“လွတ်လပ်ခြင်းကိုချစ်မြတ်နိုးသူများ” ခရိုင်စည်းဝေးပွဲကြီးများသို့ သင်အားဖိတ်ခေါ်ပါသည်

၁ ၉၈၉ နိုဝင်ဘာမှစ၍၊ လွတ်လပ်ခြင်းအကြောင်းသည် တစ်ခါမှဤမျှတိုင်မပေါ်လွင်ခဲ့ချေ။ အရှေ့ဥရောပနိုင်ငံများမှ လူများသည် အနှစ်၄၀ နှင့်အထက်က သူတို့ခံစားခဲ့ရသည့်လွတ်လပ်ခြင်းထက်အထူးပိုမိုခံစားရလျက်ရှိသည်။

သို့သော်၊ အခြားမည်သည့်နိုင်ငံရေးလွတ်လပ်ခြင်းထက်မဆို ပိုမိုအရေးကြီးသောလွတ်လပ်ခြင်းရှိပါသည်။ ထိုအကြောင်းကိုဘုရားနှုတ်ကပတ်တော်သမ္မာကျမ်းစာတွင် ကျွန်ုပ်တို့ဖတ်ရှုနိုင်သည်။ ယေရှုခရစ်က “သမ္မာတရားကိုလည်းသိကြသဖြင့် ထိုတရားသည်သင်တို့ကိုလွှတ်လိမ့်မည်” ဟုတစ်ခါကမိန့်ဆိုခဲ့သည်။ (ယောဟန် ၈:၃၂) မှန်ပါသည်။ ဆက်ကပ်ထားသည့်ခရစ်ယာန်များသည် ရောမ ၆:၁၈၊ ၂၂ တွင်ကျွန်ုပ်တို့ဖတ်ရှုရသည့်အတိုင်း လူကိုကြောက်ရွံ့ခြင်းနှင့် အပြစ်၊ သေခြင်းအချုပ်အနှောင်မှ လွတ်မြောက်ပြီးဖြစ်သည်။ “သခင်ဘုရား [ယေဟောဝါ၊ NW] ၏ဝိညာဉ်တော်တရားသည် လွှတ်ခြင်းချမ်းသာကိုပေးတတ်၏” ဟုလည်းကျွန်ုပ်တို့ဖတ်ရှုရ၏။ (၁ ကောရိန္သု ၃:၁၇) အမှန်တွင် ဘုရားနှုတ်ကပတ်တော်က “ထိုမျှမက၊ ဝိညာဉ်တော်၏ကျေးဇူးတော်အစအဦးကို ခံပြီးသောငါတို့သည်လည်း သားအရာ၌ချီးမြှောက်ခြင်းအကြောင်းတည်းဟူသောကိုယ်ခန္ဓာရွေးနှုတ်ခြင်းချမ်းသာကိုမျှော်လင့်၍၊ စိတ်နှလုံးအထဲ၌ ညည်းတွားလျက်နေကြ၏။”—ရောမ ၈:၂၁။

လက်ရှိအချိန်တွင် ခရစ်ယာန်လွတ်လပ်ခြင်းခံစားလိုသူ မည်သူမဆိုသည် တကယ့်ကိုကြိုးပမ်းအားထုတ်ရမည်။ သက်သောင့်သက်သာလမ်းစဉ်ကိုလိုက်နေခြင်းမျှသာမဟုတ်ချေ။ ဤလွတ်လပ်ခြင်းကို ဆက်လက်ခံစားနိုင်ရန်၊ ထပ်ဆင့်ကြိုးပမ်းမှုများလိုအပ်သည်။ ထိုလွတ်လပ်ခြင်းကို လုယူသွားမည့်အင်အားစုများဖြစ်သော စာတန်မာရ်နတ်၊ သူ၏ဆိုးယုတ်သောလောကနှင့်ကျွန်ုပ်တို့ကိုယ်နှိုက်၏အမွေခံအပြစ်လိုအင်များကြောင့်ဖြစ်သည်။ ယေဟောဝါဘုရားရှင်သည် ကိုယ်တော်၏မှုတ်သွင်းခံနှုတ်ကပတ်တော်၊ ကိုယ်တော်၏သန့်ရှင်းသောဝိညာဉ်တော်နှင့်ကိုယ်တော်၏မျက်မြင်ရအဖွဲ့အစည်းအားဖြင့် အကူအညီပေးအပ်ခဲ့သည်။—လုကာ ၁၁:၁၃။

လွတ်လပ်ခြင်းကိုချစ်မြတ်နိုးသူအားလုံး လွတ်လပ်ခြင်းအပေါ်ခိုင်မြဲစွာစွဲကိုင်ထားနိုင်ရေး ကူညီပေးရန် ယခုနှစ်ယေဟောဝါသက်သေများ၏ခရိုင်စည်းဝေးပွဲကြီးများ၏အဓိကအချက်မှာ “လွတ်လပ်ခြင်းကိုချစ်မြတ်နိုးသူများ” ဖြစ်သည်။ ဤစည်းဝေးပွဲကြီးများသည် သုံးရက်ဖြစ်ပြီး၊ သောကြာနံနက် ၈:၃၀ မှစတင်ကာ၊ တနင်္ဂနွေညနေ ၄:၀၀ အထိဖြစ်မည်။ ဤစည်းဝေးပွဲကြီးများသို့လာရောက်သူအားလုံးသည် တက်ကြွဖွယ်ဟောပြောချက်၊ စိတ်ဝင်စားဖွယ်တွေ့ဆုံမေးမြန်းခန်းများ၊ ထိရောက်သောသရုပ်ပြပွဲများနှင့်သမ္မာကျမ်းစာတွင် အခြေခံထားသော ထူးခြားသောပြဇာတ်များဖြင့် ဝိညာဉ်ရေးအရလန်းဆန်း၍တည်ဆောက်မှုရရှိပါလိမ့်မည်။ မိတ်ဟောင်း၊ မိတ်သစ်များနှင့်ပေါင်းသင်းရသော နှလုံးရွှင်ပြုံးစရာများ၊ အခြားရာပေါင်းများစွာနှင့် ကျွန်ုပ်တို့၏ဘုရားသခင်နိုင်ငံတော်သီချင်းများကို ပူးပေါင်းသီဆိုရသော ပျော်ရွှင်မှုနှင့် လှိုက်လှဲသောလူထုဆုတောင်းခြင်းများတွင်ပါဝင်ရခြင်းများကိုမမေ့သင့်ချေ။

ယေဟောဝါ၏သစ္စာနှံကျေးကျွန်များအားလုံးသည် ဤစည်းဝေးပွဲကြီးများစသည့် သောကြာနေ့နံနက်တွင်အချိန်မီရောက်ရှိနေရန် သူတို့အားဘာကမျှလုံးဝအတားအဆီးမရှိပါစေနှင့်။ သမ္မာကျမ်းစာ၊ သီချင်းစာအုပ်နှင့်သာမဟုတ်ဘဲ ခဲတံ၊ မှတ်ချက်ယူရန်စာအုပ်ကိုလည်း အသေအချာယူလာပါလေ။ လွတ်လပ်သောလူမျိုးဝင်အနေနှင့် သင်၏ဝိညာဏလိုအပ်ချက်ကိုအမှန်တကယ်လိုလားစိတ်နှင့်လည်း လာရောက်ပါလေ။—မဿဲ ၅:၃။

၁၉၉၁ ခရိုင်စည်းဝေးပွဲကြီးနေရာများ

ရန်ကုန် အောက်တိုဘာ ၂၅–၂၇

တာဟန်း နိုဝင်ဘာ ၂၂–၂၄

ဆူရ်ခွား ဒီဇင်္ဘာ ၆– ၈

ပြင်ဦးလွင် ဒီဇင်္ဘာ ၂၇–၂၉