စာရှုသူများထံမှ မေးခွန်းလွှာ

သမ္မာကျမ်းစာက “ဖခင်မဲ့သား” (ကဘ) ဟုကြိမ်ဖန်များစွာ ဆိုထားသည့်အတွက် မိန်းကလေးများကို အရေးမပေးကြောင်း ထင်ရှားစေပါသလော။

လုံးဝမဟုတ်ပါ။

မိဘမရှိသော သားသမီးများကို ဘုရားသခင်ဂရုစိုက်ကြောင်း ကမ္ဘာသစ်ဘာသာပြန်ကျမ်းတွင် ကြိမ်ဖန်များစွာပါသော “ဖခင်မဲ့သား” ဟူသည့်စကားက ဖော်ပြပါသည်။ ဤသို့ဂရုစိုက်တော်မူကြောင်း ဣသရေလလူမျိုးအား ပေးတော်မူသည့် ပညတ်တရားတွင် ဘုရားသခင် အတိအလင်းဖော်ပြထားသည်။

ဥပမာ၊ ဘုရားသခင်က ဤသို့ဆိုသည်– “မိဘမရှိသောသူငယ် [ဖခင်မဲ့သား၊ ကဘ] နှင့် မုဆိုးမကို သင်တို့သည် မနှောင့်ယှက်ရ။ နှောင့်ယှက်ခြင်းတစ်စုံတစ်ခုကိုပြု၍ သူတို့သည် ငါ့အား အနည်းငယ်အော်ဟစ်လျှင် ငါသည် ထိုအသံကို အမှန်ကြား၍ ငါအမျက်ပြင်းစွာထွက်လျက် သင်တို့ကို ဓားဘေးဖြင့် ကွပ်မျက်မည်။ သင်တို့မယားများသည်လည်း မုဆိုးမဖြစ်၍ သားသမီးများသည်လည်း မိဘမရှိသောသူငယ် [ဖခင်မဲ့သား၊ ကဘ] ဖြစ်ကြလိမ့်မည်။” (ထွက်မြောက်ရာ ၂၂:၂၂-၂၄) “သင်၏ဘုရားသခင် ထာဝရဘုရား [ယေဟောဝါ၊ ကဘ] သည် ဘုရားတို့၏ဘုရား၊ သခင်တို့၏သခင်၊ ကြီးမြတ်သောဘုရား၊ တန်ခိုးနှင့်ပြည့်စုံ၍ ကြောက်မက်ဖွယ်သောဘုရား၊ လူမျက်နှာကိုမထောက်၊ တံစိုးကိုမစားဘဲ မိဘမရှိသောသူငယ် [ဖခင်မဲ့သား၊ ကဘ]၊ မုဆိုးမဘက်၌ တရားစီရင်၍ ဧည့်သည်အာဂန္တုတို့ကို စုံမက်သဖြင့် အဝတ်အစားတို့ကို ပေးသနားသောဘုရားဖြစ်တော်မူ၏။”—တရားဟောရာ ၁၀:၁၇၊ ၁၈; ၁၄:၂၉; ၂၄:၁၇; ၂၇:၁၉။

ဘာသာပြန်ကျမ်း မြောက်မြားစွာက ဤအခန်းငယ်များတွင် “မိဘမရှိသောသူငယ်” သို့မဟုတ် “မိဘမဲ့ကလေး” ဟုဆိုသည့်အတွက် ယောက်ျားလေး၊ မိန်းကလေးတို့ကိုပါ ဆိုလိုသည်။ သို့ရာတွင် ဤပြန်ဆိုချက်များက ပုလ္လိင်ဖြစ်သော အခြေခံဟေဗြဲစကားလုံး (ယာ သောမ်) ပါသဘောထားကို လျစ်လျူရှုနေပါသည်။ ယင်းအစား ဆာလံ ၆၈:၅ တွင် ကမ္ဘာသစ်ဘာသာပြန်ကျမ်းက “သန့်ရှင်းရာဌာနတော်တွင် ကျိန်းဝပ်တော်မူသော ဘုရားသခင်သည် ဖခင်မဲ့သားတို့၏ဖခင်နှင့် မုဆိုးမတို့၏တရားသူကြီး ဖြစ်တော်မူ၏” ဟုဆိုထားသဖြင့် တိကျမှန်ကန်သော ပြန်ဆိုချက်ဖြစ်သည့် “ဖခင်မဲ့သား(များ)” ကို အသုံးပြုထားပါသည်။ အခြေခံဟေဗြဲစကားလုံးကို ထပ်တူသဘောမျိုးထည့်တွက် ပြန်ဆိုခဲ့ရာ ဆာလံ ၆၈:၁၁ (ကဘ) ပါကြိယာတစ်လုံး၏ ဣတ္ထိလိင်အသွင်ကြောင့် “ဝမ်းမြောက်စရာသတင်းကို ကြားပြောသောမိန်းမတို့သည် အတိုင်းမသိများကြ၏” ဟုပြန်ဆိုခြင်းကို ထောက်ခံပါသည်။a

“ဖခင်မရှိသောသား” သည် ယာ သောမ်၏ အဓိကပြန်ဆိုချက်ဖြစ်သော်လည်း မိဘမဲ့သောမိန်းကလေးများကို ဂရုမစိုက်ပါဟု အကြံပြုနေခြင်းဖြစ်သည်ဟူ၍ မယူဆသင့်ပါ။ ကိုးကားထားသောကျမ်းပိုဒ်များနှင့် အခြားကျမ်းချက်တို့က မုဆိုးမများဖြစ်သည့် အမျိုးသမီးများကို ဂရုစိုက်ရန် ဘုရားသခင့်လူမျိုး တိုက်တွန်းခံခဲ့ရကြောင်း ဖော်ပြပါသည်။ (ဆာလံ ၁၄၆:၉; ဟေရှာယ ၁:၁၇; ယေရမိ ၂၂:၃; ဇာခရိ ၇:၉၊ ၁၀; မာလခိ ၃:၅) ပညတ်တရားတွင် ဖခင်မရှိသော ဇလောဖဒ်သမီးများအား အမွေဥစ္စာပေးရန် တရားရေးရာဆုံးဖြတ်ချက်ကို ဘုရားသခင် မှတ်တမ်းတင်စေတော်မူခဲ့သည်။ ထပ်တူအခြေအနေမျိုးကို ထိုအတိုင်းပြုမူရန် စီရင်ချက်ချမှတ်ထားရာ ဖခင်မဲ့သမီးများ၏အခွင့်အရေးကို ထောက်ကူပါသည်။—တောလည်ရာ ၂၇:၁-၈။

ကလေးများကို ယေရှုကြင်နာမှုပြရာတွင် ကျား၊ မခွဲခြားမှု မရှိခဲ့ပါ။ ယင်းအစား ဤသို့ဖတ်ရှုရသည်– “ထိုအခါ သူငယ်တို့ကို လက်တော်နှင့်တို့စေခြင်းငှာ အထံတော်သို့ဆောင်ခဲ့သည်ဖြစ်၍ တပည့်တော်တို့သည် ဆောင်ခဲ့သောသူတို့ကို အပြစ်တင်ကြ၏။ ယေရှုသည် မြင်တော်မူလျှင် အမျက်တော်ထွက်၍ ‘ထိုသူငယ်တို့ကို ငါ့ထံသို့လာပါလေစေ။ မဆီးတားကြနှင့်။ ဘုရားသခင်၏နိုင်ငံတော်သည် ထိုသို့သောသူတို့၏နိုင်ငံဖြစ်၏။ ငါအမှန်ဆိုသည်ကား အကြင်သူသည် ဘုရားသခင်၏နိုင်ငံတော်ကို သူငယ်ကဲ့သို့မခံမယူ၊ ထိုသူသည် နိုင်ငံတော်သို့မဝင်ရ’ ဟုမိန့်တော်မူပြီးမှ သူငယ်တို့ကိုချီပိုက်၍ သူတို့အပေါ်မှာ လက်တော်ကိုတင်လျက် ကောင်းချီးပေးတော်မူ၏။”—မာကု ၁၀:၁၃-၁၆။

ဤတွင်ပြန်ဆိုသည့် “သူငယ်တို့” သည်နပုလ္လိင်ဖြစ်သည်။ နာမည်ကျော် ဂရိအဘိဓာန်တစ်ခုက ဤစကားလုံးသည် “ယောက်ျားကလေး၊ မိန်းမကလေးများအတွက် အသုံးပြု” ထားပါသည်။ ယောက်ျားကလေး၊ မိန်းကလေးများကို ယေဟောဝါပြခဲ့သော ထပ်တူစိတ်ဝင်စားမှုမျိုးကို ယေရှုတင်ပြခဲ့ပါသည်။ (ဟေဗြဲ ၁:၃; တရားဟောရာ ၁၆:၁၄; မာကု ၅:၃၅၊ ၃၈-၄၂ နှိုင်းယှဉ်။) ယင်းကြောင့် “ဖခင်မဲ့သားများ” ကိုဂရုစိုက်ရမည်ဟု ဟေဗြဲကျမ်းစာစောင်များပါ ဩဝါဒသည် မိဘမဲ့သောသားသမီးအားလုံးကို ကျွန်ုပ်တို့ဂရုစိုက်သင့်ကြောင်း ဆုံးမသြဝါဒပေးနေခြင်းဖြစ်သည်ဟု အသိအမှတ်ပြုသင့်ပါသည်။

[အောက်ခြေမှတ်ချက်များ]