ဆုတောင်းခြင်းအားဖြင့် ယေဟောဝါနဲ့ ရင်းနှီးအောင် ကြိုးစားပါ

ဘဝမှာ လမ်းညွှန်မှု လိုတယ်လို့ ခံစားဖူးပါသလား။ ဘယ်အရေးကြီး မေးခွန်းတွေရဲ့ အဖြေကို သိချင်နေသလဲ။ နှစ်သိမ့်မှု လိုအပ်နေသလား။ ယေဟောဝါနဲ့ ပိုရင်းနှီးချင်ပါသလား။ ဒါတွေအားလုံးကို ဆုတောင်းခြင်းအားဖြင့် ရနိုင်ပါတယ်။ ဒါဆိုရင် ဘယ်လို နည်းမှန်လမ်းကျ ဆုတောင်းရမလဲ။ ဆုတောင်းချက်အားလုံးကို ဘုရား နားထောင်သလား။ သင့်ဆုတောင်းချက်ကို ဘုရား နားထောင်ဖို့ ဘာလုပ်ရမလဲ။ လေ့လာကြည့်ရအောင်။

၁။ ဘယ်သူ့ဆီ ဆုတောင်းရမလဲ၊ ဘာအတွက် ဆုတောင်းနိုင်သလဲ။

ကောင်းကင်ဘုံစံ အဖတစ်ပါးတည်းကိုပဲ ဆုတောင်းရမယ်လို့ ယေရှု သင်ပေးတယ်။ ယေရှုကိုယ်တိုင် ယေဟောဝါဆီ ဆုတောင်းခဲ့တယ်။ “ဒီနည်းအတိုင်း ခင်ဗျားတို့ ဆုတောင်းရမယ်- ‘ကောင်းကင်မှာ စံမြန်းတဲ့ ကျွန်တော်တို့ရဲ့ အဖ . . . ” လို့ ယေရှု သင်ပေးတယ်။ (မဿဲ ၆:၉) ကျွန်တော်တို့ ဆုတောင်းတဲ့အခါ ယေဟောဝါနဲ့ ပိုရင်းနှီးလာမယ်။

ဘာကိစ္စအတွက်မဆို ဆုတောင်းလို့ ရပါတယ်။ အလိုတော်နဲ့ညီတဲ့ ဆုတောင်းချက်တွေကို ဘုရား နားထောင်တယ်။ “အလိုတော်နဲ့အညီ ဆုတောင်းမယ်ဆိုရင် ဘုရား နားထောင်မယ်။” (၁ ယောဟန် ၅:၁၄) ဘာတွေအတွက် ဆုတောင်းသင့်တယ်ဆိုတာ ယေရှု နမူနာပြောပြခဲ့တယ်။ (မဿဲ ၆:​၉-၁၃ ကို ဖတ်ပါ။) ကိုယ်ရေးကိုယ်တာအတွက် ဆုတောင်းတဲ့အပြင် ကျွန်တော်တို့အတွက် ဘုရား လုပ်ပေးခဲ့တာတွေကို ကျေးဇူးတင်ကြောင်း ဆုတောင်းနိုင်တယ်။ တခြားသူတွေကို ကူညီပေးဖို့လည်း ဆုတောင်းနိုင်တယ်။

၂။ ဘယ်လို ဆုတောင်းသင့်သလဲ။

“ဘုရားကို ရင်ဖွင့်ကြပါ” လို့ ကျမ်းစာမှာ အားပေးထားတယ်။ (ဆာလံ ၆၂:၈) ဒါကြောင့် စိတ်ရင်းမှန်နဲ့ လှိုက်လှိုက်လှဲလှဲ ဆုတောင်းရမယ်။ အသံထွက်ဖြစ်စေ၊ အသံတိတ်ဖြစ်စေ ဆုတောင်းနိုင်တယ်။ ဘုရားကို ရိုသေလေးစားတဲ့ ကိုယ်ဟန်အနေအထား ဖြစ်ရမယ်။ အချိန်မရွေး၊ နေရာမရွေး ဆုတောင်းနိုင်တယ်။

၃။ ကျွန်တော်တို့ရဲ့ ဆုတောင်းချက်တွေကို ဘုရား ဘယ်လို အဖြေပေးသလဲ။

နည်းအမျိုးမျိုးနဲ့ အဖြေပေးပါတယ်။ ယေဟောဝါက ကျမ်းစာကို ပေးထားတယ်။ ကျွန်တော်တို့ သိချင်တဲ့ မေးခွန်းတွေရဲ့အဖြေ ကျမ်းစာမှာ ပါတယ်။ ကျမ်းစာက “အတွေ့အကြုံမရှိသူကို ဉာဏ်ပညာရှိစေတယ်။” (ဆာလံ ၁၉:၇။ ယာကုပ် ၁:၅ ကို ဖတ်ပါ။) ကျွန်တော်တို့ အခက်အခဲကြုံတဲ့အခါ ဘုရားက စိတ်ငြိမ်သက်မှု ပေးနိုင်တယ်။ ကျွန်တော်တို့ လိုအပ်ချိန်မှာ ဘုရားကိုဝတ်ပြုသူတွေကတစ်ဆင့် ကူညီပေးနိုင်တယ်။

အနှစ်ချုပ်

စိတ်ရင်းမှန်နဲ့ ဆုတောင်းတာက ဘုရားနဲ့ ပိုရင်းနှီးစေတယ်၊ စိတ်ငြိမ်သက်မှု ပေးတယ်၊ ယေဟောဝါ နှစ်သက်တာတွေ လုပ်ဖို့ ခွန်အားပေးနိုင်တယ်။

ပြန်လည်သုံးသပ်ခြင်း

• ဘယ်သူ့ဆီ ဆုတောင်းရမလဲ။

• ဘယ်လို ဆုတောင်းရမလဲ။

• ဆုတောင်းခြင်းရဲ့ အကျိုးကျေးဇူးတချို့က ဘာတွေလဲ။

လေ့လာစရာ ထပ်ဖွေရှာ

ဆုတောင်းခြင်းနဲ့ပတ်သက်ပြီး မေးတတ်ကြတဲ့ မေးခွန်းတွေကို အဖြေရှာပါ။

“ဆုတောင်းခြင်းအကြောင်း သိထားရမယ့် အချက်ခုနစ်ချက်” (ကင်းမျှော်စင် အောက်တိုဘာ ၁၊ ၂၀၁၀)

ဘာကြောင့် ဆုတောင်းသင့်သလဲ၊ ပိုအဓိပ္ပာယ်ရှိတဲ့ ဆုတောင်းချက်တွေ ဖြစ်အောင် ဘာလုပ်နိုင်သလဲဆိုတာ လေ့လာကြည့်ပါ။

“ဘာကြောင့် ဆုတောင်းရမှာလဲ” (ဝက်ဘ်ဆိုက် ဆောင်းပါး)

ဘယ်သူ့ဆီ ဆုတောင်းသင့်တယ်လို့ ကျမ်းစာ သွန်သင်သလဲ သုံးသပ်ကြည့်ပါ။

“သူတော်စင်တွေဆီ ဆုတောင်းသင့်သလား” (ဝက်ဘ်ဆိုက် ဆောင်းပါး)

ဒီတေးဗီဒီယိုမှာ အချိန်တိုင်း၊ နေရာတိုင်း ဆုတောင်းနိုင်ကြောင်း ဖော်ပြထားတယ်။

အချိန်မရွေး ဆုတောင်းပါ (၁:၂၂)