ကျွန်ုပ်တို့၏ကြီးမြတ်တော်မူသော ဖန်ဆင်းရှင်နှင့် ကိုယ်တော်၏စီရင်ချက်များ

မည်မျှကြီးမြတ်တော်မူသည်တကား။ ခန့်ညားထည်ဝါသော အရီဇိုးနား ချောက်နက်ကြီးများ၊ သို့မဟုတ် ဟာဝိုင်ယီကျွန်းစုများ၊ တအံ့တသြဖြစ်လောက်သော အီဂွါစိုး၊ သို့မဟုတ် နိုင်အာဂရာ ရေတံခွန်ကြီးများ၊ နော်ဝေးနိုင်ငံ၊ သို့မဟုတ် နယူးဇီလန်နိုင်ငံ၏ ခမ်းနားကြီးကျယ်သော ရေလက်ကြားများဖြစ်သည့် သဘာဝအံ့ဖွယ်ရာများကို ချီးမွမ်းအံ့သြခြင်းမရှိဘဲ မနေနိုင်သည်ကား အမှန်ပင်တည်း။ သို့သော် ယင်းတို့သည် သဘာဝတရား၏ မတော်တဆဖြစ်ပေါ်ရာများ မျှသာလော။ မဟုတ်ပါ။ ထိုထက်မက ဖြစ်ကြသည်ကား အမှန်ပင်တည်း။ “ခပ်သိမ်းသောအရာတို့ကို မိမိတို့အချိန်တန်မှ လျောက်ပတ်စွာဖန်ဆင်းတော်မူပြီ။ လူစိတ်နှလုံးကိုလည်း အနန္တကာလ၌ စွဲလမ်းစေတော်မူပြီ။ သို့ရာတွင် ဘုရားသခင်စီရင်တော်မူသောအမှုကို အစမှအဆုံးတိုင်အောင် လူသည် စစ်၍မကုန်နိုင်” ဟုပညာရှိရှောလမုန်မင်းကြီး ချီးမွမ်းထောမနာပြုထားသည့် ကြီးမြတ်တော်မူသောဖန်ဆင်းရှင်၊ ချစ်ခြင်းမေတ္တာသခင် ကောင်းကင်ခမည်းတော်၏ အံ့ဖွယ် လက်ရာတော်များဖြစ်ကြပါသည်။ (ဒေသနာ ၃:၁၁) ကျွန်ုပ်တို့ဖန်ဆင်းရှင်၏ စကြဝဠာတစ်ခွင်ရှိသော ခမ်းနားကြည်နူးဖွယ် လက်ရာတော်အလုံးစုံတို့ကို ရှာဖွေလေ့လာစူးစမ်းခြင်းငှာ အနန္တကာလလိုလိမ့်မည်ကား အမှန်ပင်။

ကျွန်ုပ်တို့၏ဖန်ဆင်းရှင်သည် အလွန်ကြီးမြတ်တော်မူသည်တကား။ ဤအနန္တတန်ခိုးရှင်ဘုရားသခင်သည် “ဤနောက်ဆုံးကာလအခါ မိမိသားတော်အားဖြင့် ငါတို့အား ဗျာဒိတ်ပေးတော်မူပြီ။ ထိုသားတော်ကို အလုံးစုံတို့၏အမွေခံသခင်အရာ၌ ခန့်ထားတော်မူ၏။ သားတော်အားဖြင့်လည်း လောကဓာတ်တို့ကို တည်တော်မူ” ခဲ့သောကြောင့် ကျွန်ုပ်တို့ဝမ်းသာအားရနိုင်ကြသည်။ (ဟေဗြဲ ၁:၂) ဤသားတော်ယေရှုခရစ်သည် ခမည်းတော်ဖန်ဆင်းထားသမျှ လှပကြည်နူးဖွယ်ရာများကို တန်ဖိုးထားလေးမြတ်တော်မူသည်။ ခမည်းတော်၏ရည်ရွယ်တော်မူချက်များကို ဥပမာများပေး၍ ရှင်းလင်းဖော်ပြသည့်အခါသော်လည်းကောင်း၊ တရားနာသူတို့ကို အားပေးစကားပြောဆိုသည့်အခါသော်လည်းကောင်း လက်ရာတော်များကို မကြာခဏဖော်ပြတတ်သည်။ (မဿဲ ၆:၂၈-၃၀။ ယောဟန် ၄:၃၅၊ ၃၆) ဖန်ဆင်းထားတော်မူသည့် အံ့ချီးဖွယ်ရာများသည် “ဘုရားသခင်၏အမိန့်တော်ကြောင့်သာတည်” ကြောင်းများစွာသောသူတို့သည် “ယုံကြည်ခြင်းအားဖြင့်” သတိပြုကြပါသည်။ (ဟေဗြဲ ၁၁:၃) ဤသို့သောယုံကြည်ခြင်းကို ကျွန်ုပ်တို့၏နေ့စဉ်အသက်တာတွင် တင်ပြနေသင့်သည်။—ယာကုပ် ၂:၁၄၊ ၂၆။

ကျွန်ုပ်တို့ဘုရားသခင်၏ဖန်ဆင်းရာတို့သည် အမှန်ပင်ကြီးမြတ်တော်မူသည်။ ယင်းတို့သည် ကိုယ်တော်၏ဉာဏ်ပညာတော်၊ တန်ခိုးတော်၊ ဖြောင့်မတ်ခြင်းတရားနှင့် မေတ္တာတော်ကို အံ့ဖွယ်နည်းဖြင့် ထင်ရှားပေါ်လွင်စေသည်။ ဥပမာအားဖြင့် ကိုယ်တော်ဖန်ဆင်းတော်မူလတ္တံ့သော လူသားသည် နှစ်သက်ကြည်နူးဖွယ်ရာ ရာသီဥတုတို့၌ ရွှင်လန်းအားရပျော်မွေ့နိုင်ရန် ကျွန်ုပ်တို့ကမ္ဘာဂြိုဟ်ကို တိမ်းစောင်းကာ နေကို လှည့်ပတ်စေတော်မူသည်။ ဘုရားသခင်က “မြေကြီးမကုန်မီတိုင်အောင် မျိုးစေ့ကြဲရသောကာလ၊ အသီးအနှံကို သိမ်းရသောကာလ၊ ချမ်းသောကာလ၊ ပူသောကာလ၊ နွေကာလ၊ ဆောင်းကာလမပြတ်ရဟု အမိန့်တော်ရှိ၏။” (ကမ္ဘာဦး ၈:၂၂) ထို့ပြင် အဖိုးကြီးမားသောသတ္တုအမျိုးမျိုးနှင့် ကမ္ဘာကိုဘုရားသခင်သည် ရက်ရောစွာဖြည့်စွက်ပေးထားတော်မူသည်။ အထူးသဖြင့် ကမ္ဘာမြေ၏သက်ရှိအပေါင်းအတွက် အဓိကအစိတ်အပိုင်းနှင့် အထောက်အပံ့ဖြစ်သော ရေကို ဖောဖောသီသီရှိစေရန် ပြင်ဆင်ထားတော်မူခဲ့သည်။

အစီအစဉ်တကျဖြစ်စဉ် တစ်ရက်လျှင် နှစ်ထောင်ပေါင်းများစွာကြာရှည်သည့် ‘ဖန်ဆင်းရာရက်’ ခြောက်ရက်အတွင်း ‘ဘုရားသခင်၏လှုပ်ရှားသောစွမ်းအား’ သည်ကမ္ဘာမြေကြီးကို လူနေထိုင်ရာအရပ်အဖြစ် အသင့်ပြင်ဆင်ပေးပါသည်။ ကျွန်ုပ်တို့အားမြင်တွေ့နိုင်စေသည့်အလင်း၊ ရှူရှိုက်သောလေ၊ နေထိုင်သောကုန်းမြေ၊ ကောက်ပဲသီးနှံ၊ နေ့နှင့်ည ဆက်တိုက်ဖြစ်စဉ်၊ ငါးများ၊ ငှက်များ၊ တိရစ္ဆာန်များ အစရှိသည်တို့ကို လူ့အသုံးအဆောင်နှင့်ပျော်ရွှင်မှုအတွက် ဆက်တိုက်ဖြစ်ပေါ်လာစေတော်မူခဲ့သည်။ (ကမ္ဘာဦး ၁:၂-၂၅) ကျွန်ုပ်တို့သည် ဆာလံဆရာနှင့်အတူ တွဲဖက်၍ “အိုထာဝရဘုရား [ယေဟောဝါ၊ ကဘ] ကိုယ်တော်စီရင်ပြုပြင်တော်မူသောအရာတို့သည် အလွန်များပြားပါ၏။ ရှိရှိသမျှတို့ကို ပညာတော်အားဖြင့် ဖန်ဆင်းတော်မူ၏။ မြေကြီးသည် ဘဏ္ဍာတော်နှင့်ကြွယ်ဝပါ၏” ဟူ၍အမှန်တကယ်ပင် ကြွေးကြော်နိုင်ကြပါသည်။—ဆာလံ ၁၀၄:၂၄။

ဘုရားသခင်၏ ဖန်ဆင်းခြင်းဆိုင်ရာ ထူးကဲပြောင်မြောက်သည့်လက်ရာတော်

ဆဌမဖန်ဆင်းရာ “ရက်” ကုန်လုနီးသည့်အခါ ဘုရားသခင်သည် လူယောက်ျားကိုဖန်ဆင်းပြီးနောက် သူ၏ကူဖော်လှောင်ဖက် မိန်းမကိုဖန်ဆင်းတော်မူခဲ့သည်။ မြေကြီးနှင့်ဆိုင်သောဖန်ဆင်းရာတို့တွင် လက်ရာအမြောက်ဆုံးပါတကား။ ဖန်ဆင်းခဲ့သမျှ ရုပ်ပိုင်းဆိုင်ရာဖန်ဆင်းခြင်းအားလုံးတို့ထက် ဤမည်ကား အထူးခြား၊ အပြောင်မြောက်ဆုံးဖြစ်သည်အမှန်။ “ကောင်းကင်ကား ထာဝရဘုရား [ယေဟောဝါ၊ ကဘ] ၏ကောင်းကင်ဖြစ်၏။ မြေကြီးကိုကား လူသားတို့အားပေးတော်မူပြီ” ဟူသည့်ဆာလံ ၁၁၅:၁၆ ပါစကားနှင့်အညီ ကမ္ဘာပေါ်ရှိ အစောပိုင်းဖန်ဆင်းရာများကို အသုံးပြု၍ ပျော်မွေ့နိုင်ကြရန် ကျွန်ုပ်တို့အား ယေဟောဝါဖန်ဆင်းတီထွင်ထားတော်မူသည်။ ကျွန်ုပ်တို့ပတ်ဝန်းကျင်ရှိ ရောင်စုံကမ္ဘာမြေကြီးကို မြင်တွေ့နိုင်စေသည့် အကောင်းဆုံးကင်မရာတစ်လုံးထက် ရှုပ်ထွေးပွေလီသော ကျွန်ုပ်တို့၏မျက်စိများအတွက် အလွန်ကျေးဇူးတင်သင့်ပါသည်တကား။ လူ့လက်ဖြစ် မည်သည့်အသံချဲ့စက်စနစ်ထက်မဆို သာ၍ကောင်းသော၊ အပြန်အလှန်စကားပြောဆိုခြင်း၊ ဂီတသံနှင့် ကြေးငှက်တို့၏တေးသံသာတို့ကို ကြားနာရ၍ ပျော်မွေ့နိုင်သော ကျွန်ုပ်တို့၏နားများရှိပါသေးသည်။ ဘက်စုံသုံး,လျှာပါအပါအဝင် စကားပြောဆိုနိုင်စေသော ကိုယ်ခန္ဓာတွင်း အင်္ဂါအစိတ်အပိုင်းများရှိပါသည်။ လျှာ၏အရသာဖုများသည် အနံ့ခံအာရုံနှင့်တွဲ၍ မကုန်မခမ်းနိုင်သည့် အစားအသောက်အမျိုးအမည်များစွာတို့ကို မြည်စမ်းကြည့်ခြင်းမှ ကျေနပ်မှုရရှိစေသည်။ မေတ္တာပါလက်ကလေးတစ်ခု၏ တို့ထိပွတ်သပ်မှုခံရခြင်းသည်လည်း မည်မျှအရသာရှိပါသည်တကား။ ဆာလံဆရာနည်းတူပင် ကျွန်ုပ်တို့၏ဖန်ဆင်းရှင်ကို ဤသို့အမှန်ပင်ကျေးဇူးတင်ချီးမွမ်းနိုင်ကြပါသည်။ “အကျွန်ုပ်သည် ကြောက်မက်ဖွယ်သောလက္ခဏာ၊ ထူးဆန်းသောလက္ခဏာတို့နှင့် ပြည့်စုံသည်ဖြစ်၍ ကိုယ်တော်ကိုချီးမွမ်းပါမည်။ ပြုပြင်တော်မူသောအမှုတို့သည် အံ့သြဖွယ်ဖြစ်ကြောင်းကို အကျွန်ုပ်၏စိတ်ဝိညာဉ်သည် အမှန်သိပါ၏။”—ဆာလံ ၁၃၉:၁၄။

ကျွန်ုပ်တို့ဖန်ဆင်းရှင်၏ ချစ်ခင်ကြင်နာခြင်း

ဆာလံဆရာဤသို့ရေးသားသည်။ “ထာဝရဘုရား [ယေဟောဝါ၊ ကဘ] သည်ကောင်းမြတ်တော်မူ၍ . . . ဂုဏ်ကျေးဇူးတော်ကို ချီးမွမ်းကြလော့။ . . . ကရုဏာတော် အစဉ်အမြဲတည်သည်ဖြစ်၍ အံ့ဖွယ်သောအမှုတို့ကို တစ်ပါးတည်းသာပြုတော်မူ” ၏။ (ဆာလံ ၁၃၆:၁-၄) အထက်ဖော်ပြပါ ဖန်ဆင်းရာအားလုံးတို့ထက် သာလွန်ထူးကဲသော အံ့ဖွယ်ရာများကို ယခုပြုတော်မူရန် ဤချစ်ခင်ကြင်နာခြင်းသည် ကိုယ်တော်အား လှုံ့ဆော်တိုက်တွန်းပေးနေပါသည်။ ရုပ်ပစ္စည်းများကိုဖန်ဆင်းခြင်းမှ ကိုယ်တော်ရပ်နားထားစဉ်ပင် ဝိညာဏသဘောအရဖန်ဆင်းနေတော်မူသည်။ ယင်းသို့ပြုရခြင်းမှာလည်း ကိုယ်တော်ကိုဦးတည်ခဲ့သော မလိုတမာစိတ်ရှိစိန်ခေါ်မှုတစ်ခုကြောင့်ဖြစ်သည်။ မည်သို့အားဖြင့်နည်း။

ပထမလူယောက်ျားနှင့်လူမိန်းမတို့သည် ဂုဏ်ကျက်သရေရှိ ဧဒင်ပရဒိသုတွင် နေထိုင်ကြရသည်။ သို့ရာတွင် ကောင်းကင်တမန်သူပုန်၊ စာတန်သည် မိမိကိုယ်ကို ဘုရားတစ်ဆူအရာသို့ တင်မြှောက်ကာ ထိုလူမောင်နှံစုံအား ယေဟောဝါကိုပုန်ကန်စေခဲ့သည်။ သူတို့အား ဘုရားသခင်သေဒဏ်ပေးတော်မူခဲ့ခြင်းသည် တရားသဖြင့်သာဖြစ်ပါသည်။ ယင်းကြောင့် သူတို့၏သားသမီးများဖြစ်သော လူမျိုးတစ်မျိုးလုံးသည် အပြစ်ရှိ၍သေမျိုးဖြစ်လာကြရသည်။ (ဆာလံ ၅၁:၅) စုံစမ်းခံရလျှင် အဘယ်လူသားမျှ ဘုရားသခင်ကို သမာဓိစောင့်သိနိုင်မည်မဟုတ်ဟူ၍ အဆိုပြုကာ ဘုရားသခင်ကို စာတန်စိန်ခေါ်ခဲ့ကြောင်း ယောဘအကြောင်းပါ ကျမ်းစာမှတ်တမ်းက တင်ပြပါသည်။ သို့သော် ကျမ်းစာခေတ်မှအစပြု၍ ကျွန်ုပ်တို့အချိန်တိုင်သည်အထိ ဘုရားသခင်၏သစ္စာရှိကျေးကျွန် မြောက်မြားစွာကဲ့သို့ စာတန်သည် မုသားကောင်ဖြစ်ကြောင်း ယောဘသက်သေထူခဲ့ပါသည်။ (ယောဘ ၁:၇-၁၂။ ၂:၂-၅၊ ၉၊ ၁၀။ ၂၇:၅) စုံလင်သောလူသားအနေနှင့် ယေရှုသည် ပြိုင်စံရှားသော သမာဓိစောင့်သိခြင်း၏ ပြယုဂ်ဖြစ်တော်မူသည်။—၁ ပေတရု ၂:၂၁-၂၃။

သို့ဖြစ်သောကြောင့် ယေရှုက “ဤလောကကိုအစိုးရသောမင်း [စာတန်] သည် . . . ငါ၌အဘယ်အခွင့်အရာကိုမျှ မတွေ့ရ” ဟုမိန့်တော်မူနိုင်ခဲ့သည်။ (ယောဟန် ၁၄:၃၀) မည်သို့ဆိုစေကာမူ ယနေ့ထိတိုင်အောင် “လောကီသားအပေါင်းတို့သည် မာရ်နတ်၏လက်၌ရှိကြသည်။” (၁ ယောဟန် ၅:၁၉) ယေဟောဝါပိုင်သအုပ်စိုးခွင့်၏ဖြောင့်မတ်မှန်ကန်မှုကို အငြင်းပွားခဲ့သည့်အတွက် စာတန့်အုပ်ချုပ်မှုသည် အောင်မြင်နိုင်မနိုင် နှစ်ပေါင်း ၆,၀၀၀ ခန့်အချိန်အတွင်းတင်ပြရန် သူအချိန်ရရှိခဲ့ပေပြီ။ ဆိုးရွားပျက်စီးနေဆဲ ကမ္ဘာ့အခြေအနေများက ဆက်သက်သေထူသည့်အတိုင်းပင် သူသည် အရှက်တကွဲရှုံးနိမ့်ရလေပြီ။ ကျွန်ုပ်တို့၏မေတ္တာရှင်ယေဟောဝါဘုရားသခင်သည် ဤပျက်စီးယိုယွင်းသော လောကီအဖွဲ့အစည်းကို မကြာမီသုတ်သင်ရှင်းလင်းပစ်ပြီး ကမ္ဘာမြေကြီးကို ကိုယ်တော်သာ ပိုင်သအုပ်စိုးခွင့်ရှိကြောင်း အတိအလင်းဖော်ပြတော်မူလိမ့်မည်။ ငြိမ်းချမ်းသာယာ၊ ဖြောင့်မတ်သောအုပ်ချုပ်မှုကို တမ်းတလိုလားသူများ အားယူစရာအကြောင်းပါတကား။—ဆာလံ ၃၇:၉-၁၁၊ ၈၃:၁၇၊ ၁၈။

သို့ရာတွင် ဤမျှသာမဟုတ်သေး။ ယောဟန် ၃:၁၆ ပါယေရှု၏စကားအရ ဘုရားသခင်၏ချစ်ခင်ကြင်နာမှုသည် ထပ်ဆင့်ထင်ရှားရဦးမည်။ “ဘုရားသခင်၏သားတော်ကိုယုံကြည်သောသူအပေါင်းတို့သည် ပျက်စီးခြင်းသို့မရောက်၊ ထာဝရအသက်ကိုရစေခြင်းငှာ ဘုရားသခင်သည် မိမိ၌ တစ်ပါးတည်းသောသားတော်ကို စွန့်တော်မူသည်တိုင်အောင် လောကီသားတို့ကို ချစ်တော်မူ၏။” ကမ္ဘာပေါ်ထာဝစဉ်အသက်ရှင်ခြင်းမျှော်လင့်ချက်ကို လူသားအား ပြန်ပေးခြင်းငှာ အသစ်သောအရာများကို ဖန်ဆင်းပေးဖို့လိုပါသည်။ ယင်းတို့ကား အဘယ်နည်း။ ညည်းတွားလျက်နေသော လူမျိုးအား မည်သို့အကျိုးပြုမည်နည်း။ နောက်ဆက်တွဲဆောင်းပါးက တင်ပြပါလိမ့်မည်။