မိစ္ဆာပရောဖက်များကိုသတိပြု
ဘရာဇီးလ်မောင်နှံစုံတစ်စုံသည် အိပ်ရာဝင်ပြီးနောက် သူခိုးများအိမ်ထဲထွင်းဖောက်သံကိုကြားခဲ့ကြသည်။ ကြောက်အားလန့်အားနှင့်ပြတင်းပေါက်မှသူတို့ထွက်ပြေးပြီး ရဲကိုတိုင်ကြားခဲ့သည်။ ထိုနောက်အမျိုးသမီးဖြစ်သူသည် ထိတ်လန့်လွန်းသဖြင့် မိမိအိမ်၌မအိပ်ဝံ့ဘဲ မိခင်အိမ်သို့သွားအိပ်ခဲ့ရသည်။
မိမိအိမ်ထွင်းဖောက်ခြင်း၊ သို့မဟုတ် အခြားနည်းတစ်နည်းဖြင့်အခိုးခံရမည်ဆိုလျှင် သူမကိုကိုယ်ချင်းစာပါလိမ့်မည်။ ဤသို့သောတွေ့ကြုံမှုသည် သွေးလန့်စရာဖြစ်ပြီး ဤဆင်းရဲဒုက္ခကိုခံနေရသူအရေအတွက် တိုးများလာနေပါပြီ။ သို့ရာတွင်အခြေအနေပိုဆိုးရွားနစ်နာဆုံးရှုံးစေသည့် ခိုးဝှက်မှုတစ်မျိုးရှိပါသေးသည်။
ဤသာ၍စိုးရိမ်ဖွယ်ရှိသောခိုးဝှက်မှုကားအဘယ်နည်း။ သူခိုးများကား မည်သူများနည်း။ ကျွန်ုပ်တို့ခေတ်ကိုရည်ညွှန်းကာ “မိစ္ဆာပရောဖက်အများတို့သည်ပေါ်လာ၍ လူအများတို့ကိုလှည့်ဖြားကြလိမ့်မည်” ဟုယေရှုဆိုရာတွင် ယင်းအကြောင်းပြောခြင်းဖြစ်သည်။ (မဿဲ ၂၄:၁၁) မိစ္ဆာပရောဖက်များသည် သူခိုးများဖြစ်သည်။ အဘယ်နည်းဖြင့်နည်း။ သူတို့ဘာကိုခိုးယူနေသနည်း။ သူတို့၏ခိုးမှုသည် ပရောဖက်ပြုချက်နှင့်သက်ဆိုင်သည်။ ယင်းကိုသဘောပေါက်နိုင်ရန် သမ္မာကျမ်းစာအရ ပရောဖက်ပြုခြင်းသည် အဘယ်အရာဖြစ်သည်ကို ဦးစွာသိနားလည်ရန်လိုသည်။
ပရောဖက်ပြုခြင်းကားအဘယ်နည်း
ပရောဖက်ပြုခြင်းအကြောင်းစဉ်းစားလိုက်လျှင် ပထမဦးဆုံးစဉ်းစားမိသည်ကား အနာဂတ်ကိုကြိုဟောပြောခြင်းဖြစ်သည်။ ဘုရားသခင်၏ရှေးခေတ်ပရောဖက်များ၏လုပ်ငန်းကဏ္ဍတွင် ဤသို့ပြုခြင်းပါဝင်သော်လည်း ယင်းကသူတို့၏အဓိကလုပ်ငန်းမဟုတ်ပါ။ ဥပမာ၊ “လေအားပရောဖက်ပြုလော့” ဟုရူပါရုံ၌ပရောဖက်ယေဇကျေလမှာကြားခံရချိန်တွင် ဘုရားသခင်ထံမှရသောမိန့်မှာချက်ကိုပြောဆိုရန်သာလိုသည်။ (ယေဇကျေလ ၃၇:၉၊ ၁၀) ယဇ်ပုရောဟိတ်များရှေ့ယေရှုတရားစီရင်ခံရချိန်တွင် ကိုယ်တော်သည်တံတွေးထွေးခြင်း၊ ပါးရိုက်ခြင်းခံခဲ့ရ၍ သူ့အားနှိပ်စက်ကလူပြုသူများက “အချင်းခရစ်တော်၊ ကိုယ်တော်ကိုအဘယ်သူပုတ်သည်ကို ပရောဖက်ပြု၍ဟောတော်မူပါ” ဟုကဲ့ရဲ့ပြောဆိုခဲ့သည်။ ဖြစ်လတံ့သောအမှုကို ကိုယ်တော်အားဟောရန်ပြောနေခြင်းမဟုတ်ဘဲ ဘုရားသခင့်တန်ခိုးတော်အားဖြင့် ကိုယ်တော်အားမည်သူတို့ရိုက်ပုတ်သည်ကိုဖော်ထုတ်ရန် စိန်ခေါ်ပြောဆိုနေကြခြင်းဖြစ်သည်။—မဿဲ ၂၆:၆၇၊ ၆၈။
“ပရောဖက်ပြုခြင်း” သို့မဟုတ် “ပရောဖက်ပြုချက်” ဟုပြန်ဆိုသည့် မူရင်းကျမ်းစာစကားလုံးများ အဓိကပေါ်လွင်စေသည့်သဘောမှာ အကြောင်းကိစ္စတစ်ခုနှင့်ပတ်သက်၍ ဘုရားသခင့်သဘောကိုဖော်ပြခြင်း သို့မဟုတ် တမန်တော်ဝတ္တုတင်ပြသည့်အတိုင်း “ဘုရားသခင်၏အံ့ဖွယ်သောအမှုတို့ကို” ပြောပြခြင်းဖြစ်သည်။ (တမန်တော် ၂:၁၁) ဤသဘောမျိုးဖြင့် မိစ္ဆာပရောဖက်တို့ကြောင့် လူများစွာတို့သည်အခိုးခံနေရပါသည်။
မိစ္ဆာပရောဖက်များကားအဘယ်သူများဖြစ်သနည်း။ သူတို့ဘာကိုခိုးနေကြသနည်း။ ဤမေးခွန်းကိုဖြေဆိုရန် ဣသရေလလူမျိုး၏သမိုင်းတွင် ယေရမိခေတ်သို့ပြန်ကြည့်ကြစို့။