“နောက်ဆုံးသောရန်သူ” သည် ဆုံးရှုံးခြင်းသို့ရောက်လိမ့်မည်!

သင်ကလေးဘဝက အမှောင်ကိုကြောက်ခဲ့ပေမည်။ ထိတ်လန့်ဖွယ်လျှို့ဝှက်သဲဖိုပုံပြင်များမဆိုဘိ၊ ဒဏ္ဍာရီပုံပြင်များကပင် သင့်အားစိတ်မငြိမ်မသက်ဖြစ်စေခဲ့ကြပေမည်။ သင်အိပ်ပျော်ဖို့ကြိုးစားနေစဉ် မိဘများကမီးခွက်ထွန်းလျက်ထားပေးကြသည်မှာ စိတ်ကိုသက်သာစေလိုက်သည့်ဖြစ်ခြင်း!

သေခြင်းသည် အလားတူလူများစွာတို့အား ခြောက်လှန့်နေသည်။ သို့ ဖြစ်သည့်တိုင် အလားတူကြောက်ရန်ကား မလိုပါ။ အဘယ်ကြောင့်နည်း။ အကြောင်းမှာ သေခြင်း၏တကယ့်အဖြစ်မှန်ကြောင့်ဖြစ်သည်။

သင့်ရန်သူအကြောင်းသိထားပါ

ရှေးဣသရေလနိုင်ငံ၏ ပညာရှိရှောလမုန်ဘုရင်က ဤသို့ကြေညာခဲ့သည်–“အသက်ရှင်သောသူသည် မိမိသေရမည်ကိုသိ၏; သေသောသူမူကား အဘယ်အရာကိုမျှမသိ။” (ဒေသနာ ၉:၅) သင့်သမ္မာကျမ်းစာအုပ်တွင်တွေ့ရသော ဘုရားသခင်မှုတ်သွင်းထားရာဖြစ်သည့် ဤတွေးခေါ်မြော်မြင်မှုအရ သေခြင်းဆိုသည်မှာ ရှင်ခြင်း၏ဆန့်ကျင်ဘက်မျှသာဖြစ်သည်။ သေသောသူတို့အနေနှင့် အသိတရားနှင့်ပြည့်စုံသောတည်ရှိမှု ဘာမျှမရှိတော့ပါ။

ပုံတင်စကားအားဖြင့် သေခြင်းကိုရည်ညွှန်းလျက် ခရစ်ယာန်တမန်တော်ပေါလုက ဤသို့ရေးသည်–“သေခြင်း၊ သင်၏အောင်ခြင်းကား အဘယ်မှာနည်း။ သေခြင်း၊ သင်၏အဆိပ်ဆူးကား အဘယ်မှာနည်း။” သေခြင်းကိုဖြစ်စေသောအဆိပ်ဆူးကား အဘယ်အရာနည်း။ “သေခြင်းကိုဖြစ်စေသောအဆိပ်ဆူးကား ဒုစရိုက်အပြစ်ပေတည်း” ဟုပေါလုကဆိုသည်။ (၁ ကောရိန္သု ၁၅:၅၅၊ ၅၆၊ ကဘ; ဟောရှေ ၁၃:၁၄) သို့ ဖြစ်လျှင် သေစေနိုင်သောဤအဆိပ်ဆူး၏မူလဘူတကား အဘယ်နည်း။ ကျမ်းစာ၏အခြားတစ်နေရာတွင် ပေါလုက “အပြစ်တရားသည် တစ်ယောက်သောသူအားဖြင့် ဤလောကသို့ဝင်၍ အပြစ်တရားအားဖြင့် သေခြင်းတရားဝင်သည်နှင့်အညီ လူအပေါင်းတို့သည် အပြစ်ရှိသောကြောင့် သေခြင်းသို့ရောက်ရကြ၏” ဟုဖော်ပြထားလေသည်။ (ရောမ ၅:၁၂) “လူအပေါင်းတို့သည် အာဒံအားဖြင့် သေခြင်းသို့ရောက်” ကြသည်ဟု ဆိုလိုက်ခြင်းဖြင့် အထက်ပါတစ်ယောက်သောသူသည် မည်သူမည်ဝါဖြစ်သည်ကို တမန်တော်သံသယကင်းပါသည်။ (၁ ကောရိန္သု ၁၅:၂၂) မှန်ပေသည်။ ကျွန်ုပ်တို့ဆင်းသက်လာရာမူလဖခင်ကြီးအာဒံ၏ နာမခံမှုကြောင့် ကျွန်ုပ်တို့အားလုံးသည် သေခြင်းအဆိပ်ဆူး၏ထိခိုက်မှုကို လွယ်ကူစွာခံရကြလေသည်။—ကမ္ဘာဦး ၃:၁-၁၉။

ကျန်းမာရေးကောင်းပြီး အချင်းချင်းချစ်ခင်ကြင်နာသော မိသားစုနှင့်အတူ ပျော်စရာကောင်းသောပတ်ဝန်းကျင်၌ ကျွန်ုပ်တို့မည်သူမျှသေလိုကြမည်မဟုတ်ပေ။ သို့သော်လည်း သမ္မာကျမ်းစာကဆိုသည့်အတိုင်း “အချိန်နှင့်ကြိုတင်မမြင်ရသောဖြစ်ပျက်မှု” က ကျွန်ုပ်တို့၏ဘဝကို လုယူပေမည်။ (ဒေသနာ ၉:၁၁၊ ကဘ) အမှန်စင်စစ်၊ ကျွန်ုပ်တို့၏ဘဝသည် နက်ဖြန်ဘာဖြစ်မည်ကိုပင် ကြိုတင်မသိကြပါ။ (ယာကုပ် ၄:၁၄) တစ်ခုသေချာသည်မှာ—ကျွန်ုပ်တို့အားလုံး အပြစ်နှင့်သေခြင်းကို အမွေဆက်ခံခဲ့ကြသည်။ သို့ ဖြစ်ရာ သေခြင်းသည် ကျွန်ုပ်တို့အားချောင်းမြောင်းလျက် ရန်သူကဲ့သို့ထိုးနှက်လေ့ရှိလေသည်။

ချစ်ရသူတစ်ဦးသေဆုံးမှုကို ရင်ဆိုင်ခံရပ်ခြင်း

သေခြင်းသည် ချစ်ရသူတစ်ဦးကို တိုက်ခိုက်ထိုးနှက်လာသည့်အခါမျိုးတွင် အထူးသဖြင့်ရန်သူဖြစ်ပေသည်။ “မောင့်အတွက်ပိုဆိုးမှာ” ဟု ရောဂါကျွမ်းနေသောဇနီးသည်က သေရမည်ကိုတွေးတောရင်း မိမိလင်အားပြောခဲ့သည်။ အဘယ်ကြောင့်ထိုသို့ သူမပြောနိုင်ခဲ့သနည်း။ အကြောင်းမှာ သမ္မာကျမ်းစာက ဤသို့ဆိုသည်–“ဆောင်ရွက်စရာအမှုရှိသမျှကို ကြိုးစားအားထုတ်၍ ဆောင်ရွက်လော့။ အကြောင်းမူကား သင်ယခုသွား၍ ရောက်ရလတ္တံ့သောအရပ်တည်းဟူသော မရဏာနိုင်ငံ (သင်္ချိုင်း) ၌ လုပ်ဆောင်ခြင်းမရှိ၊ ကြံစည်ခြင်းမရှိ၊ သိပ္ပံအတတ်မရှိ၊ ပညာမရှိပါတကား။” (ဒေသနာ ၉:၁၀) သေသောသူတို့သည် ဘာမျှမခံစားကြတော့ပါ။ သို့သော် ပူဆွေးဝမ်းနည်းမှုဝန်ထုပ်ကြီးမှာမူ ကျန်ရစ်သူဆွေမျိုးနှင့်မိတ်သင်္ဂဟများအပေါ် ကျရောက်ပေတော့သည်။ ဤဝေဒနာမျိုးကို တစ်နည်းနည်းဖြင့်ကုစား၍ရနိုင်ပါသလော။

ဘုရားသခင်၏နှုတ်ကပါဌ်တော်သမ္မာကျမ်းစာ၏ စာမျက်နှာများစွာ၌ နှစ်သိမ့်စကားများစွာပါရှိပါသည်။ ဥပမာ၊ ဆာလံစကားများကို ဖတ်ရွတ်ဆင်ခြင်ခြင်းသည် နှစ်သိမ့်မှု၏ပင်မရေသောက်မြစ်တစ်ခု အမှန်ဖြစ်ပေသည်။ “အကျွန်ုပ်တို့၏ဝန်ထုပ်ကို နေ့စဉ်ထမ်းရွက်ပေးတော်မူသော ယေဟောဝါ၊ အကျွန်ုပ်တို့ကယ်တင်ခြင်း၏ စစ်မှန်သောဘုရားသခင်သည် မင်္ဂလာရှိပါစေသတည်း။” ဤကဲ့သို့သောစကားများသည် အမှန်ပင်နှစ်သိမ့်မှုဖြစ်စေပေသည်။—ဆာလံ ၆၈:၁၉၊ ကဘ။

နှစ်သိမ့်မှု၏အခြားရေသောက်မြစ်တစ်ခုမှာ ခရစ်ယာန်အသင်းတော်ဖြစ်သည်။ စီ.အီး. ပထမရာစုနှစ်တွင် တမန်တော်ပေါလုက ဤသို့ရေးခဲ့သည်– “မုတ်ဆိုးမအမှန်ဖြစ်သောမိန်းမတို့ကို မစလုပ်ကျွေးလော့။ သားမြေးရှိသော မုတ်ဆိုးမဖြစ်လျှင်၊ ထိုသားမြေးတို့သည် ရှေ့ဦးစွာ ဘုရားဝတ်ကို ရည်မှတ်လျက်၊ မိမိအိမ်ကိုပြုစု၍ မိဘဘိုးဘွား၌ ကျေးဇူးဆပ်ခြင်းငှာသင်ကြစေ။ ထိုအမှုသည် ဘုရားသခင်နှစ်သက်တော်မူသောအမှုဖြစ်၏။ မုတ်ဆိုးမသည် အသက်ခြောက်ဆယ်မပြည့်လျှင်၊ စာရင်းအင်းမဝင်စေနှင့်။ လင်တစ်ယောက်တည်းရှိဖူးသောသူ၊ ကောင်းသောအကျင့်ကိုကျင့်၍ အသရေရှိသောသူ၊ သူငယ်တို့ကိုကျွေးမွေးခြင်း၊ ဧည့်သည်ဝတ်ကိုပြုခြင်း၊ သန့်ရှင်းသူတို့၏ခြေကိုဆေးခြင်း၊ ဆင်းရဲသောသူတို့ကိုလုပ်ကျွေးခြင်း၊ ကောင်းသောအမှုရှိသမျှတို့၌ကြိုးစားအားထုတ်ခြင်းကို ပြုဖူးသောသူဖြစ်လျှင်၊ စာရင်းအင်းဝင်စေ။” (၁ တိမောသေ ၅:၃၊ ၄၊ ၉၊ ၁၀) ယနေ့ယေဟောဝါသက်သေတို့သည် ထိုကဲ့သို့သောယုံကြည်သူချင်းတို့အား အလားတူကူညီနှစ်သိမ့်ပေးကြပါသည်။

ကျန်ရစ်သူပြုလုပ်ရမည့် အကြီးမားဆုံးသောပြုပြင်မှုမှာ စိတ်လှုပ်ရှားမှုဆိုင်ရာ ဖြစ်လေ့ရှိသည်။ “ကျွန်တော့်ဇနီးကို ကျွန်တော်အသဲနင့်အောင်ချစ်ခဲ့တယ်။ ဒီအဖြစ်အပျက်ဟာ ကျွန်တော့်တစ်သက်မှာ ဝမ်းနည်းစရာအကောင်းဆုံးပါပဲ။ တကယ့်ကိုအခံရခက်တာ” ဟု လွန်ခဲ့သောနှစ်နှစ်က ကြင်ဖော်သေဆုံးခဲ့သောအမျိုးသားတစ်ဦးက စာရေးခဲ့သည်။ ကာလအတော်အတန်ကြာ အိမ်ထောင်ပြုပြီးသူတစ်ဦးသည် လူသားချင်းဆက်စပ်မှုများတွင် နှစ်ကိုယ့်တစ်ကိုယ်အကျဆုံးသောဆက်စပ်မှုဖြင့် မိမိ၏ဘဝကို မိမိ၏ကြင်ဖော်နှင့် ဝေမျှလာခဲ့ခြင်းဖြစ်သည်။ ကြင်ဖော်တစ်ဦးသေဆုံးသောအခါ ကျန်ရစ်သူအတွက် ကြီးစွာသောဆုံးရှုံးမှုဖြစ်သည်မှာ သဘာဝပင်။ အကူအညီအတွက် မည်သူထံတောင်းခံနိုင်မည်နည်း။

ယင်းကဲ့သို့သောအခြေအနေမျိုးတွင် ခရစ်ယာန်အပေါင်းအသင်းကောင်းများက တည်ဆောက်မှုများစွာပေးနိုင်ကြပါသည်။ “အဆွေခင်ပွန်းသည် အခါခပ်သိမ်းချစ်တတ်၏။ ညီအစ်ကိုသည် ဒုက္ခကာလအဖို့ မွေးလျက်ရှိ၏” ဟု ပညာရှိနယပုံပြင်တစ်ခုကဆို၏။ (သု. ၁၇:၁၇) မုဆိုးမ သို့မဟုတ် မုဆိုးဖိုတစ်ဦးအနေနှင့် အမှန်တကယ်ထောက်မတတ်သော အပေါင်းအဖော်များလိုအပ်သည်။ မျက်ရည်ကျလာစေနိုင်သည့်တိုင်အောင်၊ အမြော်အမြင်ရှိသောမိတ်ဆွေများသည် ဝမ်းနည်းကြေကွဲနေသူအား စကားပြောစေရန် အားပေးကြသည်။ ကြင်ဖော်ဆုံးပါးခြင်းကြောင့် ခံစားရသည့်စိတ်နှလုံးကြေကွဲမှုဝေဒနာကို ကိုယ်တိုင်ကြုံဖူးသောခရစ်ယာန်တစ်ဦးသည် အကြင်နာပြည့်ဝသောအကူအညီကို ကမ်းလှမ်းနိုင်သည်။ “စိတ်ငယ်သောသူတို့ကို အားပေးကြလော့” ဟု သမ္မာကျမ်းစာက အကြံပေးပါသည်။ (၁ သက်သာလောနိတ် ၅:၁၄) သို့သော် မုဆိုးမနှင့်မုဆိုးဖိုများသည် မိမိတို့၏အိမ်ထောင်ဖက်များကို သတိရတမ်းတကြကြောင်း မမေ့ပါနှင့်။ သို့ ဖြစ်၍ ကြင်ဖော်ဆုံးရှုံးသူအနေနှင့် အခြားသူများအားရင်ဖွင့်ရာ၌ အားလုံးကသန့်ရှင်းဖြူစင်သည့်အကျင့်အကြံကို ထိန်းသိမ်းနိုင်မည့်အခြေအနေများအောက်၌သာ ပြုသင့်သည်။—၁ ပေတရု ၂:၁၂။

သေခြင်းကထိခိုက်သင့်ရောက်စေသည့်ဝေဒနာအတွက် အကောင်းဆုံးသောဖြေဆေးမှာ အခြားသူများ၏အကျိုးကိုဆောင်ခြင်း၌ အလုပ်များနေခြင်းပင်ဖြစ်သည်– ကိုယ်တိုင်အကူအညီလိုအပ်နေသည်ဟု မိမိကိုယ်ကိုမိမိယူဆနေသူများအဖို့ အတော်ပင်စိန်ခေါ်ချက်ဖြစ်သည်! ဤကား တစ်ကိုယ်ကောင်းစိတ်ကင်းမဲ့ခြင်းအရေးပါလာသည့်နေရာပင်တည်း။ တစ်ကိုယ်ကောင်းစိတ်ကင်းကင်းနှင့် အခြားသူများအတွက်လုပ်ပေးခြင်းသည် ဝမ်းနည်းမှုကိုဖယ်ရှားရာ၌ များစွာအကူအညီဖြစ်စေပေသည်။ အကြောင်းမှာ ယေရှုက “အစွန့်အကြဲခံခြင်းအရာထက် စွန့်ကြဲခြင်းအရာသည် သာ၍မင်္ဂလာရှိသည်” ဟုဆိုခဲ့သည့်အတွက်ပင်ဖြစ်သည်။—တမန်တော် ၂၀:၃၅။

သေခြင်းအပေါ်အောင်ပွဲခံခြင်း

ပျား၏အဆိပ်ဆူးသည် အလွန်နာကျင်စေနိုင်သည်သာမက သေပင်သေစေနိုင်ပေသည်။ သို့ ဖြစ်သော်လည်း သင်၏အရေပြားထဲတွင် မြုပ်ဝင်နေသော ပိုးမွှား၏ဆူးကို ဖယ်ရှားလိုက်ခြင်းဖြင့် သက်သာသွားစေနိုင်သည်။ သို့သော် သေခြင်းကိုဖြစ်စေသောဆူးမှ ချမ်းသာရရန် မည်သို့သောအလားအလာများရှိပါသနည်း။

ဒုစရိုက်အပြစ်သည် သေခြင်းကိုဖြစ်စေသောအဆိပ်ဆူးဖြစ်ကြောင်း ရှင်းပြပြီးနောက် ပေါလုက ဤသို့ကြွေးကြော်လိုက်သည်– “ငါတို့သခင်ယေရှုခရစ်အားဖြင့် ငါတို့အားအောင်ခြင်းအခွင့်ကိုပေးတော်မူသော ဘုရားသခင်၏ကျေးဇူးတော်သည် ကြီးလှစွတကား။” (၁ ကောရိန္သု ၁၅:၅၇) သေခြင်းကိုအောင်နိုင်ရေးသည် ခရစ်တော်နှင့်မည်သို့ဆက်စပ်မှုရှိပါသနည်း။ ယေရှုက မိမိကိုယ်တော်တိုင်အကြောင်းမိန့်မြွက်တော်မူသောအခါ ယင်းသို့ပင်ဖြစ်ကြောင်း ပြသတော်မူခဲ့သည်– “လူသားသည် သူတစ်ပါးကိုစေစားခြင်းငှာမလာ။ သူတစ်ပါးအစေကိုခံခြင်းငှာလည်းကောင်း၊ မိမိအသက်ကိုစွန့်၍ လူများကိုရွေးခြင်းငှာလည်းကောင်း ကြွလာသည်။” (မဿဲ ၂၀:၂၇၊ ၂၈) မှန်ပါသည်။ ယေရှုခရစ်တည်းဟူသောဘုရားသခင့်သားတော်နှင့် ကိုယ်တော်အားဖြင့် ယေဟောဝါရှင်စီမံထောက်ပံ့ပေးသော ရွေးဖိုးယဇ်ကို ယုံကြည်သမှုပြုသူများအား အာဒံမှအမွေဆက်ခံရရှိသောသေခြင်းသည် အစဉ်သဖြင့်ချုပ်၍ထားနိုင်မည်မဟုတ်။—ယောဟန် ၃:၁၆။

ယေရှု၏စကားများသည် အမှန်ပင်အားရှိစရာကောင်းလှပေသည်– “ဤအမှုအရာကို အံ့သြခြင်းမရှိကြနှင့်။ သင်္ချိုင်းများမှာရှိသောသူအပေါင်းတို့သည် သားတော်၏စကားသံကိုကြား၍ ထွက်ရမည့်အချိန်ကာလရောက်လတ္တံ့။ ကောင်းသောအကျင့်ကိုကျင့်သောသူတို့သည် အသက်ရှင်ရာထမြောက်ခြင်းသို့လည်းကောင်း၊ ဆိုးယုတ်သောအကျင့်ကိုကျင့်သောသူတို့သည် အပြစ်စီရင်ရာထမြောက်ခြင်းသို့လည်းကောင်း ထွက်ရကြလတ္တံ့။”—ယောဟန် ၅:၂၈၊ ၂၉။

ထိုထက်ရာစုနှစ်ပေါင်းများစွာစော၍ ဘုရားသခင့်ပရောဖက်ဟေရှာယက ကြိုတင်ဟောပြောခဲ့သည်မှာ “သေခြင်းကိုလည်း အစဉ်နစ်မွန်းဆုံးရှုံးစေတော်မူလိမ့်မည်။ အရှင်ထာဝရဘုရား [ယေဟောဝါ၊ ကဘ] သည် ခပ်သိမ်းသောမျက်နှာတို့မှ မျက်ရည်ကိုသုတ်တော်မူလိမ့်မည်” ဟူ၍ဖြစ်သည်။ (ဟေရှာယ ၂၅:၈) တစ်ဖန် ဗျာဒိတ်ကျမ်း ၂၁:၄ တွင်လည်း ဤထူးမြတ်အံ့သြဖွယ်ကောင်းသော အနာဂတ်အလားအလာကို သမ္မာကျမ်းစာကတင်ပြထားသေးသည်– “ဘုရားသခင်သည် သူတို့၏မျက်စိမှမျက်ရည်များကို သုတ်တော်မူမည်။ နောက်တစ်ဖန်သေဘေးမရှိရ။ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိရ။ အကြောင်းမူကား ရှေးဖြစ်ဖူးသောအရာတို့သည် ရွေ့သွားကြပြီ။” သေခြင်း၌အိပ်ပျော်သောသူများနှင့်ပတ်သက်သော ဤသမ္မာကျမ်းကမျှော်လင့်ချက်အားဖြင့် ခွန်အားရယူကြမည်ဆိုလျှင် ကြင်ဖက်ဆုံးပါးသူများသည် “မျှော်လင့်ချက်မရှိသောအခြားသူများကြေကွဲဝမ်းနည်းကြသကဲ့သို့ ကြေကွဲဝမ်းနည်း” ရန်မလိုတော့ပါချေ။—၁ သက်သာလောနိတ် ၄:၁၃။

သမ္မာကျမ်းစာတွင်ဖွင့်ပြထားသည့်အတိုင်း လူသားများအဖို့ ဘုရားသခင်သိုလှောင်ထားသည့်အရာများကို ကွက်ကွက်ကွင်းကွင်းမြင်ယောင်အောင် ကြိုးစားပါလေ။ မကြာမီဆိုက်ရောက်လာတော့မည့် “ကြီးစွာသောဒုက္ခ” သည် ဆိုးယုတ်သောလက်ရှိကမ္ဘာ့အစီအစဉ်စနစ်၏ ပျက်စီးပျောက်ကွယ်ခြင်းပင်ဖြစ်သည်။ (ဗျာဒိတ် ၇:၁၄) ဗာဗုလုန်ဘာသာရေးကို လိုက်စားသူများအနေနှင့် မိမိတို့၏လမ်းဆုံးနှင့်ပက်ပင်းတိုးကြတော့သည်။ စားနပ်ရိက္ခာရှားပါးမှုနှင့် စစ်မက်များကွယ်ပျောက်ကုန်ကြသည်။ လူသားမြောက်မြားစွာတို့ကို သေခြင်းသို့ပို့ခဲ့သောစာတန်မာရ်နတ်ကို ယေရှုခရစ်သည် တွင်းနက်ကြီးထဲသို့ချသည်။ ပြီးလျှင် ခရစ်တော်သည် မိမိ၏ရွေးဖိုးယဇ်၏တန်ဖိုးကို လူသားများအပေါ်အသုံးချသည့် အနှစ်တစ်ထောင်အုပ်စိုးတော်မူခြင်းကာလကို စတင်လိုက်သည်။ မျှော်လင့်စောင့်စားလာခဲ့သည့်ရှင်ပြန်ထမြောက်ရာကာလတွင် လူသေများပြန်ရှင်လာကြသည်။ ဘုရားသခင်၏နှုတ်ကပါဌ်တော်အလင်းသည် အလွန်တောက်ပစွာထွန်းလင်းနေသည်။ လူသားလောက၏ရန်သူသေခြင်းနှင့်ပတ်သက်သော အယူသီးသောအမြင်များမရှိကြတော့ချေ။ အသက်ရှင်သောသူအားလုံး၌ ဘုရားသခင်၏နည်းလမ်းတော်များကို သင်ကြားနားလည်ရန်နှင့် ကိုယ်တော်၏ဖြောင့်မတ်သောစံချိန်တော်များနှင့် မိမိကိုယ်ကိုညီညွတ်စေရန် အခွင့်အရေးရှိကြသည်။—သု. ၄:၁၈; တမန်တော် ၂၄:၁၅; ဟေဗြဲ ၂:၁၄၊ ၁၅; ဗျာဒိတ် ၁၈:၄-၈; ၁၉:၁၉-၂၁; ၂၀:၁-၃။

‘ထို့နောက် ခရစ်တော်ယေရှုသည် နိုင်ငံတော်ကို မိမိ၏ဘုရားသခင်ဖြစ်သောခမည်းတော်ထံ အပ်လိုက်သည်နှင့် အဆုံးသတ်လေသည်။ အကြောင်းမှာ အလုံးစုံသောရန်သူအပေါင်းတို့ကို ကိုယ်တော်၏ခြေအောက်တွင် ဘုရားသခင်ချထားတော်မူသည့်အထိ ကိုယ်တော်သည် အုပ်စိုးတော်မူရ၏။ နောက်ဆုံးသောရန်သူအနေနှင့် သေခြင်းသည် ပယ်ဖျောက်ခြင်းခံရလေသည်’ ဟု ပေါလုကဆိုပါသည်။ (၁ ကောရိန္သု ၁၅:၂၄-၂၆၊ ကဘ) အာဒံ၏အပြစ်ကြောင့် ဖြစ်ပေါ်လာသောမစွမ်းသန်မှုဟူသရွေ့ ပပျောက်သွားလေပြီ။ နောက်ဆုံးသောစမ်းသပ်ချိန်ရောက်လာသည်။ ဘုရားသခင်အားချစ်မြတ်နိုးသူတို့သည် ယင်းကိုသစ္စာရှိရှိကျော်ဖြတ်သွားသည်။ (ဗျာဒိတ် ၂၀:၄-၁၀) ပြီးပြည့်စုံခြင်းအဖြစ်သို့ ပြန်လည်ရောက်ရှိကြသော ဤနာခံမှုရှိသူလူသားများသည် အနှစ်ခုနစ်ဆယ် သို့မဟုတ် အနှစ်တစ်ရာ့တစ်ဆယ်သာမက ထာဝစဉ်အသက်ရှင်ကြသည်။ သားတော်အားဖြင့် ဘုရားသခင့်အထံတော်မှ သက်ရောက်လာသောကျေးဇူးတော်ပါတကား!—ရောမ ၆:၂၃။

သို့ ဖြစ်ရာ ယခု အသင်နှစ်ပေါင်းမည်မျှအသက်ရှင်နိုင်မည်နည်း။ သင့်ဘဝသက်တမ်းသည် အဆုံးမရှိရှည်နိုင်ပါသည်။ ဤကမ္ဘာကြီး၏ “ဆုံးခန်းချိန်” တွင် သင်အသက်ရှင်နေသည်နှင့်အညီ သင်သည် ဘယ်တော့မျှမသေတော့ဘဲ နေနိုင်ပါသည်။ (ဒံယေလ ၁၂:၄; ယောဟန် ၁၁:၂၅၊ ၂၆; ၁၇:၃) ဘုရားသခင်၏အလိုတော်ကိုပြုလုပ်ပါက သင်သည် ဘုရားသခင်ကတိထားသောကမ္ဘာသစ်ထဲသို့ ဆက်လက်ဝင်ရောက်အသက်ရှင်နေနိုင်ပေသည်။—၂ ပေတရု ၃:၁၃။

သို့သော် သင်သည် အတော်ကလေးအသက်အရွယ်ရနေသည်ဖြစ်ပါမူ သေရမည့်အရေးကို ဓမ္မဓိဋ္ဌာန်ကျကျတွေးတောရန် လိုအပ်မည်ဖြစ်သည်။ ပြန်လည်ထမြောက်ခြင်းမျှော်လင့်ချက်က ပျော်ရွှင်မှုကို အမှန်တကယ်ပေးနိုင်ပါသည်။ သို့သော် ထိုကမ္ဘာ့စနစ်သစ်ထဲတွင် မိသားစုဘဝကို ယေဟောဝါဘုရားသခင်မည်သို့စီစဉ်မည်နည်းဟု သင်တွေးဆပေမည်။ ထိုကိစ္စများအတွက် သင်မပူပန်ပါနှင့်၊ မိမိအပေါ်ထာဝရသစ္စာစောင့်ထိန်းသောသူတို့အတွက် အဓွန့်ရှည်သောပျော်ရွှင်မှုကို ယေဟောဝါစီမံပေးတော်မူမည်။

စာတန့်စနစ်ဆိုး၏ ခဲယဉ်းသောဤ “နောက်ဆုံးနေ့များ” သည် ဆုံးခန်းသို့နီးကပ်လာသည်နှင့်အမျှ သေခြင်းကိုကြောက်ရွံ့မှုက ယခုပင် ယေဟောဝါအားဝတ်ပြုရန်တည်းဟူသော သင်၏အခွင့်ထူးကိုမလုယူပါစေနှင့်။ (၂ တိမောသေ ၃:၁) သေခြင်းကြောင့်ချစ်ရသူတစ်ဦးဆုံးရှုံးခဲ့သော်၊ သေခြင်း၏တန်ခိုးသြဇာသည် ယာယီမျှသာတည်မည်ဟူသောအသိဖြင့် မိမိကိုယ်ကိုနှစ်သိမ့်အားပေးပါလေ။ (ဗျာဒိတ် ၂၀:၁၃၊ ၁၄) ရှင်ပြန်ထမြောက်ခြင်းမျှော်လင့်ချက်ကို ယုံကြည်စိတ်ချပါလေ။ သင်သည် ကမ္ဘာသစ်အတွင်းသို့ ကြီးစွာသောဒုက္ခကိုကပ်ကျော်လွတ်မြောက်ခြင်းအားဖြင့် ဝင်ရသည်ဖြစ်စေ၊ ရှင်ပြန်ထမြောက်ခြင်းကြောင့်ဝင်ရသည်ဖြစ်စေ မှုတ်သွင်းထားသောအာမခံချက်တစ်ခုကိုမူ ယုံကြည်စိတ်ချပါလေ။ ယင်းကား နောက်ဆုံးသောရန်သူတည်းဟူသောသေခြင်းသည် ဆုံးရှုံးခြင်းသို့ရောက်လိမ့်မည်ဟူ၍ပေတည်း။—ဗျာဒိတ် ၇:၉၊ ၁၄။

[စာမျက်နှာ ၅ ပါ ရုပ်ပုံ]

ခရစ်ယာန်အပေါင်းအသင်းကောင်းများသည် ကြင်ဖော်ဆုံးပါးသူအား ဝိညာဉ်ရေးဘက်တွင် တည်ဆောက်မှုပေးနိုင်ကြ၏

[စာမျက်နှာ ၇ ပါ ရုပ်ပုံ]

သူတစ်ပါး၏အကျိုးကိုဆောင်ခြင်း၌ အလုပ်များလျက်နေခြင်းက ချစ်ရသူတစ်ဦးသေဆုံးမှုကြောင့်ခံစားရသည့် ဝမ်းနည်းပူဆွေးမှုကို လျော့နည်းစေနိုင်၏