ကောင်းကျိုးမပေးသောတေးဂီတကို ဂရုစိုက်ရှောင်လေ

“ပညာမဲ့ကဲ့သို့မဟုတ်၊ ပညာရှိကဲ့သို့ စေ့စေ့မြေ့မြေ့ကျင့်ဆောင်မည်အကြောင်း သတိပြုကြလော့။ ယခုနေ့ရက်ကာလတို့သည် ဆိုးယုတ်သောကြောင့် ကာလအချိန်ကို ရွေးနှုတ်ကြလော့။”—ဧဖက် ၅:၁၅၊ ၁၆။

၁ တေးဂီတကို “ဘုရားပေးလက်ဆောင်” ဟု အဘယ်ကြောင့်ခေါ်နိုင်သနည်း။

“တေးဂီတသည် . . . ဘုရားပေးလက်ဆောင်ဖြစ်သည်” ဟု လူလူရမ္မစီဝီလီက သူရေးသားသည့် Bible Music ဟူသည့်စာအုပ်တွင် ရေးသားထားသည်။ ရှေးအကျဆုံးအချိန်များကပင် ဘုရားသခင်ကိုကြောက်ရွံ့သော ယောက်ျား၊ မိန်းမတို့သည် ဤခံစားမှုကို သိနားလည်လာခဲ့ကြသည်။ လူများသည် မိမိတို့၏အနက်ရှိုင်းဆုံးစိတ်လှုပ်ရှားမှုများဖြစ်သည့် ရွှင်လန်းမှု၊ ဝမ်းနည်းမှု၊ ဒေါသနှင့် မေတ္တာတရားများကို တေးဂီတအားဖြင့်ဖော်ကျူးလာခဲ့ကြသည်။ ထို့ကြောင့် တေးဂီတသည် ကျမ်းစာခေတ်က အရေးကြီးသည့်ကဏ္ဍတွင်ပါဝင်ခဲ့ပြီး ကျမ်းစာတွင် တောက်လျှောက်ဖော်ပြထားရာဖြစ်သည်။—ကမ္ဘာဦး ၄:၂၁။ ဗျာဒိတ် ၁၈:၂၂။

၂။ ကျမ်းစာခေတ်က ယေဟောဝါအားချီးမွမ်းခြင်းတွင် တေးဂီတကိုမည်သို့အသုံးပြုခဲ့ကြသနည်း။

^၂ ယေဟောဝါ၏ဝတ်ပြုရေးတွင် တေးဂီတသည် ခန့်ညားထည်ဝါမှုအရှိဆုံးနေရာကို ရယူခဲ့သည်။ ယေဟောဝါဘုရားသခင်အားမပြတ်ချီးမွမ်းမှုပြုရာတွင် အကြီးကျယ်အခမ်းနားဆုံးသောအသုံးအနှုန်းများကို မူရင်းအတိုင်း တေးဂီတအသွင်သို့ဖွဲ့ဆိုထားသည်။ “ငါသည် ဘုရားသခင်၏နာမတော်ကို ထောမနာသီချင်းဆိုမည်” ဟု ဆာလံဆရာဒါဝိဒ်ရေးသားခဲ့သည်။ (ဆာလံ ၆၉:၃၀) ဆုတောင်းချက်များကို တစ်မျိုးတည်းသောတေးဂီတဖြင့် တွဲဖက်ခဲ့ကြသည်။ “ညအခါ ငါ၏ကြိုးတပ်တူရိယာကို သတိရမည်။ ငါ့နှလုံးထဲမှစိုးရိမ်ကြောင့်ကြပြီး ငါ့စပစ်ရစ်သည် ဂရုတစိုက်စူးစမ်းမည်” ဟု အာသရေးသားခဲ့သည်။ (ဆာလံ ၇၇:၆၊ ကဘ) ယေဟောဝါ၏ဗိမာန်တော်တွင် တေးဂီတကို ကြီးမားကျယ်ပြန့်သည့်အတိုင်းအတာဖြင့်ဖွဲ့စည်းထားသည်။ (၁ ရာဇဝင်ချုပ် ၂၃:၁-၅။ ၂ ရာဇဝင်ချုပ် ၂၉:၂၅၊ ၂၆) တစ်ခါတစ်ရံ တေးဂီတအုပ်စုကြီးဖြင့် စနစ်တကျခင်းကျင်းဆင်ယင်သည်။ ဗိမာန်တော်အပ်နှံခြင်းကဲ့သို့သောပွဲများတွင် တံပိုးမှုတ်သူ ၁၂၀ တို့ပါဝင်တီးမှုတ်ကြသည်။ (၂ ရာဇဝင်ချုပ် ၅:၁၂၊ ၁၃) ဤဂုဏ်ကျက်သရေရှိတေးသံများသည် မည်သို့အသံမြည်ခဲ့သည်နှင့်ပတ်သက်၍ ကျွန်ုပ်တို့၌မှတ်တမ်းမရှိသော်လည်း The Music of the Bible စာအုပ်က “ဘာသာရေးအခမ်းအနားများတွင် ဗိမာန်တော်တေးသီချင်း၏ယေဘုယျအကျိုးအာနိသင်ကို တွေးတောထင်မြင်ကြည့်ရန် မခက်ခဲပါ . . . ထိုကဲ့သို့သောမြင်ကွင်းထဲသို့ ကျွန်ုပ်တို့ထဲမှတစ်ယောက်ယောက် ရောက်ရှိသွားမည်ဆိုပါက အလွန့်အလွန်အံ့မခန်းဖြစ်ပြီး အလွန့်အလွန်မြင့်မြတ်ခမ်းနားထည်ဝါမှုကိုခံစားရမည်မလွဲပေ”a ဟုဖော်ပြထားသည်။

တေးဂီတကိုအလွဲသုံးခြင်း

၃၊ ၄။ ဘုရားသခင်၏လူများနှင့် သူတို့ပတ်ဝန်းကျင်ရှိတစ်ပါးအမျိုးသားများသည် တေးဂီတလက်ဆောင်ကို မည်သို့အလွဲသုံးစားပြုခဲ့ကြသနည်း။

^၃ သို့သော် တေးဂီတသည် ထိုကဲ့သို့မြင့်မြတ်ခမ်းနားစွာ အမြဲအသုံးပြုခြင်းမခံခဲ့ရပါ။ သိနာတောင်တွင် တေးဂီတသည် ရွှေနွားရုပ်ဝတ်ပြုမှုခြင်းတွင် အားပေးလှုံ့ဆော်မှုအဖြစ်အသုံးခံခဲ့ရသည်။ (ထွက်မြောက်ရာ ၃၂:၁၈) တေးဂီတသည် မူးယစ်သောက်စားခြင်းနှင့် ပြည့်တန်ဆာလုပ်ရပ်များနှင့်ပင် ပတ်သက်သည်များလည်းရှိခဲ့သည်။ (ဆာလံ ၆၉:၁၂။ ဟေရှာယ ၂၃:၁၅) ဣသရေလပတ်ဝန်းကျင်ရှိတစ်ပါးအမျိုးသားများသည် ဤဘုရားပေးလက်ဆောင်အား အလွဲသုံးစားပြုသည့်အပြစ်ကို ကျူးလွန်ခဲ့ကြသည်။ The Interpreter’s Dictionary of the Bible အဘိဓာန်ကျမ်းက “ဖိုနီးရှားနှင့်ဆီးရီးယားတို့တွင် ခေတ်ပေါ်တေးဂီတအားလုံးနီးပါးသည် သန္ဓေအောင်စေသည့်နတ်ဘုရားမ အစ်ရှ်တာဝတ်ပြုရေးကို ထင်ဟပ်သည်။ ထို့ကြောင့် ခေတ်ပေါ်တေးသီချင်းများသည် လိင်ဆိုင်ရာဝတ်ပြုရေးအတွက် ပဏာမတေးသွားများဖြစ်ကြသည်” ဟုဆိုထားသည်။ အလားတူပင် ရှေးဂရိလူမျိုးများလည်း အများကြိုက် “ရာဂစိတ်နှိုးဆွသည့်အကများ” တွင် တေးဂီတကို တွဲဖက်အသုံးပြုခဲ့ကြသည်။

^၄ မှန်ပါသည်။ တေးဂီတတွင် လှုံ့ဆော်နိုင်သော၊ စွဲမက်စေနိုင်သော၊ ဩဇာလွှမ်းမိုးနိုင်သော အစွမ်းတန်ခိုးရှိသည်။ လွန်ခဲ့သည့်ဆယ်စုနှစ်အနည်းငယ်ခန့်က ဂျွန်စတိန်းနား၏ The Music of the Bible စာအုပ်က ဤသို့ရှုမြင်သုံးသပ်ထားသည်။ “လက်ရှိအချိန်တွင် မည်သည့်အတတ်ပညာမျှ ဂီတအနုပညာလောက် လူသားမျိုးနွယ်အပေါ် ဤမျှပြင်းထန်သည့်သြဇာလွှမ်းမိုးမှုမရှိချေ။” ယနေ့လည်း တေးဂီတသည် ဩဇာတိက္ကမကြီးမြဲကြီးနေသည်။ ထို့ကြောင့် မတော်လျော်သောတေးဂီတအမျိုးအစားများသည် ဘုရားသခင်ကိုကြောက်ရွံ့သောလူငယ်များအား အမှန်ပင်အန္တရာယ်ဖြစ်စေနိုင်သည်။

သတိပြုရန်လိုအပ်

၅။ (က) ဆယ်ကျော်သက်ရွယ်များစွာတို့၏အသက်တာတွင် တေးဂီတသည် မည်မျှကြီးမားစွာနေရာယူထားသနည်း။ (ခ) လူငယ်လူရွယ်များပျော်မွေ့ခြင်းနှင့်ပတ်သက်၍ ဘုရားသခင်၏အမြင်ကား အဘယ်နည်း။

^၅ သင်သည် လူငယ်တစ်ဦးဖြစ်လျှင် တေးဂီတ—အထူးသဖြင့် ပေါ့ပ် သို့မဟုတ် ရော့ခ်တေးဂီတပုံစံအမျိုးမျိုး—သည် သင်နှင့်သက်တူရွယ်တူများစွာတို့အတွက် မည်မျှအရေးကြီးကြောင်းကို သင်ကောင်းစွာသိသည်။ တေးဂီတကို “ဆယ်ကျော်သက်တို့၏ကိုယ်တွင်းစွမ်းအားတစ်စိတ်တစ်ဒေသ” ဟုပင်ခေါ်ဆိုကြသည်။ ခန့်မှန်းခြေအရ အမေရိကန်နိုင်ငံရှိသာမန်လူငယ်များသည် ကျောင်းသက်တမ်း၏နောက်ဆုံးခြောက်နှစ်အတွင်းတွင် ရော့ခ်တေးဂီတကို တစ်နေ့လျှင်လေးနာရီကျော်နားထောင်ကြသည်။ ယင်းသည် မျှတမှုမရှိကြောင်း တင်ပြရာရောက်သည်မှာသေချာသည်။ သင့်အားကျေနပ်စေသော သို့မဟုတ် ပျော်ရွှင်စေသောအရာတစ်ခုခုတွင် သင်မွေ့လျော်ခြင်းကို မှားသည်ဟုဆိုလိုနေခြင်းမဟုတ်ပါ။ ရွှင်လန်းဖွယ်တေးဂီတများကို ဖန်ဆင်းတော်မူသောယေဟောဝါသည် လူငယ်များအား သုန်သုန်မှုန်မှုန်နှင့်စိတ်ညှိုးငယ်နေရန် မလိုလားပါ။ အမှန်မှာ မိမိလူများအား ဤသို့ပညတ်ခဲ့သည်။ “ဖြောင့်မတ်သောသူတို့ ထာဝရဘုရား [ယေဟောဝါ၊ ကဘ] ၌ဝမ်းမြောက်ရွှင်လန်းကြလော့။ သဘောဖြောင့်သောသူတို့ ရွှင်လန်းစွာသီချင်းဆိုကြလော့။” (ဆာလံ ၃၂:၁၁) ငယ်ရွယ်သူများအား ကိုယ်တော်ဤသို့မိန့်တော်မူသည်။ “အချင်းလူပျို၊ အသက်ပျိုသောအခါ ပျော်မွေ့လော့။ အသက်ပျိုစဉ်ကာလတွင် စိတ်ရွှင်လန်းခြင်းရှိလော့။”—ဒေသနာ ၁၁:၉။

၆။ (က) လူငယ်များသည် တေးဂီတများကိုရွေးချယ်ရာတွင် အဘယ်ကြောင့်သတိပြုရန်လိုအပ်သနည်း။ (ခ) ရှေ့လူမျိုးတစ်ဆက်ကတေးဂီတများထက် ယခုခေတ်တေးဂီတအများစုသည် လက်ခံဖွယ်ရာမဖြစ်ခြင်းကား အဘယ်ကြောင့်နည်း။

^၆ သို့ရာတွင် တေးဂီတကိုရွေးချယ်ရာ၌ သင်သတိပြုရမည့်အကြောင်းကောင်းရှိသည်။ ဧဖက် ၅:၁၅၊ ၁၆ တွင် တမန်တော်ပေါလုက “ပညာမဲ့ကဲ့သို့မဟုတ် ပညာရှိကဲ့သို့ စေ့စေ့မြေ့မြေ့ကျင့်ဆောင်မည်အကြောင်း သတိပြုကြလော့။ ယခုနေ့ရက်ကာလတို့သည် ဆိုးယုတ်သောကြောင့် ကာလအချိန်ကိုရွေးနှုတ်ကြလော့” ဟုပြောခဲ့သည်။ “ကျွန်မတို့မိဘတွေဟာ သူတို့ငယ်ငယ်တုန်းက တေးဂီတတွေကို နားထောင်လို့ရတယ်။ ကျွန်မတို့ကော ဘာကြောင့်နားထောင်လို့မရရမှာလဲ” ဟု မိန်းကလေးတစ်ဦးပြောသကဲ့သို့ အချို့လူငယ်များက ကန့်ကွက်ကြပေမည်။ သင့်မိဘများသင့်အရွယ်က ကြိုက်နှစ်သက်ခဲ့သောတေးဂီတအချို့သည် ကန့်ကွက်စရာအသွင်အပြင်ရှိကောင်းရှိခဲ့ပေမည်။ အနီးကပ်လေ့လာစစ်ဆေးချက်အရ ခေတ်ဆန်သူများစွာတို့သည် လိင်ဆိုင်ရာစောင်းချိတ်ပြောသည့်စကားများနှင့် စာရိတ္တပျက်ပြားမှုကိုရည်ညွှန်းသည့် ညစ်ညမ်းသောစကားမြောက်မြားစွာတို့ကို ဝိုင်းဖွဲ့ပြောဆိုကြကြောင်း တွေ့ရှိရသည်။ သို့သော် တစ်ချိန်က အရိပ်အမြွက်သာပြောဆိုသောစကားများသည် ယခုအခါ ထင်ထင်ပေါ်ပေါ်ပြောဆိုလာကြပြီဖြစ်သည်။ စာရေးဆရာတစ်ဦးဤသို့သတိထားမိသည်။ “ကလေးများသည် ကျွန်ုပ်တို့ယဉ်ကျေးမှုတစ်ခါမျှမကြုံတွေ့ဖူးသောအတိုင်းအတာဖြင့် တိကျသည့်အကြောင်းအရာများ၏ အဆက်မပြတ်နှောင့်ယှက်မှုကို ခံနေကြရသည်။”

ရက်ပ်တေးဂီတ—ပုန်ကန်မှုတေးသံ

၇၊ ၈။ (က) ရက်ပ်တေးဂီတကား အဘယ်နည်း။ ယင်း၏ခေတ်စားမှုနှင့်ပတ်သက်၍ မည်သည့်မှတ်တမ်းများရှိသနည်း။ (ခ) လူတစ်ဦးသည် ရက်ပ်ဘဝပုံစံလိုက်စားသူဖြစ်ကြောင်း မည်သည့်အချက်များကမှတ်သားဖော်ပြသနည်း။

^၇ ခေတ်ပေါ်ရက်ပ်တေးဂီတခေတ်စားလာခြင်းကို စဉ်းစားကြည့်ပါ။ Time မဂ္ဂဇင်းအရ ရက်ပ်တေးဂီတသည် “အရူးထသည့် ကမ္ဘာချီတေးဂီတတော်လှန်ရေး” ဖြစ်လာပြီး ဘရာဇီး၊ ဥရောပ၊ ဂျပန်၊ ရုရှားနှင့် အမေရိကန်နိုင်ငံများတွင် ကျယ်ကျယ်ပြန့်ပြန့်ခေတ်စားလျက်ရှိသည်။ သာယာနာပျော်ဖွယ်ကင်းမဲ့ပြီး ယင်းသည်စာသားများကို သီဆိုခြင်းမဟုတ်ဘဲ ပြင်းထန်သည့်စည်းဝါးရိုက်ချက်နှင့်အတူ စကားကဲ့သို့ပြောခြင်းဖြစ်သည်။ ထိုပြင်းထန်သည့်စည်းချက်သည်ပင် ရက်ပ်တေးဂီတ စီးပွားရေးအတွက် အောင်မြင်မှုကြီးဖြစ်စေသောသော့ချက်ဖြစ်သည်။ ဂျပန်လူငယ်တစ်ဦးက “ရက်ပ်တေးဂီတကိုကျွန်တော်နားထောင်တဲ့အခါ စိတ်တက်ကြွလှုပ်ရှားလာတယ်။ ကတဲ့အခါ လွပ်လပ်မှုကိုခံစားရတယ်” ဟုပြောသည်။

^၈ ရက်ပ်၏စာသားများ—အများအားဖြင့် ညစ်ညမ်းမှုနှင့် လမ်းပေါ်ဗန်းစကားများပေါင်းစပ်ထားသည့် ရိုင်းပျသောအသုံးအနှုန်းများ—သည် ရက်ပ်ရေပန်းစားရခြင်း၏ အခြားအကြောင်းတစ်ခုဖြစ်ဖွယ်ရှိသည်။ အများအားဖြင့် ဆယ်ကျော်သက်ရွယ်အချစ်ပေါ်အခြေပြု၍ ဖွဲ့ဆိုထားသော ထုံးတမ်းစဉ်လာရော့ခ်စာသားများနှင့်မတူဘဲ ရက်ပ်စာသားများသည် ပိုမိုရေးကြီးခွင့်ကျယ်သည့်အကြောင်းများပါဝင်သည်။ အချို့ရက်ပ်စာသားများသည် မတရားမှု၊ လူမျိုးရေးခွဲခြားမှု၊ ရဲများ၏နှိပ်စက်ညှဉ်းပန်းမှုများကို ဆန့်ကျင်ပြောဆိုထားသည်။ တစ်ခါတစ်ရံ ယင်း၏ကာရံထပ်များသည် ညစ်ညမ်းသော၊ ထိခိုက်သောစကားများအပေါ် အခြေပြုထားသည်။ ရက်ပ်သည် အဝတ်အဆင်၊ ဖြီးလိမ်းပြင်ဆင်မှု၊ လိင်ဆိုင်ရာစာရိတ္တစံချိန်များကို ဆန့်ကျင်သည့်သဘောများကို ဖန်တီးပေးဟန်ရှိသည်။ ရက်ပ်သည် မိမိ၏အခွင့်နှင့် ဘဝပုံစံတစ်ခုဖြစ်လာသည်မှာ အံ့ဩစရာမဟုတ်ပါ။ ယင်းကိုလိုက်စားသူများအား ဟိတ်ဟန်များလွန်းခြင်း၊ လမ်းပေါ်ဗန်းစကားပြောခြင်း၊ ဖောင်းပွ၍ကိုးယိုးကားယားနိုင်သည့်ဂျင်းအဝတ်အထည်များ၊ ကြိုးမချည်ထားသောဒေါက်မြင့်ရှူးဖိနပ်များ၊ ရွှေဆွဲကြိုးများ၊ ဘေ့စ်ဘောသမားဦးထုပ်များ၊ မျက်မှန်နက်များကိုဝတ်ဆင်ခြင်းတို့ဖြင့် မှတ်သားဖော်ပြနိုင်သည်။

၉၊ ၁၀။ (က) ရက်ပ်တေးဂီတနှင့် ယင်း၏ဘဝပုံစံသည် “သခင်ဘုရားနှစ်သက်တော်မူသောအရာ” ဟုတ်မဟုတ် မည်သည့်အကြောင်းအချက်များကို လူငယ်များဆင်ခြင်သင့်သနည်း။ (ခ) အချို့ခရစ်ယာန်လူငယ်များသည် မည်သည့်အရာကို ပေါ့ပေါ့တန်တန်သဘောထားကြသနည်း။

^၉ ဧဖက် ၅:၁၀ တွင် “သခင်ဘုရားနှစ်သက်တော်မူသောအရာသည် အဘယ်အရာဖြစ်သည်ကို သင်ကြလော့” ဟု ခရစ်ယာန်များအား ပြောထားသည်။ ရက်ပ်၏ နာမည်ကျော်သတင်းကို စဉ်းစားကြည့်ခြင်းအားဖြင့် ယင်းတွင် သင်ပါဝင်ပတ်သက်ပါက “သခင်ဘုရားနှစ်သက်တော်မူသောအရာ” ဖြစ်မည်ဟုသင်ထင်သလော။ ခရစ်ယာန်လူငယ်တစ်ဦးသည် လောကသားများစွာတို့ကပင် လက်မခံနိုင်သောဘဝပုံစံကိုလိုက်စားခြင်းဖြင့် ထူးခြားပေါ်လွင်လိုမည်လော။ ရက်ပ်တီးဝိုင်းတစ်ခုနှင့်ပတ်သက်၍ ပြန်ပြောပြသူတစ်ဦး၏အဆိုမှာ “ရက်ပ်အဆိုကျော်တွေဟာ ဆွဲဆောင်မှုရှိအောင် တစ်ယောက်နဲ့တစ်ယောက် အပြိုင်အဆိုင် ညစ်ညမ်းတဲ့စကားတွေ၊ လိင်နဲ့ဆိုင်တဲ့စာသားတွေကို ပြောင်ပြောင်တင်းတင်းဆိုကြတယ်။ . . . ယောက်ျားနဲ့မိန်းမကချေသည်တွေဟာ စင်ပေါ်တွင် လိင်မှုကိစ္စတွေကိုသရုပ်ပြကြတယ်” ဟူ၍ဖြစ်သည်။ ထင်ပေါ်သည့်လုပ်ရပ်တစ်ခုနှင့်ပတ်သက်၍ အစီအစဉ်ဖြစ်မြောက်ရေးအဖွဲ့ဝင်တစ်ဦးပြောပြသည်။ “သူတို့ရဲ့ပါးစပ်ကထွက်လာတဲ့ စကားတိုင်းဟာ (ညစ်ညမ်းတာပဲ)။”

^၁၀ သို့နှင့်ပင် ထိုညနေတွင်တင်ဆက်သွားသောရက်ပ်တေးဂီတကို ပင်မရက်ပ်တေးဂီတပုံစံမှဖြစ်သည်ဟု မယူမှတ်ကြပေ။ ဇာတ်ရုံညွှန်ကြားရေးမှူးဤသို့ပြောသည်။ “ခင်ဗျားတို့ကြားခဲ့ရတာက အလယ်အလတ်တန်းစားရက်ပ်ဖြစ်တယ်။ စတိုးဆိုင်တွေမှာဝယ်လို့ရနိုင်တဲ့အမျိုးအစားနဲ့အတူတူဘဲ။” ဝမ်းနည်းစရာကား ထိုပွဲကိုတက်ရောက်သူလူငယ် ၄,၀၀၀ ကျော်ထဲတွင် မိမိတို့ကိုယ်ကို ယေဟောဝါသက်သေဟုဆိုသူအချို့ပါဝင်ခြင်းပင်။ အချို့တို့က စာတန် သည် “အာကာသကောင်းကင်၏တန်ခိုးကို အစိုးရသောမင်း” ဖြစ်သည်ဟူသောအချက်ကို ပေါ့ပေါ့တန်တန်သဘောထားကြကြောင်း ထင်ရှားသည်။ သူသည် “ငြင်းဆန်သောသူတို့၌ပြုပြင်သောဝိညာဉ် [သို့မဟုတ် လွှမ်းမိုးတတ်သည့်စိတ်သဘော]” ကို အစိုးရသည်။ (ဧဖက် ၂:၂) ရက်ပ်တေးဂီတ သို့မဟုတ် ရက်ပ်ဘဝပုံစံတွင်သင်ပါဝင်လျှင် မည်သူ၏အကျိုးကို သင်ဆောင်ရွက်နေသနည်း။ အချို့သောရက်ပ်တို့တွင် လက်မခံနိုင်စရာအကြောင်းအနည်းငယ်သာ ပါဝင်ခြင်းဖြစ်ကောင်းဖြစ်မည်တော့မှန်ပါသည်။ သို့သော် ခရစ်ယာန်စံချိန်များကိုဆန့်ကျင်သည့် ဩဇာလွှမ်းမိုးသော တေးဂီတပုံစံတစ်ခုခုကိုအရသာတွေ့ခြင်းသည် ပညာရှိရာကျပါမည်လော။

ဟဲဗီးမယ်တဲလ်—လိင်၊ အကြမ်းဖက်မှုနှင့် စာတန်ဝတ်ပြုရေး

၁၁၊ ၁၂။ ဟဲဗီးမယ်တဲလ်တေးဂီတကား အဘယ်နည်း။ အဘယ်လက်မခံနိုင်ဖွယ်ရာအသွင်အပြင်များက ယင်းကို မှတ်သားပြသနည်း။

^၁၁ ရေပန်းစားသော အခြားတေးဂီတပုံစံတစ်မျိုးမှာ ဟဲဗီးမယ်တဲလ်ဖြစ်သည်။ ဟဲဗီးမယ်တဲလ်သည် မြင့်မားသည့်ဆူညံသံဖြင့်တီးမှုတ်သည့် ဟာ့ဒ်ရော့ခ်ထက် သာ၍ပြင်းထန်သည်။ The Journal of the American Medical Association စာစောင်က “ဟဲဗီးမယ်တဲလ်တေးဂီတသည် . . . ကျယ်လောင်သည့် ပြတ်တောင်းပြတ်တောင်းတေးသံများဖြင့်ဖွဲ့စည်းထားပြီး မုန်းတီးခြင်း၊ ညစ်ညူးခြင်း၊ ဖောက်ပြန်သည့်လိင်ကိစ္စနှင့် တစ်ခါတစ်ရံ စာတန်ဝတ်ပြုရေးကိုပင်ဖွဲ့ဆိုထားသည့် စာသားများလှိုင်လှိုင်ကြီးပါဝင်သည်” ဟု ဖော်ပြထားသည်။ သာ၍နာမည်ကြီးသောတီးဝိုင်းအချို့၏ အမည်များကိုယ်နှိုက်က ဤရော့ခ်အမျိုးအစား၏ အကျင့်ယိုယွင်းဖောက်ပြန်မှုသဘောကို သက်သေထူသည်။ ယင်း၏စာသားများတွင် “အဆိပ်”၊ “သေနတ်များ” နှင့် “သေခြင်း” တို့ပါဝင်သည်။ သို့သော် ဟဲဗီးမယ်တဲလ်သည် ယင်းမှဆင်းသက်ပေါက်ဖွားလာသော သရက်ရှ်မယ်တဲလ်၊ ဒက်သ်မယ်တဲလ်စသည့် လုံးဝပုံစံမတူသော တေးဂီတများနှင့်ယှဉ်လိုက်လျှင် တော်သေးဟန်ရှိသည်။ ဤအဖွဲ့များ၏အမည်များမှာ သူတစ်ပါးအားမတော်မတရားပြုသည့်အသုံးအနှုန်းများဖြစ်သည့် “ဇာတ်တူသားစားသူ”၊ “သေစာရင်း” စသည့်အမည်များဖြစ်ကြသည်။ ယင်းတို့သည် အင်္ဂလိပ်၊ သို့မဟုတ် အခြားသောနိုင်ငံခြားဘာသာစကားဖြင့်ဖြစ်သောကြောင့် ဤအမည်များမည်မျှစက်ဆုပ်ရွံရှာဖွယ်ကောင်းသည်ကို နိုင်ငံများစွာရှိလူငယ်များသည် သဘောပေါက်ချင်မှပေါက်မည်။

^၁၂ ဟဲဗီးမယ်တဲလ်တေးဂီတသည် ဆယ်ကျော်သက်များ ကိုယ့်ကိုယ်ကိုသတ်သေမှု၊ စိတ်ဖိစီးမှုနှင့် မူးယစ်ဆေးဝါးသုံးစွဲမှုများကို အထပ်ထပ်ပြုလုပ်ခြင်းများနှင့် ဆက်နွယ်နေလေ့ရှိသည်။ ယင်းသည် အကြမ်းဖက်မှုနှင့် မည်မျှပတ်သက်နေသနည်းဟူမူ ရေဒီယိုဝေဖန်ရေးသမားတစ်ဦးက “သင့်မိဘကိုသတ်ပစ်ရန်တေးဂီတ” ဟုပင် နာမည်ပေးထားသည့်အထိပင်ဖြစ်သည်။ ယင်းသည် မိဘများစွာနှင့် ရဲအရာရှိများကို ထိတ်လန့်တုန်လှုပ်စေသော စာတန်ဝတ်ပြုရေးနှင့် ဆက်နွယ်လျက်ရှိသည်။ စာတန်ဝတ်ပြုရေးထဲသို့ သဘောလောက်ပါဝင်သောလူငယ်အချို့တို့သည် ဤတေးဂီတအားဖြင့် စုန်းကဝေလောကသို့စတင်ရောက်ရှိသွားသည်ဟု စုံစမ်းစစ်ဆေးသူတစ်ဦးက အဆိုပြုသည်။ “သူတို့ဘာဖြစ်သွားကြသလဲဆိုတာ သူတို့မသိကြဘူး” ဟုသူမှတ်ချက်ချသည်။

၁၃။ ဟဲဗီးမယ်တဲလ်တေးဂီတနှင့်ပါဝင်ပတ်သက်လာခြင်းအားဖြင့် ဖြစ်ပေါ်လာနိုင်သောအန္တရာယ်ကား အဘယ်နည်း။

^၁၃ သို့သော် ခရစ်ယာန်လူငယ်များသည် “[စာတန်၏] အကြံအစည်များကို” မသိဘဲမနေသင့်။ (၂ ကောရိန္သု ၂:၁၁) မည်သို့ဆိုစေ “ငါတို့သည် . . . မိုးကောင်းကင်၌နေသော နတ်ဆိုးတို့နှင့် ဆိုင်ပြိုင်တိုက်လှန်ရကြ” ကြောင်းကို မမေ့သင့်ပေ။ (ဧဖက် ၆:၁၂) ရွေးချယ်သောတေးဂီတတစ်ခုအားဖြင့် လူတစ်ဦး၏ဘဝထဲသို့ နတ်ဆိုးကိုခေါ်ဖိတ်ရာရောက်လျှင် မည်မျှမိုက်မဲရာကျသည်တကား။ (၁ ကောရိန္သု ၁၀:၂၀၊ ၂၁) သို့သော် ခရစ်ယာန်လူငယ်အတော်များများသည် ဤတေးဂီတမျိုးကို အတော်နှစ်သက်ပုံရကြသည်။ အချို့တို့သည် တေးဂီတ၏အရသာကိုခံစားနိုင်ရန် ပုန်းလျှိုးကွယ်လျှိုးသည့်နည်းများကိုပင် သုံးလာကြသည်။ မိန်းကလေးတစ်ဦးဤသို့ဝန်ခံသည်။ “ဟဲဗီးမယ်တဲလ်ကို ကျွန်မတစ်ခါတစ်လေ တစ်ညလုံးလိုလိုနားထောင်လေ့ရှိတယ်။ ဟဲဗီးမယ်တဲလ် [လိုက်စားသူ] မဂ္ဂဇင်းကို ကျွန်မဝယ်ပြီး ကျွန်မမိဘတွေမမြင်အောင် ဖိနပ်သေတ္တာထဲမှာဝှက်ထားလေ့ရှိတယ်။ မိဘတွေကိုကျွန်မလိမ်ခဲ့တယ်။ ယေဟောဝါကျွန်မကိုမနှစ်သက်ဘူးဆိုတာ ကျွန်မသိတယ်။” နိုးလော့မဂ္ဂဇင်းမှ ဆောင်းပါးတစ်ခုအားဖြင့် သူမသတိတရားပြန်လည်ရရှိလာခဲ့သည်။ ထိုတေးဂီတ၏ညွှတ်ကွင်းထဲတွင် အခြားလူငယ်မည်မျှ ကျရောက်နေဆဲဖြစ်သနည်း။

သင်စိုက်သည့်အရာကိုရိတ်သိမ်းခြင်း

၁၄၊ ၁၅။ ကောင်းကျိုးမပေးသောတေးဂီတများကိုနားထောင်ခြင်းသည် ဆိုးကျိုးဖြစ်စေနိုင်ကြောင်း အဘယ်ကြောင့်ကျွန်ုပ်တို့သေချာနိုင်သနည်း။ ရှင်းပြပါ။

^၁၄ ထိုသို့သောတေးဂီတမျိုး၏ လှည့်စားနိုင်သည့်အန္တရာယ်ကို အထင်မသေးပါနှင့်။ သီချင်းတစ်ပိုဒ်ကိုသင်နားထောင်ရုံနှင့် တစ်ဦးတစ်ယောက်ကိုသတ်လိုစိတ် သို့မဟုတ် လိင်စာရိတ္တဖောက်ပြန်လိုစိတ်ပေါ်ပေါက်လာနိုင်မည်တော့မဟုတ်ပါ။ သို့သော် ဂလာတိ ၆:၈ က “မိမိဇာတိပကတိ၌ မျိုးစေ့ကြဲသောသူသည် ဇာတိပကတိအားဖြင့် ပုပ်ပျက်ခြင်းအသီးအနှံကိုရိတ်ရလိမ့်မည်” ဟုဆိုထားသည်။ မြေကြီးဆန်သော၊ တိရစ္ဆာန်သဘောရှိသော၊ နတ်ဆိုးနှင့်ပင်ပတ်သက်နေသော တေးဂီတကိုနားထောင်ခြင်းသည် သင့်အား မကောင်းသည့်သဘောစွဲလမ်းမှုကိုသာဖြစ်စေမည်။ (ယာကုပ် ၃:၁၅ နှိုင်းယှဉ်။) ဂီတပါမောက္ခ ဂျိုးဇက်ဖ်စတူစီ၏စကားများ ဤသို့ကိုးကားဖော်ပြခံရသည်။ “မည်သည့်တေးဂီတမဆို ကျွန်ုပ်တို့၏ စိတ်အပြောင်းအလဲ၊ စိတ်လှုပ်ရှားမှု၊ စိတ်သဘောထားများနှင့် အကျိုးဖြစ်ပေါ်စေသောအပြုအမူများကို ဩဇာသက်ရောက်မှုရှိသည်။ . . . ‘ဟဲဗီးမယ်တဲလ်ကို ကျွန်တော်နားထောင်နိုင်ပါတယ်။ ကျွန်တော့်ကို ဘာမှမထိခိုက်နိုင်ပါဘူး’ ဟုပြောသူသည် လုံးလုံးမှားသည်။ မတူညီသောလူများကို မတူညီသောအတိုင်းအတာနှင့် မတူညီသောနည်းလမ်းများဖြင့် ထိခိုက်နိုင်သည်။”

^၁၅ ခရစ်ယာန်လူငယ်တစ်ဦးက “သရက်ရှ်မယ်တဲလ်ကို ကျွန်တော်ဘယ်လောက်ထိစွဲသွားသလဲဆိုရင် ကျွန်တော့်ဥပဓိရုပ်တစ်ခုလုံးပြောင်းလဲသွားတဲ့အထိပါပဲ” ဟုဝန်ခံသည်။ မကြာမီမှာပင် နတ်ဆိုးများနှင့် ပြဿနာတက်စပြုလာတော့သည်။ “နောက်ဆုံးတော့ ကျွန်တော့်တေးအယ်လ်ဘန်ကိုလွှင့်ပစ်လိုက်တာနဲ့ နတ်ဆိုးတွေလက်ကနေလွတ်ခဲ့ရတယ်” ဟုသူပြောပြသည်။ အခြားလူငယ်တစ်ဦးက “နတ်ဝိဇ္ဇာအတတ်၊ မူးယစ်ဆေးဝါး၊ လိင် စတဲ့တစ်ခုခုနဲ့ပတ်သက်တဲ့တေးဂီတတွေကို ကျွန်တော်နားထောင်ခဲ့ဘူးတယ်။ လူငယ်များစွာက သူတို့ကိုသြဇာမသက်ရောက်ဘူးလို့ပြောကြတယ်။ ဒါပေမယ့် ဩဇာသက်ရောက်မှုရှိကိုရှိတယ်။ နောက်ဆုံးကျွန်တော်သမ္မာတရားထဲကထွက်သွားရတယ်” ဟုဝန်ခံခဲ့သည်။ “လူသည် အဝတ်မလောင်ဘဲ မီးကိုပိုက်ဖက်နိုင်သလော” ဟု နယပုံပြင်ကျမ်းကမေးထားသည်။—သု၊ ၆:၂၇။

ဆက်၍သတိပြုသွားပါလေ

၁၆။ ယနေ့ တေးရေးသူနှင့်သီဆိုသူအများစုတို့အား မည်သို့ပြောနိုင်သနည်း။

^၁၆ ရှေးဧဖက်မြို့ရှိခရစ်ယာန်များထံသို့ ပေါလုစာရေးခဲ့သည်။ “ထို့ကြောင့် ကြွင်းသောတစ်ပါးအမျိုးသားတို့သည် လျှပ်ပေါ်သောစိတ်နှင့်ကျင့်သည်နည်းတူ သင်တို့သည် နောက်တစ်ဖန်မကျင့်မည်အကြောင်း သခင်ဘုရားအခွင့်နှင့်ငါမှာလိုက်၏။ ထိုသူတို့သည် ဉာဏ်အလင်းကွယ်သည်ဖြစ်၍ စိတ်နှလုံးမိုက်မဲသောအားဖြင့် အလျင်းမသိသောကြောင့် ဘုရားသခင်၏အသက်နှင့်ကွာရှင်းလျက်ရှိကြ၏။” (ဧဖက် ၄:၁၇၊ ၁၈) ယနေ့တေးရေးသူနှင့်သီဆိုသူအများစုတို့အား ထိုသို့ပင်မပြောနိုင်ပေလော။ ခါတိုင်းနှင့်မတူဘဲ တေးဂီတပုံစံအားလုံးတို့သည် “ဤလောကကိုအစိုးရသောဘုရား” စာတန်မာရ်နတ်၏ ဩဇာလွှမ်းမိုးမှုကို ထင်ဟပ်ကြသည်ချည်းဖြစ်သည်။—၂ ကောရိန္သု ၄:၄။

၁၇။ လူငယ်များသည် တေးဂီတကို မည်သည့်နည်းဖြင့်စီရင်ဆုံးဖြတ်နိုင် သို့မဟုတ် စိစစ်နိုင်သနည်း။

^၁၇ ‘နောက်ဆုံးကာလ’ နှင့်ပတ်သက်၍ ကျမ်းစာဤသို့ကြိုပြောထားသည်။ ‘ဆိုးညစ်သောသူ၊ လှည့်ဖြားသောသူတို့မူကား ဆိုးညစ်ခြင်း၌ တရွေ့ရွေ့တိုးပွားကြလိမ့်မည်။’ (၂ တိမောသေ ၃:၁၊ ၁၃) သင်ရွေးချယ်သောတေးဂီတနှင့်ပတ်သက်လျှင် ခါတိုင်းထက်ပို၍ ဂရုတစိုက်သတိထားဖို့လိုအပ်လာသည်။ စာရိတ္တစံချိန်အရလက်ခံနိုင်ဖွယ်မရှိသောအမည်များက တေးအယ်လ်ဘန်အား အရည်အချင်းညံ့ဖျင်းစေသည်။ ယောဘ ၁၂:၁၁ တွင် “ခံတွင်းသည် အစာကိုမြည်းစမ်းသကဲ့သို့ နားသည် စကားကိုစုံစမ်းသည်မဟုတ်လော” ဟုမေးခွန်းထုတ်ထားသည်။ အလားတူပင် တေးနမူနာတစ်ခုကို စိစစ်ဝေဖန်သည့်နားဖြင့် သင်စမ်းသပ်နိုင်သည်။ သင့်အထဲတွင် မည်သည့်ခံစားချက်ကို တေးသံကနှိုးဆွပေးသနည်း။ အထိန်းအကွပ်မရှိ၊ ယုတ်ညံ့သည့်အပြုအမူဖြစ်သည့် ဆူညံစွာသောက်စားကခုန်ပျော်ပါးလိုသောစိတ်ဓာတ်ကို အားပေးသလော။ (ဂလာတိ ၅:၁၉-၂၁) စာသားများကောမည်သို့နည်း။ လိင်စာရိတ္တယိုယွင်းမှု၊ မူးယစ်ဆေးဝါးသုံးစွဲမှု၊ “ပြောရုံမျှပင်ရှက်ဖွယ်ဖြစ်” သော အခြားသောမှောက်မှားမှုများကို အားပေးထားသလော။ (ဧဖက် ၅:၁၂၊ သမ) ဘုရားသခင်၏လူများအလယ်တွင် ထိုကဲ့သို့သောအရာများကို စီးဝါးလိုက်၍ အထပ်ထပ်ရွတ်ဆိုဘို့နေနေသာသာ “စကားဖြင့်မျှမဆက်ဆံ” ရန် သမ္မာကျမ်းစာပြောထားသည်။ (ဧဖက် ၅:၃) တေးအယ်လ်ဘန်အဖုံး၏ပုံစံကော မည်သို့ရှိသနည်း။ နတ်ဆိုးများနှင့်ပတ်သက်သောခေါင်းစဉ်များ သို့မဟုတ် လိင်စိတ်နှိုးဆွသောရုပ်ပုံများပါရှိသလော။

၁၈။ (က) တေးဂီတနှင့်ပတ်သက်လာလျှင် လူငယ်များသည် မည်သည့်အပြောင်းအလဲများပြုလုပ်ရဖွယ်ရှိသနည်း။ (ခ) လူငယ်တစ်ဦးသည် သာ၍အကျိုးပြုသောတေးဂီတကို အရသာတွေ့အောင်မည်သို့ပြုနိုင်သနည်း။

^၁၈ သင်ရွေးချယ်သည့်တေးဂီတပုံစံတွင် အပြောင်းအလဲလုပ်စရာအချို့လိုကောင်းလိုမည်။ စာရိတ္တပျက်ပြားမှု၊ နတ်ဆိုးများနှင့်ပတ်သက်သောခေါင်းစဉ်ပါသည့် တိပ်ခွေများ၊ ဓာတ်ပြားများ သင့်ထံတွင်ရှိပါက ယင်းတို့ကို ချက်ချင်းလွှင့်ပစ်ဖို့ကောင်းသည်။ (တမန်တော် ၁၉:၁၉ နှိုင်းယှဉ်။) ယင်းက တေးဂီတကိုသင်နားမထောင်ရတော့၊ ခေတ်ပေါ်တေးဂီတအားလုံး လက်ခံနိုင်ဖွယ်မရှိဟု ဆိုလိုနေခြင်းမဟုတ်ပါ။ အချို့လူငယ်များသည် တေးဂီတနှင့်ပတ်သက်၍ သူတို့၏အကြိုက်ကိုတိုးချဲ့ရန်ကြိုးစားကြပြီး ယခုသူတို့သည် အချို့သော သီချင်းကြီးများ၊ အုပ်စုတေးများ၊ သွက်လက်သည့်ဂျတ်ဇ်တေးသံများနှင့် အခြားသောတေးဂီတများကို နားဝင်ပီယံဖြစ်နေကြသည်။ Kingdom Melodies တိပ်ခွေသည် လူငယ်များစွာအား စိတ်ကြည်လင်တက်ကြွလန်းဆန်းစေသော သံစုံတီးဝိုင်းတေးသံများကို အရသာခံတတ်ရန် ကူညီပေးနိုင်ခဲ့ပြီ။

၁၉။ တေးဂီတကို သူ့နေရာနှင့်သူထားရန် အဘယ်ကြောင့်အရေးကြီးသနည်း။

^၁၉ တေးဂီတသည် ဘုရားသခင်ပေးသနားသည့်လက်ဆောင်ဖြစ်သည်။ သို့သော် ယင်းသည် လူများစွာတို့အတွက် ကောင်းကျိုးမပေးသည့် လိုက်စားစရာတစ်ခုဖြစ်လာသည်။ ထိုသူတို့သည် “စောင်း၊ တယော၊ ပတ်သာ၊ ပုလွေ” များတီးမှုတ်ခြင်းကိုနှစ်သက်သော်လည်း “ထာဝရဘုရား [ယေဟောဝါ၊ ကဘ] ၏အမှုတော်ကိုကား ပမာဏမပြုကြ” သော ရှေးဣသရေလလူမျိုးများနှင့်တူကြသည်။ (ဟေရှာယ ၅:၁၂) တေးဂီတကို သူ့နေရာနှင့်သူထားရှိပြီး ယေဟောဝါ၏အမှုတော်ကို သင်အဓိကအာရုံစိုက်ရာဖြစ်စေပါ။ သင်ရွေးချယ်သောတေးဂီတများနှင်ပတ်သက်၍ ဂရုတစိုက်စိစိစစ်စစ်ရှိပါ။ သို့အားဖြင့် ဤဘုရားပေးလက်ဆောင်ကို အလွဲသုံးခြင်းမဟုတ်ဘဲ တော်လျော်စွာအသုံးပြုနိုင်ပေမည်။

သင်မှတ်မိသလော

◻ တေးဂီတကို ဘုရားပေးလက်ဆောင်ဟု အဘယ်ကြောင့်ခေါ်နိုင်သနည်း။

◻ ရှေးခေတ်က တေးဂီတမည်သို့အလွဲသုံးခြင်းခံခဲ့ရသနည်း။

◻ ရက်ပ်နှင့် ဟဲဗီးမယ်တဲလ်တေးဂီတများသည် ခရစ်ယာန်လူငယ်များအား မည်သည့်အန္တရာယ်ဖြစ်စေနိုင်သနည်း။

◻ ခရစ်ယာန်လူငယ်များသည် တေးဂီတရွေးချယ်ရာတွင် ဂရုစိုက်မှုကိုမည်သို့တင်ပြနိုင်သနည်း။

[စာမျက်နှာ ၂၃ ပါ ရုပ်ပုံ]

ကျမ်းစာခေတ်က တေးဂီတကို ယေဟောဝါအားချီးမွမ်းခြင်းတွင် အသုံးပြုခဲ့လေ့ရှိသည်