ဂိလဒ်ကျောင်းဆင်းများ သတင်းကောင်းဖြန့်ဝေရန်စိတ်အားထက်သန်ကြ
“စဉ်းစားမိသမျှထဲမှာ အကောင်းဆုံးအရာပဲ။” ယင်းကား အန်ဒါစ်နှင့် အမေးလီယာဂရော့သ်တို့က မိမိတို့၏ သာသနာပြုသင်တန်းနှင့်ပတ်သက်၍ ယူမှတ်ပုံဖြစ်သည်။ သူတို့သည် ဂိလဒ်ကင်းမျှော်စင်ကျမ်းစာကျောင်း၏ ၉၇ ကြိမ်မြောက် သင်တန်းဆင်းသူပေါင်း ၄၈ ဦးတို့၏ ခံစားချက်များကို ဤသို့ထပ်ဆင့်၍တင်ပြကြသည်– “ဂိလဒ်သင်တန်းဟာ ကျွန်တော်ကျွန်မတို့ကို လှုံ့ဆော်မှုနဲ့ပြင်ဆင်မှုပေးတဲ့အတွက် ကျွန်တော်ကျွန်မတို့ဟာ ခန့်အပ်တဲ့နေရာသစ်တွေဆီသွားဖို့ စိတ်အားထက်သန်ကြတယ်။”
ကျောင်းဆင်းပွဲအစီအစဉ်တွင် ကျောင်းသားများက မှတ်ချက်စကားပြောကြသောအခါ ဤရွှင်လန်းမှုကို ကျွန်ုပ်တို့သိမြင်ခံစားနိုင်သည်; ၁၉၉၄ ခု၊ စက်တင်ဘာလ ၄ ရက်နေ့တွင် ယင်းအစီအစဉ်အတွက် လူပေါင်း ၆,၄၂၀ ယောက် စုရုံးရောက်ရှိနေခဲ့ကြသည်။
“အုပ်ချုပ်ရေးအဖွဲ့မှ သီယိုးဒိုဂျားရက်ဇ်က ‘ယေဟောဝါ၏သွန်သင်မှုကို ခံယူခြင်း’ ဆိုတဲ့ခေါင်းစဉ်နဲ့ ဟောပြောချက်ပေးပြီး အစီအစဉ်ကိုစတင်ပါတယ်။ ကျွန်တော်တို့ ဘယ်တော့မှမမေ့နိုင်တဲ့အချက်ကတော့ ညီအစ်ကိုဂျားရက်ဇ်က ‘ယေဟောဝါနဲ့နှိုင်းလိုက်ရင် ကျွန်တော်တို့ဟာ ပါမွှားလေးပဲဆိုတာကို အသိအမှတ်ပြုရမယ်’ လို့ပြောပြီး ယောဘအခန်းကြီး ၃၈ နဲ့ ၃၉ မှာ တွေ့ရတဲ့ အလွန်သြဇာပါလှတဲ့ သင်ခန်းစာနဲ့ ရှင်းပြခဲ့တာပါပဲ။ ဂိလဒ်ကျောင်းအားဖြင့် ကျွန်တော်တို့ ကျမ်းစာအသိပညာတွေ တိုးပွားခဲ့ပြီးဖြစ်ပေမဲ့ မေးခွန်းတိုင်းရဲ့အဖြေကိုတော့ ကျွန်တော်တို့သိကြမှာမဟုတ်ဖူး။ ဘုရားသခင်ရဲ့ နှုတ်ကပါဌ်တော်ကို ကျွန်တော်တို့ ဆက်လေ့လာရမယ်ဆိုတာကို ညီအစ်ကိုဂျားရက်ဇ်က ထောက်ပြခဲ့တယ်” ဟု ဒေးဗစ်အေဘယ်လ်နှင့် သူ၏ဇနီးကယ်လီတို့က ပြောပြသည်။
ခရစ္စတီယန်နှင့် အယ်န်ဂျလီကော်ဖီတို့က ဤသို့ပြောသည်– “‘ကောင်းမွန်သောအုတ်မြစ်၏ တန်ဖိုးကား အဘယ်နည်း’ ဆိုတဲ့ခေါင်းစဉ်နဲ့ မက်ခ်စ်လာစန်ရဲ့ဟောပြောချက်က ကျွန်တော်တို့ရဲ့စိတ်ကို စွဲမှတ်ထင်ကျန်စေခဲ့တယ်။ ငလျင်လှုပ်ရင်တောင်မှ တည်တံ့ခိုင်မြဲမှုရှိရလေအောင် မြေမာမှာ အုတ်မြစ်နက်နက်ချဖို့လိုတဲ့ အဆောက်အအုံတစ်ခုနဲ့ ကျွန်တော်တို့ကိုနှိုင်းတာ ကျွန်တော်တို့သဘောကျကြတယ်။ လုံ့လရှိရှိလေ့လာမှုပြုခြင်းအားဖြင့် ယေဟောဝါနဲ့ ပိုမိုအကျွမ်းဝင်တဲ့ဆက်ဆံရေးကို တိုးပွားစေနိုင်ပြီး ခက်ခဲတဲ့အချိန်တွေမှာ ကျွန်တော်တို့ မယိမ်းမယိုင်ရပ်တည်နိုင်ဖို့အတွက် ကျွန်တော်တို့ရဲ့ယုံကြည်ခြင်းကို နက်ရှိုင်းတဲ့အသိပညာပေါ်မှာ အခြေစိုက်နိုင်တယ်။”
“ကျောင်းရဲ့ဥက္ကဋ္ဌဖြစ်တဲ့ မီလ်တင်ဟင်ရှယ်လ်ရဲ့ ‘လယ်ကွင်းသည် ရိတ်သိမ်းရန်ဝင်းဝါနေပြီ’ ဆိုတဲ့ဟောပြောချက်ကို တော်တော်နဲ့မေ့နိုင်မှာမဟုတ်ဘူး။ အဓိကကျမ်းချက်ဖြစ်တဲ့ ယောဟန် ၄:၃၅-၃၈ က ရှေ့ကလုပ်သားတွေ ပျိုးကြဲခဲ့တဲ့လယ်ကွင်းထဲကို ရောက်လာတဲ့ ကျွန်တော်တို့ရဲ့ အခွင့်အရေးတွေကို အလေးပေးဖော်ပြသွားတယ်။ အဲဒါက အရေးတကြီးဖြစ်နေပြီ ဆိုတဲ့အသိစိတ်နဲ့ လုပ်ဆောင်ဖို့ ကျွန်တော်တို့ကို တွန်းအားပေးတယ်” ဟု ဂယ်ရီနှင့် လင်းအယ်လ်ဖာတို့က မှတ်ချက်ချကြသည်။ ယင်းအချက်နှင့် သဘောတူညီလျက် ဂျန်နှင့် စာပါဗေအာတိုလာတို့ကလည်း ဤသို့ဖော်ပြကြသည်– “ညီအစ်ကိုဟင်ရှယ်လ်က ဘောလ်တစ်ဒေသတွေက နောက်ဆုံးမှတ်တမ်းတွေကို ဖော်ပြပေးခြင်းအားဖြင့် ရိတ်သိမ်းခြင်းဆက်လုပ်ဖို့ ရှိနေသေးတယ်ဆိုတာနဲ့ပတ်သက်တဲ့ ကျွန်တော်တို့ရဲ့မျှော်မှန်းတမ်းတမှုကို တိုးပွားစေတယ်။ အက်စ်တိုးနီးယားမှာ ၅၁ ရာခိုင်နှုန်း၊ လက်ဗီးယားမှာ ၁၀၆ ရာခိုင်နှုန်း၊ လစ်သူယေးနီးယားမှာ ၅၁ ရာခိုင်နှုန်း တိုးတက်မှုရှိနေကြတယ်။ ဘယ်လောက်အားရဝမ်းသာစရာကောင်းသလဲ! အဲဒီမှာရှိတဲ့ညီအစ်ကိုတွေက နောက်ထပ်လုပ်သားတွေ ထပ်ပို့ပေးဖို့ သခင်ကိုတောင်းခံနေကြတယ်။ အထူးသဖြင့် အက်စ်တိုးနီးယားမှာ ကျွန်တော်တို့တာဝန်ခန့်အပ်ခံရ တယ်ဆိုတာကိုကြားရတဲ့အခါ ကျွန်တော်တို့အရမ်းပျော်မိတယ်!”
“ဂျိုးဝဲလ်အာဒမ်စ်က ‘ယေဟောဝါ၌ယုံစားလော့’ ဆိုတဲ့ခေါင်းစဉ်နဲ့ ဆက်ဟောပြောပါတယ်။ ယေဟောဝါကို တစ်ခါတလေယုံစားနိုင်ပြီး တစ်ခါတလေကျတော့ ကိုယ့်အတွေးအမြင်ကို အားထားနိုင်တယ်လို့ ဘယ်တော့မှမထင်သင့်ကြောင်း သူကအကြံပြုပါတယ်။ ကျွန်တော်တို့ရဲ့ ခန့်အပ်ခံဒေသမှာ စိန်ခေါ်မှုများစွာ—ကျန်းမာရေး၊ အစားအသောက်၊ ဘာသာစကား၊ ထုံးစံဓလေ့ စတဲ့အရာတွေကို ရင်ဆိုင်ကြရမယ်။ ဒါတွေအားလုံးအတွက် ယေဟောဝါကို ကျွန်တော်တို့ယုံစားဖို့လိုတယ်” ဟု ကယ်ဗင်းနှင့် အယ်ဗလင်းကော်တီနာတို့က ပြန်ပြောပြသည်။
ထို့နောက် အုပ်ချုပ်ရေးအဖွဲ့ဝင် ဂဲရစ်လွယ့်ရှ်က “ယေဟောဝါ၏ကရုဏာတော်ကို ဆက်၍ရောင်ပြန်ဟပ်လော့” ဟူသောခေါင်းစဉ်ဖြင့် ဆက်ဟောပြောသည်။ အယ်လယ်န်နှင့် အဲန်မရီးဂိုကာဗီတို့က ဤသို့ပြောသည်– “သာသနာပြုအချင်းချင်းနဲ့ ကျွန်တော်တို့သတင်းကောင်းဟောတဲ့သူတွေကို ကရုဏာပြဖို့ဟာ ခရစ်ယာန်ရင့်ကျက်မှုကို တိုင်းတာတဲ့အရာတစ်ခုဖြစ်တယ်ဆိုပြီး သူထောက်ပြသွားတယ်။ နိုင်ငံရပ်ခြားတာဝန်တွေမှာ အနစ်နာခံခြင်း ဒွန်တွဲပါလာတယ်။ ဒါပေမဲ့ ကရုဏာမပါလို့ကတော့ ကျွန်တော်တို့ရဲ့ အနစ်နာခံမှုက ဘာမှတန်ဖိုးရှိတော့မှာမဟုတ်ဘူးဆိုပြီး သူထောက်ပြသွားတယ်။” (မဿဲ ၉:၁၃) ပီတာနှင့် ဖလဲရ်ဟပ်စ်တန်တို့ကလည်း ဤသို့ထပ်ဖြည့်စွက်သေးသည်– “ကျွန်တော်တို့ရဲ့ ညီအစ်ကိုညီအစ်မတွေအပေါ်လည်း ကရုဏာထားသင့်တယ်။ သူတို့ကို မှန်ပြောင်းရဲ့ရှေ့မျက်နှာစွန်းဖက်ကနေ ကြည့်သလိုမျိုးကြည့်ရင် သူတို့ရဲ့အမှားတွေဟာ ကြီးလာမဲ့အစား သေးငယ်သွားမယ်လို့ ညီအစ်ကိုလွယ်ရှ်ကပြောခဲ့တယ်။”
မစ်ကီနှင့် ရှယ်ရီမင့်စကီးတို့ကလည်း “ကျွန်တော်တို့ရဲ့ ဂိလဒ်ကျောင်းသင်တန်းဆရာတစ်ဦးဖြစ်တဲ့ ဂျက်ခ်ရက်ဒ်ဖော့ဒ်က ‘ဆုံးမမှုကို သင်ခံနိုင်သလော’ ဆိုတဲ့ခေါင်းစဉ်နဲ့ ဆက်ဟောပြောသွားတယ်” ဟု ပြန်ပြောပြကြသည်။ “မာနက ဆုံးမမှုကိုလက်ခံဖို့ ခက်ခဲစေပြီး ကျွန်တော်တို့ဟာ သွန်သင်ချက်တွေကို သိပ်အနာအဆာရှာလွန်းရင် သွန်သင်ချက်ရဲ့ အကျိုးကျေးဇူးတွေကို ဆုံးရှုံးလိမ့်မယ်ဆိုပြီး သူထောက်ပြသွားတယ်။ အဲဒီနောက် ယေရမိမြည်တမ်းစကား ၃:၂၇-၃၁ ကိုအခြေပြုပြီး ဆုံးမမှုကိုလက်ခံနိုင်စေတဲ့ လက်တွေ့ကျအကြံဉာဏ်တချို့ကို ပေးခဲ့တယ်။” ချားလ်စ်နှင့် ဂျိုးအဲန်ဟဲလ်တို့ကလည်း ဤသို့ပါဝင်တင်ပြကြသည်– “အချိန်အများစုမှာ ကျွန်တော်တို့ဟာ ကိုယ့်ရဲ့အနာအဆာတွေကို မမြင်ကြဘူး။ ဒါကြောင့် ဆုံးမခြင်းဆိုတာ ကျွန်တော်တို့သတိမထားမိတဲ့အရာတွေကို မြင်ရအောင် ကျွန်တော်တို့မျက်စိကို ဖွင့်ပေးတဲ့နည်းတစ်ခုလို့ ယူမှတ်ရမယ်။ ယေဟောဝါထံတော်က ဆုံးမမှု သို့မဟုတ် သွန်သင်မှုဆိုတာ ကျွန်တော်တို့ကို ကိုယ်တော်ချစ်ကြောင်း အထောက်အထားပဲဖြစ်တယ်။”
ကဲနက်သ်နှင့် လစ္စဘက်သ်အာ့ဒ်ကားလ်တို့က ဤသို့ပြောပြကြသည်– “တခြားသင်တန်းဆရာတစ်ဦးဖြစ်တဲ့ ယူလီစက်စ်ဂလပ်စ်က ‘အသက်သို့ပို့ဆောင်သော လက်တွေ့ကျဉာဏ်ပညာကို ဆည်းပူးလော့’ ဆိုတဲ့ခေါင်းစဉ်နဲ့ ဟောပြောပါတယ်။ သူက ‘ခင်ဗျားတို့သိခဲ့ရတာတွေကို ဘာလုပ်ကြမလဲ’ လို့မေးပါတယ်။ အဲဒီနောက် နယပုံပြင်ကျမ်း ၃၀:၂၄-၂၆ ကိုအခြေပြုပြီး အဲဒီမှာပါတဲ့ ရှာဖန်ယုန် (ခွေးတူဝက်တူ၊ ကဘ) အကြောင်း၊ သူအသက်ရှင်သန်ဖို့ ယေဟောဝါဘယ်လိုပြင်ဆင်ထားပေးတဲ့အကြောင်း ဥပမာပေးရှင်းပြတယ်။ တစ်ဖက်ကကြည့်ရင် ကျွန်တော်တို့တွေဟာ ဗီဇအရ ဉာဏ်ပညာရှိတာ မဟုတ်တဲ့အတွက် ဉာဏ်ပညာကိုဆည်းပူးဖို့ ကြိုးစားအားထုတ်ဖို့လိုတယ်။ အဲဒါကိုလုပ်နိုင်ဖို့ လိုအပ်ရာအားလုံး ယေဟောဝါကျွန်တော်တို့ကို စီစဉ်ပေးထားတယ်။ ယေဟောဝါနဲ့ ကျွန်တော်တို့အချင်းချင်း မေတ္တာအားဖြင့် နီးနီးကပ်ကပ်နေသရွေ့ ကျွန်တော်တို့ အများကြီးအောင်မြင်မှုရကြမယ်။”
အဓိကဟောပြောချက်
“အုပ်ချုပ်ရေးအဖွဲ့ဝင် ညီအစ်ကိုကားလ် အက်ဖ်. ကလိန်းက ‘ရတနာထဲကရတနာတစ်ခု’ ဆိုတဲ့ သူ့ရဲ့ဟောပြောချက်မှာ ၁၉ ခုမြောက်ဆာလံအကြောင်းကို ကျွန်တော်တို့နဲ့ ရင်းရင်းနှီးနှီးဆင်ခြင်သုံးသပ်တယ်။ ဆာလံဆရာဒါဝိဒ်ရဲ့ ယေဟောဝါကို လှိုက်လှိုက်လှဲလှဲကျေးဇူးတင်မှု၊ ကိုယ်တော့်နှုတ်ကပါဌ်တော်ကို နှစ်သက်မှုတွေကို သူပေါ်လွင်စေခဲ့တယ်” ဟုဂျေးနှင့်ဂွဲန်အေဘရက်ဇင်းစကပ်စ်တို့က ဆိုသည်။ “ညီအစ်ကိုကလိန်းက အဲဒီဆာလံကို အပိုင်းသုံးပိုင်းပိုင်းလိုက်တယ်။ အပိုင်း ၁ (အခန်းငယ် ၁-၆) က ဘုရားသခင့်ဖန်ဆင်းရာတွေကို ဒါဝိဒ်ကျေးဇူးတင်လေးမြတ်မှုအကြောင်း၊ အပိုင်း ၂ (အခန်းငယ် ၇-၁၀) က ဘုရားသခင့်ပညတ်တော်တွေအပေါ် သူ့ရဲ့လေးမြတ်မှုအကြောင်း၊ အပိုင်း ၃ (အခန်းငယ် ၁၁-၁၄) ကတော့ ကျွန်တော်တို့လည်း ဒါဝိဒ်လိုပဲ ဘုရားသခင်နဲ့ ကောင်းတဲ့ဆက်ဆံရေးရှိလိုသင့်ကြောင်းတွေကို ဖော်ပြသွားတယ်” ဟု ကိသ်နှင့် ဒေါ်နာဟောန်ဘက်ခ်တို့က မှတ်ချက်ချကြသည်။
“မကောင်းမှုကိုရှောင်ချင်ရင် ယေဟောဝါကိုကြောက်ရွံ့ဖို့လိုအပ်တယ် ဆိုတဲ့အချက်ကို ကျွန်တော်တို့သဘောကျကြတယ်။ အဲဒါက ကိုယ်တော့်ရှေ့မှာ စင်ကြယ်တဲ့အရာတွေကို လုပ်ဖို့ဖြစ်စေတယ်” ဟု ဒေးဗစ်နှင့် ရေလီးန်လော်န်တို့က ပြောပြသည်။ ဖရန့်ခ်နှင့် ဗစ်ဗက်ကီမက်ဒ်စဲန်တို့က ယင်းကိုသဘောတူထောက်ခံကြသည်။ “ယေဟောဝါရဲ့ သတိပေးချက်တွေ၊ ပညတ်တော်တွေ၊ အမိန့်တော်တွေ ဘယ်လိုအကျိုးဖြစ်ထွန်းစေသလဲဆိုတဲ့ ညီအစ်ကိုကလိန်းရဲ့မှတ်ချက်တွေက ဂိလဒ်ကျောင်းမှာ ကျွန်တော်တို့သင်ခဲ့ရတာတွေကို ကောင်းကောင်းအကျဉ်းချုံးဖော်ပြပေးတယ်။ အနာဂတ်မှာ ဘုရားသခင့်နှုတ်ကပါဌ်တော်ကို လိုက်လျှောက်ပြီး ဘဏ္ဍာတိုက်လိုသဘောထားဖို့ ကျွန်တော်တို့ကို ပိုပြီးတော့စိတ်ပိုင်းဖြတ်မှုဖြစ်စေတယ်” ဟု သူတို့ပြောခဲ့ကြသည်။
အဓိကဟောပြောချက်ပြီးနောက်တွင် ကျောင်းသားများသည် သူတို့၏အောင်လက်မှတ်များ လက်ခံရရှိကြပြီး သူတို့တာဝန်ကျရာဒေသများကို ကြေညာပေးသည်။ အဆာပြေစားသောက်ရန် ခေတ္တအားလပ်ချိန်အပြီးတွင် အားလုံးတို့သည် မွန်းလွဲပိုင်းအစီအစဉ်တွင် ပြန်လည်စုဝေးကြသည်။ ကျောင်းဆင်းများက အကျဉ်းချုံး ကင်းမျှော်စင် သင်တန်းတွင် မေးသောမေးခွန်းများကို ပါဝင်ဖြေဆိုကြသည်။
“အဲဒီနောက် ‘မြေကြီးတစ်ခွင်လုံးတွင် ဘုရားနိုင်ငံတော်ကြွေးကြော်သူများဖြစ်အောင် လေ့ကျင့်ခံထားရ’ ဆိုတဲ့ ကျောင်းသားအစီအစဉ်ရောက်လာတယ်။ အစီအစဉ်ရဲ့ ပထမအပိုင်းမှာ ကျွန်တော်တို့ရဲ့ သင်တန်းကာလ ငါးလအတွင်း ကျောင်းသားတွေရဲ့ လယ်ကွင်းတွေ့ကြုံမှုအကြောင်းပါပဲ။ အဲဒါက ကျွန်တော်တို့ရဲ့ သာသနာပြုလုပ်ငန်းမှာ မေးခွန်းတွေကို ကျွမ်းကျွမ်းကျင်ကျင်အသုံးပြုခြင်းကို အသားပေးထားပါတယ်။ ခေါ်တွေ့မေးမြန်းခြင်းအပိုင်းကတော့ သာသနာပြုဘဝမှာ တွေ့ကြုံရမဲ့ စိန်ခေါ်မှုတွေနဲ့ အခြေအနေအပြောင်းအလဲတွေကို အပြုသဘောနဲ့ ရင်ဆိုင်နိုင်တဲ့နည်းလမ်းတွေကို ဖော်ပြပေးတယ်။ ကော့စတာရီကာ၊ အိန္ဒိယနဲ့ မာလာဝီနိုင်ငံတွေအကြောင်း ရုပ်သေအစီအစဉ်သုံးခုက ယေဟောဝါရဲ့ ကမ္ဘာချီအဖွဲ့အစည်းကို တစေ့တစောင်းတွေ့မြင်စေတယ်” ဟု ဘော့ဘ်နှင့် ရှန်နွန်လာကာတို့စ်တို့က ပြန်ပြောပြသည်။
တစ်ဆက်တည်းလာတဲ့ လောကီမဆန်ဘဲ သီအိုကရက်တစ်ဖြစ်ပါ ဆိုတဲ့ပြဇာတ်က လောကဆန်ပြီး အထိန်းအကွပ်မဲ့သဘောထားရှိတဲ့ တချို့ဆွေမျိုးသားချင်းတွေက ဖြစ်ပေါ်စေနိုင်တဲ့ မကောင်းတဲ့သြဇာကို သရုပ်ဖော်ပြတယ်” ဟု ဂျက်စီနှင့် မစ်ချယ်လ်ဒန်ကယ်န်တို့က မှတ်ချက်ချကြသည်။ “အဲဒါက သီအိုကရေစီလမ်းညွှန်မှုနဲ့ ညွှန်ကြားချက်တွေဟာ လိုအပ်တယ်၊ အကျိုးပြုတယ်ဆိုတာ ခရစ်ယာန်များ အသိအမှတ်ပြုရမယ်လို့တင်ပြတယ်” ဟု ဝယ်န်ဇလ်နှင့် ကယ်လီကိုလာတို့က ဆက်ပြောသည်။
နောက်ဆုံးသီချင်းနှင့် ဆုတောင်းခြင်းတို့က နှစ်လိုဖွယ်အစီအစဉ်ကို နိဂုံးချုပ်ပေးသည်။ ကျောင်းဆင်းများသည် မိမိတို့ခန့်အပ်ခံရသည့် နိုင်ငံပေါင်း ၁၈ နိုင်ငံသို့သွားရန် မျှော်လင့်စောင့်စားရင်း ထွက်ခွာသွားကြစဉ် တော်မီနှင့် ဂျေးလ်ကာအိုကိုတို့၏ ဤနှုတ်ဆက်မှတ်တမ်းကလေးက သူတို့၏အတွေးအမြင်ကို ထုတ်ဖော်ပြသသည်– “ကျွန်တော်တို့တစ်တွေဟာ ခန့်အပ်ခံရတဲ့ဒေသတွေကို သွားရောက်ပြီး လေ့လာခဲ့ရတာတွေကို လက်တွေ့သုံးဖို့ သိပ်ပြီးစိတ်အားထက်သန်နေကြတယ်။ ကျွန်တော်တို့ အများကြီးလက်ခံရယူခဲ့ပြီးပြီ—ခု ကျွန်တော်တို့ပြန်ပေးဖို့အလှည့်ပဲ။”
[စာမျက်နှာ ၂၆ ပါ ရုပ်ပုံ]
ဂိလဒ် ကင်းမျှော်စင် သမ္မာကျမ်းစာကျောင်း၏ ၉၇ ကြိမ်မြောက် သင်တန်း
အောက်ပါစာရင်းတွင် အတန်းများကို ရှေ့တန်းမှ နောက်တန်းသို့ ရေတွက်ပြီး အမည်များကို လက်ဝဲမှလက်ယာဘက်သို့ စီထားသည်။
(1) Hong, J.; Hong, D.; Groth, A.; Cortina, E.; Lakatos, S.; Hornback, D.; Acevedo, L.; Coffy, A. (2) Elfers, L.; Gokave, A.; Ardkäll, L.; Abraczinskas, G.; Knott, K.; Lizer, T.; Abel, K.; Abel, D. (3) Duncan, M.: Gokavi, A.;Held, J.; Hupston, F.; Lakatos, B.; Long, R.; Minsky, S.; Acevedo, E. (4) Ardkäll, K.; Kauko, J.; Vaahtola, S.; Cortina, K.; Carson, N.; Minsky, M.; Lizer, G.; Koula, K. (5) Duncan, J.; Abraczinskas, J.; Vaahtola, J.; Madsen, F.; Madsen, V.; Long, D.; Carson, C.; Elfers, G. (6) Kauko, T.; Hupston, P.; Held, C.; Groth, A.; Hornback, K.; Koula, W.; Knott, D.; Coffy, C.