ကြိုးပမ်းစွာ လုပ်ကိုင်ခြင်းမှ ပျော်ရွှင်မှု ရနိုင်သလော

“အမှန်တော့ လူ့အတွက်အဓိကက အလုပ်မဟုတ်ဘူးလား” ဟု ဂျပန်စီးပွားရေးလောကတွင် ထိပ်တန်းစီးပွားရေးဘုရင်၊ ဗွန်ပေ အော့စူကီ မေးမြန်းခဲ့သည်။ သူအဘယ်ကြောင့် နွေရာသီအပန်းဖြေအနားမယူလိုသည့်အကြောင်း ရှင်းပြနေခြင်းဖြစ်သည်။ သူ၏စကားသည် စစ်ပြီးစ ပျက်စီးရှုပ်ထွေးမှုမှ နိုင်ငံကိုပြန်တည်ထောင်လာသည့် ဂျပန်လူမျိုးစိတ်ထားကို ပေါ်လွင်စေသည်။ မိမိဘာသာထီးထီးကြီးနေခဲ့သည့်ကာလမှ အမေရိကန် ရေတပ်ဗိုလ်မှူးချုပ် ပဲရီသည် ဂျပန်နိုင်ငံ၏တံခါးများကို ဖွင့်ပေးကတည်းက ဂျပန်လူမျိုးအား ဝီရိယရှိသူများဟု ဖေါ်ပြခဲ့ပြီ။ ကြိုးပမ်းလုပ်ကိုင်သူများဟု ခေါ်ဝေါ်ခံရခြင်းကိုလည်း ဂုဏ်ယူကြသည်။

သို့ရာတွင် စက်မှုလက်မှုတိုးတက်သည့် နိုင်ငံများတွင် နှစ်ပတ်လည်အလုပ်ချိန်အများဆုံးရှိရာ ကြိုးစားလွန်းသည်ဟူ၍ ဂျပန်နိုင်ငံကို အပြစ်ဆိုနေကြပြီ။ အလုပ်စွဲသူသဏ္ဌာန် ဖျောက်ဖျက်ရန် ဂျပန်အစိုးရကြိုးစားနေသည်။ သတင်းစာခေါင်းကြီးပိုင်းတစ်ခုတွင် “အလုပ်သမားဝန်ကြီးဌာနက ‘ဤမျှအလုပ်ကြိုးစားမလုပ်ကြနှင့်’” ဟုသတိပေးယူရသည်။ ၁၉၈၇ ခုနှစ် နွေရာသီအပန်းဖြေချိန်အတွက် တိုက်တွန်းချက်တစ်ခုက “အပန်းဖြေအနားယူခြင်းသည် သင့်စွမ်းရည်ကိုထင်ရှားစေသည်” ဟူ၍ပင်နှိုးဆော်ရ၏။ တစ်နည်းပြောရလျှင် “ဘာကြောင့်ဒီလောက်အလုပ်ကြိုးစားရသလဲ” ဟု အစိုးရက တစ်နိုင်ငံလုံးကို မေးခွန်းထုတ်နေရသည်။

ဂျပန်နိုင်ငံရှိသူတိုင်း အလုပ်ထဲကိုယ်ကိုမြှုပ်နှံထားသည့် အလုပ်ကြိုးစားသူချည်းသာဟူ၍တော့မဟုတ်။ အလုပ်ဝင်ခါစ လူ ၇၀၀၀ ကျော်ကို မကြာမီက ဂျပန်ကုန်ထုတ်လုပ်မှုဌာနမှ ခေါ်မေးမြန်းခဲ့ရာ ကိုယ်ရေးကိုယ်တာထက် အလုပ်ကိုဦးစားပေးလိုသူ ၇ ရာခိုင်နှုန်းသာရှိကြောင်း သိရှိရသည်။ ဤသဘောထားကို အခြားနိုင်ငံများတွင်လည်း တွေ့မြင်နေရသည်။ ဂျာမနီနိုင်ငံတွင် အသက် ၁၈ မှ ၂၉ နှစ်အရွယ်ရှိ ဂျာမန်များအနက် ၁၉ ရာခိုင်နှုန်းသာ အကျိုးအမြတ်ရှိရှိ၊ မရှိရှိ အလုပ်ကို အတတ်နိုင်ဆုံးလုပ်ကိုင်ကြောင်း ဒီမိုစကိုပီအတွက် အဲလန်စ်ဘက်ကာ အဖွဲ့အစည်းက (Allensbacher Institut für Demoskopie) တွေ့ရှိခဲ့သည်။

ပေါ့ပေါ့နေ ပေါ့ပေါ့စားလူငယ်များနှင့် နှိုင်းယှဉ်လျှင် ဂျပန်နိုင်ငံရှိ နိုင်ငံခြားမှလာအလုပ်လုပ်သူတို့သည် အလုပ်ပိုကြိုးစားကြသည်။ အလုပ်ကြမ်းလုပ်ကိုင်သူ မိမိ၏အဲလ်ဂျီရီယန် တပည့်ကို တိုကျိုမြို့မှ အလုပ်ရှင်တစ်ဦး အထူးချီးမွမ်းပါသည်။ “ဒီလိုအလုပ်မျိုးကို ဂျပန်တွေ ဝင်လုပ်ချင်မှာမဟုတ်ဘူး။ လုပ်သည့်တိုင် ကြာကြာခံမှာမဟုတ်ဘူး” ဟုသူပြောသည်။ အလုပ်ကြိုးစားသော ဂျပန်များပင် ပင်ကိုဝီရိယရှိသူများမဟုတ်ကြချေ။ ကြိုးစားပမ်းစား အလုပ်လုပ်သောအခါ တိုက်တွန်းချက်ကောင်း ရရှိမည်။

ကြိုးစားအလုပ်လုပ်သင့်သည့် အကြောင်းများ

“စည်းစိမ်ချမ်းသာ၊ အခြေခိုင်ခြင်း၊ ဥစ္စာပစ္စည်း နှင့် လောက၌ထွန်းပေါက်ခြင်း” တို့ကို ဝီရိယရှိဂျာမန်များ ပိုင်ဆိုင်ရန်ကြိုးစားကြသည်ဟု ဂျာမန်ပတ်စဉ်သတင်းစာ Der Spiegel ကဖေါ်ပြသည်။ ဘဝဖူလုံခိုင်မြဲရန် ကြိုးစား၍ စည်းစိမ်ဥစ္စာရှာသူ များသည်။ အခြားသူတို့မှာမူ “လောက၌ထွန်းပေါက်ရန်” သို့မဟုတ် ရာထူးတက်ရန် ကြိုးစားအလုပ်လုပ်ကြသည်။ ဤသို့သောပန်းတိုင်များသို့ရောက်ရန် အပြိုင်အဆိုင်ပညာရေးစနစ်အားဖြင့် တိုက်တွန်းခံရသူများသည် စက်မှုအဖွဲ့ယန္တရားကိုတပင်တပန်း တစ်လှမ်းချင်းနင်းသော်လည်း ပန်းတိုင်မရောက် ပင်ပန်းရုံသာအဖတ်တင်ကြရှာသည်။

သို့ရာတွင် ငွေနှင့်ဂုဏ်ဒြပ်အတွက်သာ လူတို့ကြိုးစားလုပ်ကိုင်ကြသည်မဟုတ်။ အချို့ အလုပ်အကျိုးအတွက် အလုပ်ကြိုးစားကြသည်။ ဤသူတို့အတွက် အလုပ်သည် ပဓာနဖြစ်သည်။ အခြားသူများသည်မိမိတို့အလုပ်၌ပျော်မွေ့ကြသည်။ “ကျွန်တော်.ဓာတ်ခွဲခန်းမှာ လုပ်ကိုင်နေတဲ့အလုပ်ထဲ နစ်မြုပ်နေလို့ ဝိညာဏရေးရာအတွက် အချိန်မပေးနိုင်ခဲ့ဖူး” ဟု ဟာရူအိုဝန်ခံသည်။

ထို့ပြင် သူတစ်ပါးအကျိုးဆောင်၊ လူမှုဖူလုံရေးအတွက် ကြိုးစားအားထုတ်သူများလည်းရှိသည်။ လူ့အသက်ကယ်ဆယ်ရေးအတွက် ဝီရိယစိုက်ထုတ်ကြသည်။ ဥပမာ၊ မီးသတ်တစ်ဦးသည် မိမိသုံးဆောင်ရာ ပစ္စည်းကိရိယာများ အမြဲအသင့်ရှိနေရန် နေ့စဉ်ကြိုးစားလုပ်ဆောင်သည်။

သို့သော် ကြိုးစားလုပ်ကိုင်ရန် ဤအကြောင်းများသည် အကြောင်းကောင်းများလော။ ယင်းတို့သည် ပျော်ရွှင်မှုပေးမည်လော။ စစ်မှန်သောပျော်ရွှင်မှုပေးနိုင်သည်ကား အဘယ်လုပ်ငန်းနည်း။