အရေးကိစ္စဖြေရှင်းရန် အဘယ်ကြောင့်ဤမျှကြာညောင်းနေရသနည်း
လွ န်ခဲ့သော နှစ်ပေါင်း ၆,၀၀၀ ခန့်က ဘုရားသခင်၏အချုပ်အခြာအာဏာသည် ပြဿနာမဖြစ်ခဲ့ပေ။ အံ့ချီးဖွယ်ဖန်ဆင်းရာတို့ကို လက်စသတ်ပြီးသောအခါ “ဘုရားသခင်သည် မိမိဖန်ဆင်းသမျှသောအရာတို့ကို ကြည့်ရှုလျှင် အလွန်ကောင်းသည်ကိုမြင်တော်မူ” ၏။ (ကမ္ဘာဦး ၁:၃၁) ထိုအခါ ကာလအတန်ကြာ “ငြိမ်ဝပ်စွာနေတော်မူ၏။” ကိုယ်တော်သည် မောပန်းရခြင်းကြောင့် အနားယူခြင်းမဟုတ်ပေ။ ဆိုလိုသည်ကား၊ ကမ္ဘာမြေကြီးပေါ်တွင် ဖန်ဆင်းခြင်းကိုရပ်နားတော်မူသည်။ ယင်းတို့နှင့်စပ်လျဉ်းသော ကိုယ်တော်၏ရည်ရွယ်ချက်သည် အပြည့်အစုံအောင်မြင်မည်ဟု စိတ်ချတော်မူခဲ့သည်။—ကမ္ဘာဦး ၂:၁-၃။ ဟေရှာယ ၅၅:၁၁။
ထိုရည်ရွယ်ချက်ကားအဘယ်နည်း။ ဧဒင်ဥယျာဉ်အရပ်တွင် ပထမလူမောင်နှံကို ယေဟောဝါထားတော်မူခဲ့သည်။ သူတို့၏ပထမတာဝန်ကား တိရစ္ဆာန်အမျိုးမျိုးနှင့်တကွ သူတို့၏ပရဒိသုနေအိမ်ကိုပြုစုရန်ဖြစ်သည်။ ထို့အပြင် သားသမီးများမွေးဖွားကြရန်ဖြစ်သည်။ အတန်ကြာသော် သူတို့မိသားစုတိုးများလာသည့်အခါ “မြေကြီးကိုနိုင်နင်းရမည်” ဟူသောဘုရားသခင်၏အမိန့်တော်ကိုနာခံသည့်အနေနှင့် မြေကြီးစွန်းတိုင်အောင် ပရဒိသုကိုတိုးချဲ့ကြဖို့ဖြစ်သည်။ ဤနည်းဖြင့် ကမ္ဘာမြေကြီးသည် ကောင်းကင်ခမည်းတော်ကို ပျော်ရွှင်စည်းလုံးစွာဝတ်ပြုသည့်အိမ်ထောင်စုနှင့်ပြည့်သော အလှကျက်သရေဖြာသည့်နေအိမ်အဖြစ်သို့ တဖြည်းဖြည်းရောက်လာမည်ဖြစ်သည်။ ယင်းကား ဘုရားသခင်၏မူလအစရည်ရွယ်ချက်ဖြစ်သည်။—ကမ္ဘာဦး ၁:၂၇၊ ၂၈။ ၂:၈၊ ၁၅၊ ၂၀-၂၂။
ဤကြီးမြတ်သောရည်ရွယ်ချက် ပြည့်စုံလာရန် အာဒံနှင့်ဧဝ အဆုံးတိုင်ပါဝင်ဆောင်ရွက်မည်လော။ သူတို့ဖန်ဆင်းရှင်ကိုနာခံမှုပြခြင်းအားဖြင့် ရည်ရွယ်တော်မူချက်အတိုင်း ဆက်လုပ်ကိုင်ဆောင်ရွက်ခြင်းအပေါ် မူတည်ပါသည်။ သူတို့၏နာခံမှုသည် အလိုအလျောက်မဟုတ်ပေ။ လေးမြတ်သောသဘောထားနှင့် ကိုယ်တော်ကိုဝတ်ပြုစေလိုတော်မူသဖြင့် ကျွန်ုပ်တို့၏ပထမမိဘများအား လွတ်လပ်စွာရွေးချယ်ခွင့်ပေးထားပါသည်။ ကိုယ်တော်ပိုင်ထိုက်သော အချုပ်အခြာအာဏာတော်၏ မျက်မြင်သတိပေးချက်အနေနှင့် စမ်းသပ်မှုရိုးရိုးကလေးတစ်ခုခံစေခဲ့သည်။ ဥယျာဉ်အတွင်းရှိ အသီးပင်တစ်ပင်မှအပ ပြင်ဆင်ပေးထားသောမည်သည့်အပင်၏အသီးကိုမဆို စားသုံးခွင့်ရှိကြသည်။ “စားသောနေ့တွင် ဧကန်အမှန်သေရမည်” ဟုဘုရားသခင်မိန့်တော်မူထားသည့် အသီးပင်တစ်ပင်ရှိသည်။—ကမ္ဘာဦး ၂:၁၆၊ ၁၇။
အာဒံနှင့်ဧဝတို့အသက်ကြီး၍သေကြရန် ဖန်ဆင်းခံရသည်မဟုတ်ကြောင်း ယင်းစကားများကတင်ပြပါသည်။ ဤရိုးရှင်းသောအမိန့်ကို သူတို့နာမခံမှသာ သေရကြမည်ဖြစ်သည်။ အာဒံနှင့်ဧဝသာ ဘုရားသခင်၏စကားကိုနားထောင်မည်ဆိုလျှင် စုံလင်သောမျိုးစဉ်မျိုးဆက် ကမ္ဘာချီမိသားစုကြီး၏မိဘများအနေနှင့် သူတို့ယနေ့တိုင်အောင် မြေကြီးပေါ်ရှိနေကြပေမည်။—ဆာလံ ၃၇:၂၉ တွင်တင်ပြထားသည့် မူကိုရှု။
သို့ရာတွင် နောင်တွင်စာတန်အမည်ရသော ဘုရားသခင်၏ကောင်းကင်သားတို့မှတစ်ဦးသည် ဘုရားအုပ်ချုပ်ပုံနည်းလမ်းတော်ကို အပြစ်ရှာခဲ့ပေသည်။ တားမြစ်ထားသောအသီးကိုစားရန် ဧဝအားသူတိုက်တွန်းသည်။ ဘုရားသခင်၏အချုပ်အခြာအာဏာအောက်မနေခြင်းအားဖြင့် . . . သူ့အတွက်ပိုကောင်းလိမ့်မည်ဟု အထင်မှားစေရန်အကြံပေးခဲ့သည်။ သို့သော် စာတန်၏တကယ့်ရည်ရွယ်ချက်ကား သူကိုယ်တိုင် မွေးဖွားလာမည့်လူအိမ်ထောင်စုကြီး၏ဘုရားဖြစ်လိုခြင်းတည်း။—ကမ္ဘာဦး ၃:၁-၅။ မဿဲ ၄:၈၊ ၉။ ယောဟန် ၈:၄၄။
ပထမလူမောင်နှံအား လိုလေသေးမရှိ ယေဟောဝါထားတော်မူခဲ့သဖြင့် ကိုယ်တော်၏အချုပ်အခြာအာဏာကို ဧဝထောက်ခံပြီး စာတန်၏မုသာပါအကြံပြုချက်ကို ငြင်းပယ်ခဲ့သင့်သည်။ သို့သော် ဘုရားသခင်၏ပညတ်ဥပဒေကို သူချိုးဖောက်ခဲ့ခြင်းသည် ဝမ်းနည်းစရာကောင်းသည်။ နောင်တွင် သူမ၏ပညာမဲ့သောလမ်းစဉ်အတိုင်း လုပ်ကိုင်ရန် အာဒံရွေးချယ်ခဲ့သည်။ သို့ဖြစ်၍ ကိုယ်အလိုလိုက်သောမောင်နှံစုံနှင့်စာတန်ပါ ဘုရားသခင်ကိုပုန်ကန်ခဲ့ကြရာ ဘုရားသခင်၏အချုပ်အခြာအာဏာနှင့်ပတ်သက်သော အရေးကိစ္စပေါ်လာလေသည်။—ကမ္ဘာဦး ၃:၆။
မဟာအရေးကိစ္စများဖြေရှင်းရန် အချိန်လိုအပ်
ပုန်ကန်သူသုံးဦးစလုံးကို ထိုတွင်ပင် ယေဟောဝါဖျက်ဆီးနိုင်တော်မူသည်။ သို့သော် သူတို့ပုန်ကန်မှုကြောင့် ပေါ်လာသည့်မေးခွန်းများကို ထိုသို့ပြုခြင်းဖြင့် ဆုံးဖြတ်စီရင်ပေးမည်မဟုတ်ပေ။ ဘုရားသခင်မပါဘဲ လူသည်မိမိကိုယ်ကို အောင်မြင်စွာစိုးမိုးနိုင်ပါမည်လော။ ကိုယ်တော်၏အချုပ်အခြာအာဏာကို လက်အောက်ခံရမည်ဟု ဘုရားသခင်တောင်းဆိုခြင်းကား တရားသလော။ ထို့အပြင် ပထမမောင်နှံစုံ၏အပြုအမူကိုထောက်ရှုသော် စာတန်၏စမ်းသပ်မှုခံရသောအခါ ဘုရားသခင်ကိုစိတ်ပါကိုယ်လျောက်ဝတ်ပြုရန်ရွေးချယ်မည့် အခြားလူသားများ ရှိနိုင်ပါမည်လော။ (ယောဘ၊ ၁:၇-၁၁။ ၂:၄) ဤမေးခွန်းများကိုဖြေဆိုပေးရန် အချိန်လိုအပ်ပေမည်။ ထိုပထမပုန်ကန်မှု၏ဆိုးကျိုးများကို ဖျောက်ဖျက်၍ အပြစ်မဲ့လူမျိုးချည်းသာနေထိုင်ရာ ကမ္ဘာ့ပရဒိသုဖြစ်လာရန် ဘုရားသခင်၏ရည်ရွယ်ချက်ကိုပြည့်စုံလာဖို့လည်း အချိန်ပေးရပေမည်။ ဤအရေးကိစ္စများ၏ နောက်ဆုံးဖြေရှင်းချက်ကို ကျွန်ုပ်တို့စောင့်မျှော်လျက်သာရှိဆဲပင်။
ကိုယ်တော်၏ ဤပညတ်တော်နှင့်အညီ ထာဝစဉ်အသက်ရှင်ရန်အခွင့်အရေးကို အာဒံနှင့်ဧဝထံမှ ဘုရားသခင်ရုပ်သိမ်းတော်မူခဲ့သည်။ ကိုယ်တော်၏ကြီးမြတ်သောရည်ရွယ်ချက် ပြည့်စုံလာရေးတွင် သူတို့ပါဝင်ရန် မထိုက်တန်တော့ချေ။ သို့ရာတွင် သူတို့မသေမီ သားသမီးမွေးဖွားခွင့်ရလိုက်လေသည်။ သူတို့မျိုးဆက်ထံ ပြစ်မဲ့သောအသက်ကို အာဒံနှင့်ဧဝအမွေမပေးနိုင်တော့သည်ကားအမှန်။ (ရောမ ၅:၁၂) သို့သော် ပေါက်ဖွားလာသောလူမျိုးဆက်တို့သည် မစုံလင်ကြ၍သေရမည့်ကိန်းဆိုက်ရဦးတော့ အချုပ်အခြာအာဏာနှင့်စပ်လျဉ်းသည့် မဟာအရေးကိစ္စတွင် မည်သည့်ဖက်၌ရပ်တည်ကြောင်း တစ်ဦးစီအနေနှင့် တင်ပြခွင့်ရှိကြသည်။
အရေးကိစ္စကိုဖြေရှင်းခြင်း
ကိုယ်တော်၏အချုပ်အခြာနှင့်ပတ်သက်သည့်ကိစ္စများကို ဘုရားသခင်မည်သို့ဖြေရှင်းပေးမည်နည်း။ ဧဒင်ဥယျာဉ်တွင်ပေါ်ပေါက်ခဲ့သော မေးခွန်းများသည် တစ်နည်းအားဖြင့် ယခုဖြေဆိုပြီးနေပြီ။ ဘုရားသခင်အကူအညီမပါဘဲ ဧဝပြုမူလျှင် သာ၍ကောင်းလိမ့်မည်ဟူသော စာတန်၏အဆိုသည် မုသာမျှသာဖြစ်ကြောင်း လူ့သမိုင်းကထင်ရှားစေခဲ့ပြီ။ ဘုရားသခင်ကိုလျစ်လျူရှုသည့် လူ့အုပ်ချုပ်မှုသည် တစ်ခါမျှမအောင်မြင်ခဲ့သေးပေ။ သမ္မာကျမ်းစာဆိုသည်အတိုင်းပင် “မိမိအကျိုးပျက်အောင် တစ်ယောက်ကိုတစ်ယောက် အုပ်စိုး” ခဲ့ကြပေပြီ။—ဒေသနာ ၈:၉။
တစ်ဖက်ကကြည့်ပြန်လျှင် အာဒံနှင့်ဧဝပြစ်မှားခဲ့ချိန်ကတည်းက နှစ်ပေါင်းများစွာအတွင်း ကောင်းရာကောင်းကျိုးများစွာကို တွေ့မြင်ခဲ့ရပါသည်။ များစွာသောသူတို့သည် ယေဟောဝါ၏အချုပ်အခြာအာဏာတော်ကို အဆက်မပြတ်တွယ်တာမြတ်နိုးကြောင်း တင်ပြခဲ့ပေပြီ။ အထူးခြားဆုံးပုံသက်သေမူကား “လူသား” ယေရှုခရစ်ကိုယ်တော်တိုင်ပင်ဖြစ်သည်။ (မဿဲ ၂၀:၁၈။ ဟေဗြဲ ၁၁:၁–၁၂:၃) ဘုရားသခင်၏ပညတ်ဥပဒေများကိုလိုက်နာ၍ ကိုယ်တော်၏အချုပ်အခြာအာဏာတော်ကို အသိအမှတ်ပြုသူတို့သည် ယင်းကားအကောင်းဆုံးနည်းလမ်းဖြစ်ကြောင်း တွေ့ရှိခဲ့ကြပေပြီ။ “ထာဝရဘုရား [ယေဟောဝါ၊ NW] ၏ကောင်းချီးမင်္ဂလာသည် စည်းစိမ်ကိုဖြစ်စေတတ်၏” ဟူသောပညာရှိစကား မှန်ကန်ကြောင်းကို သူတို့ခံစားခဲ့ရကြပြီ။ (သု၊ ၁၀:၂၂) ထို့အပြင် ရှင်ပြန်ထမြောက်ခြင်းအစီအစဉ်ကြောင့် ဘုရားသခင်၏ကြီးမြတ်သောရည်ရွယ်ချက်ပြည့်စုံရေးတွင် သူတို့တစ်နေ့သောအခါ ပါဝင်နိုင်ကြပေမည်။—ယောဟန် ၅:၂၈၊ ၂၉။
ကိုယ်တော်၏အစပထမရည်ရွယ်ချက်ကို ယေဟောဝါမေ့တော်မမူ။ အချုပ်အခြာအာဏာတော်ကို ငြင်းပယ်သူများသည် မြေကြီးပေါ်အာဏာပြခွင့် အမြဲရကြမည်မဟုတ်ပါ။ သူတို့ကို များမကြာမီ ဘုရားသခင်စီရင်တော်မူမည်အကြောင်း သမ္မာကျမ်းစာသတိပေးထားသည်။ ဤသို့ဖတ်ရှုရ၏။ “တရားကိုလွန်ကျူးခြင်းအမှုအမျိုးမျိုးတို့တစ်ဖက်၌ ဘုရားသခင်၏အမျက်တော်သည် ကောင်းကင်မှထင်ရှားလျက်ရှိ၏။” (ရောမ ၁:၁၈) အာမဂေဒုန်ဟု သမ္မာကျမ်းစာခေါ်ထားသည့် ဘုရားသခင်အမျက်တော်ထင်ရှားရောက်လုချိန်သည် ကိုယ်တော်အမှန်တကယ်တည်ရှိကြောင်း မလွဲဧကန်တင်ပြလိမ့်မည်။ ကိုယ်တော်၏အချုပ်အခြာအာဏာတော်ကို လက်ခံသူများသာလျှင် ထိုအချိန်တွင်မသေဘဲကျန်ရစ်လိမ့်မည်။ “ဖြောင့်မတ်သောသူတို့သည် ပြည်တော်၌နေ၍ စုံလင်သောသူတို့သည် နေရာကျကြလိမ့်မည်။ အဓမ္မလူတို့မူကား ပြည်တော်မှပယ်ရှင်းခြင်း၊ လွန်ကျူးသောသူတို့သည် နှုတ်ပစ်ခြင်းကိုခံရကြလိမ့်မည်။”—သု၊ ၂:၂၁၊ ၂၂။
မဟာအရေးကိစ္စနှင့် အသင်
ဤအချက်အလက်များကြောင့် အာဒံနှင့်ဧဝနည်းတူ ကျွန်ုပ်တို့တစ်ဦးစီသည် ရွေးချယ်စရာရှိသည်။ ဘုရားသခင်အကူအညီမပါဘဲ အသက်ရှင်ရန်ကြိုးစားကြမည်လော။ သို့မဟုတ် ကိုယ်တော်၏အချုပ်အခြာအာဏာတော်ကို လက်အောက်ခံမည်လော။ ယင်းသည် ယနေ့ကျွန်ုပ်တို့တစ်ဦးစီ ရင်ဆိုင်နေရကြသော မဟာအရေးကိစ္စဖြစ်ကြောင်း သတိရပါ။ အရေးကြီးဟန်ရှိသော အခြားအရေးကိစ္စများသည် သင်၏မျက်မှောက်အသက်တာနှင့်ပတ်သက်သည်။ ဤအရေးကိစ္စမူကား ထာဝရအသက်ရှင်ရေးနှင့်ပတ်သက်သည်။ သင်၏ဆုံးဖြတ်ချက်သည် သင်၏ထာဝရအနာဂတ်ကို ထိခိုက်ပါသည်။
ဘုရားသခင်၏အချုပ်အခြာအာဏာတော်ကို သင်လက်ခံကြောင်း မည်သို့တင်ပြမည်နည်း။ ကိုယ်တော်၏နှုတ်ကပါဌ်တော် သမ္မာကျမ်းစာကို လေ့လာခြင်းအားဖြင့်ဖြစ်သည်။ အခြားခရစ်ယာန်စစ်များနှင့်အတူ အလိုတော်ကိုနာခံရန် ရှာကြံခြင်းအားဖြင့်လည်းဖြစ်သည်။ (ဇေဖနိ ၂:၂၊ ၃) ဤသို့ပြုမူပါက ဘုရားသခင်၏ကြီးမြတ်သောရည်ရွယ်ချက် ပြည့်စုံလာခြင်းကိုတွေ့ရှိရန် ရွှင်လန်းအားရစွာဖြင့် မျှော်လင့်နိုင်ပေမည်။ ဤအံ့ချီးဖွယ်ကတိတော် ပြည့်စုံလာသည်ကို သင်တွေ့ရှိရလိမ့်မည်။ “ခဏကြာပြီးမှ မတရားသောသူသည်မရှိရ။ . . . စိတ်နှိမ့်ချသောသူတို့မူကား ပြည်တော်ကိုအမွေခံ၍ များပြားသောငြိမ်သက်ခြင်း၌ မွေ့လျော်ကြလိမ့်မည်။” (ဆာလံ ၃၇:၁၀၊ ၁၁) ဘုရားသခင်၏အချုပ်အခြာအာဏာတော်ကို လက်အောက်ခံသည့်အတွက် ဝမ်းသာစရာရလဒ်ပါတကား။ ဤအရေးကြီးကိစ္စကို ပညာရှိစွာဆုံးဖြတ်ရန် အကျိုးကြီးမားလှသောအကြောင်းဖြစ်ပါသည်တကား။