ဟန္န သားလေးမွေးဖို့ ဆုတောင်း

အစ္စရေးလူ ဧလကာနမှာ မိန်းမနှစ်ယောက်ရှိတယ်။ သူတို့နာမည်က ဟန္နနဲ့ ပေနိန္နတဲ့။ ဧလကာနက ဟန္နကို ပိုချစ်တယ်။ ဒါပေမဲ့ ဟန္နမှာ သားသမီးမရှိလို့ ကလေးအများကြီးရှိတဲ့ ပေနိန္နက သူ့ကို မခံနိုင်အောင် အမြဲပြောလေ့ရှိတယ်။ ဧလကာနက သူ့မိသားစုကို တဲတော်ရှိတဲ့ ရှိလောမြို့ဆီ နှစ်တိုင်း ခေါ်သွားတယ်။ တစ်ခေါက်၊ သူတို့ အဲဒီကို ရောက်နေတုန်း ချစ်ရတဲ့ဇနီး ဟန္န ဝမ်းနည်းနေတာ ဧလကာန သတိပြုမိတယ်။ ဒါနဲ့ သူက ‘ဟန္နရယ်၊ မငိုပါနဲ့။ ငါရှိတာပဲ။ နင့်ကို ငါချစ်တယ်လေ’ လို့နှစ်သိမ့်ပေးတာပေါ့။

နောက်တော့၊ ဟန္နထွက်သွားပြီး တစ်ယောက်တည်း သွားဆုတောင်းနေတယ်။ သူ့ကိုသနားပါလို့ ယေဟောဝါဆီ ဆုတောင်းနေရင်း ငိုပဲငိုနေတယ်။ ‘ယေဟောဝါ၊ ကျွန်မကို သားလေးပေးမယ်ဆိုရင် ကိုယ်တော့်ကို ပေးဆက်ပါ့မယ်။ သူ့တစ်သက်တာလုံး ကိုယ်တော့်အမှုကို ထမ်းဆောင်စေမယ်’ ဆိုပြီး ဟန္နကတိပေးတယ်။

ပုရောဟိတ်မင်း ဧလိက ဟန္နငိုနေတာကိုတွေ့ပြီး အရက်မူးနေတယ်လို့ ထင်သွားတယ်။ ဟန္နက ‘ကျွန်မ အရက်မူးတာ မဟုတ်ပါဘူး။ ကျွန်မစိတ်ဆင်းရဲလွန်းလို့ ယေဟောဝါကို ပြောပြနေတာပါ’ တဲ့။ ဒါနဲ့ ဧလိက သူမှားမှန်းသိပြီး ‘မင်းလိုချင်တာကို ယေဟောဝါ ပေးပါစေ’ လို့ ပြောတယ်။ ဒီနောက်၊ ဟန္နစိတ်သက်သာသွားပြီး ပြန်သွားတယ်။ တစ်နှစ်အတွင်းမှာပဲ သားလေးမွေးတော့ ရှမွေလလို့ နာမည်ပေးတယ်။ ဟန္န ဘယ်လောက်ပျော်လိုက်မလဲ စဉ်းစားကြည့်ပါ။

ယေဟောဝါကို ပေးထားတဲ့ ကတိကို ဟန္န မမေ့ဘူး။ ရှမွေလလေးကို နို့ဖြတ်ပြီးတာနဲ့ တဲတော်ကို ခေါ်လာတယ်။ ပြီးတော့ ဧလိကို သူက ‘ဒီသားလေးကိုရဖို့ ကျွန်မဆုတောင်းခဲ့တာ။ သူ့ကို ယေဟောဝါဆီ တစ်သက်လုံး ပေးအပ်လိုက်ပြီ’ လို့ပြောတယ်။ ဧလကာနနဲ့ ဟန္နတို့ဟာ ရှမွေလဆီ နှစ်တိုင်းသွားပြီး လက်ပြတ်ဝတ်ရုံတစ်ထည် ယူသွားပေးတယ်။ ယေဟောဝါက ဟန္နကို သားသုံးယောက်နဲ့ သမီးနှစ်ယောက် ထပ်ပေးတယ်။