သူတို့၏ ဘာသာမှန်ရှာပုံတော်

လူအချို့တို့သည် ကလေးဘဝကတည်းက ဘဝဆိုင်ရာမေးခွန်း၏ ကျေနပ်ဖွယ်ကောင်းသောအဖြေကို ရှာဖွေလာခဲ့ကြသည်။ သူတို့ငယ်ရွယ်စဉ်က ဘာသာရေးဝတ်ပြုပွဲများကို တက်ရောက်ခဲ့ကြပေမည်။ သို့သော် အဖြေလည်းမရ၊ ချာ့ချ်ဝတ်ပြုထုံးတမ်းများကလည်း ဘဝပြဿနာကို ရင်ဆိုင်ဖြေရှင်းနိုင်ရန် မှန်သည့်အကူအညီမပေးနိုင်ကြောင်း များစွာသောသူတို့တွေ့ရှိခဲ့ကြပြီ။

သူတို့သည် ဘာသာရေးဝတ်ပြုပွဲများကို တက်ခဲလှသော်လည်း မိမိတို့သည် မိဘများ၏ဘာသာဝင်ပင်ဖြစ်နေကြောင်း ပြောကြသည်။ ချာ့ချ်အော့ဖ်အင်္ဂလန်ဂိုဏ်း၏ ဂိုဏ်းအုပ်တစ်ပါး၏အဆိုအရ သူတို့၏ယုံကြည်မှုသည် အကြွင်းအကျန်သာဖြစ်သည်။ သူတို့သည် ဘာသာတရားကို မလှုပ်မရှားသေနေသည့်အဖြစ်တွင် ဘေးချိတ်ထားကြသည်။ အချို့တို့ကမူ ဘာသာရေးအသိုင်းအဝိုင်းတွင် တွေ့မြင်ရသော အရေခြုံဟန်ဆောင်မှုများကို ရွံမုန်းကြပြီး ဘာသာရေးကို လုံးလုံးငြင်းပယ်ကြသည်။ သို့သော် ဘဝနှင့်ပတ်သက်သည့်မေးခွန်းကား ရှိမြဲရှိနေသည်။

အဘယ်ကြောင့် လူအချို့ ကြီးမားသည့်သံသယရှိကြ

ချာ့ချ်များစွာတို့တွင် အိမ်ရာမဲ့သူများကိုကူညီရန်၊ ချို့တဲ့သူများကို အစားအစာဝေငှရန်၊ ဘာသာယဉ်ကျေးမှုတိုးတက်ရေးကို ကမကထလုပ်ဆောင်ရန် အသင်းအဖွဲ့များရှိကြကြောင်း လူအများစုသိကြသည်။ သို့သော် ခရစ်ယာန်မဟုတ်သူများတွင်သာမက ခရစ်ယာန်အမည်ခံသူများတွင်လည်း ဘာသာရေးအခြေပြုသည့် အကြမ်းဖက်မှုနှင့် သွေးထွက်သံယိုဖြစ်စေမှုများကို နေ့တိုင်းလိုလို သတင်းမှတ်တမ်းများတွင် သူတို့ကြားရကြသည်။ ထိုအကြမ်းဖက်မှုများတွင်ပါဝင်သည့် အဖွဲ့အစည်းများသည် မှန်သောဘာသာကိုကျင့်သုံးသည်ဆိုခြင်းကို သူတို့သံသယဖြစ်သည်ဆိုလျှင် အံ့ဩစရာလော။

ဘာသာရေးနောက်ခံရှိသူများစွာတို့က ချာ့ချ်များတည်ထောင်ပေးသည့် မိဘမဲ့ကလေးဂေဟာများသည် ကောင်းသည့်အရာများဖြစ်သည်ဟု ထင်ခဲ့ကြသည်။ သို့သော် မကြာမီနှစ်များက မိမိတို့ထိန်းသိမ်းစောင့်ရှောက်မှုအောက်ရှိ ကလေးများကို လိင်ဆိုင်ရာမတော်မလျော်ပြုကျင့်ခြင်းကြောင့် တရားစွဲခံရသော ဓမ္မဆရာများ နေရာအနှံ့ပေါ်ပေါက်လာသောကြောင့် သူတို့ထိတ်လန့်ကြရသည်။ ပထမတွင် ဓမ္မဆရာအနည်းငယ်သာ အပြစ်တင်စရာဖြစ်သည်ဟု သူတို့ယူမှတ်ကြသည်။ ယခုအခါ ထိုလူအချို့တို့က ချာ့ချ်ကိုယ်နှိုက်သည် အခြေခံကျကျမှားယွင်းနေရော့သလားဟု ထင်မြင်လာကြသည်။

အေဝူခေးနီးယားကဲ့သို့သော လူနည်းစုသည် တစ်ချိန်က မိမိတို့ဘာသာတွင် အလွန်တက်တက်ကြွကြွပါဝင်ခဲ့ကြသည်။ အာဂျင်တီးနားရှိလူငယ်တစ်ဦးအဖြစ် အပျိုစင်အီတာတီသခင်မကို သွားရောက်ဝတ်ပြုသည့်အဖွဲ့တွင် သူမပါဝင်ခဲ့သည်။ သူမသည် သီလရှင်ကျောင်းတွင် သီလရှင်အဖြစ် ၁၄ နှစ်ကြာနေခဲ့သည်။ ထို့နောက်တွင် သူမသည် တော်လှန်ရေးအားဖြင့် လူမှုရေးနှင့်စီးပွားရေးဆိုင်ရာ ရုတ်ခြည်းအမြစ်လှန်ပြောင်းလဲမှုကို ထောက်ခံအားပေးသည့် အပြည်ပြည်ဆိုင်ရာ ဘာသာရေးနှင့်နိုင်ငံရေး ပူးပေါင်းလုပ်ဆောင်သည့်အုပ်စုတွင် ပါဝင်လာသည်။ သူမတွေ့မြင်ကြုံကြိုက်ရသည့်အရာများကြောင့် သူမသည် ဘုရားသခင်ကိုယုံကြည်စိတ်ချမှု ပျောက်ကွယ်ခဲ့ရသည်။ မိမိယုံကြည်နိုင်သည့်ဘာသာတရားကို သူမရှာဖွေနေခဲ့ခြင်းလုံးဝမဟုတ်ပါ။ သူမလိုလားခဲ့သည်မှာ ဆင်းရဲသားများအား တရားမျှတမှုရစေနိုင်သည့် နည်းလမ်းတစ်ခု—မှန်ပါသည်၊ သူမ ယုံကြည်စိတ်ချနိုင်သည့်မိတ်ဆွေတစ်ဦးပါ ဖြစ်သည်။

အချို့တို့က ချာ့ချ်များတွင် ဖြစ်ပျက်နေသည့်အရာများကိုကြည့်ပြီး ချာ့ချ်များနှင့်ကင်းကင်းနေကြသည်။ သူ့အမြင်ကို ၁၉၉၁ ခုနှစ်ထုတ် ဂြိုဟ်တု မဂ္ဂဇင်းတွင် ဖော်ပြခံရသည့် ဘုရားမဲ့ဝါဒီတစ်ဦးက ဤသို့ပွင့်ပွင့်လင်းလင်းပြောထားသည်– “တိတ္ထိဆိုင်ရာနှင့် ခရစ်ယာန်ဆိုင်ရာဒဏ္ဍာရီတို့၏ ဂုဏ်အင်္ဂါရပ်များစပ်ကြားတွင် ထူးထူးခြားခြားကွာဟမှုရှိသည်ကို ကျွန်ုပ်မမြင်ပါ။” ရွှေချည်ထိုးထားသည့်ဝတ်ရုံကို ဝတ်ဆင်ထားကြသည့်ဓမ္မဆရာများက မော်စကိုမြို့လမ်းများတစ်လျှောက် ဆေးစိမ်ထားသည့်အလောင်းပါသော ကျောက်ခေါင်းတစ်လုံးကို ဖြည်းညင်းစွာလျှောက်၍ သယ်ဆောင်သည့်အစီအစဉ်ကို ဥပမာအဖြစ်သူထောက်ပြသည်။ ယင်းကား “ဩသဒေါက်စ်ခရစ်ယာန်သူတော်စင်တစ်ဦး” ၏ ရုပ်အလောင်းဖြစ်ပြီး ယင်းကို ပြတိုက်တစ်ခုမှ ဘုရားကျောင်းတစ်ခုသို့ သယ်ဆောင်သွားခြင်းဖြစ်ပြီး ယင်းက စာရေးသူအား ရှေးအီဂျစ်တို့၏ ဘာသာရေးခေါင်းဆောင်များနှင့် ဆေးစိမ်ရုပ်အလောင်းများကို ပြန်၍သတိရစေသည်။ မော်စကို ထိုလှည့်လည်သွားသည့်အစီအစဉ်၌ ပါဝင်သူတို့သည် “ခရစ်ယာန်သုံးပါးပေါင်းတစ်ဆူ” ကို ယုံကြည်သကဲ့သို့ အီဂျစ်လူမျိုးများသည်လည်း သုံးပါးပေါင်းတစ်ဆူဘုရား—အော်စီရစ်စ်၊ အိုက်စစ်စ်နှင့် ဟောရပ်စ် အား ဝတ်ပြုခဲ့ကြသည်ကို သူပြန်သတိရသည်။

ထိုစာရေးဆရာကပင် မေတ္တာနှင့်ဆိုင်သည့် ခရစ်ယာန်ခံယူချက်—“ဘုရားသခင်သည် ချစ်ခြင်းမေတ္တာဖြစ်တော်မူ၏” နှင့် “ကိုယ်နှင့်စပ်ဆိုင်သောသူကို ကိုယ်နှင့်အမျှချစ်လော့”—ကို တိတ္ထိအီဂျစ်များနှင့် မတူသောအရာအဖြစ် ဖော်ပြခဲ့သည်။ သို့သော် သူဤသို့သတိပြုမိသည်– “ခရစ်ယာန်လောကဟု အဆိုရှိသူများအသိုင်းအဝိုင်းတွင်ပင် ညီအစ်ကိုကဲ့သို့သောမေတ္တာသည် လောကကိုအောင်ပွဲခံရန် ပျက်ကွက်လျက်ရှိသည်။” ချာ့ချ်များသည် နိုင်ငံရေးကိစ္စများတွင် တစ်သမတ်တည်းပါဝင်ပတ်သက်မှုကြောင့် ဖြစ်ပေါ်လာသည့်ဆိုးကျိုးများကို သူဆက်ပြောသည်။ သူတွေ့မြင်ထားသည့်အရာများက ခရစ်ယာန်ဘောင်ချာ့ချ်များသည် သူရှာဖွေနေသည့်အရာကိုပေးသည်ဟု ယူဆရအောင် သူ့ကိုမလှုံ့ဆော်နိုင်ပါ။

ဆန့်ကျင်ဘက်အနေနှင့် အခြားသူတို့သည် ကျေနပ်ဖွယ်အဖြေကို ရှာတွေ့ကြသည်။ သို့သော် ခရစ်ယာန်ဘောင်ချာ့ချ်များထံမှ မဟုတ်ချေ။

သေခြင်းနှင့်ပတ်သက်သည့်အမှန်တရားကို သူမလေ့လာသိရှိခဲ့ရ

ယခုအသက် ၃၇ နှစ်ရှိပြီဖြစ်သော မာဂဒါလေးနာသည် ဘူလ်ဂေးရီးယားတွင် နေထိုင်သည်။ ၁၉၉၁ ခုနှစ်တွင် သူမ၏ယောက္ခမသေဆုံးသွားသောအခါ သူမအလွန်စိတ်ပျက်အားငယ်ခဲ့သည်။ ‘သေသူတွေ ဘယ်ကိုသွားသလဲ၊ ငါ့ယောက္ခမဘယ်မှာရောက်နေသလဲ’ ဟူသည့်မေးခွန်းများကို ထပ်ခါထပ်ခါ ကိုယ့်ကိုယ်ကိုမေးနေသည်။ သူမချာ့ချ်တက်သည်၊ အိမ်ရှိရုပ်ပုံရှေ့တွင် ဆုတောင်းသည်၊ သို့သော် မည်သည့်အဖြေကိုမျှမရပါ။

တစ်နေ့သောအခါ အိမ်နီးချင်းတစ်ဦးက သူ့ထံလာလည်ရန် သူမအားဖုန်းဆက်ခေါ်သည်။ ယေဟောဝါသက်သေများနှင့် ကျမ်းစာသင်နေသည့်လူငယ်တစ်ဦးသည် အိမ်နီးချင်းဖြစ်သူ၏အိမ်သို့ လည်ပတ်ရောက်ရှိနေသည်။ ထိုလူငယ်က ဘုရားသခင့်နိုင်ငံတော်နှင့် မြေကြီးကို လူသားများ ပျော်ရွှင်စွာ ထာဝစဉ်နေထိုင်နိုင်သည့် ပရဒိသုဖြစ်စေမည့် ကိုယ်တော့်ရည်ရွယ်ချက်များအကြောင်း ပြောဆိုသောအခါ သူမနားထောင်နေသည်။ စားပွဲပေါ်တွင် သင်သည် ကမ္ဘာ့ပရဒိသုအတွင်း ထာဝစဉ်အသက်ရှင်နိုင်သည် စာအုပ်ရှိသည်။ ယင်းစာအုပ်ကိုသုံး၍ လူငယ်က သူမအား “သေသောသူမူကား အဘယ်အရာကိုမျှမသိ” ဟုဖော်ပြထားသည့် ဒေသနာ ၉:၅ ကိုအာရုံစိုက်စေသည်။ ထိုညနေတွင် ထိုစာအုပ်ကို သူမထပ်ဖတ်ကြည့်သေးသည်။ သေသူများသည် အခြားဘဝဖြင့် ကောင်းကင် သို့မဟုတ် ငရဲသို့ မသွားပါ; သူတို့သည် ဘာကိုမျှမသိ၊ အိပ်ပျော်သောသူကဲ့သို့ဖြစ်ကြောင်း သူမသိရှိလာသည်။ ယေဟောဝါသက်သေများ၏ ဒေသန္တရအသင်းတော်တွင် အစည်းအဝေးများတက်ရန် ခေါ်ဖိတ်ခြင်းကို သူမဝမ်းမြောက်ဝမ်းသာလက်ခံခဲ့သည်။ အစည်းအဝေးပြီးသောအခါ မှန်မှန်ကျမ်းစာသင်ရန် သူမသဘောတူခဲ့သည်။ အစည်းအဝေးတွင် ဆုတောင်းခြင်းသည် ယေဟောဝါထံသို့ဖြစ်ကြောင်း သတိထားမိသောအခါ သူမလည်း မိမိ၌အရိုးစွဲနေသည့်အားနည်းချက်ကို အောင်မြင်နိုင်ရန် ယေဟောဝါထံ စတင်ဆုတောင်းသည်။ သူမ၏ဆုတောင်းချက်ပြည့်စုံသောအခါ မှန်သောဘာသာကိုမိမိတွေ့ရှိကြောင်း သူမသိလိုက်သည်။

အဓိပ္ပာယ်ရှိသည့်အသက်တာကို သူတို့တွေ့ရှိခဲ့ကြ

အန္ဒြေသည် ဘယ်လ်ဂျီယံနိုင်ငံရှိ အယူပြင်းထန်သော ကက်သလစ်အိမ်ထောင်တစ်ခုမှ ကြီးပြင်းလာပြီး ဒေသန္တရဓမ္မဆရာ၏အကူအဖြစ် အမှုထမ်းသည်။ သို့သော် ထိုအချိန်အတွင်း ချာ့ချ်အပေါ်သူ၏လေးစားမှုကို လှိုက်စားစေသည့်အရာများကို သူမြင်လာသည်။ ရလဒ်အနေနှင့် သူသည် အမည်ခံကက်သလစ်တစ်ဦးသာ ဖြစ်လာခဲ့သည်။

ကြေးစားဘောလုံးသမားအဖြစ် ၁၅ နှစ်ကြာသူကစားခဲ့သည်။ အီတလီနိုင်ငံတွင် သူ့အသင်းယှဉ်ပြိုင်ကစားစဉ် တစ်ခါက သူတို့အသင်းသည် ပုပ်၏ ခေါ်ဖိတ်ခြင်းကိုခံရသည်။ ထိုလည်ပတ်ခြင်းတွင် ဝိညာဉ်ရေးအရ တည်ဆောက်စရာတစ်ခုကိုမျှ သူမတွေ့ရဘဲ ပုပ်၏ပတ်လည်တွင် ခြံရံနေသော လောကီစည်းစိမ်ချမ်းသာများကသာ အန္ဒြေကို စိတ်အနှောင့်အယှက်ဖြစ်စေခဲ့သည်။ ချာ့ချ်အပေါ်သူ၏သံသယသည် ပိုမို၍အမြစ်စွဲလာသည်။ သူကိုယ်တိုင်၏အသက်တာသည် အိမ်ထောင်နှစ်ဆက်ပျက်ခဲ့သောကြောင့် ပျော်ရွှင်မှုဆိတ်သုဉ်းခဲ့ရသည်။ ကမ္ဘာ့အခြေအနေက သူ့ကို စိတ်ဓာတ်ကျစေသည်။ ၁၉၈၉ ခုနှစ်တွင် သူ့နေ့စဉ်မှတ်တမ်းစာအုပ်၌ ဤသို့ရေးသားခဲ့သည်– ‘ငါတို့ပတ်လည်မှာ ဖြစ်ပျက်နေတဲ့ စိတ်အနှောင့်အယှက်ဖြစ်စရာတွေဟာ ဘာအဓိပ္ပာယ်နဲ့ဖြစ်နေရတာလဲ။’ သူ့ဘာသာမှ မည်သည့်အဖြေမျှမရရှိခဲ့ချေ။

၁၉၉၀ ပြည့်နှစ်၊ အိုက်စလန်နိုင်ငံ၊ အီရပ်စ်မြို့တွင် အန္ဒြေသည် ဘောလုံးနည်းပြဆရာလုပ်နေစဉ် ယေဟောဝါသက်သေတို့၏ သာသနာပြုတစ်ဦးက သူ့ကိုအဆက်အသွယ်ပြုခဲ့သည်။ စာပေများကို သူလက်ခံပြီး ထိုသာသနာပြုပြန်လာရန် သူဖိတ်ခေါ်ခဲ့သည်။ သာသနာပြုက သူမ၏ခင်ပွန်းဖြစ်သူ ချဲလ်နှင့်အတူပြန်လည်ပတ်သည်။ နောက်ဆုံး အန္ဒြေနှင့် ကျကျနနထိုင်စကားပြောနိုင်သောအခါ သမ္မာကျမ်းစာကိုနားလည်ရန် သူအလွန့်အလွန်စိတ်ဝင်စားကြောင်း ထင်ရှားလာသည်။ သူ့ဇနီး အာစတာကလည်း သူနှင့်အတူစိတ်ဝင်စားမှုပြသည်။ သူ၏သင်တန်းပို့ချမှုအစီအစဉ်အတွင်း နေ့လည်ပိုင်းတွင် သုံးနာရီအချိန်ရသဖြင့် ကျမ်းစာလေ့လာရန် ထိုအချိန်ကိုအသုံးပြုဖို့ သူတို့ဆုံးဖြတ်လိုက်ကြသည်။ “အနားယူတာထက် ကျမ်းစာလေ့လာတာက ကျွန်တော့်ကို ပိုလန်းဆန်းစေတယ်” ဟုသူပြောသည်။ တဖြည်းဖြည်းနှင့် သူတို့မေးခွန်းများ၏အဖြေကို သမ္မာကျမ်းစာမှရလာကြသည်။ ယေဟောဝါနှင့် ကိုယ်တော့်နိုင်ငံတော်ကို တစ်စတစ်စနှင့် သူတို့ပို၍ယုံကြည်လာကြသည်။ “ဖြစ်ပျက်နေသည့် စိတ်အနှောင့်အယှက်ဖြစ်စရာများ” မရှိတော့သည့်ကမ္ဘာတစ်ခုဖြစ်သော ငြိမ်းချမ်းသည့်ကမ္ဘာသစ်နှင့်ပတ်သက်သည့် သမ္မာကျမ်းစာ၏ ဂုဏ်ကျက်သရေပြည့်ဝသော ကတိတော်များသည် သူတို့အတွက် ဖြစ်ရပ်မှန်ဖြစ်လာခဲ့သည်။ ယခုအခါ အန္ဒြေနှင့်အာစတာနှစ်ဦးလုံးတို့သည် မိမိတို့အသစ်တွေ့ရှိသောယုံကြည်ချက်ကို အခြားသူများအား ဝေငှနေကြသည်။

မာဂဒါလေးနာ၊ အန္ဒြေနှင့် အာစတာတို့သည် အဆုံးတွင် မှန်သောဘာသာကို မိမိတို့တွေ့ရှိခဲ့ကြကြောင်း ယုံကြည်စိတ်ချကြသည်။ အေဝူခေးနီးယားလည်း ကမ္ဘာ့ပြဿနာများကို နိုင်ငံရေးနည်းများဖြင့် ဖြေရှင်းရန်ကြိုးစားပြီး နောက်ဆုံးတွင် မှန်ကန်သည်ဟု သူမယူမှတ်သောဘာသာကို ယေဟောဝါသက်သေများတွင် တွေ့ခဲ့သည်။ သို့သော် ဘာသာတစ်ခုသည် မှန်မမှန် မည်သည့်အရာက အမှန်ဆုံးဖြတ်ပေးသနည်း။ ကျေးဇူးပြု၍ နောက်ဆောင်းပါးကို ကြည့်ပါ။

[စာမျက်နှာ ၇ ပါ ရုပ်ပုံ]

ယေဟောဝါသက်သေများနှင့် ကျမ်းစာမှန်မှန်လေ့လာခြင်းက ကျေနပ်လောက်သောအဖြေများရှာဖွေသည့် လူငါးသန်းကျော်ကို အကူအညီပေးနေ