သတ္တိရှိတဲ့ရှေ့ဆောင်

ဒုတိယကမ္ဘာစစ်အတွင်း အန်ဒရေ အီလီယက်စ်နဲ့ သူ့ဇနီး ဂျိုစဖင်းဟာ အနောက်ဂျာဗား၊ ဆူကာဘုမိမြို့မှာရှိတဲ့ ဂျပန်ကင်ပေတိုင် ရုံးချုပ်ကို ဆင့်ခေါ်ခံရတယ်။ အန်ဒရေကို အရင်ဆုံး စစ်မေးကြတယ်။ “ယေဟောဝါသက်သေတွေက ဘယ်သူတွေလဲ၊ မင်းက ဂျပန်အစိုးရကို ဆန့်ကျင်သူလား၊ သူလျှိုလား” စတဲ့မေးခွန်းတွေကို တရစပ်မေးတော့တာပဲ။

“ကျွန်တော်တို့က အနန္တတန်ခိုးရှင်ဘုရားရဲ့ ကျေးကျွန်တွေပါ။ ဘာအမှားတစ်ခုမှ မလုပ်ခဲ့ပါဘူး” လို့ အန်ဒရေပြန်ဖြေတော့ အရာရှိက နံရံမှာချိတ်ထားတဲ့ ဆာမူရိုင်းဓားကို ဆွဲယူလိုက်တယ်။

“အခု ငါ မင်းကို သတ်ပစ်လိုက်မယ်ဆိုရင်ကော” လို့ ဒေါသတကြီးပြောတယ်။ အန်ဒရေက အသေခံဖို့အသင့်ပဲဆိုတဲ့ ပုံစံမျိုးနဲ့ စားပွဲပေါ်မှာ ခေါင်းတင်ပေးလိုက်ပြီး တိတ်တိတ်လေး ဆုတောင်းလိုက်တယ်။ ခဏကြာတော့ ရယ်သံထွက်လာပြီး အရာရှိက “မင်း သတ္တိရှိသားပဲ” လို့ပြောတယ်။ ဒီနောက် သူ့ဇနီးကို စစ်မေးကြတယ်။ နှစ်ယောက်လုံးရဲ့ထွက်ဆိုချက်က အတူတူဖြစ်နေလို့ အရာရှိက “မင်းတို့ သူလျှိုတွေ မဟုတ်ဘူး။ ဒီကနေထွက်သွား” လို့ စိတ်ဆိုးဆိုးနဲ့ အော်ပြောတယ်။

လပေါင်းများစွာကြာပြီးနောက် အန်ဒရေဟာ ‘ညီအစ်ကိုအတုအယောင်တွေ’ ရဲ့ စွပ်စွဲတာကိုခံရပြီး ထောင်ချခံရတယ်။ (၂ ကော. ၁၁:၂၆) အကျဉ်းခန်းထဲက ရေမြောင်းမှာကျနေတဲ့ စားကြွင်းစားကျန်တွေ ကောက်စားပြီး လအတော်ကြာ အသက်ဆက်ခဲ့ရတယ်။ ဒါပေမဲ့ ထောင်မှူးတွေက သူ့သမာဓိကို မချိုးဖျက်နိုင်ခဲ့ဘူး။ သူ့ဇနီး ထောင်ဝင်စာလာတွေ့တဲ့အခါ သူက “စိတ်မပူပါနဲ့။ ငါ့ကို သတ်တာပဲဖြစ်ဖြစ်၊ မသတ်တာပဲဖြစ်ဖြစ် ငါကတော့ ယေဟောဝါကို ဆက်သစ္စာရှိသွားမယ်။ အသေသာခံလိုက်မယ်၊ သစ္စာဖောက်တော့ လုံးဝအဖြစ်မခံဘူး” လို့ သံတိုင်တွေကြားကနေ တိုးတိုးလေးပြောတယ်။

အန်ဒရေဟာ ထောင်ဒဏ်ခြောက်လကျခံပြီးနောက် ဂျကာတာမြို့က တရားရုံးချုပ်မှာ အယူခံဝင်ပြီး ထောင်ကနေလွတ်လာတယ်။

အနှစ် ၃၀ လောက်ကြာတော့ အင်ဒိုနီးရှားအစိုးရက ယေဟောဝါသက်သေတွေကို ထပ်ပိတ်ပင်လိုက်တယ်။ မြောက်ပိုင်းဆူလာဝေစီ၊ မာနာဒိုမြို့ရဲ့ ခရိုင်ရှေ့နေက အန်ဒရေကို သူ့ရုံးခန်းထဲခေါ်ပြီး “ယေဟောဝါသက်သေတွေကို ပိတ်ပင်ထားတယ်ဆိုတာ ခင်ဗျား သိတယ်မဟုတ်လား” လို့မေးတယ်။

“သိပါတယ်” လို့ ပြန်ဖြေတော့

“ဒါဆို ခင်ဗျား ဘာသာပြောင်းဖို့ အသင့်ဖြစ်ပြီလား” လို့မေးတယ်။

အန်ဒရေက ရှေ့တိုးသွားပြီး “ဒီမှာ၊ ကျွန်တော့်နှလုံးသားကို ခင်ဗျား ခွဲထုတ်သွားလို့ရတယ်၊ ဘာသာပြောင်းအောင်တော့ ဘယ်တော့မှ လုပ်လို့မရဘူး” လို့ ရင်ဘတ်ကိုထုပြပြီး အသံကျယ်ကျယ်နဲ့ ပြောလိုက်တယ်။

ခရိုင်ရှေ့နေလည်း အန်ဒရေကို ပြန်ခိုင်းလိုက်ပြီး နောက်ဘယ်တော့မှ ခေါ်မမေးတော့ဘူး။

အန်ဒရေဟာ ရှေ့ဆောင်လုပ်ငန်းမှာ အနှစ် ၆၀ လောက် ထက်ထက်သန်သန်ပါဝင်ခဲ့ပြီး ၂၀၀၀ ပြည့်နှစ်၊ သူ့အသက် ၈၅ နှစ်မှာ ကွယ်လွန်သွားတယ်။