သမ္မာကျမ်းစာ—တည်းဟူသောတန်ဖိုးမဖြတ်နိုင်သည့် ကျောက်မျက်၏မျက်ကွက်များကို စူးစမ်းခြင်း

၁၈၆၇ ခုနှစ်တွင် ရှော့ခ်ဗန်နိတ်ခတ်ခ်အမည်ရှိ တောင်အာဖရိကလယ်သမားတစ်ဦးသည် ကလေးအချို့ကျောက်ခဲများနှင့် ကစားနေသည်ကို ကြည့်နေသည်။ တောက်ပ၍လှပသော ကျောက်တုံးတစ်လုံးကို သူမျက်စိကျမိသည်။ “ရှင်လိုချင်ရင်ယူသွားပါ” ဟုကလေးများ၏မိခင်ကဆိုသည်။ ပေါင်ငွေ ၅၀၀ တန်သောစိန်တုံးတစ်တုံးနှင့် သူတို့ကစားနေသည်ကို ကလေးများမသိရှာကြပါတကား။

အသင်လည်းသတိမထားမိဘဲ တန်ဖိုးမဖြတ်နိုင်သော ကျောက်မျက်တစ်တုံးကို ပိုင်ဆိုင်လျက်ရှိနိုင်ပါသလော။ ပုံပမာပြရသော် အများသည် အချိန်တိုင်းတွင်ရောင်းရအကောင်းဆုံး၊ ဖြစ်သောသမ္မာကျမ်းစာကို ဘာသာပေါင်း ၁,၉၀၀ ကျော်ဖြင့် တစ်အုပ်လုံး (ဝါ) တစ်စိတ်တစ်ဒေသ ပိုင်ဆိုင်ထားကြသည်။ သို့ပင်ငြားလည်း၊ လူအများသည် သမ္မာကျမ်းစာကို မဖတ်ရသေးချေ။ ထို့ကြောင့်ယင်းတွင်ပါဝင်သည့်အကြောင်း အနည်းငယ်သာ သိကြသည်။

သမ္မာကျမ်းစာသည် “ဘုရားသခင်မှုတ်သွင်းတော်မူ” ရာဖြစ်သောကြောင့် ဘုရားသခင်၏နှုတ်ကပါဌ်တော်ဖြစ်သည်။ (၂ တိမောသေ ၃:၁၆။ ၁ သက်သာလောနိတ် ၂:၁၃ နှင့်နှိုင်းယှဉ်) ယင်းသည်လူသားတို့၏ အဖိုးအထိုက်ဆုံး ပိုင်ဆိုင်ရာဖြစ်သည်။ ယင်းအားဖြင့်၊ လောလောဆယ်တွင် ဘဝ၏အနှစ်သာရကို မည်သို့ရယူနိုင်ကြောင်းနှင့် ပို၍အရေးကြီးသည်မှာ မည်သို့ထာဝရအသက်ရမည်ကို ထိုမှာသိရှိရပါသည်တကား။ (ယောဟန် ၁၇:၃၊ ၁၇) ယင်းထက်ပိုမိုအဖိုးထိုက်သည့်အရာ ရှိနိုင်ဦးပါမည်လော။

သို့သော်ဤကျောက်မျက်နှင့် ယင်း၏မျက်ကွက်အားလုံးကို လေးမြတ်နိုင်ရန် ယင်းနှင့်အကျွမ်းတဝင်ရှိရမည်။ အပေါ်ယံတစ်ချက်ကြည့်ရုံနှင့် မရနိုင်ချေ။ အကြောင်းမှာ၊ သမ္မာကျမ်းစာသည် သီးခြားစာအုပ် ၆၆ ခုစုပေါင်းထားသောကြောင့်ဖြစ်သည်။ ထိုစာအုပ်များတွင် ဘာများပါဝင်သနည်း။ ယင်းကိုအစဉ်အလိုက်စီထားရာ၌ အကြောင်းရင်းအချို့ရှိပါသလော။ ရှိပါက သမ္မာကျမ်းစာတွင် မိမိအထူးသိလိုသည့်အချက်တစ်ခုကို မည်သို့ရှာဖွေမည်နည်း။

သမ္မာကျမ်းစာနှင့်အကျွမ်းတဝင်ဖြစ်ရန်မှာ စိန်ခေါ်ချက်တစ်ရပ်ပင်ဖြစ်သည်။ သို့သော်တကယ့်ကျောက်မျက်ကဲ့သို့ သမ္မာကျမ်းစာတွင် ညီညွတ်တင့်တယ်၍ စနစ်ကျနမှုရှိလေသည်။ ထိုတွင်ပါဝင်သည်များကို ကျွန်ုပ်တို့အကျဉ်းသုံးသပ်လျှင် ယင်းကိုကျွန်ုပ်တို့တွေ့မြင်နိုင်မည်။

ဟေဗြဲကျမ်းစောင်များ—ခရစ်တော်ကိုညွှန်ပြခြင်း

သမ္မာကျမ်းစာကို ယေဘုယျအားဖြင့် “ဓမ္မဟောင်း” နှင့် “ဓမ္မသစ်” ဟုခွဲခြားထားသည်။ ယင်းသည်အမည်အလွဲခေါ်ခြင်းဖြစ်၍ “ဓမ္မဟောင်း” သည်ခေတ်နှောင်းကာ တန်ဖိုးသိပ်မရှိတော့ဟု သဘောသက်ရောက်စေသည်။ ထိုအပိုင်းကို ဟေဗြဲကျမ်းစောင်များဟုခေါ်တွင်လျှင် ပို၍လျော်ကန်သည်။ အကြောင်းမှာယင်းအပိုင်းကိုမူလက အဓိကဟေဗြဲဘာသာဖြင့် ရေးသားခဲ့သောကြောင့်ဖြစ်သည်။ “ဓမ္မသစ်ကျမ်းစောင်” ကို ပထမရာစုစီအီးတွင် ရေးသားခဲ့သည်။ ထို့ကြောင့်ယင်းကိုခရစ်ယာန်ဂရိကျမ်းစောင်များဟု ပိုမိုလျော်ကန်စွာခေါ်ဆိုသည်။

သမ္မာကျမ်းစာ၏ပထမဆုံးစာစောင် ကမ္ဘာဦး ကျမ်းသည်အဓွန့်ရှည်သောကာလက ဘုရားရှင်သည်ကောင်းကင်နှင့်မြေကြီးကိုဖန်ဆင်းကာ နောက်ပိုင်းတွင်မြေကြီးကိုလူနေရန်အတွက် စတင်ပြင်ဆင်ခြင်းဖြင့် အစပြုထားသည်။ ပထမဆုံးလူမောင်နှံကို စုံလင်စွာဖန်ဆင်းခဲ့သည်။ သို့သော်လည်းသူတို့သည် အပြစ်လမ်းစဉ်ကိုရွေးချယ်ခဲ့ကာ သူတို့၏သားမြေးများအပေါ် ကြေကွဲဖွယ်ဆိုးကျိုး သက်ရောက်စေခဲ့သည်။ သို့ပင်ငြားလည်းအလင်းမှိန်အောက်တွင် တွေ့ရသောကျောက်မျက်ပမာ သမ္မာကျမ်းစာသည် ကျဆုံးနေသောလူသားများအတွက် နောက်ဆုံးတွင်အပြစ်နှင့်သေခြင်း၏ ဆိုးကျိုးများကိုပယ်ရှားမည့် “မျိုးနွယ်တော်” တည်းဟူသော မျှော်လင့်ချက်အလင်းရောင်လေးပေးလေသည်။ (ကမ္ဘာဦး ၃:၁၅) ဤမျိုးနွယ်တော်ကား မည်သူဖြစ်မည်နည်း။ ကမ္ဘာဦးကျမ်းသည် ဤလာလတံ့သောမျိုးနွယ်တော်၏ မျိုးစဉ်ဆက်ကိုစ၍ခြေရာခံကာ သစ္စာရှိမျိုးနွယ်တော်၏ဘိုးဘေးအချို့ဖြစ်သော အာဗြဟံ၊ ဣဇာက်နှင့်ယာကုပ်တို့၏ အသက်တာအပေါ်အာရုံစိုက်စေသည်။

ထွက်မြောက်ရာ ကျမ်းသည် ဆက်လက်၍မောရှေ၏မွေးဖွားခြင်းကို ဖော်ပြသည်။ မောရှေ၏အသက်တာသည် နည်းလမ်းအများတွင် လာလတံ့သော မျိုးနွယ်တော်ကိုပုံတင်ပြလေသည်။ ဘေးဒဏ်ဆယ်ပါးပြီးနောက်၊ ဣသရေလများသည် အီဂျစ်မှခမ်းနားစွာပင်ထွက်ခွာခဲ့ပြီး သိနာတောင်တွင် ဘုရားရှင်၏အရွေးချယ်ခံလူမျိုးအဖြစ် တည်ထောင်ခဲ့သည်။ ဝတ်ပြုရာ ကျမ်း (လေဝိထုံးကျမ်း၊ သမာ) သည် အမည်ဖော်ပြသည့်အတိုင်းပင် ဣသရေလတွင်ရှိလေဝိဆိုင်ရာယဇ်ပုရောဟိတ်များအတွက် ဘုရားရှင်၏ပညတ်များကို ဖော်ပြထားလေသည်။ တောလည်ရာ ကျမ်း (စာရင်းတော်ဝင်ကျမ်း၊ သမာ) သည်ဣသရေလများကို ရေတွက်စဉ် (လူဦးရေစာရင်းကောက်ခြင်းဖြင့်) အကြောင်းနှင့် လွင်တီးခေါင်တွင်ဣသရေလတို့၏နေထိုင်ခဲ့စဉ်ဖြစ်ရပ်များကို ပြောပြလေသည်။ ယခုကတိထားရာပြည်ကို ဝင်ရန်ဆိုင်းငံ့စဉ် ဣသရေလများသည် မောရှေ၏နောက်ဆုံးသြဝါဒကိုခံယူသည်။ ယင်းကား တရားဟောရာ ကျမ်း၏အကြောင်းဖြစ်သည်။ လာလတံ့သောမျိုးနွယ်တော်ကိုညွှန်ပြလျက် မောရှေကအမျိုးသားချင်းတို့အား ‘ဘုရားသခင် . . . ပေါ်ထွန်းစေတော်မူ’ မည့်ပရောဖက်၏စကားကိုနားထောင်ရန် တိုက်တွန်းခဲ့သည်။—တရားဟောရာ ၁၈:၁၅။

သမိုင်းဆိုင်ရာကျမ်းများဆက်တွေ့ရသည်။ ယင်းတို့သည်အများအားဖြင့် သက္ကရာဇ်အစဉ်အတိုင်းဖြစ်သည်။ ယောရှု ကျမ်းသည် ကတိထားရာပြည်ကိုသိမ်းပိုက်၍ ပိုင်းခြားပုံကိုဖော်ပြသည်။ တရားသူကြီးမှတ်စာ သည်နောက်ပိုင်းနှစ်များတွင် ဣသရေလကို တရားသူကြီးများအားဖြင့် ဆက်လက်အုပ်ချုပ်သွားခဲ့စဉ် ထူးခြားသည့်ဖြစ်ရပ်များကို ဖော်ပြသည်။ ရုသ ဝတ္ထုသည် တရားသူကြီးများအချိန်တွင် အသက်ရှင်ခဲ့ပြီး ယေရှုခရစ်၏အဖွားတစ်ဦးဖြစ်ခွင့်ရခဲ့သူ ဘုရား-ကြောက်ရွံ့သူ အမျိုးသမီးတစ်ဦးအကြောင်းကို ပြောပြသည်။

သို့သော်လည်းတရားသူကြီးများ၏ အုပ်ချုပ်ချိန်အဆုံးသတ်ခဲ့သည်။ ဓမ္မရာဇဝင်ပထမစောင် သည် ပရောဖက်ရှမွေလ၏အမြင်တွင် ပထမဆုံးဣသရေလဘုရင်ရှောလု၏ ဝမ်းနည်းဖွယ်အုပ်ချုပ်ရေးအကြောင်းပြောပြသည်။ ဓမ္မရာဇဝင် ဒုတိယစောင်တွင် ရှောလုကိုဆက်ခံသူ ဒါဝိဒ်၏အောင်မြင်သောအုပ်ချုပ်မှုအကြောင်းကို ဖော်ပြသည်။ ဓမ္မရာဇဝင်တတိယစောင် နှင့် စတုတ္ထစောင် သည်ကျွန်ုပ်တို့အား ရှောလမုန်၏ဘုန်းတန်ခိုးကြီးသော အုပ်ချုပ်ရေးမှ ဣသရေလများ၏ ဝမ်းနည်းဖွယ်ဗာဗုလုန်သို့သုံ့ပန်းအဖြစ်ရောက်ချိန် ၆၀၇ ဘီစီအီးသို့ခေါ်ဆောင်သွားသည်။ ပထမ နှင့် ဒုတိယရာဇဝင်ချုပ် သည် ဤသုံ့ပန်းဘဝမှပြန်လာသော အခွင့်ကောင်းရနေသော လူမျိုး၏ရှုထောင့်မှ ဤရာဇဝင်ကို အကျဉ်းချုပ်ပြန်လည်တင်ပြထားသည်။ နောက်ဆုံးတွင်၊ ဧဇရ၊ နေဟမိ နှင့် ဧသတာ ကျမ်းများက ဣသရေလများသူတို့၏ဌာနေသို့ မည်သို့ပြန်လည်နေထိုင်ပုံနှင့် သူတို့၏နောက်ဆက်တွဲရာဇဝင်ကို ဖော်ပြလေသည်။

ဆက်လက်၍ကဗျာများတွေ့ရကာ ရေးသားခဲ့သမျှတွင် အလှပဆုံးကဗျာအချို့ ပါဝင်လေသည်။ ယောဘ ကျမ်းသည် ဒုက္ခဝေဒနာနှင့် ယင်း၏ဆုကျေးဇူးအောက်တွင် စိတ်လှုပ်ရှားဖွယ် သစ္စာစောင့်သိမှုကို တင်ပြလေသည်။ ဆာလံကျမ်း တွင် ယေဟောဝါထံချီးမွမ်းခြင်းသီချင်းနှင့် ကရုဏာနှင့်ကူညီမှုအတွက် ဆုတောင်းခြင်းများပါဝင်သည်။ ယင်းတို့သည်မရေတွက်နိုင်သော ဘုရားကျေးကျွန်များကို နှစ်သိမ့်မှုဖြစ်စေခဲ့သည်။ ထို့ပြင်၊ ဆာလံကျမ်းတွင် လာလတံ့သောမေရှိယနှင့်စပ်လျဉ်း၍ ကျွန်ုပ်တို့အားထပ်ဆင့်ထွန်းလင်းပေးသည့် ပရောဖက်ပြုချက် အတော်အတန်ပါဝင်သည်။ သုတ္တံကျမ်း နှင့် ဒေသနာကျမ်း သည် ဘုရားရှင်ပညာတော်၏ မျက်ကွက်များကို တိုတိုနှင့်အချက်ကျကျ ပြောဆိုချက်များကို ဖော်ပြထားသည်။ ရှောလမုန်သီချင်း မူကား ပို၍အတွင်းနက်သော ပရောဖက်ဆိုင်ရာ အဓိပ္ပာယ်ရှိသည့် သာလွန်ထူးကဲသည့် မေတ္တာကဗျာဖြစ်သည်။

နောက် ၁၇ စောင်ဖြစ်သော ဟေရှာယ မှ မာလခိ အထိကျမ်းများသည် အဓိကအားဖြင့် ပရောဖက်ပြုချက်များဖြစ်သည်။ မြည်တမ်းစကား မှလွဲ၍အားလုံးသည် ရေးသားသူ၏နာမည်တပ်ထားသည်။ ဤပရောဖက်ပြုချက်အများသည် မှတ်သားဖွယ်ပြည့်စုံချက်များ ရှိပြီးဖြစ်သည်။ ယင်းတို့သည်ကျွန်ုပ်တို့အချိန်နှင့် မကြာမီသောအနာဂတ်ရှိ အထွတ်အထိတ်ဖြစ်ရပ်များကိုလည်း ညွှန်ပြလျက်ရှိသည်။

ထို့ကြောင့်ဟေဗြဲကျမ်းစောင်များသည် အံ့ဖွယ်ပုံစံအမျိုးမျိုးနှင့်တင်ပြလေသည်။ သို့ပင်ငြားလည်း၊ အားလုံးတွင်တူညီသော အဓိကအချက်ရှိသည်။ သူတို့၏ပရောဖက်ပြုချက်များ၊ မျိုးဆက်စာရင်းများနှင့် ထူးကဲသည့်ဖြစ်ရပ်များသည် လက်တွေ့ကျသော ဉာဏ်ပညာနှင့် ပရောဖက်ပြုချက်ဆိုင်ရာများနှင့် အရောင်လက်လျက်ရှိသည်။

ခရစ်ယာန်ဂရိကျမ်းစောင်များ—မျိုးနွယ်တော်ပေါ်ထွန်း

အပြစ်ထဲသို့လူသားများကျဆင်းချိန်မှ နှစ်ပေါင်းလေးထောင် ကုန်ဆုံးခဲ့ပေပြီ။ ဗြုန်းကနဲပင် မြေကြီးမြင်ကွင်းတွင် ကြာမြင့်စွာကပင်စောင့်မျှော်ခဲ့သော မျိုးနွယ်တော်မေရှိယ ပေါ်ထွန်းလာပါပြီတကား။ ခရစ်ယာန်ဂရိကျမ်းစောင်များသည် လူ့သမိုင်းတွင်ဤအဓိကသော့ချက်ဖြစ်သူ၏ အမှုဆောင်ခြင်းကို ခရစ်ဝင်ကျမ်းများဟုခေါ်ဝေါ်သော ပြီးပြည့်စုံလင်သော သီးခြားစာစောင်လေးစောင်တွင် မှတ်တမ်းတင်ထားသည်။ ယင်းတို့မှာ မဿဲ ၊ မာကု ၊ လုကာ နှင့် ယောဟန် ဖြစ်သည်။

ခရစ်ယာန်များအတွက် ဤခရစ်ဝင်ကျမ်းလေးစောင်သည် မည်မျှတန်ဖိုးရှိပါသည်တကား။ ယင်းတို့ကယေရှု၏အံ့ဖွယ်လုပ်ရပ်များ၊ ကိုယ်တော်၏အဓိပ္ပာယ်ပြည့်ဝသည့် ပုံဥပမာများ၊ တောင်ပေါ်ဒေသနာများ၊ ကိုယ်တော်၏နှိမ့်ချမှုပုံသက်သေများ၊ ကိုယ်တော်၏ကရုဏာနှင့်မိမိ၏ခမည်းတော်အပေါ် အကြွင်းမဲ့နာခံပုံ၊ မိမိ၏ “သိုး” များအပေါ်ကိုယ်တော်၏မေတ္တာနှင့် နောက်ဆုံးတွင် ကိုယ်တော်၏ပူဇော်သက္ကာဆိုင်ရာသေခြင်းနှင့် ဘုန်းတော်နှင့်ထမြောက်ခြင်းများကို ပြောပြသည်။ ခရစ်ဝင်ကျမ်းများကိုလေ့လာခြင်းက ကျွန်ုပ်တို့အတွင်း ဘုရားရှင့်သားတော်အတွက် နက်ရှိုင်းသောမေတ္တာကို တည်ဆောက်ပေးသည်။ အဓိကမှာ၊ ကျွန်ုပ်တို့သည်ခရစ်တော်ကိုစေလွှတ်သည့် ယေဟောဝါဘုရားထံ ပိုမိုနီးကပ်စေသည်။ ဤမှတ်တမ်းများကို ထပ်ကာတလဲလဲ ဖတ်ရကျိုးနပ်ပါသည်။

တမန်တော် ကျမ်းသည် ခရစ်ဝင်ကျမ်းများရပ်ခဲ့သည့်နေရာမှ အစပြုသွားသည်။ ယင်းသည် ခရစ်ယာန်အသင်းတော်၏ စောစောပိုင်းနှစ်များဖြစ်သော ပင်တေကုတ္တေပွဲနေ့မှ ၆၁ စီအီးတွင်ရောမ၌ ပေါလုအကျဉ်းကျချိန်အထိ အကြောင်းကိုဖော်ပြသည်။ ဤစာစောင်တွင်၊ ပထမဆုံးခရစ်ယာန်အသတ်ခံရသူ သတေဖန်၊ နောက်ပိုင်းတွင်တမန်တော်ပေါလုဖြစ်လာသည့် ရှောလု၏ဘာသာပြောင်းလာပုံ၊ ပထမဆုံးလူမျိုးခြားဘာသာဝင်များဝင်ရောက်လာပုံနှင့် ပေါလု၏စိတ်လှုပ်ရှားဖွယ် ဧဝံဂေလိခရီးစဉ်များအကြောင်းကို ကျွန်ုပ်တို့ဖတ်ရသည်။ ဤမှတ်တမ်းများသည် စိတ်တက်ကြွဖွယ်ဖြစ်ပြီး ယုံကြည်ခြင်းကိုလည်းတည်ဆောက်ပေးသည်။

စာစောင် သို့မဟုတ် ပေးစာနှစ်ဆယ့်တစ်စောင် သို့ယခုရောက်ရှိလာသည်။ ပေါလု၏ပထမ ၁၄ စောင်သည်စာရရှိသောခရစ်ယာန်များ သို့မဟုတ် အသင်းတော်များ၏အမည်နှင့်တပ်ထားသည်။ ကျန်စာစောင်များသည် ရေးသားသူများဖြစ်သော ယာကုပ်၊ ပေတရု၊ ယောဟန်နှင့်ယုဒ၏အမည်များတပ်ထားသည်။ ဤစာစောင်များတွင် ကြွယ်ဝလှစွာသော ဩဝါဒနှင့်အားပေးချက်များ ပါဝင်ပါသည်တကား။ ယင်းတို့တွင်ကျမ်းအယူနှင့် ပရာဖက်ပြုချက်များ၏ ပြည့်စုံချက်များပါဝင်ပါသည်။ သူတို့နေရမည့်ဆိုးယုတ်သော အသိုင်းအဝိုင်းမှ သီးခြားနေရန် ခရစ်ယာန်များကိုယင်းတို့က ကူညီပေးသည်။ ညီအစ်ကိုချင်းမေတ္တာနှင့် အခြားဘုရားရေးရာ အရည်အချင်းများ မွေးမြူရန်လိုအပ်ပုံကို ယင်းတို့ကအလေးအနက်တင်ပြသည်။ ဝိညာဏဆိုင်ရာအသက်ကြီးသူများ၏ ညွှန်ကြားမှုအောက်၌ လျောက်ပတ်သောအသင်းတော်ဖွဲ့စည်းပုံအတွက် ပုံစံကိုယင်းတို့ကချမှတ်ပေးသည်။

ဟေဗြဲကျမ်းစောင်များသည် ပရောဖက်ပြုချက်နှင့် နိဂုံးချုပ်သကဲ့သို့ ဂရိကျမ်းစောင်များလည်း အလားတူပင်ဖြစ်သည်။ ၉၆ စီအီးခန့်တွင် တမန်တော်ယောဟန်ရေးသားခဲ့သော ဗျာဒိတ် ကျမ်းသည် ပရောဖက်ပြုချက်များနှင့် သမ္မာကျမ်းစာ၏ အဓိကအချက်ဖြစ်သည့် ယေဟောဝါ၏မေရှိယနိုင်ငံအားဖြင့် ကိုယ်တော်၏နာမ ထင်ရှားစေခြင်းကို စုစည်းတင်ပြသည်။ ရူပါရုံများသည် ဘာသာရေး၊ စစ်မှုနှင့်စာတန်၏ယိုယွင်းသော အုပ်ချုပ်မှုအားလုံးကို ဖျက်ဆီးခြင်းအား ကွင်းကွင်းကွက်ကွက်ဖော်ပြသည်။ ယင်းတို့ကိုခရစ်တော်၏အုပ်ချုပ်ရေးဆိုင်ရာမြို့ဖြင့် အစားထိုးပြီး ၄င်းကမြေကြီးမှုရေးရာများကို စီမံရန် လုပ်ဆောင်သည်။ ဤနိုင်ငံတော်အုပ်ချုပ်မှုအောက်တွင် ဘုရားရှင်သည် “မျက်ရည်ရှိသမျှတို့ကိုသုတ် . . . မည်။ နောက်တစ်ဖန်သေဘေးမရှိရ” ဟုကတိပြုထားသည်။—ဗျာဒိတ် ၂၁:၄။

သို့ဖြစ်လျှင်သမ္မာကျမ်းစာသည် ဘုရားရေးရာအလင်းကို ရောင်ပြန်သည့် အနာအဆာကင်းမဲ့သည့် ကျောက်မျက်ဖြစ်ကြောင်း စောဒကတက်စရာ ရှိပါသလော။ ယင်းတစ်အုပ်လုံးကို သင်မဖတ်ရှုရသေးလျှင် ယခုစတင်ပါလေ။ သင်သည်ယင်း၏ညီညွတ်တင့်တယ်ခြင်းကြောင့် ဆွဲဆောင်ခံရကာ၊ ယင်း၏တောက်ပမှုကြောင့် ထွန်းလင်းလျက်၊ ၄င်းသတင်းတော်ကြောင့် ဘဝင်ခိုက်မိပါလိမ့်မည်။ ယင်းသည်အမှန်ပင် “ကောင်းမြတ်စုံလင်သောဆုကျေးဇူး. . . အလင်းတို့၏အဘထံတော်ကသက်ရောက်” ခြင်းဖြစ်လေသည်။—ယာကုပ် ၁:၁၇။