောင်းကို ဝေမျှခြင်းသည် မေတ္တာပါလုပ်ရပ်ဖြစ်