မယ်တော်ဘုရားမဝတ်ပြုမှုသည် ရှင်သန်နေဆဲလော

မိ ခင်ဘုရားမဝတ်ပြုရေးသည် ရှေးခရစ်ယာန်များခေတ်တွင် ရှင်သန်ဆဲရှိခဲ့သည်။ အာရှမိုင်းနား၊ ဧဖက်မြို့တွင် ၄င်းနှင့်ပေါလုတွေ့ကြုံခဲ့ရသည်။ ဘုရားမကိုးကွယ်ရာအခြားမြို့တော်တစ်ခုဖြစ်သည့် အာသင်မြို့တွင်သူပြုခဲ့သည်နည်းတူ “လောကဓာတ်ကိုဖန်ဆင်းတော်မူသောဘုရားသခင်” အသက်ရှင်တော်မူထသောဖန်ဆင်းရှင်သည် “လူတို့အတတ်အကြံအစည်အားဖြင့်ထုလုပ်သော ရွှေရုပ်တု၊ ငွေရုပ်တု၊ ကျောက်ရုပ်တု” တို့နှင့်မတူကြောင်း သက်သေခံခဲ့ပါသည်။ ယင်းသည် မယ်တော်ဘုရားမ အာတေမိကိုကိုးကွယ်ကြသော ဧဖက်မြို့သားများအတွက် သည်းမခံနိုင်စရာစကားများဖြစ်လေသည်။ သို့နှင့် ငွေထည်ဖြင့် ထိုဘုရားမရုပ်တုများထုလုပ်၍ ဝမ်းစာရှာသူတို့က လူထုအားထကြွဆူပူစေရန်လှုံ့ဆော်ပေးခဲ့သည်။ ထိုအခါ လူအုပ်က “ဧဖက်လူတို့၏အာတေမိသည် ကြီးမြတ်တော်မူ၏” ဟုနှစ်နာရီခန့်အော်ဟစ်ကြလေသည်။—တမန်တော်၊ ၁၇:၂၄၊ ၂၉။ ၁၉:၂၆၊ ၃၄။

ဧဖက်လူတို့၏အာတေမိ

ဂရိလူတို့လည်း အာတေမိကိုကိုးကွယ်သည်။ သို့သော် ဧဖက်မြို့တွင်ကိုးကွယ်သောအာတေမိနှင့် အနည်းငယ်ကွာခြားသည်။ ဂရိတို့၏အာတေမိမှာ အမဲလိုက်ခြင်းနှင့်မွေးဖွားခြင်းဆိုင်ရာ အပျိုကညာဘုရားမဖြစ်သည်။ ဧဖက်လူတို့၏အာတေမိမူကား မျိုးပွားခြင်းဘုရားမဖြစ်သည်။ ဧဖက်မြို့တွင်တည်သော သူမ၏ကျောင်းတိုက်ကြီးမှာ အလွန်ဟိန်းလှသဖြင့် ကမ္ဘာ့အံ့ချီးဖွယ်ရာခုနစ်ခုတွင် တစ်ခုပါဝင်သည်ဟုဆိုကြ၏။ ကောင်းကင်မှကျဆင်းလာသည်ဟုယူဆကြသော သူမ၏ရုပ်တုသည် ကြက်ဥပုံရင်သားများဖြင့်တန်းစီနေရာ မျိုးဆက်မျိုးပွားခြင်း၏ပြယုဂ်အဖြစ် သူမအားတင်စားထားသည်။ ဤရင်သားများ၏ထူးခြားသောပုံစံကို အမျိုးမျိုးရှင်းပြကြသည်။ ၄င်းတို့မှာ ကြက်ဥပန်းကုံးများ သို့မဟုတ် နွားသိုးဝှေ့စေ့များကိုတင်စားသည်ဟူ၍ပင် ရှင်းပြကြ၏။ မည်သို့ပင်ရှိစေကာမူ မျိုးပွားခြင်းကိုပုံဆောင်ကြောင်း ရှင်းလင်းပြတ်သားပါသည်။

The New Encyclopœdia Britannica အရ ဤဘုရားမ၏မူရင်းရုပ်တုသည် “ရွှေ၊ သစ်နက်သား၊ ငွေနှင့်ကျောက်နက်” ဖြင့်ထုလုပ်ထားသောကြောင့် စိတ်ဝင်စားစရာပင်။ ဧဖက်လူတို့၏ စီအီးဒုတိယရာစုမှဖြစ်သော နာမည်ကျော်အာတေမိရုပ်တုတစ်ခု၏ မျက်နှာ၊ လက်များနှင့်ခြေထောက်တို့မှာ အနက်ရောင်ဖြစ်သည်။

အာတေမိရုပ်တုကို လမ်းပေါ်လှည့်လည်ပြစားလေ့ရှိသည်။ ကျမ်းစာပညာရှင် R. B. Rackham ဤသို့ရေးသားထားသည်။ “[အာတေမိ၏] ကျောင်းတိုက်အတွင်းတွင် . . . သူမ၏ရုပ်တုများ၊ ဓာတ်တော်ကြုတ်များ၊ ရွှေငွေဖြစ်သောခွက်ယောက်ဖလားတော်များ သိမ်းဆည်းထားပြီး ပွဲနေ့များတွင် ယင်းတို့ကို မြို့ထဲသို့ ထည်ထည်ဝါဝါစီတန်းသယ်ဆောင်တတ်ကြသည်။” ဤပွဲနေ့များသို့ အာရှမိုင်းနားမှ ဘုရားဖူးသူထောင်ပေါင်းများစွာတို့လာကြသည်။ သူတို့သည် ဘုရားမ၏ဓာတ်တော်ကြုတ်ကလေးများ ဝယ်ယူကြပြီး “ဆုပန်ချက်များကိုနားညောင်း၍ လက်ခံသူ” ကြီးမြတ်တော်မူသော ဂုဏ်းထူးဆောင်သခင်မ၊ ဘုရင်မမြတ်၊ အပျိုကညာတော်ဟူ၍ ချီးမွမ်းထောမနာပြုကြ၏။ ဤသို့သောဝန်းကျင်မျိုးတွင် “ရွှေ၊ ငွေ၊ ကျောက်” ဖြစ်ဘုရားနှင့်ဘုရားမများအစား “လောကဓာတ်ကိုဖန်ဆင်းတော်မူသောဘုရား” ကိုပေါလုနှင့်ရှေးခရစ်ယာန်များ အမွှမ်းတင်ချီးမွမ်းကြရန် ကြီးစွာသောသတ္တိလိုအပ်ပေသည်။

မယ်တော်ဘုရားမမှ “ဘုရားမယ်တော်”

ဧဖက်မြို့ရှိခရစ်ယာန်အသင်းတော်၏အကြီးအကဲများအား ဖောက်ပြန်ခြင်းဖြစ်ပေါ်လာမည့်အကြောင်း တမန်တော်ပေါလုကြိုတင်ပြောကြားခဲ့သည်။ ဖောက်ပြန်သူများပေါ်လာ၍ “မှားသောစကားကိုပြော” လိမ့်မည်ဟု သူသတိပေးခဲ့သည်။ (တမန်တော် ၂၀:၁၇၊ ၂၈-၃၀) ဧဖက်မြို့တွင်အမြဲစိုးရိမ်ဖွယ်ရှိသောအန္တရာယ်များအနက်တစ်ခုမှာ မယ်တော်ဘုရားမဝတ်ပြုမှုကို ပြန်လိုက်စားခြင်းဖြစ်သည်။ ယင်းသို့အမှန်ဖြစ်ပျက်ခဲ့သလော။

New Catholic Encyclopedia တွင်ကျွန်ုပ်တို့ဤသို့ဖတ်ရှုရသည်။ “ဘုရားဖူးမြို့တော်ဖြစ်သောကြောင့် ဧဖက်မြို့သည် [တမန်တော်] ယောဟန်၏သင်္ချိုင်းတည်ရာမြို့ဟူ၍ယူမှတ်ထားကြသည်။ . . . ဧဖက်ကောင်စီ (၄၃၁) ထောက်ခံသည့် အခြားရှေးထုံးစဉ်လာတစ်ခုသည် အရှင်မြတ်ယောဟန်နှင့်ဆုထူးရအပျိုကညာမာရိတို့အား ဆက်စပ်ထားသည်။ ထိုကောင်စီစည်းဝေးကျင်းပရာအဆောက်အဦကို မာရိကျောင်းတိုက်ဟုခေါ်ကြသည်။ ကက်သလစ်စာစောင်တစ်စောင်က (Théo—Nouvelle encyclopédie catholique) ဧဖက်မြို့သို့ ယောဟန်နောက် မာရိလိုက်ပါသွားပြီး ထိုမြို့တွင်သေသည်အထိနေထိုင်ခဲ့သည့် “အကျိုးသင့်အကြောင်းသင့်ရှေးထုံးစဉ်လာ” ရှိသည်ဟုဆို၏။ ဧဖက်မြို့နှင့်မာရိ ဆက်စပ်မှုရှိသည့်အဆိုကား ယနေ့ကျွန်ုပ်တို့အတွက် အဘယ်ကြောင့်အရေးကြီးသနည်း။

The New Encyclopœdia Britannica အားဖြေဆိုခွင့်ပြုစို့။ “ကောန်စတင်တိုင်းလက်ထက်တွင် ခရစ်ယာန်အသင်းတော်သည် ဧကရာဇ်နိုင်ငံ၏အသင်းတော်ဖြစ်လာသောအခါ ဘုရားသခင့်မယ်တော်ကိုဝတ်ပြုရေးသည် အရှိန်ရလာ၍ နတ်ဘုရားများကိုးကွယ်သူလူထုလည်း အသင်းတော်အတွင်း အုပ်စုလိုက်ချီ၍ဝင်လာကြသည်။ . . . ဤသူများ၏ကြည်ညိုကိုင်းရှိုင်းမှုနှင့်ဘာသာတရားလေးစားခြင်းသည် ရှေးပဝေသဏီကာလကတည်းကခေတ်စားခဲ့သော ဗာဗုလုန်နှင့်အာရှုရိဘာသာတရားမှ ‘ကြီးမြတ်သောမယ်တော်ဘုရားမ’ နှင့် ‘မြင့်မြတ်သောအပျိုကညာတော်’ ကိုးကွယ်မှုတို့မှဆင်းသက်လာသည်။ မယ်တော်ဘုရားမကိုးကွယ်မှုကို “ခရစ်ယာန်ဘာသာရပ်ဖြစ်စေခြင်း” အတွက် ဧဖက်မြို့သည် အကောင်းဆုံးနေရာဖြစ်ပေသည်။

သို့ဖြင့် စီအီး ၄၃၁ ခုနှစ်၌ဧဖက်မြို့တွင် တတိယအကြိမ်ဟုဆိုသည့် ဘာသာရေးဂိုဏ်းများ၏ကောင်စီစည်းဝေးက မာရိအား “သီအိုတိုကာ့စ်” (Theotokos) ဘွဲ့အပ်နှင်းခဲ့သည်။ ယင်းမှာ “ဘုရားဖွားမြင်သူ” သို့မဟုတ် “ဘုရားသခင့်မယ်တော်” အဓိပ္ပာယ်ရှိသည့်ဂရိစကားလုံးဖြစ်သည်။ New Catholic Encyclopedia ဤသို့ဆိုသည်။ “ဤဘွဲ့နာမကိုအသင်းတော်ကအသုံးပြုလိုက်ခြင်းဖြင့် နောင်လာမည့်ရာစုနှစ်များအတွင်း မာရိနှင့်စပ်ဆိုင်သောအယူဝါဒ၊ သူမအားကိုးကွယ်ခြင်းကို ကြီးပွားတိုးတက်လာရန် ဆုံးဖြတ်ခွင့်ပြုလိုက်ခြင်းအမှန်ဖြစ်ပေသည်။”

ဤကောင်စီအဖွဲ့ စည်းဝေးခဲ့ရာ “အပျိုကညာမာရိ၏ဘုရားရှိခိုးကျောင်း” တိုက်ပျက်များကို ရှေးဧဖက်မြို့တည်ရှိရာအရပ်တွင် ယနေ့တိုင်တွေ့ရှိနိုင်သေးသည်။ ရှေးထုံးစဉ်လာအရ သေသည်တိုင်မာရိနေထိုင်ခဲ့သောအိမ်ဟုဆိုသည့် ကျောင်းတိုက်တစ်ခုထံလည်း သွားရောက်လည်ပတ်နိုင်ပါသည်။ ၁၉၆၇ ခုနှစ်က ဤမာရိယန်ကျောင်းတိုက်များထံ ပုပ်ရဟန်းမင်း ဆဌမမြောက်ပေါလ် လည်ပတ်သည်ဟုဆို၏။

မှန်ပေသည်၊ ဧဖက်မြို့တွင်ပင် ပထမရာစု၌ ပေါလုကြုံတွေ့ခဲ့ရသော ဒိဌိအယူဖြစ်သည့် မယ်တော်ဘုရားမကိုးကွယ်မှုကို အသွင်ပြောင်းလဲကာ “ဘုရားသခင့်မယ်တော်” အဖြစ်မာရိအားကြည်ညိုမြတ်နိုးခြင်း ပြင်းထန်လာသည်။ ထိုကြောင့် မယ်တော်ဘုရားမကိုးကွယ်မှုသည် မာရိကိုကြည်ညိုဝတ်ပြုခြင်းအားဖြင့် ခရစ်ယာန်ဘောင်တိုင်းနိုင်ငံများတွင် ဆက်ရှင်သန်နေပါသည်။

မယ်တော်ဘုရားမကိုးကွယ်မှု ရှင်သန်နေဆဲ

“၅ ရာစုနှစ်တွင် ဧဖက်မြို့၌အပျိုကညာမာရိအား ဂုဏ်တင်ချီးမြှင့်ခြင်းကား အန်နတိုလီယာနိုင်ငံတွင် အပျိုကညာမိခင်မြတ်အား ဒိဌိများကိုးကွယ်ခြင်း၏ [ပြန်ပေါ်လာသော] ပုံစံပင်ဖြစ်သည်ဟု ကျမ်းစာပညာရှင် W. M. Ramsay ၏ထောက်ပြချက်ကို Encyclopœdia of Religion and Ethics ကကိုးကားထားသည်။ The New International Dictionary of New Testament Theology ကဤသို့ဆိုသည်။ “‘ဘုရားသခင့်မယ်တော်’ နှင့် ‘ကောင်းကင်ဘုရင်မ’ ဟူသောကက်သလစ်အယူအဆများသည် ဓမ္မသစ်ကျမ်းနောက်ပိုင်းမှဖြစ်သော်လည်း ၄င်းတို့သည် အရှေ့တိုင်းတွင် ရှေးပဝေသဏီကာလကတည်းက ဘာသာရေးနှင့်သမိုင်းတွင်အမြစ်တွယ်ခဲ့ကြောင်း ညွှန်ပြပါသည်။ . . . နောင်တွင်မာရိအားကိုးကွယ်ကြည်ညိုခြင်း၌ ဒိဌိအယူဖြစ်သည့် မြင့်မြတ်သောမယ်တော်ဂိုဏ်းနှင့် ဆင်တူယိုးမှားသဘောထား မြောက်မြားစွာရှိသည်။

ဤဆင်တူယိုးမှားချက်တို့မှာ များလွန်းလှသည့်ပြင် အသေးစိတ်ဖေါ်ပြချက်ဖြစ်လွန်းသဖြင့် မတော်တဆတိုက်ဆိုင်မှုမဖြစ်နိုင်ပါ။ အပျိုကညာမာရိ၏ မိခင်နှင့်သားရုပ်တုများသည် အိုင်စစ္စကဲ့သို့သော ဒိဌိဘုရားမများ၏ရုပ်တုများနှင့် တူညီချက်များရှိသည်ကို သတိမထားမိဘဲမနေနိုင်ပါ။ ကမ္ဘာတစ်လွှားကက်သလစ်ဘုရားရှိခိုးကျောင်းများရှိ အနက်ရောင်မက်ဒေါနာ (Black Madonna) ၏ရုပ်တုများစွာတို့သည် အာတေမိ (Artemis) ရုပ်တုကိုသတိရစေသည်။ ဤအနက်ရောင်အပျိုကညာများအကြောင်း စာစောင်တစ်စောင် (Théo—Nouvelle encyclopédie catholique) ကဤသို့ဆိုသည်။ ၄င်းတို့သည် ဒိုင်နာ (Diana သို့မဟုတ် Artemis) . . . သို့မဟုတ် Cybele (စိုင်ဘီလီ) အားကျန်ကြွင်းသည့်ကြည်ညိုလေးမြတ်ခြင်းကို မာရိအပေါ်သို့လွှဲပြောင်းပေးနည်းဖြစ်ပုံရှိသည်။” အပျိုကညာမာရိ၏ တက်ကြွရာပွဲတော်နေ့ (Assumption Day) ၌ တန်းစီလှည့်လည်ခြင်းအခမ်းအနားများသည် စိုင်ဘီလီနှင့်အာတေမိတို့၏အခမ်းအနားအစီအစဉ်များကို အတုယူထားခြင်းဖြစ်ပေသည်။

မာရိအား ပေးအပ်ထားသောဘွဲ့အမည်များကိုယ်နှိုက်က ဒိဌိဆိုင်ရာ မယ်တော်ဘုရားမများကို မှတ်မိသတိရစေသည်။ အစ်ရှ်တာအား “သန့်ရှင်းသောအပျိုကညာ”၊ “အကျွန်ုပ်သခင်မ”၊ “ဆုပတ္ထနာကိုနားညောင်းတော်မူသော ကရုဏာရှင်မိခင်” အဖြစ်ချီးမွမ်းထောမနာပြုကြသည်။ အိုင်စစ္စနှင့်အက်စ်တာ့တို့ကို “ကောင်းကင်ဘုရင်မ” ဟုခေါ်ဆိုခဲ့သည်။ စိုင်ဘီလီကိုကား “ချီးမြှင့်ခံရသူခပ်သိမ်းတို့၏မယ်တော်” ဟုခေါ်ဝေါ်ကြသည်။ အနည်းအကျဉ်းသာပြုပြင်ကာ ဤဘွဲ့နာမအားလုံးတို့ဖြင့် မာရိကိုခေါ်ဝေါ်ကြသည်။

ဒုတိယမြောက်ဗက်တီကင်သည် “ဆုထူးရအပျိုကညာ” အယူအဆကိုအားပေးထောက်ခံသည်။ ပုပ်ရဟန်းမင်း ဒုတိယဂျောန်ပေါလ်သည် မာရိကိုအလွန်ကြည်ညိုလေးမြတ်သူဖြစ်ကြောင်း နာမည်ကျော်သည်။ သူ၏ကျယ်ပြန့်သောခရီးစဉ်များတွင် ပိုလန်နိုင်ငံ ဇက်စတိုချိုယာမြို့ရှိ အနက်ရောင်မက်ဒေါနာကျောင်းတိုက်ပါအပါအဝင် မာရိနှင့်သက်ဆိုင်သောကျောင်းတိုက်များသို့ လည်ပတ်ဝတ်ပြုရန်အခွင့်အရေးကို သူလက်မလွှတ်ခဲ့ကြောင်းသိရှိရသည်။ ကမ္ဘာတစ်ဝန်းကို မာရိထံသူအပ်နှင်းသည်။ ထိုကြောင့် “မယ်တော်ဘုရားမ” ခေါင်းစဉ်အောက်တွင် The New Encyclopœdia Britannica ကဤသို့ရေးသားထားခြင်းသည် အံ့အားသင့်စရာမဟုတ်ပါ။ “ဤအခေါ်အဝေါ်ကို အမျိုးပုံစံမတူခြားနားလှသည့် ကျောက်ခေတ်ဗီနပ်စ်များဟုအမည်ပေးထားသောရုပ်တုများနှင့်လည်းကောင်း၊ အပျိုကညာမာရိနှင့်လည်းကောင်း စပ်လျဉ်း၍အသုံးပြုထားသည်။”

သို့သော် ရိုမန်ကက်သလစ်တို့၏ မာရိအားကြည်ညိုလေးမြတ်ပုံတစ်ခုတည်းဖြင့်သာ မယ်တော်ဘုရားမဝတ်ပြုရေးသည် ကျွန်ုပ်တို့ခေတ်တိုင်ရှင်သန်လာသည်မဟုတ်ပါ။ အမျိုးသမီးအရေးကိုထောက်ခံအားပေးသူတို့သည် မယ်တော်ဘုရားမများဝတ်ပြုမှုနှင့်စပ်ဆိုင်သော စာပေအမြောက်အမြားကို ပုံနှိပ်ထုတ်ဝေထားသည်ကား ထူးခြားသည့်စိတ်ဝင်စားဖွယ်ဖြစ်ပေသည်။ ယောက်ျားများနိုင်ထက်စီးနင်းပြုသည့် ဤလောကတွင် အမျိုးသမီးများသည် သနားစဖွယ်အနှိမ်ခံနေရသည်ဟု သူတို့ယူဆကြသည်။ သို့ဖြစ်၍ အမျိုးသမီးသို့ဦးတည်သောဝတ်ပြုမှုသည် အဓမ္မမှုလျော့နည်းသောလောကရရှိရန်အတွက် လူသားတို့၏မျှော်လင့်ရာဖြစ်သည်ဟူ၍ ယူမှတ်ကြသည်။ အမျိုးသမီးတို့အား ပို၍လိုက်လျောအရေးပေးမည်ဆိုလျှင် ဤလောကသည် သာ၍ဝပြောချမ်းသာမည့်ကမ္ဘာဖြစ်မည်ဟု ယူဆကြပုံလည်းရှိသည်။

သို့ရာတွင် မယ်တော်ဘုရားမဝတ်ပြုမှုသည် ရှေးလောကဓာတ်အား ငြိမ်သက်မှုမရှိစေခဲ့ပါ။ ယနေ့လည်း ငြိမ်သက်မှုရှိစေနိုင်မည်မဟုတ်ပါ။ ထို့ပြင် ယေရှုကိုမွေးဖွားပြုစုရန်အခွင့်ထူးရသော ပထမရာစုမှသစ္စာရှိအမျိုးသမီးအဖြစ် မာရိအားမည်မျှပင်လေးစားမြတ်နိုးဦးတော့ မာရိအားဖြင့် ဤလောကသည်ကယ်တင်ခံရမည်မဟုတ်ကြောင်း ယနေ့ယေဟောဝါသက်သေများနှင့်ပူးပေါင်းလာသူ သန်းပေါင်းများစွာတို့သိရှိနားလည်ထားကြပြီ။ အမျိုးသမီးများလွတ်မြောက်ရေး၏တောင်းဆိုချက်အချို့သည် တရားမျှတခြင်းနှင့်အညီဖြစ်သည်တိုင် ယင်းအားဖြင့် ငြိမ်သက်သောကမ္ဘာဖြစ်လာနိုင်မည်မဟုတ်ကြောင်းကိုလည်း ယေဟောဝါသက်သေများသိရှိထားသည်။ အကြောင်းမူကား၊ အာသင်နှင့်ဧဖက်မြို့သားတို့အား “လောကဓာတ်မှစ၍ လောကဓာတ်၌ရှိလေသမျှသောအရာတို့ကိုဖန်ဆင်းတော်မူသောဘုရား” ဟုပေါလုချီးမွမ်းထောမနာပြုခဲ့သောဘုရားသခင်ကို သူတို့မှီခိုအားထားကြသည်။ (တမန်တော် ၁၇:၂၄။ ၁၉:၁၁၊ ၁၇၊ ၂၀) ယေဟောဝါအမည်ရှိသော ဤအနန္တတန်ခိုးရှင်ဘုရားသခင်သည် “ဖြောင့်မတ်ခြင်းတရားတည်နေရာ” ဘုန်းထင်ရှားသောကမ္ဘာသစ်ကို ကတိထားတော်မူပြီဖြစ်၍ ကိုယ်တော်၏ကတိတော်ကို ကျွန်ုပ်တို့စိတ်ချလက်ချအားထားနိုင်သည်။—၂ ပေတရု ၃:၁၃။

ဘုရားသခင်နှင့်လူတို့ရှေ့အမျိုးသမီးများ၏အနေအထားနှင့်ပတ်သက်သည့် ကျမ်းစာကြည့်မြင်ချက်ကိုမူကား ဤမဂ္ဂဇင်းတွင်ဆက်လက်ဆွေးနွေးတင်ပြဦးမည်။

[စာမျက်နှာ ၅ ပါ ရုပ်ပုံ]

သံဝါသနှင့်စစ်မှုဆိုင်ရာ ခါနာန်၏ဘုရားမ အဲရှ်တိုရဲသ်

[စာမျက်နှာ ၅ ပါ ရုပ်ပုံ]

ဧဖက်မြို့၏ ပျိုးပွားဘုရားမ အာတေမိ

[Credit Line]

Musei dei Conservatori, Rome

[စာမျက်နှာ ၇ ပါ ရုပ်ပုံ]

ခရစ်ယာန်ဘောင်၏ “ဘုရားသခင့်မယ်တော်”

[Credit Line]

Chartres Cathedral, France