နက္ခတ်ဗေဒင်ဆရာတွေ ယေရှုဆီ ရောက်လာ

အရှေ့အရပ်ကနေ လူတချို့ ရောက်လာကြတယ်။ သူတို့ကတော့ ကြယ်တွေအကြောင်း လေ့လာတဲ့ နက္ခတ်ဗေဒင်ဆရာတွေဖြစ်တယ်။ ကြယ်တွေကိုကြည့်ပြီး လူ့ဘဝရဲ့ အဖြစ်အပျက်တွေကို ဟောနိုင်တယ်လို့ ဆိုကြတယ်။ (ဟေရှာယ ၄၇:၁၃) သူတို့က အရှေ့အရပ်မှာ ရှိနေတုန်း “ကြယ်” တစ်လုံးကို မြင်ပြီး အဲဒီကြယ်နောက် မိုင်ပေါင်းများစွာလိုက်လာတဲ့အခါ ဘက်သလီဟင်မြို့ကို မဟုတ်ဘဲ ဂျေရုဆလင်မြို့ကို ရောက်လာကြတယ်။

နက္ခတ်ဗေဒင်ဆရာတွေ ရောက်တာနဲ့ “အခုမွေးဖွားတဲ့ ဂျူးတို့ရဲ့ဘုရင် ဘယ်မှာလဲ။ အရှေ့အရပ်မှာ ကျုပ်တို့ ရှိနေတုန်း သူ့ကြယ်ကို မြင်ခဲ့ရတယ်။ သူ့ကို ဦးညွှတ်ဖို့ ရောက်လာတာ” လို့ပြောတယ်။—မဿဲ ၂:၁၊ ၂။

အဲဒီသတင်းကို ဂျေရုဆလင်မြို့ကို အုပ်ချုပ်တဲ့ ဟေရုဒ်မင်း ကြားတော့ အရမ်း စိတ်အနှောင့်အယှက် ဖြစ်သွားတယ်။ ဒါနဲ့ ပုရောဟိတ်မင်းတွေ၊ တခြား ဂျူးဘာသာရေး ခေါင်းဆောင်တွေကို ခေါ်ပြီး ခရစ်တော် ဘယ်မှာ မွေးဖွားမလဲဆိုတာ မေးမြန်းတယ်။ သူတို့က ကျမ်းစာကို အခြေခံပြီး “ဘက်သလီဟင်မြို့မှာ” ဆိုပြီး ပြန်ဖြေကြတယ်။ (မဿဲ ၂:၅။ မိက္ခာ ၅:၂) ဒီအခါ ဟေရုဒ်မင်းက နက္ခတ်ဗေဒင်ဆရာတွေကို တိတ်တဆိတ် ခေါ်တွေ့ပြီး “အဲဒီကလေးကို မတွေ့တွေ့အောင် သွားရှာကြ။ တွေ့ရင် ငါ့ဆီ ပြန်သတင်းပို့ကြဦး။ ငါလည်း သူ့ဆီသွားပြီး ဦးညွှတ်မယ်” လို့မှာလိုက်တယ်။ (မဿဲ ၂:၈) တကယ်တော့ ဟေရုဒ်က အဲဒီကလေးကိုရှာပြီး သတ်ပစ်ချင်တာ။

နက္ခတ်ဗေဒင်ဆရာတွေ ထွက်သွားတဲ့အခါ အံ့ဖွယ်တစ်ခု ဖြစ်ပျက်လာတယ်။ အရှေ့အရပ်မှာ သူတို့မြင်ခဲ့တဲ့ “ကြယ်” ပေါ်လာပြီး ရှေ့ကနေ လမ်းပြတယ်။ ဒီကြယ်က သာမန်ကြယ်မဟုတ်ဘူး၊ သူတို့ကို လမ်းပြပေးဖို့ အထူးပြင်ဆင်ထားတဲ့ကြယ်ပဲ။ နက္ခတ်ဗေဒင်ဆရာတွေဟာ ယောသပ်၊ မာရိနဲ့ သူတို့သားလေး နေထိုင်တဲ့ အိမ်ပေါ်မှာ ကြယ်ရပ်တန့်သွားတဲ့အထိ ကြယ်နောက်ကို လိုက်ခဲ့ကြတယ်။

နက္ခတ်ဗေဒင်ဆရာတွေ အိမ်ထဲ ဝင်သွားတဲ့အခါ မာရိနဲ့အတူရှိနေတဲ့ ယေရှုလေးကိုတွေ့တော့ ဦးညွှတ်ပျပ်ဝပ်ကြတယ်။ ရွှေ၊ လောဗန်နဲ့ မုရန်တွေ လက်ဆောင်ပေးကြတယ်။ ပြီးတဲ့နောက် ဟေရုဒ်ဆီ ပြန်မယ်လုပ်တဲ့အခါ ဘုရားက အဲဒီကိုမသွားဖို့ အိပ်မက်ကနေ သတိပေးတဲ့အတွက် သူတို့တိုင်းပြည်ကို တခြားလမ်းနဲ့ ပြန်သွားကြတယ်။

နက္ခတ်ဗေဒင်ဆရာတွေကို လမ်းပြတဲ့ “ကြယ်” ကို ဘယ်သူပေါ်စေတယ်လို့ ထင်သလဲ။ ဒီကြယ်က ဘက်သလီဟင်မြို့မှာရှိတဲ့ ယေရှုဆီ တိုက်ရိုက် လမ်းမပြပေးခဲ့ဘူးဆိုတာ သတိပြုပါ။ အဲဒီအစား ယေရှုကို သတ်ပစ်ချင်တဲ့ ဟေရုဒ်မင်းနဲ့ တွေ့နိုင်အောင် ဂျေရုဆလင်မြို့ဆီ လမ်းပြပေးတယ်။ ဘုရားသာ ကြားမဝင်ဘူး၊ နက္ခတ်ဗေဒင်ဆရာတွေကို သတိမပေးဘူးဆိုရင် ဟေရုဒ်က ယေရှုကို သတ်ပစ်လိုက်မှာပဲ။ ဒါကြောင့် ဒီကြယ်ကိုပေါ်စေသူဟာ ယေရှုကို သတ်ချင်နေတဲ့ ဘုရားရဲ့ရန်သူ စာတန်ပဲဆိုတာ ရှင်းနေပါတယ်။ သူ့ရည်ရွယ်ချက်အောင်မြင်ဖို့ အဲဒီနည်းကို အသုံးပြုခဲ့တာ။